| 日記 | 日記主簡介 |
||||
2010 年 1 月 2 日 星期六 【晴】 水魚 我地兩個都有一個相同特點 就係超級大頭蝦...!!! 曾經我唔記得帶鎖匙同Log書返工 攪到差D臨門一腳開唔到車 幸好...當時我在屯門..離家不遠 可以托女友擺比我 不過我記得佢當時係好醒目 我打電話比佢救命時 她已經話識睇我更表... 知我響咩站咩時間出現 要知道我地唔係寫站名..係記站既數字代號 女友果陣竟然可以記到知道我咩站 已經趕去比攞比我途中 真係犀飛利....!!! 今日到女友唔記得野返工 唔記得帶咩....?? 就係"職員証" 冇左佢唔使旨意入公司門口 響幾時發現唔記得帶...?? 都算好彩....響"豐景園"輕鐵站 立即兵分兩路.... 她有她繼續返去魚翅城 我有我返屋企攞佢張証 攞完我唔搭巴士... 搭西鐵...轉東涌線...再打的過去 哈.... 居然女友只係快我10分鐘到 鐵路...果然係偉大的發明呀 不過今日發生左一D小插曲 我搭西鐵既時候... 有個女人拍我 問我攞錢搭車 佢話我差7蚊.... 問我可唔可以比佢..... 仲話4、5蚊都好丫...我唔夠錢呀 我又唔知點拒絕 唯有比5蚊佢啦 點知...我一打開個蛤蟆散紙包 佢見到我有好多碎銀 就立即話...比7蚊我啦.... 我頓時...唉!!!!!! 是但啦.....咪再煩我喇 呢D人都唔知佢係唔係有心厄我 但如果佢真係冇錢返屋企 我又唔幫佢... 佢又會好慘.... 算啦.....當飲少支水吧 去到同女友講返呢件事 原來女友都係一條水魚 已經比人劏左好多次 佢心態都係一樣 佢厄就當我當黑.....佢真係有需要就當做好心 唉.... 我地呢兩條都係天生一對既"小肥羊"啊.... >>January 3, 2010 at 3:26:19 PM GMT+8 2010 年 1 月 1 日 星期五 【晴】 敏感 本來BBQ完返來大家都好攰 回到家大家都想休息上床瞓覺 我沖完後先輪到女友沖涼 而我沖完涼已經急不及待咁鑽上床上去.......做人生一大樂事.....!!!! 瞓覺....!! 我鑽上床後好快已經瞓著左 所以我後來連女友幾時上來張床瞓我都唔知 但我後來被人弄醒左 唔係女友叫醒 係有人在我身邊郁到我醒 很嚴重呀...可以郁到我醒 因為我唔係D咁易被弄醒的人 好....!!! 我好奇望下咩事個身邊有人郁下郁下咁 原來係女友在床上左轆右轆咁 問下女友仲咩事呀?? 傻瓜瓜咁講我身痕呀...!! 還以為佢講笑..我仲講使唔使打妳一身呀..??(整醒我太可惡啦...可知瞓覺時攪醒我係死罪啊..!!) 咁後來發現真係唔係玩啦 著燈望一望先見到她全身都紅紅咁....(當堂嚇一嚇醒...發生咩事!!) 呢D擺明就係皮膚敏感啦 望下個鐘....睇下咩時間 原來都清晨五點幾 問女友幾時已經覺得皮膚敏感呀?? 竟答我.....沖完涼出來瞓唔夠半個鐘已經痕到瞓唔到 計一計...咁即係妳自己一個捱左幾個鐘...(正一天下大傻瓜....點解唔出聲呀...?) 問個傻瓜點解唔出聲 佢話唔想我明天返工冇精神...(大概知我返早D繁忙時間吧...) 正傻人呀......見到妳咁 我幾咁眼瞓都成個人醒哂啦 立即捉佢去睇24小時醫務所 出到去診所....光源充足地方再細心睇睇女友點 真係手、頸、都紅哂，起哂紅色一點一點(見到她都辛苦...) 入到去見醫生發覺背脊都係紅哂 醫生話不如打支針先啦 會冇咁辛苦....冇咁痕 我都估到女友都係會扭計唔打(唔得呀...一定要打...唔打我唔比妳返屋企.!!) 最後都迫佢打左支針 回家食左第一次藥同搽左藥後明顯好左好多 醫生之前講到明話D抗敏感藥係食完會係好眼瞓 果然食左唔使半個鐘個傻瓜有得好瞓 望著瞓著的她...我眼前呢個正一係傻瓜呀 一早講我知去睇醫生就唔會痕足一晚啦 但算啦...我知道可能換係我都會唔出聲 見到妳好好咁瞓著左..我放心得多喇 我冇時間再瞓...要返工一陣 呢段時間無野好做....諗諗下妳敏感都可能係我攪成 BBQ時妳燒左幾隻扇貝、幾隻貝殼類海鮮來食 如果唔係我冇點理妳.... 妳就唔使係咁燒野係咁食啦來解悶啦 唔食咁多.....妳可能會冇事 但而家講咩都冇用吧 我一陣要返工呀... 只能做的係較好鬧鐘..放好妳要食既藥、清水、手機、在妳床邊 不敢打電話比妳騷擾妳瞓覺喇 等六個鐘後先嘈醒妳食藥吧 唉..... 我終於都磨到差不多八點半喇 可以準備去返工 要放工返來先再見喇 最好妳可以瞓足瞓飽瞓到我返來啦 咁就最好不過喇 >>January 2, 2010 at 12:16:06 AM GMT+8 2009 年 12 月 31 日 星期四 【微冷】 緊急BBQ 今日諗住家中一齊煮飯 我地連餸都買好哂 準備返去落手煮添喇 突然收到C4其中一員既電話......"陳成"呀 叫我去燒野食.... 嘩.....真係諗住我隨傳隨到咁 五點九問我七點鐘得唔得閒 真係丫 好彩.....鄙人比較念友情 同女友講聲問埋佢一齊去好唔好 女友話.......你D朋友無見咁耐.....去囉一齊 最後我地拿拿聲放返D餸入雪櫃內 立即換衫...沖涼...執執D眼耳口鼻出門口 搭的士去...燒烤場有得憑單據資助10蚊......叫好過冇啦 去到同朋友傾計多過燒野食 反而悶親女友.... 悶到佢要係咁燒返野比我食.... 唉.......真的很衰哩我....!!! 下次啦....星期二...5號 到我同返妳D朋友又燒過... 到時妳同朋友吹水.... 我燒返過比妳食 為妳燒足全程呀.... 妳想食咩燒咩........ 那天....妳口講...用手篤....食咩.... 以妳為先...好嗎...?? >>January 1, 2010 at 5:07:59 PM GMT+8 2009 年 12 月 31 日 星期四 【颳風】 2010年1月1日零時零分 今日去左女友個朋友Rachel家中開大食會兼倒數慶祝 佢住個地方保安超嚴密... 的士都未入到House門口已經被截停 話冇住戶証不駛入.....(我頂佢個看更丫...) 當時我地真係吽左一吽..!!!(我們係通緝犯嗎...??) 為什麼唔比我地入呀..?? 良久先問D保安員.... 喂喂......我地抽住咁多野咁重點行入去呀 佢住第八座呀.... 行入去都好遠呀... 最後班女既...用美色電下幾個保安員... 話我地最多打比屋主啦 確定到我地身份就比我地架的士入去啦...好嘛...?? 最後個保安員都頂唔住呢班女生既甜言蜜語 比我地架的士入去第八座樓下落車(美色誘惑成功...!!!) 唔單止個保安被電..... 就連個的士司機都受不住美色...唉..!! 響保安員美色拉鋸戰時..的士司機係停左錶咁比我地等 你話...做女既人又靚既...幾咁著數呢..!! 的士司機最後仲向佢地講..."祝佢地新年快樂呀...玩得開心D喇!!!" 不過姊妹們都好識做... 個錢跳錶係80幾蚊.... 佢地比左張一百蚊紙佢唔使找.... 呢D咪叫..你對我好..我對你你好囉...!!! 上到去... 大家搬一盤盤既食物上去時真係命都冇.... 因為食物又重又有醬汁....怕佢跌又怕佢漏醬汁 不過幾經辛苦我地都安全到步 將食物放好 大家都開開心心咁食..好熱鬧好開心 D食物個個都整得好好..好精緻..好靚 而且份份都咁好食 個個都讚好呀 Sara整果D金沙骨真係好好食 阿Pat整個D壽司又係好好食.... 阿Pat真係好有心機..真係用冰袋令到佢盤食物唔好變壞 當中沙律都係我最愛 仲有半盤係蟹子沙律添 我食左好多好多好多好多 而女友整果D蜜糖雞翼都好好食 好香好甜..但甜得來又啱啱好 大家都對大家既食物一致好評 而我都唔係白食架... 我都出左成六百蚊買飲品....(汽水、果汁、酒...) 肉痛得好心甘命抵.....哈哈!!! 開初還以為會得八至十個人左右去一齊慶祝 點知前前後後都來左好多人（Friend搭Friend咁估計前後差不多二十五人左右...) 當中有D我係唔識架...(好多靚女呀....!!!) 在倒數果一刻最多人響度 大家大叫..5、4、3、2、1 .....Happy New Year...!!! 真係好彩佢家中係複式連天台.... 如果唔係一定比人投訴呀..!!!(咁鬼死嘈....!!!) 總之大家都很盡興啦..... 我不會忘記今日 因為今日係我去咁多次慶祝最熱鬧的一次 到現在心情都未平伏 心中仲係想去果度玩過 真係太令人興奮..同令人情緒都高漲呢.... 真係很想叫埋你地一齊去玩呀... 好了..... 講到2010年我零時零分做的第一件事 就係.... "同女友相擁地接吻、大家互相講"Happy New Year...!!!" 同埋我互許今年的願望 想知我們的願望是什麼嘛...??? 哈哈....呢個係超高度機密 但係我覺得女友許的呢一個願望 我能夠幫她實現.... 我會比心機努力架喇...老婆~ 嗯嗯.... 2010年新的開始 我要同我老婆講...."我真的很愛妳!!...呢生只會得妳呢一個.... 我會承諾當日的說話.....不會反口!!! 將末來的日子裡..... 我將會向妳、給妳一個難忘的求婚 老婆呀.....妳要等我不要離開我呀....!!! 妳可知道我真的很愛妳喜歡妳嘛...... >>December 31, 2009 at 8:18:35 PM GMT+8 2009 年 12 月 30 日 星期三 【微冷】
每人整一份呀
>>December 31, 2009 at 12:38:01 AM GMT+8 2009 年 12 月 29 日 星期二 【颳風】 叫什麼禮物..??不曉得了!! 今日返工返晏晝 我最唔鐘意呢D時間...!!(公司話....輪到你揀咩...!!!) 唔拖唔水咁....簡直將成日都比哂佢...(你簽左約賣身比公司架...!!!) 只不過...我今日都冇人陪...女友又返工...返咩時間都算吧啦..!! 食晚飯既時候收到阿Annie電話 佢響電話話我知...要幫我買既野買左喇(果刻諗...我要妳幫我買咩...???) 係..... 我之前托Annie買既手袋 買來送比Irene...(都唔知叫咩禮物喇....聖誕生日乜野日子都送過哂...) 記得有一日同女友行街 女友睇中左個袋 但香港買比較貴 唯有同女友講....睇多幾間先啦 其實我心中有數...知道間間都差不多價錢...平都唔會平得好多 唔去買住係想遲一點先送比女友吧... Annie好好人呀...超級大好人呀....肯幫我去日本買返來(Annie...妳係我大恩人呀....獲獲都麻煩到妳...!!!) 雖然話飛日本時先順手買回來.... 但我知都要搵呢個袋都要時間、車錢、很花氣力... 真係要好多謝Annie呀 所以今日呢餐飯我很願意很甘心請呀....(雖然妳呢餐都擺明劏我一頸血...!!!) 明天係31號呀(可以和女友、朋友倒數呀..) Annie、Irene、Irene同期訓練幾個同學(難聽D叫幾個八婆..!!) 一齊開大食會、打牌、打機兼睇倒數 我知有人叫左George一齊去呀....(而家唔使我約喇...有女仔主動叫佢黎喇....!!) 我仲收到風話George走去接人機呀...(唔叫埋我去...我打滾左咁耐熟路嘛...) 你條友仔偷偷地拍拖唔出聲..!!! 聽日先玩殘你兩個....(務求妳兩個當眾揇埋一堆...互相接觸接觸...哈哈!!) 最憎人.....拍拖都唔話我知嘞....哈哈 唉....可以搵到呢個George真係執到呀(真心架...!!佢真係好好好男人呀...粗口都唔講架...!!) 斯斯文文...怕怕醜醜...最慘佢又靚仔嘛....(上天太唔公平吧..!!) 女既......妳執到啦... 哈.....仲詐傻.....You know what i mean..... 明天先等班女黎收拾你.....哈哈 今日托Annie買比女友既手袋呀...!!! 
>>December 30, 2009 at 5:53:07 PM GMT+8 2009 年 12 月 29 日 星期二 【乍雨乍晴】 反瞓的我 聽女友講... 我都幾反瞓... 瞓著時成日會郁來郁去 女友講終有一次我會轆落地下 女友仲話我不單止反瞓... 仲成日都"富"被...... 每次女友醒一醒時都要幫我蓋被... 我話...我都唔怕凍... 但女友話...你唔怕..?? 半夜掂你D手同個身都係凍架...!!! 有D咁既事咩我話...?? 女友話....哼..!!!梗係啦..!! 其實我瞓左我點會知喎 但今日我開始留意到 我發覺近排天氣凍...再加上女友不在我身邊時 我起身係會係咁流鼻水..打乞痴..打個不停 仲有少少凍... 甚至今日係凍醒左我添 同時都証實到我真係會"富"被 因為我瞓醒時..張被有一大半已經跌左落地下 自己係完全冇蓋到被 小時候...阿媽會咁幫我蓋被 到而家咁大個人都係咁 要女友幫我蓋被 小時候阿媽要我著多D衫先好出街.....凍呀出面 而家我又係著兩件衫就出去 女友就會哦我....要我著多兩件啦 仲要攞定件衫放響我面前....快D著左佢 有時我都知我係激死女友咁滯 女友已經投訴.... 你唔好要我好似你阿媽咁啦...!!!好冇...??? 仲成日都話我似個小朋友咁 每天起居飲食都要照顧 咁我又幾鐘意被我鐘意既人照顧嘛 咁妳夠成日扭計唔肯呢樣果樣啦 妳夠似細路啦... 其實大家都喜歡被對方痛鍚關心的感覺 所以我仍然都會係咁 著少D衫等妳哦下....要妳關心下我..... "乖啦...著多件啦....熱你咪除囉..好無..!!" 同樣地...我都不介意妳咁同妳講 "乖啦.....睇醫生...食藥啦....D藥丸好細粒乍..!!" 妳真係好鬼怕食藥架...哈哈!! 嗯嗯....!! 明天妳才返來... 很掛妳呀... >>December 30, 2009 at 4:08:15 AM GMT+8 2009 年 12 月 28 日 星期一 【乍雨乍晴】 等著妳呀... 我放工後就送女友返工 今日對女友來講都仍然好凍.. 著住大黑褸的她....掛住黑頸巾既佢 頓時立即遮住成個大利是封 雖然著住大褸的她... 陪住佢等車時都仲係縮埋一團咁 暖蛋雖然左右手各一個在手心中 但我掂她的臉、耳鼻都仲係凍得很 我主動把她臉靠向我頸等佢冇咁凍 到上到車後我就發覺我頸全染住她的化妝碎粉 攪到我下巴、頸都閃閃令 哈哈....抹又抹唔到 仲越抹越弄得範圍越大. 無法子吧....唯有閃到返屋企啦我 到站後.....抱一抱過她一陣子就分開喇 女友今次一去要31號早上先返來 都好既... 一返來可以陪我慶祝倒數 節目都預備好了 去女友同事既家中玩 我諗都離不開大食會同打麻將 31號好難得我可以放假呀 上年我都要返工呀 不過31號不返工就賺少左額外一點喇 但比我選擇返工定放假 我情願賺少一點放假都想陪她一齊過元旦... 望下家中個掛鐘... 女友現在應該在半空中喇 希望過到果邊女友會保重自己身體啦 那邊仲凍到好似落雪添 祈求不要病到回來 祈求不像果班機會...要溶雪飛唔起 攪到遲大到回港先好呀 我真的好想妳陪我過元旦架 >>December 29, 2009 at 10:36:48 AM GMT+8 2009 年 12 月 27 日 星期日 【乍雨乍晴】 工作時的我... 對來黎講 返工係一件好悶既事 尤其係我地呢D工 響一條路線上不斷咁兜 有時兜到真係會問返自己 我正話有冇停過呢個站呀...?? 有時為左比自己唔好咁悶 會Set一D野比自己做 我最常做既就係迫自己控制到架車唔Chop(搖晃) 而我如果狀態好的話 我可以令到架車自行滑停.... 其實我地D列車係人手控制 好多時好多司機都會為左快 都會用加速急停得急來方便自己 由靜止到加速如果過急 架車裡面D人就會向一個方向搖一搖 扶唔緊扶手就會跌 停得急更加唔使講.... 做乘客真係坐全程的話嘔都似呀 其實我以前都做過乘客... 我都好憎D司機亂咁來 試過有次我頂唔住要坐下一班車 而家自己做司機 我會盡自己能力駕好一點 我都有問過D朋友... 我駕得如何 個個都話幾好...(女友都話我駕得好過好多司機呀..可能係氹我吧..!!!) 唔扶住手自己企得穩都唔會跌 其實我都不算係新人 也許呢D都是我份內事吧 不過...今日我食飯去搭人地車時 果個司機我同佢唔係太熟..... 應該係新人 佢個樣都幾"乞人憎"..串串共咁(見到佢就有衝動打獲佢..) 事關佢夜晚都帶住"黑超"...!!!!(咩夜晚會有太陽咩...定還是你係明星呀..??) 嘩....!!! 佢手車真係我坐三個站就差不多跌底三個站 連D客都媽佢點駕車 佢仲要係開第一期既列車 第一期既列車係最好最易駕駛 若果要佢駕三期列車 我諗架車成地下都會係嘔吐物 我都唔知呢D同事係點Pass個路試..!! 呢條友仔已入我心中黑名單 以後佢開既車.... 我一定唔會上 我真係買佢怕呀.....!! >>December 28, 2009 at 3:43:15 PM GMT+8 2009 年 12 月 26 日 星期六 【颳風】 陪著妳走.. 今日陪女友出街 女友覺得今日天氣好寒 整天都......震著話好凍 老是要伸手入我口袋中取暖...(但妳都係咁凍..都暖不到既..點解???) 我同妳都不知誰身子較弱 像今日呢D天氣... 我覺得非常好 但對妳來講呢D天氣凍到週身唔舒服 什麼身體毛病都好像跑出來似的(最經常的...腰痛、下半身疼痛...我估是妳的職業病) 呢度唔舒服..果度又有唔妥 平日呢度痛開的..痛上加痛 生理毛病都跑埋出來.. 很久前已經聽妳話過想做個婦科檢查 講到今時今日都未做 是真的冇時間.....??還是其他原因而不去....妳我心中有數吧 嗱.....!!今日妳又痛過喇.... 見到妳咁....心中很不舒服(因為我幫唔到妳...!!) 我永遠都感受不到妳的痛是怎麼...因為我不是女人 而妳自己更擔心著會有什麼病 自己又不知道 我知妳最怕最驚自己會有懷孕的問題(因為生屬於我們的小朋友係妳最大願望...對嗎..??) 每次妳都問我有事會點算好..?? 每次妳講呢世說話眼神都顯得好擔心..(我知再講妳一定就會喊出來...) 其實我每次都避開唔答妳(每次我都笑笑話點會有事喎...) 因為怕妳再講下去會越諗越多野 今日妳又問我.."我真的有事咁點算好...??" 我諗我今次要認真答妳吧... 有事又好冇事又好生唔生到BB與否都不重要 我要既老婆唔係要"包生仔"架.... 無論如何我都唔會掉底妳一個 若果真係不幸有事我很願意照顧妳一世 無論妳發生咩事我都會在妳身邊 和妳相處一段不短的日子喇 妳心想什麼，怕什麼，擔心什麼..我或多或少都會知道(不知多都知少吧...) 來緊我們大家放假的日子 我陪妳去檢查同等結果好嘛.... 一齊去、一齊知道、一齊面對 總之...我就陪著妳好嗎...?? 我應承妳呢一生都陪著妳身邊.... 很多朋友都會收到呢個Email的.....如何我真的有反口"離妳而去".. 妳大可同大家一齊拿呢段文章出來....聲討我.... 放心啦.....不要傻瓜瓜咁再問我喇 妳問幾多次我都只會咁答...答案都會只得一個 就係.. 無論妳有咩事我都唔會離開妳... 好明白嘛..? >>December 27, 2009 at 3:40:50 PM GMT+8
|
|
無事嗎?irene佢而家情況如何