2009 年 10 月 9 日 星期五 【炎熱】

陪伴一起


星期一就要返工喇，一諗到呢度我就不自覺地嘆一嘆氣..."唉"
，有時真係好羨慕女友工作，假期又多，又可以週遊各地，人
工唔差得我好多，而且去到仲有零用錢比你用，真係可以話比
錢你去玩，只係來回對住D客難頂D，但當你一放工後果一分鐘
開始，可以叫什麼都結束，只祈求今生不再遇到呢D客或者同事
便可以了，呢D話我都響佢地口中聽得太多，都已經不覺得係咩
新鮮事....!!而講起女友今次既假就長喇，拉長哂攞盡哂黎放，可
以話"盡地一放"，真係爽死喇，其實今個假我地係諗住去旅行，
但可惜攞唔到機位，算是我地不好彩啦，如果去....有諗過去Ansterdam
、Frankfurt呢D地方，因為呢D地方聽女友口中所講係幾靚，以前
去旅行多數都諗住去玩去食，近一排我反而想去見識下別的地方
，去影下相睇下景，我好細個果陣已經好想好想去荷蘭，因為我
仲係細路果陣，有個節目叫"寰宇風情"，果時介紹荷蘭呢個地方
，我真係好想見到好大好大好大既風車，去走下一大片綠色大草
原，我真係好想親自見到真正的"農場物語"，好想睇人地係點放羊
，最可惡係我只可響女友口中聽到佢講呢個地方，因為佢真係去過
，我真係好鬼死妒忌佢去過咁多地方，有次我話我想去日本北海道
玩下，點知佢話已經去過幾次，喂....大姐呀...我未去過嘛，妳去過咪
啱囉，可以帶路，點知佢話...唔得呀....我已經唔記得哂D方向，有時
真係比佢吹漲，唔知係唔係真係呢...?女仔D方向感係咁差，定係扮傻
呢..?有時見佢買衫，女友去過一次，佢下次又會記得點返去果間鋪，
你話係唔係玩野丫..??之但係，我喜歡望女友買衫個樣，雖然每次我
都比唔到意見，我呢一係答"幾好丫"、"OK丫"、差唔多o者"、"妳鐘意"
啦......，所以女友而家都費時問我，而家只會問買定唔買好..??不過我
次次都係咁答，"又唔係我比錢，使咩問我喎"!!!我身邊好多男性朋友都
投訴自己女友成日都買衫買野，其實我又覺得冇問題，的確有專家話
女性天生係咁，所以我以後都仍然繼續會陪女友行街，因此......我的女
友行街時不再要問我"係唔係悶親你呀...?"真的不需要問了，同得妳出
街，就預左要陪住妳啦...係咪..!

>>October 10, 2009 at 2:53:25 PM GMT+8

2009 年 10 月 8 日 星期四 【晴】

艱辛的湊仔日



還有三天我就放完有史以來我最大既大假，有點唔捨得，越放越
唔想返工，今過呢個假亦都放得有點缺憾，我整傷左身邊的人，
雖然，女友冇放上心，但那一刻的確令我和她一齊咁耐最嚇怕我
既一次，深刻體會到咩叫手足無措...一片空白，一剎那我覺得好
似幾年前我撞車那一刻，係"嘭"果一刻的感覺，女友燙到大叫果一
下，就好似我果一刻炒車"嘭"果一刻的感覺，同樣深刻、震撼、恐
懼，我絶對希望永遠都唔會再試，如果這一次係燙到佢塊臉，我
真係唔知點算好...!!反轉來諗可能今次算係幸運吧，一諗返見到女友
響醫院第一次洗傷口個痛楚樣，同埋傷口滲出來既滲液，心中都好
唔舒服..好唔知點咁....!!總之心就唔好過啦..!

不過....女友每日對我講，都過左去算了吧，我已經盡量唔諗喇，如果每
一日都好似今日咁，咁我就真係冇時間去諗喇，今日我同女友真係攪
到一頭煙，兩個小朋友可以玩死我們兩個大人.....，湊小朋友真係真係
唔容易，原來做人父母都甚艱難，一個係差兩個月就一歲，另一個係四
歲半，細果個既係女大既果一個係仔，未足一歲果個仲要包尿片，又要食
奶粉，又要逗佢訓，又要逗佢玩，我試過抱又唔得，放佢床又唔得，都
唔知想點。只係睇佢媽咪攞果一大袋湊女架餐過來，又BB車又奶樽又尿
片又奶粉又有D佢地食既餅仔等等......，真係攞命，大果個都好少少，只
係比玩具佢玩，比電視佢睇，比顏色筆佢畫畫，比D零食佢食下，呢個我
都勉強湊得掂，但個細既..我真係連抱都唔識抱，真係令我拿手唔成勢.....
我真係舉手投降.....!!反看女友確係有D辦法，女仔真係有做媽咪既天份，
而我真係冇咩耐性，對住呢兩件細路我真係有少許燥同煩......!!而夜晚我同
女友出街食飯時，要帶住兩個小朋友，原來都好多野要做，出門前為佢兩
個準備D野已經夠煩夠多喇，仲要背住一大袋野出去，我明白點解女人一
生完點解會變師奶喇，拿住咁多野又推住架BB車，唔變師奶就假喇....!出去
食野又要選D地方大少少既地方，想食日本野唔使諗，好了...去到食喇，又
怕小朋友亂抓枱上面既野，一下唔小心燙傷整親佢就真係..漏夜同女友趕工
都痾唔返個女比人，我地食野要一個睇住小朋友，另一個食，到我食完，
到我睇，又到返佢食，食果陣仲要照顧個大仔，又要幫佢斬件幫佢分碗仔食
，麻煩到極點，整整下個女既又喊，食都食得唔安樂，一餐飯分幾次食，
認真攞命.......!!

雖然係咁，全程又唔係真係得辛苦既，如果小朋友唔喊，又肯同你玩，同你
笑時，你又會覺得小朋友好可愛，好抵錫，大仔有時真係好得意，就算想飲
支益力多都要向你問長問短，"我想飲呀"..."我飲唔飲得呀"....叫佢飲多支，又
會同你講，媽咪唔比.....，我同佢講我唔同你媽咪講啦，飲啦....佢個半推半就
樣，其實佢跟本好想飲，總之佢D天真表情真係好抵死，食完晚飯果陣陪佢去
睇玩具，小朋友眼定定望實果件佢想要既玩具時，真係會定哂型，佢愛不釋手
既樣子，向佢講係唔係想要，佢又會支吾以對咁，問買比佢好唔好，佢又會話
媽咪唔比唔比....!!而最後買左比佢，要佢自己抽住，佢又真係攬死唔放，直到
一返到屋企，佢好心急拆開玩，成個過程真係好趣緻，我果陣諗..如果當年都有
人對我咁好就好喇，小時候......想買件玩具，阿媽一定唔比，而家大左見到小朋
友想要時，我又好想滿足佢，當係補償返當時小時候既自己啦.....!!不過呢..我正
話做左個小實驗，我攞左一件細件精緻又貴既玩具，同一件大大件又平既玩具
比佢揀，小朋友真係會選擇大大件既，哈哈，小朋友既思想真係....天真又直接....!

總括來講，如果要我湊小朋友兩日三日就真係冇所謂，但要我長時間對住就....
我真係會死囉...!!而女友好明顯係有耐性過我好多好多，個細路扭計都面不改
容咁照顧佢，我真係唔係好得呀，第時生左都真係唔知點算好，我唔知會唔會
湊到發癲呢...?到左夜晚佢媽咪帶返佢走時，我見佢一個人帶走兩件，我真係覺
得做媽咪既真係好強，湊小朋友真係唔簡單呀.......真係佩服為人父母者....。

>>October 9, 2009 at 7:15:24 PM GMT+8

2009 年 10 月 7 日 星期三 【炎熱】

習慣的改變



諗住今日行完街去食粥便算，但行下行下又見到D打冷鋪
，女友話想去食下，咁我地就由食粥變左食四餸一湯喇，
我地響人來人往既街邊開枱食，一路食就一路有人行過，
有少少唔係好自在，但食落又好似將焦點放左響食物上面
，又唔覺人望喎....真係怪..!!!食緊果陣見到遠處有一枱大吵
大叫，食得玩得飲得好High，我諗果枱D人應該係醉左掛，
佢令我諗起我十幾歲時同C4一齊劈酒既日子，而家望到佢
地好似望到以前自己咁，原來係咁礙眼既，真係都幾乞人
憎，我諗當年有好多人都想食食下飯打獲我地，我一邊食
一邊同女友講返我以前十o靚歲D事，女友聽到都嘩....嘩....
咩你以前咁鬼死曳架..!!!係呀...而家諗返起，我都覺得玩得
幾過份，但無可否認果段時間日子係我最開心既.....!!!之後
我又反問女友，其實我有樣野好想問，但成日一係就唔記
得一係就冇機會問，我問女友....其實我印象中妳中學時期
果陣，妳D生活習慣都係唔係幾好，又求其又粗魯而且我
肯定妳以前唔會咁著重乾淨清潔同衛生既人......，總之女兒
家來講，妳以前一D都唔似女仔...，咩事令到妳變得咁緊要
呀..?之後女友仲自爆我以前唔會執屋、打掃、摺被等等...!!
總之係唔會做野啦，因為阿媽會幫我執...!!要講到變係由做
呢份工開始，原來佢地做訓練生時，在模擬艙內既廚房係要
將D野分開好清楚，東擺呢樣...西擺果樣，總之咩都有規定
點擺點做，而且當做完一程機既時候，佢地要將所有野還原
，即係要將所有之前用過既野放去原位，唔止咁，佢地仲要
清潔廁所，廁所內D擺設又係要做足，總之就咩都要做得好
乾淨整齊，就係咁，而家在自己間屋都會執得整齊乾淨，尤
其係個廚房同廁所....!!女友咁講開又好似係喎，起碼我真係
冇咩點見過家中個廁所係地下會濕，而廚房又真係件件野都
會擺得好整齊，就連食個麵都多野個人，一定會有個托盤，
一個碗一個碗蓋一對筷子....!上次我妹上來家中，女友整左個
咁既公仔麵比我妹食，我妹第二日問我，問我地係唔係餐餐
都咁多野攪...!!!咁咪洗野都洗死人..!!其實我開頭都唔係好習慣
咁樣，但日子耐左我又覺得好正常，而家我自己都會咁做，諗
起來我都好耐冇用個煲來食公仔麵喇..!!間唔時有D人都會話我
多餘，亦都亦有D人會話.."你地好似去西餐廳食咁呀..!"是但啦
隨得人點講啦...哈哈!!總而言之我而家好喜歡咁做法..。

其實咁講起來女友要多謝公司對佢既訓練，我亦都要多謝佢地
喇，冇佢地我唔會有一個咁好既女朋友，冇佢地我可能今時今
日都係用個煲食麵，食完個煲可能仲要幾日後先會洗，咁講法
我不得不承認我係這家中的破壞之王，又整壞野、又要成日女
友執我手尾.....，但係我都係要申冤囉，我真係對準先去廁所架
，真係冇咩可能會撻Q囉....，會唔會真係貓咪屈我呀..!!!查清楚
先好喎...!!

>>October 8, 2009 at 6:16:29 PM GMT+8

2009 年 10 月 7 日 星期三 【炎熱】

夜街...
(凌晨2:58)


正話大家睇完電視，又訓唔著無無聊聊咁，抱埋肥貓咪出去
行下夜街，順手買下野宵夜食，我估貓咪一定諗..我終於可以
出街喇...!!!不過為免貓咪走失，始終都要拖住佢出去，放佢出
去行都唔敢放得太遠，我覺得放貓仲煩過放狗，講到尾貓一走
甩真係冇咁易捉得返，所以今次我地放佢去行都有D驚驚地，
走甩左就不得了，之不過肥貓咪都算乖，全程都好定冇走甩....
。下次可以再考慮帶佢出去行下。煩係煩在返屋企要幫佢洗一
洗四隻腳同抹返乾淨佢個身，但呢D野...女友喜歡做，佢對隻貓
有時仲好過對我，係呀..".我投訴呀...!!!"哼.......有時女友真係好大
細超呀，因為有幾躺返來我係冇禮物..而佢係有玩具玩囉...!!!!你
地話我係唔係要劏左佢丫....!!!今過正話我抱過貓咪，我覺得又重
過之前，唔知貓會唔會有膽固醇過高呀..血壓高呀咁呢..!!都唔怕
既...好快貓咪要做身體檢查，到時Check到有唔妥，真係要禁食的
話，我就親自禁你，仲要響佢面前食野........嘩...自己好變態呀......!!

抱完肥貓咪散步後，同女友去左24小時惠康買野，我地一次過買左
14盒啫喱粉，幾罐淡奶，又買左D什果，粟米粒等等材料，整布丁、
啫喱、沙津........，回到家，我要女友教我整彩虹啫喱，我一心諗住
如果我今次望實就會一定識得自己整，但睇黎我太高估自己，佢D
熱水、暖水、凍水點攪拌又點Mix埋佢，又要較份量，原來係超級煩
，算了....我都係整返普通啫喱算喇，彩虹啫喱難整到七彩，我投降
喇.....!!!我只係識幫手切生果、青瓜......仲有開罐頭什果"擎"乾水同埋
洗碟洗碗、執吉個雪櫃放野......，咁今次都算係咁丫，我都有幫得到
手，冇姐手姐腳..........算係咁架喇真係!!!

唔覺唔覺女友一整就整到而家，直到而家女友都仲要執緊廚房D手尾，
我係唔係好衰呢...?!!女友響出面廚房打仗，而我就躲響冷氣房中打呢篇
記事，我係唔係好衰呢...??如果係...我值幾多個"衰"呀...??

>>October 7, 2009 at 6:54:53 PM GMT+8

2009 年 10 月 6 日 星期二 【炎熱】

"日記"、"日誌"....還是"近況"


昨日有個朋友send左封Email比我，內容都大至問下最近我
點樣，亦都有問女友傷勢如何..??有心了，而家佢可以隔
兩天先去洗傷口，而且已經有明顯好轉，現在期望係疤痕
可以有咁淡得咁淡，不過呢D都要時間去痊癒...急不來..!!
而其中朋友還有講到一件事，問我點解每日都有野可以寫
，我諗佢指我個日誌吧，其實..我想講....很久很久之前我已
經有寫，早期既日誌大多都要比錢，所以果陣冇咁流行，但
隨住時代發展，而家有好多好多都係唔使錢既Blog，所以早
期我寫既野，跟本唔會有任何人睇到，而我亦冇諗過要比任
何人睇，試問你會唔會張自己本日記，當書咁比人傳閱呢...??
其後可能大家開始已經有寫....流行左，所以好多人都會問你
，你有冇blog....，其實以前唔係叫blog....係直頭叫Diary。往後
日子個個都有擁有自己既blog咁滯，有時朋友比得你睇佢D生
活記敘，你又會好想話比人知自己又發生咩事，其實每一天
點會有咁多事發生丫，有時我果一日跟本冇咩發生，但又要比
自己寫D野上去，唯有張自己一件好小好小既事，放大一點來
講，講下自己既感受體會，但寫得出過頭又唔得，之前我都會
寫女友D更期，返咩工，去邊度，又或者係自己有關返工既事，
得來的係.....竟然有人會去查你女友係邊個，咁啱如果係女友D
同行既仲煩，因為只係知我以上少少資料足以起到我女友底，
對佢帶來好多唔方便，而自己就都係比自己人起到，返工竟然
有人問，喂...呢個Blog係唔係你架，我真係唔識答佢......!!!!!所以
而家我寫有時都寫都好小心，畢竟都要保障自己身邊的人，可
能有人會問，咁你可以唔使日日寫架嘛....!!!我當然知啦，早期我
就係因為唔係日日寫.....終攪到一日係完全唔寫.....，所以而家點都
好，我都會比自己寫d野上去，就算懶都盡量比自己懶一日就好了
，第二日點都要寫返，始終比自己一個習慣一種寄託嘛，其實我
自己私底下還有一本用手寫的，不過果本係一星期寫一次，講真
....一星期寫一次先會多野寫D，而家我呢D唔係日記日誌，係我每
日近況，係睇我每日做過D咩罷.....!但點講都好，我都喜歡寫D野比
人知道，有時自己睇返之前做過D咩.....都會問自己....我有發生呢D
事架咩...?都蠻有趣架。

>>October 7, 2009 at 1:23:35 PM GMT+8

2009 年 10 月 5 日 星期一 【炎熱】

行街


仲有幾日就放完假，諗起要開工就.......!!!所以
趁呢幾天陪返女友出去行下玩下咁，今日去左
Terminal 2果邊行下沿店，去果邊睇埋套戲，仲
走左上8樓睇左兩個鐘飛機起飛同降落，今日仲
係25R降落07L起飛，所以兩邊都睇得好清楚，
到今時今日我都係混淆737同A320既分別，無法
啦，架架都差唔多，今日仲有幸見到A330 One
World寰宇一家呢架機，睇到差不多天黑，落左
去食野，女友用職員証食仲平過出去出面街食，
不過講真D野麻麻地，但又未至於食唔到，Ok
咁啦，食完又行多一陣，女友買左D野，原來連
買野佢都有得平，真係過份呀...仲要平一截。最
後搭E33返去屯門，落車去左7-11買野，見到個死
o靚仔..我諗得16歲左右，買完煙人出來，學人用
手"拍"包煙仔，唉.......女友話如果第時我地個仔係
咁我就嘔血喇，我諗唔會掛...!!!段估我地教出來點
都冇咁差掛!!!買完野出來，轉頭見到班差佬逗佢地
查老身，真係抵死，仲要比差人搜下身，哈....樣衰
，唔知比差佬搜到煙會點呢...!!!!哈.....!!最後我地都直
行直過就走，呢D死仔唔的佢入差館坐下係唔知驚，
不過呢D始終係人地阿媽既事，他朝如果我地個仔係
咁，我實打死佢......!!最後我都係同女友講...我都係鐘
意生女多一點......女始終都會乖一點....似妳夠好啦...!!

>>October 6, 2009 at 3:43:39 PM GMT+8

2009 年 10 月 4 日 星期日 【酷熱】

男女大腦構造


其實每日同女友去政府診所洗傷口時，我心都覺得有點兒
那個，但像女友所說，事情都發生左都冇得返轉頭，女友
還說你又唔係兜頭淋我，我還見得人啊..!!算是安慰我心嗎
?但點都好啦，我還有野可以做到既，就係對女友好D，在
我識眾多朋友當中，我覺得我自己呢個女朋友已經好好好
好，起碼女友唔係喜歡發脾氣的人，咁來以來，要我諗女友
有冇發大小姐脾氣，我真係冇咩印象，反而我有向她發脾氣
，最近果次就係我唔見左錢果次，我很兇很兇咁鬧她收聲唔
好煩我，我諗如果比著我朋友D女友，男友咁向佢咁兇講野，
唔嬲爆你就有鬼喇，所以我應該覺得好幸運先係，我呢個女
朋友真係算算算算係咁，還求什麼呢....!!!

今日女友SEND左個Ppwer Point比我，內裡有幅圖係講男與女
的大腦構造，很有趣，我指著張圖問女友，妳是否都一樣嘛
??女友笑著講...妳覺得呢..??我又問女友....咁我呢幅又似我思
想嗎...???女友笑著話，圖中腦部佔第尾三小的部分，你真係
唔覺有喎.....!!!我望左張圖就去搵咩最小咩又尾三邊部分啦..?大
叫..我邊有呀.......!!我不嬲都喵得好準喎，會唔會係肥貓所為呀.
..?我地兩個笑左片刻，開心地笑笑笑笑，其實想太多不開心事
都無謂丫，如果大家真的相愛，又點會為小小事而傷感情呢..?
?其實兩個人相處同相愛都很簡單......

佔尾三少果部分似我......冇可能囉...我自問眼界算好好喎!!


方向感好似女友呀，妳竟然可以話香港鐵路張路線圖都話睇唔明，我真係好難想像妳去日本點搭JR囉.!!


>>October 5, 2009 at 4:46:53 PM GMT+8

2009 年 10 月 3 日 星期六 【酷熱】

傻的是我..!


今日夜晚同女友去左Ocean Park Halloween Bash，其實我地
一早已經訂左入埸票，本來我攪到女友咁，我已經冇心情
去，之但係女友扭要去要去，見到佢咁想去我無理由話心
情唔好唔去丫，最後我地都去左玩....，全程反而係個傻妹
逗我開心，帶我進入比鬼嚇的氣氛，而事實上果陣一隻鬼
都嚇唔到我，可能對方目標係女仔，因為我行完條路係冇
鬼，之後女友就響我正話已行過條路撞鬼，嚇得佢係咁尖
叫，係咁攞我背來遮視線，又係咁抓我件衫避，見到佢咁
我都笑左出來，第一間鬼屋已經叫到拆天.......真係冇佢收，
出來女友問我點解唔叫?我話跟本嚇唔到我..!!女友扁著嘴講
，咁陪下我嗌嘛，大叫下尖叫下先開心嘛，叫我開心點啦，
唔好去玩都唔開心啦，之後我全程都同佢一齊叫，由開頭我人
叫我就叫，直到玩到我開始都投入，那一刻我才放開心情去玩
去叫，當發洩又好，玩又好，總之我大叫完，個心情好似好
左好多咁，我地總共玩左五間鬼屋、轉左兩次觀景塔、來回一
次纜車、又來回一次海洋列車，最後好想玩埋個大熱氣球，但
真係太多人等，而且我地都開始倦喇，仲有最緊要係唔走就追
唔到尾班車，坐上巴士返屋企，大家都在車上恰著左，一睜開
眼睛已經到車站落車，差點連車都落唔到過站，兩個人呯呯嘭
嘭由上層衝落下層，大大力咁踩個地下，荒死個司機聽唔到仲
有人落車，我們兩個都夠傻吧....!!!之後捉緊女友隻手，拖住佢
手拉佢去食宵夜，兩個好似啱啱放監咁，係咁食係咁食，難怪
我們呀，海洋公園D食物飲品貴得離譜呀，買支水都18蚊，我
地全程都係靠果支水捱下去乍...!!返到屯門食宵夜時我地坐去間
餐廳既卡位度，唔知果一刻點解....我又好似又打回原形咁，又好
不其然諗起我整傷女友既事，一諗起我又唔開心又唔想出聲，女
友一見我咁就問我若果我用熱水整傷你...你好嬲我嗎??我當然知
女友意思係乜啦，但妳係女仔嘛，外表對每個女仔而言係比好多
事都重要，如果唔係點會800幾蚊買盒粉底，每個月用幾千蚊響
護膚和化妝品上呢...??我一諗起女友你....很緊張自己既外表時，我
就會好怪責自己點解會咁唔小心!親手用熱水整傷左妳.!!!

餐廳果一刻我唔會忘記，妳的頭係怎樣伏在我手臂上，妳那句話...
"係呀.....我雖然受到少少傷但係我唔怕，因為我知你唔會因為我咁
而唔要我"，妳知道嘛..那一刻我覺得我係感到"你屬於我我又屬於
妳的感覺，那一刻的流動我感到好暖烘烘...!我覺得妳好似突然頃刻
間回答哂我心中所有猜疑，前幾天的我只會不斷諗，妳會唔會好嬲
我，但又唔響我面前嬲呢?總之我不斷諗....妳會唔會討厭我憎我令妳
攪到咁，我又係咁不斷諗我應該做出咩事去補償給妳，我傻到有諗
過用番同樣的熱水去燙自己，總之呢幾天我都不間斷咁諗，諗到我
食不安又訓不好，不過.....妳今天咁講我明白妳想我如何，妳只求像
平時一樣對妳好，愛護妳便足夠。這幾天裡....我不單止整傷妳，我
仲響妳受傷後苦口苦面，掛著唔開心的態度出來，令妳見到我都更加
唔開心，還要反來逗我笑，哈哈....看來我都是一個很呆很蠢不懂轉彎
的蠢人，妳成日都話自己傻傻的，其實妳跟本係最心水清的一個，妳
亦都係最明白道理的一個，原來我才是最傻的一個...。可惡的我...令
妳傷上加傷，Sorry呀...!

原來補償的方法很簡單，我只要對妳好似平日一樣好，不再苦瓜乾咁
，開開心心對著妳愛妳，就已經足夠......!!像妳說的一樣愛很簡單，我
應承妳..我再不會請妳食苦瓜....，因為呢幾天妳食夠喇....哈哈(我要笑)

>>October 4, 2009 at 7:51:01 PM GMT+8

2009 年 10 月 2 日 星期五 【酷熱】

是否好轉中...?


開始見到有好轉，希望她可以無事，是我還看不開
定如何，女友都主動向我說笑，我還想點..??若果
我再那口那臉...是否會更加不好..?我應該當冇事發生
嗎?其實今日跟女友入治療室洗傷口，護士拆開紗布
後，我見到已經真係冇咁嚴重，姑娘還笑著說傷口好
得好好喇，只要keep住洗多幾天，生番d皮膚就應該冇
事，但皮膚要時間轉淡色，而今日換紗布時女友都冇
叫痛， 撕開舊紗布已經冇黏實個傷口，代表已經乾水，
總而言之，叫開始痊癒中.....進展好好，今天的我還係
咁問姑娘會點..跟住點....，姑娘都厭我煩吧....講..其實
真係唔係好嚴重，只係燙傷，係燒傷中最輕微的一級，
冇事的.....!!雖則個個姑娘都咁講，但我始終擔心女仔對
外表的要求，有疤痕始終不是太好...!

早排已經一早買了海洋公園萬聖節的入埸劵，明天的情況
不知女友會否願意去，不過明天事明天算吧，現在最希望
女友可以好番，我什麼都不想喇，但女友都主動向我笑，
我係唔係應該大方一點，都向她笑呢...?

>>October 3, 2009 at 2:57:53 PM GMT+8

2009 年 10 月 1 日 星期四 【晴】

為什麼點解點解


我什麼都做不到，來緊十月尾都不知怎算...!!!
假期過得很痛苦，盡管最近身邊的人安慰，
呢件事點會有得"算"，索性用熱水淋死我，
我想我會好過點，為什麼我要懶，為什麼我
會盲左咁，為什麼我攞住熱野我都會咁大意?!
為什麼大意的人是我，受痛苦的是我身邊的人
，萬分都估不到是我令佢受傷，一直話要愛護
保護她的人是我，是我令她受傷，是我親手倒
下去，那一刻她痛極的叫聲在我腦海不停重覆
，意外那刻我呢世都不會忘記

>>October 2, 2009 at 1:34:32 PM GMT+8