| 日記 | 日記主簡介 |
||||
2010 年 1 月 12 日 星期二 【颳風】 家中墜機事件 激死呀 我架波音777墜機呀 仲要睇住佢墜呀 我講既架係1比500既模型呀.... 呢架係亞洲國際都會既拉花機呀 係唔知邊次女友坐中呢一款機 而特登買返來架 係咁既.... 通常女友坐中邊架就會買返今次坐果架既模型 重複坐既當然唔會買啦 如果唔係747、A330、A340都有幾十部... 家中多多位都唔會夠放.... 移歸正傳先 今日隻衰貓唔知係唔係天氣凍關係 經常收埋自己去個竇度瞓 因為果度有暖風機吹住佢 但要經過個竇 佢就要跨過個飾物櫃 就係咁.... 佢就跨過之餘仲推到我架777落地 我頂...!!!!! 比佢咁跌一跌 細緻既配件立即跌爛 機頭個起落架斷左.... 救不了... 太可惡喇.....!!! 今晚冇點心食呀 要罰你餓下呀 醫生都話你過肥呀之前 唔可以食太多呀 哼.......!!! 嚴重警告你呀 再試圖意圖擊落客機的話 連暖風機都關掉佢 正衰野.... D飛機係你媽咪送比我架 咁夠Pop整爛佢.... 問你下次仲敢唔敢 嗚哇哇....呀!!!!!! 777-300ER(Asia's world city)......你死得好慘呀 我唔制呀...要用返衰貓D食糧錢扣返我架機既錢呀... 我條氣先順呀 最後向女友申訴 竟然話...咁我下次買個部新比你囉.... 貓咪都唔想架...!!!(抱住佢向我講..) 呀........ 激死呀...投訴無門呀 女友話...Case Close.... 呢D咪係傳說中既"不平等條約"囉 大細超到出哂面.... 妳好衰呀!!!!!! >>January 13, 2010 at 1:27:56 PM GMT+8 2010 年 1 月 11 日 星期一 【乍雨乍晴】 誤會.. 今日同雪兒去左食飯 自從雪兒調左去湖康後 我都好耐冇見佢喇 雪兒真係冇咩點變 食飯期間講左好多關於她工作上的事 和以前的舊診所同事有小爭執 但之前我見過馬姑娘時 馬姑有主動向我講呢件事 話只係小誤會...是雪兒太敏感吧... 我聽左解釋都相信係誤會 何姑娘個樣同把聲係就惡一點 但內裡我覺得她好好人 佢D說話直接係人都知.... 無心之失...講個冇心...聽者有意 真係多麼槽的事 麥姑娘係Clinic中最Senior既RN 有威嚴就一定架喇 不能否認麥姑娘睜大開怒目時係多麼可怕 但麥姑娘的內心...我認佢係好善良 其實大家都知 佢係唔係一出更表都會鬼殺咁嘈 話...又出成咁樣..做死人咩..?? 工作辛苦..人手不足..我知大家都很燥... 早排要打流感針、季節性流感等等既針 個個都做到無命無停手...飯都冇得食咁滯 "燥"就會出現 剛巧最Junior既雪兒被護士長欽點遍更 遍得不好...自己又Junior比人嘈實在避不了 但我打聽過所有姑娘的意思 她們全部只係怨更期不好 其實邊個遍...佢地期期都嘈架啦 同雪兒無關 今日我將呢個誤會解釋講比雪兒知 希望佢唔好再唔開心...嬲左大家 雪兒都老實向我講 開初真係好唔開心...聽到佢地D語氣真係...!喊了出來...!! 但過幾天後...直到今日....雪兒都明白大家冇嬲到佢 其實雪兒本身係TSWGOPC....既人 但係調左去湖康...看來都買斷...長註湖康喇 不過...既然在湖康做得開心 我都支持她不要回TSWGOPC 最多我探佢去遠一點囉.... 七年喇.... 我識左呢班姑娘七個年頭 由天水圍到元朗到屯門診所 我全部姑娘都識得 在我病重果幾年 多得她們才好過來 我很重視呢班姑娘的友誼 由最初病人關係 到熟稔.... 真係很有緣份 真的不想見她會有誤會 診所中.....所有都係女護士 女人是非一定避不了 希望她們可以互相忍讓一下啦 我期望著....今年新年都會好似上年咁 我地大家可以開開心心咁一齊在茶水休息間開Party.... 我知道姑娘工作真的好辛苦 明天或者買幾打西餅給她們打打氣吧 大家要..一團和氣啊~ >>January 12, 2010 at 7:20:37 PM GMT+8 2010 年 1 月 10 日 星期日 【颳風】 好感.. 有時我都覺得我地拍拖拍得好怪 我諗都冇咩人會去圖書館拍拖吧 齊齊響圖書館"打書釘"喎!!! 一打..打幾粒鐘!!(當對人一定係痴線的吧...!!) 女友話...我地有交稅呀 梗係要用盡D公共設施啦 起初其實都唔係好鐘意入去 因為又唔講得電話、又唔比講野大聲 而且仲好多時冇位坐(難到要同老人家、小朋友...爭櫈仔嘛...??) 佢D電腦仲慢過D咸豐年既386機 真係用到火都黎 今日我去左圖書館睇書借書 女友攞左本有圖畫既英文故事書比我睇 真係可悲.... 我竟然有字係唔識讀同解 真係好失敗...Orz.... 簡直係失敗中既失敗 完完全全的敗下來 有時真係幾後悔細個唔讀好D書 我能有女友一半已經很好喇 只可惜我連女友的一半都冇 想返起中學時我做D咩... 除了..整估我後面兩位個Irene、Keat外 當然受害的女同學不止咁少啦 但Irene真係當年吃左不少苦呀 諗諗下點解我會成日整估佢呢...?? 當中有D仲係好賤添... 我都唔明當年Irene點可以忍受到 若果去告發我們.... 怕且我成績單上都有一個小過或許大過呀 正話我問女友記唔記得當年 有一次好賤果一次 女人....果然記仇得很 不單止記得 仲講返我好多唔記得既惡行 真係好鬼死衰格呀..我都覺得果陣既自己 多口問點解唔話比老師知.... 女友話唔知呀... 可能怕大家鬧大左會唔開心吧(幹咩要理我感受喎當時...??) 算啦...都咁多年了 講出來都唔怕喇 以前我總之坐任何異性的前後左右 我都會對佢地產生好感(據說呢D叫日久生情喎...!!) Irene當年真係唔知點解 全年都坐左我後面 任老師點調位都好 調極都會坐響我左右 一個學年咁相見相對住大家 縱使...妳幾咁男人婆都好啦 始終都係女仔.... 或者....我早已經暗地裡喜歡妳吧 果時我真係有為左突出自己 才向妳施毒手吸引妳注意吧... 怎說也好啦現在 我當年整估妳的 估不到十幾年後完完全全衰在妳手上 但我心甘命抵咁....比妳整估返我一世... 不得不說.... 現在的妳真係靚過讀書時代的妳好多好多好多好多..............!! 或者早就注定我們 兜兜轉轉咁即使分開冇聯絡十幾年... 都會碰到面..相認到 從微妙的機會中....我們走在一起 令到十幾年後的今天... 我們可以拖著對方既手... 我祈求呢世..大家都會"走不掉..甩不開" >>January 11, 2010 at 2:20:19 PM GMT+8 2010 年 1 月 9 日 星期六 【微冷】 女人的消費論 一放工就同女友去左百佳超市 我地每逢每個月既10號都會去掃貨 點解?? 無他吧 只係就返信用咭個截數日 因為10號係重新計算 今次買野既數會出響下個月張信用咭月結單上 咁可以今個月用下個月還 其實都唔知咩理論 咁即係今個月還上個月數 咁有咩分別呢...?? 女人D數口真係奇怪過人 話說今日去百佳買完一條盒裝紙巾價值28.5 但買完去日本城睇同一件貨....27.5... 平左一蚊 個傻婆真係問我係唔係可以問百佳攞返一蚊...!!! 話係唔係有D....咩店平D會賠個差額...!!!! 嘩...我真係叫救命呀... 算啦.... 一蚊我比妳啦..!!! 妳個傻婆買一支神仙水都800幾蚊 妳去慳果一蚊 不過今日比女友發現左個著數 佢去COLOR MIX睇...SKII 大支裝神仙水..700幾蚊 平專門店差不多200蚊 咁就一口氣買左5支... D女人好蠢呀... 果一蚊就慳....3000幾蚊就走去比人賺 不過...個傻瓜都冇唔理我 女友買開比我支香水係400幾蚊 今日走去卓悅睇258蚊.... 我都有3支收穫..哈哈 唔係我話買架 係個傻婆話..平呀..平呀... 買左先啦...可以擺得耐架嘛 呢D就係女人既消費手法 我覺得.... 女友...買野時太可愛喇 那種滿足既笑容.... 算啦....間中一次啫 不過我前幾日先咁講過.... 乖女....我地要慳D喇... 如果唔係有排妳都嫁唔出呀 問妳怕未..!!! >>January 10, 2010 at 2:59:59 PM GMT+8 2010 年 1 月 8 日 星期五 【颳風】 玩野 接過女友放工後 時間全部比哂佢 首先.....放工立即返屋企換衫 之後出去整頭髮... 一整...整左三個鐘 又染又拉..左整右整 等到我變化石..可以攞去博物館展覽喇 我足足一口氣睇哂佢地全部呢個星期既雜誌 咁梗係飛頁黎睇啦 整完..差點認不出佢... 唉...真死得!!!! 我真係睇唔慣咁直髮的她 之後去左食飯 諗住打邊爐 點知又冇位 最後去左食台灣野.... 可能之前等到我吽哂 食飯時冇咩胃口 跟住...我.....哈哈 我話....因為女友D頭髮整到一陣味....影響我胃口呀 之後女友撒賴唔比錢 要我比哂.... 理由係...我今日用左好多錢喇!!! 同埋....我銀包得返二十蚊 我整佢丫 二十蚊你夠膽死出街食野 提意大家一齊"洗大餅" 最後我侷住簽咭.... 女友見我百萬個不願意 搶我銀包攞咭比人簽 仲加多句...."唔好刮花張咭呀" 抵死個女侍應..又回答"知道"!!!! 我身邊呢個女人係唔係玩到冇野好玩呢...?? 整天比佢玩殘兼吹漲.... 怕了妳喇 下餐妳比呀..!!
>>January 9, 2010 at 3:56:43 PM GMT+8 2010 年 1 月 7 日 星期四 【乍雨乍晴】 日日如是 今日一早又送左女友返工 我而家真係發覺除左機場的禁區地方外 我已經行到個機場熟到爛...(熟到可以差點兒收人陀地喇...!!) 真係閉上眼都會識得行唔會撞親....(當然啦機場咁大點會撞親喎..) 不覺間我在機場都打滾左一段時間 坐機場巴士聽佢果D報站機廣播 沿途巴士站我倒轉返都識背 就連好幾個巴士司機都認得我地(發夢啦...人地認得我隔離個女友乍...識我係老鼠呀...!!!) 唔知遲D可唔可比少幾蚊搭車呢..? 我留意左D機場巴士司機好耐 佢地對女空服特別好 其他人上車.... 人地都未企定..行李都未放好 司機就踩油去....睬你都傻.....企唔穩係你事 如果係女空服上車 有D會誇張到為佢特登開個鈄板 等佢可以拉行李上車 仲會好到有時等佢放好行李先開車 若果響機場上車的話 有D司機見個女空服拉住大黑小黑同Garment Bag.... 肩膀上仲揹住個方方手袋時 仲會親自幫佢地搬上車兼放埋上行李架(懶係紳士咁...!!) 你話...響香港....做女性係幾咁著數呢...!!!! 也難怪既.... 靚女梗係討男人歡心既... 仲要著住套U喎... 明明果個女既都唔係靚女 一見佢著住套U就咩都唔同哂 先入為主....係唔係都話個女既係"靚"... 不過....將心比心 我明白的... 因為我都係咁....不怕認吧..!!! 有一次...我見到個死金毛仔串串共咁跑住追我車 我等到佢就跑到來時我先關門...哈哈..(我很賤呀都覺得...!!!!) 心諗...吹咩..!!!! 亦都有一次.... 我見到對面月台有個靚女跑來追我車 明明我都關好門.... "叮"埋準備開車添喇 我都等佢由對面月台跑過來 我仲要特登開頭門比佢上 個靚女...表面上係跑上來... 但看得出一點都不落力跑 不打緊.... 靚女我實等妳既.....(係唔係好賤呢..哈哈..) 無計啦... 靚女係有點點著數吧 天下間的男司機話呢D都係人之常情吧...(為自己找個藉口先...) 當然亦都有例外啦 聽女友講....有一次佢在屯門分站追機場巴士 女友話..我揮哂手跑哂都唔等我..(整佢個計丫..女友話..!!!!) 我話...佢係唔係睇妳唔到呀 女友就話....點會呀..我套衫咁"勁" 點會見唔到喎 後尾我說笑話...佢呢個可能係女司機掛 咁都唔係冇可能丫.... 我真係搭過有女司機開E33路線呀 佢可能妒忌妳靚過佢吧...哈哈 好喇...廢話講完喇 因為今日真係冇咩事發生 平平靜靜咁..... 咁都未嘗唔係一件好事黎既...!!!! 一整天無風無浪咁渡過 我都唔知可以寫D咩 寫我同妳.... 又比D人...哩....果D人呀...投訴呀 個頂我地唔順喎.... 唔寫妳同我...咁又冇時發生 咁唔通我寫我食咩飯咩..!! 係.....!!我可以選擇唔寫一日 但係懶得一日唔寫自己又怕會懶下去唔再寫(懶開會有條路嘛....) 所以我會迫自己每天都寫一點事上去(所以我叫呢個日誌做..Daily Writing) 我寫左咁多年日誌 我覺得唔係自己冇事發生冇野好寫 而係自己發生既事每天都相同 起身...返工...食飯...回家...瞓覺... 要千篇一律咁寫又冇意思 有時明明發生左D事好想記下來 可惜當時冇筆墨...(係自己冇記性..持續性失憶吧...) 回家又唔記得左咩事 想寫一點深入關於自己和女友既 得來..竟然會有一個三唔識七既人走出來 問我女友....妳係唔係....邊個邊個呀..???(我頂....呢D係唔係叫宅男呀...?) 自己工作上又有D唔敢寫出來 費時比人日後有機會秋後算帳(比Senior阿Sir見到我就扒街喇...!!) 所以...最好寫既都係我同女友發生既事 點知...又你呢比班友仔....唔使望喇.....講你呀(你呀.....吹時姐) 話頂唔順... 但係又要八八掛掛咁去問我喎 哈....你話你班友想點呢...?? 真係難服侍呀 好.....!! 今日我送女友返工 落車送左佢去魚翅城後就走左喇 之後我返工... 一直平靜咁等到放工 回家食左女友一早預備好既飯...(你們所講係我的殘廢餐....) 睇左陣電視....(大結局呀今日....) 瞓左幾粒鐘後..一打開眼睛已經係凌晨3點 跟住我先打呢篇日誌 直到現在呢一刻 來緊又要開工返上晝11點(辛苦命....真係做到人都癲..!!) 明天我放工後就接女友放工 好喇... 我又要去恰多一陣喇 希望明天會有好事同開心事發生響我身上啦...(唔倒楣都算係好事對我來講...) **以上粗體字就係我今日發生的事...千篇一律...好多時每日都係咁過...冇咩特別...你地見得多都悶啦..係咪先...** 唔講下廢話...我都唔知可以打D咩囉...所以我先話...!! 好喇......真係要去瞓喇... 明天要開工喇...
>>January 8, 2010 at 7:56:30 PM GMT+8 2010 年 1 月 6 日 星期三 【乍雨乍晴】 狂風浪蝶...!!! 女仔真係天生好鬼死貪靚 淨係見到家中有一枱一櫃都係美容品同化妝品就知 當我每次咁講 妳都會話..."咁女仔梗係貪靚D架啦...!!!" 如果唔靚咪隨時都會比你D男仔飛呀...! 唔保持形象新鮮D... 一陣轉頭搵過另一個... 我就不知點算好喇 要知我都唔細啦 下刪一千個女人之苦的理由... 哎呀... 我真係比妳激死我呀 同我一齊咁耐... 我係咁既人嘛...?? 要驚都係我驚先啦 妳個衰野呀... 仲話冇人追妳...!!! 殺到上門呀!!!! 妳無話可說吧.... 哼....!! 我唔擔心才怪呀 之不過殺到上門當日 見到妳個不知所措既樣 真係好好笑呀 不停向我講講講解釋 我唔知架...!!!我冇做過咩呀..!!我真係唔知點解呀....!! 妳知嘛...當日妳個樣好徬徨呀 如果有當時DV在手的話 拍下來....睇返妳個傻瓜兩頭拎整個人企左響度個樣 真係..唉!!! 說真的.... 我的確果陣有擔心妳究竟出面做左D咩出來 為什麼會殺到上門 但好快我又冇事 因為當時妳D反應真係令到我好相信妳係不知情 任妳更蠢....玩都唔會玩到上門吧 再見到妳將D野掉都掉唔切咁就... 我堂當見到真係想抱住個肚笑 妳還即日在我面前解決呢個問題 荒死我會唔信妳咁 其實... 咁都好丫 証明妳仲有魅力 証明妳D護膚品化妝品冇白買白用 証明妳仲可以....妳仲有市場呀 還可以警告我小心點添 看來我不對妳緊一點.... 妳都會比人搶走呀 我可不同妳呀 我要搵返個似妳咁好既女朋友真係難過上海王星呀 妳不要掉低我才好呀 不過話事話... 以前讀書陣妳真係好中性化架喎 咩事會令妳變返個女人架....?? 仲有呀..講左好多次喇 同我一齊可唔可以唔好著高過兩吋既鞋呀..?? 我同妳個樣已經係比下去啦 仲高多我成吋.... 係唔係有心同我作對先...???!!! 吓....!!!!!!!! >>January 7, 2010 at 3:50:23 PM GMT+8 2010 年 1 月 5 日 星期二 【乍雨乍晴】 要聽話啊!! 本來今日係諗住叫女友同我一齊回娘家執野 但見她面色很差 一看下已經知佢又病喇 還有點點發燒 傻瓜瓜的她帶著病還落樓陪我走左兩轉車 開初從倒後鏡看女友已經覺得她同平日不同 以往當我見到她跟我車時 我會拉高個遮光布比佢看到我駕駛時的背影 間中個傻瓜還會抵死地咁扮鬼臉... 等我從後鏡看到佢個鬼臉樣 當我停站時還會拍拍我玻璃門個窗叫我 若果碰正當時架車要企位時 她就一定會走到最前望我駕車... 但今日她很無精神 個頭一味係咁靠住個玻璃窗仲合埋眼似係瞓左咁 在我車來回兩次...合共四轉車.... 即係去...一次、返一次、再去多一次、返埋最後一次 我先至可以收得工... 平日女友不在我車時 我會開大一點冷氣 費時令架車咁焗 咁當然同時架車會比較凍一點啦 不過以今日天氣... 我車都係暖過出面好多既 但當我見到女友入來 我會主動較細個空調 因為女友好怕凍嘛 尾二果轉車... 我出來望望她時... 連我埋左站停車她都不知道 拍一拍她才勉強醒來 看到她臉色真的不太妥 我摸摸她的額頭同頸 感到有少少熱..... 我回休息室裝左點暖水給她沿途飲 不過最後女友都冇飲到 只係當暖蛋來最暖兼繼續瞓 到我真係可以放工走得喇 拍一拍她....才醒過來 我捉她去睇醫生 睇完醫生食左三次藥 期間一直都係在床上瞓.... 到正話已經好左好多 起碼都識得扭計叫肚餓口乾丫 唉...咁大個人都仲扭計咁孩子氣....真係服妳囉.... 之不過女仔要扭下計撒下嬌才可愛同逗人喜歡嘛 所以我都鐘意女友扮下小朋友咁扭下計 當然啦....妳要適可而止啊....扭得太厲害會有反效果呀 但我知女友會就住來扭計吧 嗯...!!!現在見到妳有返精神好返咁多 我可以放心喇 明天或者遲幾天才到我家執野吧 因為.... 我最愛既女友... 我會將她的健康同感受永遠都放在我心中的第一位 在我心中......妳比任何東西都來得更重要 因為妳是世上獨有的...唯一的 永遠都得妳一個 若果不去愛妳多點同關心妳多點.... 睇怕我人生真係無咩可做喇... 看看情況呀.... 我知後天妳Turn Around.... 但如果妳身子不爭氣...又再病過的話 不批准妳去返工呀 要聽話在家休息同瞓多D 要乖乖的聽話先得架..... 知道的話.....就立即走來向我講 "知道喇"咁啦~ >>January 6, 2010 at 7:13:40 PM GMT+8 2010 年 1 月 4 日 星期一 【陰】 又再BBQ 今日同女友D同事既同事既同事既同事BBQ 不知搭左多少層的關係.... 當中有做機場保安、HAS地勤、維修區、魚翅及港龍地勤和空服等等 一大班人一齊又BBQ(今期很熱氣呀一定....係咁BBQ) 其實我對妳那邊的人絶大部分都唔識... 甚至見都冇見過 不過聽佢地各自部門的事真的很有趣 知道了好多內幕...(很驚人呀....!!!!!) 唉.....我而家好驚去旅行時D行李有問題 佢地D手段簡直係爐火純青地步 我不敢在此說太多 事關佢地又唔係做咩壞事.... 只是手法比較無賴D吧 也許佢地工作實在太悶掛 今日呢一個BBQ真係好多人去 有D放工來..有D臨開工前食完走去返工 可見香港機場係幾咁忙同幾咁多人呢.... 很羨慕那班HAS既停機坪工作人員 可以駕住果D拖住十幾卡既哥爾夫球車... 穿梭停機坪中 在飛機下面走來走去 我諗我真係無機會入機場停機坪的禁區 我睇來都冇緣可以好似女友咁 可以跳上飛機個大渦輪引擎內企上去影相 我睇怕連架機個轆都冇幾會掂到 唔知親手掂一大架鐵鳥(佢可係曾飛起到三萬幾呎高空的物體呀...!!) 感覺會如何呢...?? 算吧啦...唉 工作性質不同 正如佢地都會問我鐵路上的問題同人事咁 道理相同吧 嗱嗱嗱..... 今日我燒返野食比妳喇.... 妳放工咁辛苦..我咩都幫盡妳啦 不要再扁嘴喇 明天陪我返天水圍執屋吧 我妹今日在家中大執 執左我好多野出來問我要定唔要 我妹仲話好多陳年"古董"呀 叫我快來娘家處置呀.... 明天....我放工後能陪我回天水圍"考古"嘛?? 好唔好呀...???(哼...無得唔好....冇得Say No呀...!!!) >>January 5, 2010 at 6:37:50 PM GMT+8 2010 年 1 月 3 日 星期日 【晴】 送...遲來的禮物 今日開工途中在洪水橋站見到有人向我揮手 呢個人係一邊跑上月台另一邊廂就拍八達通入閘機 再飛身上我車....以上動作係連消帶打咁 我見佢咁辛苦..... Ok....我實等埋妳既 當呢個人越行越近我車時 我先發覺佢好熟口面.... 原來係天水圍既診所姑娘 我諗佢應該返E更吧 我睇下時間.... 嘩...姑娘妳都較得D時間好緊迫喎 上左車後.. 姑娘響天水圍站落車 打個手勢Say個Bye就走喇 我諗..佢自己都趕時間啦 計一計.....姑娘共有兩個仔女 剛剛一個"好"字 其實香港真係好細 之前我才知姑娘個老公 我都係識得既... 唔係..應該話我識佢..佢唔識我 佢老公響十年前我已經識得 因為我住佢個病房 當時佢係護士長... 但據悉而家佢已經升上..做左病房經理 呢D家庭真係唔愁生計呀 老婆係註冊護士..老公係醫院病房經理 我估佢兩公婆夾埋一個月搵成5萬蚊最少 真係羨慕死人喇 而佢對仔女我間中都會碰到 上一次見到係響百佳超市時 當時我同女友行超市入貨 而佢就兩公婆同對仔女一齊 上次問到佢地已經係讀三年班 細果個讀二年班 嗯....!!!!只係咁諗一諗佢地D生活 已經生活無憂...幸福到滿瀉..簡直係我偶像呀 我可以有佢一半就好喇 唉.....想下可就好喇....!!! 繼續去捱騾仔...打醒十二分精神開車吧...!!! 聖誕節剛剛左 在X'mas Party我抽到一D唔等洗既禮物 就係一打好靚既File..... 診所D姑娘個個都有家室有仔女 而且個個都係讀緊小學或者幼稚園 呢D咁可愛既File就啱哂佢地D小朋友喇 我開頭還傷腦筋點處置D File添 而家佢地有著落喇 明天或後天...我帶佢診所送比姑娘吧 就當係我比佢地D仔女既...遲來的聖誕禮物"吧...!! >>January 4, 2010 at 1:10:19 PM GMT+8
|
|
無事嗎?irene佢而家情況如何