2009 年 7 月 16 日 星期四 【清涼】

世界新紀錄八秒八三.....


天氣太過熱喇，本身出汗多的我都要帶多兩件衫出
街，用來替換，唔單止淨係衫，就連紙巾都帶多兩
包，小毛巾亦會有一條，用來濕水抹自己D汗，女友
仲買左幾支止汗劑比我，我亦都會帶多支返工同出街
，正所謂自己知自己事，因為汗既臭味真係好難頂，
連自己都覺得臭，出到街見人仲得了既，所以近排雖然
咁熱，但我都可以保持自己乾爽乾淨。
只不過唔係每個人都係咁，今日我放工去佐敦約左朋友
行街，識得我D人都知，我係極之討厭搭鐵路，因為又迫
又冇位，想瞓下都唔得，所以呢一個行程，不作他選...我
搭巴士，現在D巴士大多都係二加二的座位設計，若果自
己一個人坐的話，在繁忙時間都會一定同D陌生人坐，當
然如果坐個靚女落黎就最好啦，望佢恰眼瞓矃時中下中下
中落我膊頭度就為之Very good喇，咁呢D情況同機會真係
極為少有啦，就算係男人坐來黎都冇咩所謂其實，只要佢
唔係D咩麻鬼煩的人就得，因為有時坐住旁邊果個係大聲公
，你都咪話唔煩，但有一樣係更加難頂係D食開煙既人，如
果佢坐響我前面，佢果陣味就真係極為惡頂，我真係唔係幾
受得來，如果有得轉位我會轉，唔好彩冇位的話，我只有歎
自己黑仔，但只不過今日真係黑上黑，我前面坐住一個又大
煙酒味夾一大股臭汗味的傢伙，嘩.....我同我旁邊個女仕都
當堂暈響度，前面坐佢旁個男人都情願去下層企都唔坐，整
個車程，架車迫爆，唯有佢一個人可以享用兩個位，最巴閉
係佢喇，而我同身邊個女仕就用Tempo apple wood味既紙巾
掩住個鼻，真係多謝我身邊個女仕比張咁大陣味既紙巾比我
，因為我用果D只係Tempo薄荷味，唔能夠Cover過佢個臭男
人既味，卒之全程巴士，我倆要去到美孚先有得救，我地以
八秒八三既速度逃離災難現場，走到下層，呢一程巴士真係非
常之難忘，我真係此生都不想再見到果個男人，果陣臭味而
家只係諗下都想作嘔，可想而知我當時在現埸係幾咁慘情呢.....

>>July 17, 2009 at 3:28:00 PM GMT+8

2009 年 7 月 15 日 星期三 【酷熱】

傻的揮揮手



今日，女友要返工喇，佢都不知不覺間放左幾日假...
我都有同感，每個人都係咁，返工時間一日有七十二
小時咁，而放假一日好似得一粒咁.....快樂總係不知時
日過，但玩還玩，始終都要開工既，趁我今日返半日
，一放工就衫都唔換送佢去返工，今日玩左一樣野，
就係睇住佢走..我先走，我在客運二大樓度比左十五蚊
上左去觀景台度望，經過大家一輪電話之後，我知道
佢係邊一架.....，但我都絶不好過，因為觀景台係露天
，我真係烈日下曬死咁滯，由太陽仲曬到我燶，等到太
陽落山，我先見佢架衰野慢慢郁....頂..!!!!在觀景台有幾
座唔使比錢既望遠鏡，一望之下...佢原來仲要等另一架
入來，佢先可以出，我諗在馬路上呢D叫讓路吧，由佢
郁到升起走人，足足用左十五分鐘，如果可以刪除之前
D太陽和等的時間咁望佢飛，咁就好喇.....!!!不過，我都係
第一次咁送佢，感覺幾特別既，不知佢見唔見到我揮手呢..?
但係在我身邊一齊看的，一定以為我瘋的吧...揮咩手呀..???
其實...妳又點會望到丫....!!!

其實果度唔曬的話，都係一個好去處，又平景又靚，拍拖
去的不妨諗諗呢個地方吧，溫馨提示係黃昏後先好去，不
然會曬Q死你....!!

後話.....其實香港唔止中環維多利亞港個夜景靚，就連機埸
既景色都好吸引人，當你去另一邊望，就會望到博覽館既
彩色光線，再往另一處望又會望到汀九橋同屯門公路裡面D
車發出既小燈光，閃下閃下又係好靚，你望向跑道又會見到
著滿點點燈火既光，又係好靚....，如何兩個人一齊來拍拖，
大家一齊望呢一大遍景色，真係有點浪漫既味道，就算，好
似我咁，今日一個人到，一個人望住咁靚既景，亦都可以好
安靜咁諗下野，當一個人寂靜咁在那處，你會諗到好多野，
當然啦....諗到既有開心的、唔開心的，咁更係啦，未必每個
人都會接受呢套，但我..我本人係呢類人，一個人獨處Solo時
，會有更好既啟發，可以咁講，當我一個人對住咁靚咁大自然
既景物，好多時都會有意想不到的收穫比自己....。

或者我自己太無主見喇，其實我話"是但啦"、"無所謂"、"隨妳
喜歡"..呢D說話，看來唔係遷就，或者我明白有時女友會有點
失望的眼神，雖然女友唔開心冇講出口，但我知內心都不會太
過好受，始終無心傷害等於無情力，打左人都唔知人地痛緊....，
回想起，其實妳都暗示我好多好多次，是我仲傻下傻下咁唔知
仲乜吧，我諗下次妳問我想去邊度食飯，我會懂得答妳吧....!!!!
最少我應該做到這個吧.....!!


我想...我應該還欠妳一句對不起呢..



傻瓜機，Zoom得唔好，不過勉強可以影到佢準備Landing...


開始Landing喇...


Landing果下煙都出埋...


Landing Success.....!!


空中巴士A310..如果我冇睇錯的話，呢間航空公司我打死都唔好幫襯..!!點解?大家心照啦...!!!


Dragonair 空中巴士A330..都係若果冇睇錯的話...港龍全部機隊都係Airbus...!!


呢架應該係波音B747喇，華航自從611班機空中解體事件後，安全率高左好多，我去台北有考慮過佢架都...


日落西鈄...真係曬到燶，我果刻好怕曬傷自己，飲恨冇帶太陽油...!!


又另一個機開始Landing喇...呢架係澳航..


聽聞澳航係世界上安全率最高既航空公司..接近零意外，但張機票貴到抽筋...


影日落.....而家睇日出日落都未必使去鳳凰山...睇下..大大個咸蛋黃架...!!!


開始日落喇..


夕陽向下沉喇....


慢慢沉!!....


沉下又低D喇!!....


不經不覺已經沉左一半!!....


直到沉左一大半喇!!....


夕陽醉了....落霞醉了...任誰都掩飾不了....!!!


日落後的一號客運大樓....!!


果然係世界頭三名既機埸....住在香港隨時都可以見到，其實香港人算係好幸福，起碼呢一秒我咁諗先丫...哈哈!!


呢D算是晚霞嗎...?我覺得好靚好吸引，就係咁忍唔住就影底左佢喇...!!


呢個晚霞另一吸引我之處係佢D霞光....好似有三截咁...看到嗎??


俯瞰落去機鐵機埸站，其實入夜後度度都好靚....，唔怪得之咁多外地人會來呢度睇景啦....!!


一號客運大樓、萬豪酒店、一號大樓停車埸、的士同機鐵站，睇到嗎??


晚上的一號客運大樓...!!


晚上的一號客運大樓連外面全景..!!


而呢一個係二號客運大樓既商埸頂既設計，到左晚上會發出耀眼白光，好似而家咁..!!


>>July 16, 2009 at 6:53:28 PM GMT+8

2009 年 7 月 14 日 星期二 【綿綿細雨】

好女仔Rachel



今日女友約左佢個同事一齊食飯，佢叫Rachel，
其實我覺得呢個名幾好聽，一來唔係太多人用，
二來又好讀，Rachel個人都幾好，感覺上好豪爽
咁，說一不二咁既性格，女仔來講真係幾少有，
或者我第一次見佢吧，真實性格未顯現出來，但
最少今日我們三個都相處得融洽啦，晚上到我們
家食飯，佢都有幫手整餸，原來都係一個入得廚
房既女仔，哈哈....好似幾好喎....!!!不過人地已經
有男友，個男友係做差人，嗯....人地前途真係無
可限量，而我...我諗我都要打死一世工，唔到十幾
二十年都唔使望上位，其實我都有諗過諗下其他野
，去幫助自己工作上的前途，但係我睇中果D一係
要幾萬蚊，一係要全日制，我邊有咁多時間喎，讀
P.T.又要幾年時間，我又唔想拉咁耐，所以好多時
都要放棄，只不過我遲D都要養家架嘛，照時間來
計，女友將來搵錢都會多過我，我就算加薪都追唔
到佢，唔知係唔係男人始終要面子呢...??其實我知女
友跟本唔會介意呢D，但心內硬係覺得比人知，我會
比人笑咁，唉....我點做好呢...??難道真係要半工讀嘛
...?臨老先入書叢，如果當年我爭氣一D，比心機讀多
兩三年，情況就不一樣喇.......，大家覺得我應該點做好
呀???仲有要講聲唔好意思，我咁遲先覆大家Email，唉
.....我真係驚好似上次咁，比人問我係唔係blog既主人，
而家攪到我講野都要就住就住，好驚比人秋後算帳呀!!!

>>July 15, 2009 at 1:34:06 PM GMT+8

2009 年 7 月 13 日 星期一 【酷熱】

應慳則慳...??


返夜，雖然未算係最夜果批，但講真..我唔係咁鐘意
呢個返工時間，撞正係星期五、六，往往都會迫滿哂
人，而且夜晚好少有『孖仔』，如果係天水圍線的話
真係個個都變哂『罐頭裡的沙甸魚』，尤其係呢排天
氣咁熱咁焗，個個都會要求冷氣有咁大得咁大，最好
好似個雪櫃咁，但係唔係每個人都鐘意咁，今日有個
女人叩門向我講，可唔可以熄細個冷氣，跟手佢指住
手抱中既BB，佢唔舒服呀，哦...原來驚BB冷親，咁好
啦，去到一半路程都冇，我就聽到後面有人講，嘩....
咩部車咁焗架..!!!又聽到D人講...一係開到鬼咁大一係就
開到鬼咁細，唉.....聽到有呢D聲音，我就望下鏡，好似
見唔到手抱BB個媽咪，我估可能落左車啦，咁我就開返
大小小啦，之後去到總站先至開返大佢，關門焗佢等D
冷氣會涼D.......所以話，好人有時都幾難做，不過都唔係
第一次，我都習慣喇，鬼叫死人劉德華個廣告深入民心
咩，一有咩事D客就會講，今時今日咁既服務態度係唔得
架喇...!!!呢下野...多得劉德華唔少.....，攪到任可一行的服
務性行業都中招........!!

放左工見到女友在剪髮，有點恐怖，因為佢在房坐住，對
住塊鏡，手攞把剪髮較剪，響度剪下剪下剪.....，房又唔係
著左好多燈，有點似D豔鬼索命的感覺，哈哈，咁當然只係
嚇左一嚇，之後..我即刻開返燈，佢既傻瓜樣又響我面前喇
，不過....女友自己剪又剪得唔差喎，幾有層次，碎得來又幾
好睇，剪完又向我講...咁就慳返百幾蚊喇...哈哈...!!女人...買化
妝品又唔見慳住慳住，但呢D錢就攞黎慳，唉....都唔知D女人
諗咩既....真係難理解呢...!!!


激死我....呢個網成日都上唔到，我真係想休左佢...整佢個計丫..!!!!!

>>July 14, 2009 at 7:03:48 PM GMT+8

2009 年 7 月 12 日 星期日 【清涼】

妹...談未來



今日放假，同女友一齊出左去行街，途中我妹打電話
比我，於是大家三個人一齊去食左個Tea，順便一齊行
街，我妹同女友真係好好傾，咩都會講，有時我覺得
女友而家仲了解我妹，可能大家都係女孩子吧，我妹
仲有一年先畢業，問到想做咩工，佢開頭都唔係好清楚
，冇咩方向，但我知佢一心想做係一D有員工福利既工
作，好似唔使比D搭車呢類，但唔知佢係唔係去左一次
旅行之後就上左癮，成日想週圍去，仲成日話今年一定
要去多次日本，但係去日本真係唔平，除非有員工票啦
，用十分一價錢去買機票，真係個個聽到都心郁啦，我
妹都唔例外，而家佢不停咁學其他語言，我諗都係為未
來自己鋪路吧，毫不知情既阿媽，而家仲不停咁問佢日
後想點，有時真係好想話下媽子，個女都咁大個啦，佢
自己會有打算架喇，問佢咁多..佢反而覺得你煩，不過...
而家知個妹有未來的打算，我都唔使擔心太多喇，起碼
唔使幫媽子做傳聲筒丫，我都放心喇，希望來年我妹都可
以攞到員工優惠票啦，佢可以遊覽世界各地我都開心既，
我就話冇錢冇料o者，但我相信以我妹能力，要入呢間公
司都唔係難事，講真...我都好想去下旅行，可惜真係冇時
間，所以我話呢...我真係好羨慕佢架，攞正牌去環遊各國
，份工受氣D都值得丫。針冇兩頭利架嘛...!!!

>>July 13, 2009 at 3:47:03 PM GMT+8

2009 年 7 月 10 日 星期五 【酷熱】

觀星...



今日同女友一齊回家時，女友無聊地望向天
空，並且講..嘩...今晚好多星呀...!!!於是我又
望上去睇下啦，的確好多星喎，而且個月亮
發出反射既光，顯得旁邊的星星更加之閃更
加之光，女友數下數下...嘩...有幾十幾粒呀.!!
跟住我又望，係咩...好似又係喎，但點解D星
會郁既...??妳係唔係睇錯呀..??是飛機發出的光
嘛..?女友話....點會呀，飛機發出既光係紅綠閃
燈，況且都唔會飛咁低再講亦冇引擎聲，我心
諗..又係喎，但女友都發現星星真係好似會郁咁
，而且唔止一粒，係好多粒都好似識郁咁，好
奇怪，我話會唔會係D雲郁，比到我地有錯覺，
覺得係星星郁呀...?就係咁兩個傻人響條路，係
咁仰頭望住個天，途人一定覺得我地瘋了吧....!!
可能有途有已經報左警話有兩個傻的在街上，我
估應該大概吧....!!!女友這時候又講...會唔會係流星
呀..?我話傻吧...有流星天文台早就會報告啦，女友
話...天文台報告果D係流星雨......!!!一粒半粒流星天
文台點會報告呀..!!!!女友話唔好理係唔係啦不如許
個願吧...!!!我......要我當街許願麼...??傻了吧妳....!!!!!
我話....妳知唔知咩係流星呀..?流星係太陽系既塵埃
跌入地球範圍之內，同大氣摩擦燃燒著就係妳睇既
流星喇..!!!對住粒塵許願..?不如對住個垃圾筒許願吧
(因為路邊有個垃圾筒)，之後.....我就比女友埋怨好冇
情趣呀，破壞哂我對流星既幻想....，不過...我地仲係
好似傻瓜咁研究點解呢星會郁...??最後當然咩都研究
唔到啦，係星星郁定係雲郁，定係我倆一齊撞邪見到
唔係星星係外星人.........天知曉喇...!!!但兩個人都係覺
得D星星郁仲郁得好快.....難道兩個人八隻眼都睇錯...??

究竟星星係唔係識得郁架..??

>>July 11, 2009 at 6:59:04 PM GMT+8

2009 年 7 月 9 日 星期四 【清涼】

同是流浪貓....命運郤不同



正話落街食飯，見到件慘不忍睹的事，一班少年有
男有女，在邨內追隻流浪貓(我估啦...因為我在輕鐵站
上睇唔到)，流浪貓受驚跳出花槽，衝出馬路就被架
客貨車輾斃，不偏不倚只係輾車四肢中間即係腹部，佢
未有即時死去，在我輕鐵來之前牠手腳甚至係頭都曉
輕輕咁震動，我還見到班少年人見到此情此境的反應
，反應是好似人地玩完一件玩物咁拾不回而叫囂，像
告訴比人知遊戲完了一樣，隨即就消失在花槽後，在
我上輕鐵前可見到有心的司機會避開貓咪，以免再輾
過牠.....。當我食完飯回來之時，牠已完完全全被車輾
過無數次，心內不太好受，如果是我隻貓咪我會點算好
??雖然對那班少年所作的行為令人氣憤，但佢地又真係冇
虐待牠，就算當時有警察都奈他們不何，世界係咁...我都
只有嘆氣今次牠不好彩，逃走而跳出馬路，如果牠反方
向逃走，結果就好完全不同，看見已面目全非的屍骸，
難免會諗為什麼司機還要輾下去，牠已經離死不遠喇.....
但係安慰的想想，可能徹底地給牠死亡還好點兒吧，因
為輾到佢第一下，牠還有知覺同反應，既然要牠痛苦掙扎
，倒不如令牠快點死亡會好吧，方法是絶不人道，但我估
貓咪都想情願了結自己都免得自己再痛苦下去吧....!!

回到家，抱著自己的貓咪，陪牠玩了一會兒，可能當日我
不是拾牠回家，牠結局都同佢一樣，如果貓咪能夠識路，
走去嶺南大學棲息就好喇，那裡有最少四十隻流浪肥貓，隻
隻都有學生輪著照顧牠們，那裡有隻The King Of Cat 叫小虎
，是那裡的霸王，但最近已經聽聞佢太老又肥的關係，已經被
其他貓佔領佢地盤，但點都好啦，那裡的貓係好幸福，個個
學生都愛錫佢地，所以果度D貓係特別一點...就係唔怕人，你
可以隨時走去摸佢甚至抱佢，點解我知咁多...??因為我妹在那
裡讀書嘛，每次女友去到那兒都會像發瘋一樣，要摸過夠本才
收手呢，尤其係果隻肥到肚腩拖地既小虎呢....不過最近唔係成
日見到佢，不知佢去左邊個地盤喇.....

>>July 10, 2009 at 10:26:23 AM GMT+8

2009 年 7 月 8 日 星期三 【酷熱】

一天光哂



收到公司的通知，我合格喇，竟然會合格喎，有
點難以至信，但我打打自己的臉...真的..有反應...
痛的，是一件實實在在的事實，因為我覺得自己
一世都係不幸運的，今次在半打天才波之下成功
闖關，真係好奇蹟............!!!

在其位而謀其事，我諗我都要好好安排一下自己，
打算下一步了....!

>>July 10, 2009 at 2:47:39 AM GMT+8

2009 年 7 月 7 日 星期二 【清涼】

無聊一個人



放工無聊去左大窩口，睇下以前紅十字新界西總部
有咩變，點知差D迷路，幸好最後都走得返出來，
而且仲成功入去裡面睇下，總部個格局基本上冇變
，都係咁舊，諗起以前同班同學咁一齊去學First Aid
，一齊唔留心比阿Sir鬧，一齊肥左佬，一齊再補考，
真係開心，再望下出面的球場，大家一班人熱屎辣辣
咁步操，操足幾個鐘，辛苦到不得之了，見到每一件
物件，回憶一下子湧出來，十幾年喇，很多事物都變
了，連阿熹都結左婚，時代已經再不屬於我地，家下
既CU198團隊已經變左，我諗母校班新會員都唔會提
起我地班老屎忽，雖然不想承認，但都要承認，自己
真係開始老喇.....!!臨回家路程，憶起以前等巴士的時候
，邊個有冷氣巴士丫，大家都係坐住架熱辣辣既熱狗，
所以今日我都特登等架熱狗，唯一一條屯門熱狗線66號
，我等到喇，跳左上車，D座位真係坐唔習慣，三個位
一張椅，不過沿途都冇咩客，所以架車好吉，講起巴士
，而家D熱狗都所剩無幾，剩底的熱狗都係舊冷氣巴的底
盤，而不安裝冷氣系統，由於本身係遇左佢安裝冷氣系統
，所以馬力係大一點，加上車窗全開，無風阻，響屯門公
路由荃灣返屯門，只係十五分鐘多少少，架巴士真係快到
離譜，其實我好享受呢一程，車窗全開D風打入來真係好
爽，而家搭巴士好難有D感覺架喇....!!在屯門公路上還可以
見到飛機低飛準備降落，飛機低飛的程度係你可以望到架
飛機係咩航空公司，加上佢D引擎聲再加上一個咁完美的海
景襯托，我覺得呢幅圖真係好完美，最衰冇相機在手中，
如果唔係我一定影底佢.......!!


女友返工我送不到她，近來發覺D返工日子同佢撞到扖街，
時間相撞到無法管接管送，究竟邊個編更表架﹖有心兼特
登的嗎??編更果個實在太過可惡喇.......希望下期D更期會好
一點啦....，因為我都不太想返呢D兩頭唔到岸的時間，實實
在在我真的"受夠了"

>>July 8, 2009 at 1:54:24 PM GMT+8

2009 年 7 月 6 日 星期一 【酷熱】

搵得來...洗得去..!!



今日好返好多喇，可以出到我自己把聲
，唔再係嚇死人既聲，1500蚊係有價值
既，早知係咁我就比心機讀書，做個醫
生啦，1000蚊同個病人吹水，仲貴過D
律師既談話費，醫生仲叫我返去覆多次
診，即係又要比錢佢洗，1000蚊呀，我
都要一又六分一日先可以賺到，我眼見
當日都有成十幾個病人到診，佢一日起
碼搵10000-20000蚊最少，仲未計佢響私
家醫院掛牌喎，佢巡一次房好似唔知幾
多千，咁貴過皇帝出巡，羨慕不來了，
我都要一生一世為錢幣做奴隸過呢一世
架喇，雖然係咁，我都算係比上不足比
下亦都有餘，我又未至於去到山窮水又
盡吧，起碼我仲有錢去大快樂鋸個扖丫，
開講有話...知足常樂.....


其實我應該開心既，1000蚊一次醫生我
仲比得起，常言道﹕輸人不輸陣，每個
人都應有個"勢"，健康既是財富，又何必
多比一次果區區一千蚊，而要垂淚嘆氣呢....!!!

>>July 7, 2009 at 7:23:13 PM GMT+8