| 日記 | 日記主簡介 |
||||
2009 年 11 月 14 日 星期六 【微冷】 幸福與家庭的距離.. 今朝一起身... 手都好似唔係自己咁 好酸好攰好痛..... 好似仲痛過之前咁... 今天晨咁早女友已經煮左個早餐比我食 有一碗火腿絲通心粉、一杯熱華田、一袋牛油麵包(美心餅店買既...) 我用手食通心粉都冇咩問題 因為只用匙羹食 牛油麵包我食左三個..都冇問題 問題係杯熱飲..(有重量呀...!!!) 我係手震到攞唔起咁滯..(手震程度仲比食藥後的更震...) 仲差D倒瀉響我件制服度....(倒瀉就真係大劑喇....!!) 我一攞上手覺得唔對路... 立即放低.....並求救..(即係叫女友...) 唔係... 我唔係要女友餵我飲啦..(當我係BB咩..?) 係叫她幫我左杯倒右杯咁整涼杯熱飲同時..(對流原理呀...!!!) 要分開兩杯飲....(倒兩杯半滿的...) 而且仲要用左手攞杯飲 天氣咁凍我仲要她做D咁野係唔係好衰呢.....(係...真係好衰..!!!) 無法啦.....杯野太滿太熱喇.... 響度講一講啦... 我地食三餐呢..係有定架 早餐會好多野食 午餐會少過早餐 晚餐呢....唉....!!! D菜可以炒到冇咩油同埋你唔使旨意會有肥肉可以食.... 而飯呢係煮得啱啱好.....正晚餐+明天帶飯用.... 但點解咁清淡都覺得好食呢...??? 我唔知...
但不可以唔認.... 女友廚藝真係好得 咁雖然我地正餐食得"咁健康" 但可惜我同女友對零食都採取不能抗拒態度 有點矛盾啊.....(咁正餐食得咁健康幹麼...?) 你地又有所不知喇.... 女友得天獨厚... 佢有一個食極都唔長肉既身體..... 佢可以食咁多零食都唔會肥.....(但我都唔知點解..佢都話自己肥....唔明...) 但可能女友肯做家務抵銷吧...(如果唔係..何來家中咁企理喎...) 嗯..... 我覺得女友係有點包包臉外.....(對不起....把妳的秘密公告天下添....) 身材都好好丫.... 咁仲減乜鬼呢...??(再下去..一陣風都可以吹走佢囉....) 反觀我呢... 食幾多肥幾多.... 即使女友點Keep我都好啦.... 我都係睇住肥下去.... 所以...我有時都覺得我係好失禮我女朋友....(真的呀...!!!!) 尤其係見女友D朋友既男友.... 好明顯我係比下去 我呢個時候就會諗....(我係唔係應該消失呢...??) 出街.... 我開初都唔係好敢拖女友手出行 尤其係送返工時接放工時.... 我覺得總係有數百對眼光仇視我咁.... 所以我有問過女友...."喂...你到底鐘意我D咩....?? 女友就會答....鐘意就鐘意啦....咁妳又鐘意我D咩呀..?? 噢......奶野...(挖個洞比自己跌下去...) 我點答呀...?? 我咪又係話鐘意咪鐘意囉....冇咩點解架喎.... 嗱...我真係唔明喇 點解...妳答呢個"鐘意咪鐘意囉"呢個答案就得 而我答就唔得.....?? 最後要我講一大堆....因為妳好囉、識煮飯、脾氣好、對人好、同妳一齊會開心囉而且真的從心中快樂出來囉，........(讚美的答案...) 跟住.....女既就會話... 就咁架乍.....?? 我講得永遠都好似答唔中女友心中想聽的答案咁....(有冇女性可以話我知....到底妳地想聽咩呢...??) 之不過...女友有度好 就係唔會因為我答唔中而追擊我.... 咁事實上我女友係好嘛....(我冇咩再願喇...) 因為妳真係好值得我用一生時間去同妳一齊嘛..... 反觀我自己 我覺得永遠我都對妳...係同妳對我唔成正比 感覺到妳為我做了很多很多 我為妳做的很少..少之再少 甚至我的大意令妳受傷.....(我只有破壞....!!) 當我一見到妳D朋友既男友 有能力攪好一個婚禮 有能力買到一間屋 有能力可以一年可以去幾次旅行 有能力可以到令妳唔使做既 有能力................ 我會覺得我好似對妳不夠好咁 永遠覺得妳在朋友面前總係失色又失禮.... 我知我女友從來冇怨言過 甚至當一班人前..好大方介紹我係妳男友時....(我覺得妳好有信心咁...) 我總會覺得好失禮呀.... 人人都話女仔係唔介意呢D 只要男既對佢好... 女既什麼都願意...什麼都願捱 但可能男既天性啦...點都要一點臉子啦 我會有以上咁種種諗法 我知...我既女友..一定話我傻啦 但原來兩個人一起.... 不單止唔可以餓親個老婆之外 仲要比幸福佢 人地話一個幸福既家庭 我現在最多只能勉強擔得起家庭(不算添呀.......妳我都有搵錢付出....) 但幸福似乎離我有一段距離 我到底幾時先可以好似做到妳身邊朋友 果D男友既野呢...?? 27歲喇.... 我點算好呀...? 越諗我越擔心... 我真的可以做到嗎..?? >>November 15, 2009 at 3:19:04 PM GMT+8 2009 年 11 月 13 日 星期五 【颳風】 放肆玩的後果 今日放工後在家中同女友一齊玩... 玩咩...? 玩遊戲機囉...玩WII呀.. 兩個傻既響度狂打網球 差D連電視都打爆埋....(女友先小人後君子..要賠呀..!!!!) 打完網球就打棒球、高爾夫球、打埋保齡添 可知道打空氣係幾咁消耗體力的動作啊 最後都仲未夠喉... 玩埋槍Game打喪屍.....(我地玩得很喪呀....!!!) 而我今日先知女友眼界十分之差...(開十槍先中三槍..!!!) 好在遊戲有無限生命 未致到玩兩Round就Game Over 不知不覺我地玩到半日..(玩到天都黑...) 咁正話就玩完落街食野啦 去左食大家樂... 我們大家都發覺身體開始有點問題... 對手好酸好痛..... 連攞食物個托盤都差D攞唔起....(差D當場出醜..) 回到家.... 按摩膏、震痛貼、安美露、可以令手冇咁痛既藥都出齊...(直頭係Show Hand...我地哂冷...哂咩..?哂藥呀...!!) 你幫我貼同搽.....我又幫你貼又搽...!!(好痛呀..細力D啦....!!!攞命咩..!!!!) 好後悔玩左半日.... 開心完既代價係痛痛痛.... 我明天仲要返工 我點算好...?? 我郁郁手都酸痛呀 可惡既女友話 好彩我過幾日先返工啫.....(我可以響屋企慢慢抖..!!) 聽到佢咁"串" 我就話...我有衝動入廚房搵刀砍妳呀..... 點知..佢話 你有力搵刀砍我的話就來吧...!!!!(十分之囂張呀...!!!) 女友的確講得冇錯... 我連攞筷子都冇力..更何況係攞刀 好好好...... 我認命好了 是我命苦要明天要返工 妳條命好明天放假.....(咁滿意未丫...??!!) 既然我已認命 咁麻煩妳幫我捽多兩下啦...好酸痛呀...!!!!(叫緊救命喇...!!) 講堅啦.... 女友真係唔話得.... 自己都酸痛都幫我捽藥同貼膠布.... 真的很感激感動呀....(看唔看到...我眼泛淚光呀..!!!!) 唉..... 下次都係睇住來玩好了 我們都唔係十八同廿二喇.... 女友都不出聲 大概默認了吧.....(作死呀...話隔離果個老...欠打還是活得不耐煩呀..?) OK...!!!我更正 係我的確老了 骨頭都捱不到很易碎囉..... 我女友...??? 當然很後生啦....(答案滿意嘛...???) ****打呢日既日誌好痛苦...手好痛呀....!!**** >>November 14, 2009 at 2:08:13 PM GMT+8 2009 年 11 月 12 日 星期四 【微冷】 你地好嘈..我受夠喇.. 正話同女友去左百佳超級廣場掃貨 例牌都係買700幾蚊以上1000以下既自家用品..(但有試過有次買左1300幾蚊..!!) 其實得兩個人住買咁多野真係有點痴線 但事關係我係買飲品買左好多好多..(冇水我會死...!!!) 買果時推果架手推車重到個傻瓜都推唔郁... 就連我都要好用力先推得到..(真係好鬼重...!!) 可想而知道係幾咁重呢....!! 呢排天氣開始凍..(但我唔覺得凍....呢d天氣先好) 而家女友日日都凍到震呀 所以我買左好多包暖蛋比佢 唔單止係可以而家用... 而且仲可以等佢返左工冇我響身邊都可以用得著 其實我真係擔心一個人在外邊咁凍又冇人理既感覺 如果比著係我..我都唔知會點算...(得一個人喎..自己要照顧自己) 不覺不覺我都差不多三十歲喇 如果呢個時候先比女友飛左 我真係會咩都冇哂 所以我一定唔以比女友離開我..(我自己都會怕..) 而且我呢個女朋友真係對我好好 我覺得我呢一世都唔會找到個更好的 我承認我都有間中眼望望咁撩下其他女仔..(只係望下望下...) 但我真係從冇諗過要做背叛我女朋友既事..(即使女友不在我身邊) 咁多年中.. 我都冇諗過我會得到一個女朋友 既然而家我得到一個咁好既 我一定會好好對待..一齊走埋下半生 我不會放手 亦都唔容許比其他男人乘虛而入 人地話女人先會有佔有慾 我覺得男既都會有 當男人找到一個真心真係鐘意既都會不惜一切留住佢 朋友問我會唔會怕女友比其他男人搶走..(我好怕...我真係絕對係好怕) 畢竟我都知女友都有追求者...(只係女友打死都唔認係...) 不過我相信我女友所做的 同樣地... 女友都會相信我... 所以我點會令女友失望呢 我即使比自己班男人話我"怕女人.." 我都冇所謂.... 因為我真係鐘意我自己個女朋友 我寧願比人話我怕女友、怕老婆都好 我都唔會走去搵另一個 誰說男人都全部都係不會專一呀 我會.!! 我不會再聽其他其他...不要再同我講...我真係受夠喇 你們就當我"重色輕友"吧..!!
>>November 13, 2009 at 1:46:23 PM GMT+8 2009 年 11 月 11 日 星期三 【雷雨】 覆診 今日放工陪左女友去診所覆診 覆咩..? 咪係我唔小心燙傷佢果件事囉 個傷口雖然好左 但疤痕仲在呀..(很內疚呀...) 醫生話起碼等一年先會淡色 但係已經唔使再覆診... 頭先..我問返我認識既姑娘 問有冇方法可以令疤痕淡色D 姑娘叫我買Cica Care 買左返來先知原來唔係一張細細塊既物體 係要自己裁剪既透明膠布 仲可以洗淨重要添..(夠環保呀...) 希望Cica Care可以幫到佢沖淡疤痕啦 唉..... 點解我會咁唔小心架...(雖然問過自己好多次...) 諗起當日女友叫痛時我真係手足無措....(就算而家我見到佢疤痕我都會覺得痛..) 事後女友雖然冇怪責我 但我又點可以當咩事都冇發生過丫 最槽榚係... 女友過幾天就要去一個飲宴做姊妹
試問天性要靚既女仔點可以比呢D野比人睇呢...? 左諗右諗女友諗住用披肩遮住... 總算解決到問題.... 本來可以唔使左遮右掩...(現在就多得我唔少喇..!!!) 而家為左我一時唔小心而要攪成咁 從此以為我要叫自己留心小心多一點 不會次次都好似今次咁.....咁好彩 如果上次燙到佢塊臉 我都唔知點面對她 她亦都唔知點臉對其他人 我不可以再比呢D事情再發生 一定不可以...
>>November 12, 2009 at 3:26:08 PM GMT+8 2009 年 11 月 10 日 星期二 【晴】 驚嚇的惡作劇 唔知咩人既惡作劇.... 好無聊.... 上傳左一張相上網 張相係電影"驅魔人片中個女孩...." 當然唔係可愛果時個樣啦 係個女孩識360轉呀轉呀個頭時個樣.... 其實我唔覺得核突...(當我睇套戲時覺得...) 只係難接受為什麼好好地一個女孩要佢戲中扮成咁"鬼"樣 其實呢個惡作劇係好多年前我已經見過(我估都有十幾年前...!!我仲讀中學果時...) 佢係會等你開左一個網址後 等待一段短時間 佢就會全螢幕加上尖銳的慘叫聲顯示響你螢光幕前(去嚇鬼死你...) 你會見到個驅魔人片中個女孩既恐怖核突樣(不知佢咩樣自己上網找找吧....) 講真.... 第一次見我都比佢嚇到心離一離... 估不到今日我又會重遇佢 應該唔係... 係比我女友見到 咁點...??? 咪嚇到佢衝出房囉...(仲尖叫到我耳膜都穿...) 當時我在幫女友準備煮飯既材料..(幫手批薯仔、蘿蔔、剁碎D豬肉...) 當我聽到大叫我都唔知發生咩事 我當時仲攞住我刨同薯仔走去睇下...(佢已經衝左出房) 只係見佢眼都紅..手指向房....(當時我諗..唔係又好似馬鞍山新港城咁掉個BB去我地衣架度嘛....??) 女友都係出唔到聲住(臉有難色.....手指呀指咁..) 過左一分鐘左右女友先話我知咩一回事 咁我入電腦睇啦.... 又唔左張圖喎...(欺騙我嘛妳...??我仲有薯仔未刨好呀..!!!) 咁我唯有跟女友指示跟佢上網...等我試下"中招"啦 但又找唔返個網喎.....(一定欺騙我啦...死野..!!!) 正當我地算吧時 突然.... 哇.......................!!!!!!!!!!!!!(我信喇..我信喇...) 佢又彈多次出來(即係個恐怖核突樣...) 我都當堂佢嚇一嚇.... 女友慘D...(嚇左兩次...陰公囉...!!) 但今次可能係兩個一齊啦 今次嚇左果一下係真係大叫既我地兩個都..... 之後我地就互望互相手指指大笑喇...(我笑佢嚇完都驚...佢笑我就你係男仔都叫出聲...) 喂....本能反應呀...!!!!!(妳先冇鬼用呀...!!!) 之後今次張圖好耐都唔彈走(我就同女友講呢個係一套片中的女主角呀..) 叫"驅魔人"呀...!!! 可能今次我地認真一齊睇張圖啦 睇落又唔係好核突...(其實佢係突襲時..果下嚇人啫..) 好了.....始終都要解決呢個突襲問題既 開Software Scan下部機......刪左今日果去過的Cookie....(咁應該唔會再突襲我們喇...) 雖然今次冇嚇破膽..... 但係D人真係幾不負責任 撞正人有心臟病的話真係會嚇死...(我自己都Feel到心跳加速得好快..) 若果真係睇左嚇死人.... 製作者可真害人不淺呢....!! >>November 11, 2009 at 1:24:29 PM GMT+8 2009 年 11 月 9 日 星期一 【炎熱】 我愛流質飲品 小時候... 同阿娘出街好...行街又好... 當我一經過便利店呀、士多呀、辦館呀呢D呢.....(當時我個年代係士多比較多) 我都會扭阿娘買野比我飲....(好得意..我唔會扭買野食喎...) 咁當我開始有記憶果陣啦 我諗應該大概4歲開始 我扭飲野阿娘都會買比我....(真係扭親都會買..) 當時呢...我好鬼鐘意飲維他奶...(唔知係唔係細個都鐿意飲奶呢....?) 一盒250毫升可以由荃灣地鐵巴士總站...(而家仲健在呀...) 坐巴士，當年D巴士係熱狗車...仲好鬼熱仲好慢添 我記得係搭68M線...(亦都係仲健在呀條巴士線..但路線要問問何是喇...!!) 果時仲係冇大欖隧道架.... 得條屯門公路....(仲有條青山舊路......) 車程由荃灣去元朗大概係一個半鐘左右啦..... 所以我果陣搭巴士好似覺得去旅行咁....(因為要坐好耐嘛...) 就係果時.. 我一盒250毫升既紙包飲品 可以由荃灣地鐵站飲到去元朗西巴士總站...(都未飲完...) 你話我當時係幾咁小朋友呢...(口仔細細一定好可愛喇.....!!!【嘔!!】) 你叫我而家飲250毫升.....(500毫升唔夠我飲啦....) 你比30秒我飲都嫌多呀.....(好明顯係完全變態啦呢D..!!!) 不過講返細個時啦..... 咁4、5、6、7歲時 阿娘就真係我要飲咩就會買比我飲既... 但呢種權利呢.. 到左8 - 12 、3 、4 歲時已經冇左 每次扭.....唔係扭呀..(查一查個年紀已經係開始大個喇.....) 唔係扭....係叫 每次係叫阿娘買呢.... 我阿娘都會Say No、唔買、唔好、冇錢、又飲、飲死你、你咳、多痰等等藉口..... 唔買比我.... 我都唔知點解..... 攪到我次次都用死慳兩個半去買野比自己飲...(仲要唔比得阿媽知喎....) 唉...我都唔知點解唔比得阿娘知.... 好似一比佢知就係死刑咁..... 我亦唔知點解我咁鐘意飲有味道既野... 呀...!!! 我有印象阿娘講我細個仲係BB仔果時 阿娘話我係痴線..(咁話自己個仔喎..所以而家咪真係有D.....!!!) 通常BB都會有病見醫生醫生都會開藥水比我地飲 咁呢...藥水喎.... 唔知點解連BB都覺得難飲.... 一飲就喊....全身扭曲.... 而我呢.... 就一D都唔怕....唔喊.... 仲要嗒下嗒下咁飲....(呢D係阿娘講架) 好鬼Enjoy...好滋味....飲得 咁阿娘見我咁樣佢就索性張幾支藥水混合來一齊沖入奶樽比我飲 我仍然飲都好Enjoy...好滋味.....(我而家諗起都覺得苦呀..!!!) 聽阿娘講... 當我阿娘一抽起我啜緊果支混合藥水奶樽呢..... 我就會喊..... 要塞返入口先唔會喊.....(真係我都覺得好神奇..) 可能細細個我已經對"流質"特別有好感吧..... 所以而家我大個左 我一經過便利店 如果當時我唔係好飽.... 我都會入去買野飲....(係要有D水放入口先至安樂..) 所以..我覺得我成長左最大既好處就係.... 我唔使又叫又扭都可以憑自己去買自己鐘意既野飲 呢件趣事我都有曾經同女友講過 她問我會唔會第時都會咁對自己D仔女 我諗我都會好似我娘咁掛.... 畢竟成日飲真係唔係幾健康 某程度上可以叫做浪費金錢呢..... 所以.. 我覺得當年阿娘咁對我都係好既....... >>November 10, 2009 at 1:12:41 PM GMT+8 2009 年 11 月 8 日 星期日 【晴】 生存....
昨晚我搭船時見到沿岸萬家燈火(閃下閃下咁...好靚) 我突然覺得能夠出生於香港呢片地方真係好幸運 我諗緊咁多外國人都咁遠坐飛機來香港旅遊 都係為左睇香港呢片夜景 而自己生於香港 只係搭車就可以隨時欣賞到(搭車點都平過搭飛機掛...) 試諗下如果自己係出身響落後地區 又會如何 我成日都話自己好倒楣(好鬼死黑仔....!!!) 咩事都衝住自己來咁 什麼不如意不幸運 種種不如意事..好似失敗、失戀、失去某某....(讀書時代還要憂心成績添..) 自己就好似以為自己去到絕路....非死不可咁 其實自己能生於香港已經係一個好大既幸運同幸福 起碼我有自由(唔係犯法想點都得....) 我想去邊就去邊(原來自由係幾咁寶貴...) 簡單至..我打開水龍頭就會有水(有D國家落後地區....水源都唔係你想有就有...) 你都可以響香港垂手可得 比起其他地方 我望到呢片香港地方 有得還說不幸福嗎... 得閒..我可以隨時都可以欣賞到香港咁靚既景色 我亦都隨時可以走去山頂望下夜景 有時我搭機埸巴士 好難免會碰到遊客 我曾遇過在晚上..同遊客一齊坐同一架機場巴士 當一經過青馬大橋時並遠望到汀九橋時... 佢地會發出讚嘆既聲音...(嘩嘩聲......!!) 其實我都經常經過呢兩條橋(遲點仲有座好似叫昂船洲大橋添....比青馬仲要高....) 每一次我都會望橋外風景(真係百看不厭...) 無論日與夜...都各有特色 而當我夜晚每次坐船經過中環(好似昨晚咁...!!) 我一樣都係會比夜景吸引 總會從袋中取出手機或相機影三四張相(對準個夜景...係咁影入記憶咭中...) 即使每一次都係同一個位置角度影(可能天生冇咩藝術細胞啦...) 都要影一影先會安樂 而我近呢一年仲會留意埋一下夜晚既天空... 留意天空既交通 從前聽到空中傳來噴射引擎既聲音只會望一望(咦.....好似有飛機經過喎....) 但而家會留意埋佢飛既航道 就昨天晚上... 在長洲上空已經見到好多飛機響同一方向同航道刷過 而搭船回中環途中(船程行左一半左右啦...) 我眼見天空好多野閃下閃下(紅綠色既閃燈...) 我細數過..... 在呢個漆黑天空中 共有六架機在不同高度、位置、速度...航行中 想像緊如果自己搭既飛機內見到外邊遠處有另一架機...會如何感覺.. 女友話唔會..我肉眼見其實佢地仲差好遠距離同高度(我點知咁多喎...我真係見到好似好近嘛...) 原來人地話航空交通都會繁忙就係咁解 就係咁 昨晚我在船上同一時間可以見到以上咁多野 我就覺得自己能生於這個地方已經係好幸福 什麼窮呀、失戀呀、工作不如意呀、你都會突然覺得不值一題 其實我諗...點解我會可以一出生既響香港呢...?(如果我一出生在中國某一個窮困地區又會點...?) 是我幸運識得投胎.. 是我前世做了什麼好事嗎... 如果我一出生係響落後地區 落後地區的我會點睇住響香港的我自己呢 我都有遇到好多唔開心既心 要去死呢個Idea....想過好多次添 而家回想....點解我會有呢D咁白痴既諗法呢.... 為了小事去死去傷害自己.. 是不是好傻瓜呢.. 我覺得如果我再發生咩唔開心事 我能夠咁樣諗一諗 我諗我心情開心開懷好多好多 再諗埋我有個家，身邊還有個好既女朋友.. 做人也不能太貪婪吧.. 對嗎.. >>November 9, 2009 at 2:26:21 PM GMT+8 2009 年 11 月 7 日 星期六 【炎熱】 180度的轉變 ***以下"Grandma"係解我既(女麻)(女麻)***因為出唔到香港常用字
今日女友真係唔嫌攰肯起身喎...(查真一點係我唔想起身多一點) 起身她整左個早餐一齊食...(食火腿通粉...轉頭己經煮好..好快手..!!) 女友執下個妝...我好快亦執好個Bag就鬆人..(出發..!!!) 去長洲行(順便探下我Grandma..) 如常一樣我地去到姑媽家中 咁啱姑媽兩老去左旅行 得大表姐在家 其實去得長洲..我都會探望我阿Grandma 大多人都知新年女友在長洲發生什麼事...(我女友很不受大伯歡迎...!!!) 就係大伯帶頭攪到我女友好尷尬....(始作俑者係佢....正衰人...!!) 什麼水性揚花....(極為可惡....的說話) 但今日唔係新年 所以大伯冇去到(我亦唔想見到佢...) 得我Grandma、表姐響度..(我指長洲裡面我識既...) 我Grandma住在長洲的安老院 女友今次都膽戰心驚咁去買點生果比我Grandma..當做禮物... 去到安老院後... 女友跟著我後面.....良久才敢探頭見我Grandma... 但今次Grandma竟然冇唔鐘意.... 仲叫佢"坐啦.." 雖然不知發生什麼事 但係見到Grandma接受她 她都親手扶起我Grandma行 或者老人家喜歡有人會肯親近吧 Grandma好開心...(我都好開心..) 女友由安老院一直扶到去我姑媽家中 扶我Grandma沿途我Grandma仲同女友傾計 女友亦都好肯親近我Grandma.... 我真係覺得太好喇....(但諗緊...點解突然會咁呀....!!) 難道呢D叫"迴光返照"?? 雖然到最終都不知原因 但係只要肯接受她我已經好滿足(我相信女友都會咁諗...) 去到姑媽家中.... 我Grandma係咁同我女友講我以前細個既事..... 仲叫女友要好好看守著我...(怕我跌出街嗎...??) Grandma竟然話我好"大意"呀做事....(但都不忘咁推銷我出來..我係點點點..!!) 而表姐都好鐘意同女友傾計...(大家都女人吧我估..!!) 很開心...我同女友仲同表姐個女玩添.... 好快就到食晚飯時間 我地同表姐、表姐個女去食泰國野 點知去到又遇到新年其中一班親朋戚友....(我都唔知有咩親...??!!) 我連佢係邊個打邊個我都唔係分得好清楚... Ok.....呢班人都係響我女友比大伯語言攻擊時都冇幫手拆局既人...(簡單D講..即係唔出聲果隻....) 一入到間餐廳我見到佢我立即又有好多假設...(係咁諗如果佢地又講佢咩咩咩..我點拆好呢...?) 點不之.....咩事都冇 仲有講有笑.... 對方個女人仲好有興趣知我女友更多事.... 咁即點呀....?(你地之前好怕我大伯咩...咩都跟佢鼻子走?) 不過既然對方都肯主動同我地傾計 我地又唔可以咁無禮貌唔理人既 所以大家都好似唔記得新年果時發生咩事....!! 講真...我真係唔知發生咩事 但係食飯時我Grandma竟然會夾餸比我女友食...(咁她當然立即都夾另一件餸比我Grandma啦..) 今餐大家都食得好開心... 可能冇大伯篤口篤臉.... 我好記得當日佢點話我冇用...佢D仔最好最叻.....讀大學好Q巴閉呀..?!!(我一定記住....我對佢特別記仇...) 係你呢個大伯攪到我女友回家大喊一場... 我下年..新年我發毒誓唔會再比你咁對我地講野(夠膽試下再欺負我女友丫....) 我一定會反枱.....(我呢一世都唔會認你係我大伯....!!) (冷靜點先...!!!!) 明年事明天先算啦....(可能明年佢會祝福我地呢...世事又話唔埋..!!) 而家只係講今日先啦..... 今日真係值得開心... 因為估唔到今次個個都接受她.....(雖然唔知點解突然會咁...) 而最最最...緊要係我姑媽搭20:30分既船....21:30到碼頭 我地搭22:00果一班船...... 在碼頭碰到我姑媽兩老 我姑媽上次都對我女友都有微言既.... 今日碰見..姑媽會同我女友講 下次再來坐下喇.....探下婆婆都好嘛...(佢係女..所以佢地慣左叫婆婆...其實婆婆都係Grandma) 仲從袋中攞出佢地旅行既手信"一大包厚厚既豬肉乾比我地...(九成係過大海啦咁...) 最後仲用佢地張月票等我地兩個可以唔使錢搭船走....(用左姑媽、姑丈張月票) 上到船....我地兩個已經唔覺唔覺咁食左大半包豬肉乾....(船上有食肉怪獸呀.....!!!) 到中環Ifc.....搭東涌線去南昌再轉西鐵去屯門....... 一個鐘都唔使.....!!(無錯..時間就係金錢...!!!) 雖然我唔鐘意搭鐵路....(喂....據聞你自己都係...咩喎..!!!竟然話唔鐘意..?!) 但不得不承認佢真係"話咁快就到" 今日 雖然我唔知咩事驅使佢地對我女友咁好 同上次真係判若兩個人 我不知真心還是假意....(但至少我仲未肚痾丫..食左成包豬肉乾都...) 其實點樣點唔喜歡都好啦... 都唔好兜口兜臉咁多人前唱一個同你無仇無怨既女子丫(人地都係女仔黎架....!!) 你都有個三個女...(反轉比著你係我又會如何...??) 將心比己點白痴都識點解啦...!!! 都咁大個人又係長輩... 我只會覺得你係小家同女人腔...(週街唱..成個八婆咁...) 你如果尊重我地 我更唔鐘意你都比面尊重你囉... 原本今日唔係想講呢D...... 我係想講今日我見到一D野令我覺得生存係幾好一回事..... 因為我突然覺得我們可以生存呢度係幾咁美好... 下次啦..... >>November 8, 2009 at 8:12:13 PM GMT+8 2009 年 11 月 6 日 星期五 【炎熱】 接放工... 今日返晨咁早... 要凌晨四點四十五分去到簽到...(嘩.....攞我命呀...!!) 三點半就起身....(未瞓醒呀..!!) 都唔緊要.... 如果我係一向都係返開早 日日凌晨開工都冇所謂 但係我D爛更兩日早...一日收夜....又返多兩日晏咁(簡直係折磨呀..!!) 唔好話蛇呀...人都死啦 不過做打工仔有邊個唔會為份工忍氣吞聲丫 唯有較多三四個鬧鐘囉(呢個響完到呢個..果個響完又到呢個...週而復始...) 我總會知醒既... 如果女友響度..我就唔驚(人肉鬧鐘嘛...仲要係超高聲頻率) 佢一定會拍醒我叫得醒我...(我要老實承認..起身靠她...!) 我真係越來越倚賴她喇....(簡直係阿媽湊仔咁...!!) 不過呢幾日女友唔響度嘛.... 只好靠自己啦(唔係可以點喎..!!) Anyway.... 終於都捱到收工喇(真難捱..) 返到屋企執一執屋、沖左個涼、瞓左一陣 起身就出去喇 今日她會返來...要去等佢放工(唔可以再放飛機架嗱...再放就死梗...!!) 好喇.....我等左今日...等左我四日喇(好似好很難委我哩....) 都唔知話係佢慘好丫..定我慘好 我等做四日....慘 佢做足四日....慘(邊個慘D呀咁....?) 咁慘定唔慘都要見到佢問過佢先知既 今日好好呀 係我預定好的時間出來(仲要早左少少添..!!) 幫佢拉個行李(一共三件唔計個"方方"手挽袋) 真係好鬼死重....(妳藏屍嗎...??) 唔怪得之妳搵行李車推出來啦!!(十足十人地去完旅行一袋二袋咁....) 原來係D食物同罐裝飲品(連肥貓咪都有手信...太可惡喇...!!) 加加埋埋所以先咁重.... 出到去巴士站等巴士 人龍鬼打咁長...(今日唔使錢搭車咩..?咁多人..!!) 雖然車係有座位剩低 但最終都冇上到... 因為架巴士行李架上第一二層已經比人塞滿左行李(我唔想又托多一次呀...前幾天先
卒之等左下一班車....(寫明2009既新車添呀...架車好光猛，行李架仲長D添..) 都唔係等好耐添乍....5分鐘已經有車上(呢D咪叫效率囉...呢D司機有前途呀...!!) 巴士都係滿客咁走... 在車上同女友傾計.... 她帶著嘆息語氣話.....(唉...!!!!) 本來前三日都幾好架...客又唔滿又冇咩燈Call..D客又唔麻煩，同事又爽手勤力唔走精面 而且三日都有"香港菇"一齊同行，同聲又同氣... 本來真係好開心架.... 點知...呢返來呢一程遇著個死人新老總(聽女友講係剛剛升上去...) 男人黎架....好似比公司洗左腦咁..(即係咩都跟足指引做...!!) 當女她踏入房去開會時已經知道佢係麻煩人..(女友話我要認命喎...!) 無時無刻都審核住個妝要好D、唇膏唔夠色要再搽紅一D、妳笑得唔夠,要笑返多D、派餐時又親自Check下個餐熱唔熱.....(麻鬼煩..!!) 攪到佢要全程袋定支唇膏響外褸口袋裡面..一得閒就係咁搽係咁搽...搽到支唇膏都冇左半支咁滯...(咪又藉口買支新囉....) 呢一程厭煩到連個Crew meal都冇心情食.....(我未食過呀...應該攞比我試下嘛....!!!) 當然啦...我聽到她講就覺得好好笑好有趣啦(我心諗世上真係會有D咁煩既人架....??) 但當我見到佢一口激氣係咁講講講咁... 我就覺得佢內心真係好激氣.....(唔講得笑..好勞氣...好激心..!!) 我話...咁做野係咁架啦...忍下啦忍下啦....出糧時咪開心囉!!!(冇聽過咩...公司比妳份糧一半係比
點知...女友好激動咁講(捉實我手臂咁講...!!喂...痛呀..痛..痛....放....放手先...!!!!) 唔係呀..我好似有做到佢令到佢唔滿意呀...!!!(總係覺得佢針對我咁呀...!!!) 死喇......今次佢一定剔好底分比我喇....!!!(唔怕啦..妳D同事段估唔會比低分妳掛..咁拉上補下..!!) 哈哈......算啦算啦(唔好再諗再激氣啦..都放左工..呢一次旅程已經劃左句號架喇..!!) 都過去左...我估妳都唔會咁好彩再碰中佢架喇....(我安慰佢咁話啦.....) 雖說...女友真好激動講得 但係都敵唔過身心疲憊(梗係啦....四日裡面都瞓都唔好...又要勞動...點會唔攰丫) 巴士未駛到東薈城她已經恰著左.....(望落去好似好好瞓咁...!) 攪到我全程我都唔敢點郁...(因為怕一郁會整醒佢嘛..!!) 而呢架巴士開得都算快 響屯門公路做左車手..... 每見到有巴士在我地前佢都會過對方巴士頭....(可能係其他巴士慢啦..!) 到左屯門市中心落車(拍醒佢喇...) 同女友去食左D野.... 同時...女友都攞出今次買既戰利品出來 一看之下...!!! 原來大部分都係食食食....飲飲飲.....(我見到D脂肪同熱量..我覺得女友買得好有誠意..!!) 不過我好多都未見過(我指D食物同飲品..) 使到我都好想可以立即拆開逐一咁試下(新屎坑...咩都想試下...!!!) 食完飯回到家.... 她衫都唔換就立即抱起貓咪玩....(嗱...我有準時比佢食野架...!!!) 我諗肥貓咪都好掛住媽咪既......(而家肥貓眼中係冇我存在...只得媽咪存在...!!哼...你話養貓丫...我養到咁鬼樣!!) 同時間我都入房攞左前日買既耳環同相架比女友睇 雖然都預知道她見到會有咩反應(嘩...好靚噢..!!!)<----《很行的對白色!!!》 但見佢有咁既反應我都會覺得開心既 今次我第一次幫佢拆同帶耳環...(手好震....好似永遠都對唔準拮咁...) 感覺好恐怖...(拮入去喎...哎呀.....好似好痛
我係咁問痛唔痛....(我見到好痛...!!!) 佢係咁叫篤入去啦..唔痛架....(係真唔係呀...篤入去都唔痛..??) 幾"驚"辛苦先幫佢帶到上耳
好喇好喇 家中終於有返D生氣喇...(唔再靜英英咁...) 來緊日子她又會放幾日假...(真係開心死....恨死我喇!!) 不過明天我都係放假.... 或許明天會一齊出去長洲行下(去沙灘行下玩下..去街邊食下咁...) 當然啦..... 要睇下今次大小姐會唔會好似上次咁 三點不露....(下午三點都唔起身仲訓
如果唔係就真係咩地方都唔使去喇 索性一齊瞓飽去吧...!! >>November 7, 2009 at 3:00:10 PM GMT+8 2009 年 11 月 5 日 星期四 【炎熱】 搵笨 今日放工去左元朗千色同同事行街 又去下打機 好似好耐冇去過機舖咁(邊度係...上個幾個月先去過) 諗住玩下賽車Game啦(我只係識玩三種Game..一係賽車..二係槍Game...三係格鬥) 打開銀包攞張咭出來玩 點知!!!!! 架機話我張咭係舊咭係舊Version用(我頂丫..) 要我Update張咭 要我比12蚊Update(打劫咩....?!!!) 我心諗我攞20蚊玩..Update用我12蚊 玩野定搶錢呀? 但都算啦....!!! 點知Update玩先知我張咭D資料係重新Set過(你地冇講我知喎事先...!) 當時我部車玩到810匹馬力.. 而家咁Up一Update我得返600匹馬力(咁算點呀...?) 咁........ 咁我........比錢...Update仲咩? 而家係我比錢你Downgrade我部車(咁即係當我傻架啦...) 而家擺明同我過唔去啫咁.... 呢一躺玩得我好不爽..... 唉.....我都唔知我去機舖玩定係機舖玩我喇 去完之後一齊去左許留山食甜品 呢樣叫下果樣叫下(發左達咁....成枱都係食物...) 賣單成120幾蚊.....(好想借尿遁...) 最後AAA制..(一個A一個人...三人夾錢所以三個A...) 食得好滿足咁就返屋企喇 嗯..... 明天這個時間我應該接完她放工回到家喇.....(期待期待中....) 等多一天乍...(行快D啦個鐘..快D!!快D!!!) 我要耐心等埋餘下果十零個鐘呀.....
>>November 6, 2009 at 3:25:32 PM GMT+8
|
|
無事嗎?irene佢而家情況如何