2009 年 8 月 10 日 星期一 【微雨】

千元套券!


唔知點解每個女仔都好鐘意唧黑頭、暗瘡等等
，總之塊臉只要有唔應存在既野，佢都會用盡
方法整走佢，不理代價有多痛...都要做...!!不過
估唔到女性連人地塊臉都要理埋，每當我有呢
D野響臉上，女友都會一句『我睇唔過眼』而將
我正法...!!咁通常為左滿足對方手癮，我都會算
吧...死就死...痛就痛啦....!!但係我唔知點解次次都
有機會比佢捉到我塊臉有呢D野，我開始諗，漸
漸我覺得我每次出暗瘡前都會做一樣野，就係食
龜苓膏，而呢D龜苓膏每次都係女友買返來既，一
向咩都食既我，只係當過期涼粉咁食，邊會諗到
食完會係咁出暗瘡丫...!!最後問下女友，同佢講...
我食完唔掂呀...係咁爆瘡好痛呀，女友話係呀，
係呀....係咁架，食完有D人係會咁，而且你唔出下
暗瘡，我邊有得唧過手癮呀..!!嘩......女人真係變態
呀，我都唔係傻既...下次我唔會再食呢D野，女友響
手袋攞出起碼五叠龜苓膏套票出來，跟住話你唔食
我邊食得哂，一係你換返錢比我啦...!!哇....大嗱嗱成
千蚊點換呀?!!咁你咪乖乖地幫我食減D佢囉......!!都估
到你會咁講架喇...嘩...而家呢個咩世道呀....夾硬來既
唉.......!!

>>August 12, 2009 at 12:04:09 AM GMT+8

2009 年 8 月 9 日 星期日 【乍寒還暖】

我的生存之道


其實要響香港呢遍地方求生、搵食、交朋友....
，有時都幾艱難，唔係個個都會看得開睇得透
，適者才能生存，在呢個弱肉強食既社會上，唔
係你死就我亡，我向來都係一個比較故步自封既人
，只要自己顧好自己，我已經好滿意，所以我唔
會好刻意表現自己有幾才幹，況且上我的確冇咩
才幹可言，人事上，雖然我知道任何一間公司都
會有人事關係問題，我覺得少一個敵人無疑係一
件好事，但都唔會多一個朋友丫，若果要我好似
人咁自降身價去賣命的話，去埋D搖頭草兩邊擺的
傢伙一堆..!!我情願跟我自己作風去做，係就我會蝕
底一點，有時做事未必會下下都過到人，但我起碼
都過到自己...，我始終都相信，少一個敵人唔等於
多一個朋友...!!

>>August 10, 2009 at 6:17:12 PM GMT+8

2009 年 8 月 8 日 星期六 【酷熱】

大肚疑雲....!



這兩天都不知攪什麼，自己個肚總係氣脹脹咁，
三餐不想點食，但又接受到酸溜溜既零食...!!!!
如果我是女人的話，個個一定話我係有左喇....!
但係直到而家都係咁....，腹部總係谷脹脹咁，
食左胃藥都係咁，莫非上次真係衰多口，講左..
一句...『我唔知女人生仔有幾痛喎...呢世都冇可
能試到...』，那陣時氣得女友死下死下咁.....令她
無話可說，今次佢知到我咁......我可以想像到一陣
佢個得戚樣，好....今次算妳狠.......我認輸喇，真的
好難耐呀，究竟我睇唔睇醫生好??難到要我開口講
...醫生呀...『我幾天都肚脹脹咁，谷住有點想嘔想嘔
感覺，食唔係好到正餐，但對酸溜溜食物又會......我
怕我未講完醫生都忍唔住會當場笑死，反要我叫白車
救返佢呢...!!唉.....!都差不忍受多半天時間吧...待女友
回家放工返來那說我怎辦吧....!!

>>August 10, 2009 at 12:04:24 AM GMT+8

2009 年 8 月 6 日 星期四 【酷熱】

機開人不在


二百一十六小時未關過電腦，唔知會唔會壞呢﹖
咁多人都在線狀態....，不要再問我了，我要返工
機著人不在呀，前幾天有人真係在我日誌看出我
心意，那些人很厲害呀，果然夠細心，o殊.........
....!!!不過呢D野你知我知天知地知就好喇，要殺頭
架可不想比人秋後算帳呀...!呢排心情不太好，每
天奮力做事又如何﹖咪又係回到起點...再行過，咁
辛苦都唔知為咩，一生一世為錢幣做奴隸...多麼折
Q墜.....，唉....講咁多仲咩...讀啦.....!!!!

>>August 7, 2009 at 11:26:05 PM GMT+8

2009 年 8 月 4 日 星期二 【乍寒還暖】

誰又屎忽痕呀????!!!!!


公司遲D又話要做評估，我真係好憎讀公司D書，都唔知讀黎仲咩...!!.做
司機都要成日考考考!!!考來有屁用咩?睇熟同唔睇熟又如何喎，有用咩?
正常做駕駛者邊使讀咁多野架?家陣駕飛機嗎?左考右考!即係又要過返d
一放工就要仆返屋企溫書既日子啦!!仲要出到總部大廈考，麻鬼煩，只
係三個月時間準備...!!!!我十足而家果D教師基準試咁呀，唔怪得咁多人
仆到咁走唔撈啦，二合一左而家仲麻煩，多多事實，麻麻煩煩，唉.!有
街好快D出喇，遲D連街都冇得去要讀書架喇..!!!唉....自己講咁多有咩用
呀!!，改變到咩??咪又係死死氣讀....我還有得選擇麼?

>>August 5, 2009 at 11:47:40 AM GMT+8

2009 年 8 月 3 日 星期一 【寒冷】

我們的仔女 (8號風球)



我們有一仔一女喇..!!!哈哈，千萬唔好諗左其他，
我地唔係真係有對孖生龍鳳胎，我同女友只係在
宣明會助養一男一女的兒童，其實大家素未謀面
，但好似遲D對方會寄信比我地，告訴近況，但我
又聽講佢地一來一回加翻譯信件，起碼都要四個月
至六個月時間，不過點都會啦，我想下一世過得好
一點呢.....，今世要積番D福喇，講笑吧....其實見到
好多人都好慘，昨日同女友傾計講我地食一餐價錢，
就足夠助養一個小朋友一個月，對我們來講，應付
係有餘的，所以才好快下了決定做呢件事，咁..果個
地區就好多左兩個有書讀有溫飽的小朋友喇。做點善
事，人唔會好左、肥左、靚左...但內心的確係有開心
的感覺，我喜歡幫到人解決困難的感覺，不知大家有
冇興趣呢..?二千六百四十蚊一年，還可以選擇個個朋
分開比，很有意義的事呀.....大家諗諗佢啦...

>>August 4, 2009 at 4:13:02 PM GMT+8

2009 年 8 月 2 日 星期日 【酷熱】

女友和我做義工



今日我同女友都係放假，無咩好做於是返左去我以前返
工既社區中心，做義工，其實好耐之前已經有舊同事叫
我返去幫手做義工，一來我做過比較熟手，二來有好多家
庭我都識，但今日呢個活動有點不同，今次探訪既唔係公
共屋邨，而係公屋隔離果D半木半磚頭做既村屋，呢個有
點難度對我黎講真係，因為我好怕熱，而村與村的窄巷真
係一D風都冇，我仲要抽住兩大袋，類似福袋的禮物，雖然
女友都有幫手攞，但係真係又米又餅又有水，一D都唔輕架....

幾經辛苦去到那戶人家屋企喇，佢地一家有四口，住響個都
唔知有冇二百呎既地方，呢間屋連冷氣都冇，得兩把有等於
冇既風扇吹住呢間屋，一D都唔涼，簡直係一個蒸籠咁，悶
熱空氣充斥全屋，十分難受，而這時我見到佢個仔仔正在做
緊功課，我估應該係假期作業，佢就響一張摺櫈上面做，書
枱都冇，問到佢點食飯，原來係有一張殘舊既摺枱，而櫈都
唔係太多張，食飯時有兩個人要坐床邊當櫈，而家中個妹妹
正在睇既一本殘破漫畫，問佢係唔係買回來，佢話全部都係
在回收箱挑出來的，我當堂打了個突，此刻女友都頂唔住，
竟然熱到有汗水滴出來，而我就簡直係好似跌左落水上返來
咁啦，我又問你們平時食D咩呀三餐..??佢話係麵包同少少菜
少少既肉，有限既米，而且仲要一日煮好全日份量，免得下
一餐又要浪費石油氣煮多一次，我此刻覺得自己好幸福，我
同女友奉上兩大包糧食、日用品的禮物比佢地，佢地即刻開心
到不得了，只是一罐豆豉鯪魚，佢地都好以如獲至寶咁，我這
時又問下她老公有冇工開，月入多少，原來得4000蚊，若果返
唔足工時仲要冇呢個價錢，兩子女都要讀書，大部分錢已經用
在佢地身上，交租、水電等，已經冇幾多得剩，佢真係一條數
計比我睇，而天氣近來唔好關係，個女有點咳嗽，但都冇餘錢
睇醫生，只好等佢自己好返為止，講下講下，個女人都眼泛淚
光，女友攞紙巾比佢用，佢只係撕開些少來抹，真係慳到離哂
譜，講左一大輪，佢又開個雪櫃我地睇，一太陣怪味傳出，好
明顯...有D食物已經係唔可以食，但係佢仍然留住下次用，其實
我地探訪只係一個鐘Set左，我地要返回中心的，之但係我同女
友又唔想就咁走就算，於是..我地帶佢地出去就近商場好好地咁
請佢地食一餐，出到去佢個仔原來係好鐘意食麥當奴，但因為太
貴佢地都冇咩點食過，最多都係食一個最平既飽食，佢仲要講話
要分開大家食.....我心中只有My God..!!!呢個字，因為我真係想像
唔到，而家香港真係仲有呢D咁既家庭..!!!好難接受，我同女友帶
住兩個小朋友點餐，點知佢連餐係點都唔知，亦唔知有幾多個餐
幾多個飽選擇，最後佢地食個最平既餐，我估佢地係唔好意思吧
，所以我話呢個唔夠飽架喎，不如點呢個巨無霸餐比佢地啦，而
女孩子就要左個魚柳飽餐，女友私底下幫佢地點左三杯新地雪榚
，另外幫佢媽咪點多個餐，看見佢地兩個小朋友好開心攞住個餐
我諗，平日我要食真係話都冇咁易，而佢地就好難滿足自己，我
們望見佢食都好開心，或者我真的只可以幫到佢呢度，而佢地食
..真係食到好乾淨，一條生棻一粒芝麻都冇，可見佢地真係幾咁節
儉呢....!!!一D都冇浪費.....。回程時經過文具店，女友給他們買了一
些文具，之後就分開喇，今日聽到最多既係"多謝"。之前我們應承
過她會幫佢地引見社工，著手教佢地攞多一點綜援，等佢地生活可
以改善一點，其實佢老公成日被人無故克扣人工，而佢地又唔知係可
以告發佢地，我估大概佢怕麻煩，畢竟要入法庭都係錢，無良老板
就係看中佢地呢個弱點而欺壓佢地，呢D人真係可惡又可恨......!!!

回到中心...我地比其他人慢左45分鐘左右，不過時間都唔係問題，
而事實上仲有幾隊小組都未返，我估佢地都係和我所見遭遇差不多
，我同女友回家途中傾計，原來我地生活都幾折墮，因為昨晚我地
先響意粉屋食左200幾蚊，而可知200幾蚊對佢地來講，真係可以足
夠佢地一星期用來一家餬口.......!!!而我地就一餐玩完，真係有點慚愧
，不過見佢兩子女都好生性，我相信只要捱多十幾年後，佢地都會有
仔女回報佢父母。

總之今日看見他們...衣食住...都有困難，想到都會心酸，而衣食住行，
呢個行字，原來佢地連尖沙咀都冇出過，旺角係點都唔知，因為佢
地跟本負擔不起車費，香港貧富懸殊，政府可以真係話無能，富者
越富...貧者越貧..，呢個惡性循環，香港怎會好呢....!!!唉...我自己都
要珍惜眼前所有野，飽足原來都唔係必然的....!!

>>August 3, 2009 at 2:48:44 PM GMT+8

2009 年 8 月 1 日 星期六 【清涼】

現實與遊戲


已經睇左新運到車廠既列車，唔知幾時有得先開為快呢?
希望唔好好似三期車咁，一點都唔好駕，一期比一期差
就好了，不過睇個款今次係用躺門而唔係推門，如果係
真咁就好喇，你知啦....肥人入去時，會好似入左一個好
窄既廁所咁，要屈身先可以關門，如果不幸有人跟車時
，兩條麻甩佬困在一室，幾難睇呢.....!!!不知情的人還以
為我們係背脊斷哂呢....!!!

昨人去左Terminal2度睇探知館，雖然之前有去過呢個地
方，但都係走馬看花咁，冇一次係認真睇，次次都係上
八樓睇就算，天氣熱係原因之一吧，攪到我想留耐一點
，館來展出舊啟德既資料同模型，近呢個月每一有多餘
時間就玩電腦Game，一隻名叫ATC3的遊戲，係玩航空管
制飛機升降的，每一關比一關難去過，我玩到尾二果關已
經暫時不行了，玩落先佩服當年舊機場D航空管制人員，點
解可以響咁細咁窄的地方控制同指示咁多架機。開初以為
遊戲始終係遊戲，不會太真實，取景不會取足，誰知我昨日
先知，遊戲內的行走航道及路線，甚至跑道上所有畫位都係
真的，而且遊戲內的英文對答都有九成同現實相似，因為在
館內我都聽過佢地控制塔同機師的對話....!!!今時今日的遊戲
真係太厲害了....!

題外話，有一隊樂咩..好似係唱歌的，叫五月天，上網Check
下佢地個英文啦，唔知咩原因咁手多多去查啦，一查之後笑
死我...原來真係叫Mayday......，我想知五月天到底知唔知呢個
英文字有咩意思.........航空語讀解係『求救』，呢隊樂隊好唔掂
嗎..??求咩救呀...??

>>August 2, 2009 at 11:49:39 PM GMT+8

2009 年 7 月 29 日 星期三 【綿綿細雨】

自問不甘心....


誰說....付出便會有收穫呀??自問付出了這麼多，
準備功夫做足，資料搜集咩都做哂，好喇...到頭
來我得到什麼呀..??換來只有失望、不甘心、不
忿氣、激氣.......，我的感受我諗旁觀者不會理解
，名存實亡的制度，更加令人憤怒，生存在香港
呢個社會上，要力爭上游真係不是易事，但即使
不甘心又如果，權力在人手中，規則在人口中，
我只有無奈不忿的接受，我還可以怎樣...!!!

>>July 30, 2009 at 3:14:50 PM GMT+8

2009 年 7 月 28 日 星期二 【綿綿細雨】

繼續病....


唉....個傻妹一時又燒下，一時又退燒，看到她食又食唔到
，訓又訓唔到，在床上輾轉反側，我都替她辛苦，D藥對佢
好似唔係好得咁，可能份量不足佢可以打低病菌啦，一陣再
陪她出去睇醫生，希望今次可以藥到病除啦，一陣幫女友請
假，我又要找人調更，食左個豬頭更，但冇法子啦，女友真
係病到咁...好需要人睇住佢，照顧佢，所以...返咩我都不會介
意，好喇...祈求天主讓女友可以快D好番啦，真的不忍心見到
她病得咁辛苦啊....

>>July 30, 2009 at 3:00:20 PM GMT+8