2009 年 6 月 19 日 星期五 【酷熱】

陣陣的痛.....!!


已經過了幾天，好似仲痛過界到果時，
keyboard單手打，筷子要用左手，咩都
係左手，右手用力都會痛......!!!幾時先會
好翻...?難聽d連照顧自己都有問題，女
友始終都要返工，我攪得抬嘛...?

多謝咁多朋友打電話來關心，原來我人
緣都算係咁，當然...托女友的福啦...!!

>>June 20, 2009 at 3:35:20 PM GMT+8

2009 年 6 月 17 日 星期三 【清涼】

嚴重的流蚊飯...


昨日....不小心被刀界到手背，不知是否界中
了比較主要既血管，血一直流，地下、雙手
衫、褲甚至按住傷口止血的毛巾都染滿血，
我不知為何會咁嚴重，只是一刀傷口，女友
扶坐的士去急症室，那刻的我已經有點頭暈
，到急症室時，拿開條用來索我傷口的血毛
巾，那條毛巾可以索滿血多到滴出來，也難
怪吧，家族有血液的遺傳病，血液中少左一
種蛋白係用來凝血，我血液長流也不奇事，
打左支我估計是幫助凝血的針，才得救，在
觀察房留了一晚，醫生決定不輸血，原因怕
會有不良反應，著我食多點野飲多點水，自
行身體補充血液才是最好方法........!回家，我
望到我的血跡有D彈到牆身上，有D索左入地
板中隙縫中，洗不掉，現在的我連打字都痛，
只能用單手打字，打呢個日誌打得我苦不堪言...

幸運的是大家都學過First aid，才冇咁狼狽，起碼
識得舉高手加上綁手臂止血..如果唔係流血都流死...
女友擔心說，如果..若有..不幸有一天遇上意外
大量流血，點算??一刀深少少的傷口都咁嚴重，遇
上大意外...怎麼辦..?

>>June 19, 2009 at 12:00:38 AM GMT+8

2009 年 6 月 14 日 星期日 【陰】

書店混吉的我



今日在三聯混吉左四個鐘，我四個鐘內足足睇左兩本書
，我估D店務員都留意左我呢個混吉男好耐架喇，之後
我又去左7-11又睇雜誌，又睇左一個鐘，個店務員在我
身邊係咁掃地抹地，目的都係想趕我走吧，呢招我做7-11
時用得多喇，估唔到風水輪流轉呀，跟住我又走左去剪髮
，其實我早幾年前已經發覺自己甩頭髮，個髮型師幫我剪
髮時係咁Sale我洗頭水，又Sale我做colour，大佬呀，我都
已經甩頭髮啦，仲Colour，玩咩...!!!夜晚我同女友去左上水
，上去佢同事家中食飯，佢同事家真係好大，一個連天台既
單位，呢D算唔算得上係"理想的家"呢...??食完回家前同女友
去左元朗食個糖水，返到家都入夜喇。今日好奇怪，肥貓咪
唔係點出聲唔係點行來行去，而且仲冇點食野，貓糧幾乎原
封不動咁放返響度，完全同平時唔同，不知是不是有病呢，
如果明天佢都係咁..我應唔應該帶佢睇醫生呢...??定還是由牠
自己好返就算呢...??但我相信如果明天都係咁，最錫佢既一定
帶佢出去睇醫生，而我知道佢睇一睇醫生仲貴過我睇醫生，又
要為肥貓咪破財喇，可愛的肥貓..我真係多得你唔少喇...激死我...!!!

>>June 15, 2009 at 5:53:02 PM GMT+8

2009 年 6 月 13 日 星期六 【陰】

準老襯..Philip哥..!!



昨晚同Philip兩公婆出來食飯，雖然佢地未結婚，
但係我估佢地都差不多喇，我一到餐廳佢地已經
等緊我，我坐埋位見到座位旁有幾袋野，原來係
佢地既婚紗相，早排佢地原來去左台北特登去影
相，而我真係估唔到係Philip平時吊兒郎當性格，
竟然已經好好咁安排好之後準備結婚既野，我當
堂打了個特，真係十萬個估不到，難怪佢女友咁
開心，女孩子知道自己將會成為新娘子時，笑都
會特別甜特別靚...哈哈，看得出，佢女友已經完
完全全落入佢手，打風都打唔甩，我諗都要儲錢
做人情喇，而我同佢交情...唉....!!總之破財啦...!!!!
但呢D錢..我多多都俾，老友人生大事，打劫去搶
都要俾封大人情過佢既.....請笑納吧.....!!

響餐廳我睇佢地D相真係，真係靚到冇人有，著起
婚紗既女孩子果個樣真完完全全咁表露佢既喜悅，
化妝雖然不太濃，只是加上甜蜜同幸福滋潤下，已
經令佢容光煥發...靚到盡，而老襯著上禮服都格外有
型，我諗呢個帥樣只會響呢度見到，講真...真係帥到
爆燈....，我只係睇相都睇左半個鐘，因為真係太多，
而問到佢地影左幾錢，我真係暈響度，已經到台灣影
都影到接近四萬蚊，如果響香港影可能要加個Double
喇，不過Philip係有計既，響魚缸都撈到唔少油水，邊
好似我咁....要坐艇丫，希望快D收到佢張帖啦，快D拉
埋天窗吧.....

>>June 15, 2009 at 1:36:59 AM GMT+8

2009 年 6 月 12 日 星期五 【晴】

還神之行



今日同菠蘿成出左去長洲，佢話想出去還神，我話下..???
還神...??但無所謂啦，我當去行下又好玩下又好，出去走走
吧，況且女友又未返...!!約左菠蘿成去朗屏站，之後一齊出
去搭西鐵，我還諗住只係去長洲，原來佢要還兩邊神，一邊
係車公廟，而另一邊係長洲北帝廟，真係頂佢唔順，男人之
家左拜右拜，我地去左車公廟後，菠蘿成搵返之前個解簽佬
，我在旁不知佢地講咩，之後只見菠蘿成比左一封利是佢，
我同佢拜多兩拜就走喇，趕頭趕命去到中環碼頭，唔知今日
咩日子，個碼頭可以迫滿人，情況僅次於拜山既情況，我地
本來諗住坐普通位便算，但人多到不得之了，我地怕冇位坐
，只好買豪華位，豪華位只係多張枱同有冷氣，我唔見得有
幾豪華，同菠蘿成一過傾計好快就到長洲，菠蘿成去到又唔
知拜咩野，又叫我幫手燒衣，唉....天氣已經熱啦，想我死嗎..??
過左一個鐘左右，儀式完成，我可以去行下玩下，我地去左
東灣睇人游水，又睇下女仔，又睇下肥仔，又睇下猛男，又
睇下肥婆，應有盡有，應睇亦都盡睇，我地坐埋一邊望...一邊
傾計，告知我最近發生的事，最後我地去左食海鮮飲左四支啤
酒，再搭船出返香港，望見香港夜景真係好靚，忍唔住影左幾
張相，哈哈......!!今日真係好倦，雖然辛苦，但可以同菠蘿成出
來聚下都係一件樂事，或者他們話得我無錯，我太忽略自己的
朋友了，女友同朋友應該取得平衡.....!但我可以嗎...??

>>June 13, 2009 at 4:04:47 PM GMT+8

2009 年 6 月 11 日 星期四 【暴雨】

死o靚仔...!!


近來收到好多朋友既電郵，問來問去都果件事，
為左保護私穩關係，我唔方便post事情響日誌上，
其實大家都好識做丫，不會響日誌上留言，費時
遇上尷尬事情，我都回覆左比大家了，多謝大家
關心啦，無事的.....放心...!!我還欠大家很多，不會
有欠冇回頭的.....!!不過...近來真係唔係幾開心...!!

放AL真係好悶，有時得自己一個人，都唔知可以做
D咩，今日為左解悶，我用左100蚊去機舖打機，好
久都無試過玩咁耐，不過今日遇著D打機冇品既死o靚
仔，打機唔係羸就係輸，自己又要技不如人，玩賽車
Game，大家都係同Class同Level，你自己入彎成日開咁
快點會唔炒車??輸都係自然的事，我不知道個o靚仔唔
知係唔係不甘在一班女仔面前輸咁多舖，臨走前要問
侯我，我還口係自然反應，我又不怕你D死o靚仔，夠
pop既咪搵人打我囉，聲大夾冇準，我真係一D都唔怕
呢D人，下次再係咁我一定報警，死低能仔，我會怕你
嗎??我出來玩果陣...你仲讀緊ABC乍....!!真係好想下次再
遇到佢，睇下佢可以玩D咩出來....!!

>>June 12, 2009 at 6:24:14 PM GMT+8

2009 年 6 月 11 日 星期四 【颱風】

我的肥貓咪


唉...放假先黎落狗屎，個天都唔喜歡我喇，
女友一早返左工，家中得返我同肥貓，其實
有好幾次我都好想帶佢落樓下散步，但又怕
整到佢污槽哂，不同以前喇，以前佢出街玩
我唔會理，但而家佢係家貓，就唔想比佢亂
來，我眼見有好多貓比鐵路截開兩截，比汽車
壓扁，橫屍街頭，我不想佢步後塵，唯有焗佢
在家中，我知牠好鐘意出街，我見牠成日望景
就知喇，但有D事真係辦唔到呢...!!

其實我口話佢係衰貓，之但係我成日都同佢傾
計，或者知得我最多內心深處的心事最多係怇
，我覺得佢係有性佢係知道的佢係感覺到的，
每當我唔開心時佢真係會過到我身邊倚靠我腳
旁，一係就跳上沙發上;陪我貓真係好可愛，查
實我唔明點解有D人可以咁殘忍虐殺佢，我成日
都同佢講，你很幸福呢，當日如果唔係我拾起你
，你都可能不在人間喇，餓死凍死甚比人殘殺死
，所以當女友不在，牠就係我最好的朋友喇....。

我真係要衷心多謝牠呢....

>>June 12, 2009 at 4:38:20 AM GMT+8

2009 年 6 月 10 日 星期三 【晴】

媽子話"我"當年



今日同女友回娘家食飯，我媽子響食食下飯時講我
小時候既事比女友知，我也不介意講吧，響我讀中
二果年，我帶同學到我家中，但我不知響咩時候，
我同學竟然偷左我媽子房內偷左500蚊，就係咁，響我
毫不知情下就咁比佢偷左錢，好了，故事未完，咁
錢唔見左，媽子一定知，當年媽子一口咬定係我偷，
就係咁我比佢打左人生中最大既一鑊，呢一個係我人
生中最大的死貓，雖然媽子找了我同學對質，但邊有
人會認丫，而對方父母亦都十分維護佢，又話佢個仔
幾乖幾好，點都唔會做呢D事，倒頭來我始終一個人背
起罪名，回到學校，我見佢有錢買好多零食，有錢買好
多野，我肯定係佢偷，而當時佢個得戚樣令我火起，
我當日放食午飯的時候，我捉左佢就響課室，打左我人
生中最狼死的交，我用左學生椅"車"到佢跌低，再按佢
響地，打左佢幾拳，最後我仲隨手攞起個粉刷夾硬塞入
佢口，當然我既行為比老師發現，我同佢被捉去見主任，
好彩係主任知我平時為人唔係咁，所以我只係被記手冊，
見家長就冇事，當然我又被對方老母話我媽子唔識教仔啦
，旁人眼睛係雪亮的，說話更加係有力，有一個同學當住
我們各老母指佢個仔，平日點得罪人多點乞人憎，對方老
母最後氣到拉住佢個衰仔走左......自此我冇再同佢講過一句
說話，呢件事發生後，明顯少左人對串我，話我什麼不是，
可能當日個個都見到我點打果個人，怕左我吧.....其實，我
到現在都不能洗脫污名，500蚊都係找唔返，講真..我仲好在
意我媽子為了呢件事打左我一餐呢......!!

今日媽子攞返出來講，我向佢再講多次，我真係被屈，今日
佢竟然先話信我，點解唔肯早10幾年前相信我，就算而家先
話誤會，屈我呢一件事在我人生中係一個不折不扣的事實，
雖然.....而家事情結果係點都唔再重要，畢竟事情過左咁耐，
但委屈仍然存在我心....，回家時，女友向我說，算了吧，過
去的由它過去吧....!!我只是想，我不會像媽子咁，未攪好件事
就打左我先，我一定不會咁樣對待我的下一代.....

可能係咁原因，我情願借錢比對方，都唔想對方因某D原因，
得唔到錢去做D傷害自己同人地既事，錢係萬惡的，但如果
我幫左佢可以解決對方煩惱，我也覺得值得呢....當然，令我
有咁既諗法，還有一個人，一個和我毫無血緣關係的人，是
她在我冇能力時候幫左我許多，解決左我好多好多的煩惱，
只可惜現在已經聯絡不上她，想多謝她都無機會，何時有緣
先會碰面呢....?

>>June 11, 2009 at 8:17:29 PM GMT+8

2009 年 6 月 9 日 星期二 【暴雨】

孤注一擲..?


今年D股票真係...唉...!!!激死我，成幾萬蚊
坐哂艇，冇得郁，算啦，我只希望D股票可以升
返我買個價，我就走得喇，賺錢都..不敢期望
了，希望來緊日子都會好一點啦....!但有時都
要主動出手，同女友傾過，我們都願意向Philip
開一個戶口投資黃金買賣，我都不希望會賺到大
錢，只希望可以賺到點點就夠喇，不過我都相信
他的，如果今次都坐艇，咁我地真係咩錢都郁唔
到架喇......!!

祈求黎緊日子都安安定定，畢竟我們都有點孤注
一擲的感覺，如果問我有冇驚..?我都擔心都驚架
，但有時D野都要搏下既，我願賭也會服輸..

>>June 10, 2009 at 4:02:38 PM GMT+8

2009 年 6 月 8 日 星期一 【乍寒還暖】

完成考試喇


快D恭喜我啦，我考完喇，但唔知會唔會PASS
，不過我諗都中規中舉啦，又唔係好好又唔係
好差，五五波，只不過可以放下心頭大石，真
係可喜可賀，和女友出去慶祝一下先，哈..我都
未知得唔得已經咁開心，如果PASS左我會唔會
開心死啦﹖相反如果肥左，我可能跳樓死吧...!!
可惡係我今日考時竟然落狗屎，路都睇唔見，
唉....一切都係聽天由命吧...!!

怎都好...盡了力，什麼都不理喇!!

>>June 9, 2009 at 10:32:39 AM GMT+8