2009 年 10 月 29 日 星期四 【晴】

玩上癮的Online Game

以前經常講人比錢玩Online Game係好傻既事

因為始終都係虛擬世界

任你遊戲中更勁更勁都係虛擬世界內的事

關掉電腦...你就變會打回原形

從前我都唔知為什麼D人可以為升Level而費寑忘餐

今天我可能領會當中"上癮"之處

呢幾天我同女友都在玩模擬Cafe..模擬開舖做生意

而當每升一個Level才會有更好的餐牌出現

我們一個用Notebook一個用Desktop玩....

發覺原來買點數咭玩才會更爽更過癮

終於我們兩個人都忍不住去左便利店每人買左一張120蚊既點數咭

回家像小朋友一樣立即開電腦入點數繼續玩

大家都買到更多的道具去裝潢自己間Cafe

又整落地玻璃窗、玻璃門、獨特既桌和椅等等

不消一會已經把剛買來的點數用左一大半

唉........

其實為左什麼呢.....??

240蚊其實都可以令兩個人好好的吃一頓

現在就奉獻比遊戲裡面

不過.......

能夠見到自己間Cafe整到可以靚過其他人

心裡的確係有種"贏你九條街"的感覺

之前明明人地Level仲高你一截

而家因為你比錢而可以贏到其他人Level可以遠拋其他玩家

女友仲玩到係咁笑笑笑...玩到連個妝都唔落住..衫又唔換...咩都放埋一邊......玩遊戲要緊啊..!!!

一直玩到而家成四點幾先肯收手

仲要較定鬧鐘明天要收煮好的食物

睇來.....120蚊不能滿足她

一個人玩女友話無樂趣..還要叫我陪佢一齊開Cafe玩(還要我Level不能超越她喎..!!)

我見女友整得間Cafe咁靚我又唔想整得差過佢

咁即係我都要比錢玩

哈哈........我們似乎中左Online Game毒

或者我今天都明白點解之前有D少年人因為唔見左或者比人偷左Online Game道具而

"呯"....一聲跳落樓

原來道具真係得來不易

我正話問女友如果真係比人偷左Online Game道具..妳會點

女友答....

我會喊囉....!!!

不過家中保安軟件應該做得好好.......冇咁易比人入侵到偷野吧

雖然話Online Game係浪費時間同金錢

但如何可以令她冇咁悶

一個身處在外.....只要上到網就可以玩

咁比錢玩我都覺得值得既

其實呢個Online Game介面都幾和諧同得意丫

又唔係打打殺殺既遊戲

眼見Cafe內的人仔來來往往、煮餸動作又趣緻、聲音又得意

比錢又何妨呢....

不過呢......今天呀..!!!!

有點過份呀

雖然唔使返工啫

都唔使玩到而家成凌晨4:30先收機架....!!!

妳唔乖呀..!!

2009 年 10 月 28 日 星期三 【晴】

我的態度....

我為人不算直接，但唔會虛偽到要單單打打，

有咩事唔鐘意可以講清楚囉，我又唔會打人

更加唔會咬人，從小我已經知道為人處事的

技巧，當然我都撞過版，記得第一次出來做

兼職，當時我一直都係返中更，後來老板轉

我返早更，而早更全部都係阿姐級人馬，當

時我新仔丫，就係向佢地講左一句，"中更得

閒過早更好多"，嘩.........當我再返中更時好似

遭天繾咁呀，個個都唔理我都唔知發生咩事，

最慘就係唔知發生咩事，我問佢...問一句鐘意

答一句，有一次我更表要調時間，阿姐問中更

同事果日得唔得閒，果位同事話得....!!!但一聽到

係幫我調就改口，咁呀...咁就唔得閒喇...!!!!的確

要從工作上取返好自己個聲譽係一件好難既事，

雖然難..但經過今次我好明白什麼叫辦公室政治，

要在一間咁多職員既公司生存，有時欠點技巧都

會出事，工作到現在我都係響辦公室政治下生存

，我做左咁多年，基本上我已經知道生存係靠咩，

要生存就唔可以講野咁直接同時，又唔好要人估估

下，當人地對號又座，入啱當然冇所謂啦，但入錯

呢個誤會會繼續下去，現在的我鐘意帶點技巧同當

事人講清楚，(喂...好似你呢度有D問題喎)，有時如果

事情唔係太緊要咪算數囉，多一事不如少一事，在

辦公室大忌係講人是非，但聽人講是非就冇問題，

咁當然聽完就算啦，禮多人不怪..!!老一輩的人鐘意

後輩稱呼下佢，咁呢D多叫無坊丫，好得意喎，當人

地見到你直行直過就會覺得你冇禮貌喇喎，但呢D係

你不知不覺就會中招，個人串唔串就係咁比人講返來，

見到後輩更加唔可以擺款啦，因為好多時求人你都係

求後輩，因為前一輩既人..你係唔敢問佢，想問佢地調

假呀..?後輩係唯一選擇....!!!其實仲有好多好多技巧，

講到我最憎係，你向別人唱我!!!而家科技先進，網誌係

 一種人同人溝通既平台，有時D人唔敢講就係網誌用ABC

先生出來，用呼之欲出既文字講我唱我講我單打我，呢個

技巧高超在唔點人名出來，我最憎就係呢D，仲要唔係一次

，係多次都係咁，但當返到公司佢又會當無野同你傾計，

仲會扮到好Friend咁，呢D咁既人我最憎，我覺得你唔鐘意

咪出聲囉，咁做你唔覺得自己好小家咩..??可能呢D人會覺得

自己好醒，我唔點名講你唱喎，當你覺得係唱自己就即係承認

啦，嘩....真係以為自己好智慧咁，我覺得有咩唔鐘意同不滿

直接同佢講，總好過要人估估下對號又座，即係要人估下係

唔係響度講緊自己，算係咩意思呢..?

在辦公室生存我已經有自己一套，我曾經響三間不同既辦公室度

做野，三間公司我都可響佢地不同黨派中穿梭，個個都可以傾到

計，或者我很細個已經出來做兼職，體驗到好多不同事情，亦都見

過什麼叫"眾叛親離"、見識過什麼是辦公室中的"過街老鼠"......，

我覺得做朋友都係一樣，你唔係好妥佢，你咪向佢出聲囉，單單

打打呀、在網誌中暗示呀呢D手法，真係會令人討厭，起碼我討厭

先，啱傾咪講多兩句，唔啱傾咪大家點個頭敷衍下就走囉，攪咁

多野托咩，呢D人都係多餘.....!!!

2009 年 10 月 28 日 星期三 【晴】

旅行後遺症

自從今年四月去完台北旅行返來，唔係係自從我小學五年級開始，

我已經開始肥胖，開頭都不相信，係打死都唔信，

我點叫肥呀??(那時坐我旁邊果個同學仔就真係肥喇!!)

當時小息果陣，肥仔同學仲拉我去佢媽咪度，介紹我食D自製小食..(嘩...很特色果時覺得)

登...登....登...登....

就係芝士一粒、梳打餅一塊、紫菜一片、豬肉鬆少許(其實係口可擺到幾多就放幾多入口)

食前準備...(亦係有次序架)

將一塊太平梳打餅拿出來備用、紫菜一塊又係備用......好喇.!!!

食法.....

首先....將粒芝士放入口(勁咬咬咬)...之後...將塊紫菜包住太平餅放入口(勁咬咬咬)...最後口腔混雜一屯(芝士、紫菜、餅干)既物質後，同時放入一口豬肉鬆(口放到幾多放幾多)

整個過程由製作至落肚大概係咁，夠唔夠特色呢..??(我承認係好怪味才對)

不過怎說..我都係咁食過一排，因為我小息獲獲都係黐餐(從小已經這樣無賴)

大概肥都係因佢而起...呢D有如豬油拌飯的毒藥小吃，差點害到我冇人要呀!!(喂..冇人叫你食喎..係你黐餐乍噃!!)

好在仲未衰到貼地，而家都叫有人肯要...哈哈 (太有恃無恐喇) 
嘿嘿嘿...

不知道而家佢仲係唔係肥仔呢...??會不會想瘦身男女劉華後尾果個結局...

可能而家人地已經有吳彥祖的樣貌、身材、高度吧....!!!(太可惡喇..冇可能既，邊會有咁易變身丫!!)

但咁又點丫，明明早一輪已經有人話我瘦左....(早一輪即係今年年頭呀)

就係去一去台北，我每日一杯珍珠奶菜、大大件雞、大大支雪糕......(太多太多食物不能盡錄)

食足四日，一早起身食食食，去到景點食食食、夜晚宵夜食食食......(日又食夜又食.....搏命去食食食....)

一回到香港已經發覺肥左個碼咁，都唔知係唔係我太重關係，

回程時架飛機係咁震呀震，好似要跌要墜咁..(女友當時好平靜，只係氣流吧，仲叫我坐定定啦)

我果刻就諗，你地當架機就黎跌都叫人冷靜...話冇事架啦...!!不過....其實我都知係氣流

，只係有少部份人當時係咁叫係咁叫，好似真係有事咁..(我都係跟個氣氛係咁以叫下啫!!!)

其實我都不知幾攰，果時我鯨吞完個飛機餐後我都訓左陣，最主要係服務我地果行位係空少..唔係空姐，冇視覺響受咪唯有瞓囉(當身邊個女友死既...!!!!活得不耐煩麼??)

一開眼已經見到香港個地形喇...(從高處俯瞰下來真係別有一番風味呀)

唉......到左香港.....

個個除左攞手信之外，第二句好唔好玩呀，第三句..."嘩你肥左呀"(我頂你個肺，往日同你冇仇..今日與你冇怨....使唔使咁直接呀..??)

正所以增肥容易減肥難....如果用錢係咁就好喇....(搵錢容易洗錢難)

奉勸各位將會去台北之人，去到台北，其實消費品同香港差不多價錢，

唯獨係食既係最平最抵，除左台北麥當勞，我比佢騙左75蚊新台幣，

一個魚柳飽...佢地唔係叫魚柳飽，唔記得叫咩飽，總之都係魚柳飽，

一個魚柳飽要75蚊新台幣!!!!!(台北麥當勞=黑店)咪去..!!!

但的確去到最大歡樂都係食，但食係要代價，如果自問冇果種"點都食唔肥"既天賦的話

去到都係睇住黎食，如果唔係好似我咁中招，一陣去要返來要置過D衫就無謂啦..!!!

但我諗呢個時候女人一定話仲好，我有借口換過哂D衫(嘿潶........阿邊個....妳唔好話冇咁諗過呀..!!)

Anyway........有機會碰到大家都假期，我都會去多次台北，上次太多地方冇去到，

好飲恨呀...!!!!!

　

>>October 28, 2009 at 11:16:33 PM GMT+8

2009 年 10 月 26 日 星期一 【晴】

當麻煩人遇上麻煩人



有時D人都唔知話佢正義感好丫定係多乜餘好
，少少野都要攪到大大獲先肯罷手，為左一督
痰都要攪一餐，事原響車上有個女人企左響阿
伯附近，誰不知阿伯痰上頸放箭落地，女人又
睇唔過眼話佢污槽，就係咁嘈嘈嘈，好吧好吧
....出來睇下咩事啦，的確係有督痰響地，我問
道係唔係你吐呀阿伯..??阿伯用瞬雷不及掩耳既
腳法，再加上佢黃金左腳用力一踩一卒，卒散
左督痰毀滅証據，唉....算吧啦，都冇左囉，心
諗散場啦好嘛，女人又不甘示弱講而家咁多咩
菌咩病就係呢D人攪出來喇...!!!嘈到頭都暈，好
煩，我心諗點解仲未有人來架...???我已經阻左
後面，我又唔可以打開門比任何人走，又有人
爆粗媽我....開門比佢地走，幹咩連我都鬧，很
無辜呀，我點解釋都冇用，算...你要媽要閙隨便
啦，借聾耳陳對耳，咩都當聽唔到，好了好了
，終於有人來，好野....的佢地兩個人落車，職員
問係唔係你吐，支吾以對，最終認左....，之後
事情變成點，唔知道，因為我已經連人帶車走頭
，為左一督痰攪到咁多事，阿伯又乞人憎女人又
麻鬼煩，比著係我，我只會離開個阿伯，最多等
下一班，好彩唔係多人時間，如果唔係就煩上煩
，我今次好留意有冇人拍片，好驚好驚，我唔想
上Youtube，好彩車上多數都係老人同婦孺，如果
有後生仔仲唔用手機影全程，回家我都仲買個保
險，不停上網搜尋有冇今日既事同片，所有有關
字眼都搜尋過，慶幸暫時都冇發現，要保持下去
呀...!!!!我唔要"發揚光大"呀!!唉...呢D人真係好鬼死
煩，我真係唔明有冇咁好嘈，頂佢地唔順呀!!!

>>October 27, 2009 at 1:10:09 PM GMT+8

2009 年 10 月 25 日 星期日 【晴】

環保??!!



今日收到張電費單，要交成八百幾差不多九百蚊，
上網費又成三百蚊、煤氣費又係四百幾、水費睇
下打簿又幾百蚊、仲有層樓又要四千幾蚊、加埋
衣、食、其他....!!嘩...原來真係唔少錢，我們兩個
人搵到加埋都只係叫夠用，而我唯一好處係搭車
可以慳返一點，但有時我貪舒服我又會比錢搭其
他，仲有找咭數，咭數都佔開支一部分，如果果
個月隻貓仲要病要睇醫生，呢D額外既開資真係好
溶，錢好多時都唔知用左去邊，明明出糧個戶口今
星期一仲有成五位數字，轉頭到星期五已經得返四
位，錢用左去邊??唔知道，或者錢有腳會走吧....!!

正話睇電視講有關慳電方法，佢講得出浪費電力既
行為我全部做足，電腦長開，為左令電腦長開而同
時令佢唔會熱得滯，我同一時候會開風扇次定部電
腦，我所有電器都係備用狀態，冷氣我仲係開足十
幾個鐘，總之家中有人，冷氣都會開著，我諗我大
概係環保份子既公敵，因為我永遠同意佢講話，唔
環保地政會死，人都會死，我心諗..夏天三十幾度都
話唔好開咁大冷氣，開二十五點五度...??你才是想死
吧...!唉...我諗我都冇冷氣會死果D人，要我環保..??真
係好難做到呀，我唯一可以做係垃圾分類，呢樣我真
係有做，垃圾真係會分開掉，不過講到底，我都係一
個絕對不環保的人....，因為若真係要我唔開大冷氣，
我會發癲囉....!!!

好了........過埋今晚...生日又完喇，又要等下年，今年都
開心過得，希望下年..再下下年...再下下下年.........都會
開開心心啦，再一次Happy Birthday To Me先......!!

>>October 26, 2009 at 12:32:05 PM GMT+8

2009 年 10 月 24 日 星期六 【微冷】

生日快樂....


今日係我既生日呀...嘿嘿嘿!!唉..又大多一歲老左一年，
呢廿幾個年頭得失各半啦，如果你問我人生覺得點..??
我滿足架喇!!試諗下...我地生出來咩都冇就走進呢個世
界，而家我得朋友、親情、愛情等等，賺番啦!!我還可
以求什麼呢..??生日願望呢係......唔講得啦，傳說講左會
唔靈嘛...!今年生日女友送左個蛋糕比我，是親手做比我
的禮物，已經好開心喇，仲有....請我去食自助餐...哈哈!!
食到好飽，但食飽又點丫，咪又轉頭食個糖水，今次真
係唔得喇，好飽好飽....!!今年生日有點特別，今日係新曆
生日，而明天係舊曆生日，爽死喇，哈哈，我去到邊想食
咩都指指就得，女友比錢找數..哈哈哈...!!生日大哂呀.......!!
我都覺得玩得過份左..hee....!!但同女友去旺角食食食買買買
玩玩玩，真係好開心。回想下今年係第二年女友陪我過生
日，希望每年生日女友都可以陪我渡過，咁就係最好喇....!
今日我做左好多白痴野，同女友一齊夾糖、去左冒險樂園
玩、又去掃街邊小食、又去食雪榚....。總之....今日真係同
女友過得好開心，在此要多謝朋友們的祝福呀....Thank you!
拉天窗會通知你們喇，唔使個個都來問我幾時喇......。

好喇.......快要踏入我舊曆生日喇......happy birthday to me!!!

>>October 25, 2009 at 3:49:38 PM GMT+8

2009 年 10 月 23 日 星期五 【微冷】

那刻心慌我..那刻驚慌的妳



今日我返晏擺低左女友響屋企，女友話夾定時間
Join埋一齊，趁我食飯時間大家食晚飯，不過今次
我話唔好喇，我著她叫佢約下自己朋友啦，妳都
有妳自己既朋友嘛，誰知妳一句答我.."你係唔係已
經開始嫌我煩喇??"我當然唔係嫌妳什麼啦，只係想
妳都可以約下自己既朋友，擁有妳自己既時間，我
覺得愛情同友情樣都重要，有陣時朋友約妳咁多次
妳都唔應約推左佢，攪攪下朋友就會疏遠妳，我可
不想自己女友為左男友攪到連朋友都疏遠。我覺得
要自己另一半只係陪自己係一件好霸道既事!!

知不知當妳係咁打電話比我時，電話震動著我，震
動左好長時間，一兩個電話我知妳只想大家趁少少
時間聽下大家把聲，但當電話震得第四五六七轉時
，咁即係代表妳一定有事要找我，如果我返工工作
期間個電話係咁既話，我會好在意究竟有什麼緊要
事，真係仲會有衝動想一邊開車一邊問咩事??咁我
當場冇咁做啦，搏炒咩??但我會明顯地開快一點，關
門關得快一點，假若見到有人追我車，我係絕對狠心
不會等任何人就開車走，心中總覺得一定有點事，妳
才會不斷打比我...。

今日就係咁，妳不斷咁搵我，我返工唔知妳發生咩事
，到我可以打比妳時，妳已經用緊張又驚慌既語氣同
我講呢件事，我聽到仲驚過妳，我只好用"方法"走出來
搵妳，在搵妳途中我好驚妳會出事， 直到搵到妳我先
放心，是我的錯嗎...??如果今晚妳係陪我食，妳就可能
遇不到呢件事，妳就唔會嚇親，如果呢件事那時真係仲
繼續下去的話，真的出事，我真係不知道以後怎樣面對
妳喇，Sorry.....!

我都不知仲會唔會有下一次，但我經過今次件事後，我
好清楚知道在妳身邊都很重要，不管是陪伴妳又好，保
護妳又好...，仲有我都知道接妳放工都很重要，由今日開
始，我可以或者有需要都會睇實妳，今次雖然危險，但
妳都可以從緊張驚慌中想到方法走甩，並且等到我過來
，妳已經好叻女喇，希望今次呢件事唔會再發生，希望我
響當妳有需要時，我都響妳身邊，由那一天拖妳手開始我
已經講，我唔會再要妳唔開心，我係會緊張妳的，今天的
事我要向妳道歉呢，講到底都係我間接害妳驚慌一場。

>>October 24, 2009 at 1:45:14 PM GMT+8

2009 年 10 月 22 日 星期四 【晴】

世上只"靠"媽媽好.....



在繁榮時間工作有一個好處，就係唔使緊張地留心開
關車門，因為有月台助理幫手，從後鏡只見到月台助
理不斷推D學生、上班族入車廂，碰巧單Car車，情況
更為嚴重，如果在行駛時留心後鏡，望望車廂內的景
況時你會留意到一點有趣事，就係無論你架車有幾搖
晃都好啦，D人係唔會郁同跌，因為架車迫到爆，人
貼人咁企，跟本冇虛位佢郁動身體，咁呢個時候亦都
造就左好多色狼，有意冇意地抽水，接過的投訴都係
屢見不鮮，聽受害人講，有時迫到連邊個抽自己水都
唔知，唉.....唔想中呢D色狼計，唯一方法係早D出門口
啦...!!今日過左繁忙時間後，車廂又變回鬆動，就算入
十架BB車入來都唔會阻到人，可想而知係幾咁少人丫
，BB車內今日有個媽咪，佢抱起個BB，一邊坐車一邊
餵奶比BB飲，車廂內不准飲食..?我又唔會咁無賴趕人走
既，只不過今日BB唔知點解飲飲下就嘔奶，從後鏡睇BB
好似飲一樽嘔夠兩欂出來咁，而BB果D嘔吐物噴哂響媽咪
度，唉....比著我真係唔知點好，不過見到媽咪又好似十分
不介意咁，拿拿聲清理BB身上同臉上既嘔吐物，媽咪自
己就仲係一身都係，到攪好BB乾淨喇先攪自己身上果D
，但唔知係唔係唔夠濕紙巾關係，媽咪抹左等於冇抹，不
過最頂癮係媽咪同BB講左一句，"平時你上車飲奶都唔會嘔
架喎.!!今日仲咩事噢..?"喂......阿媽咪呀，咁係唔係關我事呀
想話，即係話我開車令到令郎嘔奶啦，你要講都行遠D講丫
，我在前面聽得好清楚架..!!!不過不得不佩服個媽咪，我見
佢落車時佢個身仲係一撻撻嘔吐漬響件衫度，但見媽咪仍然
好開心推住架BB車，一邊推架BB車時同時都不忘與BB玩表
情，果然世上只有媽媽好，嘔到成身都係都冇罵過BB半句...!!
我開車離開時諗，如果比著我，佢嘔到我一身係..我真係唔知
點算，能夠好似果個媽咪咁冷靜嗎....??我諗我唔得囉!!

放工約埋女友一齊食下午茶，將呢件事講左比佢知，我問
比著妳會點做好??女友話咪抹囉..都無法架..難道打BB一身
嗎..?講講下，原來女友返工時都有呢D情況，情況更槽係嘔
向旁邊既乘客，而女友想再講下去時，我叫好喇...停喇..唔好
再講，我一陣仲要食野呀!!女友立即不屑講我，"睇下你幾衰
丫，都唔聽下做媽咪做女人既心態....，湊仔做人媽咪好辛苦
呀....(下刪"哦我"十萬字).....!!好了好了....我話如果係我地仔女
的話我估我唔會介意佢D嘔吐物吧..!!還未講完呢D，女友又話
佢若果出街先要賴屎換片仲煩啦...!!!嘩..好喇.......夠喇，再講我
真唔使食喇..!!

唉.....女人... 一講起呢D就會好認真呢，而家我諗真係第時仔女
又嘔又換片，我應該大概不會介意吧...!!咁而我未試過就咁答
住妳先啦，第時佢地有咩事，最緊要妳執手尾同包底啊...!!

>>October 23, 2009 at 10:01:50 AM GMT+8

2009 年 10 月 21 日 星期三 【晴】

女朋友...



從前的我唔係好鐘意食粥，可能係以前阿媽煮得好難食關
係啦，追溯以前，我阿媽煮飯都叫幾好，但唔知咩事令到
佢越整越差，差到我同我妹要背住佢倒左落廁所沖走佢毀
屍滅跡，雖然知到折墮，但真係連我咩都放入口既人都食
唔到，可想而知真係有幾差，就是但講一味餸吧，例如今
餐食剩D飯、苦瓜、雞亦咁，阿媽下一餐就會將之前食剩
所有的做大什會，用電飯煲煲粥，仲要煲到好結，再將苦
瓜、雞亦加上紅米一齊拌在一起，咁就叫做一餐，用電飯
煲整既粥已經係唔好食，仲要又苦又咸又結加上紅米，難
聽D講真係見到都好想嘔呀，覺到我一見到粥就諗起阿媽D
"結"作，不過自從我認識第一個女朋友之後，我對粥開始
改觀，粥原來煮得好係好好食，以前我病，女友一定會用
元貝加瘦肉煲粥比我食，真係用個煲去煮，係要睇火果隻，
一唔留神就會煲燶，但係以前女友手勢都唔差，就算煲燶
都係燶左少少，我都覺得好好食，我果陣仲笑著話，當作
D粥有BBQ風味吧，而粥都係我以前女友唯一做得最好既野，
講到其他餸就，唉.......!!不過我食過都唔係好多餐，因為佢都
好少煮飯，因為懶得洗碗做家務，記得以前所有家頭細務事
都係我做，做到凌晨先會有得瞓，最無奈係我凌晨執乾淨，
佢朝早返工就同我打回原形，我果時都有話過佢，佢話返工
趕時間，我再講多兩句就會嬲，攪攪下我都由得佢，費時出
聲忍得就忍，始終覺得為左呢D事嘈傷感情係好唔值得，而且
嘈完仲要我氹佢打完場，呢個"打完場"真係唔易做，唉.....不過
都過去的事喇，不是我要數衰佢，而的確係時下既女仔係唔
鐘意做呢D，怕整傷對玉手，又話放工仲要做辛苦喎，喂.....!!
我都係好似都係一樣咁放工喎，我唔辛苦嗎??佢答我話，你份
工坐住做，每一轉都有得休息，而佢當時做Fotomax店務員時
要企，仲要受氣，即係講到我份工好舒服而妳份工就比擔泥更
辛苦...!!!嘩........咩道理黎架，那時的我敢怒而不敢言，只好啞忍....!!

自從我同而家呢個女友一齊後，家務會主動做哂，一日三餐都
會準備好，而且D餸仲係好好食，比較特別係女友煮餸佢係會
擺位，好似出街食咁，有時見到咁靚真係唔捨得食，每天既飯
盒都會整好，同事們見到都會嘩嘩嘩....，問是出街買架??就係咁
而家我做少好多野，有時真係見到女友咁辛苦做做做，自己都
過意唔去，成條懶蟲攤響度，我唔知女友係唔係傳統觀念強定
還是職業病，我講左好多次女友先肯比個地我掃同拖，洗碗就
輪住洗，叫佢唔使餐餐都整飯盒返工，之前女友要離開幾日，
佢就會煮定放入雪櫃，而飯盒既數量係啱啱好，冇多冇少，總之
佢一離開幾天，我都唔會餓死，總會有食物支撐到佢返到來，有
時諗，女友係唔放心我會餓親定或者還當我小朋友，但有樣野可
以肯定，第時我地D仔女會好幸福，因為有個咁好既媽咪，而我
真係諗極都諗唔到我可以對我D仔女好似女友咁，所以我真係好
想第日生出來兩個都係女，咁就好喇，女仔始終都會乖一點，就
算佢地第日成績唔太好，都可以嫁得出唔使擔心，第時個女結婚
都唔會為禮金而煩惱，仲有最緊要係，女友生出來的唔多唔少都
有媽咪遺傳丫，又靚又乖又聰明，嘩............講到去左土星添，好喇
走返去地球喇，現在最緊要係努力儲錢，娶女友過門，雖然女友
經常喊住話自己唔會再有人要，我覺得冇可能囉，要擔心的是我呀
，如果女友比人搶走，我真係會喊呀...!!所以女友唔好離開我呀，我
真係會睇唔開唔知做D咩架..嘿嘿嘿..!!

>>October 22, 2009 at 1:39:44 PM GMT+8

2009 年 10 月 20 日 星期二 【晴】

病...


但點知做完就係惡夢既開始，到而家都深受影響，仲要
唔知幾時會好返，可能呢一世都會好唔返...!!就係二千年
果次入院，阿媽探我果時，我記得係阿媽推左我去花園
坐，我都好記得阿媽坐在我對面，坐坐下傾傾下時，阿
媽捉住我手同我講，阿媽生到你咁，都唔知帶你入呢個
世界是不是累左你...!!!那刻真係估唔到阿媽會同我講呢
D野，果陣有十秒想喊的感覺，自己強忍住強忍住...!由
果時開始我就冇怨過我阿媽生成我點，因為我知大家都
唔想....!!事至今我而家都係有D病帶響身上，無了期的覆
診，不過我都習慣喇，唯一影響我既係未來，生BB的時
候會點，始終係一個遺傳病，我曾經同女友傾過未來如果
真係生，妳會唔會擔心，我亦都有講不如唔好生，因為見
到自己咁，好驚我下一代會同我一樣，但我知女友好鐘意
小朋友，我亦都知生BB係女友其中一個願望，女友話而家
臨生前D檢查已經可以Check到好多野，唔使咁擔心架，咁
我都信她所講，我知道如果我堅持話唔生的話，女友一定
會好唔開心，由拍拖開始果時女友已經有未來一個溫暖的
家既憧憬，所以始終我都答應第時生的話會生兩個，一仔
一女就最完美喇....!!

可能自己身體有呢D病，自己抵抗力較差，我病既次數不比
女友少，我地曾經講如果我地兩個一齊大病，咁邊個照顧邊
個好呢...??不過托主既褔，我地都仲未試過兩個一齊大病，只
係試過兩個一齊小病。但尋日我返工時，返到一半我就覺得
唔舒服，先係作感冒之後就喉嚨痛再有點頭暈，食晏時我走左
去買左D必利痛食，好似好左一點，所以我就冇睇醫生，放工
回家就訓，一訓訓到去夜晚，我之前仲應承左女友會接佢放工
，點知我放左一大架飛機，女友在老地方呆等，而我又冇比電
話又冇比Message比佢，女友打比我我又聽唔到，攪到佢又唔敢
走，因為怕我來緊途中，終於到我聽到電話響，果時女友已經
係等左我成粒幾鐘，我一接電話係未訓醒把聲咁講..."喂....咩事呀?"
但聽到女友把聲唔使五秒我立即醒一醒，再望望個鐘...!!!死喇!!
過哂鐘，我就好唔好意思咁話，我食左藥訓左聽唔到電話，所
以就........，好彩女友冇嬲，講真比著自己白等成個幾鐘，仲要一個
電話都冇仲唔接電話喎，比我都唔意!!反而立即問我有冇事，有
冇食到野..??並且話我自己返啦...!!唔使一個鐘女友就返到屋企，
我問咁快既..?原來係搭的士轉東涌線轉西鐵，而且仲有碗粥買到
返來，我估應該係響Terminal 1 果度買吧，跟住女友話"你發燒呀!"
女友幫我掛號睇醫生，診所話而家已經有位見醫生，立即過來可
以，佢連衫都唔換就"的"左我落去，去到打左支針，攞左明天病假
，返到屋企我又繼續訓，訓到咁上下拍醒就係叫我食野，再訓拍醒
就係叫食藥，哈.......我係唔係真係咁唔識自己照顧自己呀?不得不承
認女仔係比較細心同緊張，其實我只係感冒加上食左藥先會咁倦，
唔係病到起唔到身，不過我喜歡被人關心照顧既感覺，我知道我
係絕對需要她，或許上天見我咁多病病痛痛既人，因此才賜予我
一個咁好既女朋友，其實和她一起..我病都病得開心架...。

>>October 22, 2009 at 3:41:43 AM GMT+8