2007 年 1 月 12 日 星期五 【微冷】

今日十分之累呀，因為上下午都有tour要帶，真係講野講到氣都咳埋呀，最後成把聲都沙晒．．．因為都好耐冇試過連續上下兩場咁喇，真係好辛苦！而且呢兩場都係三十幾四十人一組，所以講野好晒氣，個死人mic又好快冇電喎，所以真係想死．．．不過最算攪掂左，聽日終於可以唔洗帶tour，可以靜靜咁做下其他野喇．．．

放工之後搭車返屋企，又係一上車就係咁訓，真係好累，訓酊落車之前對眼都仲係合住，真係好死，好唔想落車．．．落車之後真係拖住雙腳行番屋企咁！返到去又等食飯，我地後來出左去食飯．．．因為今晚係勁歌總選，所以碌低左，食完飯返到屋企時都已經做得七七八八喇，都成十點幾，所以之後再一次過由頭睇番晒，最舌睇到而家成點幾鐘喇．．．雖然身體真係好累，但係精神上唔係太累，可能睇電視睇到已經個人精神晒，就黎有精神病咁滯．．．不過最開心既係，古巨基可以拎左好多個獎，仲可以拎埋金曲金獎，勁呀．．．yeah~ 唯一佢拎唔到男歌星就有d失望啦．．．不過唔緊要，下年再有機會拎既，永遠支持佢架！都唔爭在啦，都支持左佢十年有多喇，我會繼續支持佢的．．．加油，基仔！

聽日又要返工，真係好死，仲要返朝九晚六呢．．．點捱呀？

>>January 13, 2007 at 4:56:52 PM GMT+8

2007 年 1 月 11 日 星期四 【微冷】

今日終於可以訓到成十一點喇，哈！真係好，可以訓得多d，個人就精神d喇．．．yeah~

好在今朝有朋友打電話叫醒我咋，如果唔係我估我會一直係咁訓落去，訓到唔識得起身添，哈！跟住下午約左個好朋友，出左去深水步，一心諗住睇下電腦節有咩野可以執，睇下有冇咩野驚喜．．．點知，都係不外如是，又冇咩特別平野，又冇咩驚喜，哈，所以好快我地就走左囉，之後去左鴨寮街同旺角．．．陪我朋友買定佢聽日同後日帶camp既野．．．基本上今日係陪朋友既購物日，哈！但係都好開心丫，大家有講有笑，又一齊去食十蚊麵．．．哈，都好耐冇食過喇，最上一次都係同呢位朋友一齊食．．．諗諗下都有好幾個月了．．．！唉！

聽到朋友講起佢星期六同日去煎魚灣wild camp，真係十分之羨慕．．．我又想起了之前同A仔一齊去煎魚灣既情景，真係十分之懷念哦．．．好想再去！雖然路途十分艱苦，但係最重要係辛苦過程中有你最想一齊既人陪伴住自己，所以幾辛苦都係值得架，唉，真係好想回到舊時．．．以前既日子，永遠都係最快樂開心既回憶．．．即使中間曾經發生過好多令自己傷心或者COLLAPSE既事件，但係，始終一些開心既日子永遠都會留住係心中，永不會磨滅．．．

>>January 12, 2007 at 2:18:46 PM GMT+8

2007 年 1 月 10 日 星期三 【微冷】

哈~ 今朝起身十分之辛苦，因為琴晚唔係好訓到呀，可能因為琴日下午訓左一陣，攪到訓唔到覺啦，好可憐呀！今日成日個人都烏烏下咁呀，成日好想訓，但係而家因為調左個位，所以想恰眼訓都唔得呀，太open了，唉！不過我都知其實係唔應該恰眼訓既，所以今日成日係咁砌我d計劃書，終於比我攪好左一份，仲send埋比IC，希望新年果時可以攪得成個活動就好喇．．．今次呢彈野係我黎左呢度之後第一個比較大型既活動，我都好想成功，比番D顏色比D同事睇．．．黎曉寧，加油呀！

聽日又可以放假了，哈．．．開心！可以出去睇一年一度既電腦展，承機又睇下D產品，因為屋企部電腦真係係時候要換架喇，捱左咁耐佢都好叻仔架喇．．．都係時候要功成身退了．．．希望聽日見到D正野啦！

琴晚同A仔講起去台灣旅行，哈，真係好想去，好想可以再去台北，為什麼都好，買書也好，買野食也好，去散心也好，去relax也好．．．總知好想去旅行！原本我自己係lplan左在6月尾去日本的，不過由於子彈有限，而家真係好好咁plan先至得喇．．．又想去台灣又想去日本添．．．點好呢？唔知點揀好呀！煩煩了！

>>January 11, 2007 at 12:56:20 PM GMT+8

2007 年 1 月 9 日 星期二 【颳風】

hehe~ 今日係放假黎講都係幾早起身既一日，因為今朝早七點九就起身，八點九就出門口喇，點解？約左人囉．．．其實我地都約得好急架，係琴晚大家係MSN見到時先臨時約既，哈哈．．．

我今日約左A仔一齊去又一城踩早場冰，哈哈．．．真係好早，因為我地去到DELIFRANCE食早餐先，之後食到佢冰場十點半開門，我地再入去玩．．．哈，好耐冇踩過了，真的起碼有好一兩年．．．最上一次應該係帶D細路係暑期時去西九龍踩那次了，當時真係有點兒"雞手鴨腳"．．．不過過程十分之順利，而且仲見到好多好笑既場面同事物，真係諗番起都幾攪笑架．．．有什麼鴨仔團啦，架仔小學生，殺制王哥哥等．．．正！

之後，我地行左一緊又一城，就去左深水步，因為我地想親住星期五電腦節之節格定價先，睇下電腦節會平幾多丫嘛．．．我地星期五又會出多次深記睇電腦．．．我都要睇MON呀，因為個MON死死地，成日好似DISCO咁轉顏色，哈！睇完之後我地去左食LUNCH，果間野都唔好食既，如果唔係見佢好坐少少都唔去呀，之前去過都冇咁差既．．．算啦，最緊要係坐得舒服O者，因為大家都踩冰踩到好累了．．．真係好在唔係星期五踩．．．本來我地係約左星期五，但後來想過都係唔得，因為A仔星期六去CAMP呀，星期五踩佢真係會累死的，所以都係唔好，星期五做D平和D既節目好D吧！

今日LUNCH果時，大家好慶喜咁講到好想去台灣或者日本旅行，亦講及了很多以前去台灣及其他地方旅行時既趣事同回憶．．．真係好回味同開心呢．．．其實．．．我真的不知道我們是否有機會可以再一次去旅行，因為．．．我仍然未真正知道我們之間是否真的有這份緣可以繼續延續下去．．．我仍然在等待緊真正出現在我眼前的答案！我就是一個這樣的人，沒有一個很真實的答案在我眼前出現，我是不會很真實知道的，是否很傻吧？但是亦是我一份去找尋真相的堅持，才可以走到這樣的地步吧！

完左今日既節目大家就各散東西，佢有佢去青衣洗牙，我有我返屋企．．．我返到屋企累到要死，走左上床又訓左個覺，哈，而家好精神添，死啦，好驚今晚會訓唔著覺呀！！聽日又是返工天，真係有點兒唔想返，因為星期五又係放假了．．．哈，夾在中間的返工日子總係令人好希HOLIDAY MOOD的．．．快快完成星期四的工作，又是星期五的放假天了．．．又可以與A仔出外有節目．．．真豐富了！

>>January 10, 2007 at 12:05:31 PM GMT+8

2007 年 1 月 8 日 星期一 【颳風】

今日既天氣仍然好凍呀，快d回番暖就好囉，唔洗成日著住d又厚又腫既衫呀！

今朝好可憐，係咁咳，其實琴晚開始已經係咁，我一咳得厲害時就好容易氣喘，唉，所以今朝又係咁喘喇，好慘！之後頂唔順喇，都係請左病假，要去睇醫生．．．醫生同我講，今次佢十分之建議我改用長期性既氣管噴制，因為比直接服食既類固醇既壞影響少．．．醫生話，食得太多類固醇可以導致好多問題，例如會肥胖，面腫，引致心臟病，糖尿病，高血壓，同埋骨骼疏鬆等，所以醫生好希望盡量減少我直接服食類固醇．．．我唯有答應醫生長期噴新既噴制去控制情況．．．嘩，但係枝野好鬼貴囉，成二百幾蚊一枝，好在醫生而家要我一日噴一口，即係枝野可以用到三個月o者，唉．．．好慘呀！

食左d藥之後就十分之眼訓，係咁訓係咁訓，訓到個人”溫溫頓頓"咁，唉，又好似阿婆咁恰眼訓喎，哈！好辛苦呀！好在聽日係day off，可以休息一下啦．．．其實近幾日已經係成日咳架喇，只不過d氣管問題未發出o者，點知就今朝黎料．．．但係好在今日冇咩特別工作在身，所以都可以放心請病假．．．

先排我係一間基督教書室買左本書，叫做”態度決定了你的高度”，呢本書特別在真係令我有好大既感動同感受；尤其在心靈上有好多既安慰同反醒．．．有機會既大家都買呢本黎睇下啦！本係係施以諾寫架．．．

>>January 9, 2007 at 11:18:05 AM GMT+8

2007 年 1 月 7 日 星期日 【乍雨乍晴】

嘩嘩~ 今日既天氣仍然係好凍呀，真係凍．．．朝早根本係唔願起身果隻，好辛苦先至"的"起心肝起身呀，哈！不過反而今日早左好多返到公司喎．．．今日因為有個同事佢突然隻腳傷左，所以今日中心超級唔夠人用呀，得番一個centre assistant係中心，所以我都要搬埋d野落去幫手睇埋中心喇．．．好在今日我冇帶飯，因為琴晚打邊邊呢，所以方便好多啦，如果唔係lunch時就要上上落落喇．．．

其實今日真係唔係好做到野，因為一要睇中心呢，就一定唔可以乖乖咁坐係部電腦前面做野架喇．．．不過食lunch果時都幾好，因為有IC陪我食，我地又係傾左好多野，哈！跟住下午果陣時有個義工黎左幫我地手做野，我就同佢傾開計，佢同我分享左好多佢以前做運動員時代表香港參加長跑比賽既經歷，真係好羨慕佢，一方面去外國參加比賽，一方面可以順手去埋旅遊，真係開心死．．．我都同佢分享左一D旅遊既趣事，特別係講起果次去日本東京，走果日搭車搭多左個站，仲遇到個”尋找他鄉的故事”既主角，佢仲幫左我地添，哈，超好笑呀！！想起旅遊既事真係特別開心，當然最重要係同邊個去啦！

今日可能太累了，所以放工搭車果時一上車就訓著左囉，一訓就訓到返屋企呀，哈．．．真係好訓．．．行返屋企果陣個人仲係”鐘”下”鐘”下咁，哈，真係好累呢！返到屋企門口，媽咪一見到我就話：”嘩，你做咩黎呀，隻眼底咁黑既，你比人打黎呀？”哈，超好笑囉！

>>January 8, 2007 at 12:06:09 PM GMT+8

2007 年 1 月 6 日 星期六 【乍雨乍晴】

hehe~ 今日懶懶呀，本來應該一朝早起身返教會的，但係因為賴床，所以最終都係冇返到教會．．．哈！今日其實應該要返架，因為一來係聖餐，二來係我跟住幾個星期日都返唔到教會，因為要返工呀，所以我都有點兒慚愧呢，唉！

今日下午同左屋企人食lunch之後去左行街，爹地去左眼鏡88配眼鏡，哈，佢有老花呀，所以最後配了副漸進鏡呀，唉！老喇，見住爹地媽咪開始老了，雖然好多朋友都話：”嘩，你爹地媽咪個樣好後生喎！”係架，我都因佢地個樣後生而感到自豪架，哈！其實最緊要係佢地保持心境開朗o者，咁樣好自然人都靚d啦．．．我而家都有佢地自由發展架，佢地鍾意玩咩野興趣也好，去邊度玩都好，去邊度旅行都好，只要係佢地開心就ok架喇，做仔女既最緊要係全力支持父母想做既事丫嘛．．．

跟住臨黃昏時段，好朋友A仔約左我出去市中心陪佢行街街，因為佢想去睇鞋．．．本來我都有d衰，初頭想唔去架，因為我要返屋企食飯，擔心會太趕．．．但後來諗諗下本來琴日就約左佢，突然失約好似好衰咁，所以最後都赴左佢約啦，因為唔可以令佢失望架嘛！我地行左大約一個多鐘頭，但係最終都冇買到鞋，因為都睇唔o岩．．．唔緊要啦，要買既最終都可以買到對合心水既，係咪？

跟住黎緊既星期五我地又有節目喇，真係好期待．．．希望到時好玩啦．．．

明天又是返工日，唉，真係每日返工都係想放假，哈！成日諗住去玩．．．真係唔得架喇．．．黎曉寧，你曳曳喇，成日掛住去玩，唉．．．

>>January 7, 2007 at 1:35:38 PM GMT+8

2007 年 1 月 5 日 星期五 【乍雨乍晴】

嘩~ 今日返工簡直係一個字，坐．．．點解？因為仲係好holiday mood囉 ，好似仲係放緊假咁呀！加上今晚約左好朋友有個好重要既約會，所以更加冇乜心情做野啦，直澄係係度等放工咁滯，哈！做下野又hair下咁，真係覺得自己有點兒過份呢．．．哈！

放左工真開心，跟住一支箭咁走左去荃灣喇，去到時間o岩o岩好，大家都同步去到目的地．．．之後，我地去左八年前第一次約會既地方食野，點知一去到，間野轉左手之外，仲轉埋唔再係食葡國野，變左做食西餐．．．唉，好似冇咩意思咁，焗住都要叫野食架啦．．．之後我地叫左個二人餐，係個扒差d之外，其他野都幾ok啦！不過就無啦啦食左佢$300喇，真係唔好意思，要佢洗咁多錢．．．哈！不過今晚真係好開心，同左佢行左好多地方．．．不過都係覺得荃灣開始冇咩好行喇，到左十點鐘d舖頭已經閂晒門喇，都冇野好行既，真係有d無癮呀．．．不過，我相信最重要係大家都enjoy個過程嘛，係咪？所以．．．A仔，多謝你的一餐及陪了我一個開心既晚上呀！

今晚開始越來越凍了，大家都要小心身體，著多件衫呀，唔好凍親至好呀！！凍凍．．．

>>January 6, 2007 at 3:55:58 PM GMT+8

2007 年 1 月 4 日 星期四 【颳風】

今日係放完五日假之後第一日返工喇，哈，真係十分之超級唔習慣呢，好怪咁呀，尤其係返到去又要坐番個新位度．．．唉，更加唔習慣囉！

一返到去就開email，嘩，傻架，十萬九千個飛埋黎呀，又超級多電話要reply喎，真係死．．．最死都莫過於係在我放假既日子中，有人好似好好人咁幫我接晒d booking囉，但係就攪到d野亂鬼晒，係又book唔係又book，佢都傻架，根本冇睇過d manpower係咪ok，成日話：我地係open to public架，所以有tour就要book．．．傻架，唔洗佢帶就梗係啦，真係比佢激死呀！好心啦，佢都就走啦，總係要攪埋晒d麻煩野出黎架．．．

算啦，唔好為d咁既人而激氣嘛．．．其實都有開心既事既，就係係我最煩惱，最惆悵既時候，有個好好好朋友打電話比我，firm我一d出去玩既日子．．．哈，簡直係沙漠裡出現既綠洲咁呀；雪地裡送碳呀，好溫暖，完全唔記得晒d麻煩野同唔開心既野囉，真係好多謝呢位朋友係合適既時間出現左，哈！真係o岩．．．呢d是否叫心靈相通呢？

>>January 5, 2007 at 11:55:51 AM GMT+8

2007 年 1 月 3 日 星期三 【晴】

ADD．．．

頭先聽左楊千嬅首新歌，我的生存之道．．．突然間好有感受．．．在此希望與大家分享：

～～～～～～～～～～～～～～～～～～～～～～～～～～～～～～～～～～～～～～～～～～～～～～～

我決心 喜歡你 像親人
唯一得這想法應付 逝去情人

如你結婚別過問 恭喜咀咒 也未襯
這種命運 遲早光臨 逃命要緊

沒法可 哭出姻緣 總可笑去幽怨
如我想清醒再生存 醉一次便算
我有爸媽掛念 事業還望發展
仍能活著 未曾靠諾言
記憶似病發感染 心卻比水善變
再也不相信蜜糖 便信鹽
我怕爸媽掛住 莫被情字拖欠
遺忘昨日 便能記得明天
世間有無數喜宴 情人誰來奉獻
我有膽 總應該 會遇見

你間中 接觸我 像親人
唯一不肯親我臉龐 令我回魂

仍沒法可 哭出姻緣 總可笑去幽怨
如我想清醒再生存 醉一次便算
我有爸媽掛念 事業還望發展
仍能活著 未曾靠諾言
記憶似病發感染 心卻比水善變
再也不相信蜜糖 便信鹽
我怕爸媽掛住 莫被情字拖欠
遺忘昨日 便能記得明天
世間有無數喜宴 情人誰來奉獻
我有膽 總應該 會遇見

自問我好欺騙
仇人亦會被懷念 來天再有夜宴
定寬恕你漸老的臉

>>January 4, 2007 at 2:43:43 PM GMT+8