2009 年 7 月 5 日 星期日 【綿綿細雨】

失聲


兩天了，講不到說話兩天，從未聽過自己這樣
恐怖的聲音，雖然睇左醫生，但食左藥未見好
轉，而今日卒之都出去看專科醫生，只係見一
見過醫生就要一千蚊診金，攞埋藥要一千五百
蚊，有點不如乾脆殺了我的感覺，不過食左兩
次藥明顯有好轉，我出得返聲，失聲左兩天有
多，而家我可以講到野喇，雖然聲仲係好難聽，
但起碼我想要咩食咩想點，我都可以用口講，
不需要手語又寫字丫，明天女友要返工喇，慶幸
這兩天女友係放假，如果唔係都幾難捱，還要
覆多一次診，平心想想，有D錢確係要比人賺的，
我都不要再肉痛吧。

>>July 6, 2009 at 8:45:34 PM GMT+8

2009 年 7 月 3 日 星期五 【綿綿細雨】

貓咪...你好野



放工同女友去左食大排檔，點知食下食下落起大雨
上黎，老闆為我地搬枱都搬唔切，因為唔止我地呢
張，仲有其他食客嘛，我同女友雖然移左位，但D餸
都比雨水沾濕左少少，望見咁樣，我地都唔知食唔
食好，大家面對面咁笑了起來，最後我地都係照食，
仲叫多左一支啤酒一齊飲，今餐雖然食得狼狽一點，
但我們都食得好開心，而且今餐仲係好平添，一百蚊
有找，三餸兩飯一湯，加多支啤酒，呢餐認真唔錯呀...

另外晚上發生件事，可惡呀，因為我罸左肥貓冇得食
一餐，比女友知道左，我比女友哦左一大輪，又話佢
點識呢D唔可以攪，點知會整壞，總之處處維護牠，最
後女友平時在家的話都會煮點夜宵出來食，今日女友
話冇得食，以報貓咪冇得食一餐之仇，呀.......救命呀....
衰貓...我同你誓不兩立呀，害我冇得食.....!!咩世界呀..??

家中地位﹕ 肥貓咪 〉 女友 〉 我.......!!簡直係大大的打擊....!!!

**已經回覆大家E-MAIL，請見諒，日誌經常唔得，本人正
密謀轉Blog事宜，大家有好Blog介紹嗎...??**

>>July 4, 2009 at 3:05:41 PM GMT+8

2009 年 7 月 2 日 星期四 【酷熱】

懲治肥貓


前天，不幸比家中隻肥貓碰跌我電腦枱旁
杯水，Keyboard咁就壞左喇，女友呢兩天
又不在家，自己又冇時間買返個新既，幾
兩日用電腦真係好得好辛苦，好在MSN係自
己Login，所以都叫有得用下，但係打中文
字就困難好多喇，不是....應該話係打唔到
先真，我呢兩天只能用有限的英文字母，用
Mouse一隻字一隻字咁剪貼上去，折墮得很..
，一切都係拜隻衰貓所賜，所以發生呢件事
當日已經罰左佢冇左一餐食兼且唔比佢出廳
走動，為時三個小時左右。其實佢都唔係第
一次，對上一次佢又係整跌一杯冇水既杯，當
時杯邊有部手提，若果果時杯水係有水的話，
我就要買部新手機喇，所以今次罰佢都係有理
由的，希望佢真係知發生咩事，下次唔好再打
瀉我地D野啦，如有再犯....下次會加重刑罰。

好了，終於買返個新的，是無線Keyboard連多
隻Mouse，成380蚊，還順手買多一套新電腦
喇叭，再來多再大筒的DVD-R光碟，夾夾埋埋用
左我差不多1000蚊，用錢快過倒水，可謂又大
出血喇。

>>July 3, 2009 at 7:44:27 AM GMT+8

2009 年 6 月 29 日 星期一 【酷熱】

驚動到官差


今日女友放假，終於都可以回家抖幾日喇，真係開心
，所以...我放工就約左女友去行街，臨回家時諗住去買
D生果，而據媽子講，元朗買生果係平D，所以我地去元
朗買，元朗街市賣生果條街，真係多人到插針都唔入，
響我地後面有個女人，好大聲咁鬧『郁啦...企X哂響度仲
乜X野呀..!!!』，其實我都想行，但前面D人唔郁有咩計呢
??我地都控制唔到D人架..!!所以有個女仔就隨口講左一句
『痴線』，就係一句痴線便引起好多事端來了...

原來個惡女人同行仲有個金毛男人，約三十幾歲左右，都
係兇神惡殺咁款，個男人就用好勁既粗口，惡鬧個女仔，
但女仔都不甘受辱反擊佢，只係個女仔真係斯斯文文既人
大聲極有限，而且冇粗口反擊，明顯處下風，但兩惡人都
冇諗住攞個彩就收手，聲大夾惡咁鬧之餘，仲越行越埋個
女仔度鬧，個女仔就越縮越入，其實女仔都唔算鬧人，都
係講道理而且見佢想息事寧人想算數想走，但惡人唔放過
佢，大家持續左五分鐘左右，同時都有好多人圍觀，個女
仔唔知係唔係怕左個惡男人，因為佢真係越行越埋個女仔
度，就係咁向後縮左一步，個惡男就咁整到個女仔跌低左
響地，女友連忙扶起同時，亦都鬧左佢一句，『兩個人蝦一
個女仔.....有冇攪錯呀』，惡女立即閙佢，『關你X事呀!!』
正當我想出聲之時，有警察來到，由於個女仔跌到，有傷痕
，警察問咩事，街坊就話兩惡人又閙又整到佢跌到，兩惡人
當然唔認啦，女友話『我見到』，就係咁...我地就坐龜車去差
館，我第一次坐龜車呀...唉~~!

小小一件事要去到差館攪左成兩個鐘，最後因為個女仔有傷，
並且有人証即係我女友，個惡男而家暫時被起訴，要比500蚊
保釋，走果陣全部人一齊走，惡男竟然認低威想講和解，但
女友插口話唔得，之後我地走另一邊走，終於大家可以回家喇...

今日我地認識到個朋友，即係受害者，大家交換電話聯絡，我
地一齊走時，女友話唔可以原諒呢D人，叫個女仔唔好和解，
不過我都睇得出個女仔都唔想放過佢，原因係點解，就不可以
向大眾公開，私下問我吧.....，傾下先知個女仔都係剛出來做野
教書既，唔怪得之，比人鬧一句粗口都唔講啦......

不過....為左少少事要報官會唔會有點兒那個呢...??是小題大做嗎?

>>June 30, 2009 at 1:21:59 PM GMT+8

2009 年 6 月 28 日 星期日 【綿綿細雨】

壞心情


今日在家中翻呀翻呀...翻到我一叠CD，開初還唔知係咩
內容來的，放在電腦看......太懷念喇....係我在舊中心返工
的相片，想起果陣真係做得好開心，雖然遇到D唔好既社
工同事，但辦公室政治下，我還是努力做好自己，就係咁
我都比老闆續左三年約，由咩都唔識到事無大小都知道，
真係要多謝中心的同事們，見到呢D相...驅使我去找返張
多謝咭，係我Last Day中心同事比我既，睇返有一個同事，
寫左一句咁既野，『加油...不可以弱過女友呀』，哈哈，
當時佢成日都話我點可以比女友食得你咁應架...!!!我真係
無言以對，但點都好，一切都已經係過去，其實近排心情
唔係太好，有同事都問我咩事，因為我明顯咁少左出聲，
唔知點解呢，我一見到落雨我就會心情下滑，尤其呢排天氣
真係時雨時晴，攪到我心情都好不爽，返工有點炆，連帶
關係令到自己返工都做錯野，唉...何時先晴天呀...?

>>June 29, 2009 at 2:47:25 PM GMT+8

2009 年 6 月 27 日 星期六 【颱風】

對待不喜歡的


今日同女友、表弟妹去左食壽司，原來我加下數下
，我都有好多表弟妹，以我媽果邊來計，我係最大
果個，而我都係較喜歡同媽子果邊D表弟妹來往，而
女友都係同我一樣，鐘意我媽子果邊D表弟妹，就快
又中秋喇，又話要同我老豆果邊D人食飯，唉....又唔
知到時會比咩說話我聽喇，話我都不要緊，還受得起
，只係女友係無辜的，要是又好似以往咁個個比說話
我女友聽，我話過親戚都冇面比，我一定反擊，如果
個大伯都係咁口衰，我話過唔會再見佢，再見之時就
係大伯死時，做親戚鞠多個躬比你.....我係咁架喇，對
你還要講人情嗎...??你去死吧...

>>June 28, 2009 at 3:25:54 PM GMT+8

2009 年 6 月 24 日 星期三 【炎熱】

自討苦吃..?


今日走左去圖書館借書，唔知咩驅使我，近呢
半年我都會keep住入圖書館，其實由細到大對
讀書都冇咩天份，我諗我讀書人生最風光的都
係小學五年班果陣，考到第一名，成績仲要超
越左A班，去到抽屜攞起我當年張獎狀....往事只
能回味，真係好想再試多次......!!最近借左三本
書睇，分別係《家》、《春》、《秋》，其實我
只係睇左《家》的半本，感覺都幾好睇，哈.....
我成日都話自己驚返工冇精神，何解我仲要睇書
，自費精神呢..?倦...看來都係自己攞黎....!!!

>>June 25, 2009 at 6:40:06 PM GMT+8

2009 年 6 月 23 日 星期二 【晴】

香港中學生



香港人始終都係八掛，做事太多無謂的堅持，
太少實際的行動，好簡單，今日有個女人響
扶手電梯卡住自己條長裙，一刻間，當時人
只懂拼命拉條裙尾出來，祈望可以拉到出來，
不致而家咁拉爛又扯甩，而當時大大話話有
十個人在電梯上，大多還是學生，竟然冇一
個可以做到"整停部機"既動作，只係望、睇
、叫，仲要幾個人行去望湊熱鬧，十秒內都冇
人E-Stop部機，正當我想幫手之際，終於有個
醒目既女仔停左部機，當時人條裙基本上扯左
一少部份入去，最後點我不知道喇，我諗除左
剪走扯入部分外，佢都冇得選擇，機器冇眼，
有時真係幾危險呢....!!!而問題點解會咁多人響
個急停制附近都冇人幫手按停，要等到一段時間
先有人做反應，如果果個人唔係扯條裙入去，而
係扯頭髮入去，咁點算，要等到佢頭皮都扯走，
先有人幫嗎...??中學生讀左咁多年書都係得個睇字
，而當時按急停的人，只係個小女生，望上去都唔
知有冇12、13歲....冷靜頭腦..高低立見吧.....

>>June 25, 2009 at 3:18:09 AM GMT+8

2009 年 6 月 21 日 星期日 【暴雨】

一等下流



是日返工第一天，唉......手雖然還有點痛，但都還可
應付得來，工作時比平日打醒萬八分精神，總算平平
安安，回到家，女友已經返左工，時間相撞我亦無暇
送她，忽然媽子打比我，問我今日得唔得閒，我問咩
事，原來媽子原先約好今日去飲宴，但有點事去不到
，唯有找我頂上，就係咁我同我妹一齊去左一個，我
都唔係好識既人既婚宴，都不打緊了，其實去到都係
食，只係一開始人情又比左，麻雀又輸埋，乳豬又肥
，菜又苦，魚又腥，雞又老，翅又稀，伙記又惡，嘩
......我以為電視做既先會咁，估唔到我都遇到，伙記又
擲碟...唔係放碟，上菜又差D倒瀉我杯汽水，好彩我手
快接得住，如果唔係我要找你D枱布圍住身回家嗎....??
D燒乳豬肥到全部得係肥膏...點食呀??到上帶子豆角時
全碟都有苦味，上碟雞又肥又難食，魚好似未熟透仲有
腥味咁，最緊要D翅，我第一次食到我想嘔，嘩....總之
就惡頂啦，最好呢都係尾個碟橙，你話我俾左成1000蚊
人情，我唔堅持到臨尾打包返幾隻靚橙先走.......我仲係人
黎咩....?講真我咁大個仔食咁多餐最難食係今餐，心諗....
主人家咁攪，你去麥當奴擺酒好過啦...唉........幾咁失禮呢..!!
據飲紅酒人仕講，D紅酒又係勁惡飲，以上咁多都算喇，
最緊要新娘化完妝都係唔靚女既，新娘都係咁D姊妹質數
就更加......!!!連我妹身為女仕都係咁講，你話幾咁唔掂呢，
唯一視覺享受都冇埋，失敗中既失敗，抽獎又冇我份，可
惡中既可惡，臨尾走人..主人家問今晚大家難忘嗎...??


咁既招呼...咁既態度...咁既服務，唔難忘都難啦...!!!!

>>June 22, 2009 at 6:17:19 PM GMT+8

2009 年 6 月 20 日 星期六 【酷熱】

十級嘔心



今日接女友放工，晚上，回程巴士都算係多人，
坐足九成滿，只係後排五座位既位冇人坐，而我
同女友坐下層車轆上面的對頭位，到左尾二個站
巴士就會直上高速公路，就係呢個尾二站，上左
一個令我地作嘔既中年男人，一上車坐正我女友
對面，係面對面咁坐，個中年男人坐左唔夠十分
鐘，就響我地面前做左D嚇人動作，佢竟然公然響
我倆面前挖鼻，挖鼻都不特止，仲要週圍彈，佢足
足挖左有五分鐘之久，我地除左目瞪口呆..不敢郁外
都唔知可以做D咩，待佢挖完肯收手喇，我地先跑上
上層，上層得返D單丁位，我地只好各有各坐，落車
時，見個男人都係同我地一樣站落，而佢掂過的扶手
我地完全唔敢掂，原本諗住落車食飯，大家當堂冇哂
胃口，一來大家唔係肚餓啦....，最後..我地去左食左糖
水便返屋企，唉.......同女友講起正話個男人，我地都無
話可說，簡直嘔心呢....

>>June 21, 2009 at 5:56:43 PM GMT+8