2009 年 9 月 30 日 星期三 【酷熱】

灰灰的天



越是這樣...我越唔開心.....
我連早午晚飯..都無心情去食....
能做到的我願做，但我冇野可以做到.....
砍頭埋牆死了去算....

>>October 1, 2009 at 1:25:18 PM GMT+8

2009 年 9 月 29 日 星期二 【酷熱】

會恨死我........


不知可以說什麼了，我唔小心成大半杯熱茶倒左
去女友肩膀背脊處，都是我貪快之錯，平時我會
蓋杯蓋，若果我蓋杯就唔會發生咁既事，而家燙
到女友背脊又紅又傷，外表對女孩很重要，雖然
醫生話唔係好嚴重，但包紮後可以清楚見到有點
血水滲出敷料，我見到都覺得佢一定很痛，洗傷
口時女護士話燙得不算深，好番都應該唔會好覺
有疤，但淡淡的疤痕就會留下，姑娘亦都話若果
後期處理得好，疤痕應該變得很淡不會太覺，安
慰她不要擔心，我諗姑娘都係同時安慰我不要太
擔心吧，我估...因為姑娘知兇手是我先咁對我講...
醫生講大約一星期左右會乾水個傷口，但呢段時間
她會好唔方便，好似訓覺不可以躺睡，沖涼亦都麻
煩一點，每日亦都要抽時間去洗傷口，女友明明有
個假期可以休息，現在比我弄到真係要"休息"，女
友口雖說算啦..不要想不要提，但我都算得上毀她的
容吧，內疚又難過....，我看得出女友今次真係好唔
開心....!內心一定恨死我吧.....

>>October 1, 2009 at 6:02:51 AM GMT+8

2009 年 9 月 28 日 星期一 【雷雨】

穿針引線...?!



放工同女友、女友既同事阿Annie、Pat、Jadn、而我就帶左
三個同事阿George、阿陽、Shing，一齊北上玩同食，難得幾
天都放假又就到大家，放工唔訓辛苦D去玩都值得丫，約兩點
半左右我地搭B3X去深圳灣口岸，而家麻煩左好多，過關要填
健康申報表，而女友佢地一早已經填左一叠，方便佢地過關，
而成班女就一支箭就好順利咁過左去對面"岸"，而我地就仲係
一支筆輪住用，係咁填係咁寫又寫錯又寫過攪左好鬼耐先過到
對面，踏入深圳之地，去到要兌人民幣，阿陽佢就話，唔係可
以用港幣架咩...?唉.....傻佬你估仲係以前咩，而家人民幣仲貴過
港幣，100蚊對88個幾，知唔知咩係風水輪流轉呀，而家你試下
上去比港幣丫，人地唔做你生意兼叫你過主呀..!!!呢番說話係出
自阿Pat口中，咁當然我男同事聽到佢一輪嘴咁講，都冇得插嘴，
呆聽....樣衰呀..!!大家都哈哈大笑，笑阿陽一面無知樣.....!!!都好既
大家可以攪下氣氛，話哂大家都係第一次見面，大家笑下講下，
混熟一點，一陣大家玩都會開心一D嘛.....!!好喇兌好錢，大家都有
點餓，其實大家都冇咩點食過野，於是我地搭的士去左個大購物城
內，其中一間食肆，看來裝潢都好豪華，直頭係酒店咁，地方大到
離譜，去到佢門口要等一等位，呢個時候有一班人向我地Sale按摩
推拿，我地當然聽左便算啦，收左D單張當應酬佢地，而女士們佢地
因為唔想白等位，就話行去睇女人野，咁我地唯有幫佢地等位啦，女
仕們一走開，果班人又Sale過我地，向我地細細聲..推銷佢個場點好點
好，最緊要果句，『又平又近....乾手淨腳...冇手尾又有專車接送，仲
有好多靚女"陪"呀...!』而我地果刻先知，原來佢sales我地上馬欖，但
佢地一番誠意又專登等女仕行開先講，我地又話好喎...真唔真呀...靚唔
靚先，尤其係阿陽..真係好似去玩邪骨場咁，跟住我地好快就有位，可
以入去食野，George同阿Shing就話好好好........我地食飽先去，仲大大
聲講，同一時間班女既行完返來，佢見我地咁氣氛高漲就問我地咩事
，我地當然話冇冇冇......，有位坐有得食興奮啫....!!!而果班sales就好識
做彈開左，入到去坐定我地先話比班女知，佢地推我地上去叫雞呀...!!!!
班女既以為我地真係去架...!!!尤其係阿傻Annie瞪著眼話"你地咁架..??"
咁我地為左自己既聲望，當然話唔係啦，但我都相信..我地呢幾個出名
唔識偷食既人，尤其係George添，跟本冇諗過要去..!!!

真係坐定定喇，食自助餐，全場真係好多野食，有日、中、法式既菜，
甜品、海鮮、仲有可以叫燒物添，總之應有盡有，就連紅酒、啤酒都係
任飲，由大家開頭飲汽水食野，直到變左飲紅酒食榚點、甜品，大家雖
然飲得唔算真係好多，但大家都係有少少wing wing地，最臉紅係阿Jadn同
埋George，兩個紅到一模一樣，笑到我地死，又話佢地好襯呀，迫佢地
兩個一齊坐貼影左幾張相，見到我地D行為，好明顯係有酒精影響啦，大
家食左三個鐘，坐到呢一場散先走，埋單800蚊人仔都唔使，真係平到大
家都醒哂，因為大家都望緊張單有冇錯，原來証實係平到你唔信，食飽
飽之後出去又見到果班Sales，又sale我地.....我地話一陣去一陣去..!!!!就係
咁應酬左佢地兼甩身喇.....!!!

出到去天開始黑齊，想影相都唔係好啱時間，大家唯有行下街，內地消費
一下啦，其實果度有點似香港又一城，當中既貨品好多仲貴過香港，女仕
一睇化妝品再問價錢，已經彈返出來，同我地講仲貴個香港間莎莎，最後
我地去左超級大市場"家樂福"，估唔到我地可以一齊行咁耐，足足行左兩
個鐘，買既野全部係...糖果、大量日用品、零食、麵餅，最後比錢係唔夠
錢，好彩阿Pat同阿Jadn都有銀聯Visa，解決大家比錢問題，男仕們變相欠
左佢地班女仔一身數，我地男仕們真係用到連的士錢都唔夠比，落到深圳
灣口岸時要走去前面架班女仔既的士借錢，真係超級樣衰，最瘀係仲要比
的士佬見到，果一刻我地同時有個念頭..就係滅的士佬口....!!!下車大家都
一袋二袋咁去過關，點知又發生同一件事，又要填健康申報表，一支筆幾
個男人搶住用，班女既抽左D好輕既貨過左關，到我地拎轉頭時班女唔見
左，只遺下最重個幾袋比我地抽，影都唔見，我地就好慘咁抽住咁重野過
關，返到香港個B3X線巴士站先見到佢地向我地揮手，仲話幫你地排左個
頭位上巴士，班女擺明玩野，條人龍廿人都唔過，使鬼排隊咩，不過大家
都都有風度既，算數啦，大家笑笑笑過便算，上到車.....大家坐既位置同今
日晏晝有點不同.....

其實......今日我同女友擺明有心想佢地認識啦，雖然唔知大家會唔會有機會
，但我既清楚我班男既係唔會拈花惹草既先敢帶比佢地識啦，女友講到明
佢地D女既都係正正經經架嘛，其實我知佢地咁多個.....感受到今次用意係咩
一回事，但點都好丫，大家都叫玩得開開心心，有講又有笑，最緊要佢地都
肯好願意自動交換電話號碼同Msn下次一齊玩過丫，就算今次唔可以成事，大
家都可以做過朋友識多幾個異性丫，起碼之後女既唔會再同我女友講，『跟本
無咩機會時間認到男性朋友』，而我果邊D男既又係咁講『我地無端端又點會
認識到女仔丫』

不過夜晚我都同女友講，阿Jadn同George真係幾投契，兩個都好襯丫，無論
高度、性格、兩個都係咁『直』....兩個講野都唔識得轉彎，諗到咩就講咩，
大家都係爽快性格型....!如果佢地真係成事咁就真係好喇!!!因為George真係確
實一個好男仔呀，之後女友又講，阿Jadn夠係一個好女仔囉....!!!!


我......!!.女友............!!


互相.....!!


『哼』!!!!左一聲.....


巴之閉..!!!

>>September 29, 2009 at 8:31:42 PM GMT+8

2009 年 9 月 27 日 星期日 【乍寒還暖】

去定唔去...??



女友來緊開始放大假，其實都係早就預謀好，Plan左好多
野要做，其中一件事就係去做婚宴既姊妹，即係要劏人開
門利是果D，血盤大口九萬九千九百九十九毫九...!!!如果比
著我要應付我一定拉大隊走人，落去飲杯茶先上再來講數，
呢招係二十計中既反客為主嘛，其實結婚我都唔明點解要
玩埋呢D無聊野，有一年我做兄弟時就頂左一杯廿四味加
魚膠粉啫喱，啫喱內有任務要做，又要做完先過關，雖然大
家玩得好開心，但冇一知道我內心係幾難頂，仲苦過苦瓜，
廿四味都叫一口氣吞哂飲完丫，廿四味啫喱喎..要咬要o趙要
吞，真係完全食哂D苦味，呢一輩子我都記得果杯野，其實
唔應該用杯形容，應該用碗形容先係，因為佢真係用食飯既
碗裝住，真係好乜難食.....!!除左回想當日我的慘事外，我仲
想講今日女友同佢D姊妹試當日著既裙，而條裙今日攞左返來
，係一條好Low cut既裙，女友試左上身又出奇地唔使改，啱啱
好Fit哂，而且我第一個反應係"嘩"左一大聲，真係好靚，唔係
講笑，真係好靚呀，仲要自己求其扎左一個髻﹐話就話求其，
但都扎得好實，跟住仲要係咁以咁Make up....，都係果句..話就
係咁以，其實仲化得行過平日返工果時，最後總之係全副武裝
著哂上身，由頭到腳都攪掂哂，出來比我見到果刻，真係有點
暈暈地，差在未噴鼻血吧....!!!可惜當日我係唔會去丫，同佢D小
學同學又唔熟，費時到時要自己招呼自己啦，又要比多份人情，
錢多咩...!!!但我好肯定當日，我打死都要親自接女友回家，著到
咁我真係怕佢比人拐左去，但諗諗下自己又唔想比人睇蝕自己個女
友喎，當日有姊妹就會有兄弟，我又擔心佢會比人撩..，丫........而
家我十五十六....我到底去定唔去好呢...!!!其實我知女友一定會乖乖
唔會曳，但我始終都有點怪怪心情，總係覺得佢會比其他兄弟撩佢，
我呀......對住女友咁耐，佢咁一著我都眼定定咁望，更何況係未見
過佢既男仔呢....!!唔得呀...唔得呀...我點做好.....，最衰係妳呀，妳
無情情著出來比我睇仲咩，攪到我而家心情好複雜呀....!!!


呀.............我...的...天...呀...!!!!我點做好呀....??跟住去...定係唔跟住去..
大家不如比D指示我啦....!!!快Msn我或者email我啦......

>>September 28, 2009 at 1:38:23 PM GMT+8

2009 年 9 月 26 日 星期六 【酷熱】

嘔心情慾Show


今日出左去，搭E33線巴士回家既時候，嘩.....見到
D我同女友都冇野好講既事，事源今日去等巴士返
屯門，去到見到有架巴士已經等緊客，而架車仲有想
開走既意圖，於是我同女友好似追狗咁追架巴士，其
實還有一個原因去追既係，呢架巴士D坐住係可以調
較背部，而且仲係闊一點，亦都可以話舒服一點，呢
D車通常只會響A線出現，E線係好少有，用咁平價錢
去搭呢D車..抵啦....。上到去據我地經驗...係坐上層尾
二果行位係最舒服，因為佢坐位調較角度係比其他位
係大一D，我地亦選擇果個位坐，一上到去女友就好
快訓著，我諗佢太倦吧，沿途客都唔多，車都坐唔滿
，仲剩底好多位，不過中途站上左一對男女.....唉....佢
地坐到最後我都估又係攬攬鍚鍚架喇，不過算喇，我
當睇唔到啦，但係天黑車窗係會反光，我唔想睇，但
都比我睇到，佢地真係好跨張，全程都係又攬又摸又
摷仲要濕吻到有聲，我唔想比人知我睇到，我唔郁當
咩都唔知，但佢地真係錫到D聲連我女友訓著都可以嘈
醒，我見女友醒左就拍佢耳語佢知咩事，於是我地兩個
就一齊望住塊反光車窗..欣賞Good Show........，全程55分
鐘，呢對男女真係可以攪足全程，雖然冇人發現，但話
哂都有人響度丫，當我地死架咩，我亦都服左佢地可以
有耐性攪咁耐，當中還有些荒唐動作，費時響度講，到
左屯門，佢地落車先，我地就去總站落，本想諗住去食
D野，見到佢地都有點飽飽地，因為個男既又好似食白粉
樣咁，賊眉賊眼咁，女既身材都好飽滿下，樣都唔係好得
果D，即係兩Pat咁既野攪下攪下咁，可想言之當時係既咁
核突......!!!回家路程中同女友都笑緊呢件事，其實我地係唔
係都應該反擊下.......做返佢既野比佢睇呢...??女友一聽到就
成個大手袋，即係返工果個正正方方呢個袋，成個車埋黎...
嘩.....當堂暈一暈，其實我覺得女友有時都幾暴力呀....，女
人真係唔可以開罪，尤其係自己果個添.....，真係鬼都怕左
妳呀....

>>September 27, 2009 at 1:58:47 PM GMT+8

2009 年 9 月 24 日 星期四 【酷熱】

馬路狂人


唉.....今日差點撞車，我頂.........我真係比對方司機玩死
，在十字路口已經奇怪佢點解會突然收慢部車，原來佢
係為左U Turn......，當然果段路係唔比咁做啦，我亦估唔
到佢咁做，佢又唔睇車..唔睇人，只顧自己，突然比油U
Turn，我差點就炒埋佢度，還不止，佢仲要U Turn完之後
，因為在行人綠燈時，人來人往期間夾硬衝紅燈，完全妄
固任何人既安全，不過我知果個位有"天眼"，如無意外佢
應該會比天眼攝下全過程，我估個司機應該唔熟路就亂咁
黎......!!我期望佢快D收到傳票，扣佢分....停佢牌，等佢唔
好再為禍人間呀.....!!!

我諗都唔會有人明我講咩，遲點畫張圖上去說明啦...


簡單示意圖，我已經好努力表示，奈何我美術設計有限，只可以畫到咁.....唔知大家睇唔睇得明呢...??


紅色長方形為佢架車，我諗後面架巴士都估佢唔到，因為佢都要扭一扭先避過架私家車...!!!



個司機真係亂來，話開車就開，完全唔使理任何人....!!!!




好勁...佢真係敢開車..唔理係紅燈...!!!不過如無意外..天眼已經Rec一切....私家中司機一定走唔甩....


>>September 25, 2009 at 5:03:42 PM GMT+8

2009 年 9 月 23 日 星期三 【炎熱】

可愛BB打.......飛機


正話回家搭輕鐵既時候，我感覺個揹袋比人攪野，
為左唔打草驚蛇，我當唔知冇事發生，諗住睇定D
先算，由於入夜天黑之後，車窗係會反光見到背景
，所以我就望塊車窗，睇下咩事，點知....原來有個
坐BB車既小朋友，都幾可愛架，佢係度係咁攪我又
打我架飛機公仔鎖匙扣，打飛機打得好開心，不斷
咁拍，哦....原來只係小朋友...算啦...由得佢玩到夠啦
，雖然佢阿媽係咁打佢手仔，但都冇損佢打飛機既興
致，我為左唔打擾佢玩，我當咩都唔知，但其實我係
用反光車窗睇住佢，因為真係好鬼死可愛，佢係咁玩
，係咁玩..玩到一時興起...佢竟然用口咬我架飛機，我
即刻縮都縮唔切，唔係因為怕佢咬爛，係因為驚架飛機
唔乾淨，一陣食到佢肚仔痛，果然...一唔比佢拍打飛機，
佢就喊，我唯有繼續比佢玩，但今次我就直頭同佢玩，
拆架飛機比佢攞住，我又整震架飛機等佢覺得新奇D，我
一直同佢玩，玩到我過站都唔理，我足足過左八個車站，
最後我要搭對頭車返去.....但，無所謂啦...我又有時間，又
可以令佢唔喊，又可以同佢玩，都值得既....，如果女友在
旁的話，佢一定玩到唔捨得走，一向鐘意小朋友既佢，真
係一比佢同小朋友玩就真係不得了......，真係要拉走我女友
，一人拉一個，人地阿媽拉走佢個仔..我拉走個女友...哈哈.!!

想起第時要有兩個BB，女友話最好一男一女，諗起要湊仔
我真係頭都暈，一講起生BB...女友前陣子連BB名都改好左，
不過只係改左個女既，男既未改，嗯......生BB始終都係未來
的事，一個BB要四百萬，而我就覺得...起碼都六百萬啦，我
真係要比心機儲錢喇..........我太多錢要花要用喇....好痛痕呀!!!!!

>>September 24, 2009 at 12:07:39 PM GMT+8

2009 年 9 月 22 日 星期二 【酷熱】

一個人想


唉....今個月用多左好多錢，好多都係預計唔到既
開支，每度幾百，呢度又幾千，講真...我好耐都冇
試過咁手緊得咁辛苦，離出糧日仲有幾天，我要努
力捱過去，或者近排我發生太多不如意既事喇，硬
係覺得是誰欠了我咁，情緒同時都差左好多，做事
成日都好炆........，總之呢排我真係好激動，少少事
都會好易情緒失控咁，今日無聊地去左黃金海岸那
邊，在岸邊靜了好一會兒，重新諗諗呢陣子發生什
麼事，其實....算啦，過左去，錢又可以搵得返既，
壞左既野又可以整得返既，如果我好似上次咁向女友
發脾氣的話，呢D事或許好難補救，有些事其實自己
都控制不了，同時其他人又唔想，更加唔關其他人事
，與其要激心板起臉口，自尋煩惱，何不把事情處之
泰然呢...?或許咁...我會有另一個天空另一條路，所以
之前的事當算了吧.....不要叫自己不要再想再諗喇....

>>September 23, 2009 at 2:57:58 PM GMT+8

2009 年 9 月 21 日 星期一 【酷熱】

黑仔指數.....高得驚人


今日放工先知自己冇帶鎖匙，原來一直都有問題，我
地完全冇後備匙放在人地家中，真係冇諗過冇門口入
會點..??幸好今天女友唔係Overnight，如果唔係我諗我
又要做破壞王要爆門，不過都死啦...我在街上做左幾個
鐘流浪漢，最慘係部Notebook電腦一直開著中，部電腦
出哂名運作係熱到離譜，幾驚佢燒著間屋!!!而且肥貓又
響裡面，今朝我又冇比野佢食，我估餓死佢咁滯，在門
外只聽到屋內既貓叫聲，我估佢係話我知..."愛莫能助"吧...!!

無辦法...我只有等女友返來，於是我去接佢放工，其實我
好討厭著住制服週街行，又入唔到機舖、漫畫店、行商場
、去咖啡屋，咩都唔做得，奈何我冇衫換，加件衫我怕我會
中暑....，在椅上等呀等..等呀等...女友終於現身，而我就等
到中眼訓，女友講返...原來我Send電話Message時佢係收唔
到，係直到等巴士就上車果一刻，電話先響，先知我等緊
佢，如果唔係我又係白等.....仲要追返佢車!!其實我係唔係應
該要去黃大仙、車公廟、北帝廟、天壇大佛、許願樹等等地
方拜下神呢??我係唔係開罪左邊一個神呢..???我真係好黑呀
呢排，我係唔係亦都同時要向神父告解一下呢??每日帶本聖
經、十字架出去，有誰可以話我知...我到底呢排食左咩屎...??
咁Q黑....!!!我真係真係黑到貼地喇......，就連女友都對我搖頭
嘆息喇，我係唔係真係死得...冇得救喇...??

>>September 22, 2009 at 3:47:56 PM GMT+8

2009 年 9 月 20 日 星期日 【綿綿細雨】

慳得一蚊得一蚊.........誰教我的...??



今日買了一張辦公室用既有輪有背靠既轉椅，在實惠走了躺
，又在DSC走了一躺，亦都到過好幾間傢具店，為了買一張
椅，響咁熱天氣下東奔西跑都可算係辛苦，但女友又真係好
似越行越有勁咁，果然女仔係鐘意Shopping呀，卒之行左粒幾
兩粒鐘，最後都係去返實惠買，599蚊，但佢地話600蚊先有得
送貨，但又真係唔知再買咩好，我地抽一抽又唔係算得上好重，
妳眼望我眼，我地眼神上決定『自己搬』，點知一搬左出去行
左一條街都冇已經後悔喇，為了一蚊就玩死自己...何必呢....???
坐少兩日都唔會死啦....，但都冇法，洗濕左個頭，唔通返轉頭
話都係送貨咩..?原來張椅都真係唔輕，好似仲越攞越重添，撞鬼
佢丫，我隻手已經比條麻繩整到好鬼痛，抽到我手都紅哂，我
仲問...輕鐵站咩搬左去咁遠咩??點解行極都未到架??最後用左一
年時間搬到輕鐵站搭車，都好好彩..呢段時間冇咩人，所以都唔
算好迫人，跟住氣都未抖順，點解會咁快落車架...??我好似一分鐘
前上車乍噃...?總之舒服既時間過得特別快，辛苦既時間明顯係覺得
好耐，我有如耶穌當年背十字架上山咁，一步一步咁回家中進發，
都係果句，我地間屋點間好似搬左去咁遠咁既??女友都唔係得果望
住我行，沿路一直幫我搖佢果把公仔膠片手扇，但我好想講D風好
熱啊....!!!雖然起唔到咩作用，但都係一番好意，開心既，從來我都
唔覺得屋苑外果條暗鈄有料到，今日佢真係好堅，總之就抽死我咁
滯，去到升降機大堂..有Lift都唔上，我坐左成五分鐘涼下冷氣先，
管理員見到我地咁，問...『搬傢俬呀﹖』，心想...正一廢話，鬼唔知
阿媽係女人..山係石頭海係水....!!!而最致命都係佢果句，『仲咩唔送
貨呀?』我真係冇聲出.......，大叫...『貴丫嘛....!!!!』心諗....要比多一
蚊喎，當然...心中的我正在砰自己心口啦，『點解唔送貨喎??』卒之
回到家即刻攤屍咁攤，而我係第一次飲啤酒係飲得咁快係今次，一
打開個雪櫃就見咩飲得就開，嗆住咁飲，好似去完撒哈拉沙漠返來咁
，飲飲飲，而女友就去沖涼，之後我都去沖涼。

一切回復平靜之後，我地開始拆箱，砌張椅出來，夾手夾腳攪掂咁佢，
其實....砌佢一D都唔難，難在係要用手上螺絲，上到我手都軟，好喇，
攪掂，找過最輕坐上去睇下會唔會冧先，証實係安全，到我坐，唔冧
OK掂哂.....!!當收拾好所有工具時，女友發現張椅個右邊扶手果度，少
左一塊蓋掩.....!!又要再倒出來大檢查有冇掉到，但又冇發現屍骸，大
家平心諗...我地都冇大力跌、撞、拋.....應該唔會爛走左塊蓋掩喎，最後
我地相信係件貨有問題，我電話打去問下佢，佢叫我攞返去換..!!!!我真
係呆了一呆.....吽左一吽.....又要搬..?唔係掛??之後我問佢可唔可以只係換
果部份，好彩...係得既....!!!咁冇問題啦...一星期內同你地換件貨佢.....事
情算告一段落......!!

晚飯....女友煮好，飯都盛好，我只係去食，但我發覺我手....係累到連攞
筷子都手震，仲要震得好勁，最後我食左一個半殘廢餐，全程都係女友
夾餸比我，真係連女友都覺得我.....『你真攞命~你真攞命~你死得未~~』

我話以後都唔會幫襯惠康超市，係佢..係佢教我『慳得一蚊得一蚊.......』
我以後都係幫女友去百佳超市蓄積分冇咁嬲喇....!!!係架喇...我賴得就賴
架喇，點丫.....我都覺呢排心理唔係好平衡...可能我因為前排唔見左錢關
係掛.......，回想起...真白痴..我去實惠買多一舊紙巾都會夠六百蚊，我都
唔知果陣我諗咩......!!最更加令我跌落地係..女友講...『係囉...我都奇怪你
點解唔送貨，佢仲話打左眼色比我知...『送貨啦』........原來由始到終我
都誤會了那個『眼神』......!!!

好...都死得眼閉喇我..!!!

>>September 21, 2009 at 6:50:35 PM GMT+8