2009 年 9 月 2 日 星期三 【酷熱】

肉痛又心痛


好痛呀...個口生左幾粒痱滋呀，無論係食野、講野、掂到佢
都痛到彈起再跌底，今日就連女友整既飯盒都食唔到，平日
我好鐘意飲D酸野，好似檸檬味道果類既飲品，我今日呷左
一口已經痛到反白眼，而更黑仔係要用口"up"廣播，痛住黎講
，簡直係整估我啦，真係想佢快D好返呀，我正話已經用鹽"那"
一"那"佢，希望真係可以盡快好啦，今日我只係飲鮮奶做我既
早、午、晚三餐喇，我可不是BB仔呀，況且我身子唔係好受得
咁多奶類飲品，分分鐘我會肚痾呢，而最最最最最可惡係今日
班同事，還響我面前壽司飯團.....，食果陣佢個津津有味個衰樣真
係...!!!!!!我真係期係望佢，食完肚痾，痾足九九八十一日，包保每
次都搵唔到廁紙呀..!!夠毒哩...!!!

另外今日我又碰見呢一個用拐杖塞實對車門老夫婦，果然佢又從
施故技，阻住我開車，我真係想出去打佢一身，你地知啦..我向來
都冇咩愛心架嘛，我唔似女友咁，咁有人性有同情心，總之響我
開工阻我者，我都想郁佢，咳咳咳..!!!咁當然啦..我只係幻想打佢，
而唔係將幻想變事實....!!我還要份工作賺錢呢，我點敢亂來呢....!!!
因為我好需要D錢做以下的事呀.......!!

放工去左同女友睇有關婚紗相的資料，女友已經"鵝"左我影好多次
好多次，看來都係避不了喇，唯有就範，女孩子果真對呢方面好認真
，行下呢間去下果間又去返呢間，完全唔覺倦，但係我響烈日當空
下咁行，行到我大汗搭細汗，攪到我要即時去買件衫換，其實早輪
婚紗展已經睇過，最後我地決定飛去台北影，去影婚紗相同時去埋
旅行，唉......但係錢就.....唉........刷咭可以不用還錢嗎...???萬分不願意
比張信用咭佢，暗啞底....睇下張單啱數，嗚嗚......小姐....唔好計多我
錢呀，刷咭時亦都唔好刮花我張信用咭呀.....心~痛~死~了~!

>>September 3, 2009 at 5:23:44 PM GMT+8

2009 年 9 月 1 日 星期二 【酷熱】

我是金牌放債人..??


今日返工期間收到光記電話，嘩....我覺得係奇聞呀，因為呢條
友仔以唔會主動搵人而聞名遠播，今次竟然主動搵我，自己都
應該估到他找我應該有要事吧，響小休時間回覆電話給他，問
他有何要事，誰知佢既要事就係『明天得閒食個飯嗎?』若果呢
番話我係坐響椅子聽的話，我一定會從椅子仆下來，簡直天方夜
譚呢...!!趁小休同光記聊左一陣子，原來佢已經做左失業大軍，一
下子都找不到路數，想跳槽回頭之前公司又覺得失面子，其實之前
已經常囉嗦他，做人飲水思源好...經常蟬過別枝怎樣說都不是好事吧
，錢又唔係賺多好多，無謂一下子話走就走丫，可是他一於少理，繼
續我行我素，我亦勸不了他，算吧....人各有志，路他認為咁行係冇問
題，作為旁觀者還有必要再出聲嗎....??好喇，而家自食其果啦，唉..
其實我之前已經好言相勸，但偏偏又比佢指我生性猜疑，諸多擔心....，
現在怪得誰呢...?在短短四分鐘..我又哦下佢........，今次他冇再出聲，其
實我都喜歡幫朋友既，我知光記打比我都係想我幫他留意下有咩工可
以做，多個人多個腦多對眼..可以留意有冇工適合他，不過佢又算係好
彩喎，剛剛我朋友公司又請人，請佢類似以前既職位，當然人地公司唔
係係又請唔係又請啦，平心而論，光記係有一點本事既，如果唔係之前佢
點會成日跳槽丫，傍晚我作中間人幫佢約見工，我都算叫做多一件好事
吧，不過.....講開又講，好幾個朋友都話我係金牌放債人，唔係放錢個D
債，係放人情債過人，可知天下最難報既恩，就係父母恩，最難還的債
，就係人情債，不過大家放無限個心啦，我都明白施恩莫望報的道理，
但求能夠維繫朋友大家良好關係，我賣多多無得還既人情債都冇所謂...!!!
呢D道理和說話，係我女友之前同我講的，所以有時我都不得不服女友的
性格，講到底以女性來說，她都算是有情有義吧.....!!


講開今日係七月十四，週街都見到人燒衣，而燒出來的灰燼紛飛四散，其實
鄙人都唔係太相信呢D日子，總覺得平生冇咩得罪人，君子坦蕩蕩，魑魅魍魎
亦唔會埋到你身，但係今日天黑時唔知係唔係大風，響唔知邊度吹左D燒過但
又未燒完既溪錢入來車廂張櫈度，我亦相信呢D係巧合吧，但突然咁見到，心
都會涼了一涼，響以前小時候我都會跟婆婆去燒下衣咁應下節日習俗，但而家
女友唔信呢D野，所以我都冇好似以前咁應節燒衣。其實去看看外國人....!!人地
過"鬼節"係幾咁開心呢....為什麼中國人要攪到恐怖咁呢...?平常心看啦...只係一個
習俗來吧，又何需忌乜又忌物呢...!!

>>September 2, 2009 at 12:37:49 PM GMT+8

2009 年 8 月 31 日 星期一 【酷熱】

擁有



九月一，呢個日子好大轉變，早上人流多左好多
，所以一眼都要關七，乜都要打醒十二分精神，
坦白講，壓力都幾大，人都緊張左，唉....但要搵
食，無得選擇，有時諗..做人都幾慘，從來我都唔
會太抱怨自己任何事，即使我身體先天欠了一款蛋
白，攪到做任可事都要避免碰撞損傷，不單止係咁
，我發覺自己做事比任何人都倒楣，頭頭都會碰著
黑，不過我有件事從來都冇諗過係...我竟然可以搵
到女朋友..!!!由搵到女友果日開始，我就覺得上天對
我都不薄，攞走我一D野..同時又會比返D野比我，
其實每一次有人讚我女朋友靚呀、好呀、任何讚美她
的說話，我都會有點自豪感，尤其係響班C4中，我真
係要叫佢地妒嫉，有時聽到佢地話"真係唔公平"呢D
說話，我都會心中一笑，其實...在我未找到女朋友之
前，我個人係幾灰，覺得好多事都係唔好，但現在的
我會覺得每事都看開一點，天跌落黎當被蓋，好多事
都會變得容易解決，其實我人生都唔差丫，能夠擁有
家人、朋友、女朋友、工作、棲息處、行得食得走得、
身體四肢都叫健全在丫，...!!我還能求什麼呢...?

>>September 1, 2009 at 2:20:55 PM GMT+8

2009 年 8 月 30 日 星期日 【綿綿細雨】

禍不單行!



心情不太爽今天，一來大脾又唔知仲咩，好似做完泥工
咁，又酸又痺，貼左最新果隻必利痛止痛貼，同事話都
好好用，讚話佢真係能夠止痛，但我買左來用我覺得一
D用都冇，可能個人體質不同吧，所以到而家我都係仲痛
仲痺緊，好唔自在，好想咬人...!!!!!!!!不單止係大脾，就連
我個口都中招，自己食食下野，咬到自己個嘴唇，立刻出
血，流血唔打緊，但而家變左粒好大好大既痱滋，而家連
食野都痛到流眼水呢。禍不單行....幾小時前我又再次唔小心
咬多一次自己個嘴唇，唉..........家下連飲水都痛攪到，正話
我刷牙好似行刑咁，一路刷一路痛，真係真係超級的倒楣呀
，Oh-No.......明天我仲要返工，現在我應該點算好呢...??

>>August 31, 2009 at 7:07:57 PM GMT+8

2009 年 8 月 29 日 星期六 【酷熱】

幸運??定還是不幸運??



今日同女友去左元氣食壽司，今餐真係瘋狂地叫，我
地完全冇諗過食咩，只係攞起個餐牌，係咁指係咁指
要D碟要果碟，結果...佢地攞左一幢吉碟上來放響我地
毎個位，而壽司就用一隻大碟上，好多好多件壽司放在
一起，多麼的變態呢，此時此刻，我地對望著對方...係
咁細細聲咁笑，我估旁人一定以為我地傻左喇，雖然壽
司數目唔少，但係我地都食得哂，到左賣單的時候，我
地估計四百蚊應該有找吧，點知佢收左我地二百三十幾
蚊，我地當然知咩事啦，我地唔敢出聲，比左錢後我地
諗佢應該係計少左一隻最貴既花碟，即係計少左一項價
錢，我們一比完錢，就即刻快快步咁走，慌死佢會出來
追數咁，不過..間中有呢D小便宜，真係會幾開心既，最
少我同女友都笑左五分鐘丫，呢餐多麼的"抵"呀...!!今日
還發生件事，我地要坐巴士出去，但因為懶得追車而坐左
後面果架巴士，我地上左後面呢架巴士之後，巴士開走，
咁啱佢停燈位時，我地架巴士同之前我地懶得追既巴士，
平排咁停下等燈位，呢刻我地見到隔離架己士下層張椅有
個手提電話，我估係有人響上一個站遺下，我地就係咁，
有得睇...冇得執......!!!仲要眼見個師奶落下層時見到比佢執左
，唉........多麼的激心呢...!!!其實如果真係執到佢，都會好似上
次咁，睇下佢咩人而決定收歸國有定係物歸原主既.....!!

只不過...有D野係你就係你...唔係你就唔係你，事都係不能強求
吧...，但點都好啦，今日同女友一齊過左好開心既一天...!!

>>August 30, 2009 at 3:42:53 PM GMT+8

2009 年 8 月 28 日 星期五 【酷熱】

新居入伙..



昨天返工，去左女友班同事度打麻將，其實主要目的
係賀佢新居入伙，響呢D時勢仲可以買樓，仲要係新樓
，呢D咪因住收尾個幾天囉(妒嫉中)，不過佢層樓響好高
層，仲可以望到半個海景，真係好棒，自己都有點心郁
，如果我地有錢的話，就真係好囉，我地就住高佢兩個
單位，哈哈，講笑啫，一陣如果佢睇到呢篇野，主人家
真係攞刀擘我呀，諗長遠點，佢地買樓都應該既，佢都
已經講好下年年尾結婚，開始組織一個小家庭的第一步。

昨日佢未來老婆仲煮飯比我地食，要整13人的份量真係
不容易的事，成班女既就堆去廚房煮，男既就打牌兼打
Wii遊戲機，間屋真係夠大呢，700幾呎，實用率88%，所
以咁多人玩都冇問題，最主要連個廚房都夠大，真係可
以企到6個纖腰細細既女仔，對比我家的大半倍差不多，
佢地煮飯用左1個鐘，整左8個餸一個湯，相當不錯，咁
當然我都係覺得自己女友整的好食D啦(唔好怪我呀，我
當然要話我女友好過妳啦係咪先)，唔通妳想我死咩...!!!

今勻打牌可謂真係陪跑，手風亦都不順，我要去到南圈
尾先有得食，仲要係得4番....!!!男既打完食飯，女既就食
要飯打，男呢(即係我地)就去洗大餅，幾個男人堆去廚房
收拾殘局，唉...如果比我班八掛同事知道，我顏面何在呢...!!
不過唔洗大餅都唔知道，原來佢男友都幾有潔癖，事關佢
真係反轉個廚房清潔咁滯，所以現代既男人都唔係個個
大男人主義既，至少我地呢班唔係丫，倒轉諗，其實自
己都算係咁喇........!!不知我女友同樣地都對我滿意嗎...??

>>August 30, 2009 at 3:44:05 AM GMT+8

2009 年 8 月 27 日 星期四 【酷熱】

病瘉後首開工日.....


要返工喇，久遺左既工作，再上手真係有點陌生，
頭果十五分鐘還有些少怯場呢，好彩最後都漸入佳
境，好順利咁做足一天既工作，我Tray內收到通知，
唔記得邊日要做四期新車既訓練，望到果堆新車，
如果咁叫左上左車身顏色的話，就真係樣衰過前三期
，不過真係有點期待它，不知開著它感覺會如何呢..??
好喇......雪櫃內的失敗之作，原來係好怪味，可能加左
雞蛋關係啦，真係一D都唔好食，就連肥貓咪都冇興趣
，雖然折墮...但無法啦..十幾杯點哽呢一個人....?!!果然
煮野唔係我強項，睇黎等佢返來後，我都要請教下御廚
，時間係點掌握的...??我唔想下一次浪費我所有材料呀，
今次....唉..今次真係好折墮呀....攪到鬼五馬六..天一半地
一半，今餐我真的受夠喇..!!

>>August 28, 2009 at 1:57:39 PM GMT+8

2009 年 8 月 26 日 星期三 【清涼】

失敗作品..


在家中我現在要下廚的機會很少，因為家中有個御廚響處，
所以家中每一餐既菜餚都係她一手包辦，而我則無須費心，
以前我都會做一D簡單既甜品，好似啫喱呢D小食咁，一來
容易，永無失手，但有一天，佢竟然做左個七層啫喱出來，
當堂覺得自己連一個啫喱都做不好，所以現在我索性唔整，
免得出羞人前啦，前陣子我有傷在身，不良於行，女友大概
估到我會悶，之會整一D布甸、士多啤梨、芒果糯米滋、啫喱
糖、沙律等等小食，果然.....我得閒冇事就真係走去攞黎食，
原來一個在家中養病真係會悶到走去食野，而果度既份量足足
佔左雪櫃三分一，三份一份量我只用了一星期左右完全食哂，
但今日早上才問女友佢，問佢有冇食過....??原來佢一D都冇食到
，其實我都知她都喜歡食呢D小食，之不過佢今次一點都冇食過
，或者她唔想我唔夠食啦.....!!今日她去左返工，我剛才嘗試整下
佢個七色啫喱布甸，但我上手先發覺唔係想像中易整，原來時間
都要就得好先可以整到，時間耐左會隔開兩層，層與層之間會硬
左，唔會太好食，口感會差左，但時間快左又會兩色拌在一起，唉
...到現在我都做唔到....!!!已經用左七包啫喱粉兩罐花奶幾隻雞蛋
，出來係『混一色啫喱布甸』，芒果粉果批都冇所謂.....可以食得落
口，但係芒果味外的粉混左芒果布甸料合成一杯....唉....見到都唔想
食啦，但有幾十幾杯，倒左又好折下墮咁，唯有照冷凍佢，睇下
明天係咩味道啦，如果食得落口都可以自己哽左佢既.......不過，
我真係唔識整呀，攪到廚房亂七八槽，作品失敗之餘又要攪乾淨
返個廚房，簡直係雙重失敗，其實十幾杯呀，唔知貓咪食唔食得
呢D野既呢....??如果佢食得的話...我就唔使一個人食哂佢咁飽喇....!!!


肥貓咪....明天有好野益你呀....!! (=.=)

>>August 27, 2009 at 6:08:38 PM GMT+8

2009 年 8 月 25 日 星期二 【酷熱】

改變習慣!


假期過埋27號就返工，抖左咁多日要我突然返番工真係
唔習慣，但人始終都要做野既，好多朋友問我好返未，
其實都好返哂架喇，不過唔知點解成日硬係覺得身體有
D唔妥咁，好似而家咁，正話都冇事，忽然之間又好想作
嘔咁，我只係飲左一杯華田，可能杯野甜過頭，就攪到而
家咁，我真係頂自己個身體唔順...，成日都係咁攪到我好
煩，有被折磨既感覺....，而最緊要係自己唔舒服唔單止自
己一個人辛苦，仲會帶比身邊另一半一樣辛苦，叫她去返
工返得唔安樂，怎過意得去呢..!!或者我真係要認真地接受
女友的建議，每一餐要食得清淡一點同準時一點喇，或者
我真係要聽聽她話吧..!

>>August 27, 2009 at 5:29:19 AM GMT+8

2009 年 8 月 24 日 星期一 【酷熱】

送餅....


今日到診所去拆返個固定片，不過要行遠D
要搭車，去到天水圍健康中心，診所內既姑
娘、阿姐、阿叔我好多都識得，正因為咁我
又唔好意思去到兩手空空，所以走左去美心
買左四打西餅，我咁大個仔都未試過一個人
抽住四打餅通街走，一去到診所，阿姐已經
問"買比我地架..?"真係明知故問，唔通我一個
人可以哽四打餅咩...?梗係買比你地啦....!!!我抽
住D西餅去到護士長間房，當然護士長又回敬..
咁客氣呢D說話啦，其實貴就唔係太貴，二百蚊
有找，如果大家開心的話，呢D錢我絶對願意花
，講到底...我見到別人開心，我內心都會開心既
，同姑娘講左一大輪說話，終於叫到我入去拆傷
口，那個位置呢幾天真係苦不堪言，又熱又痕....
，今日我終於可以沾水洗全身喇，再照多次X光，
出來結果係開始癒合中，而且都唔再痛，不過醫
生講呢段時候要小心一D，免得佢再裂過，呢D...
醫生你唔講..我都知啦.....!!總之...拆左之後..而家舒
服哂.......，又要開始倒數返工的日子喇...!!

**請各方好友們...EMAIL"你地知道吧..!!"

>>August 25, 2009 at 2:42:11 PM GMT+8