| 日記 | 日記主簡介 |
||||
2009 年 12 月 2 日 星期三 【微冷】 我的第一次
正話女友執佢個化妝枱 不覺間已經執左一大堆用過同未用過出來 粉底、唔知乜水物水、臉膜、控油粉、應有盡有..... 有D放到就過期都未用... 很折墮呀.... 為左唔浪費佢.... 正話我做左人生第一個臉膜...(避迫架我...!!!) 又比女友當"模特兒"咁化到我人唔似人...鬼唔似鬼咁 我....發誓以後都唔會再化 原來男人化妝係...連自己見到都想嘔.... 但我明白點解女人會咁捨得花錢響呢方面 我用左佢到粉底真係可以遮到我D..."印" 真係攪到塊臉好白..... 掃埋D紅色胭脂上去.... 我自己好想嘔..... 比女友過完手癮後.... 我慘喇 原來卸妝係咁Q煩..... 要用卸妝油又卸妝棉..... 我仲以為攞棉花紙巾添 卸妝完又要洗臉....超煩.... 我真係佩服女人可以咁有心機整呢D野 女友仲有幫我夾睫毛液 又要另外再用暖水洗 好煩..... 但今日過足女孩子既玩意癮 好特別..哈哈 鳴謝女友咁有心機陪我玩啦 但....下次唔好喇 我怕左要洗D手尾 我而家塊臉都好似仲閃緊呀 明天我點見人呀...? 人地仲以為我變態架..... 激死我喇.... >>December 3, 2009 at 3:46:14 PM GMT+8 2009 年 12 月 2 日 星期三 【晴】 與伯母食早點
今朝早上去左女友既娘家食飯... 有點緊張呀.. 因為我好少見女友既家人 一齊食飯就更少機會啦 慶幸最後都順順利利咁渡過 伯母煮飯原來都幾好食喎 難怪生個女出來廚藝一樣了得啦 食完飯...女友帶左我入佢間睡房"參觀" 內裡的公仔多到佔左半張床..(好典型既女生房間...) 而房內既書真係多到離譜.... 小說同好多參考書放滿兩個書櫃 細心望下...原來仲有以前讀書時代既課本 多手既我好似尋寶咁...不斷搜尋 我仲搵到女友以前既學生手冊同幾本有鎖..鎖上既日記.... 打開學生手冊見到中二中三時女友個樣(當場指住張相..我笑死左當場) 一個超短髮既造型...成個男仔咁(男人頭..女乜乜...男女廁所都入得..哈哈) 同而家簡直兩個人....(一個男生..一個女生..!!!) 而家既女友靚左好多好多...(真係架...咁先似返個女仔嘛..) 所以妳好難怪當日妳叫我..而我唔認得妳呀 其實...我仲好想睇妳D日記呀... 好想睇妳寫D咩記左D咩呀 點知...一掂妳D日記妳就搶都搶唔切... 內裡一定藏住好多不可告人之秘密哩 有成十四本咁多 當小說咁睇...睇三日都睇唔完啦 好孤寒呀妳.... 食完飯後....執左一大堆野返去我地屋企 包括好多書、相簿、衣服、鞋都有十幾對...唉!! 唔怪得妳會拉個大黑出去啦 成箱野拉左返去屋企之後...時間都唔早喇 又要係時候返工喇 我夜晚等妳陪我食晚飯呀.... 食咩就妳話事啦.... 換衫返工喇...!!! >>December 3, 2009 at 4:44:59 AM GMT+8 2009 年 12 月 1 日 星期二 【晴】 Nice Flight 臨返工前見到女友可以咁舒服唔使返工...真係有感而發..有野想講 好羨慕女友點解會有咁多假放 今個月女友個Roster有好多個"G" 不過為左搵多D....女友話要Swap幾班機返來做..(好勤力呀....) 仲話去邊都肯....連BLR、DEL、MAA都肯做...!!!(唔通女友真係好等錢洗...??) 我好羨慕女友可以週圍去 每次聽佢去既地方.....好似"哥本哈根【CPH】"(我都唔知咩地方黎...聽都未聽過!!) 後來先知原來係丹麥內其中一個地方(自己真係孤陋寡聞呀...) 好喇...到女友話去"東京"【NRT】、"台北"【TPE】....呢D地方 又會話...我已經去左好多次...一個人去冇咩感覺喇已經!!!(哂命啦妳...!!!我好多地方都冇去過呀....!!) 不過TPE、NRT、KIX、TAO呢類Short Haul..多數都係Turn Around...(我覺得而家自己好勁...我記得大多數既IATA代號名..) 去到都唔會有太多時間行街玩下.....(但都叫踏進人地國家丫...) 若果比我可以到一到我已經覺得好開心好滿足..... 因為我未試過嘛... 如果我咁去一去....冇幾千蚊都唔使旨意去得到 所以...我嚴重警告妳呀..咪再響我面前講..."又係呢個地方"呢D說話呀...(我咬人架...!!!) 不過...我都唔係冇著數既... 最少我都可以間中得到各地手信、明信片等等 而家好多時已經有朋友問我女友今個月會去邊....(想知自己問佢啦...咪再問我呀!!) 可能撞中女友飛去果個地方會有野要買 家中隻肥貓咪都唔輸蝕丫...(貓咪話...哼~使乜講..!!!) 佢D手信都唔少... 而媽咪買食物比佢多既....(所以食到而家咁肥囉...!!媽咪出錢..貓咪出命...唉!!) 難怪隻衰貓咁鐘意親親媽咪既....(世上只有媽媽好嘛.....) Anyway.... 我知道女友好鐘意自己呢份工 曾經有為我諗過轉做Ground....(返工可以定時定候一點..) 其實一個人可以寄工作於娛樂.... 係人生一大福氣喇 所以......不要再傻傻的問我果個問題喇 想做的....妳就繼續做啦 我只想妳而家..以後..永遠..都可以開開心心..快快樂樂咁 其他問題....等到我們真係生左小朋友先諗吧 到時先再考慮啦 好嘛...!! >>December 2, 2009 at 2:39:34 PM GMT+8 2009 年 11 月 30 日 星期一 【晴】 攻心計 每人總會對有D事感興趣..(偏偏我就唔知自己有咩興趣...可能我唔係人啦...) 姑且唔講其他人鍾意咩興趣... 因為個個都講下...跟本冇可能講得完 今日放工女友來接我(仲要係坐冒險號....) 放工後.. 大家見冇咩做...食飯又覺太早， 就走左去行下街 我地行左去屯門市廣場又出左天水圍銀座..再行埋元朗行千色店 跟手再去埋元朗廣場..仲行埋街邊既舖仔 元朗有間專係賣家政既用品...叫做"家政坊" 無論家政用既工具、材料、食譜都有 總之應有盡有....簡單到連麵粉都有幾個種類.... 女友響呢間鋪留左二十分鐘都唔願走....(我好悶呀...衰鬼..!!) 不斷睇果度D食譜....(比睇衫睇得更入神...!!) 又向店員左問右問....(毫不客氣地咁添...!!) 跟住女友突然轉個頭向我度 問我...."返去整點心好唔好...??" 我問...咩係"點心"?? 在我心目中..食得既都叫"點心"... 女友更正......即係整傳統點心...蝦蛟、燒賣、叉燒飽...... 跟住仲攞本食譜向我面前...係咁篤....呢D..呢D呀....!! 我當然冇所謂啦....(有得食就乜都得啦...) 但......冇聽過話妳識整喎... 女友拍心口話去上堂學囉 仲話知有個Course上十幾課....學整呢D點心...1700蚊學費..!!!(點解妳會知架..??) 我話....妳已經要上公司既堂喇喎....兼且妳又要返工...妳顧得掂喇..??(掂...!!!!!!) 見女友寫包單話冇問題.....咁我都無所謂啦.... 跟住我諗..我地屋邊有蒸籠等呢D架餐呀...? 女友話....咁要買部新架喇.... 之後去到電器舖睇....一個電子蒸爐都要平極都要千蚊...貴D既幾千蚊都有 仲要容量唔係好大添喎 再諗..家中都廚房都冇咩餘位擺啦... 我話...不如算啦.... 食點心去酒樓食....再唔係去百佳惠康再唔係豪一D去CitySuper買十包八包妳蒸過夠啦 女友聽左有點發晦氣話....咁我餐餐買飯盒在你食算啦好冇???!!!! 再講...又問我....."同我一齊我鐘意咩興趣妳唔知嘛..?" 再講....你係唔係覺得我整蛋糕呀包水餃都覺得我攞黎自己做嘛...?? 想話我多餘嘛??(我從來冇咁講過喎...!!!) 再講....我整比你食....你唔會開心嘛...?? 係唔係食得太多......厭悶哂.....??覺得我多餘攪咁多野出來?? 我整完從來未叫過你執廚房喎..!!!!(得得得.!!!冷靜D先....我冇講過咩喎...!!) 女友連消帶打咁講左以上一大堆說話...(其實唔止講咁少...) 仲講到好似想喊想喊咁....!!!!! 我話....唔係...唔係...!!!! 女友立即變臉...笑盈盈咁講....(果然有嚴重職業病呀...隨時都笑得出) 咁你應該支持我買個蒸爐比我啦學整點心啦....係咪..!!(係...!係...!) 我要呢個大既...(篤住想要果個..) 我開始明白正話女友係有心玩我耍我.... 講一大堆野原來係想我比錢買野...(完完全全跌入呢個陷阱....!) 響呢個時候..我還可以說"不"嗎...?? 本能反應去望望個價錢...(@#$@#%>~#...!!!) 我話...咁呢件野就當聖誕節禮物呀.... 女友話...咁呀..咁我要再隔離呢個多功能D既.....!!!(個價錢仲...!!!!!!) 我真係不得不佩服女友既"手段".... 呢D先叫"攻心計" 不過....算啦.....!! 講到尾我都會有得食既.... 不過等妳上左堂先買啦好嘛.....?? 返去仲要執執廚房D位呀..... 唔係講笑呀......真係冇咩位放喇(妳本身個廚房已經好多架餐...!) 要放個有返咁上下Size既蒸籠入廚房.... 真係要諗計點放呀...!! 唉....都唔知點講妳好囉... 今次我真係頂妳唔順兼服左妳囉..!!! >>December 1, 2009 at 1:55:30 PM GMT+8 2009 年 11 月 29 日 星期日 【微冷】 又再去混吉 女友今日去魚翅城上Business Class Course 一上要上到下晝五點半先有得放 而我放工又走去搵佢 接放學之餘一齊順便食埋飯 行下行下始終都要去返Terminal 2 果邊搵食 食完又去左商店街"混吉"一番 其實我好懷疑個"食蕉"係唔係認得我地 上次女友著住便服就話做隱形人....扮冇人知冇人識.... 但今次成封大利是企左響度....邊圍玩.... 擺明"混吉" 女友好大膽呀.... 在Terminal 2 上演左一幕"魚翅女混吉實錄" 我真係冇眼睇.... 女友依然自我感覺良好.....繼續玩所有Tester.... 玩完..食完..等巴士準備返屋企 今日唔係出Trip....女友都要帶小黑出去上堂 都唔明點解唔使出Trip都要拉小黑出街 噢....公司話呢D係一個Crew既 Image喎.... 真多餘....咁做Ground Service果D點算...? 又唔見佢地拉個通街走..?? 唉...... 總之妳地公司都係多野又麻煩....多多制度 真係同我公司有得Fight 妳就好啦.....下星期一先返工喇 見到妳過Roster..真係妒忌死... 天呀....大家都係返工.....天理何在呀??? >>November 30, 2009 at 3:46:46 PM GMT+8 2009 年 11 月 28 日 星期六 【晴】 My Last Day Sick Leave 多謝醫生慷慨咁比左三日假比我 明天...我又要回到工作懷裡 不打緊啦...我都賺左三日 三日裡我都冇出去其他地方... 基本上除左接送女友外...我都冇其他地方 一來係病假...免得有人見到我以為詐病唔返工呀 況且....女友臨出走前已經講到明要我乖乖地咁休息 女友已講到出口...我還敢唔聽嘛...?(想死頂...!!!) 今日C4中既阿成打電話比我 叫我出去食個飯... 開頭要我去到舞雷公咁遠食 我咁狀態當然話唔好啦 誰知....他越叫個地方就越近 最後講到話去我樓下食...(咁無所謂啦...) 去到同阿成乜都講下 講下佢呢排點...其餘C4有咩動向 講來緊聖誕節有咩攪.... 原來...C4已經講好聖誕節北上..... 去做咩....就到時決定... 但都離不開飲酒、唱K、飯局、圍內朋友既小賭局 以前去呢D節目...跟本就唔會問你得唔得...去定唔去 因為唔去即係唔當大家朋友啦.... 所以以前我都幾多節目 而且當時冇女朋友.... 真係想去邊就去邊 但而家個個都要問多我一句.."去定唔去" 因為我身邊多左個人 所以大家朋友之間已經疏左好多見面 今日阿成之約到我.... 係女友今日仲未夠鐘回港.... 如果唔係.我睇怕都係推左多 個個都話我..自從同呢個女友一齊 我就好似咩都要身邊既人批准先可以做咁 好似今日咁..... 阿成約完我食完飯去酒吧飲幾杯吹下水 我話唔得..我呢段時候要接女友放工...我話我一早應承左女友 阿成立即用D不屑眼光望我.... 開到口講...."使唔使成日接呀...?" 拉鋸左幾分鐘時間我都係話唔得 咁食完唯有各有各散.... 其實我都想去玩下 但係我一早向女友講過..總之我有時間我定會接返工放工.... 再講....一個人由咁遠回來..點都想有人接啦 不知怎講 我點都唔想女友一出來..左望右望時都見唔到我等佢 我見過...我因為遲到女友唔敢走...呆等個樣子 好似被遺棄咁...我睇得個心會好唔舒服 那次呆等待的她......一見到我出現時 臉孔由呆呆咁突然變得開心咁起身走向我來 其實我果一下心情唔係太好..(感覺好差.....) 我不知怎寫出這種心情 大概係女既想男既接..但係又遲到..女既呆等..到等到你由呆樣變開心樣... 呢個轉變即係話我知...女友好想我接佢...就算我遲左好耐先出現，女友都冇嬲仲仍然開心地笑臉迎我 但係事實上女友係有理由去嬲嘛...(因為果次我遲左好多...) 果次女友比我覺得係....佢係需要我，即使我遲大到 有時我問自己係唔係重愛情多重友情 如果好朋友同女友同時出事..我會選邊個? 我不知怎答 但我知朋友可能還有其他朋友幫...因為朋友不會只得一個 但女友..我只得一個，女友有事時第一時間想便會想我先 我看醫生要留醫院 我留資料第一通知都係寫女友在先...家人寫第二 每次女友都話唔得閒..攰的話不要來喇.... 這真的心內那句嗎..? 同樣... 每次...女友放假跟我車時 要女友坐幾個鐘頭不斷來回 每次見不多五分鐘又要開車走下個總站見 你估坐個鐘頭不斷來回不痛苦嗎...?? 我亦都係話過佢 咁悶坐住來回....不如回家休息下仲好啦 但你估下我心中諗....我想唔想女友陪我來來回回丫...? 點講...今日我都推左去下半場走去接女友放工 當大家肯定見到對方時... 她總會急急走過我果邊 雖然每次行為動作表情都係一樣.... 但唔打緊....我都會不厭地接妳放工 放工後坐上巴士..... 今躺若果不順利的話聽妳訴苦....講講講..!! 今躺若果順利既開心講完....就挨向我小睡 今次.....妳呢躺很順利過渡... 但搭車時妳不是挨向我瞓. 而係不斷撞向玻璃窗瞓 隨著巴士搖晃係咁撞.....(妳完全冇感覺咁..) 所以下次不同我爭坐窗口位喇... 撞傷我唔使夠錢.... 但你撞爛玻璃窗要賠錢呀....知道冇..! >>November 29, 2009 at 7:16:15 PM GMT+8 2009 年 11 月 27 日 星期五 【晴】 S.L第二天... 在家中休息中 一早比上面果層嘈到我迫住起身..(鑽牆拆屋咁...) 連貓咪都比佢一早嘈醒... 首先我咩都未攪就餵貓先.....(又係貓咪罐頭...) 因為呢個係女友妳既命令.... 之後..我先找雪櫃果D已經攪拌好既蛋糕漿.... 然後開火...隔水蒸...(留言字條講明一定不可以焗..!!) 蒸左出來成件馬拉盞咁...... 白色....又軟熟既蛋白蛋榚.... 真係食入口好香蛋白味... 同雞蛋打做既蛋糕好唔同.... 好快我就食哂 食完我做下女友平時在家做既家務 家中雖然不算大...但都不算細..(夠兩個人住有突啦..) 掃地、拖地、抹塵、執屋、洗衫、燙衫.......連厠所都洗埋(突然覺得自己好勤力呀...!!) 女友一個人平時做哂既野我今日一個人做 原來真係好辛苦... 我響度諗..我成日話女友點解可以食極都唔肥... 可能跟本只因為大量家務勞動先會咁...(同先天無關...!!) 以前我在錦田...家中細...執得易 最主要當時女友係冇要求執屋...我執成點都冇所謂.... 但而家唔係...女友始終有點要求 唔知而家係唔係生活習慣感染左... 我同女友既恤衫制服、我條褲、她條紅裙、紅色外衣都要覺得燙直先先著得上身(有人會諗多餘啦...燙乜鬼丫..) 看見她整套制服就會諗.... 點解佢套衫咁似比公仔著咁....(因為好細件....) 最得意係件紅色外套... 正面係利是封...反轉就變左成個"檸檬咁.." 若果唔係黃色件外套領口位果邊有個公司嘜頭響度 真係反轉著都得... 條裙真係好似惠康超市絛裙咁... 難怪上次阿婆錯認女友係惠康職員.. 問D餅乾放去邊...(傻到係女友將錯就錯咁...真係又親自帶婆婆搵) 唔做Crew可以做惠康超市店務員都得呀...(嘩....人工同性質差天共地呀...妳肯嗎..?) 做左半天..我都終於執好哂.... 我自己好滿意呀.... 因為我覺得同女友執既係差唔多....(十分之整齊企理..) 同時亦體會到女友平日係幾咁辛苦... 可知我仲未買餸煮飯喎... 唉....平時還要女友放工做咁多呢D家務 真係好唔人道呀.... 女友平日叫我唔使做....(會不會心中其中好想我幫手呢...?) 妳快D答我啦...!! 其實唔使答都知應該要幫手啦 什麼年代呀..?女既仲一定要做家頭細務咩...? 某程度上...女友都叫職業女性丫... 嗯嗯.... 不知妳而家做緊咩呢..? 瞓緊? 派餐中? 行街中? 我估不到呀....!! 我而家就聽歌、打日誌中呀.... 而家MP3正播緊"合久必婚"呀...(歌詞都幾講我咁呀好似...) 我們會明年、後一年、大後年才會結婚呀..?(我還說不出等到何時才結婚是不是很失望...?) 妳又有咁問.....我們會在那裡度蜜月呀..?(妳成日都話結婚後的願望呢個係...) 妳問我去邊好...我次次都話唔知呀....(口中成日話..妳度度都去睇過..我都不知那裡才啱妳...) 聽到我咁答...妳大概會想兜巴打我吧......!!! "合久必婚"歌詞內有句話"就算跟妳未遊盡花都" 其實...我真係一次都冇去過歐洲 巴黎.....(我而家諗到...我想去呢個地方...) 如果下次妳再問我...我會有答案喇 妳都會想去呢個地方嗎...??(即使我知妳去過幾次..) 等妳返來答覆啦... >>November 28, 2009 at 3:39:20 PM GMT+8 2009 年 11 月 26 日 星期四 【炎熱】 S.L第一天...送兩次機... 其實由醫院出來開始已經冇咩事.. 基本上我洗完胃果刻已經冇事.... 但礙於會有手尾...(呢一洗真係好甘....好痛苦...)
所以都係照醫生吩咐....
休息之餘亦唔好亂食野
今朝一起身....
七點左右...女友已經整好個蒸蛋糕比我食
食完先比我出街
今日要先到機埸比些少現金小伊去台北幫我買手信
上次失策左...只係帶左大黑同小黑
好多野都要夾硬放之餘..仲要攪到行李過重
話雖如此...都仲竟然唔夠派D手信..唉..!!
今次可謂要靠人買去補償....
小伊...靠妳喇!!
講返今日
起身攪好哂..
我出去搭西鐵轉機場快線....
九點九已經坐左響Delifrance食野...(厄錢架...嗚嗚!!!)
點知...佢咩都攪掂哂
仲豪到可以坐的士..(仲爽過我搭機埸快線...)
攪到今日似送機模樣咁...
有點攪笑....!!!
看到佢到咁開心去玩..
自己都想去埋一份
尤其係見佢第一次自己出門既心情
我估一定會好難忘
因為自己都試過...果陣我都好驚...
好驚飛機會唔等我..(名副其實驚比人放飛機喇呢D...!!)
好了...到左11:00左右
她們入禁區..我亦都要止步
幫佢兩個影左兩張相..
四日後先會見喇...
此時
我都走返去國泰城會合女友
要女友自己一個出來
我今次真係有點兒那個
但一次半次....
女友都明白既...
約11:20分左右我架S64到站(架車勁兜路...!!!) 同女友又食點野果腹一下 今日終於見到女友肯笑喇...
我心都才舒服一點...
原來激嬲女友係可以咁可怕....
當一個平日好好既女朋友突然對妳不瞅不睬
真係一D都不會好過...
呢個懲罰比起比女友狂鬧更加可怕
真的...我怕喇...
以後都唔敢....
會笑的女友在國泰城內同我一齊食飯
我覺得好開心呀...
燈光下見到女友化好妝、著起制服、精神飽滿
原來我女朋友真係好靚呀...(敢講唔靚丫?...!!唔係...事實上真係好靚呀..!!)
唉.......為什麼妳竟然會願意和我一起架....??(到而家都很謎呀..)
每次妳都話....冇點解..我鐘意囉!!!
嗯....
我都很願意照顧妳一生一世呀...(而家妳似照我多D...!!)
今次妳飛既係"爛班"....
我知道妳唔係咁鐘意呢一躺架?...
忍耐下啦...我女友EQ很高架...
好得意今日...
我送左兩次機
一日之內送內兩個人去不同地方
一個去玩....一個返工
女友班機16:40先起飛....
在餐廳中同女友一齊食又一齊講
在餐廳中可以見到所有飛機既起飛..降落..
我見到小伊班機起飛....12:20幾分左右起飛
A330-200空中巴士...我不會認錯(太容易認喇...冇難度)
我同女友講..指住架機....
人地飛去玩喇
我地又會幾時先再會去一齊旅行呀...?
說得忘形的我倆...
講.....
我地不如先註冊結婚先啦(誰肯願意嫁比你呀...女友講..!!)
一切說得很完美....講得好開心...講得好興奮
不斷話去邊玩又去邊度遊
香港交通...我可以幫妳慳
出國既飛機....妳可以幫我慳...(好鬼死孤寒諗縮數呀我地...)
細聲講...吱吱吱咁笑
講到上天又下海...飛天又遁地...飛埋上火星
不覺間....女友要走喇..開工喇
始終都要分開
今次....在走出餐廳臨行前
在電梯大堂外....
我抱緊著她....(不理有冇人望喇...!!其實女友不介意...我介意什麼...?)
我不會再像以前咁....
以後每次我都會好似今次咁
抱得妳很緊...
緊到點...??
咪緊到妳化妝既胭脂碎粉
都印到我件衫上囉...
回程我上巴士除左件風衣
先發覺點解有一攤閃閃爍爍白色印響度..??
看埋一點....反而仲嗅到有點香味
我估九成都係妳正話印落去吧....
心中微笑了一笑...
估不到回到家我仲有點小驚喜
我正話出去時妳已經幫我整好蛋糕漿比我自己蒸蛋糕
妳真係對我好好呀
放心啦..我會定時食妳預備好既食物喇
我會定時餵埋貓咪
我不會再要妳擔心我個胃....
同貓咪個胃...
妳一直都冇偏心貓咪....
其實妳一樣都係咁關心我
期望快D到後天.....我會在機埸等待妳回來..
2009 年 11 月 26 日 星期四 【晴】 真的知錯.. 妳今次真係嬲左我呀 好少可咁.....今次我一定激得佢好緊要喇 雖然最後妳得肯開口講我 教訓我一D都唔鍚身，明知大家都易病 我更加一向都係病得難癒呢 其實話得我冇錯既....真係 我病左返工就照顧不到我...(難道要女友詐病來放假照顧我嗎..) 我又唔聽女友講....一早已經叫我小心小心個胃啦...(不是第一次胃痛喇.!!) 真係返工的話我更加要妳擔心...時時刻刻返工時候不斷擔心我 不幸我病時妳出Long Haul時...大家天各一方更加擔心 妳今日仲講我知 原來妳放工表面上報平安同時更想知我有冇唔舒服..有冇事唔妥(係我反報平安給女友先真...!!) 其實原來我先係被擔心的一個 要個女友次次都擔心男友有冇事 我真係好差勁呀 點解會攪成咁...? 點解D事調轉左來做 不是應該男既愛護保護個女既咩 原來我比女友更軟弱.... 我真的要今晚"涉"高枕頭諗下 我呢年來為女友做過咩?? 明天女友都要返工.... 趁女友不在我應該靜靜地咁諗我來緊應該點做.... 待夠鐘喇....一陣我就要去一轉機場先 托小伊買手信.... 好多人都問女友應該成日都可以去到TPE...使咩要托人買 有原因的... 第一....TPE機場既手信店....同香港一樣價錢 第二....女友通常去TPE都係Turn Around...不會有多餘時間購物 第三....就算唔係Turn Around...她通常都要再駁下一程機走...同樣不會有時間買 第四....果邊地道買的多選擇同平好多 所以...... 小伊...我不是老點妳去買架..唔好誤會 見到人地去玩自己又想去 曾經有諗過發一次癲.... 點發...?? 就係TPE即日來回....買後備位....夾硬上女友班機上 為的只想看看她工作的模樣.... 我從未見過女友開工係點模樣 我都相信 總有一日我會咁做....(諗都會開心) 不過....現在可不可以唔好再嬲我呀 妳發嬲唔出聲個模原來可以好惡..... 我真心的怕妳、驚妳.... 我會學乖一點..... 我應承左此時此刻我只會開電腦半小時..(比我打呢段話...) 我轉頭會食藥瞓覺架喇 我知道我係妳"男朋友"不是"一舊快叉電..!" 我打完就立即瞓.... 明天...我要送妳返工呀.... 希望一陣瞓醒妳能夠向我笑返喇 我今次真的知道錯喇... 我今日先知..原來妳唔笑又唔多出聲.....係幾咁....!!!!!!!! 呢個"唔笑又唔多出聲臉容"當算係今次罰左我啦.... 好嘛...可以嘛? 因為呢次妳給的....我都可難受喇!! >>November 26, 2009 at 7:30:37 PM GMT+8 2009 年 11 月 25 日 星期三 【晴】 大教訓 成日都話女友易病.... 其實病都不要緊... 小病都只係打針食藥 但有時大病到入院既先至累身邊既人 昨晚我如常用完電腦上網後 上床瞓覺 仲諗住早D瞓可以精神一點 而且我之前已經比女友話我成日都夜先瞓... 但又一早起身 我其中一個叻過女友既係(以為好叻...!!唉...) 我只係瞓三個鐘左右就可以"叉滿電" 所以有時我成點先瞓都可以返到早更 行車安全...?(妳曾擔心...) 我自己知自己事...我係唔會恰眼瞓 但唯一麻煩既係 我一上車做乘客就會好快瞓著..(再叉下電..) 當我瞓完到站後...我就OK精神... 臨開車前整多罐香濃罐裝咖啡 嘩.......想再瞓都難... 呢D情況..我好多時都有出現.... 有時都幾自我感覺良好架....(因為唔係個個都可以咁做嘛...) 女友以前都會哦下我...叫我唔好咁... 當然我...當佢發UP耳偏風啦 女友清楚我性格 佢大概都知再哦我...我就會唔鐘意 勸告無效也拿不我辦法 可能上天要我狠狠地衰一鋪幫女友出口氣啦 昨晚...當我仰睡時就慢慢咁發覺個肚好"灼" 好似有火燒咁 我平時都有試過咁情況... 但我一食三四粒胃藥再加杯奶就會冇事 昨晚我如常咁做 只係今次我食完都係痛 仲越來越痛... 我痛到在床上縮埋一舊 同時我都嘈醒左正在瞓覺既女友 女友見我咁就再比多粒藥我食 食完唔夠十分鐘 我突然喉嚨一湧就嘔 嘔返之前既野出來... 趕不到入廁所就嘔吐出來 吐物份量不少 而嘔完我成條喉嚨好灼熱好"那" 我知應該係胃酸 女友勸我入急症室....(冇得唔肯....) 我無奈應承...因為我知自己真係好唔妥 但當前要女友幫忙著清理時後才陪到我去 唔使過好耐我再噴嘔多一次 今次仲嘔出帶少少血既野(我倆都被嚇到...) 我都係仍然好辛苦 女友話不如叫白車好唔好 我唔肯...(十分抗拒....) 女友用掃把連地拖搭住一齊用快快手清左D吐物 之後立即飛的士去屯門醫院 沿途我一郁個身...個肚都痛得要命 喉嚨又"那"到我痛 去到醫院分流站評為第二緊急... 坐住痛左成二十分鐘先有醫生睇 人生最漫長既二十分鐘好難捱.... 我要照緊急既胃鏡... 結果出來胃壁損左...胃酸又過多..("那"親正在受傷既胃壁..所以我先會痛...) 胃酸不斷損害個胃壁先會有出血(所以我先有嘔D血出來...) 而過多胃酸經喉嚨嘔出來先會灼傷喉嚨... 在治療室內我要插喉入胃盡量抽哂所有胃酸先來 我見到抽出來既野...好核突...我仲見到有血 之後再打D唔知咩水入去再抽.... 又再打多次..... 來來回回洗左三轉..(好辛苦....插喉令我好唔舒服..好想作嘔...) 最後抽出來D水開始乾淨... 同時我真係冇咁痛...(好左好多喇...) 但麻醉藥未過...我唔走得 麻醉藥有效期間...我不斷不自覺咁流口水..... 到真真正正走得時已經係天光 回家時..我都知我預左比女友哦...我 但女友冇......只係再叫我唔好再好似以前咁... 食唔定時、又成日食酸野、又成日唔夠瞓....攪到抵抗差哂同生理時鐘亂哂 我......無話可說...(今次衰左一鋪結撻撻的...) 回家間屋一陣酸臭味.... 地拖掃把全部不要得....(污嘈哂...) 女友幫我請假後仲要清理手尾 又要等鋪頭開先有地拖掃把買.... 夾硬等到正話先清理完 女友完全冇瞓過....而家仲煲緊白粥我食 我真係傻呀 仲以為瞓得少好叻咁...(經常同女友講我係"快叉"呀) 去食飯飲檸檬茶...連檸檬都食埋以為做專長特技咁....(之前我連檸檬都可以就咁食) 以上女友所做不到的我還懶係叻咁.... 最尾要攪到間屋臭哂污嘈哂、地拖掃把全部要換過新、害到女友冇得瞓左一晚.... 我是不是我累人呀...? 雖然妳冇哦我.... 但今次我真係知衰喇 我會好好咁改善生活同飲食習慣喇 今次是我錯...對唔住呀(要鬧就鬧我啦..今次我不會再駁嘴喇) 我今次真係知道好錯喇 我會聽妳說話不會有下次喇 今次這個胃痛痛得我好痛.... 我完全接受左今次教訓喇 妳返來冇笑過呀.... 妳係唔係有嬲我呀? 妳唔笑我覺得妳好惡呀 我第一次咁樣怕妳呀.. >>November 26, 2009 at 2:40:25 AM GMT+8
|
|
無事嗎?irene佢而家情況如何