2010 年 2 月 14 日 星期日 【颳風】

快樂的年初一

哈....

今年發咩神經呀??

佢居然諗住初二先到長洲拜年喎

年年香港住既所有親戚都會初一到

佢初二去到跟本就唔會有人去陪佢(哼..搵鬼陪佢啦....)

咁都好既

我唔使碰到佢

當去到長洲知道佢今日唔到

簡直係新年報佳音

女友都成個人輕鬆哂(見到個傻妹笑得都開心D呀...!!)

如我所講

跟本冇人唔鐘意我女友

係上年全部人都要睇佢頭先...個個針對她(真係唔明點解個個都要怕佢...!!)

今日個個都肯同女友有講有笑(而且仲有兩個BB比個傻妹玩..開心死佢..!!)

今日仲多左幾個家庭來到一齊拜年

好熱鬧呀

我地去食飯都要開三張枱先坐得哂(可想而知有幾多人呢...)

今日我計過我D利是錢喇

我有960蚊....女友就760蚊

始終女友都仲未係親戚住....(但我知女友佢遲早都係會係我地親戚....係我既老婆..)

果兩百蚊係我姑媽同表哥各二百既差別

其實佢地對女友佢都算唔錯喇

每人最少都封四十蚊.....(二十蚊各兩封每人)

起碼我地拆開都未見過十蚊紙先丫(一返到家就開始拆來睇..哈哈!!)

姑媽仲問我幾時到我派利是....

收左咁多年...我仲想收呀

我又唔係財神....派利是我會心痛囉...而家我係咁諗

不過我問親結左婚既十個都有九個話....

派利是係開心既......係快樂事...

唔知到時我會點諗呢...??

唔知到時我會點封呢...??

封一封十蚊比人加都封50蚊Neway代用劵...(仲要唱夠500蚊先可以用果隻...!!!)

再唔係另一封封一張我親筆手寫既小揮春...."身體健康"、"心想事成"、"一本萬利"咁...

哈哈.....真係自己諗到都想打自己呀...(咩無賴來呀..咁孤寒架)

咩喎....我已經想像到自己將來會好窮嘛........

寫到呢到呢.....正話女友見到我以上打的文字後的反應和動作是

佢話我...."妖......!!你係人唔係呀...."度"得你好鬼肉酸呀寫得...."

仲好大力搖左我三野...."你唔好影衰我呀..!!!"

之後就走左出房喇...!!

好......講返之前先

總之今日去拜年都好開心同順利啦

夜晚..我地去食飯...

食飯時睇電視睇花車巡遊

其中有女友間公司既花車出來

原來George個女友今年有份出席呢個花車巡遊....(講真..我真係望唔到佢...!!!)

比人遊街視眾...(Hey...轉個圈呢面揮揮手Say個Hi....行前十步再回眸一笑步生花添呀....!!)

女友問點解幾年都抽唔中佢去(妳係唔係唔識或者得罪左高層呀..??)

哈..我都想睇下個傻妹遊街同人揮手時個樣係點....(一定係好可愛抵死吧....!!)

放心啦.....

你公司年年都有贊助

只要妳仲在公司工作總有一年會選中妳個傻妹既

到時我會變身"宅男"在街上....瘋狂地突出重圍同妳揮手Say Hi....架喇!!!(咪阻住我..姐姐..姐姐我要簽名呀..@@)

大概我瘋了喇...哈哈!!

好喇...明天初二去婆婆家拜年

估計進帳都會最少500蚊

我估女友都會同我同價(呢D咪叫唔公平囉....)

因為我媽邊人比較喜歡妳嘛(連我D表弟妹都係咁....)

係呀....當正妳係半邊女喇...得未..??

妳快D氹我婆婆開心討佢歡心啦

可能婆婆會出手更大架......真架..!!!(婆婆身家好厚架....我個妹同我咁講過..!!)

希望明天妳都多逗利是啦....

嗱.....!!

我都算係咁喇....

點都班到初一二三假返來陪到妳

欠下許多人情債呀我....

但係一諗到可以同妳一齊都放到新年假期

什麼都不計啦....(欠人情債又如何..最多我咪日日收最夜囉..值得呀...!!)

嗯....!!

今天很開心呀....

看..!!!

開心到凌晨三點半都未能瞓到呀我

希望來緊我地的時間和日子都係可以開開心心咁過啦...

2010 年 2 月 13 日 星期六 【颳風】

妳好靚女呀

今日係年三十晚

今年我係刻意寫假放既

因為想同女友一齊行花市同拜年....

果D錢...賺少一點都無計啦....

陪妳係最緊要嘛....啱唔啱聽呀

正話同女友行花市

買左好多無謂野

又買左一棵好細好細既桔返來擺

水仙花又買左一盤返來

不過....買完出返去都唔容易呀

迫呀迫咁出去

真係辛苦...但係行花市都係為左去迫下咁吧

行完同女友去食左個糖水就返屋企

好喇....

明天係初一....又係情人節

如以往一樣我會帶女友去長洲拜年

記得上年真係令女友佢好唔開心

我話過今年佢敢膽再傷害她的話

我一定唔會算數

其實如果碰不到那個人渣的話

跟本個個都對女友好客氣

希望明天會開開心心啦

個傻妹之前唔知天氣咁凍

仲買左一件比較少布既衫過年

明天咁既天氣...

攪到而家個傻瓜響度不斷搵襯衫外衣保暖

但有樣野我已經知道

就係明天女友會...唉..!!!

身高過我....!!

起碼高我兩吋....

妳真係好鬼衰架

講左好多次叫妳買鞋唔好買過兩吋高既

妳今次仲要整對四吋半高既....

妳話妳係唔係有心玩野丫...!!

聽日我點見人呢.....?????

妳要靚都要睇下我咩高度先得架

我唔係姚明.米高佐敦呀....

之不過.....

妳今年買呢套衫同裙真係著得妳好靚呀

只可惜我冇一套衫可以襯托得起妳呢...!!

妳呀快D快F告訴我呀...

我點著先可以襯托到妳的美麗呀?

可不想失禮妳呀

嗯嗯嗯嗯........(雙手托著下巴地說...)

妳真係真係好靚呀.....(好迷人好殺人啊...)

正話未化妝只係試著都咁靚

明天化埋妝真係仲得了既...!!!

比我大叫多次丫....

妳好靚呀....!!(聽唔聽到有回音呀...!!)

最後響度多謝各位Email既祝賀...

我地結婚呢就.....下次講比你地知啦

還有我們的聚餐會過年後由Sara、Carman攪...今次佢係攪手呀

到時大家又可以見下喇....

收到我呢個Email就回覆我啦....

在此我祝大家..新年進步、身體健康

大家有個開心快樂既新年情人節..

2010 年 2 月 12 日 星期五 【微冷】

執屋

今日我地買左D野返來大掃除

回到家反轉間屋執得乾乾淨淨

漂白水都用左兩大支

垃圾掉左起碼有七大袋以上

大家執得身水身汗

好在今日天氣涼左一點

我先冇咁辛苦

算係執得舒服既我都覺得

我地執得好細仔....

連衫、褲、裙、手袋內既垃圾都通通攞左出來掉

見乜掉乜....掉得好狠

最後執完我走去沖涼

除左D衫褲就掉落洗衣籃內

褲袋既垃圾就一野掉哂落垃圾袋

就關門沖涼

女友就將全部垃圾掉去樓梯既垃圾桶內

當我沖完涼出來時諗住同女友一齊出街食野

當我打開銀包就覺得好似少左D野

諗真點係一張五百蚊

係我先前女友㩒機比我買野用既

咁我立即發茅咁搵啦

諗清楚我應該係放左入褲袋內...

都係自己錯貪快就放入褲袋便算

咁搵左一陣我突然靈光一閃

會唔會我正話當垃圾咁掉左呢...??

於是我地兩個發癲咁去樓梯垃圾桶搵返之前我地掉既所有垃圾

樓梯又焗又熱....

垃圾又要袋袋打開睇

有D唔係我地既垃圾...

打開一睇..又菜渣又雲呑

最慘我連護墊都搵到

但偏偏我就搵唔到五百蚊

唉....

兩個傻既響度搵垃圾

袋袋都打開哂..又臭氣沖天....

真係想嘔咁滯

找呀找......搵左成半個鐘都冇

漸漸諗會唔會唔係掉左去垃圾場袋處呢

但又唔甘心..

反正都搵開...再翻搵一次

終於響其中一袋比女友搵返出來

五百蚊紙夾雜住紙巾捲成一屯

我地拆到成到都係垃圾

我地仲要掃返乾淨個後樓梯...

真折墮呀

我倆都搵到成身汗...

個身又污槽哂

我又要沖多次涼

女友又要沖多次

到出去食飯時諗返起D菜渣真係咩胃口都冇哂

都唔知點解我會咁大頭蝦

錢都掉去垃圾桶內

我都覺得自己冇得救呀

如果比我係你....

你地會發癲咁搵垃圾嗎...?

女友都算係咁喇

換好哂出街衫都同我搵垃圾

好了.....家中大致上執好了

明天要換哂所有床單枕具....

我們明天再努力吧...

我今次唔會再將錢當垃圾掉走佢架喇...

嗯....我知道女友想講咩既....

"你條粉腸....越幫越忙嘛....!!!"

係咪...?

哈哈哈哈哈哈.....!!!

2010 年 2 月 11 日 星期四 【晴】

無出色

今天還以為很幸運地...

第一次駕到新車去載客

眼見個個途人都望向我....

車上好奇的小朋友同大朋友都望向駕駛室內

看看新車的設備同錶版設計

所以為了滿足人人的好奇

今日我全程都打開遮簾布

只不過有一轉真係令我好Hurt囉

如常地我都係駕車有小朋友望著我

個小朋友大叫話.."嘩..好得意呀D按鈕...按呢個會開門...推呢個會郁動架車........."

還大叫嚷...."我大個左都要駕呢D車..."

誰知..佢阿媽講

"死仔包.....毫無大志...駕車有出色麼..!!你再唔比心機讀書...大個就好似佢咁喇....!!!!!"

嘩.....!!

我往日同你無仇..今日同你無怨

你老母使唔使咁Q直接呀!!

家下好失禮你嘛...?

我都係用雙手打工賺錢架

明知我會聽到仲大大聲講...

學女友咁講

我真係想連人帶椅踼你出路軌比車車開你兩截呀

冇D家教...因住你個仔大個左做Sales呀

去Sale白粉...fing頭同K仔呀

呀...!!!!!

真係好Hurt呀......

我無出色呀

2010 年 2 月 10 日 星期三 【晴】

前主席

放工後..直接等個傻妹放工

時間緊迫我連衫都冇換就咁過左去

等左佢一陣

好快就出到來Gate B

一如以往咁.....個傻妹一見到我就會急急步..跳跳跳咁過來

唔知點解我每次見佢咁跳跌急步咁過來時

我就會有種特別感覺

好似...似曾相識咁

之後...我諗左好耐我記得係咩感覺

就係小學生的我放學既時候

我都係好似佢咁.....跳急步咁出來

好似放監出冊咁...

看到佢今日都係得一件行李加個衫袋

十分輕鬆

於是我地就商量不如落元朗買過年應節既食物

因為元朗比較多同平...

我地搭E34出元朗大馬路行

買左好多野....

全部都係食得既....

到行到買到七七八八時

天色都開始黑

諗住鬆人返屋企

沿途經過7-11便利店

女友佢去增值張八達通

我就去雜誌堆打下書釘

不覺我自己就攞左本台北旅遊指南睇

睇得好入神

不自覺諗起我地去台北既日子

女友見到我看都入神

佢又同我一齊睇

我話我地上年今日都應該係刨緊呢D書吧

真係好想同妳去多一次旅行呀

女友話...你我撞正大家有假先啦

唉....成盆冷水照頭淋....

立即冇哂心情...

放低本書就行出7-11諗住去搭輕鐵

點知一出去就見到唔知咩黨派響度派揮春

再行過一點見到一個好熟面口既人

我地一望佢...

佢地就對住我地禮貌微笑咁Say Hi再加一句...放工呀?

睇真D...佢原來係我舊大大大大老闆

田北辰

可能我地衣著突出一點....

女友雖然用風衣蓋過上半身

但突出既下半身紅裙...

仍然搶眼非常

而且仲拉住個大黑

心水清都知女友係做咩啦

而我就比左件風衣女友

我直頭係著住制服出去通街走

而阿田生.....前主席點會唔認得我件衫係咩丫

所以見我著住件"檸檬"出來時...佢就問我放工呀....??

我笑笑答佢.....係呀....!!!

而阿田生都好快咁講完...之後上左佢部白色平治房車

車牌係佢既代表佢有份既公司"GG2000"

好快佢就絕塵而去

哈.......

我真係第一次咁近距離見到佢

我諗...如果佢仲係九鐵主席

可能我會走去問佢幾時加我人工

但而家佢就幫自己個黨派同袍一齊派揮春

真係夠哂親民

之但係最後...我地係一張揮春都冇攞到就走

事關我地都一袋二袋三、四袋咁

實在無法去接佢地D揮春喇

唔知佢下次會唔會響屯門出現呢...??

2010 年 2 月 9 日 星期二 【晴】

電器殺手

自從女友買左部MP3機比我後

我每一日都帶住在自己身上

除了返工時間

其他時間我都係聽住佢

對音色有要求

選擇左對耳筒都唔平

無記錯係七百幾蚊

差不多係一部MP3機價錢咁滯

所以..個傻妹真係對我好唔錯架喇

可知我係家中既電器家品的破壞之王

入到去住已經整壞左兩大件家電......洗衣機同電視機

其他小電器....例如風筒、叉電機都一一比我破壞.....死在我手上真係不計其數

開初女友都會話下我...小心D

而家....

都費鬼時話我

只係搖搖頭再唉一聲就算....

其實我都唔知點解自己有咁大既破壞力

好似有心同女友作對咁

但我真係無心咁整壞佢架

係唔知點解到我手就會壞....

講開......我返工都試過我開架車都有問題....

果次係關唔實其中一對門..而要回廠修理

咁都算死在我手吧.....

講返部MP3機

我今日就唔見左一邊耳其中一件配件

就連邊度跌都唔知到

只知一攞上手聽就已經冇左一邊配件

唯一希望反轉個袋找尋

但係結果都係冇

死死氣唯有打去原廠問有冇得配

對方話有....

比八十蚊來買啦....

嘩...真係搶錢咩...

但我可以點...??

都要侷住比八十蚊佢

仲要我親自上去攞

仲要最快過一星期先有

跟住仲同我講初十先開門

咁即係要我等到幾時

咁即係要我呢段日子聽一邊耳..只可以

唉....

呢個世界上點會有咁大既打擊架...??

嗚嗚...妳響邊呀??

MSN又唔Online.....

我想搵妳都搵唔到

明天妳返黎時我有好多野想話妳知呀....

2010 年 2 月 8 日 星期一 【晴】

安靜

有時真係頂唔順呢個日誌

每隔一個月左右就會傻一次

整天都上不到去

就算上到去都登入唔到

認真攞命..認真攞命

所以我都覺得自己容忍能力好強

響呢個日誌打滾左一年零九個月

都繼續捧場用佢

呢個日誌無論係上載照片、文字及字型轉變都麻煩過人

響呢個年頭仲邊度有要上傳Img Link去Show張圖片

同埋要打Font Html Code先顯示到粗細鈄字體去比人睇架...!!

而家個個網都係自己有獨立上傳同埋有word介面既設定架啦

咁先會方便架嘛

得得得!!!!....我辛苦D做多幾個步驟都唔緊要

你咪要我間中上唔到去先得架...!

真係好鬼死炆呀....!!

係...我知我有選擇可以過檔去另起爐灶....由零開始

但呢度有一樣野係令我留戀既係

呢度比較"寧靜"

會少人入來睇

除左我主動講比人知我有呢個日誌外

基本上冇人會到呢度

呢個亦都係我想期望的

我真的喜歡靜靜咁一個人記下每一天的事情

如果我走左去Yahoo Blog的話

D人左撞右撞總會撞到入來

我覺得咁樣好似係刻意公開自己既事咁

我不喜歡....

我都係比較喜歡"安寧安靜"的寫作環境....

2010 年 2 月 7 日 星期日 【乍寒還暖】

今天攪什麼鬼事??

今朝和女友去同我阿娘飲茶

飲完茶就諗住直接返工

反正天水圍一樣有E34線巴士去機場

可能仲快一點...

行大欖隧道出汀九橋再入青馬....

我諗點都快過行屯門公路既E33

飲完茶直接去等E34

頂佢...等左兩架969都唔黎一部E34...心諗有冇攪錯呀

已經落住雨...濕住等架啦....

女友要返工...所以盡量都唔比佢濕到個身

地下又污槽...所以行李又要抽住...唔可以拉

仲要大黑小黑...兩大件...

雖然唔係太重

但落住雨咁抽住佢...都好攞命

好喇....望到有車來喇

上到車放好所有行李

埋到座位連遮都摺都靚一靚咁放埋去

諗住落車行一段路仔..兩個人一把遮都OK....

所以摺得靚一靚都冇所謂啦

架巴士人上車越上越多

去到尾三個站..我頂佢個肺

佢砰一聲...

撞埋架前面部單層巴士度

雖然撞擊好細

都已經冇可能再坐呢架車

又要落車冒雨等下一班

正話摺得靚靚既遮又要打返開佢用

真係摺來都多餘..!!

時間係咁過

等到下一班又冇位坐

連企都差D冇得企

唔上車又唔得...因為會遲到

唉....

落雨天先整D咁野我地嘆

真係多得司機唔少

雖說司機係唔想

但心中真係有微言

明明有個靚位坐...而家要企到出東涌

喂..我比足車錢架喎

巴士公司又唔識做

又唔Call架吉車載走我地

得不償失....全程用左一個鐘零八個字

唉....如果E33....衰極都係個半鐘....

去到魚翅城仲要冒雨跑入去...

連遮都冇時間開.....驚遲到

哈....

我真係從來未坐過咁黑既巴士

最多都係壞車、冷氣出煙、爆軚、壞冷氣....

今次都算倒楣喇

仲連累女友都一齊受罪....

唉...無話可說..!!

送走她後我獨個兒去左長洲

去長洲前去左IFC行下CitySuper

買左72蚊壽司上船食

一個人可真戅居呢

仲要冇枱..要用手托住食...一邊夾..一邊平衡...一邊點芥末豉油... 一邊又怕佢跌....食慢D又怕佢變壞會食死我

好在.....最終都安全地食哂落肚....

去到後順便探下我Grandmother

只不過沿路都落狗屎咁鬼死大雨

去到邊落到邊...

冇哂行逛既念頭

唯有上去姑媽屋企坐下啦

去到見到人家個小妹妹響我姑媽家中...

佢見到我竟然稱呼我.."叔叔"

我當堂唔知點應佢好??

我都未到三十...唔使咁講嘛..好Hurt呀?

我好老咩..心諗?

妳個死妹釘想找死頂喇

好無奈我只好應個小妹妹..."乖"!!

我問...屋企得妳呀??有冇姨姨響度呀?

小妹妹點頭..立即掉頭入屋....

大叫..."姨姨呀....有個叔叔搵妳呀...!!!!!"

我既天空立即變灰..好灰...好很灰

攪什麼鬼野飛機呀今日...??

坐完撞完車既巴士後重要比人叫叔叔...!!!

妳個死妹釘丫

叫聲哥哥好難為妳呀...!!!

我腦海中畫面係打到個死妹釘抽哂筋....

本來都諗住食埋個晚餐先走

但比佢叔叔前叔叔後我真係毫無留戀之意

搭19:30既船返中環

去港鐵站由香港搭到青衣

咁啱又見到女友既同期Training同學Winky搭另一方向既東涌線到青衣站下車

響青衣站樓下大堂碰到正一正

原來佢啱啱放工準備返屋企

多口問句去唔去一齊食飯呀

嗯......佢又肯喎

心暗喜...好野..有人陪我可以冇咁悶喇

大家響青衣城食左個飯就返屋企

食飯時Winky去行李攞左罐汽水比我睇

原來係可樂黎既....

係Diet Coke 青檸味.....響加拿大買返來既

見咁得意即場試下味

倒左兩個半杯大家試

大家都話.....同檸樂有分別咩...????!!

飲完之後Winky攞返個空罐

原來Winky個細佬喜歡收集各國可口可樂產品

不過.....我同Winky可能都唔係太鐘意飲汽水關係

先會覺得冇分別...

其實個罐幾特別...

有機會..等女友去紐約加拿大呢D地方時

我都叫佢買D返來先..哈哈!!!

但我已經預計到女友會點答我

回答一﹕"你想抽死我呀汽水係水黎架嘛..咁重?"

回答二﹕"放咁多水....行李過重又要比錢呀...!!!"

回答三﹕"咪飲咁多汽水啦.....老左你糖尿病呀.."

回答四﹕同埋.....呢句....我永遠都冇得反駁

"噢......我唔記左買添....嗯...!!你都知我頭腦遲鈍唔記野啦....下次有機會去先再買過!!"

哼.....

下次下次....

但妳上次都係咁講...話下次先呢.....!!

但我知道家中女權至上.....我只好..唯有真係等.."下一次"啦

2010 年 2 月 6 日 星期六 【晴】

八達通....

唉......

今日發覺唔見左兩張張八達通...

唔係在街外唔見

係在家內唔見

記得果張並唔係普通既八達通

係麥嘜版既限售版八達通

另一張係個人成人八達通

因為而家Staff Card Octopus關係

所以早幾年已經冇用到

只係留在做紀念

我記得麥嘜既限售版果張我包得好乾淨

張咭花都冇花過

我好鐘意張咭

主要佢能夠比我有既係快樂回憶...

亦記載我工作上轉變既証明

另一張就係普通既個人八達通

又係好新淨...

因為我前前身張咭用到殘哂

基本上可以張佢上下撕開見到晶片

但我就用膠紙包到佢實一實繼續用

有一天我仲放放埋落洗衣機比佢潛水

卒之要買張新既....

但唔夠半年就買左張麥嘜版既限售版八達通

即就係家下唔見既果兩大張人八達通

不過可以肯定係冇餘值

全部係負錢的

費事唔見咭會益左人

係呀..睇下我幾咁機關算盡

其實我信冇唔見

只係在家中搬來時唔知塞埋去邊

講起八達通...我現身上都有兩張

一張係自己

一張係女友比我救命既

自從我用零用錢後

因怕我真係一時冇錢返唔到屋企或者冇錢食飯會餓死街頭關係

女友整左一張自動增值既八達通比我

哈....很貼心...諗得週到哩

所以....我身上雖然得60蚊

但其實係250蚊又250蚊又250蚊..........無止境下去(因為每次自動增值250蚊...)

我知我出名失憶

成唔唔得帶呢樣果樣

所以女友先會申請一張比我用

但用既原則係....

真係冇錢..救命先可以用(女友講到明係咁...)

如果用左...下期女友張信用咭月結單會顯示出來

到時女友一定向我大興問罪(D錢去左邊...?????)

所以...到而家我都未用過

不過...我信總有一天我會用得著的

因為我總有一天會失憶又唔記得...

2010 年 2 月 5 日 星期五 【晴】

運輸業

放工後約左女友同雪兒一齊上去護協再買野

今次醒目喇

我地帶左手拉車去買

女友今日再入去睇

見到好多野返左貨

護膚品、食物禮劵都好平

我地又買多四底蘿蔔榚、兩底年榚、五叠鴻福堂糖水禮劵

仲有好多零食...送禮用的禮盒

朱古力、餅乾、代餐、女性用品等等

合共買左1895蚊....

睇來都買得九九十十喇

年貨要買的都買盡

購物完後

同樣都係好似昨日咁...

佢老公車我地走

而我地都係一齊食晚飯

去左元氣食壽司

大家一路食一路傾計

佢老公對我女友的工作幾有興趣

好多野都想知..想証實

其中有個話題係問女友

妳有冇返工做做下野時收到乘客既咭片

因為佢聽聞有好多咁既傳聞

而事實上真係有

女友答有收過

仲收過唔少

不過咭片最後下場都係成為廢紙

十個空服有九個半都唔會選擇呢D人

原因係...你能夠在呢班機咁送咭片識我...

同樣地都可以在另一班機上咁做

呢D情緣全無保障....

女友所講又唔係冇道理吧

仲有...

今日我先知雪兒讀書時代係幾咁曳

唔返學、逃學、日日都拍散拖......

真的估不到佢今日可以做到姑娘....

人人際遇真係不同

我冇逃學又冇拍拖果陣時

我都係會考...緊緊合格

攪到今日要做司機...唉..!!

實現左...細個唔讀書..大個做運輸的真理

我同女友都係做有關交通工具的工作

我就日日屯門元朗天水圍

佢就台北東京新加坡...

世上邊有公平丫

我都好想可以女友咁週圍去

就算只係到一到佢個機場我都心足

點解咁架...??

我又做運輸...佢又做運輸

差咁遠既....

唉....無心機再寫喇....