| 日記 | 日記主簡介 |
||||
2010 年 3 月 6 日 星期六 【雷雨】 Sick alone 都不知攪什麼鬼事 是否自己食錯野 攪到自己個身生左D"風難" 睇左兩日醫生都係咁 痕得要死 食左D藥鬼打咁眼瞓 整天昏睡在床上 女友又不在我身邊 自己隻手又伸唔到去背脊搽藥膏 原來.... 一個人病真係咁辛苦 難為她有時一個人在外地 冇人幫自己的情況會係點 唉.... 工我返唔到要請假 女友我接唔到... 只好乖乖在家等她回來 很想見到妳呀 妳快D返來啦 你而家在半空中還到仲響地上呀 等妳等妳等妳....掛住妳呀 >>March 7, 2010 at 5:02:35 PM GMT+8 2010 年 3 月 5 日 星期五 【陰】 Sick leave 個身痕得要死 今天真的冇心機對著電腦打字 今日我亦冇返工請左病假 女友妳可唔可以送一個"平安鐘"過我呀 妳不在..我一個人很慘 叫天地不應亦不聞呀 >>March 7, 2010 at 5:02:49 PM GMT+8 2010 年 3 月 4 日 星期四 【晴】 怎能生厭? 傻妹今日要返工.... 其實很開心可以送到妳返工 接到妳放工 妳曾經問我辛唔辛苦... 其實真係有點辛苦架 有時放工很攰.....就走去接妳 我曾經搭地鐵瞓著....由青衣搭到去東涌 再由東涌瞓到去九龍...都不知道 一醒來都唔知身在何方 雖然好攰..... 但見到你從Gate度走出來時 我又會好開心喎 妳呢....好似小學生放學咁 好似果D小朋友放學見到父母咁 一見到就急步走過來....好鬼抵死同可愛架 被妳撲向我身果一下呢真係.....唔知點形容 我地又唔係三年先見一次...唔係仿如隔世好耐冇見咁 但每次見到妳來都會 開心的.....因為妳在我身邊，我能夠掂到妳的，能夠聞到妳獨特既氣味 安心的.....因為妳安全到步，事實上每次我都有點擔心....比妳一個人出去咁遠 自從上次比妳嚇我後..我更加知道要抱緊妳啦 妳每次放工回家都總會有點驚喜的 例如買手信咁..... 那地方去得太多次喇...... 已經買到冇野好買 記得嘛.... 有次就係咁.... 返來打開行李拿出來..."一罐可樂" 話....."響邊度邊度買架..." 可樂都好一點.....起碼個罐身字樣字體不同...都叫特別 但有一次妳去首爾 妳買一包"辛辣麵"返來.....仲要係一包..得一個麵餅果D 樓下百佳都有得買啦..... 真的比妳激死呀 老遠帶一包麵返來....比妳吹漲...哈哈 所以...... 我點會唔鐘意去接妳呢.... 坐巴士回家聽下妳D奇人奇事就夠好啦 冇奇人奇事.....給個身軀比妳靠著睡也好吧 是嗎...? 妳又問我 咁送妳返工辛苦嗎....?? 冇咁辛苦呀 因為妳次次上車都講唔夠廿句就會瞓到落車.... 我只係幫妳落車按鐘的用途 同埋都係比妳靠著瞓的作用 但有時送完妳返工..之後 我又返工..咁就真係有點攰喇我 不過話雖如此.... 我都好想能夠陪妳搭車返工 "唔得閒...攰呀辛苦的話留在家中啦...唔使送喇" 呢句話....妳每次返工都會講 我知既.... 妳口中說唔使.....其實妳係好想既 妳D表情已經話哂我知 由開始到而家我都很喜歡陪著妳週圍走 其實不是一件很感動的事吧...傻瓜 像個傻瓜瓜向我流眼淚仲咩喎... 對妳好都不需要理由吧 對著妳呢個傻瓜點會厭丫 日日都有D事總會嚇一嚇我....係咪? 不知妳今次回來會比D咩比我呢.... 看....!!又有期待喇.... 怎會對妳生厭呢.... 不要再喊喇...傻人....!! >>March 5, 2010 at 2:35:22 AM GMT+8 2010 年 3 月 3 日 星期三 【酷熱】 嫌命長的死中坑 而家D人係唔係有病架呢? 定還是活得不耐煩呢? 嫌命長嗎...? 你個死中坑.... 對面班車剛剛先入站 邊有咁快會開車走呀 使唔使咁趕時間呀? 我架車已經出左站 都已經郁緊 架車都出左四分一出月台啦 你仲彈出來去追對面班車 真係估你唔到 你條死中坑 你係我返工以來第一個要我打開車窗 伸個頭出去望下.. 睇下我有冇撞死你既人 我見你跌落地還以為你死了呢 看來係架車個"響咹"太響太勁 嚇到你跌低吧...!!! 在超繁忙時間...千隻眼望住你跌低 你都瘀到爆吧 你條粉皮...要死就返去自己間屋度死 咪過來亂過馬路... 咪以為真係以有本事咪撞死我的心態...用你條命賭 輸左你係會死冇全屍 話你知吧.... 我冇超速...跟規則駕車而撞死你 我最多比人停職一陣子 錯不在我..我係唔會有事 要死唔該你死遠D 咪比我轆開你兩截.... 真係有病.... 望都唔望就過馬路 痴線... >>March 4, 2010 at 8:35:04 AM GMT+8 2010 年 3 月 2 日 星期二 【晴】 外快 今日返工時碰見以前做裝潢既師傅 冇錯.... 當年我出去同人劈酒用既錢 就係呢個師傅出糧比我既 數數手指都有差不多十年喇 大家都好似冇見好耐 難得係佢仲認得我 果然...我十年如一日...都係咁咩呀..哈哈 望下師傅佢多左白頭髮喇 而我都冇做裝修工作好耐喇 看見我而家做司機.... 師傅都話唔錯丫....收入穩定嘛 問我結婚未呀....? 嘩..我都想呀..冇錢呀!! 師傅聽左我咁講... 竟然問我有冇興趣得閒客串下 得閒而又有工開時去做下 做下油漆、上下牆紙咁.....比500蚊一工我 聽落去好似幾吸引咁 其實我都想去玩下 當年我都做開... 我諗我都會ok掛 而且我真係冇咩錢 做油漆閒閒地都會有5日工開 咁我賺幾千比女友儲住佢 咁去旅行都會容易一D丫 唔去旅行當儲錢結婚又夠好囉..... 嗯..... 妳會唔會比我陪少妳一點....去賺多一點點呀...??
>>March 3, 2010 at 1:24:40 AM GMT+8 2010 年 3 月 1 日 星期一 【晴】 點心 今日回家見到個傻妹笑笑口 唔知做咩事 直至張妳剛整好的蝦蛟、叉燒包點心後 我先知妳要我做白老鼠 哈.....願意到極啦我 食到痾我都會試呀 妳整.....我點敢唔棒場呀 係咪先?? 況且妳整得既都會好少失手 蝦蛟係幾好食...我指個味道 但係個蝦蛟皮好以厚左一點 叉燒包呢就好似個樣整得 連張包底紙都有....等我食前要撕走先可以食 但係好似淡左一點..... 如果多返D味會更好 只不過...妳學左幾堂有咁既樣 我覺得已經好好好好喇 真架...... 妳煮野食真係好有天份呀 如果再係咁整落去 我怕我會越來越肥喇 咁我肥當然冇打緊啦.... 但係你會唔會嫌棄架..?? 不過妳煮得咁吸引 我既同D同事食飯時呀 總有一個會夾走我兩件..... 有一半人覺得盒飯係買返來 另一半人亦都係咁講..... 妳上次問我帶飯會唔會厭既? 點會喎... 況且我唔帶飯.... 得果D"生果金"買左飯我仲有得剩...??? 咪玩啦...!!!! 係呀..... 下星期要比多一點零用噢 約左朋友食飯呀我 妳要記得呀..... 一陣冇錢比我要去餐廳"洗大餅"就唔係幾好啦... >>March 3, 2010 at 1:25:19 AM GMT+8 2010 年 2 月 28 日 星期日 【晴】 爆粗.!!! 收到個電話message.... 嚇親我呀 289蚊電話費要交 我平日個plan係88蚊 點解會咁 我又冇打長途電話又冇狂上網 唯有打去PCCW度問過明白 佢話我上個網.... 係...我真係有上過網 但用左都唔夠10分鐘 點解要收我咁多錢 佢話計網路流量.... 我用左2MB...係2MB唔係2GB 佢就收我百幾蚊 真係......我用咁多個台 最仆街都係PCCW..... 又厄錢又古惑又成日扣多我錢仲成日送一個月服務比我 之後第二個月唔聲唔聲咁扣我錢 忍夠了...受夠了 我仆你個街.....我就賠錢毁約...!!! 我就比幾舊你執藥..... 我情願賠都唔用你個台 我仲有叫我身邊既朋友轉台 PCCW..你去死吧 最大間電話公司係你...最仆街都係你 我一向都睇李仆楷唔順眼 抵佢比ICAC查佢個仆街 我真係用到我火都黎 一路開車一路好唔順氣....點解要比你厄錢 我忍埋你呢幾日 我發誓唔會比我身邊既人用你個死人台 㗅...!!!!!!! 我好焗氣呀..... 真係忍唔住要爆粗呀.... **Anyway...我平時唔係咁架，我好少好少好少好少講粗口架...講都係最多仆街呢兩個字** 原諒我今日咁粗口吧大家.... >>March 1, 2010 at 7:04:55 PM GMT+8 2010 年 2 月 27 日 星期六 【晴】 甩難...大解放!! 今日中午時間我地把BB完壁歸趙 待我放工後 BB媽咪請左我地食左餐飯 當係謝謝我們對BB既照顧.. 其實我應該多謝佢 等我可以體驗下有BB在身邊既生活 真係一個很好既經驗 飯後我們真的可以去拍下拖喇 呢幾天真係掛住湊仔 我地咩都冇做過.... 我地去左行沙田市中心果邊 之後... 冇地方去我地就去左東涌 去左東薈城行左一陣 真係一D都唔好行 冇野睇冇野好買 之後我地搭S64去魚翅城行下 傻妹有職員証可以帶我去行下個小小商店街 又去週圍睇下 原來魚翅城係有健身室...!!!! 據說港龍大廈仲有個泳池添 我地去行左兩粒鐘 最後去左裡面個餐廳食自助餐 我真係唔明.... 魚翅又係大公司....死人廢鐵你又係大公司.... 點解你會冇佢地冇好設施比員工享用... 大家都係運輸....你真失敗 唉..... 講返魚翅城 佢D自助餐都OK好食 又唔係貴.... 而且好多靚女睇添...(哈...作反呀...!!!) 食完我地去左客運大樓二 上去8樓睇停機坪的景觀 去到天氣幾清涼 風吹過來真係好舒服 不過...傻妹話凍.... 唔緊要丫 我仲有件褸比你褸住 再凍既我可以抱抱妳嘛 湊左三日仔喇 辛苦左我地三日 比個機會我抱下妳都得掛.... 好彩妳都肯唔嫌棄比我抱下 真的很愛妳呢個可愛既傻妹啊.... 真的很難得你唔嫌棄我呀 如果一張咭片...妳有一個機會的話 妳已經有數十次的機會了 多謝妳肯為我.....而在我面前撕碎掉走 來証明妳的一心一意 我.....都會是一心一意 用此一生來全心全意對妳一個最好 >>February 28, 2010 at 1:40:08 AM GMT+8 2010 年 2 月 26 日 星期五 【炎熱】 湊BB..最終章的感想 BB住埋今晚之後 明天媽咪就會過黎接佢走 在呢幾天我真係體會好多野(其實係撞好多次板先真...) 原來照顧一個BB係咁辛苦(真係認真攞命...) 好似食野咁...餵BB時我地只可一個食野.. 食完換另一個接手湊...到另一個食 所以第時想兩公婆一齊食飯... 我諗頭個九個月都唔使點旨意 好似出街咁.... 推BB車....原來上車都好麻煩(真係感覺到有人覺得你係好麻煩....) 有時仲上唔到車 仲有一定要搭LIFT....用左好多時間等 最攞命係一出街.... 好似個BB走去Camp咁 食既著既玩既換既都一大個大袋都裝唔哂 唔係講笑...袋野真係好重下架... 遇著出到街佢先賴屎....(名副其實Oh....Shit...) 仲要搵地方同佢換(又唔似7仔咁...總有一間響左近) 我亦都係咁大個仔第一次走去商場D育嬰室.... 同女友一齊夾手夾腳換片....(其實我只係負責掉左塊屎片) 在家中又要記時間比佢食野 又要間中比佢飲幾安水.... 出去客廳睇電視唔大聲得 怕嘈醒佢... 半夜無時無刻都要睇下佢D被仔有冇蓋好(最怕係焗親個BB...) 佢半夜喊又要出來抱下佢....安撫下佢 BB怕細菌感染污槽 每次入去房掂佢都要好好地咁洗手(呢個係女友的命令..不可反抗..) 同佢沖涼都係一大挑戰 我真係到而家都唔係好識點托佢個身沖涼(原來BB係幾鐘意玩水...) 其實不止以上 好細微細眼的動作都要好注意 雖然話BB來到我真係冇咩覺可以瞓(真係多得佢唔少呀...) 但又要同自己講.... BB唔想既..唔識既....先會喊.....累到我冇得瞓都唔可以怪佢(你個死仔包丫...我忍你) 湊BB原來比關心女友更加困難 呢幾天我真係可以肯定 女性天生真係有湊仔既本仔(所以母愛係偉大既...) 而男人天生真係對湊仔無能(所以咪得世上只有媽媽好囉..你聽過世上只有爸爸好未丫...??) 呢幾天辛苦女友喇(You are great..!!) 帶住BB時又要照顧下我咁 雖然呢幾天有四五餐都係出街食 但我知妳真係湊仔而分身不暇先會煮唔到飯 睇來第時我們都要請個工人才攪得掂(又要錢......又要列入我的計算範圍) 同埋......妳真係有心理準備轉做地勤(Sorry呀!!) 雖然之前我跨下海口講.....冇問題.....妳生左都可以繼續飛都得 但睇來我太高估自己喇 原來我真係對湊BB係..... 一竅不通...老鼠拉龜...阻手阻腳....四邊不分....無能為力...無可奈何 我真係屎到連開奶都唔曉得諗要用咩水就沖出來...(真係好死蠢我都覺自己...) 嗯..... 妳對我既"作為"...未來有冇D擔心呀??(真心的講我知喎....) >>February 27, 2010 at 3:26:51 AM GMT+8 2010 年 2 月 25 日 星期四 【炎熱】 私生子 真的晚上能瞓一覺好的 個衰仔昨晚竟敢冇咩點喊 所以我倆都唔敢大聲同開燈 怕一嘈醒佢個個都唔使瞓 湊左幾日仔體驗到我耐性係零 真的擔心他日真係我個仔..咁點算? 唔知女人係唔係真係有心機一D 因為我覺得個仔真係好煩 真係最難頂係換屎片 唉.......... 而家真的見到咖哩都冇哂胃口.....應該係反胃先真 點解女人可以同佢抹屁股仔架...?? 還有一天..... 還可以體驗湊仔生活多一天 不過你問我係唔係會討厭BB仔? 咁又唔係喎 佢唔喊唔拉屎尿唔使我餵奶時唔好嘈我瞓覺既時候 我真係好鐘意同佢玩 BB真係好直接 係開心佢會笑.....係不爽的話佢就會喊... 的確有佢可愛之處 今日放工約左女友同BB一齊去行街 無錯....梗係又係推BB車去啦 睇下到時又碰到邊個 睇下有幾多人會以為係我地個仔先 公司班死八公..... 將我有"私生子"一事公告屯門 連D女同事都真係走來問我 咩你真係有個仔架?? 真的吹漲呀 睇下我個樣都知冇咩運架啦.... 如果真係好運 做左人老豆喇.... 點會得閒幫人地湊仔呀... 用下腦啦....你班蠢貨...!!! >>February 26, 2010 at 9:27:45 AM GMT+8
|
|
無事嗎?irene佢而家情況如何