| 日記 | 日記主簡介 |
||||
2009 年 12 月 18 日 星期五 【颳風】 埋頭手作中.... 放工立即回家 要陪病好既貓咪嘛 二來我要整好D花佢 我要25號前攪掂.... 雖然整得唔靚 但已經好比心機整喇 女友唔好嫌棄才好呀....!! 今日已經完成一半喇.... 回家再努力過... 明天女友才返.... 等妳回來食飯呀 好..... 我要繼續我的手作喇.... 今日的進度...托哂網底喇...!!! 
>>December 18, 2009 at 11:51:21 PM GMT+8 2009 年 12 月 17 日 星期四 【颳風】 何謂"凍" 對女友黎講... 今日真係幾凍 所以今日要佢返工就真係幾慘 但據我了解.... 佢今次去果度係落雪 因此大黑細黑都出動哂 認真誇張呀... 但我好唔明白佢所見解 咩什麼.....外國的凍...不同香港的凍 香港果D凍得好唔舒服 我真係唔明何解 外國會凍得舒服嗎...?? 咩唔係....係凍就凍...唔凍就唔凍咩 最衰我又窮丫 我都想去堆雪球 去感受下當地天氣 可以像妳咁...整個人扒響雪地上 我都不知何時才有機會去呀 好啦..... 我今晚會繼續摺花 我會等妳回來...
嗯嗯...來報告今日摺花的進度...!! 用網托底托到我手好痛....整左好耐先整到呢幾支...真係冇咩天份...!! 
右邊果D托左網底.....左邊果D...唉!!明天先攪喇....手痛呀!! 
夜喇...!!唔整喇...明天先繼續...要瞓喇真係..!!! >>December 18, 2009 at 3:34:21 AM GMT+8 2009 年 12 月 16 日 星期三 【微冷】 摺花 努力地...用心地...盡力地 去摺玫瑰花.... 真係好難呀.... 我而家發覺自己係唔係有D"手腳不協調" 好似整極都唔似咁 我要摺夠24支.... 摺完到包花紙又係一個問題 但... 我點都會做到整到既 我相信我會越整越好既.... 哈..... 而家諗我摺得差妳會收貨嗎...?? 我會響聖誕節前整好送比妳架喇.... Irene....妳等住收花啦... 還在努力中...!! 
不過..... 我努力左幾粒鐘都好似冇咩進展... 都係得10幾朵左右 我隻手指公屈鐵線屈到好痛 而且我覺得整極都唔似咁 都唔知自己做緊咩咁 我似乎對美術方面冇咩天份 我真係有點擔心會唔會交唔到貨呀 看...!!整左幾粒鐘就係整得呢幾支 又拆又捲.....一支重複咁拆...又捲..又拆..再捲.... 以下就係嘔心瀝血之作.... 很失禮呀.... 唔講都唔知..我係捲玫瑰花添呀..!! 
>>December 17, 2009 at 4:05:34 AM GMT+8 2009 年 12 月 15 日 星期二 【雷雨】 一隻夠哂數 今日特登調假陪貓咪做手術 話就話陪.... 其實自己都走左去.... 因為我真係唔知可以做D咩 好彩今日都有D野攪下.... 下午去完樂富..之後搭地鐵去荔景 轉東涌線去香港站..... 再由香港站搭機鐵去機場 去機場部HSBC㩒左幾叉野出來 係....我真係無聊到去機場ATM㩒錢 㩒完又搭返機鐵出青衣站轉東涌線去南昌再去紅磡 由紅磡搭到去大圍再轉馬鞍山線去第一城 去7-11買左支烏龍茶又入過閘搭返車去上水 去到上水食左杯雪榚就收到電話.... 貓咪手術做完左..... 很成功..... 鬆一口氣喇..... 打電話通知返女友話比佢知手術成功 去到診所會合女友睇下貓咪如何 貓咪D手手腳腳包住左...因為怕佢會抓 頸度帶左個好似個雪榚筒咁....因為怕佢會用條脷攪佢 見到貓咪時...佢都反應.但好遲鈍.. 我都覺得正常既.... 我同女友見到都放心 嗯嗯... 原來裡面果條係線.....係一條"橡筋" 醫生冇估錯...一條粗既係扎頭髮用..另一條係普通我們常用既橡筋 貓咪真係....好百厭..咩都放入口 經過今次....我睇貓咪知驚未...!!! 跟住落黎就係找數 頭尾檢查...治療...手術...傷口處理....雜費.... 價錢同我們人類住院冇分別.... 都係咁貴.... 但......作為佢主人....佢出事而我又知 我難道由得佢死嗎...?? 養動物責任真係大 如果仲有機會... 我養魚就算喇 雖然佢可以帶比我們好多快樂...... 讓我地大家冇咁悶....佢可以陪我..我又可以陪佢 但心理負擔很大...又怕佢出事.. 我真係擔當不起... 我諗..... 我唔會再養多一隻寵物 一隻已經很足夠喇....... >>December 16, 2009 at 1:46:07 AM GMT+8 2009 年 12 月 15 日 星期二 【晴】 Operation... 突然瞓不著... 諗起貓咪明天要做手術 心中有點忐忑不安 我唔知點解好怕手術呢兩個字 我覺得手術會令人有後遺症 我係其中一個不幸者 手術十分成功.. 可惜手尾要跟我一世 我好怕貓咪會好似我咁 人地話物似主人形 似我..咁就死得人多 不知貓咪而家諗緊咩 佢會怕嘛...? 不過貓咪唔會有下一代 因為早已替牠絕育左 有事都不會連累下一代 手術..... 在我記憶係冷冰冰的地方 記憶中我在推入手術室... 離開家人....家人要止步的一刻 得我一個人面對... 當時我怕得要命.... 聽到手術室內..."支支支...的尖銳機器聲音" 好像將要劏我行刑一樣 我記得自己是咁安撫自己 同自己講 打左麻醉針..... 就算死了應該不會太痛苦吧 又諗起朋友很輕鬆的一句 車.....入去放底兩件野拍拍屁股咪出返來囉.....冇問題呀 要放低兩件體內的廢棄器官組織體... You make a sound easy ar...!!!!! 入到去看見手術的燈.... 同戲裡的無太大分別.... 仲多左一盞細既燈添 由手術推床...過我上手術枱時 護士問我叫咩名..做咩手術 我話我做咩咩咩手術....我名叫.... 名都未講完... 一下血管的劇痛.... 原來係麻醉針 很快冇意識了 像睡了一覺..好舒服.... 醒了.... 第一眼.....見到頭上戴著綠色手術帽的女人....(聽到是女生既聲線...) 問我叫咩名呀...? 做完手術喇 對呀...我好像係做手術喎...感覺肚有點點痛... 我話...我叫........ 又睡了 睜大眼已經在病房內.... 劇痛左我十幾日 手術開刀的痛...真係不能用筆墨形容 太痛了.... 貓咪就係要受這種痛.... 對佢來講是殘酷嘛...? 貓咪冇向我講想唔想做手術 係我們迫佢做 佢又會點諗 好怕...一失敗了會如何 風險真係一個好可惡的詞語 係一個未知數... 是不能確定的 無百份百 我雖說口中話唔太擔心 但手術兩字對我來講太有陰影 佢影響我好多好多 後遺症甚至差點影響我同女友的感情 開初為了未來生BB的事 我擔心生出來會似我咁..會有事 女友堅持話現在好多野生出來前已經可以驗出有冇事 我話...假如咁唔好彩驗不出..生出來先有事呢...怎算...?? 女友話...我陀住個BB生出來夠會有危險啦....難道我都要怕有事嗎....?? 為什麼你又不擔心我會有事呀?? 那一刻我真係無言以對 為了呢件事...大家爭辯左好耐 呢件亦都係我們唯一一件會鬧不開心的一事 現在... 我們都有計劃未來怎去行 生BB都會有風險我們都知道 動物包括人類..一面對世界一刻開始同時都要面對無數咁多風險 人生如賭博...贏輸都冇時定 贏輸都唔係你同我可以作到的決定 祂自會有主宰 怎都好.... 我要同自己講....貓咪今次都係入去放底條線就出來啦.......冇問題 很輕鬆的事 連女友咁痛錫貓咪都不太擔心明天的事...我不要嚇自己吧 又唔係開腦切心的高危手術 而且醫生都話好簡單的 係...... 香港醫學咁好....我應該放心先係 6吋長的一刀我都可以捱過 佢開咁短就更加冇問題啦 Faith..... 自己應該都要好好休息去應付明天的事才對.... 我現在的事...是該去睡!!! >>December 15, 2009 at 4:07:28 AM GMT+8 2009 年 12 月 14 日 星期一 【晴】 新車試駕... 今日整天在司機訓練....哈哈 對上一次司機訓練該是做學神的時候吧 但今天有點怪怪的咁 有三個阿Sir跟住我..... 真係好鬼緊張 第一次全程駕駛第四期新列車...車身編號1112 真的好怪... 我全日都發覺全街人都望住我架車 咁又難怪.... 完全同之前車身顏色不一樣 白色加綠色線條車身...加上蘋果綠座位 車門玻璃窗呈梯形 路線牌放在最後個窗口位度... 比我係街外人都會望多兩眼 但今天過得好快 可能帶少少虛榮感...."望我吧....望我吧...望唔望到幾咁瀟灑..." 我自己都想嘔添..哈哈 講返車內控制 基本上一樣 多左CCTV 控制都冇想像中咁困難 還以為國產野會好衰添..... 放工前....打比女友落來望望"先睹為快" 在Depot外見到我.....大家打左個眼式 費時比阿Sir見到啦我..(叫女仔落黎..未死過...當阿Sir冇道呀...?!!) 出來會合女友 女友第一句.... 部車好..."核突" 好古怪....... 唉......!!! 點解妳又係咁講架...!!(好聽d都不怕死啦...) 今日我駕住呢部"核突"野一日呀 我又諗會唔會好多人都覺得架車"核突"呢....?? 駕住咁核突既車..唔知又有冇人認得我呢...???? 妳真係好鬼衰呀...又係咁講我.... 下次唔叫妳落黎睇喇....!!!! 嗚..... 媽呀....今日我做左一日小丑呀 很打擊呀....!!!!!! **明天是貓咪的大日子.....貓咪要比心機捱過去呀....好快會冇事架喇...** >>December 14, 2009 at 10:33:35 PM GMT+8 2009 年 12 月 13 日 星期日 【晴】 講國語... 今日發生左一件我自己覺得好勁既事 就係...我用國語教人搭車去邊去邊... 今日有個後生女來問我....(可能我著制服關係吧..) 而女仔個樣仲幾OK架喎....(幾靚架...!!) 佢問我由天水圍行深圳灣口岸搭咩車先得...........(用國語..!!!) 我可以用國語教佢.... 佢竟然聽得明喎...!!!(哇哈哈...太勁喇我...!!!) 我話... "由呢處上天橋過到對面向前行.... 之後妳會看到輕鐵天耀站... 輕鐵站旁邊會見到巴士站 那處有巴士去"深圳灣口岸" 個女仔就話是否搭B2呀?? 我答...沒有B2....應該是B2P....!!" 女仔講左謝謝你就走左... 回家講比女友聽呢件事...哈哈..!!!(哼....只係妳識國語嘛...??!!!!) 女友叫我用國語講多一次比佢聽..(滿有信心咁講...) 點知....女友係咁捉我錯字...(超級可惡..!!) 仲話....個女仔可能心中笑緊你唔知講咩....(簡直係打擊呀....!!!!) 人地只係估你大約講咩字.... 正如我聽人地講唔正既廣東話咁 雖然人地講唔正...但我地會估得明咁 唉..... 比女友咁講一講又好似係喎 當堂冇哂心情...!!!!(希望個女仔唔會認得我啦咁....!!!) 不過女友話我一定唔會教人搭錯車 因為我講啱條路線之餘...國語都好標準 就係.."B2P" @&^#%)@#..... 有兩個係英文字....而一二三四五呢D國語係人都知點講啦 女友.....真係好鬼衰..!!!! 哼..妳好呀妳...我下次咩都唔同妳講呀...!!!!! >>December 13, 2009 at 11:57:36 PM GMT+8 2009 年 12 月 12 日 星期六 【晴】 孤寒還是慳? 今日返工時見到有班中學生為左慳返二元五角 就搭"冒險號"..... 都唔知邊過改呢個名...."冒險號" 而自問我係一個搭一個站都會買飛既人 但我有試過坐"冒險號"?? 係有.... 仲有幾次添.... 一次係以前女友同佢班Friend有一次去BBQ時 為左快、方便....就迫我上輕鐵搭左一個站.... 好彩冇事.... 另一次係有預謀的 先叫有買票既朋友搭車先 若左見到沿途站有人檢查票... 咁我就早一站走人....(所以手提電話係一個好偉大既發明既...) 那次我係搭左三個站.... 都冇事.... 之後幾次就係不知情下逃票 D可惡Octopus機好多時都過唔到咭 但自己以為又拍左...但其實係冇拍咭 最後到目的地出站時 出站機就"咇"你..."此咭沒有入站記錄.." 我頂....好彩冇人查啫...!! 如果唔係我死得真係無辜喇 仲有一次係我好細過時 仲係用"月票"任坐年代 當年月票分為..."元朗通"、"屯門通"、"中央通"、"全線通" 而當年輕鐵有條好得意既規例
當時....孫中山壽辰係學校假期....但唔係紅日 我果時唔知就張自己張"元朗通"...當"全線通"用 咁我當場斷正啦 票控我.... 當年細過又唔可以比阿媽知(比阿娘知道仲有命...我..??) 但我又聽同學仔佢地講..."有得上訴" 但要自己寫信去 當年我就暪住阿娘就作文比九鐵.... 講到自己好可憐、又係初犯、又話冇心逃票、又話唔會有下一次咁......(總之死哂狗咁啦..) 比到客務中心職員等左幾日... 我又上訴得直.....呵呵... 真係可憐呀我細個時.... 咁細個就要自己解決問題.... 當年罰180蚊呀..冇記錯好似係 180蚊...??當年我每日零用得7蚊乍....!!! 罰錢....殺左我好過喇....!!! 回看而家D後生仔.... 罰280蚊....碎料啦 買條底褲都唔止咁價錢啦.... 我仲曾經聽過有個人講... "我有錢先唔會買飛.....反而我冇錢就要賣喇..." 哈...佢有解釋架.... 因為越窮越見鬼喎....你冇錢唔買票實就會黑仔到比人拉到...!!! 唉....真係咩道理呀...? 今時今日...我雖然唔使比錢坐車 我自己亦都識大多數查票既同事 講真..如果我帶一兩個人唔比錢上車都唔係問題 只要篤篤手指.."喂...識得架" 咁就冇事... 不過我唔會咁做 同表弟妹出街我都要佢地親自拍咭入站 尤其係表弟.... 對鐵路興趣好濃厚....(唉...都唔知有咩咁好迷....) 有次問我咩時候多人查票咩時候冇人查票 的確..係有D時間係真空... 但我冇講比佢地知... 用得人服務..你就要比錢 你覺得貴..你有權唔搭... 搭車比錢就天經地義既事 我就算搭巴士都係... 我情願比多錢都唔會比少 除左真係有時真係迫於無奈比少就冇話可說啦 如果車費13.5....你有13蚊同一張20蚊 咁你又唔理由比20蚊佢 如果我遇到呢D情況 我會向司機自首...."師傅...少左幾毫呀..冇散銀呀" 通常司機都唔會難為你 起碼我未試過唔比上車又或者比人趕落車丫........ 而家女友返工搭E33....$13.6 其實真係好鬼平.. 行青馬橋要比錢架..而屯門公路都唔短...(我都唔知龍運巴士點維皮..???) 雖然平之但係慢... 若果坐機場鐵路係快..但係要比成百蚊...唔抵(真係貴到離譜我都覺得...) 所以我知女友好恨結婚後攞家屬坐車免費福利 而我都一樣好恨攞超級折扣價錢既機票呀 大家都謀住大家既福利... 我地真係有諗過不如註冊結婚攞左福利先 遲D先後補返個婚宴 heee...... 我地係唔係機關算盡，諗足數呢.... 我都覺得我地好無賴呀... 哈哈... 不如我地明天去註冊嚕...好唔好呀..? 咁......算唔算係求婚呀...? >>December 12, 2009 at 11:46:01 PM GMT+8 2009 年 12 月 11 日 星期五 【晴】 我願妳知道... 我響度再同我女朋友講.... 我從無諗過要變心去愛另一個 我只係想同妳於今生做對現在的好情人未來的好夫妻 我亦都已認定係妳...同妳結婚.... 我點都好...都痛愛著妳 我亦不容許有人傷害到妳 我認定妳是我的今生唯一 我不會粒聲唔出走左去冇回頭 我向妳發毒誓..我絕不會出去"滾" 我不可容忍有人出口傷妳...令妳喊 我不可以令妳流眼淚 我不願令妳失望 我會盡我全力..給妳幸福快樂 我會在妳身邊給妳肩膊..可以比妳安心地挨著 我會響冬天時做妳個暖蛋 我會響妳身邊做妳一世既聽眾 我會響妳唔開心時氹妳逗妳開心 我如果激嬲妳...我會向妳認錯 我要妳好放心做我一世情人 我願意一生都唔變心咁愛妳 我願妳可放心 我願意... >>December 11, 2009 at 11:15:05 PM GMT+8 2009 年 12 月 10 日 星期四 【晴】 妳昨晚講過咩...?? 昨晚飲到頭暈又眼瞓 大家一瞓就瞓到11點幾先起身 食過午飯就去診所接返做完檢查既貓咪回家 貓咪同平時一樣都係咁... 識行識走又識食 同人講佢有事真係冇人會信 唔知貓咪知唔知自己將要做手術呢..? 我都曾經比人開過一刀 那種痛現在已經有點模糊.... 只記得係痛到瞓都瞓唔到 不過.... 手術已經定左日子做.. 希望到時會順利啦 今日女友問我昨晚講過咩... 呵呵...出自妳口喎..!! 妳一D印象都冇嘛...?? 嗯..有點印象..又不太肯定呀..??? 妳大概睇左我日誌寫咩吧 嗱.....妳昨晚講過D咩... 我就唔會講返妳知架喇.... 不用擔心喎... 妳冇講到D唔可以比我知既事喎 唔好追問我喇 總之... 我會對妳好啦 仲有呀 我唔會走左去架..傻人.!!!! 同樣地... 妳飛走左我都唔會走....只會等妳回來... 我應承妳我不會"離場" 好無呀? >>December 10, 2009 at 11:46:24 PM GMT+8
|
|
無事嗎?irene佢而家情況如何