| 日記 | 日記主簡介 |
||||
2010 年 1 月 22 日 星期五 【微冷】 I promise you 有個傻妹今日夜晚 慶幸今次返夜係返8:30pm 所以都有巴士搭... 好輕鬆.... 仲可以去麥記買20蚊餐上巴士食 我諗我地果時響車上面...真係有人想打我地呀 哈哈 成車人得我地食老麥.... 仲要食兩個餐加大加蘋果批加多4隻雞亦 妳呢個傻妹仲要食到鬼咁慢... 由上車食到落車... D香味響巴士上一直都冇停過 不過我地都好醒目 識走去車尾位置食 一來少D人發現 二來妳著住制服費時比人見到佢個食相啦 可知道個妳個傻妹響車上食老麥係幾咁"論盡" 一陣比人用手機拍片放上網... 題目係..."魚翅空姐的醜陋食相..." 噢...到時真係唔使出街喇 好開心呀 呢兩個餐我換左兩個多啦A夢呀 我知道妳特登陪我食老麥 為既係幫我換公仔... 妳肯陪我食 妳成日都話老麥唔健康..又乜又物架嘛 今日都肯陪我食薯條 我覺得已經好好喇...我亦都好滿足喇...真架..哈哈 其實送妳返工時我都有D唔放心架 妳之前成日都用果D事嚇我 係唔係衰丫妳....攪到我咁!!! 所以我而家會好珍惜同妳抱抱架 妳今日問我會唔會對妳對到厭... 唔會呀...我冇呀...真係冇呀 仍然對妳同以前一樣 我心中的妳....妳係好乖巧好抵錫架 妳令到我反而好需要妳呀 冇妳我會儲唔到錢、冇飯食、 有了妳...妳會幫我準備一切 我唔開心妳會氹我 雖然有時妳係囉嗦同埋煩D 但我都係咁鐘意架 我真係唔介意妳煩下我呀 有陣時望望妳臉上D可愛抵死又得意既表情.... 已經叫我好心軟喇 真係唔捨得對妳唔好 講真架...... 妳返左工走開左 我真係有掛住妳架 我真係冇對妳對對有厭悶感覺 我話過要對妳好嘛 我話過唔會介意妳的過去 我話過我會同妳結婚之後同妳一齊生仔 我話過...如果妳唔開心我要氹妳 我話過我會聽妳講野..訴苦與樂 我話過我會痛錫妳呀 我亦都話過唔會再比那個人傷害妳呀 我話過我會守我對妳的承諾....有效期係到老死為止嘛 最近我還話過...同埋應承妳 將我的錢全部交出比妳打理，妳每天給我零用錢.... 妳問我男人會唔會唔鐘意咁樣...比人管 其他男人我不知道 但我.... 我甘願比妳管我.... 其實而家都幾好丫..... 每日返工有六十蚊我用 所有開支妳攪掂 我咩都不用理 我反而覺得自己好幸福呀 只要我真的愛著妳... 妳不要離開我..不要搵另一個....總之不會失去妳的話 妳做什麼我都會喜歡 我會不變咁一直喜歡妳到老 所以妳不用問我會不會對妳厭喇 因為妳問幾多次都好 答案只會得一個.... 我呢下半世都唔會對妳厭 呢個都係我對妳的承諾 咁妳可以放心未呀...傻瓜..?? >>January 23, 2010 at 3:13:32 PM GMT+8 2010 年 1 月 21 日 星期四 【微冷】 滾 妳今日帶住D奇怪又陰聲細氣的語氣問我一條令我哭笑不得的問題.... 喂......其實呢.....你有試過去滾呀??(都唔知妳咁問仲乜...差D飯都噴出黎呀!!!) 唔係打邊爐個滾...係走去滾..??(妳個傻妹真係以為我諗係打邊爐喎.....) 哈哈哈哈哈哈哈哈哈哈哈哈哈....(哈哈哈哈哈哈哈哈哈哈哈....) 你想我點答妳呢..??(有...!!!冇...!!!) 有幾多個男人滾完會返來話比自己個女人知架 肯講果個....唔係白痴就係傻既 去滾都唔係一件馨香的事丫 起碼我圍住男人堆講起呢D野 明知佢係有去玩過 佢都唔知同你講..."我滾過兩次".. 呢個又講"我滾過三次" 我仲勁呀...""我滾過十次"...有兩次仲起雙飛添呀...!!!!!(妳唔係單純到連雙飛加四味都唔知咩嘛..???) 冇.....一個都冇 最巴閉都只會同你講...有或者冇... 在我身邊我起碼識一半人以上試過去滾 即係而家出街要搵一個去過滾既男人係好易 好似7-11咁....梗有一個響左近 嗯....我知我知我知.... 而家係問我有冇試過去滾嘛....? 我同你地講... 我冇.... 一次都冇 我對住三千燈火發誓.....真係冇 但諗..真係有諗過去...(正常丫....男人嘛...妳女人都有諗過去潛建啦....!!!!) 最終都係冇去行動.... 真係好古怪.... 我身邊既人....不斷咁講話點好玩好正好爽 爽到真係想知有幾爽.....(作死呀...女友會睇到架...!!!) 但我知我咁做我又對唔住自己另一半 不過有時又覺得....成世人一次都未試過....(真係想死頂喇.....當女友死的嗎...??) 好似有D可惜咁.....(仲敢講可惜...??!!...活得不耐煩嘛????) 好似試少左一D野咁..(女友話...妳想試下冇減D野就真..!!!!!) 我在男人面前...我係個比人話係...怕女友既人.....喂.....滾完你唔講我唔講有咩人知 你咁都唔去......"你去食屎啦...做男人做到咁"....(我真係有比人咁話過..) 但我有時又覺得....唔滾同怕女人係兩回事 我話.....我夠覺得你戇居低能白痴囉 比六舊水去玩一野.....你咪得果一下興奮... 不過條友串嘴呀..... 挑....!!!!我六舊水我玩得起呀 我個個星期都玩.... 次次唔同女...爽到震... 嘿...你吹咩...!! 最後....呢條友我係冇同佢聯絡 可能佢而家已經得到"天下性病集於一身"之症(我好歹毒呀...哈哈) 我總覺得..上去玩得多實會中招... 或者..我出入得醫院多啦 我曾經聽過隔離床有個男病人二十幾歲左右 因為下體有事而漏夜入院 到病房....駐夜醫生來睇.... 好死唔死係個女醫生....再加個女護士入去問診 我聽到個男人要向兩女性如實回答時....(我上星期有去召妓...很文學味道....叫雞就叫雞啦我心諗..) 佢把聲真係細聲到瘀到暈(細聲都冇用....夜半三更聽得一清二楚) 仲要為呢D除褲比佢檢查......(Oh...Shit..!!!!!) 我的天呀.....(My God...!!!) 不單止咁... 佢D親戚來探佢時 個個都叮囑佢滾少D喇(通哂天...顏面何在呀...???) 嘩......... 如果玩完要瘀到比全部人知..... 我寧死都唔玩 呢個係原因一啦 仲有另一個原因另我話過唔會去滾的原因係 我唔想響度講.... 想知..又八掛既....而我又信得過你既...我會講你知 真心的.... 我已經有個咁好既女朋友 我冇理由要走去滾丫 做D返唔到轉頭的事呀 我覺得要去滾過先係.......男人眼中的男人...我情願比人話我唔係男人囉 而家反而我滿足係....有女仔讚我係一個好男人....咁我會開心D囉 有了妳...仲點會走去玩喎(真係搵唔到理由比自己去滾...!!) 望下女仔就會...哈哈...(機場港龍果D Crew真係果果都好得...妳都係咁講架..!!!) 望係唔使錢架嘛 況且...我要滾都冇咩本事 零用錢不夠我咁做(咳.....係夠都唔敢咁做..ok...!!) 滾完冇錢找數...要剝光豬通街走架....聽聞.... 我才不會咁笨啊.... 係呀係呀.....我要對妳忠心嘛.....諗都不敢喇....咁妳放心末呀..???(很愛妳呀...點會去做呢D要妳傷心同失望喎...係咪...!!) 為了妳.......比人話我怕女人、怕女友、怕老婆...都唔打緊啦.... 我又唔係對住佢地做人世.... 我係對住妳做人世嘛 >>January 22, 2010 at 6:52:26 PM GMT+8 2010 年 1 月 20 日 星期三 【晴】 醉得要死.. 今日一起身 頭有點痛... 口好鬼乾... 乾到飲水時係感到條脷係咁索走哂D水咁樣 而瞓在身邊的她.. 此刻還在瞓到死豬般咁 好少見她會咁熟睡...睡得很甜 當然啦 我們昨日同ARMI慶祝生日 飲左好多好多既酒呀 在我印象中記憶中我好似輸左好多次"十五二十"、"大話骰" 唔單之我輸... 個傻瓜好似都係一樣 輸得好慘....變相係飲得更慘 女友真係冇精梅既天份 好似後來有人叫我幫女友頂酒.... 頂左幾多杯幾多支...?? 唔記得喇 我只記得係咁飲呀飲呀飲呀 班友仔搵命搏咁...連平時斯斯文文既女仔都發酒癲 又啤酒、紅酒、Vodka、芝華士.....應有盡有 不過後來我先知我未算慘 阿壽星女比人隊到要人抬返去 我同女友都起碼有知覺識得行去的士站搭車 好慘呀.... 我已經差D企都唔穩啦 個傻妹仲要將成個身挨過來我度 荒死我唔會跌咁 我上的士有經驗呀 響上車之前如果比司機見到你啤啤呼咁呢 佢有可能會唔比你上車 今次我上的士前果刻扮到好清醒咁 好清醒咁扶女友上車 仲要幫佢扣安全帶... 睇我幾咁清醒.....可以幫傻妹同自己扣到好安全帶呀 我沿途又唔敢比自己瞓著 一直捱到屋企樓下 比錢我都唔知比幾多 只知搭左三個位數字車資.... 去到樓下管理處時 比阿管理員見到女友要我扶住先行到 管理員哥仔話...『仲咩呀..??阿咩小姐飲到咁醉呀??』 我心諗...我都唔好得好多乍 你睇唔出咩......!! 唔怪得的士佬咁順攤比我地上車啦 最後管理員哥仔仲問我得唔得....使唔使幫手 之後佢幫我地按升降機.... 看來女友人緣不錯呀 我都係第一次比人幫手按制搭升降機呀 回到家開門...插鎖匙開門比平日難左DD 入到去....嘩... 唔得呀..我都要坐坐呀 先比佢瞓覺. 一跌落床就瞓天光 而我都識得沖一沖個身先瞓 沖完出來之後見到女友個醉樣 塊臉紅卜卜咁....好迷人既樣 忍不住親一親個傻妹 但親佢都冇反應.... 唉....好彩我係妳男友乍 如果唔係比人食左都唔知呀....拍極妳都唔識醒 由看自己...其實我都到頂喇..... 真係要去瞓... 好彩明天係放假.... 哈!!!.....如果唔係..我同女友一定唔會同你地班友癲呀 不過....間中一次大醉在長街上.... 唔打緊啦 我其實幾鐘意醉醉地既感覺 個身輕輕地咁....返去又好瞓 係第二朝起身辛苦一D啫 最終...女友瞓到下午一點幾先識安樂醒 先沖涼....再換埋床單.... 因為昨晚冇沖涼就上床瞓喎..佢話 噢.... 清醒而潔癖的女友又醒覺並且出現喇..... 既然妳而家咁鬼死清醒... 妳快D比返一半的士錢我呀....... 我零用錢唔包妳搭的士架.... 知道冇...!! >>January 22, 2010 at 12:12:05 PM GMT+8 2010 年 1 月 19 日 星期二 【晴】 廚房又有新寵 又買了一個電子蒸爐 好似話過...應承過...話當佢走去學整點心時會買比佢喎 咩我有咁講過咩...? 我好肯定..... 你有.... 你有應承我 我昨日話過要儲錢呀 前日都話過 上星期都話過 上個月都話過 但係儲極而家都係得個"吉" 望住ATM自己個戶口 真係萬念俱灰.... 點解.....?? 點解永遠都係儲底得咁多?? 銀行你可否比個解釋我呀?? 戶口會食我錢嗎...?? 妳呀.... 正一吸血鬼呀 放工接完妳 仲要劏我一部機 妳見到我條頸嘛... 看..... 看到嗎?? 呢度呀......哩.....見到嘛.....滴緊出來啦... 一都係頸血呀 之但係當聽到妳話 買來...大家都有份食嘛 你唔想食試多一D新野嗎...? 我想試... 點會唔想喎 對著妳....怎會唔心軟喎..! 嗱..... 買就買左喇... 妳唔好淨係得叉燒包、蝦蛟、燒賣呀 我真係會叉燒包、蝦蛟、燒賣再鳳爪埋妳呀...!!! 諗起下期我張月結單 唉... 死很得.......!!! >>January 20, 2010 at 4:20:08 PM GMT+8 2010 年 1 月 18 日 星期一 【晴】 Stand By Duty 女友既所謂AL...我開頭以為係放好長添 原來係計算埋Stand by在內 咁即係隨時後命啦 其實都幾唔知點咁架我覺得 咁變相話隨時有人捉走我女友返工喎 我呢.....就唔係咁鍾意女友係Stand by Duty 一來佢會比人捉走 二來佢會好辛苦... 同時要執兩份行李...一個係夏季..一個冬季 因為都唔知去個地方係凍定熱 還要在家準備一切 包括扎頭髮、化好個妝等等有關儀容既野 最緊要要確定個電話係收得到 如果收唔到.... 公司搵唔到妳.... 就有可能當妳無故唔返工 就係咁..... 一直係咁等電話.... 街出唔到..怕行行下比人捉走 煮唔到野...試過煮個即食麵時...整到一半 有電話到... 個麵就係咁煮到一半就熄火走人 隔左一天返到來 見到個麵索哂水...乾身哂...!!!!! 所以食要食D可以攞走既食物 麵包就係首選 將呢D事講人知 人地會覺得好得意好好玩咁 但如果妳眼見到她咁... 精神緊張地咁等電話.... 跟住仲要用有限時間出到去報到 你就唔覺得一D都唔好玩唔好受 今日就係咁.... 比公司Call走左 眼見佢沖出去趕時間咁走 真係有點要心痛 跟住就發覺自己 嗯...我份工真係算不差喇 妳要加油呀.... 明天接妳啦.... >>January 19, 2010 at 2:47:29 PM GMT+8 2010 年 1 月 17 日 星期日 【炎熱】 我的諗法 信箱中..收到個傻妹一封信 才知妳有咁諗法我一直不知.. 祈求認為自己自私的事....實現左 妳知道嘛? 我一直都覺得自己好多路都不平坦 病痛多過人...身子又差過人... 近呢十五年好多人生路都係好難行的 但唯獨愛情路感情路上 我覺得自己真係好幸運 亦都令人感到羨慕的 以我其貌不揚的外觀 竟然可以找到個咁好既女友..我未來係太太 真係夫覆何求呢...?? 能和女友一起拍拖真係全靠緣份 我真係估唔到未來老婆係我中學的同學 一個以前很男孩子氣的女生 真係點都估唔到過左十年後 她會變成一個很曉得打扮的女生呢... 我第一次見到她... 真係"識妳係老鼠"呀!!!!! 但一當妳表明身份後我便記得妳喇 我地響埋一齊都有一段時間喇 話多....可以話好多....因為我們早就認識對方 話少....可以話好少.....因為我們拍拖都還未夠一千日 但見返妳和妳一起後 比妳喚起我好多舊時回憶 漸漸我都開始記得返以前我們的經歷 原來我不單止整估過妳咁少 仲有搶妳當時午飯盒內的菜汁...用來餸在D飯食 大肆宣揚妳的校裙有血跡而妳當時又不知道 因為妳月事來到...我令妳尷尬非常 還有強行摷妳個書包、銀包.. 當摷到有妳女性用既用品時就大大聲聲咁叫...引同學注意 仲有在班房內同男同學夾計仔去揶揄佢...笑妳咁 而家記返起都覺得自己好鬼衰 都唔知攪咁多野為咩.... 當時真係冇諗過一個女孩子的感受 不得不佩服當時的妳 點解可以容忍我地咁對妳 其實妳只要講比miss或阿sir知 我地定必"死梗" 但當時妳冇咁做 為什麼呢...?? 我諗如果我而家好似中學時咁對妳 妳會如何..?? 會一巴掌車過來嗎..?? 原來真係有報應架... 而家我完完全全要聽妳話喇..哈哈 但又奇妙得到在..我又甘願比妳管束我喎 是天意吧...!!! 命運安排要我再次遇到妳 要我補償當日對妳的做過的事 我真係覺得好奇妙好神奇 當日同Ex分手時可以咁"和平" 過一天我便與妳一起 說真的...我當初真係覺得個Ex..認定係我既未來老婆呀 當時的她真的好好... 若當時咁下去... 我一定不會願意分開 不過最終我估不到她又第三者 而她的性格突然變得咁快 而我又遇到妳 和妳又十分之投緣 所以我不會怪妳所講所願的... 所謂"望我分手" 我不知道妳信中所指是什麼喇 人....係自私的.. 呢個係本性...只係看自私到那個程度吧 我真係從來都冇諗過係妳既出現 令我們分開 妳唔係衰 人...唔係一個衰女人自私的女人 不要再咁講自己好了 我真係想不到妳會咁諗...直到現在 真的不關妳事.... 妳知道嘛... 若當日冇妳借我膊頭給我流淚 若果冇妳給我捱眼瞓陪天光咁傾訴 若果冇妳給我支持安慰 若果冇妳應頭...肯要我的話 我真係不知怎麼辦....我還能在世上??不知道... 從妳肯應頭..肯要我那一下開始 我便知道妳係我既一生依託 呢一個依託可以令我變得人生完滿 令我人生變得無憾... 記得我當日忍著眼淚對妳傾訴時 我真的不想對著任何人流眼淚 我不想比人見到我咁 但果一刻妳給我感覺係好安心 因為我覺到可以安心地靠著妳流淚 這個世上除了我家人見過我流淚外 妳便是唯一的一個 還有....不是妳先開口話要我的話 我跟本冇勇氣去講我愛妳 是妳才令我們可以在一起 當天我才知活在因第三者出現而失戀係幾咁痛心 亦都全因妳才可以令我咁快可以好返 那晚..真的像角色掉換一樣 是妳主動肯抱著我、親我、伴著我還有妳給我那一支蘋果綠茶 如果話妳因自私而祈求我們分開 我也有責任吧 當分手前的日子Ex咁對我... 我也曾祈求同她分開... 而想和妳一起 總之在當天....我能夠站得穩再起來全靠妳在我旁 妳的性格我很清楚 我都知道我的性格妳同樣清楚 我知道妳係感覺到我係鐘意妳 但我們當中因問題發生太多鎖碎事 大家都擔心你會不會放下我 我又會不會放下妳而憂心 但妳看到嘛?? 我地已經講到談婚論嫁 又去一齊選擇影婚紗相的地方同店舖 一齊去計劃未來儲錢買樓 我地還有興奮到試過去睇單位 一齊諗將來生BB的事 男的女的...名都早已改好喇 一切一切都係真實的...我地真係真實地咁做過呢D事 不如大家都應承大家不要亂想吧 應承妳我不會放下妳掉底妳一個人 其實我又點會捨得唔要妳喎 >>January 19, 2010 at 12:45:33 AM GMT+8 2010 年 1 月 16 日 星期六 【微冷】 我背後的儲蓄能手 放假日 諗住去下電腦節睇下 點知迫人迫到死 女友仲混亂中覺得比人搏懵 最後真係一入到去就搵出口走 一D野都冇買到 之但係我地真係一心諗住買想要既野 最後我地去左黃金同高登商場睇下 終於買左個1TB既HD...即係1024GB既容量 奇怪係個HD價錢 外置HD反而平過內置 我真係有諗過買個外置既 拆開佢 放入機箱當內置用 但問過D人.... 這方法不可行 還說.....人為破壞冇得賠... 我頂..... 驚死我會搵佢報仇咁.. 我先冇咁無聊呀 除左買個HD外 仲買左個高清機頂盒 可以睇高清喇 可惜...返到去先知自己唔識整... 過兩天叫Philip大哥幫我Set.... 我買完電腦用品之後 就到女友行街 佢又買左兩件衫、一條裙、一對鞋..!!! 而價錢係同我買既電腦用品相差只有二百蚊多D 果...果...果.....對鞋....要....800幾蚊..!!!!妳用來踩地下架乍.....咁貴!!! 我仲想話家中鞋櫃已經滿到要倒瀉喇...... 執屋當日我係睇過妳鞋櫃.... 有D鞋係著都未著過 完封不動連塵袋都未拆架... 有D個鞋底仲好新 我懷疑只係踩過家中地下... 完全未著過出街 妳可知....妳只得一對腳.....妳可不是"白足"呀!!! 衫同裙還好一點.... 買回來第二天都會著上身去出街... 只不過我點講都冇用架喇 女人天性不能改變也......我都慣了 今日...... 大家都有戰利品呀.... 錢就用左喇...算吧 平日工作咁辛苦.... 當係獎勵一下自己 滿足一下自己吧 呢個藉口夠好啦.... 我是一個永遠都不會明白女人用錢...花費...購物...方程式的人 我只知女人買野就會開心、快樂、樂得忘形 有人能夠陪佢睇佢鐘意睇既野佢就會笑 我只知...我只要有耐性陪女友睇衫買野 她就會開心...滿足 佢就感覺被感到重視 所以...我不介意走進滿佈女生的衫裙鞋天地的店舖 我只係最怕佢店舖裡衣架刮鐵架絛鐵通既磨擦聲 通常女人都鐘意由第一件衫一直揭到尾...由尾揭返上頭...還要來回數次 總之就要...揭揭揭揭揭揭 之後再問呢件好...邊件好...果件好...我覺得呢件好....呢件好似冇咁好....不如買埋啦好唔好 我不介意...不討厭陪女人睇衫 相反...我真的好喜歡見到女友開心咁睇自己喜歡既野時候個樣 但真係不用再叫我入去買內衣褲既店舖喇 已經試過一次了 我總係覺得那次個女sale.....個心係咁笑我 我Feel到Sale姐姐佢強行忍笑.... 其他Sale姐姐骨子裡已笑到腸穿肚爛 我果刻有"身敗名裂"、"前途盡毀"的感覺 幹什麼問我呢套好不好喎....!! 又唔係我著...!!!!!!! 我真的不敢想像Sale姐姐個腦諗緊我咩喇.... 直到今天.... 我都不敢再去呢D地方.... 尤其係果一間...... 真的怕怕喇 C4問我女友喜歡買野.. 咁D錢咪.....!! 冇錯...的確我們積蓄不多 但要講洗錢...女人拍馬都未追得上男人吧 記得某天女友可以把今個月用過的錢買過咩列出來 有單有據有貨 而女友問我.....咁你呢...錢用左去邊呀?? 我講不出錢洗在何處 我覺得女人係世上最識儲錢既動物 一但女人有了儲錢目標 要儲蓄一 點都不難 現在我們都在儲蓄計劃中 所以連今日買一個675蚊既HD同630蚊既機頂盒 我都會問過她 要她點頭我先買 講真...我不介意將來把工資全數給她 給她每天比我零用錢.... 我都會開心的 我真係一個不想對錢傷腦筋的人 我給妳全部.... 呢D萬惡既金錢等女友同佢死過吧 因此家中所有開支妳攪掂不要煩到我 有剩係妳叻.....妳自己袋吧 妳喜歡買野... 但我不會懷疑妳用錢洗銀既方法 所以千萬不要再話我知妳點用錢喇......... 一路直到我老死為止都唔好比我知.....Ok..?!! 因為真的愛妳.....什麼都想交給妳 >>January 17, 2010 at 5:39:50 PM GMT+8 2010 年 1 月 15 日 星期五 【颳風】 睇日落.. 好耐冇做過D有益身心運動喇 自從搬離舊居後 我真係掂都冇掂過"單車" 今日趁天氣涼涼就出左去戶外活動 一早我地就去左大埔踩單車 仲約埋George同Annine一齊添 我地四個人一齊由大埔踩到出沙田... 到左沙田買左支水抖左一陣後 我地又由沙田踩返去大埔 其實踩落先覺得... 大埔同沙田距離係一D都唔遠 可能我地兩對拍住拖一齊踩 沿路，傾、講、笑......不覺不覺就到目的地 見到她們一對已經膽敢響我地面前拖手 就知佢地已經公開關係吧 開初我地仲以為George會同阿Pat果邊D人過電添 真係估不到爆冷....同Annie一齊 都好既.... Annie傻得可愛既樣貌 配合又高又溫文既George...."瓻{ 真架... 我都覺得George係絕種好男人 不煙不酒不粗口.....而且為人風趣..帶點幽默 如果我係Gay的話.. 我一定唔會放過佢 我講真的..George真係幾靚仔...真架 拖住Annie出街真係襯到絶.... 不似我咁...... 好像點都襯托不起女友 不說喇........ 唔想個傻瓜見到會唔開心 我真的知道女友係不介意我..... 只係我欠缺信心吧.... 好喇好喇.....講返踩完單車 踩完之後一齊去左食午飯 之後大家去影相.... 但我又冇帶相機 有帶都冇用丫... 又唔夠George果部Pro.... 見到George幫Annie影相時 Annie真係好似化身做左做Model咁 有個咁叻影相既男友...可真幸福呢 我諗女友都會想影吧 可惜我冇咁Pro既相機 又冇佢咁好技術 最重要我係唔識點比人影相 我真係唔知點笑 所以...我好擔心影婚紗相時會點算好 我好怕影左一輯唔識笑既婚紗相 真係好憂心呀 今日我地一齊去左機場二號客運大樓影相 影到部機都冇電... 冇電到連睇相既功能都做唔到 那邊廂影相 而我就同女友睇飛機降落 唔知係唔係被女友感染左 我覺得飛機降落接到既動作好優美 開始懂得分別各種型號的機種 我地由下午睇到太陽落山 大家見住個鹹蛋黃慢慢落山 我們兩對一齊同自己既另一半看日落 個景致真係好靚 已經不再光芒刺眼的太陽變成一個 紅色的蛋黃.... 它的紅色光線反射響客運大樓既頂部 得出來既效果...好美麗 環看四週....不止我們兩對 展望台上還有幾對情侶同我地一樣....看日落 這一刻我諗..... 好多人拍拖都係行街唱k行旺中等等... 其實每天都有迷人既日落景致 良辰美景不要這麼浪費丫 我們都覺得即使那個展望台凍到震...吹風吹到人都會失憶咁滯 今日冒著凍死的精神上去看看....都係值得既 其實也是男人的佳音噢.... 咁凍.......係時候比你抱抱佢既機會呀 再給她加上自己的一件外衣.... 你的動作加上美麗感動的環境..天時地利人和的配合 你的另一半我諗都會開心吧... 最起碼..我們兩對都開心丫 再望下四周.... 對對情侶都很受落呀.... 雖然..那裡消費真係不便宜 無論車費、食既、入場費都係要錢 真係去一去都冇左兩舊水 但都值得既... 總之......我地今日個個都好開心啦
>>January 16, 2010 at 8:46:44 PM GMT+8 2010 年 1 月 14 日 星期四 【颳風】 凍上加凍 今日陪Philip去睇電腦 主要係睇下LCD MON 最後如他所願買左個19吋既 價錢非常合理 1500蚊左右 買得個咁靚既MON 點可以唔買張靚Display card呀 又去買... 選擇左一張800幾蚊既.... shit.... 買完先知...先醒起底版唔啱插 算吧.... 唯有買張底版盛惠1200蚊 底板轉得 CPU都難免要換 又1500蚊 發覺連RAM都唔啱插 又要全換.... 又800蚊 都換得7788喇 換埋個機箱吧 買個超多風扇...好散熱 又600幾蚊 順手換隻400幾V既牛 又200幾蚊 最後...為左要BACKUP資料 又特登買個USB HD...1個T..即係1025個GB 又600幾蚊 我見咁平又買多個... 我妹知道咁平 又要我買多個 老闆....前後3個.....!!!! 就係咁 諗住買個MON 點知換左機咁滯 好彩有車... 如果唔係要我抽咁多野上巴士 我真係叫救命 Philip最後來到我家一齊食飯 將呢諗住換MON的念頭變成換機的事實話比女友知 女友個腦立即開左1000轉腦力...諗到 下次我買衫時都咁先 買衫呀??新衫要襯新裙呀 買得新裙要買埋對新鞋喇 反正都換....內衣褲都一併買過吧 新Look喎.....不如set埋個頭...做個Color啦 反正都係..... 化妝品一併都買新的吧 反正我有折扣 嘩........霎時間諗得幾完美呀 喂...!!! 送句比妳...."You Wish...!!!!!!!!" 女友話我都唔會咁大方啦(不如直接話個孤寒吧...!!!) 不時買化妝品都係咁哦我...(咁妳真係一屋都係化妝品喎) 點會咁爽咁豪丫..(我想豪...係冇錢豪乍...!!!我都想我女友再靚靚D見人架嘛..) 哈....... 咁又話唔定既 假若妳嗲得到我買的話.... 我都會甘願去冒住碌爆咭的危機掛.....(我諗...我估!!!) 當然要睇妳功力啦 不過妳都功力都登峰造極吧 還在討論時 有人大叫.."食飯啦...D飯比你地D說話整凍哂喇...!!!!" 哈哈.... 有人看不過眼嗎...?? 呢D係我倆相處的手法.... 嫌凍.....廚房有微波爐... 自便吧...!! Philip........"我頂你地兩個個肺丫..." >>January 15, 2010 at 5:42:35 PM GMT+8 2010 年 1 月 13 日 星期三 【颳風】 很失敗啊..!!! 放工....之後 陪女友去街市買餸 諗住買快D就兵分兩路去買 我負責買其中一樣餸.. 就係..豬肉 諗住今日剁冬茹剁豬肉餅食 家中有冬茹...唔使買 豬肉....二人前 二十蚊....梅頭豬肉咩都夠啦 好....買完響呢度會合 良久..... 大家都買好一袋二袋..會合 女友檢查份量夠唔夠... 但係一望之下 女友話我呢度幾錢呀...? 我話...20蚊囉 嘩....有四分一都係肥肉喎!!!!!! 你點叫佢斬架...??? 咪二十蚊....梅頭囉... 不過佢係有問我要咩肥定瘦.... 我咪話"半肥瘦囉" 女友立即話我...買叉燒咩半肥瘦?? 你答佢要瘦佢都搭D肥比你架啦 家下佢擺明比一半肥..一半瘦..比你 買二十蚊..得十幾蚊食得...!!!! 我點知喎....!!! 咪去買多十蚊囉咁.... 卒之...買左前後三十蚊豬肉 回家到剁冬茹 我平時就先浸軟再切 先切個腳出來，再切頂帽 然係張頂帽直五刀..橫五分咁切 再切碎個腳...大概四刀左右啦 咁先切好一個冬茹粒 點知....比女友見到 問我...."你仲咩呀..??" 咪切冬茹囉....盲咩妳...!!!!!! 咁切...你切到天光啦..!!!!!! 咁要點切先唔天光呀..? 女友先將冬茹用刀身壓扁.... 之後好快直四刀橫四刀....攪掂 連個冬茹腳都順住果八刀碎埋 話我......邊洗左切右切咁多刀呀....? 咩喎.....唔知嘛我..!!! 到剁豬肉碎 我問.....呢個姿勢OK嘛...? 把刀OK嘛..?? 唯一一個唔使比佢哦我既程序 但係到剁完後 女友話我... 你係男仔...大力點剁都唔覺手攰 如果我好似你咁剁....手都斷!!! 我話.....又有問題嘛?? 之後...女友用我剁碎左既再攞D來剁 女友用刀個尾來剁.... 而個刀頭做支點 刀頭剁時冇離開個砧板 只係個刀尾好快咁上下切咁去剁 的確..女友只係剁既手法係唔使用咁多力之餘 會快..同真係碎一點 好喇...到攪拌佢....即係肉同冬茹拌勻 我用手去拌勻佢 但手法又比佢話我錯 我用手抓咁拌....係唔會均勻..同埋污槽 話咁D指甲會留有肉碎... 一路拌時會可能連D指甲污槽野拌埋入去 女友又做示範 原來用手個拳頭轉下咁去壓 的確又係好快好均勻.... 好了......全個過程由買到整都錯 最後我話放入個爐蒸.....點都啱啦...係咪 女友話...係!!!! 但你放返底..... 你未落調味粉...!!! 我有一秒想跌響地下度 我諗我唯一做得啱係開爐同蓋好鑊蓋..... 有一個入廚好了得既女友....結果係.... 你做咩都係錯..錯..錯...!!!!! 哇....... 我以前邊度會有咁情況架...???? 下次唔冬茹剁豬肉呀 呢一餐真係煮到我想剁人呀... >>January 14, 2010 at 7:28:00 PM GMT+8
|
|
無事嗎?irene佢而家情況如何