| 日記 | 日記主簡介 |
||||
2010 年 2 月 24 日 星期三 【晴】 三人行 事關有個BB在家中 好多野都唔方便做 BB亦玩殘我 因為間中半夜佢都會喊 唔知喊咩野 明明已經飲左奶換埋尿片 都仲係喊....唉!!!!好鬼嘈呀!!! 女友佢抱起逗佢玩 "依依丫丫咁"傾計仔氹佢開心 希望令到佢玩到倦睇到攰去瞓覺 一抱...就抱左成個鐘 終於都肯瞓喇 見到BB瞓覺個樣真係好可愛 BB肯瞓...我地都瞓 不過...BB床仔要拉到我地床邊 因為要隨時隨地要照顧佢 都很好喇..... 瞓到朝早6點就睜大對眼仔 唔使講啦 佢又喊扭要飲奶....BB都要食早餐嘛 佢一醒..我地全部都要醒.... 連貓咪都醒埋 反正起左身女友話整埋我地既早餐 女友叫我坐底坐好個姿勢.... 要我用手臂托住BB...另一隻手我就托奶樽餵奶佢飲 女友放好BB比我.... 話.... Ok....嗱...唔好亂郁....hold住咁....佢就會自己啜奶飲...咪亂郁呀.....飲奶時唔好攪佢呀...."俗"親佢就大件事喇!!!! 我聽完真係唔敢郁 因為我真係怕出事... 萬一真係有意外.... 我同女友漏夜趕工都賠唔返個仔比人!!! 但係....我真係托到好鬼攰..手都軟 點解佢可以飲咁慢架 我真係懷疑佢係唔係真係啜緊 女友整好早餐自己食左先 食完..BB都只係飲左一半 到轉手比女友餵... 我走去食早餐 唉...... 真可憐呀.....食早餐要食到咁!!!!! 我真係完完全全體會到將來我們有BB的話 情況會係點..... 就係....我會攪到一塔糊塗..!!!! 看來真係要趁呢兩日可下點湊仔喇 還有.... 昨晚我地出街 因為個傻妹話要買返D粉底呀眼影等等 多左一個BB...當然要推埋BB車出去行街啦 我咁大個仔... 真係第一次同一個女仔推BB車上去搭輕鐵 仲要坐正我D相熟同事既車 到站後個死仔打開個窗問... 你幾時有個仔我唔知架... 妖........開你既車啦...問...!!!!!! 上到市廣場 當陪女友行到D化妝專櫃時 女友停響度揀 我就做推車公停埋一邊 點知呢個時候BB又喊!!!! 我攞佢媽咪比既玩具.....比佢玩同睇 分散BB注意能力 唉....男人老狗停埋一邊同BB玩 仲要響班化妝Sales前咁做 唉....前途盡毀啦 先前比同事見...而家比Sales見 個Sales仲話我地個仔好得意呀...!!!(個仔唔係我架...!!!) 買完我地去食野 我地食時又要照顧佢 試下餵少少水佢飲啦 都係咁..... 食野要輪住食 妳食我睇...我食妳睇 回家時搭輕鐵返去又多人 仲要夾硬塞架BB車入去真係..... 唉..!!!!!!!!!!!!! 我真係冇諗過我都會有機會做迫入BB車果個 我知大家都好迫 我都好無奈... 大家放心啦.... 我坐幾個站落車架喇..... 好不容易回到家 入到去又要收BB車、洗奶樽、幫BB沖涼仔 真巴閉呀.... 要開暖風機吹熱間房...再倒水入房沖 真係呢D工夫都做到我手軟呀 整到咁上下...又話要食奶喇 又沖又餵..... 跟手又換埋片.... 多多野做.... 原來....湊一個BB係咁如此辛苦呀 呀....!!!!!!!! 阿娘.......妳好偉大呀!!!!!!!!! >>February 25, 2010 at 7:08:23 AM GMT+8 2010 年 2 月 23 日 星期二 【晴】 未來..將來 今日女友帶左個BB返來幫人湊三日 個BB係女友既朋友 因為佢個阿媽要返內地做D緊急要事 唔方便帶埋個B返去 下晝女友抱左佢返來 我放工返來見到真係O左嘴 左一袋右一袋BB日用品 喂..兩日乍唔係兩個星期呀 使唔使咁多野呀? 最誇張連張床仔都攞埋黎 個BB都有6個幾月大 間中都會喊下咁 不過逗下佢..佢都會笑下 都幾可愛同逗人喜愛 我大概係一個唔係太識抱BB既男人 我抱起佢唔夠1分鐘 佢就喊.....!!! 但係女友一抱返 過一陣佢就唔喊 是我問題嗎...?? 諗返起...我地都算係成日幫人湊仔 每次個傻妹一有時間可以的話 都唔會托人手踭....幫手湊 我見到個傻妹咁熟手 我諗我地第時個BB我都唔使擔心點照顧吧 呢一個唔係我地個仔都咁錫佢 係自己親生的話仲唔痛鍚到佢燶...? 個傻妹向我講明結婚後一定要生最少兩個... 睇來我第時D開支真係會多到不得之了 真係有D擔心呢.... 而家望到佢真係好適合做一個慈母.... 但教仔女唔係一件容易既事 妳真的有信心妳可以做得到做得好嗎? 我想像緊....呢個真係我地既仔 我們一家三口 都會算係一個幸福家庭嘛..? 妳話過妳願望係可以嫁到個好老公同擁有屬於自己既家庭 我都好想幫你一起實現願望 看來我真的要努力一點 不單止要搵老婆本...還要搵養仔女果最少400萬呢.... 嗯... 我會比心機努力架... >>February 24, 2010 at 10:49:10 AM GMT+8 2010 年 2 月 22 日 星期一 【炎熱】 仆Down on the floor 天氣勁潮濕呀 呢D天氣真係令到人都攰D呀 今日就係呢D潮濕天氣 響我車上跣底左個少女 佢都算跣得慘 由月台邊跣到仆入車廂 見住佢跣到扖街 響倒後鏡完全睇哂個過程 個女仔瘀皮就梗架喇 仲要跣穿對襪再爆缸 見到佢都痛 佢著裙既...有冇蝕到佢先知 但我問佢野 佢好似咩都唔識講咁 好似想喊想喊咁 最後為左唔好拿屎上身 我都係Call左上頭落黎攪 所以話呢..... 千其唔好著咁高既鞋呢 仲要呢D天氣著..找死嘛想...??? 真係跌破相點算好呢..... 知唔知呀...... 妳唔好再高我兩吋呀..... 我會咬人架.... >>February 23, 2010 at 1:31:55 AM GMT+8 2010 年 2 月 21 日 星期日 【微冷】 宣誓 稍為瞓醒... 女友突然話比張相我睇 女友臉色好似看來不太好 我心諗....我應該冇收埋女仔相喎 仲咩事比相我睇呀 可知道我剛瞓醒個腦唔太清醒 那刻心中只係諗... 無理由..我應該冇相可以比女友捉我既 我既女仔相...女友全部都知 開始有點發寒..... 好似受死又唔知咩罪咁 女友塊臉又好似好黑鑊屎冇血色咁 真係唔醒都嚇鬼醒 唉.....心諗...死就死啦 就算捉到我D相都唔會係咩大件事...一定不會情慾相片先起碼 我肯定冇影過呢D 段估就算係女仔相都係一左一右咁影果D吧 我深信我真係冇收埋任何相片 但又諗下會唔會當書籤咁夾左書自己又唔記得 唉....真係一百萬個估不到的可能 一分鐘內諗左好多野.... 好喇 到女友攞張相出來比我睇 原來係一篇英文告示牌的相片 用我極"有限公司"既英文都明白.....講咩 第一個反應係 "關我鬼事呀...!!!"比我睇仲咩鬼 原來相片係一響婚姻註冊處影的 相內係一段誓言 看清楚後我望住女友.... 咁點解呀...?即係點呀 女友又用佢得意技倆..."變臉" 由好黑臉變到好小鳥依人咁 問...... 我地幾時會讀呢段野呀...? 我話...我唔識雞腸呀 女友話....唔打緊 知你英文屎....< b>(我頂...真係咁直接...!!!) 我比個中文版本你< b>(嘩...兩手準備啊..!!)& lt;/b> 快D而家試下讀出來丫...!!! 唉..... 望住段文字真係.....有點臉紅 點講呀..冇情情咁叫我讀 唉....硬住頭皮咁讀出來 女友話...咁勉強...!!!比D感情啦 好似好委屈你咁.....& lt;b>(妳而家唔係夾硬來嘛....??) 激死我.... 我話...咁妳讀先啦 丫....個衰婆真係立即讀出黎...< /font>(真係一D都唔怕醜....)& lt;/font> 我承認女友讀得真係好有感情...(真係好情深款款...) 之後女友話..You Turn..!!!...要好似我咁語氣同感情讀出來 唉....... 我...我讀喇 哈....我都唔明 讀完妳點解會咁開心.....(傻瓜瓜咁抱實我....!!好鬼抵死...!!) 喂....未係呀..... 到我儲到錢時.... 我到時會大大聲咁向住各見證讀出來 女友仲要我讀好個英文版本呀 話到時如果有外籍人士在場都要知我講咩先得 喂..... 什麼都未準備好呀 咁心急仲咩呀....傻妹 我都仲未問妳呀 去邊搵段咁野出來呀 瞓醒咁嚇我....< /font>(我真係整妳個計丫)< /font> 要我宣誓....要我讀出來 真係作死妳呀 但...放心啦.... 呢段誓詞我只會為妳讀 我應承妳...Ok?? 到時...妳要講"我願意"架...!!! 知道嘛....
女仕們....若果妳男友無端端咁向妳講....妳會回覆妳要講果句誓詞比妳男友嗎..? 呢個係英文版......!!! 
呢個係中文版......!!! 
>>February 22, 2010 at 4:32:33 AM GMT+8 2010 年 2 月 20 日 星期六 【颳風】 大戰24圈 嘩.... 打左24圈麻將真係眼都盲 真係冇諗通可以同女友同埋佢D同事竹戰咁長時間 我後面果4圈真係打到傻下傻下 差D食詐糊、大小相公、亂出沖比人 好彩自己都有三分醒...... 捱到最後 我同女友夾埋先羸103蚊 大家都冇點輸羸 如果唔係之後D人要上訴 我有幾百蚊袋袋平安 班女都有病..... 輸左唔比人走 焗打....真係慘 最後要輸返出去先可恨嘛 打完天都光 一齊去食早餐 各有各回家 還"睡眠債" 真的好攰..如果唔係都唔會而家先補打日誌.... 不過...新年唔細細地賭下.....點似過年呢 輸又如何.... 怎說都好.... 今個新年過得很開心..很愉快 >>February 22, 2010 at 4:25:17 AM GMT+8 2010 年 2 月 19 日 星期五 【乍雨乍晴】 嚴寒的位置 放工同左George去機場 佢諗住影相 我諗住接機 咁互相利用啦 你陪我等..我陪你影 其實我諗住反正都係等放工 而且我又知女友返來係坐咩機種 不如試下去Skydeck睇下佢部機降落時個樣啦 因為我未試過佢做 走去睇住佢部機降落...況且A340-600機種 魚翅唔多呢D機...基本上知時間知機種就知一定係呢部機...而唔會攪錯 陪George上到SkyDeck 嘩..一丁人都冇 當然啦.....凍成咁..又空曠又三面對住個海 跟本係凍到唔係人來既地方 我著得一件長袖衫加一件大風衣..係咁多 佢就著件羽絨都叫凍 是但啦...其實我又唔係太怕凍 因為我仲有絛頸巾... 只要包住我耳同鼻....就Ok George個鎖匙扣係一個迷你溫度計 睇一睇個溫度係得唔夠六度 影左一個鐘多D 天都開始暗喇 終於見到部A340-600機降落 見住佢入Gate...見住佢駁天橋 預計佢都冇咁快出到來 去SkyDeck留多一陣影多一陣 但係我開始感到越來越凍 望一望個溫度得5度唔夠差DD先夠 以為今日真係得我地上來 估唔到仲有一個鬼佬上來 條鬼佬仲主動走埋黎同我地傾計 個鬼佬都講hey......too cold here....佢望住我指指佢自己身D衫問我....Are you OK..? 我話...Yes....I'm freezing haha 條鬼佬就話...Wear some clothes...!!!!!!!! 我心諗..有既話我一早著左啦...多舊魚..!!! 之後條鬼佬又同我地講東講西 我地好想佢收聲.... 但佢係咁講野 又唔好意思...Stop佢 佢真係多野講到連佢屋企響邊有咩人都話我知 果刻我真係想講....hey....enough !!!Can you stop your shit yet..!!!!!!YOU ARE SO NOISY!!!! 不過為左唔好影響香港人形象我唯有繼續聽佢胡說八道 過左一陣George主動叫我過去幫佢Set機我先有機會甩身..... SkyDeck真係好凍...最後連個鬼佬都走埋 不過我地都真係開始頂唔順....好凍 望下錶時間都差不多可以接女友 我地一齊去機場美心食完野就走 George搭機鐵走...我同女友搭E33走 點知架巴士鬼咁多人 行李架完全放滿哂行李 女友果一件唯有放響司機旁邊個位置 果個位置寫明唔堆放任何野 但可能女友佢地有套制服著上身.....有個身份 D巴士司機都會由得佢 咁當然啦...只係得小黑一件行李先會咁做啦 我地自己都仲要手執住個大衫袋呀 仲要坐到最後果排椅度 背住個冷氣機 好彩坐後排全部都係女性 唔係太迫....若果唔係要迫到返屯門 你都唔好話"少野" 去到巴士站落車 一落車後面已經有部好吉既E33 我整鬼佢丫...早知咁快有部車我地就唔使迫啦 返到去屋企... 個傻妹攞左部模型比我 係佢今日坐返來架機買比我既 係一部1比500既A340-600既模型 不覺之間我地儲左8架機喇 咁多架機中 我只係坐過747、777、A330... 其他都未坐過 很羨慕女友可以咁坐咁多款機週圍去 不知...我幾時先有假期可以碰正女友放假 我地一齊去旅行呢 好想去多次旅行呀 >>February 20, 2010 at 9:47:53 AM GMT+8 2010 年 2 月 18 日 星期四 【乍雨乍晴】 牙籤充筷子 整天都落雨..真係好乞我憎 我最憎就係返工時開車落雨 最攞命佢又唔係大雨 攪到開車時想快一點都唔敢 驚跣轆剎唔切車.... 我整天就係咁.... 用比限速更慢的速度開車 時間用多左...廁所都去少左...食飯時間短左 最可恨既係.... 放食飯時...我先發覺唔記得帶筷子架餐 望住盒意粉真係呆左.... "點算好...??" 唔通要用手食呀? 平日個飯盒總會有人準備定比我 臨出門口一攞就係... 邊使諗要帶乜帶物... 今日妳不在....就出事了 我唔信邪...新年流流...我總唔信成間房一對即棄筷子都冇 找呀找..搵呀搵 搵到呀....但好似有D發霉咁... 你敢用咩...!!! 我用左10分鐘搵架餐........除左對發霉既其他都搵唔到 好在....都衰唔到貼地 我搵到一筒牙籤..... 咁啱我又食意粉.... 頂住檔用住先 所以話...天無絕人之路 係個食相折墮一D啫 總好過用手食丫 放工時..天氣好鬼凍 撞鬼佢囉....我淨係著住件制服加件厚風褸.....前後兩大件衫 我唔係怕凍呀 我身一向唔怕凍.... 我係D耳同鼻既位置怕凍呀 頂唔住入左7-11買左盒叮叮點心...一支熱維他奶 幾歹都暖下先 食完攞住奶飲我突然諗 次次我攞住支奶都係同妳一齊 因為次次叫凍....個妳個傻妹總要手攞D暖野先安樂 我次次都話...."係唔係真係咁凍呀..??搓到個樽咁實，個樽都比妳就黎搓爆喇...!!!" 估唔到今日我做左佢做既野 係咁搓住個熱奶樽取暖 哈....如果比妳個傻妹見到我咁樣...妳會有咩講呢...?? 回到家睇下個信箱有信 哈....次次妳都好好野 總係等到妳出Trip我先會收到妳信 妳真係計得啱啱好....定還是同郵差夾定..!!! 入到屋見到張餐枱張字條 係喇.....記得喇!!! 要開暖風機比個衰仔嘛... 望住隻肥貓咪.....你真幸福呀.... 出面D貓冒住比車轆死既險瞓車底避寒 你可以用暖風機.... 前世你做過咩好事呀...?做隻貓可以做得你咁舒服.... 比左糧你食自己喇....唔鬼理你... 沖完涼入房拆信... 今次四張紙....唔算過份喇...!!睇完哂 嗯....我會回答﹕ 我都係一樣，我都冇後悔過，比我選擇多一次..我都係會過來!! 如果我唔過來我們就會冇開始冇今日 如何我唔過來可能到今日我都唔會了解你 如果今日才比我知道......我先會更加唔開心囉 仲有...我點會捨得比妳一個人自己唔開心喎 所以我點會後悔呢... 傻妹呀...咪傻啦妳.... >>February 19, 2010 at 3:39:19 AM GMT+8 2010 年 2 月 17 日 星期三 【乍雨乍晴】 衝...利是 本來初四要開工既我 臨時又比人調更.... 放多一日 但係之後就慘喇 日日返工冇停手喇 放左咁多日真係唔想返工呀 但我知呢個係冇可能既事囉..!! 今日下晝送女友一齊搭巴士返工 出面真係好鬼凍 連我對手都暖得比平時慢 個傻妹著件大褸加條頸巾都凍到震震震..! 如以往咁....個傻瓜都係插雙手入我衫袋內捉住我手取暖 唔怪得她既.... 因為佢真係好怕凍 所以我趁個傻妹買野食時.. 我去左買...十數包暖蛋芯比佢用 左手一隻..右手一隻 比佢暖一下 去到魚翅城都係同平日一樣買野飲比佢飲 不過今次係熱飲 一枝熱維他奶都不夠 仲要加多一盒牛奶..叮熱佢飲先夠先開心 哈....似足小朋友一樣呀 飲完暖完後抱一抱她我就搭巴士返去 回到家之後我去左屯門Depot..... 其實返去都係諗住逗下利是 哈.....都有唔錯既斬獲呀 有成三十幾封.... 雖然有一半都係十蚊紙 但錢呢D野唔太計較 我在乎收時個感覺.... 收得多利是....手攞住一叠叠厚厚既利是感覺好滿足 好..到現時為止...合共有62封利是 內面既錢...我冇心機再數... 諗住到初十先一次過點算下有幾錢 其實今年真係好滿足同開心 最開心今年個個都對我女友好好 希望每一年都係咁就好喇.... 唔知我幾時先到我派利是呢...?? 手機影得唔清楚，暫時收到62封利是......!!! 
>>February 17, 2010 at 10:31:59 PM GMT+8 2010 年 2 月 16 日 星期二 【乍雨乍晴】 只得妳 這個新年.... 我食既年榚、椰汁榚、蘿蔔榚、芋頭榚、馬蹄榚、油角、笑口棗 真係食到超哂錶 如果食呢D油膩野好似像飲酒後咁吹波波量度得到的話 我超標足似令我坐十世監都唔得掂 今年真係食得好過份 食到自己都驚..... 廚房個鑊都懶得收埋佢 因為轉頭又想煎過 一日煎四五六七八次 油都用左差不多兩支 在眾多應節的食品中 我最鐘意蘿蔔榚、年榚.... 總係唔到食完果一底都唔肯收口 蘿蔔榚配上辣椒醬真係.....點忍口呢?? 加上而家呢個女友 對食既....好多好多都識得整出來 食既野真係源源不絕地供應入我口中 呢幾天...我想要食的話 只要我一開口話想食 個傻妹真係會即刻為我去煎比我食 當女友攞住碟已煎好既年榚、蘿蔔榚出來時 我果一刻覺得自己好幸福咁 對唔住呀 今年個情人節和妳渡過得馬馬虎虎 本想買對女友話喜歡的耳環比佢 但最後我都冇走去買到 相反...女友當日送左條頸巾比我 原來個傻妹用返工時間同埋去外地下榻酒店休息時間去編織的 我真係在家完全睇唔到個傻妹織過任何一針一線.... 女友真係收埋得厲害呀 忍不住問呢條未完成既頸巾"妳到底收埋左去邊" 原來收埋左返工個小黑行李內 妳真的好鬼馬呀.. 怕熱的我..本來頸巾對我來講都係冇用 但呢幾天咁凍... 我會將佢圍住我頸項 連返工時我都帶住佢上頸 真的很溫暖呀 多謝妳呀 原諒我情人節向妳冇咩表示 我不是不在乎妳架 相反..我很在乎妳才是呀 hee...!! 真的好想立即娶左妳去呀 好想向妳講"我願意"呢 難得今年情人節碰上新年的年初一 我又要妳等 怪自己還未儲足夠老婆本 我應承妳丫...當我一夠錢 我就向妳求婚 不要再滴滴咕咕咁懷疑我對妳的真心喇 我未來身邊的另一個........ 一定會是妳的 如果我違背同反口.... 我就不得好死 情人節還欠好一句 "呢生我都會好好地愛著妳" 只會愛的一個....得妳一個
>>February 17, 2010 at 9:43:47 AM GMT+8 2010 年 2 月 15 日 星期一 【乍雨乍晴】 不錯的進帳呀 今日出動收左1580蚊利是呀..... 算係咁喇今年我覺得 計埋昨天果900幾蚊 女友都係同我一樣....我幾多佢幾多...當然佢少左一封1000蚊利是啦 個傻妹暗叫...真係不公平呀...!!! 哈哈哈.... 仲有今日麻將、十三張、魚蝦蟹都有斬獲 羸左400幾蚊.... 不過D錢分哂比表弟妹買野食 小時候.....阿姨佢地羸錢都係會比我地 而家大個左.....到我地做返呢D事 比返佢地D仔女.... 我估今年會有3000蚊利是錢左右啦 明天返自己家拜年呀 阿娘都係200蚊..老豆100蚊 基本上要逗的都逗完喇 希望今年D同事會鬆手D爽手D啦 今年新年真係過得開心 因為個個都對我女友好好呀 明天係最後一天放假 夜晚會去睇戲 女友初四都要同我一樣..開工 傻妹響度怨...天氣咁凍 著件大褸都冇用啦 看來我都要買多D暖蛋暖貼比個傻妹跟身喇 新一年......希望我們開工都會順順利利啦
>>February 15, 2010 at 11:48:24 PM GMT+8
|
|
無事嗎?irene佢而家情況如何