2009 年 9 月 13 日 星期日 【炎熱】

雙重損失..既失錢又刮花了感情..!!


收到銀行信，渣打個戶口原來一直扣緊我錢，
我竟然今時今日先知，其實最衰都係果D電話
推銷，好幾年前我買左一份唔知咩保險，即係
果D斷手斷腳死埋人先有得賠果D，當年我因為
怕煩又本住有地都係搵食啫的心態，就咁就買
左一份保險，每月唔知扣六十幾定八十蚊，其實
我戶口一向都係有錢放響度，早幾年仲係做兼職
、裝修等等，所有人工都係入去呢個戶口，總之
最後戶口係有唔多過二萬蚊左右，而保險就一直
用渣打戶口扣數，好喇...一路扣...扣到戶口少過
一萬蚊，跟住渣打又因為我戶口少過一萬而又扣
錢，即係兩邊一齊扣，銀行又扣我錢，保險又比錢
，一直扣到我戶口冇錢........!!!係無哂錢，得返廿幾
蚊..!!!銀行果D職員打比我，先話我知發生咩事，嘩
.........有如晴天霹靂...我大拿拿兩萬比你地班粉腸陰
乾，點解冇人話我知要扣錢..???同佢鬧交咁滯，我都
知一定攞唔返D錢，所以一怒之下..Cut左呢份保險再
Cut埋個戶口，嬲到連渣打張提款咭都剪爛埋...!!真的
很想喊呢.....萬幾兩萬蚊就咁唔見左，有冇人可以話我
知...我其實係發緊夢呀..?但打打自己..痛架...很真實，
直到晚上直到而家都訓唔著，深深不忿又心痛又激氣，
突然我覺得自己嬲哂全世界D人咁，但我又可以如何丫，
自己平時D信又唔睇清楚，以為冇用開呢個戶口就唔使
理佢，雖然都明白自己疏忽，但真的好痛好痛，呢個係
我暫時呢人生中最貴的教訓，打破我上次撞車賠萬五的
紀錄...!!今日...真的好耐好耐好耐都無發過咁大脾氣，發
生事情後我仲很大講對女友喝叫"唔好嘈我煩我"....唉..!!!

我竟然向自己女友發脾氣，原來我EQ真係咁低，今日的
所作所為，我知已經嚇親了她，但覆水難收，說過的確確
實實係無可收回，雖然事後向她道歉，但我知她一定會記
得我今日做的事說的話，唉.....點解自己會咁白痴咁低EQ
，竟然向她發脾氣都有..??都唔關佢事又!!我出咁大聲仲咩.!!
雖然事後..Sorry、對唔住、道歉的話都講過哂，女友雖說
唔緊要...我明白....!!!但心中是否介意，我不知道，但將心比
己，我係佢...我一定會唔多唔少都會有點點介意囉.............!!


現在..怎算好...??

>>September 13, 2009 at 3:59:52 AM GMT+8

2009 年 9 月 12 日 星期六 【晴】

子夜涼茶

而家係凌晨三點三.....

雖然明日係放假，但都唔知點解無端端未訓，走左去
煲五花茶，可能就係為了妳的一句..『好熱氣呀』，其
實大家都是要返工，工作是對等的，妳辛苦時我也辛
苦，為何每次都是妳做呢D家頭細務呢..?這個家..我也有
份住，但家務比例八二分帳咁，妳八我二!!!有時候諗，
以前妳都冇病得咁密，都不會因少少事而病一輪，是不
是我太倚賴的關係呢....?唉.....問心...自己真的很懶...!!!!!

希望呢煲五花茶...妳會啱飲啦...已經加多左冰糖，很甜...
不會是妳怕怕的苦茶....

>>September 12, 2009 at 3:19:32 AM GMT+8

2009 年 9 月 11 日 星期五 【炎熱】

這一天...


放工同女友一齊去超市入貨，一入就入左八百幾蚊，當然
啦..一個月幾貨喎，有返咁上下，其實貴係貴在D日用品，
其次係D零食，最後係我地入得最多最多既水貨，汽水、果
汁、沖劑、少少啤酒，仲有唔少得係貓糧，好耐都冇買過
肥貓既糧喇，平日都係女友攪掂既，所以佢而家只係埋女友
身，當我死既...!!!呢D咪係客家佔地主囉.....!

天氣熱到溶呢排，今日好少少，但冷氣機都係日開夜又開，
我一直都遺忘左個隔塵網，原來我一直都冇洗到個隔塵網，
今日開冷氣時，冷氣係運行緊，但係冇風出，奇怪去睇睇
發生咩事，一睇之下架冷氣機內既銅片銅喉已經結哂冰，而
塊隔塵網就污槽到不得之了，而細看下有好多都係好似係貓
毛，卒之攪左一大輪，同女友又拆又洗，又要等溶雪，呢一
個鐘真係難捱，洗好之後，部機就凍左好多喇，不過......唔
知係唔係今日拆機，整到間屋大塵左，女友係咁打噴嚏...!!!
以前我家中因為嫌冷氣原裝隔塵網不夠隔塵，所以會自己再
買塊3M隔塵網剪Fit個Size加上去隔多一層，而且一個月後你
有不得不佩服塊隔塵網，真係隔到好多好多好多小塵粒，所
以今日我都買左剪上去用，返工返左半天攪左冷氣又攪左粒幾
鐘，又出去超市，今日就係咁....平平凡凡過左喇....!

回家時買了少少禮物給女友，希望會開心返啦，唔開心的事
不要記喇...

>>September 11, 2009 at 8:17:17 PM GMT+8

2009 年 9 月 10 日 星期四 【寒冷】

女友不愉快的遭遇



女友放工返來，沿途無咩說話講，同平時吱吱
喳喳係咁講野既佢完全唔同，開初仲以為感冒
未清先會咁，但望望她臉氣色又唔係好似，唔
似有病在身，女仔始終喜歡有人關心下佢，所
以我都主動問下女友.....，妳有什麼唔妥呀...???
點知佢都係唔想講咁，但我又真係好想知發生咩
事..??因為女友真係同平時好唔同，最後我問多幾
次之後，女友面色一變，眼角開始滲出眼淚出來，
很久都冇發生呢D事情喇，一時間我又以為做錯什
麼，問到是否我有什麼激嬲妳呀...?只見她低著不
斷搖頭，最終女友都向我講出發生什麼事，聽了雖
然我很氣憤...但這刻的我又可以做到什麼呢，我什
麼都做不到，只能細聽她哭著地將事情和盤托出，
的確事情令到她情緒受到很大刺激，始終我都無咩
方法幫到佢，我只能事後陪伴她多一點，關心她多
D，唉.....希望女友可以快D忘記不開心的事情，做回
平日開開心心，愛笑愛睡的她啦，現在的她連睡都
睡得不好，返來一直都冇好好地休息過，比著平時的
她，一放工就會抱頭大睡，點會好似而家咁...!!見到她
不開心憔悴的樣子，真的叫人心痛呀.....!!

>>September 10, 2009 at 11:00:14 PM GMT+8

2009 年 9 月 9 日 星期三 【酷熱】

好朋友返港.....Janme



舊同學janme今日由美國返香港，我先頭見到個來電都唔知
係邊位，真係有諗過唔接，不過我始終都接左，一聽之下
，喂...估下我係邊個..??一時間記唔到，我答唔知呀，你係
邊個呀..?最後佢先開估，哦......Janme..!!我仲以為妳仲響果
邊梳乎係添，咩事要妳返香港呢..??原來係帶個BB返來比
香港既親朋戚友見下，真係巴閉囉，過幾天就約返D同學
出來聚聚，有點難度呀，兩星期內要約到人，真係未必個
個得，講到尾有部份人已經有自己家庭同仔女，唔係自由
身，之不過..如果用"難得妳由咁遠返來"做大前題，我諗都
會有多D人出席既....，要做攪手都唔係易事呀，點解次次都
係我，我D人際關係唔係太好乍噃..!!!Ok啦....為左妳我盡力吧....

今日我搭巴士回家時候，發生左D好技術性既野，個巴士司機
好勁，事情係條單程路因為要維修關係，將一條本身已經窄小
既馬路，仲要改為單線雙程行車，當時馬路仲係放置左臨時交
通燈，呢個時候我架巴士同對面架巴士迎頭相遇，其實第一時
間我見到已經係好難先會過到，因為太過窄，跟本係夾硬來，
到車身對車身時候，車身與車身大家相距不足一吋，就連自己
都會驚佢會刷到我架巴士車身，最後兩架巴士都慢慢吞吞咁郁
下郁下咁，直到完全過哂架巴士先加速，諗起正話既畫面，我
直頭感覺到我掂到隔離部巴士咁，好貼好貼，真係替個司機緊
張，我仲諗如果撞到咁點算呢...???最後都冇事，司機既眼界技
術真係太好，全車都差點就要拍手掌，因為車上每一個乘客都
望住佢點過呢條路，包括八掛的我，哈哈......

女友今晚返左工喇，明天先會來，臨行前女友不停咁打噴嚏，
身體好似又唔多妥喇，我最後都買左一D成藥比佢跟身，臨行
前佢食左兩粒，又怕她唔飽肚食會胃痛，我又去便利店撲左兩
個美心軟蛋糕比佢，又買多一次蘋果汁比佢，聽醫生講，有病
時想食生果，蘋果係最好選擇，好似阿媽湊女咁，一個袋內有
齊藥、麵包、果汁咁比佢出發，不知道而家佢仲有冇事呢...??我
望就望D藥對佢有效啦，講到底一個人去返工又有病，我係絶對
唔會放心架，如果明天接她時都係咁，我就捉佢睇醫生吧.....!!!!
係架...真係要捉架，如果唔係又會扭計唔去，我不會再上當架喇...

>>September 9, 2009 at 11:34:23 PM GMT+8

2009 年 9 月 8 日 星期二 【酷熱】

求婚的方法


今日同俊哥去左飲野，好耐都冇去過清吧喇，真係好舒服
，不過價錢就貴左一點，一大杯啤酒要125蚊，雖然話係靚
既外國入口啤酒，其實飲落口都係差不多，我真係分唔出何
謂麥啤，但算啦.....以環境、氣氛、質素來說，幾百蚊都係值
得既，而且仲有好多靚女白領入來幫襯，可以話係視覺享受，
咁當然啦.....始終都係自己女友比較好啦，呢一點不用多講..!!!
其實自己早幾年真係好鐘意落酒吧飲，一來貪佢個暗黑氣氛，
再加上一D勁歌，玩骰盅、猜15、20、間中仲有啤酒妹來陪你
飲一兩杯，當時的我真係覺得果度係人間天堂，但而家叫我去
我反而覺得佢嘈，可能人老左受不到呢D氣氛，況且玩都冇以前
玩得咁癲，而家我地已經冇左劈酒呢支歌仔唱，圍埋一齊都真係
純粹傾計...慢慢飲，所以我先話，家下既清吧既環境先係我選擇，
真係太棒喇，去完都想去多次，下次我諗我會帶女友一齊去，拍
拖又多一個好地方喇...!

另外今日確定左一件事，就係有兩位同事將會結婚，眼見同我年
紀的朋友都一個一個咁有自己家庭，有時諗..女友都講得啱，係時
候要談婚論嫁喇，再不能停留在談情說愛的階段，其實每一次女友
經過婚紗店都會停一停步睇睇，我見到女友的眼神真係好想穿嫁衣
，唔知係唔係真呢，女仔對呢方面真係好有期望，曾經女友向我建
議個婚禮係點攪，女友仲要仲要一定一定咁話，我要買整套婚紗，
擁有它，而每次見女友講到呢D，都會不覺流露一種好甜的感覺，不
是說笑，如果你在我女友旁邊，你都會感覺到，唔止係咁，而家每次
經過一D珠寶首飾店時，一樣都係停步，不斷去望，指住櫥窗的介指
講，呢對好靚、呢對好呀、呢對好閃呀、我鐘意呢對呀，最頂癮佢會
問你，咁你覺得好唔好呀...??妳叫我點答呢...??難道我要講唔好嗎..??
不過平心而論，女友睇中果D我都好鐘意既，但係個價錢就.....!!!!女友
呀，你等我儲多幾個錢先啦，總之應承妳啦，我一定會娶妳啊，放千
萬個心啦，講下講下女友又會問我，妳會點同我求婚呀...?我問妳反正
都係嫁比我架啦，唔使求啦可以，點知女友話，唔得呀，一定要求呀
，仲叫我諗得好特別D既方法去求，仲講到明....我跪地咁求都冇用呀，
唔收貨唔應承呀一定，唉.........我對呢方面真係白痴，大家有冇方法推
介我呀，有咩方法會打動女友的心，願意和甘心地下嫁比我呀..?我的
一生中，只容許一次求婚，只許勝不許敗呀，唉....都未求婚已經有咁
大壓力喇，真係到我要求時，我真係可能血壓直線上升，全身冒汗，
嚴重的可能緊張到暈低架..!!你地叫我點算好呢...??來吧......所有我的女
性朋友們，係妳地出馬出手的時候喇，快D每人比一個求婚方法比我
啦，為了我的下半生的幸福，快D去MSN或者E-mail方法比我啦，不是
講笑呀，女仔心中最感動的求婚境況係點架...??係唔係好似電視劇咁，
要播比全香港人知，話我求妳嫁比我呀..??而且我仲係好想知道，係唔
係有越多人睇到我求婚，女仔就會開心D...?又係唔係要拋棄男人的尊嚴，
要當眾做出D動作，女仔先會覺得有誠意呢..???快D比建議比我啦，我一
定會感激你架...!!

>>September 9, 2009 at 2:43:28 AM GMT+8

2009 年 9 月 7 日 星期一 【酷熱】

玩野話當年



唔知有冇同人講過，其實應該我有同某D人講過既
，當笑話聽吧，其實點解我會諗返起呢個笑話呢..?
就係因為今日搭港鐵接駁巴士時發生D事而令我
諗起既，話說今日有個阿伯坐巴士入錢上車時，
搏大霧入少錢，其實響呢個年頭已經好少有呢D
事發生，因為大家都係用八達通，而家驚反而係
佢會扣多我錢吧，但今日...阿伯入大餅，咁當然啦
，司機發現左，叫阿伯入返足，點知阿伯話...我冇
錢喇，咁司機可能見佢有咁上下年紀....最後都話下
次入返足喇，事件告一段落，今次係因為司機好人
先會咁啦，但早幾十幾年呢，仲唔係八達通時代，
入大餅係搭巴士一定要做既事，我果時家中個兜兜
永遠都會有幾百蚊大餅，預比搭車用，咁同時果一
個年頭"搏大霧"入少一兩蚊都好慣常，唔厄巴士公司
果個一定係有點智障啦.......，而我果陣都會間中入少，
但我唔會特登比少，真係冇散銀我都會用四拾五入計
，而最令我放心"搏大霧"的原因係，我有個親戚響九
巴做司機，佢同我話上頭有指引係司機唔可以同乘客
鬧數帳，但呢條指引同時都冇公開比乘客知，因為同
時都要方便司機"凶一凶"個客，等個客入啱錢，總之
巴士司機唔可以咬定乘客入少錢，而香港社會都算自
律，有九成半人都會有比多唔入少，所以司機同乘客
好少好少有鬧數帳新聞。不過......早十幾年..即係又係
我好鬼貪玩既年紀啦，我同個朋友搭巴士，唔怕講埋
喇...係C4其中一人呀，心照係邊過啦，最賴皮果個呀，
有一日坐269C，當年架車係仲經元朗區，我同佢由牛
頭角上車，果時係D放工後少少既時間，約八九點咁啦...
唔係好記得，我地有車到就上車，我上先佢上後，點
知入完錢後，巴士佬話我朋友入少錢，其實我知巴士佬
係冇睇錯，佢真係入少左，但我朋友就開始玩野喇，又
話係你巴士錢箱食我錢呀....!!又話要停車驗箱點錢呀，攪
左好一會兒，我就響身邊睇佢戲，人就越排越多，車上同
等車的都開始鼓譟，巴士佬最後屈服，巴士到站後，我朋
友車未停定已經一支箭衝去下層巴士司機位置旁，等開門
落車，車停定我朋友落最後果個，不過佢臨落車向左個司
機講...."係呀.....你吹咩....我係入少錢呀....!!"之後再飛落車，
我當然都怕比人點相一齊跳車啦....!!!而事後巴士佬有冇噴
血我就唔知喇，不過呢.......我果排搭車都怕比人點相，最
恐怖係自己認唔出個司機嘛，萬一我又上返佢車，佢又認
得我咪PK...!!最後當然都無事啦，但呢件事就成為笑話，其
實細個真係咩都唔識死，咩都夠膽死...!!!唉.......，咁而家搭車
我一定比有多冇少啦，有多當比巴士公司執藥囉，一個幾毫
咪煩我咁多呀，一陣比少......佢半路叫我落車仲樣衰呀....!!!

不過呢D小時候趣事，間中記下講下自己都會笑，仲會諗，點
解以前咁多做得出，點解唔諗下......大叫入多兩毫比你公司執藥
呀...!!!咁咪仲型....!!!哈哈.........!!其實仲有好多呢D趣事，有機會
講過我暫時呢一人生中最最最最最比人白眼既一次，真係真係
果刻想打死果個人佢，到而家佢講果一句話我仲好記得清楚，講
開咁講...我都幾記仇架喎....哈哈哈!!

>>September 8, 2009 at 1:55:05 AM GMT+8

2009 年 9 月 6 日 星期日 【清涼】

從沒有『滾』



剛才落左去同女友食飯，去到邊都咁多人，真係好鬼討厭
，諗住去飲茶點知多人到連等都費事，去餐廳食又係咁，
人人都話香港經濟差，邊度係呀...??個個人消費力都咁強，
或者香港對食呢方面，唔會點虧待自己，辛苦搵來自在食，
早十年左右我都會好捨得食呢方面，個個星期都會睇下飲食
男女，睇下邊度有野好食，最折墮時我同我個朋友可以五百幾
蚊食個早餐，成千蚊去酒店食晏，三百幾蚊食個Tea....，夜晚
我記得有次兩個人食左四千幾蚊，而家諗返就真係好折墮呀，
但果時又唔使咁大開支，又冇女友又唔使點比家用，最主要果
陣我搵得到，果時同個朋友去做左兩三年裝修，成三百五蚊一
日，日日有工開，仲成日有OT錢，間中個工程急的話，老板仲
會比雙工錢，即係果陣你只要肯捱肯做，一個月萬三四真係冇
咩問題，試想下十年前喎有萬幾蚊收入喎，加上果陣又細，正
正式式死o靚仔一 名，用錢真係快過倒水，個個星期去飲下酒呀
食下飯，一餐飯成千蚊，個個星期都係咁，那時候的我名副其實
餐搵餐食餐餐清，早十年的我有咁多用咁多，銀行到月尾真係可
以提唔到錢出來，因為有時得返幾廿蚊，可愛的那時候係仲會問
朋友，你銀行仲有幾多呀??就連果幾廿蚊都過埋去佢戶口，集夠
一百都提埋出來，真係用到盡，呢D日子持續了兩三年左右，我得
到既係一身好酒量，飲多多都得冇問題，失既係我完全冇錢剩冇積
蓄，果時真係冇諗過用錢洗去其他方面，好似去下旅行咁，真係冇
諗過，又冇諗過學下人投資，更加冇諗過要儲錢，果時我地仲大大
聲聲咁同人講，今朝有酒今朝酒嘛，唔玩下點對得住自己呀...!!!呢D
就係我十年前既做人之道.......!!

現在回想起自己，那時候如果儲錢去下旅行的話，我諗我都可以去到
好多地方，又或者我比D錢我親戚投資，今日的我就唔會咁辛苦啦，
可能女仔真係會清醒一點，好似我妹咁，有錢就去旅行，家下佢搭飛
機仲多過我，去既地方又多過我，見識仲多過我好多，錢...或者咁用
先會用得其所....用得有意義。我今日向我女友講返呢D事，佢都嘩然
地講，睇唔出你以前咁喎，其實我仲有更過份的事呀，如果我再講埋
我係點搭車的話，我怕我女友都會忍唔住打我呀...哈哈。不過那時候
亦都係我過得最開心痛快的時候，之不過雖然我以前係咁貪玩，但我
有一樣野我係身邊個個朋友都有做而我冇做既，就係出去滾，就算當
時我冇女友都係一樣，我半次都冇滾過，回想當日真係個個人都會引
誘你去玩，返大陸過大海咩都有人叫我...去啦去啦.....!!就連以前我裝修
師傅都叫我一齊上去滾，唉......其實當時自己都好好奇架，真的有諗過
去，反正都係用錢玩，但唔知點解...要我做我又做唔出呢D事......，當每
次佢地玩完返落黎都會講點好玩點好玩，當我聽完又會好心郁...真係咁
好玩...???但每次都係咁，每次我都係做唔出呢D事，而家過左咁多年啦，
我呢班朋友間中都會玩下，不過每次都唔會問我去唔去，二來大家工作
性質已經唔同，時間又唔會似以前咁，大家一齊收工。可能我一直都冇
做過呢D出去滾呀玩女人的事啦，講真，在我呢班朋法友中，最其貌不揚
個係我，身材最唔Fit都係我，但只係唯獨我得女朋友，班朋友個個都話唔
公平，呢個世界點會咁..??你都有....我點解搵極都冇..??我聽到咁除左笑，
我都唔知可以比咩反應佢，而且我女友都算係不錯丫，起碼好多人都話佢
靚丫，而果班人到而家都係一支公，食自己，哈哈....算不算因果呢..??算不
算上天對我"唔滾"的獎勵呢...???不過我班朋友中雖然有D係大滾友，但佢對
我女友都會好尊重，在我女友面前班友仔連粗口都唔會多講，最多都係"卜
街"、"妖你"咁，唔會十句有八句都係，而且佢地好奇怪，無論點講粗口點
勁都好，大家心中有不成文規例，無論如何都?對唔會妖人老母，呢一句
在我地圍內中係?對禁語，所以..我有時都覺得我地班人中衰極都有個泡既....
最起碼..我地都冇人衰過犯毒呀衰十一衰到上差館丫，我地個時候都唔係天下
太平，一樣咁多引誘，和而家一樣，諗返轉頭大家當年成日去酒吧去玩，都
冇叫學壞，冇阿媽老竇管束既我地都算係咁啦......
，

女友聽完我講完後，問我係真唔係呀，人滾你唔滾...??!!!你地D男人會忍到...???
好.....我對住五千燈火發誓而家，我真係一次都未滾過，如果我真係有滾過，我
次次肚痾都搵唔到廁紙，再要我起更毒的誓我都唔怕，因為我真係..."從未滾過"，
但我承認當年係有諗過，不過我始終都冇行動丫，其實我覺得我都算係咁啦..朋友
中個個都玩，我可以忍受得住唔玩喎，係咪先...??做妳男友我算對妳有個交代對得
住妳啦...!!我真係冇玩過女人架....

>>September 6, 2009 at 11:07:20 PM GMT+8

2009 年 9 月 5 日 星期六 【清涼】

未來的打算....


今日在Deopt度開工，真係苦不堪言，烈日當空之下調動
D車，又拖又拆，又跳上又跳落，架架車都係開一陣間，
攪到開冷氣都冇用，幫D車沖涼時，見到D水射向來，真
係好想打開個窗，掂下D水涼一涼爽一爽，今日亦都係我
第一次調動D新車，雖然只係開龜速，但係首次開真係有
點說不出的新鮮感，只不過對架車有點失望，一來D顏色唔
靚，二來原來車頭玻璃窗視點比前三期車細，有點不習慣
，而唯一有度好處係變左躺門，取代之前既推門，咁我地
呢D肥仔有運喇，終於唔使夾肚腩開關車門，下午茶時間，
去左龍門居食，其實在果度住都唔錯丫，D樓都幾新，而且
仲有少少海景望下，相當不錯啊...!!!不過點靚都好，自己同
女友都係鐘意東堤灣畔果度D樓，上次曾經去同女友D同期同
學的同事上去睇單位，嘩...真係無話可說，咁當然啦......個價
錢更加都係冇話可說啦，但係有時真係千金難買心頭好，難得
我地都好鐘意東堤灣畔呢度，其實我地都計過數，首期勉強都
有得比出來既，但係要每月供都幾辛苦，起碼要供二十幾年，
況且而家住緊呢個單位都係一好大的問題，放出去都比較難，
平放又好似好賤賣咁，但企硬又怕無人問津，話哂我地住的位
置、方向、交通網絡都算幾好，無理由亂咁放出去架嘛，不過
咁，呢D始終係由女友決定既，佢有佢想法，深知心急又係急唔來
，只但係我地兩人都好鐘意果度，畢竟有一層自己既樓先會安心
，有一個完全屬於自己既屋企喎，有誰不想呢...??小時候....每事
都好想自己話事...拿主意，好喇，真係人大左喇，而家先知呢D
野係咁煩既，人生開始步入另一階段，結婚、買自己既家，原
來係咁困難，深深咁知道同體會到原來靠自己一人跟本冇可能
完成呢D事，所以現階段真係我同佢都唔可以冇左份工呀，是但
一個失業都會好大鑊，唉........仲話要生仔喎，點得丫，同女友現
階段想下就可以，一個唔小心發生意外真係....!!!邊養得起呀，所
以肥貓咪都要瘦下身喇，食少餐啦，同之後你就食我地食剩既腩
飯菜汁吧......!!貓糧罐頭果D太貴喇...!!!

我向佢咁講佢真係望住左我，有時諗佢係唔係真係明我講咩架呢...??
放心啦........女友點捨得餓親你，比你食得唔好丫，佢最痛錫睇怕都
係你喇.....!!要餓都會餓我先啦，越講越妒忌呀，唔講喇..!!!!

>>September 5, 2009 at 6:54:52 PM GMT+8

2009 年 9 月 4 日 星期五 【酷熱】

回憶當年的中秋....


今日粒痱滋仲係大大粒咁，響我口中痛呀痛呀...!!!無法子
喇，怎樣都要點東西，不然我會暈得都似呀，終於我用左
好大既勇氣食左一個腸仔包，可知道腸仔係咸味的食物，
它一碰到我粒痱滋，當堂痛入心痱，直到放工之後我先去
藥房買左一支Bonjela搽落去，估不到又好得好快喎，只係
搽左兩次..我已經冇咁痛，看來小朋友用的"吻百蜜"真係冇
用，咁鬼甜，我一搽入口就即刻當蜜糖吞左落肚.....，真係
冇鬼用....!!!!

放工陪女友去買冰皮月餅，一買就買左五盒，仲未計散買果
D，大大話話都有幾四十幾隻冰皮月餅響雪櫃度，另外仲有
兩盒傳統既月餅，真係日日都飯食都得喇，不過真係既，而
家D冰皮又確實吸引，食第一隻就想食第二隻，真係乞人憎呀
，今年除左女友之外，唔知仲會唔會有多D人陪我過中秋呢，
我暫時呢生最深刻的中秋節係1998年，因為我係在屯門醫院過
，當時姑娘仲每人派左一個迷你月餅比我地，響果時餐餐口淡
淡的日子裡，有一塊月餅食簡直就係病人的最高享受呀，不知
今年來緊呢個中秋.....會不會給我一個難忘的呢....??

>>September 4, 2009 at 11:01:21 PM GMT+8