2009 年 10 月 19 日 星期一 【晴】

相處的方法



一個人在家真係好悶，又唔知做咩好!!而我有種嗜好就係去
搭巴士遊車河，每當我一悶、冇野做、唔開心..我都會去坐
車，我真係有上過網睇過巴士公司請唔請人，如果請的話我
就有免費車坐，咁就可以比我任坐巴士馳騁香港，朋友話你
都有免費車坐啦，但我係最憎坐鐵路，除左機場快線之外，
又或者係東鐵頭等，其他路線一律討厭，D座位硬掘掘，又
要打橫坐，站與站之間又短，好快會下一站，你跟本無法坐
得舒服，而且又多人又迫，若果我坐巴士我坐上層，就算下
面迫爆，對我都冇影響，都係坐得一樣咁舒服，加上佢D座坐
起碼係軟既，冷氣又近自己又有得自己開關，呢D....鐵路點會
做得到，所以我有時我寧願比錢都唔坐鐵路，因為我覺得鐵路
唔及巴士優勝，鐵路只係準時同快班次密、保證唔會塞車，咁
訊號故障就另一件事啦，所以我係鐘意坐巴士呢種交通工具，
我記得以前同女友拍拖，我地若果唔知去邊，都係坐巴士遊車
河，一來舒服，女友又可以靠向我肩膊瞓覺，曾幾何時我都覺
得咁係幾浪漫架，試諗下，在夜晚，你如果搭中果班巴士係冇
咩人上，而且仲要唔係冷氣巴士，你可以打開少少窗，等少少
風吹入來，你當然會幫佢披上自己果件風衣比佢，女仔通常怕凍
嘛，跟住女友一邊手挽住你手再伏在你肩膊上，架巴士如果果一
刻仲要響吐露港或者屯門公路沿海行車，大家可以望到夜景，
再手挽手靠著你，嘩!!你真係唔想落車呀，當然啦，要識揀時間
啦，你撞啱放工時間先搭車就真係煞風景啦..!!!而家我呢個女友唔
係咁喜好呢樣野，咁個個人唔同丫，我喜歡唔等於佢都喜歡嘛，
不過正話搭66號線普通巴士時，真係腦海會不斷閃出以前的片段，
但過去的始終係過去，喂....唔怕女友知道唔鐘意嘛??唔怕...，我次
次都係咁向佢講，佢冇可能響我記憶中消失，但我絕對唔會回頭，
我覺得對女友坦承之餘有時都要比D信心佢， 等女友會覺得放心
，知道我做咩，咁會嘈少好多好多交，不是向人說什麼呀，事實
上我同女友真係冇咩點試過嗌交，大家唔睬大家咁，我絕對同意
女友EQ係好高，高到有時我都覺得唔好意思去爭論，好似我上次
我好大聲喝佢咁，因為我果時好火滾嘛，我喝完佢佢都好好聲氣
叫我"算喇.....唔好為呢D事唔開心啦....(下刪百多字)"，當你咁對佢
佢又咁對返你，果刻我的反應係我好似過份左，之後自己就會好
對唔住佢咁，自己會即刻諗點逗返佢笑好呢...??若果件事相反，女
友因你呼喝佢而佢又嬲，又黑口黑面咁，我就會煩上加煩，試問我
已經唔開心喇，仲要我去氹妳開心，好高難度的事呀...!!!!所以我覺
得女友個性格好就好在呢度，佢可以令我主動地去氹返佢，可知道
要一個男人夾硬去唔願意去氹一個女仔係幾艱辛的一件事呀，因為
大家都覺得自己冇錯，點解要我去氹你呀?而女人就係有呢個優勢，
就係我嬲你就要氹我，無論我係啱定錯..總之我嬲你就要氹我，你
唔氹我即係唔愛我..!!!當男人聽到呢句"你唔愛我"就會真係火喇，我
又點樣唔愛你呀...??嗌交.....好多時就係因為咁要開始，一發不可收拾..!!

當然啦男人都要自律一點，有時有D事，女人真係唔鐘意，你就做比
佢睇，佢唔嬲你就唔係女人啦，男人要面子，女人同樣要，當你響佢
班女仔朋友面前，對佢好一D再好一D，令到佢響姊妹裡面個個都話佢
"妳就好啦..有個咁錫你既男朋友...!!"佢唔開心升到上天花板..??當我咁
做果時，女人就會好自然向你班男仔Friend做到自己係一個好千依百順
既女朋友，到時男人一樣會講，"咁咪好囉有個咁好既女人，執到啦..!!"
咁自己又係會開心，呢個絕對係Win Win雙羸局面，咁事情永遠都唔會
係完美既，男女始終都要有一方要忍耐，如果有心同身邊果一半過埋下
半世的話，妳就下我..我又就下妳..又有幾難呢...??我成日都同D朋友講，
當你同佢一齊時，得番你同佢，兩個人要講咩面子丫...???在家中有咩人
會見到你"失面子"丫，你衰極其量都係衰比佢睇，好過響咁多人咁多朋友
前兩個人面阻阻、鬧哂交咁，貪好睇嗎...??到時就真係"失面子"喇...!!!

在家中男人既面子價值係唔高，講到底"面"都唔可以當飯食當錢洗，無謂
為左少少事而傷到大家感情丫，感情好得意，要培養感情要用好耐既時間
，但你要破壞佢，五秒內可以完全將佢毀滅，你要拖到佢手要用好長時間
先得，但講分手兩字，唔使三秒，就可以講到兼實行，分手....值得嗎..??

>>October 20, 2009 at 1:35:35 PM GMT+8

2009 年 10 月 18 日 星期日 【暴雨】

1019@訓練的日子


今日係10月19日，尤其係對我份工作，呢個數字有點特別，
車身編號1019係我第一次自己一個人獨立駕駛既第一部車，
亦都係我第一次一開波就有人響呢架車心臟病發既車，記得
第一次自己報上OCC真係有點口吃，因為驚嘛，手同心都有
點震，放工時，師兄一知道係我發生呢D事，已經話"你腳頭
都幾差喎"，我當然好無奈啦，因為我都唔想架，不過事隔都
一段時間，突發事都不止一次，若果唔係死人塌樓，我諗都
冇咩問題，我都信自己應付得到，話哂唔叫新人喇...!!而家公
司都一路有請人，我當年見工都仲係舊公司，In我前三日打比
我，叫我9:30分去八鄉Depot見工，仲叫我帶計算機去，因為
會有個測驗會考，當時心諗考咩要用計數機呀，我數學最差架
，最後去到考原來係考八達通餘額轉換，我考果時諗，咩駕駛
都要八達通計算架咩，ok..最終都唔係好難，我都識答，之後，
佢就叫我考電腦check我D反應、顏色Check有冇色盲、Check我聽
覺要我判斷高低分貝，總之玩呢個Test真係玩到頭都暈，尤其係
Test我顏色果Part，我真係比個芒D顏色炸到我頭暈，佢仲要閃得
越來越快，又紅又黃又橙又黑又白，總之佢好似要玩到我手腳不
協調為止咁，呢Round Test玩左個半個鐘，出來真係有點想嘔，
勁頭暈，之後佢話8星期內會有通知，不過我只係兩日已經有通知
，叫我Second In，今次去屯門Depot見，入到去房有兩條友坐響
度招呼我，第一題問...自我介紹..用英文.!!!!!!!下....我D係有限公司
喎，英文??即場真係比佢考起，不過最後我都講得出，雖然有點窒
，第二條問題問我對工作有咩認識??下.....??我心諗咪駕車囉，想我
有咩點認識呀??果陣我都唔記得點答，總之我印象中我都係答到九
五搭八，再問第三條問題係如果架車有乘客暈左，而你在駕駛途中
你會點做，我當時答下一站停車，報上公司講情況，報警囉...!!其實
我都唔知答緊咩，最後問我對呢份工有咩要求??嘩....你咁問我，我
果陣諗..我可以有咩要求喎..??唔做想有糧出算唔算要求呀..??但我心諗
如果我話冇要求，佢又可能覺得我冇誠意喎，卒之我口快快答左咁我
做左一段時間，按表現會唔會有晉升機會呀..??講完勁後悔，咁即係問
有冇得升，我未做就問有冇得升，我想死嘛...???心諗...冇喇完喇..!!果
時對方答我，如果表現好當然有啦，我記得仲反問我咁問，你唔會想
知你薪金會有幾多咩...??嘩.....我點敢開口問呀??不過我答我諗大約8500
蚊左右吧，我們呢D中五生響市場上係咁上下人工吧，跟住佢答如果
真係做既話會有10000零唔知幾多起薪...!!!OK....今日個Interview完架喇，
有通知會響一個月內通知.!!!!其實In完都覺得好秒茫，點知佢唔使三日
就通知我叫我上去訓練，一訓練就玩左兩個幾月，呢兩個月又辛苦又緊張
，畢竟第一次控制一部30噸既鐵，最緊張都係第一次出街開車，原來坐
上去係咁高喎，真係好新鮮，而最開心係同班同學一齊訓練，最印象深
係阿Sir要我地試下比對車門夾手，原來真係好痛，用氣壓關門佢會越夾
越實，真係手會痛同紅腫，之後又試下當架車做緊急煞車動作時，叫我
地唔可以扶手，原來真係會企唔穩，會當埸PK跌哂落地，又叫我地用人
力推部車，原來架車咁重，但放哂所有制動，三個男仔就可以推得郁佢
，總之試過我多古靈精怪既野，回想起真係幾開心，而考試當我第一次
跟住阿Sir載客時，真係超級緊張，又怕比阿Sir點錯處又怕夾到人又怕撞
死人，總之怕怕怕....!!!當中最開心係我合格啦，第一次0930響600出我，
人生第一轉車，車身編號1019，505線，車次編號003，雖然沿途車內有
點意外，但都叫順順利利，直到而家，托上天的褔我仲未有過大意外，
希望紀錄可以保持到我唔使做為止啦....!!!


其實做學神時，我都有影過好幾百張相，但因為有好多同學樣，就費時
整出來，早前女友攞左佢份工既畢業相我睇，佢地既畢業真係好似學校
畢業咁，響個Hall度有人影相，一個個走上去攞証書，好似好隆重咁，而
當中我最睇唔過眼係佢班中只得兩個男生，嘩...果兩個男生響果六星期真
係爽死呀，成二十幾個女同學陪住六星期，點解當時我果班冇女同學架??
唔公平呀!!

我同女友出身在不同機構，但同樣都係服務性行業，算係香港的大公司吧
，當我地兩個互相告訴對方，當時我們各自的訓練過程時，我聽她的又會
講得好得意同有趣，同樣地佢都有咁既感覺，到而家女友都係唔信三個人
可以推郁架車!!!唉.....真架，但而家冇可能試到妳睇囉，同樣地我都唔信妳
急救會合格架，妳咁雞手鴨腳，我都懷疑妳會急救牌係唔係買返黎囉......!!!

講笑乍......睇完唔好入來打我呀!!!!

>>October 19, 2009 at 6:02:03 PM GMT+8

2009 年 10 月 17 日 星期六 【炎熱】

一吋之差...



響我地房張Notebook電腦枱上有一支好細既光管，連我
都唔知係咩型號，都唔使講啦，又係經我手整壞，我都
唔知點解，係用到我先至壞，我係唔係真係咁衰手呀??不
過都冇緊要啦，話哂支光管已經用左好左，由我地未一
齊佢自己一人住時已經用緊，可能唔係我黑仔，係事實
佢真係夠期要換吧...!!我好不容易先拆到支光管出來，佢
真係好難拆，大力D又怕佢碎裂，唔大力D又整佢唔出，
麻鬼煩，好喇，到拆到後用拉尺度下佢係幾長，點知屋企
的所謂工具箱，只係得兩支螺絲批同一把電線鉗，再加多
幾粒螺絲、幾卷電線膠布、一個硬膠既鎚仔，真係得咁多
，我完全響度數哂出來....!!據知女友上一次家居小維修係點
辦??原來係叫隔離屋個男人幫手，哈哈......或者女仔真係著
數一點，呢D工作真係有人肯出手幫佢，做男仔真係唔著數
呀...!!!!好......我唯有用軟尺度，一打開睇...軟尺有三條咁多，
啊....原來度身材係咁緊要既!!!要三條咁多，怕唔準備嘛..?!!!
用軟尺一度條管，好似21吋..又好似20吋半咁，但當時我估呢D
光管尺數應該唔會好多選擇，我覺得到時去到問20-21吋的光管
，對方就咁比啱我，點知去到問，原來真係有20同21吋分別
既尺寸，頂......!!!!咁我都唔知買咩好，20定21吋呢...??Two Two
One，二選一，50 ，50，好.......我決定賭20吋果支光管，返到
去一安上去，真係差左每邊半吋，只可以勉強掛到上去，雖
然係著燈，但郁一郁佢又會熄又開咁...!!最後我都係拆佢落黎
，我將整套光管拆出來，之後反轉一望，原來佢背部係有寫
光管係用咩尺寸同型號，我當堂^%#&$($)#&#!$*$%"*%%.....!!

我將兩支比較對一對，我買果一支叫做T4型號，而應安上去果
支係叫T5型號，真係差少少，就真係差少少...佢就唔啱安裝上
去，真係激死我!!!唉....怪都只怪自己唔望清楚就走去買，而家
又要走多一轉，真係自己攞黎...!!!

>>October 18, 2009 at 10:11:08 AM GMT+8

2009 年 10 月 16 日 星期五 【晴】

一年喇



不覺不覺一年喇，上年今日呢個時侯我應該都係
好唔開心，一夜間比人遺下咁，其實我唔白點解
多年的感情會一夜泡湯，是我不符合要求定還是
做得不夠好，無理由丫，從來冇一個人話我對女
友係唔好，就連你當時身邊的好姊妹都話我做得好
好，咁既然我好，我點解要出局...??愛情我都有份付
出，點解要迫我出局，或者妳做得啱既，今時今日的
我都仲係咁，我不能好似你果個咁，咁有條件，我
冇車冇樓，甚至我戶口都窮得冇6位數字，記得識
妳第一天，同妳出街，妳連甚麼叫"名牌"妳都分不開
，是我教妳的，咁是不是我令妳貪慕呢D野呢...???
一直我覺得女仔有一兩件名牌出街係應份，說到尾
女仔都喜歡外觀，著重人地點睇自己，看著妳慢慢
變得不可理喻，少少野都要嬲，買一樣野比妳，妳
用十幾次就唔用，喂...全香港咁多人，撞手袋都好正
常吧，難道男仔開車..在路上見到有人開佢同款車就
要撞死對方..壤著要換車嗎...?的確我真係不能滿足到
妳物質需要，就算我滿足到我都忍唔住妳對我的態度
，我同我妹玩得埋，妳都要嬲我整日，喂....果個係我妹
黎架...!!!怎樣攪都攪不出任何事啦，妳嬲什麼呢...??其
實我自問算係一個好錫自己女朋友的男人，因為我知自己
係咩料，有人問津我已經執到，所以我對自己女友我都
會全心全意，但那一刻當我漸漸感到妳有另一個時，真
的令我失望，那時我才發覺我都有想喊的時侯，我手拿
起電話想找人傾計，果陣夜半時份我只知可以找她，找
到她傾訴..第二天我地已經一齊，我有諗我係唔係好賤格
，昨天去今天來，但妳放手在先，我咁做都不過份吧，其
實我都應該多謝妳，冇妳我唔會同佢一齊，今日女友臨返
工前問我，仲有冇掛住佢..?我答有，但唔係掛住，係記住
，妳不可能在我記憶中消失，受傷的疤痕怎好，只要細心
望都會睇到，妳都係一樣，除非我死左啦，如果唔係我今
世都唔會忘記妳...。早陣子約過妳出來，見妳同佢都十分
開心，或者她才符合妳條件，真心的替妳開心，我不會仇
記著妳，分手後我們都係朋友，現在你過得好，我都過得好
好，呢一年女友未試過向我大發脾氣，雖然佢唔係每一日都
陪著我身邊，但我已經好滿足，我地唔係有錢之但係我地過
得開心，我真的好渴望同女友結婚，我好願意什麼我都比佢
，其實我好簡單，唔需要對方為我做什麼，只要見到女友真
心地微笑，我已經足夠，我不能誇口講我係一個最好的男友，
但我係好肯定會盡力去痛錫自己既女友的男人，今次呢個女
友將會係我今生今世亦都係唯一一個我最既愛人，我係唔會
放手比女友走。因為我知道我再不可能找到更好，還有我一
定會守我的諾言，應承妳的每一我講的承諾，"買我地好鐘意
果一個單位、生兩個我們既仔女"，雖然而家我冇能力做到，
但我一定會勤力多點賺錢返來，實現 我們的未來，妳曾經
講過，只需有一個家，一家四口可以開開心心咁行完今生今
世，已經好足夠， 我定會努力令我呢個老婆快快樂樂。還有...
我永不會介意妳過去的任何事，在我心中妳永都是最美麗最矜
貴，我今生能碰到妳是我最大的幸運，上天對我真係不錯，雖
然我做事往往都頭頭碰著黑，但係我愛情路上真係好幸運，老
人家話上天攞你D野但定會去另一些地方補償，我的幸運就係就

"妳"....

我愛妳....

>>October 16, 2009 at 6:47:43 PM GMT+8

2009 年 10 月 15 日 星期四 【晴】

我對拍拖的看法


明天係新的開始，一切回復正常，女友又要返工，我又要返工，
不可以好似上星期咁，可以成日一齊行街，妳知嘛....有人問我，
唔好開名講邊個喇，佢咁問我.."你同條女一齊住你唔覺得好辛
苦好冇自由咩?你唔覺得好似打多一份工咁咩..??而家約你出去飲
下野都難呀..!使唔使做到咁呀..?其實...我女友跟本冇咩點管我，
我要出去我相信我向女友講聲便可以，但係唔知點解，我有種唔
想掉底佢既心態，我覺得好似掉低佢一個響屋企自生自滅咁，自
己走左去玩，佢就好似家中無無聊聊發呆，其實女友都唔係每天都
在，佢返工一個走左去咁遠已經好慘，返來我又出去玩，我玩都玩
得唔安樂，可能個個女仔都唔同，有D覺得對方出去玩無咩所謂，
但我知我呢一個女友唔係呢類人，佢鐘意有人陪，有人接送，每
一次等女友放工，當佢一出現見到大家見到大家時，她由遠處急
步走過來，她那一個笑容令我會覺得佢都需要我，雖然未至於一
見面要抱住大家，但大家一齊走一邊聽佢發生咩事，我都會覺得
"暖"，好多人都話男人會花心鐘意望女仔及下女仔，咁呢D正常喎
，男人係咁架啦，可能女友知道呢點，佢有時反而叫我主動望下果
個女仔....嘩...係唔係好點點點，一齊評頭品足，咁反而大家有得笑
開心一點，事實我覺得當男人找到一個佢喜歡既女人，佢都係會不
惜一切去愛佢令佢開心，其實我唔知點形容自己對女朋友既心態，
但要大家都開心，我諗遷就同容忍都同樣重要，當自己女友對你所做
既時都容忍你，自己都會好自律自覺，不要去試對方容許極限，人
同人相處..你對我好我對你好，你對我好我對你更好，畢竟呢個人會
同你走埋下半生，大家對大家都好D一齊先會快樂同開心，我愛我女
朋友，既然我決定和她一起走埋下半生，我定會對佢好好，人地話
做朋友有今生冇來世，我諗做夫妻都一樣，今生既然有緣一齊，點解
唔令大家今生都快樂呢...?

我好多時都話我自己做咩事都好黑，但有樣野我係由細到大都估唔到
既係，我竟然可以搵到女朋友，仲係我班Frend裡面最快搵到既一個，
C4中我算係最唔好樣的一個，望望下可能仲有D面目可憎的感覺添，所
以我成日都話比自己知要好好咁珍惜佢，因為我知道我再無可能有第三
次機會搵到女仔既肯同我一齊，One way or the other.....打死都唔會放手，
打死我都唔會比佢走...!

>>October 16, 2009 at 11:59:52 AM GMT+8

2009 年 10 月 14 日 星期三 【晴】

昂貴的興趣


女友還有三天就要返工喇，近來我地經常出街，用
多左好多錢，真係要慳D先得喇!!但係買野係女人既
天性，邊度可以話唔買就唔買丫，今日女友去完診
所後，走左去九龍果邊買左一大堆"輕粘土"、一堆整
粘土既"架餐"、一大盒顏料，買左返屋企響度自己整
裝飾，不得不承認女友係有點天份響呢D手作仔，我回
到家時，只見到有個傻婆埋頭苦幹咁，用把刀拮下拮
下咁，一陣又用手搓下搓下咁，終於玩左幾個鐘，女
友自己做左"幾個餐"出來，女友攞去比我睇，又真係
幾靚幾別緻喎，我覺得女友真係對食物情有獨鍾，連
整粘土都係整食物，雖然好靚，真係好靚，忍不住要
讚佢"好叻呀妳"，之後我問...呢D粘土幾錢呀，原來呢
D粘土、顏料、架餐，合共用左八百幾蚊，女友咁講一
講我真係有點目定口呆，真的可以食既都唔使咁貴喎，
嗯.......不過女友鐘意玩呢D，無所謂啦...!我返工確實唔
可以成日陪住佢，如果女友真係喜歡..有興趣玩呢D野
的話，再貴多一點我都會買比佢，話到尾我都令佢身體
受傷，當買來逗女友開心，我覺得都值得既，只要女友
喜歡、開心，我做到的...我都會做，因為呢個係我對佢
其中一個承諾。但而家我最希望係女友身上唔好留下我
比佢既疤痕，每當我見到佢個傷口，我都會很自然咁內
疚同自責自己，每見一次就會咁諗，雖然我已經向她道
歉很多次，但感覺仍然好實在，我知我應承女友不要再
諗， 但真係好難做到呀..!希望時間會沖淡妳的疤痕同埋
我的既不開心又自責的記憶啦。

>>October 15, 2009 at 1:09:40 PM GMT+8

2009 年 10 月 13 日 星期二 【晴】

我的咖啡進化史......



細個果陣我好憎聞咖啡果陣味道，覺得佢有種好濃烈既
味，而另一個原因係我細個果陣，媽子話咁細個學咩人
飲咖啡丫，飲華田啦..!!所以細個果時唔知自己係唔係自
我催眠得多，不斷同自己講咖啡唔好飲既..!正所謂吃不到
的葡萄是酸的嘛，卒之整下整下令到自己到中一先去飲第
一杯咖啡，仲要.....背住媽子飲，諗返起都十分低能呀..哈哈
試諗下一個讀到中一先開齋飲咖啡第一杯喎，係唔係講都
冇人信呢!!但呢個真係事實，

到開始大過D，出去做野時，果時我已經識叫咖啡，但係咩
咖啡都會放入口，總之覺得苦既都算係咖啡，好飲同唔好飲
我完全唔識分辨，而我有一年做暑期工時，我跟果個師傅每
日都飲一杯黑啡，響佢既感染之下，我又試下飲，嘩...又苦
又酸，勁難飲，但係的確有提神作用，所以我都照飲也，飲下
飲下又好似習慣左，但由於係茶餐廳黑啡，D咖啡粉質素好
極有限，而當時自己又未飲過真正靚既咖啡，所以在我心中
，一杯正常既黑啡應該係又苦...苦中帶酸先係，而我飲黑啡
既日子足足維持左半年有多，又唔知咩時候就冇再飲喇....!!!!

到個人又大少少，有一日同朋友上左山頂廣場行逛，行到倦
喇就去左間比較靚既餐室飲杯野，當日...我係點左一杯黑啡，
而當杯黑啡一來到時，咖啡味好唔同，我真係感覺咩叫咖啡
既香味，飲入口...奇怪喇，點解會苦得來唔係帶酸既....???但
飲左第一啖我已經忍唔住再飲埋落去，果一日我先知，黑啡
原來係咁既味...!!!

唔知係唔係飲得咖啡多，自己又鐘意食?野，而家攪到成日都
胃痛，所以以前個女友都唔比我飲黑啡，當時個女友向來又鐘
意甜食同奶味，我同佢一齊，自自然然都跟佢飲埋D正常既咖啡
，即係又多甜多奶果種，而我因為唔係太鐘意甜味，所以我只會
落少少煉奶飲，同佢一齊果陣，我地第一次去走去飲咖啡既地方係
Pacific Coffee，果時第一次覺得有冇攪錯，一杯咖啡成30幾蚊...!!
搶錢咩..!!但果陣拍拖時又點可以話貴唔去丫，入去出返來好樣衰嘛...
，不過更令我想走人既係......原來黎親叫咖啡既客，佢地全部用英
文定唔知咩文叫，總之就唔係廣東話，我記得我第一次去係用中文
叫........我果時係特登等到冇人比錢先去拿拿聲買，而家諗起都覺得
好樣衰，好似人鄉里出省咁，"唔該比杯焦糖咖啡...凍既..大杯同埋
一杯熱泡沫咖啡要多D奶..."我完全徹底地將茶餐廳文化帶入呢一間
又一城既Pacific Coffee.....，不過點都好啦...我就係咁，就第一次坐梳
化嘆咖啡，果時先覺得，原來飲咖啡都係一種享受，之後既日子我
地都Keep住去呢D地方坐，一來舒服二來可以磨時間...，另外我發誓
下次叫咖啡果陣我要講英文，所以開頭我只係識飲Cappuccino同埋果
杯Latte.....，真係飲到我把口都好Cappuccino...成口都係泡泡!!!

而後來我地都好多時去呢D地方拍拖，而果陣仲發現Starbucks個環境
更好，D咖啡更加好飲，當然啦..都係果兩杯走天涯，但有一日女友
話想飲其他，下....!!!!我發誓唔講中文喎，好彩當日我唔係發毒誓，如
果唔係我就.....!!!之後日子，我都唔理喇....講中文咪中文囉，講中文唔
得咩...??呢度香港黎架..!!

直到有一日，我碰到呢個女友，我地當日都係去Starbucks飲咖啡聚舊
，但當時Starbucks好多人，冇位坐，我地只好手?走出去飲，當日係
佢請我飲，我話比佢知飲咩，之後佢去比錢，佢就用一大堆我都唔知
佢講咩既語言，佢講得好順口好快好自然，總之..佢同收銀講左一大堆
說話，而出來果杯都係我想飲既咖啡啦......!!我果刻就知..我可以擺脫唔講
中文喇，我地第一次係響葵芳新都會飲，由於冇位，我地出左來噴水池
果邊石級度坐，一邊傾一邊飲，我當然冇放過要叫教我全部咖啡名稱既
叫法啦，原來當中有D唔係英文，係意大利文，所以有D字都係古古怪怪
，就連大細中杯都有另一種叫法，講真...我真係學左好耐，我先記得全
部名點叫，而想加泡加奶加焦糖都有叫法，我真係用左好一段時間先至
學識講....!!!記得所有....!!

自此.....因多得女友指導，我而家可以好順口講得出我想賣既咖啡，要加咩
少咩都可以講得到，其實我都唔明白點解自己要用外語講，跟本用廣東話
佢都會照單全收，但有時當你身邊所有陌生人都用外語叫時，自己用廣東
話叫又好似有點兒那個，話哂呢度都係咖啡室唔係茶餐廳，咁咪當入鄉隨
俗囉，咁其實學識多一D野都冇壞丫，我覺得..!!!!

哈哈...我講得自己有點品味咖啡個節目咁，響度係咁講咖啡，不過我同佢唔同
，佢講係講佢點嘆咖啡。而我講既係，我由細個到今時今日的我，飲咖啡既
歷程，而家我覺得咖啡係好香好好聞，唔再係細個果陣覺得惡頂既果種濃烈
味道。不過而家對茶餐廳咖啡有點抗拒，但奶茶茶餐廳的確係好飲過其他地方。
嗯...我打篇文章打到手都軟哂，係時候飲杯咖啡喇，而家我家中既咖啡係
蒸餾既，要等一段短時間先可以飲，為免我會打爛個玻璃咖啡壺關係，女友
都怕左我，唔使我整黎飲，每次女友都係咁講﹕"得得得......!!!我沖比你，你
唔好攪"..........因為打爛呢個咖啡壺係冇得配返個原裝!!所以我都識做咁講一句
"唔該".......仲有唔好咁甜呀..!!

>>October 14, 2009 at 12:47:08 PM GMT+8

2009 年 10 月 12 日 星期一 【炎熱】

真係笑話



今日同我同事出去食飯，約左去尖沙咀等，由於鄙人
係無車階級，所以我個同事一早到左，好明顯我同事
係一個有車階級之人，有錢多米也。鑑於我遲到佢早
到既關係，佢一早已經泊好架車響街邊，當然佢泊車
既地方係唔停得車架啦，純粹貪方便。泊好一落車，
佢行開左一邊煲煙，一路煲，一路煲....煲到佢見到有
個著制服既人出現，當時我同事估大概係出來抄牌的
吧，但人在車旁，通常阿Sir都會叫"拿拿聲開走佢喇"
，所以我同事都好淡定，一直煲到阿Sir差不多到佢部
車時佢先掉左煙頭落地，行上去同阿Sir講，得喇得架
喇......我而家即刻開走架喇....Sorry Sorry!!點知....阿Sir話﹕
我係食物環境衛生署職員，而家票控你"隨地掉煙頭"，
我同事都想兜話...我跌左乍，但阿Sir立即話﹕但我冇
見到你意圖會執喎!!!就係咁...比人罰左千五，仲貴過牛
肉乾，冇幾耐我先來到會合佢，見佢面??咁，就問佢
咩事，佢就講番個過程我知，由於受害人唔係我，我只
係覺得好好笑，有咩理由連制服都認錯架..?之但係佢係
受害人關係，由佢口講個過程一D都冇笑過，仲好激氣，
但我又唔想響佢面前笑佢，但事實上又真係好好笑，我
又要扮得好同情佢咁，其實我心中已經笑到我死下死下，
不過我同事似乎唔自在1500蚊，立即去銀行交左罰款，
有米真係唔同D，如果比著我咁比人罰千五，我真係情
願你殺左我。回到家我講返比女友知呢件事，女友都笑
到半死同轆地，結論都係同我一樣，有咩可能咁都會認
得錯架...??真係懵到上頭殼頂呀!!!女友還加多一句，唔食
煙咪冇事囉!!食煙既...都係抵死架喇，女友似乎真係好不
妥D煙民，難怪女友既..!!!

>>October 13, 2009 at 3:45:11 PM GMT+8

2009 年 10 月 11 日 星期日 【炎熱】

體力透支


今日去買左電腦既一D輔助配件，就係風扇，因為部電腦
Run得耐得滯真係可以熱到攞黎煎蛋，好多時我都會開通
頂，原因係我好多時都要Download野，之前我就係咁，開
過夜後部機張VGA熱到令部機熄左，Check左核心溫度竟然
高到差不多80度，所以買電腦用既風扇的確係刻不容緩，如
果唔係一陣熱到咩都燒壞哂真係喊都無謂，其實自己已經盡
量配合，例如調較電腦時間制同Set FTP，等佢響一個定時自
己開機同熄機，其實我有時諗，我到底要整咩成日都開通頂
，一日到黑都係下載下載，浪費電又佔用硬碟空間，部機本
來係女友自用，開初係好輕身，我一入來加呢樣果樣，部機
而家重到女友都搬唔起咁滯..誇張吧....!!!

講起今日返工真係有D唔習慣，萬般不願咁起身，在腦中有一
刹那閃過"我不如詐病吧"，但始終都冇做到，點講都好，人
始終要返工既，響放假呢段日子裡，有試過放假放到今日唔
知星期幾，真係離譜。而今日係女友第一次自己去診所洗傷口
，問到女友仲痛唔痛，佢已經話唔痛喇，仲向我講笑咁講，希
望新生D皮膚會比之前更白更好啦..!!唉......我都唔知話妳豁達好
丫定係樂觀好，但點都好....無事就最好，無疤痕就更好啦。

放工，女友坐我尾轉車，一齊響屯門落地，天氣亦開始涼，我
都唔怕著住制服同女友行街買野，咁當然啦，一件風衣遮住我
上身係唔少得，我地沿西鐵搭落去，去到柯士甸站，去行下圓
方，之後又上返車去旺角東行新世紀，再沿東鐵搭落去沙田市
中心又行，再之後去埋上水廣場行埋兼食飯，再由上水搭巴士
返屯門，回到家我已經倦到攤直，而家再費精神打埋呢篇野，
身心體力完全透支，服左女友返到去仲可以有精神試今日買既
野，唔通女人真係買野試衫係可以增加自己精神同體力嗎??妳
係咩構造架?妳......妳係唔係火星人黎架??!!

>>October 12, 2009 at 5:03:53 PM GMT+8

2009 年 10 月 10 日 星期六 【炎熱】

電話推銷


今日冇點出過街，只係響屋企出面D廣場行下逛下咁，
冇咩特別亦都冇咩野可以買，不過今日女友就破格陪
去左機鋪玩，又玩賽車、大富翁、督下手指、玩下槍
Game、射下籃球等等，足足玩左成粒鐘，玩左成百幾
蚊，尤其係大富翁又唔識玩，係咁燒錢，一唱就唱50
蚊代幣咁玩，玩左兩轉，好了...風吹雞蛋穀..財散人安
樂，兩個傻的咁從機鋪走出來(我地呀)，雖然燒錢燒得
快D....但我地都叫玩得開心丫，值得既...!!

回到家後，各有各做自己事，女友在客廳包緊餃子，準
備今晚果餐，而我就去左洗手間開小又開大....!!!我辦緊
大工時，突然手提響起，來電顯示都唔知乜水，是但啦，
反正有時間又有分鐘，照聽可也......，原來係推銷借貸既
電話，以下係我記得既對話......


對方﹕我地係唔知咩借貸公司呀...閣下有冇財政問題呢?

我﹕冇呀

對方﹕咭數呢....

我﹕冇欠呀.....

對方﹕咁有冇需要借貸呀..?

我﹕我一身街數啦...，你有好方法幫我嗎...??

對方﹕我地有個計劃係特低利息架......之後係咁介紹.............

我﹕咁即係平幾多先...???如果我借兩萬要還幾多.....

對方﹕咁大約係唔知幾多厘息(我唔記得)

我﹕嘩...咁都叫低..我已經冇錢好窮喇，老婆仔女都養唔起呀....!!

對方﹕其實我地仲有每月還息....息口比任何銀行都低呀....

我﹕咁即係點呀..?

對方﹕一係你借多D，我地比你個優惠息率會仲底.....好抵架...

我﹕咁係唔係即係借得越多平得越多呀...?

對方﹕可以咁講啦....還款期仲有得傾....

我﹕咁呀...好啦，咁閣下意思係我借一萬還八千嗎...??

對方﹕唔係唔係(有點大聲喇).....即係你借得多還個利息會更低

我﹕車......咁同銀行差不多啦，而且你都唔係第一間咁推銷我，其他公司比你更低喎

對方﹕(無奈又開始激氣)咁係邊間呀...?仲有仲低既息口...??

我﹕係呀....，有間比你更加低呀......人地借得多優惠仲多啦，仲話可以點點點.......................下刪2000字

對方﹕咁其實我地公司都好抵架，只係幾多幾多(又重覆之前的數字)

我﹕我知我知.....你到好抵嘛，但人地果間仲抵喎......

對方﹕(開始激氣)咁到底係邊間......佢地點優惠法...???

我﹕人地呀....借五萬還四萬....仲送埋機票去歐洲包食宿七日又有抽獎，中獎後唔使還錢.........

對方﹕#$%^&%@@#$@$*%#%**&(大力CUT線)



其實我同佢玩左成10幾分鐘，內容唔止咁少，但我真係唔記得咁多
，只係記得大約係咁，而我講緊同時.....女友在客廳中不斷大笑......
一直咁笑到我收線出來，其實有時呢D電話話煩，如果自己有時間
真係可以玩返佢，佢咁唔好彩撞正我得閒冇野做，算你個人黑仔吧....!!

其實我自己要果刻忍笑都好辛苦架...!!!

>>October 11, 2009 at 3:29:01 PM GMT+8