2009 年 7 月 27 日 星期一 【晴】

發高燒



近年香港氣候都不太好，唔係太凍就太熱，已經冇左早廿年前
天氣變化既緩衝區，往往一下子會好極端，像早幾天咁，十幾
個鐘前仲係九號風球，十個鐘後又會突然變得熱屎辣辣，環保
份子話世人不保護大自然先會咁，但有幾多個會跟住做『25.5
度』丫，起碼我唔會，冰封三尺非一日之寒，我一個人環保都
唔夠地球用多半秒鐘，更何況今時今日呢D天氣，你夠膽開25.5
度的話，除非你嫌命長，否則開果個一定有病，我諗好多大機構
都會有指引，話要開25.5呢個溫度，但從來冇公司會硬性規定要
開，因為大家都知...呢個係香港跟本冇可能做到，環保份子，即
係好似當年清世祖時民間既反清覆明聲音，氣勢單薄..未成氣候...
不過...我都唔係冇試過跟住做既，我亦都試過身先士卒做，最後
係比人拍門...喂.....好熱呀..焗死喇咁....，咁我可以點....!!難道堅持
找死嗎要自己...??要實行非易事啊..!!!

不過...一熱一冷又一冷一熱咁進出呢個環境，真係好鬼易病，身
子弱的人真係一野就可以冷親，今日女友出門口返工還好地地的
，不過佢烈日下等車，上左一架冷氣巴一句鐘有多，落車又熱過
，再返公司又過多次冷河後，以佢咁既體質前後唔使三個鐘，就
即刻病，她還好，可以在離開前找到另一人替佢返工，如果過多半
過鐘，就真係全村人等佢一個人而冇得走，雖然她返工有完滿解決，
但女友打比我時話唔舒服，唔想郁，那是在電話中還可聽到她聲線
，誰知我去到公司搵佢，再打比佢響邊，佢已經沙哂聲喉嚨痛，話
都唔多講到，到我搵到佢時，佢係坐住長椅挨向落地玻璃窗度恰著
，我第一下輕拍佢冇反應，似睡著了咁，到我想拉回她身體等佢唔
好恰得咁冇儀態啦，摸上手先覺佢成身熱到滾，再摸下額頭已經感
到一定不會低燒，其實有點不知所措，佢又唔多清醒咁，我又唔知
應該係扶佢行，背住佢行(咁佢同我都好樣衰喎...前途盡毀啦咁...)，
但的的確確佢又全身又熱又軟，一時三刻都唔知點的走佢....，有諗過
Call白車，但佢公司喎，咪會好多人知，又好似行唔通喎，最後去汽
水機買左支凍水比佢，濕D凍水比佢額頭降下溫先，雖然不時有人問
使唔使幫手，但我都話唔使，No..thanks.."It's OK(呢句係應鬼佬既)
，就係咁先慘.....到女友好一點點，識稍為用力，咁諗住可以扶佢去
的士站(豪一次啦..要300幾蚊呀)，點知我高估左自己，扶到個人又攞
唔到佢跟身兩大件家當，攪到我不知幾狼狽，經一番折騰後，總算
上到的士，去到女友平日的診所睇醫生，一去到探耳仔就探到40.1度
，兩隻耳都係一樣，最後再用水銀針探口多一次，仲衰..40.3度，即係
接近105度，醫生立即比女友睇先，但診斷過醫生認為去醫院比較好，
立即寫紙去醫院，可能係高燒關係，又係好快有醫生見，但醫生認為
不是現在流行的豬流感，但都要留響觀察病房觀察，唔比走住，一留
就留左大半天，而我就陪足佢全程，幸好有同事肯同我調更期，如果
唔係要立即返工，我一定冇精神，雖然女友燒未退好，但已經降低左
好多，醫生都唔主張留院，因為醫院多病菌，最後都比藥我地走，出
醫院門口，又係搭的士返去，安頓所有野，我只係得返六個鐘訓，把握
時間，我訓左一覺，精神好一點先返工，臨出門口摸摸女友額頭，都大
概退燒，不枉響醫院又打針食藥咁辛苦，有好轉了。

返工回家又睇一睇女友，已經好左好多，我都放心真的好好去訓，安樂
醒後，而家先有時間打呢段文章，懶人病發作，兩日當作一天咁打，另
外我原本要回幾個email....，但響度講都一樣，有關入識考試，的確係要
用計算機考筆試，然後有一段英文讀出來要你，之後仲有人會問你突發事
情處理，大致上係咁，有問題可以找我........祝大家好運喇

>>July 28, 2009 at 4:06:01 PM GMT+8

2009 年 7 月 25 日 星期六 【酷熱】

未來四代目


今日返到去公司總部，見到有本新書及通告，大約都
係講會有一批新車返來，而我都睇過個樣，如果呢D係
祖國製的話，都算係咁，但個人其實唔係咁鐘意國貨，
硬係覺得佢唔安全兼唔實淨，豆腐渣一撞會散，看來
有點歧視國貨，難怪我呀，之前我買親祖國用既貨品，
都會自自然然好快佢就自己暴斃，好喜歡自絶於自己咁
，攪到我而家有得揀都唔買"覓現差拿"既野，不過我又
唔係話一棍打死全船人既，國貨亦都有好用既物品，佢
就係我由幼稚園到中學都用既"中華牌鉛筆"喇，當年呢，
學校係唔比學生用鉛芯筆，總之冇支中華牌響手，老師
就唔覺得你係讀書架喇，發癲起上黎，老師真係可以就
因為你冇帶祖國鉛筆而罰你，可知道早十幾年，老師既
地位可係高高在上呀，老師可以用文具打手又扭下你耳
仔咁，唉....當時小學生的我都有比老師打手板，嘩.....諗
起都痛呀，佢唔係一把間尺打喎，係問同學收集間尺，集
齊咁多把喇先郁手打你，唉.....響以前邊有得又投訴又告個
老師丫，而且當年既氣氛，係阿媽都鐘意老師幫手教仔....
回到家話比阿媽知.....只會衰多兩錢重，同埸加句"抵死"
，不過......而家時移世易，我呢D而家只可以當說話一笑而
之，可知道而家D細路幾咁身驕肉貴丫.......!!!哈哈....點解
講講下會講左咁遠架，原諒鄙人突然感慨回憶吧.......!!!

其實我今日係想話，D新既列車，都算係靚，有三代目列車影
子，不過好樣冇用，好唔好開先緊要，如果佢留底埋三代目
列車果種難駕血統，唉.......將來駕上手又係棧攪，又係搵自己笨
，咁真係唔要好過要喇....!!!

>>July 26, 2009 at 6:24:59 PM GMT+8

2009 年 7 月 24 日 星期五 【炎熱】

胃氣脹



今日唔知點解個胃脹下脹下咁，好似好多胃氣侷住，
好鬼死辛苦，返工時要比平時用多好多技術，因為
若果自己開得唔好，我驚我會嘔，而事實上我已經
有作嘔感覺，這一刻..我覺得自己好似頭D主角咁，
開車要唔比水濺出來，而今日就有我，而醒定駕好
D，如果唔係會嘔出來，最後都頂到總站，拿拿聲走
去7-11買盒胃藥，頂住當先，不過都好好彩，最尾我
都冇嘔，仲不時由個口放返D胃氣出來，每放一次，就
會舒服一點，一直捱到放工，上天算對我不太差了，如
果嘔壞左部車，我賣命賣血兼賣埋肉都賠唔起呢......!!!

女友今日要返工，時間就不到，所以都唔可以陪佢一齊
去，我諗女友唔會嬲掛，不過..我真係近呢幾次都冇陪佢
返去喇，希望下期D更期會好一點啦，其實可以陪到女友
，我都不介意返尾班果個，反正我都習慣了，還有什麼
好擔心返得唔好放得唔多丫.....!!

>>July 25, 2009 at 7:36:17 PM GMT+8

2009 年 7 月 23 日 星期四 【酷熱】

失敗的書展2009


今日有同事問我去唔去書展，比著早幾年我都會二話不說
話去....當然去啦，因為果度有好多出面買唔到，而且仲有
齊咁多出版商，要搵書唔使東奔西跑，還有度好，佢仲會
有一個幾好既折扣，就算冇折扣都會比平日便宜點點，兒
時，我諗大概小三小四左右啦，記得第一次書展係我阿媽
子同我一齊去既，當年買左三本書一個係香港百年歷史見証、
香港老花鏡、一本92年版本地圖...哈哈，本地圖而家仲響度
呀，而當年比我感覺，書展係"好神聖不可侵犯"既，感覺係入
左去一個莊嚴的圖書館,咁，要靜既，之後每年我差不多都有去
，其實書展一向都改變中，到我讀中學時開始有點不同，開始
又賣下其他野咁，例如文具書券等等......，但感覺尚算可以的，
那時果處都還有點書卷氣味，但係今年太過離譜喇，我覺得唔
係一個書展，只係一個欠缺cosplay既漫畫展，我未去只係睇電
視見到班賣弄性感的女子，唉......不是佢醜樣，無可否認個個都有
美少女既潛質，我講只限佢地化左妝時啦，但會唔會去錯地方
呢??呢度係買書，你果本叫寫真，係純圖片，字都唔多個五十
隻，okok...你地話呢D叫健康的性感，那妳就咁著出去行兩轉
老廟砵蘭睇下，睇下有冇人會欣賞妳所謂健康的性感，相反叫
返老廟砵蘭D姐姐仔去書展度，比人品評下果D又係唔係健康的
性感吧!!!其實呢班人只係想搵快錢，著到自己咁而去書展侷銷量
，而香港班宅男咩男乜男就瘋癲咁用幾百蚊買妳本書，咁當然啦
一個願打一個都要願捱先可以的，攪到個書展買正正經經既書果
D就冷清，而果度圍住班人叫囂簽名又影相，書展立即變成失意
義的活動.......!!在我心中2009書展係絶對失敗既.....。其實，香港
係國際大都會，事實上不可以抹殺別人任可生意商機，但是不是
去錯地方呢...??何不將佢地分開分別咁攪呢..??會展其實好大地方
丫，分開遠一點地方不是會更好嗎..??今年..我去唔去書展...??我當
然去啦，其實如果唔係有本書要在書展先有得買的話，我今年真
係諗住唔去，不過.....若左為左班唔知咩模..而錯過今年，我心中又
唔想，畢竟當中還有好多正正經經的書商開展，所以我都最後應承
我同事去，但聲明...我絶無興趣睇同買呢班"o靚模"既野.....!!!

>>July 24, 2009 at 6:15:58 PM GMT+8

2009 年 7 月 22 日 星期三 【清涼】

結果...


收到上個月考試成績喇，哈哈哈...唉....!!!!!!
呢個世界點會有公平丫...同學們...!!!!!
但能指日可待之事，我現在又不想做喇....
自己想點...不知道，只知我最怕係悶......
皇帝式的工作...嗯!!!我還比較喜歡

『安於現狀』

還有...我開始好討厭呢個blog....雖然唔使比錢用，
但係五日唔埋就上唔到，我幾好脾氣都假啦....
其實我有點喜歡yahoo果款blog，起碼留言都有得
保密丫，我真係怕又再殺個人出來問...

你係唔係邊個邊個呀....

咁要我點答呢...?

若要秋後算帳，我怎麼辦，香港難撈呀，我唔想
臨老先去搵工....!!如果係咁....乾脆搵刀劈死我吧...!!

>>July 23, 2009 at 7:48:57 PM GMT+8

2009 年 7 月 21 日 星期二 【酷熱】

有血有肉的刻骨教訓



暫時在人生階段中，我已體驗過朋友過身，失去朋友
固然感到唔開心，嘆息人生這麼唏噓，這麼脆弱...!!!!
但呢D事情還不止一次，今日我先聽到，我一個唔係太
相熟的朋友，佢撞左車，佢自己就輕傷同短暫失憶，但
坐在佢身邊的朋友就冇咁幸運了，送院途中已經冇得救
，曾幾何時我都坐過佢手車 ，真係好危險，響一D短街
窄巷都開得好快，佢曾經仲話自己試過開到二百三十幾，
響吐露港公路.!!吐露港公路的確係條好長好直的路，如果
想爽手一點都會不自覺地超速，因為我都試過，但我只係
開到百四已經覺得好快，已經立即收油減慢車速，而佢當
然炫耀自己手車有幾勁啦，我曾經話過佢，總有一日你會
撞車，只係睇你係撞大單野定細單野，不幸地今次開大，攪
出人命，害死人一世會安樂嗎...??

今日見到佢，明顯係好冇心機，心事重重咁，平日的他一埋
位就講"車經"，今日佢好少出聲，判若兩人咁，作為朋友我
點都會慰問下佢有冇事，過去的算吧，回不到頭的，下次唔好
重滔覆徹就可以喇，只見他無奈地點頭細語講，"有心了，我
會喇..."，氣氛頓時變得很差，其他朋友為了打破薑局，只好笑
說其他話題，但對於他來說，很難平復吧，即使事情已過了一
段時間，但大家知道，發生左就係發生左，改變不了......!!

吃完飯，大家回去時，他突然捉住我講，"真的比你批中，我
緦會撞車的事實"，其實我冇諗到佢會記得我曾經忠告他，他
說和我說的一樣，撞完車..人係無反應的，明白我當日點解用
"震撼"形容，一個不是開玩笑旳震撼，我話，其實我自己當天
只係好彩，我就只係車有事，所有人冇事，我得到無損人命的
教訓，而你受到的是有血的教訓，從他口中，我知佢想話佢好
後悔，當日將我的事當作笑話故事聽，現在他面到危險駕駛引
致他人死亡罪之外，還要承受對方家人的壓力，本好地地一個
人，因你而發生意外，對方家人對他萬般怨恨，自己良心又不
好過，車已毀又害人亡，他問我怎樣解決....!!!其實我都唔知點解決
，一切都塵埃落定，已成定局，若我係當時人，我都不知怎算..!!!

一個有血有淚的事實放在我眼前，警告我唔可以開快車，我上次
仲響大嶼山公路開咁快添，我諗我以後都唔敢超速喇，返工更加
不用說啦，寧遲都莫貪快，我要好好記住....

>>July 22, 2009 at 3:19:32 PM GMT+8

2009 年 7 月 20 日 星期一 【酷熱】

現今社會人


今日同Philip傾開大家自從出來社會工作後，仲有冇
識到其他傾得埋，講得心既真朋友，誰知大家都話..
冇，我們都一致認同，只有在求學時期人先會冇咩機
心，唔會算你唔會計你，就算大家有唔妥，都會好快
冇事，而且由細開始培養友情，呢份真友情得來不易
呢...!!!現今呢個社會做事，想每事都好做一點的話，處
事都要圓滑一點，唔可以亂講得罪人，做人處世方面都
要臉臉拘圓，難聽D叫見人講人話，見鬼講鬼話，唉....
在社會要吃得開真係很假呀!!有時大家有過節時，當面
對面碰面又要扮冇事咁，最慘就係在旁D朋友，不知我
倆可能已經何等惡劣，還要拉埋我地一齊食飯出街咁，
是我的朋友太單純嗎..??其實現今社會，叫得閒約食飯
，呢句說話..唔算得上係約會，極其量只係打個招呼....，
是朋友太天真未能洞察世情吧，其實現今D人多數都係飲
食男女..只不過係沉醉一夕風流...，當然啦.....現在還要留
意身邊的人，人心的確難測，但世道更加難測，在公司做
人做事都一定要觀人入微啦，謀人之心唔可以有，但防人
之心唔可以無，咁工作上先會運籌帷幄，做事先會順利，
我覺得自己工作上都冇咩阻礙暫時.....打聽下都冇人對我不
滿起碼，老總都對我滿意，咁我都覺得滿足架喇...!!有人問
我會想升嘛...?諗下就會，唉...才不勝不可居其位..職不稱不
可食其祿，中學時中文Miss都有教啦.........，其實安於現狀，
到上到我地呢批人自然就會上啦，又何需要靠其他事上位呢...??
對上一次我比人"質"左食死貓，飽足足一星期，氣才消呢，
同事和同事又有咩需要被你利用呢??好喇...比左死貓我食又如何
呢你??現在咪又係同我做緊同一樣野吧，所以而家想在工作崗位
中找好好既朋友，唔係冇可能，我諗比大海撈針更難吧....

>>July 21, 2009 at 5:53:18 PM GMT+8

2009 年 7 月 19 日 星期日 【酷熱】

過去...現在....


好眼瞓....返工時好想瞓，但放左工又唔想瞓
，真係攞命，今日返工跟住個新人尾，其實
我都冇咩點，有誰未做過新仔丫，我果陣都唔
想比人話阻住地球轉，但係今次呢個真係離哂
譜，行佢埋D都死，我不敢想像車內既乘客會變
成點，但憑肉眼可以見到架車時快時慢又落重迫
力，我替乘客可憐呀，諗緊會唔會係女仔控制呢
?但係圍內班女車手都OK架喎，就連最嬌滴滴果個
都開得好好，呢個年頭不可以小觀女孩子呢....!!!到
站落地開估，原來係打壞書生型，唉....讀到大學畢業
有誰會願意幫公司做司機丫，所以耐唔中就會出一個
呢D同事，睇住黎啦....個市一好一點佢即刻跳槽，信
不信由你啦，公司長期缺人，人流失得好快，但係佢
又要請D學歷高既人，試問我學歷高又點會甘心做你呢
份工喎，到Tran完佢..佢做唔夠一年又走，找呢D人咪多
餘囉，何不找D學歷低一點，反而呢一批人會知道自己
走不得，而呢一批人先係幫公司做野架嘛，不敢講太多
了，一陣比人又秋後算帳喇，見過鬼都怕黑喇......，而家
比之前公司黑暗左好多喇......睇怕自己都要醒醒定定喇

>>July 20, 2009 at 4:49:47 PM GMT+8

2009 年 7 月 18 日 星期六 【微雨】

寄失信與靠誠信



今日先聽媽子話，收到我D銀行信，咁同平時一樣，
一封封拆來睇，通常我都會有次序咁拆，首先係匯
豐之後係恒生再落係渣打..大新...最後係永隆，而基
本上永隆我就走馬看花咁睇，因為我連佢張信用卡都
未開，所以如無意外係唔會扣錢，相反...我反而會留意
佢有冇扣多我錢，因為我有八十幾蚊Cr響度....，但係我
不能不承認我係唔會記得有咩銀行信要收甚至我刷左咩
咭我都唔會有咩印象，一切都係要等信來先清楚，上個
月....恒生寄失我一封信，一封提我交款的信，好了..到今
日我又收到一封恒生今個月的信，今次要罰我利息，其實
唔係多，三百幾蚊，但係我唔順係我冇收信佢就罰息，如果
我之前收到信而我冇交...是我問題，之前我都試過，是自己
唔記得，我願意比錢，但今次罰十蚊都係錢，我唔順氣....，
之後我打去Card Center理論，以先小人後君子既方式講，因
為我都相信好多人想避息..而亂屈銀行寄失信，我亦都打定
輸數，預左比錢，打去都係想搏下有冇得週旋餘地，咁發咭
中心講左唔夠五分鐘唔夠，佢就肯免我罰息，對方話我記錄
一向良好，所以相信真係寄失.......。估唔到咁快可以攪掂件事
，慳返三百幾蚊....開心哂....!!

好彩我平日銀行真係好準時入數比錢，唔拖數..如果唔係今次都
唔會咁順利，不過我諗我都要Mark底自己交錢截數時間日子，如
果下次又寄失....就算真...銀行都唔會信，響香港同銀行打交道，
信譽真係好重要，正所謂有借有還再借不難嘛....

>>July 19, 2009 at 7:09:23 PM GMT+8

2009 年 7 月 17 日 星期五 【驟雨】

娘家營救緊急事故



今日個癲婆一放工，回家一換過衫，就和我同埋佢個朋友加個拖友，
去左會展睇婚紗展，我話打風喎，仲去睇...?女友話...三號風吧，趁
出面冇左個大大既太陽響度，陪大家一齊去吧，我看看天氣..又係既
天陰陰咁，而且個風都唔會咁快殺埋身啦，就係咁我就同女友一齊去
喇，大家約在灣仔港鐵站等，人齊喇..出發..未到會展已經比好多婚紗
既Sales係咁推銷自己間影得幾平幾靚幾好，終於忍不住，我地決定用
男同男一齊行，女同女有一班自己行，果然沿途就冇咩人推銷我地喇，
係女仕們間中都會比其他人推銷，但都已經比先前少好多，去到會展，
大家走返埋自己另一半度，結果又比人Sales過，但今次Sale得有價值
，因為佢地推銷我地又去佢會攤位度，而就係咁大家避過左買入埸票，
大家都慳左十幾蚊，咁過橋抽板就梗啦，難到你比我地免費入埸就要幫
襯你嘛....呢個話.係其中一個女仕講既.......夠無賴喇...!!!

其實佢地已經有心目中既婚紗相店，所以我地都係去旁聽，但係果D相
真係靚到，有衝動我地又影吧，去台北影..又影又玩，多麼爽呢...而且個
價錢真係好吸引，唔使一萬已經包起好多野，在香港攪...冇三四萬都冇呢
D質數.....雖然佢地係心中有數，之但係都坐左三個鐘一齊旁聽，看到旁好
多檯都成交左好幾次，而我地仲係週旋中，我諗個Sales真係想用刀斬死
我地，三個鐘費盡唇舌都係叫到你其中一對人影，而且比錢時，人地話唔
夠一萬...不如一次比啦，誰知佢地唔肯，人家肯讓步六千訂，都唔肯，最
後要講到四千，天呀...我真係怕佢轉頭找人斬死我地呀，到時連訂金都蝕
比佢喇....

走出會展已經成七點幾，大家一早講好去九龍城廣場成日式燒烤，一百四十
幾任食兩個鐘，當然亦都係蝕水啦，班女既......講仲多過食，唯有我地班男既
，燒好比佢填飽佢地個肚啦，這時候望下個電視，話十一點半前會掛八號風，
但我地都係十一點先走，走果陣明顯風勢勁左好多，遮都吹爛咁滯，好唔容易
先坐小巴去到黃大仙站，諗住坐地鐵便算，但又比我地見到有巴士剛好到站，
只要去屯門的，不理三七定二十一，上去吧，沿路雨漸大，望向青馬橋燈都熄
左，汀九橋都冇左條長紅燈光線，頓時覺得呢個海死氣沉沉咁，巴士去到屯門
，雨又奇怪地變細左，太好喇...天都怕D雨打親我會唔覺意打死我吧，所以都可
憐我停雨一會兒....天說...食懵你喇...!!

果然回到家..身都冇咩點濕，沖涼便上床訓覺，點知，都未訓到一個鐘，手電
響起，我妹打比我話家中個窗關不到，而家比風吹翻吹跌咁滯，家中輪流用手
扶穩它乍，快想方法啦，我話用繩綁緊它.....果然家中兩女仕不夠力，老竇又唔
響家中，唉...怎麼辦...家中有人叫救命咁滯，毫無方法唯有借鄰居架車同女友一
齊趕回家中啦，馬路上真係大風到冇人信，地上全是垃圾，街燈時著時熄，二十
分鐘唔使，趕到娘家，我妹同阿媽都比雨吹濕，我們四人夾手夾腳先固定好個窗
，為左穩陣，天光前都唔諗住走喇，一來太大雨，二來怕有咩事兩個女既攪唔掂
，而家係凌晨四點五十五分左右，感覺好似冇先前咁大風，女友我妹同阿媽亦都
瞓著左，本來呢篇文章諗住明天先打，因為有D燒烤相片不在我手，貼不到出來，
不過反正睡不到，打左也好，明天只係上載相片便可，無計啦..天生懶....!!!

好喇....眼瞓....瞓覺

>>July 18, 2009 at 9:08:56 PM GMT+8