2010 年 2 月 3 日 星期三 【晴】

辦年貨

新年喇就快....

人人都忙住執屋、賣新衫、辦年貨

講起辦年貨

我家、我地、我D親朋好友都係去

百佳、惠康、吉之島、Citysuper、TASTE Supermarket 度買...

有時買野話百佳、惠康呢D地方較便宜

但其實兩間大家都唔差得好多

不過確係Citysuper 同 VOLE比人地貴得離譜

之但係...呢兩間Supermarket真係有好多其他超市買唔到既貨

咁我地作為消費者就各取所需啦

果個所需就係要.."平"

老老實實....我年年送得最多..收得最多就係"金紗"朱古力

我有一年只係叫阿媽買三盒就可以過到送到初十

我比你又係金紗...你送比我又係金紗

分分鐘去到最尾你收到人送果盒......係自己買來送比人果盒

幾無謂呢..你話!!

不過今年有點特別....

本來都係諗住買金紗過到初十

誰知今日雪兒又比電話我...

諗住約食個飯....

到見到面先大家講起辦年貨既事

原來雪兒都諗住去攪年貨

不過買既地方唔係Supermarket....

係"護協"....全名...香港護士協會

去到佐敦護協...

未上到去已經一大班女人大包細包咁走

果刻好難想像佢地係護士....

因為佢地既行為同師奶冇分別

上到去護協...地方細..多野賣..人又多...水洩不通

幾辛苦先鑽到個位入去買年貨

買既方法係...3樓比錢mark貨....之後上5樓攞貨

果度有年貨買之餘都有好多護膚品、健康食品、零食等等

仲有好幾個試食攤位

原來護協好多野都好平

連出面大型連鎖店

好似聖安娜、美心、鴻福堂、海天堂等等.....

佢果D禮劵比街買便宜一大截

見到咁平....

一D都唔執輸.....搶呀...

可惜...我已經執輸

好多都冇貨

最後只係買左聖安娜蘿蔔榚票、幾十盒包裝好靚既餅乾同禮盒

仲有一大袋零食

仲買左個"風筒"

我買左738蚊..雪兒就1276蚊...

好彩雪兒老公有開車出來

如果唔係我都唔知點攞走

本來諗住接女友放工

諗住都要..對唔住...放佢一次飛機

哈....雪兒老公又肯去兜埋佢

要人特登入東涌..真係十分唔好意思

最後我都請左佢地食飯...

食完飯後...佢老公仲車埋我地返來

真係極度唔好意思...

諗住比返油錢佢

佢又唔肯收...

唯有....再一次感謝人地啦...

回家...在MSN同雪兒傾計

再多謝佢一次啦....點知雪兒不斷哈哈哈咁

原來兩公婆跟本八掛要望下我女友個樣

哈.......早知係咁...

我用盡佢部車兼慳返餐啦....

哈哈....

講笑乍....我點會咁計較喎

反正遲早你地都會見到

我將來一定比梗紅色大炸彈比你地架

仲有今年一定問妳攞利是呀

你地放心啦

如妳所講..我冇幾多年再收利是

我一定會搏老命攞利是架...

哈哈...

2010 年 2 月 2 日 星期二 【晴】

等運到

今日走左去車廠等運到

冇錯...

真係等D野運到

據可靠情報今日會有幾部新車落地

嘩.........!!!!!!!!!!!!!!!!

等到喇.....等到天都黑喇

終於都來喇...

幾架大貨櫃拖架一齊來

到停定....拉鋼繩...吊起佢...放落黎

見住D新車吊一架一架咁放落黎....

嘩...我話....

會唔會跌架..??

到時真係新車"落地"喇

不過我只見果條吊臂....

穩如泰山....好安全咁順利咁放哂D新車落地

講真...對呢D車冇咩好感

唔知點解

在我心中...第一期車身橙色拉花係最靚最特別

到二期同九鐵睇齊統一車身顏色...都過得去我都覺得

但今次都唔知似咩....

唉.....遲D仲過會統一哂車身拉花佢

我真係冇眼䏲....

其實呢幾部都未係最後.....仲有好幾部車會遲D再送過來

遲D有幾會或者帶埋個傻妹去睇

上次我話會帶佢睇新車落地

咁啱傻妹又返工

唔怕..仲有幾會

下次再捉你去睇佢點運來...點吊落黎...點樣扣架車上路軌

好喇....

明天下午妳返來喇

家中有多把聲喇

太好喇

明天接妳....!!!

2010 年 2 月 1 日 星期一 【晴】

獨個兒

妳不在家中

工..我又放左喇...

都唔知做咩好

又唔想咁早返去

而家電視劇又唔好睇

回到家真係冇野好做

舊時買部WII返來

諗住得閒玩下去解一下悶

點知買左返來都唔知有冇開多過100次

仲好多時都開唔夠一個鐘就收機唔玩

很久冇去過機舖打機喇

今日入左去睇

好多遊戲都Update左

好多都唔知點玩

來來去去我都係賽車同槍Game

最終都玩左30蚊....

賽車Game平左....

一蚊一舖....

就係咁我就坐左去玩左30舖賽車Game...

頭暈又手軟

頂唔住....太暈喇玩到...

最後都走人....

走去個洗手間方個便清醒一下

出來就見到機舖比差佬查老身

嘩...好彩走快一步....

查一查真係麻鬼煩.....要呆等佢查完全場先攞命嘛

回到家中諗住上日誌

頂....又上唔到....

雖然你唔使錢比我用

但成日都咁真係......唉!!

其實呢個部落真係好落後

全部要自己寫HTML出效果

Upload相片又係麻煩過人

有時真係想放棄呢度

但自己又唔想冇哂我之前所有野

認真麻煩....!!!

唉...

看來今天妳都係上不到網喇

但算係咁喇.....妳Send左Message比我...

話我知妳無事....

好喇......等多天妳就返喇

哈...

一個人在家真係好靜好靜...

我去睡喇.....

2010 年 1 月 31 日 星期日 【晴】

不虔誠的我

今日送妳返工...

哈哈....我都習慣了

就連巴士大佬都認得我地

嘩...又送老婆返工呀???

係呀係呀

全車程都冇咩客上車

而且巴士都開得好快...

40分鐘唔使已經響惡哂城落地

照舊陪妳入去買支熱飲

比妳暖暖雙手..暖烘烘返妳個身後

我就返去

返去時搭回頭車又搭返正話架巴士

我都係坐返之前個位

呢一程....妳不在我身旁喇

在車上諗妳同我講既事

嗱....雪櫃有D預備好既食物

叮熱佢或者蒸熱佢就得喇(如果你唔懶走去蒸熱佢的話..會好食D架..!!)

還有D木瓜雪耳糖水....凍食又得熱食又得

如果唔夠錢用又或者要用錢就自己去ATM攞

 唉..好似阿媽吩咐阿仔做野咁

傻瓜....!!

我雖然冇妳咁醒咁叻

但一般既野我都識做架嘛...(真係好一般既事先係...哈哈!!!)

妳放心返工啦

三日兩夜的日子我冇問題既

反而得妳一個在另一個地方

雖然話妳都唔係第一次

但我仍然很擔心妳架

我不在妳身旁時妳要自己乖乖咁定時食藥呀

不知妳的下榻酒店會唔會有得上網服務

有的話就可以睇到我寫喇

我呀...要果邊既零食呀

要買D比我呀....(又屈手信呀....真係無賴)

Ok....就咁先啦

妳放工返來時我來接妳啦

真係要記得食藥...記得呀

有事有病痛我真係幫妳唔到架

可不想妳像上次咁

妳痛到聲都出唔到...痛眼淚都不斷流出來呀

妳有事我心痛時返工都會返得唔安樂

真架....

我真係唔想再飛站喇

唔係次次都咁好彩冇人投訴架

仲有呀

好感謝妳每天早晚都為我祈禱呀

是我先會咁衰

不能為妳持之以恆去...認真禱告

天主同妳會原諒我嗎...??

我可真係"教而不善"呢!!

2010 年 1 月 30 日 星期六 【炎熱】

見鬼

天氣時凍時熱

今日返早時我真係熱到想唔著衫

唔理三七廿一...開盡部冷氣

唔知係唔係架車冷氣有D問題

開左好耐都好似唔係好到D冷氣

但車廂後果半段位置又出到冷氣喎...

看來前部分既冷氣系統都就快打柴

算啦..咁仲好

怕凍既...上前D

怕熱既...行後D

Fit哂呀...

其他車冇架.......只此一架

威哩..!!

今日返工時發生左一件事

雖然係好小小小小事

但果刻比佢嚇一嚇..真係有半秒嚇破膽既感覺

其實我們行車時有D好奇人望住我地開車都習慣左

只要你比我知你係望住我..

而同時你又唔好嘈我、郁手郁腳拍我玻璃窗踼我門

我都會由鬼佢.....由佢睇到飽睇到嘔都唔關我事

而今日都係有人望住我開車

但從倒後鏡望到...只見到兩粒白色眼珠

跟住佢仲要瞪一瞪大對眼

好似想要跌粒眼珠出來咁

心中大叫...."我兩隻眼見到鬼呀...!!!"

但日光日白喎...!!!!!

半秒定定神立即望真D....

我頂....佢個死人肺丫

原來係個黑人細路

由於我塊倒後鏡係掛於高處

如果冇人既時候...後鏡會望到黑色既地板同少少橙色椅子

而個黑人...因為黑色皮膚..我以為係地板倒影

誰知唔係...係整個人上半身

佢塊黑臉....但眼珠係白色...

使到我有半秒錯覺

虛驚一場.....

我連忙下一站立即放返塊布遮住

直到女友來搭我尾轉車我先開返塊布

嗯....

我女友塊臉...靚好多...

呢D靚女..我打開塊布都來唔切啦

下車講返呢件事比女友知

女友贈左四個字過我

"種族歧視"

喂....!!

曾幾何時有個人話最憎做深色皮膚人既客喎

麻鬼煩..身又大陣味..多多要求...眼光猥瑣..又大食..講野大聲..又嗜酒飲........一路數數數下去!!!!

而家邊個先歧視呀...?

哈....

冇野好講哩.....

我呢仗口舌劍戰贏得漂亮呀真係......。

知妳明天返工

去Super Market陪妳買小食

等妳明天可以帶上機食

開頭又只係話買幾件零食便算

買下買下...連菜呀、濃湯料呀都買埋

我冇錢架....

想不到連妳都係咁

得廿蚊響銀包...

仲衰過我..我都有三十蚊丫唔計散銀都有

妳得果廿蚊學咩人行超市呀..!!!!

最尾要我簽咭...

真的還好意思呀妳

嗱....

我冇錢找下期咭數架

下期張單妳同我找左去呀...

我既零用錢唔包找咭數架....

哈....錢都係留比妳煩喇...我唔想理呀...!!!

丫...

係呀....家中最高領導...

我想問下妳呢....

究竟我會唔會有機會加零用錢架..??

加係加百分點丫定係跳Point計呀

又或者係直接加呀??

千祈唔好話我知係冇得加呀

我會罷工絕食兼抗議架

妳都知啦

我都係80後架嘛....

好激進架...

2010 年 1 月 29 日 星期五 【晴】

照片...我的經歷四重奏

今日執拾相簿時

執到好多舊相片出來

遠至我半歲的時候

近至現在的都有

只係相片都有四千張以上

係..真係好多

相片有影人像既、有影風景既、有影無聊既

係冇裸照....我才冇阿蕉同冠A咁白痴呀

其實點解我會有咁多相片..?

全因以前女友在沖灑店工作

我才會有咁多

直到現時人生中

我影得最多相係同舊女友一齊既時候

有冇懷念以前既日子...??

話冇....就騙你啦

或多或少都有既

但係只會係回憶囉

而家......

我心只有妳

我知我地既經歷、回憶...

將會比我的前度會更多

妳話係唔係呀..?

是但翻起一本相簿看

揭起相片見返小時候既自己

相片中見到有風景..同埋細細個既自己

有D我係有記憶的

呢一張我仲讀緊幼稚園時影的

我正坐在一架已停泊在一邊的電單車上影

我記得係我老豆同我影既

當時我仲好疑惑加上天真無邪既語氣咁問...

『爸爸呀....會唔會有人鬧架....架車唔係我地架喎..!!』

之後的此情此景..就記在呢張相片中

有一張係我小學二年班運動日影的

點解我咁記得..??

因為影的前一天..

我老豆塞左10蚊比我

塞左響我枕頭底下

是我當日...早一晚要求爸爸比我既

爸爸同我講..

『好啦....聽日你枕頭下面就會有錢去運動日買野食架喇...』

果然..第二天早上

一打開個枕頭

兩個五蚊銀在我枕頭下

真係開心到不得之了...

當年喎...10很巴之閉喇

還有一張係中學時代影的

是我紅十字會整Team人的合照

講起真係...哈...!!!

當年....校花係A班一個女生

我讀D班.....只能遠觀

連說話都冇機會同佢講

估不到陰錯陽差...

自己亂選學會...

我其中一項活動學會係"紅十字會"

當年..校花都有參加紅十字會....

從此...我就有機會接近她

哈........恨死我班好多男同學架

當時我仲有佢屋企電話

又有一齊出去活動

一齊大家一班人食飯

讀D班的我....我估如果唔係參加左紅十字會

我估我呢世都唔會埋到佢身..哈哈哈!!!

而家仲有冇聯絡...?

當然有啦

上年佢仲結埋婚添

我都有去撼

佢既婚訊

我諗令好多男生既夢想都泡湯喇

如果我冇女友的話...

我諗呢煲湯我都會有份兒泡埋一份

看看再近一點日子的相片

比較有感覺該係呢張喇

同前女友一齊去澳門影既

我睇都冇幾多個會好似我地兩個咁傻

成中午12點先決定由葵芳出發去澳門

去澳門既決定仲要係響當時決定

去到都成下午3點

大白痴既我地去搵大三巴不知行了多少冤枉路呢

最後要路人幫我地留影....

就係咁....就影下呢個回憶喇

看來想打破這個『即興決定』

我到看看有冇機會可以癲到

買即時登機票去女友執勤的機上

又即日來回....

好恨左上佢架機好耐好耐架喇....

始終不能如願..

去台北或台南既機係最好選擇....

因為路程短..同埋即日來回

唔使住下榻酒店....可以立即做完班機就走

但係要破都很困難吧

又要碰正妳台北或台南的執勤機、又要咁好彩又多餘位、又要好彩妳唔係立即原機走、又要我有時間有假期等等

咁多條件下..我睇都難過中三T

真的好希望有一天

在機上妳會派飯比我食、問我飲咩...買唔買免稅品.....

不知會不會..望穿秋水呢?

再看看呢張相片.....最近影的

是同妳去食台灣麵時影的

當日我買左新機....

不停咁試影相...

影呀影..影呀影...係咁影

連妳既食相都不放過

妳一手夾住麵時...

我舉機影下

妳果刻由.."喂"唔好影呀...!!到好快咁轉反應...."笑"

影左

妳笑個反應仲快過我按影相的按鈕

妳變臉變得好快呀

其實呢張相..我好鐘意...

點解會鐘意..??

唔知呀.....貪妳笑得突然中帶自然掛....

同妳一齊都一段日子

似乎...

我們的合照...真係少得可憐

睇來找一天大家狀態好的時候

出來影個夠才可以呀

同埋都係時候訓練自己影相

去學識點笑....

我真係好擔心將來D婚紗相...

我笑都唔笑..咁就

影完比人感覺我好似被迫咁款

到時候就真係

仆Down on the floor 喇

2010 年 1 月 28 日 星期四 【晴】

願食餐好的..

可以飽睡一頓

真係好舒服

這幾天夾埋的瞓覺時間

真的不足十二個鐘

真的從未如此辛苦過

返工、煮飯、洗衫、哂衫、照顧妳探望妳等等

平日...除左探病之外

家中件件事都係妳包辦

只係妳不在家幾天

我已經冇左半條人命

真的不敢想像妳平日怎樣對這個家勞心勞力

女人真係不能小看呀

再次見到無病無痛的妳

很安心呀

我始終喜歡跳跳扎扎傻傻更更的妳

同埋.....

呢幾天我都係20蚊老麥餐來果腹乍

我好討厭薯條汽水呀

我想食得好一點....可以嗎?

我們幾天無一齊好好坐底食飯喇

蒸個水蛋又好...蕃茄炒蛋又好

兩個餸一個飯...

大家坐在一起

已經夠我開心、滿足喇

2010 年 1 月 27 日 星期三 【晴】

回家

幾經辛苦先搵人同我調更

好在而家叫有點點點點點點點點點點點點地位...

要搵人都不比想像中困難

講真...如果請不到假

我會出"茅招"....

因為我點都要陪著她出院

檢驗雖然發現到點點問題

解決方法亦都有點愕然

但現在好可能每一次她會痛得很厲害

雖然醫生亦都話可能會唔痛

但聽到醫生咁講

點叫人不擔心

我不忍心每個月都送她入院呀

為什麼會突然有D咁事發生

明明已經做左年檢

年檢的報告都顯示冇問題

為什麼會咁?

妳同我同一時間聽醫生講

知道這樣的結果後

越見到妳平靜....我越係擔心

如果痛楚都可以分擔

妳話多好呢...??

記得嘛..?

我講過無論妳變成點都好

我都唔會掉底妳走嘛

不過妳今日可以返屋企

藥要乖乖咁定時食

止痛藥....痛先至好去食

仲有..要Keep住覆診呀

嗯.....我會Mark底妳邊日覆診

妳呀....咪旨意偷雞飛走左呀...

唔使諗...借"返工遁"呀...

2010 年 1 月 26 日 星期二 【微冷】

My Turn

雖然妳萬分不願意

是我硬著強迫妳(對唔住呀...!!!)

語氣欠佳地向妳講話

其實只想為妳好

我知一個人在那裡會悶到發荒

因為我試過

如果倒轉我有事

我都相信妳會好惡咁迫我咁做

我好怕再突然見到妳痛到辛苦個樣

我見到妳咁....

我會驚...驚到會手足無措

好似果陣咁....我呆定了

這兩天....我無時無刻都擔心妳

呢兩日..我夾埋瞓不到六個鐘

無左妳在家呢兩天

我要去探妳陪妳、自己煲粥妳食

妳曾經講過..世上最難食既兩個餐

一個係飛機餐..另一個就係醫院食既飯

我記得架...

所以我幾辛苦..幾咁輪盡都好

我點都會煮好比妳

我平時都等食等得多喇

現在輪都輪到我做喇..幾辛苦我都做同埋覺得值得

我冇什麼期望

只要妳無事....

妳變成點我都不會介意

一陣約左醫生傾下有關妳身體出左咩問題

不用怕

我永遠都會支持妳

唉.....

有時我發覺是不是我太過倒楣運

連累妳都要成日入院

早上六點幾喇而家

放工..做野...煲野一直冇瞓過

真的要恰恰喇

如果唔係..返工時我可淒慘喇

2010 年 1 月 23 日 星期六 【微冷】

對不起

今日我放工後接她放工

在Gate B看到她出來...

遠處見到她揮手叫我過去Gate B度

坐著水池旁彎著腰坐住響度

臉色有點難看

細問下...原來係女性的每月一痛.......來經喇

我呢世都唔會知經痛究竟有幾咁痛

正如女人永遠不會知男人剃鬚的感覺

問她何時開始痛呀??

原來在機上....落地兩個鐘前已經不妥

她講我知，連行路都要彎一彎腰咁行...

好辛苦才捱到返香港....

出來Gate之前....已經有幾下頂不住

要停一停下來...回一回氣

大概講到呢度已經無氣說話...

我看得到...她實在痛得難受到不得了

見到咁..我又幫佢唔到...

我果刻好無奈..好無助....心很痛

我真係好想有人幫我睇下女友點

但到最後我都係只可以比自己個身體比佢做支撐

任他在我懷中埋頭掙扎...

痛楚令注重儀態的她也不理什麼

掙扎到髮髻都散開喇

我真係無法相信她有幾辛苦幾咁痛

幾經折騰她才勉強站起行路

本想搭巴士..但係要行出去又太遠

搭的士又要行返轉頭...

最後選擇搭機鐵....

諗住一出青衣就搭的士返去

但去到青衣她又好似有好轉咁

拿拿聲搭東涌線轉西鐵

一搭去南昌站又再見她彎著腰叫痛

此時有個女人讓個位比女友坐

我真係唔知點好...??

下站落車搭的士..??

定係不如直接送佢入醫院呢..??

因為我真係第一次見到佢咁痛..痛得咁辛苦

但我又見佢坐定左我又唔敢亂郁佢

一直去捱到去屯門站

都是不太放心.....

陪她睇一睇醫生先吧

特登走去睇個女醫生既診所

醫生同佢打左支針後...

在診所食過一次藥....

再響診所抖左個幾鐘...

中途又痛....

醫生開多一次Extra既止痛藥比佢食外同時再開一D瞓覺藥比佢

之後醫生吩咐瞓覺藥返去屋企食

Extra既止痛藥食多一次

過了一陣女友似昏睡狀態咁

全身軟軟咁

嚇得我又叫診所姑娘叫醫生睇下

Check血壓後.....尚算正常

只係她突然適應不到強勁止痛藥才會昏睡

過左一陣醫生話可以回家比她休息

再痛時....不可以再食止痛藥...因為已經太多食得

只可以比D瞓覺藥佢食

讓她好好咁瞓一瞓

扶她回家都很困難

我要扶著她又同時拉行李

有一段仲要係落樓梯

我狼狽得要扶完她下去才搬件行李下去

好不容易才返到屋企

半醒半睡的她...我呢刻可以放她上床瞓...真真正正休息比佢休息

她衫都不能換到

只係除走對鞋就由她休息

不知是好還是壞果一刻

好的....係佢唔使痛到咁辛苦

壞的....係拍她反應好鈍

替她拆好個髮髻...蓋被睡覺

我不敢打擾她

我怕一叫醒她..她又會辛苦

見到佢咁我心好唔舒服

我永遠都唔知佢感覺係點

點解佢會咁痛

如果一個月要折磨佢一次怎算??

我真的好想知佢痛係點痛

來緊的時間我不敢離她太遠

我怕佢有事會冇人知

我怕佢痛會冇人理

我怕佢要人幫助時..會冇人幫佢

我不敢離開她長時間

時間過得很慢呀

除了夜晚我叫她食多次藥同飲杯奶外

我由她繼續瞓

一直都係這樣....

除了我沖涼果五分鐘外...

我都床邊陪佯住她....

我不敢走她太遠

我好怕佢會好似今日咁痛得要彎腰叫苦叫痛

我用電腦都只敢在她身邊上網

我要看到她才放心

為什麼她要受咁痛苦

為何我呢世都不知她痛的感覺

她心地很善良呀...為什麼要偏偏今次要這樣折磨她

若果我今天要返工不得閒接她

她怎麼辦.....

一個人在機場痛到要叫白車嗎??

是我也有責任吧.....

我作為男友都應知道她的飛行時數已經過多

身體會承受不來

係我.....太弱小要令女友一齊同我捱.....

我是世上最差勁的男人

女友身邊的朋友已經開始成家立室喇

我...??

我還在做什麼呀??

準備...?儲錢?

女人的青春不多

我要負起責任才是....

我呢刻在做什麼??

我很失敗吧...!!!!