2007 年 6 月 3 日 星期日 【晴】

added...

頭先同A仔鬧左場交．．．我知道我令佢好憤怒，好傷心，好無奈！！！

所以，為了讓大家都好受一點，我決定刪除了令人誤會的內容．．．請原諒我當時的愚昧，不智及衝動！！

我而家好想話你知，我好清楚自己想要D乜野架喇，只係我之前想多了，想大了，是我自己唔知足吧！請原諒我！

倒轉頭，可能根本係我唔識得去顧及你感受，誤會左你，反而係我老屈左你．．．對唔住呀！

>>June 4, 2007 at 3:46:34 PM GMT+8

2007 年 6 月 3 日 星期日 【晴】

WOW．．．今朝起身時十分頭暈呀，唔知係因為唔陪訓既關係丫，定係好似A仔話因為我沖涼沖得太熱，所以受唔住呢？總知一句啦，我都係要好好養好個身體了．．．

一路返工一路超暈既情況真係好辛苦呀！初時返到公司，成朝都係咁，本來真係想返完個朝早下午請病假，不過，因為真係太多野要做同跟進喇，所以都根本不可能走人，唉！好可憐！好在，食完飯之後訓左半個鐘，個人就好似好番少少．．．

去到三點就同兩個同事開會，嘩，好多野做同跟進囉，我就黎死架喇．．．而家都唔知我既精神同體力係咪可以負責到呀，真係好多野跟同做，而我老細又好似越來越想A字膊，唔想揹飛係身，想樣樣野都過晒比人，尤其係過晒比我囉，真係好討厭！呢個人為左自保真係咩都做得出架．．．算啦，都係捱多三個月O者，我會好努力咁捱埋佢架．．．不過之後幾個月都係超PACK既工作呀，真係有點開始驚驚地呢．．．唉！！天呀！

>>June 4, 2007 at 3:39:30 PM GMT+8

2007 年 6 月 2 日 星期六 【晴】

今日係我間教會，中華基督教會聖光堂既八十大壽呀，所以今日堂慶特別開心，因為真係好難得一間可教堂可以屹立係一個地方整整八十年歷史．．．八十年來經歷過風風雨雨，例如香港淪陷，金融風暴，SARS等．．．所以真係好令珍惜架！今個主日既金句係：”凡事謝恩；因為這是上帝在基督耶穌裡向你們所定的旨意．”（帖撒羅尼迦前書第五章十八節）．．．真係對於呢個金句好有感受，很認同．．．真係要凡事謝恩，因為有好多野都係天父神所特別為我地而設架，真係好值得我地去珍惜，就好似我地教會有八十年歷史一樣吧！

完左崇拜之後，我地所有教會既弟兄一齊去左北角既城市花園酒店進行我地既堂慶聚餐喇，哈，係食BUFFET呢！好開心，D野都OK好味既，而且因為我地教堂已經有八十大壽，所以好多野都開始壞喇，要裝修下喇，所以今次聚餐亦都係一個籌款環節之一，好多弟兄姊妹都各出其謀，希望可以表演下籌多D錢．．．哈，我就冇份表演喇，不過我地一家都有份出錢架！

食完之後，我地一家人坐丁丁返番去CAUSEWAY BAY，我地行左好多地方，因為爹地同妹妹都係度不斷SHOPPING，而我就同自己講唔可以再SHOP喇，哈！不過最終都敵不過一個6折既DISCOUNT，真係可惡！不過最緊要買到心水野啦．．．最後，媽媽仲論我地飲左茶許留山呢，真係開心，咁就攪左成日，最後成七點先至走人，返到屯門都已經係八點幾了，於是我同妹妹就幫手拎D野返屋企先，而爹地媽咪就去左海趣新星酒樓度拎位先．．．點知我返到屋企，見到成地都係玻璃碎，原來我隻杯比波波貓打爛左，真係好可憐哦，波波佢因為冇人係屋企比野佢食，所以發脾氣呀！唉，我都打左佢一餐呀，不過最後都係請左佢食野，仲”呵”番佢啦，其實，邊度忍心架！

食完飯之後返屋企都已經係十點幾喇，攪呢攪路，而家都成十二點幾喇，都係時候要訓了．．．妹妹佢今日病左，所以聽日打算請病假．．．好羨慕呢，可以訓多少少嘛，哈！

>>June 4, 2007 at 11:58:29 AM GMT+8

2007 年 6 月 1 日 星期五 【晴】

今日成日都冇tour帶，所以終於可以好好咁做下d工作喇．．．不過做做下都係覺得好悶好累呀！唉．．．今朝食左個好豐富既m記早餐，係熱香餅呢，食完之後好飽呀．．．去到下午一點，要食lunch了，但完全食不落呢，所以只係出去買左一份三文治同一杯蜂蜜雪梨汁．．．買完返去都係飲左杯野咁大把，係後來兩點幾我先至食得苟一件三文治咁大把咋，另外一件都係放工果時先至食埋佢．．．不過唔知點解，飲完杯野之後係咁肚痛，唔知係我受唔到凍野或者生果，定係d雪梨唔新鮮呢，所以攪到我肚痛？定係食得太多野？唔知呀，我只係知道今日肚痛左成日，痛到放左工返到屋企之後出埋去食飯時我都仲痛緊呀，好可憐！

後來食完飯返到屋企，都因為好眼訓呀，聽日又要早起，所以．．．訓了．．．

>>June 4, 2007 at 11:40:15 AM GMT+8

2007 年 5 月 31 日 星期四 【乍寒還暖】

唉~ 終於捱到一號了．．．而家先發覺到每個月既一號係幾咁可愛．．．荷包終於可以肥肥白白了，o．．．

今日老細冇返工，所以工作都輕鬆多了，喜歡怎樣就怎樣．．．不過當然仍然在老細既制抓之內啦，我而家每日做既野都係為左fufill佢架咋．．．講真，我都發覺老細開始有點睇唔過眼，佢而家開始寧願自己做埋一份，只係叫我跟住佢要既instruction去做．．．咁仲好啦，起碼大家慳番唔少時間，唔洗我做完佢又唔滿意，又要我改，改黎改去．．．都唔知為乜！而家咪好囉，佢要點就比晒指示我去跟住做，我又唔介意丫，橫掂我做既野佢都唔滿意架啦，倒不如跟佢指示去做，咁仲皆大歡喜啦！

其實比起以前既我，我會好接受唔到，完全會覺得自己係一條廢柴，都唔知係度為乜．．．但係，我而家唔會咁諗，因為我記起A仔講過一句說話，佢話：”有時D野，唔係我地冇能力去做，亦唔係我地冇心冇努力去做，而係根本有D野權力不在我地手上，我地無論點做，點比心機去做，有幾想做好份野去都好，最終都因為冇權力既問題，而令整件事都會失敗，做極都唔會做唔好，老細點都唔會滿意你．．．就係因為我地冇權力！”．．．到左而家，我完全明白了．．．所以，而家既然係老細佢緊張件事做得唔好，怕我拖累佢，咁我又有咩驚O者，咪有佢自己做，我FOLLOW住佢既指示去做囉，咁一定唔會出事喇，我都係配合佢O者，EASY啦！有人比埋指示我去跟，我又何樂而不為呢？係咪？最緊要既係，我可以慳番唔少力氣去做我自己想做既事，而唔洗成日因為同老細角力而受壓力或者頭痛，唔開心．．．或許而家咁係最好既安排．．．

今日我係度PLAN緊一個TRAINING既PROJECT，呢個TRAINING會去到起碼十二月先至會完．．．突然間心中一想，到時自己都未必會係度了，哈！跟手尾果個真係慘喇．．．其實，比起以前既我，我會好懂得為公司安排，點都會做好D手尾，所有野埋晒尾我先至會離開，因為我做人都抱住有始有終既信念．．．不過，而家呢刻我只知道，我即使幾為公司著想也好，都唔會有人會為我去諗同著想任何野！所以，我唔會咁傻仔囉！讓我為自己好好的自私一次吧！

>>June 1, 2007 at 3:13:00 PM GMT+8

2007 年 5 月 30 日 星期三 【乍寒還暖】

今朝早都唔係好願起身呀，因為琴晚都成十二點先至訓呀，所以個人好累呢．．．

返到公司又係開始工作既時候，真係好辛苦，好多野要做要跟番．．．成日基本上都係比老細係度不斷”卒”我唉，我就黎”卒”死架喇，我就黎傻架喇，超級煩同難服侍呢！！

今朝係咁做野，做到個人都冇晒心機，難得十二點可以落一落中心睇一粒鐘counter，雖則落到去都係做野，只不過都可以叫做鬆番一口氣咁．．．而家唔知點解，見親老細我都好冇心機，以前都冇咁既感覺架，而家越來越係咁諗，真係無次見到佢都好辛苦，唔係見到佢黑面，就係因為唔知咩野佢”卒”我攪到我黑面．．．真係好差既關係呀！今日佢又不斷”卒”我交野喇，真係頭痛到爆呀！

下午難得帶tour，索性帶埋d野落中心算，係中心做野我覺得冇咁大壓力啦．．．點知今日帶左班超曳既學生，真係好q煩囉．．．都唔知點解，以前我對住呢類學生完全冇問題同困難，但係而家可能成日心情唔好呀，所以一見到d咁既學生我連脾氣都冇咁好架，我今日係咁易都寸過下鬧過下d學生！唉．．．完左個tour諗住抖下啦，點知老細又打落黎叫我做乜做物咁，好煩．．．好多野我覺得係佢自尋煩惱既．．．我知，竹黎緊六月個活動對佢黎講十分重要，佢就成日大我，話如果我做得唔好我要揹飛．．．講真，我唔係好怕喎，咁有時d野唔係可以話咁鬨利咁理想架嘛，唔通你想點就點咩，好多外在因素影響架嘛，佢都傻架！我估佢仲驚過我，仲怕揹飛過我啦，我d small potato黎架，揹飛邊到我丫，哈．．．況且，我而家都賴晒皮架喇，唔理咁多囉，最緊要盡左本份就ok啦．．．

放工之後一上車好累了，但係都訓唔到覺，好頭痛好辛苦呀！落車之後，行到半路隻左手痛痛地，原來有隻大螞蟻係我隻手度咬我呀，超痛．．．我好辛苦整走左佢．．．點知我搭lift時，我又覺右手痛痛地，shit！原來頭先隻野仲係度，睇黎佢好唔憤氣我整走佢，所以佢死纏爛打都要再咬多我一啖，最後，我兩隻手都好痛，比蟲蟲咬到死呀！嗚！

>>May 31, 2007 at 12:02:10 PM GMT+8

2007 年 5 月 29 日 星期二 【晴】

今日一朝早起身，同平日返工差唔多時間啦，一早出左去堅道果頭見工．．．真係衰，上到去堅尼地城果頭黎塞車，塞足十五分鐘，原來係我落車位前少少位置，警察set左個block查車呀，仲係要續架查，所以攪到大塞車，我最後遲左五分鐘，真係麻煩！今朝搭車時收到A仔既電話，當時好開心架，因為A仔特登打比我鼓勵我見工成功呀，所以好開心．．．不過其實又有點唔開心，因為A仔話佢琴晚訓唔到覺，所以好早起左身喇，當時佢已經返緊工（但係其實佢今日應該係返下夜架．．．），唔，好擔心佢呢，近排成日聽到佢講訓得唔好，真係好心痛佢呀！希望佢可以今晚訓番覺好架啦．．．

"A仔傻豬，唔好成日諗太多工作既野呀，放工就是放工呀，帶太多野返屋企，你只會令自己壓力太大，越會訓唔到覺架，乖啦，好嘛？”

去到見工，成個過程我覺得完全係好似拎人地既料咁囉，總知一句，完全唔似係做interview，而且好似抄我料咁囉．．．加上呢份工既工作內容同工作地點我都好唔鍾意，所以即使佢叫我去2nd in，我估我都唔會晒時間再去喇．．．算啦，當係頭炮既好開始啦．．．

in完之後我搭車返屯門，去左市中心行左一陣，不過冇買野呀，只係買左兩罐野比波波貓食咋，哈．．．希望佢喜歡食啦．．．之後返左屋企果頭，同左媽媽食野，我地食左台灣野，不過唔係好飽，因為兩個人share一退個餐！所以後來我都再買野返屋企食啦，哈！死啦，近日發覺先生越來越肥，肥左好多呀，真係大件事！不過醫生又話我應該肥番少少，等個血壓可以高番少少，但係我又唔想肥呀，因為會唔靚．．．

食完野返左屋企之後訓左一陣，因為個人突然好累好頭痛呀，不過都係訓左一粒鐘多少少咋，因為中途無啦啦接左個電話，係一間機構叫我去面試，但係過程中果個人真係態度好差囉，好似機械人咁，我問一句佢先至好悔氣咁答我一句．．．真係好討厭！我而家黎見工o者，唔係要求佢呀嘛？咁樣態度對人實在令我好激氣呀！加上，佢叫我今個星期五去見，我根本都去唔到，要返工，所以我都決定唔去喇．．．唯有嘆一句同呢份工冇緣啦！

之後下午四點幾再同媽媽落左M記食野，食左麥樂雞餐，因為我欠一張點Jack卡呀，如果儲齊就有365份雞雞食喇，但係都係double左既，激氣．．．頭先食野時貪吃飲左杯凍野，而家攪到好肚痛呀！唉！之後又呆呆悶悶咁返左屋企，又走番上床訓，又係訓得一粒鐘度，收到個姊妹既電話，知道佢工作上好多唔開心唔如意既事，而佢都好關心我今日見工既情況．．．唉，我地一齊努力啦，加油呀！

呢兩日唔食就係迎訓，哈！越來越肥喇，O．．．好似肥左幾磅呀，好可憐！唔想肥肥呀！但係．．．A仔實在太錫我了，佢成日買野比我食，又話御准我食零食，哈！傻瓜，我而家真係好兩難，又有受寵若驚添，哈！又想食好味野，又鍾意佢錫我，但係又好怕肥．．．哈．．．點好呢？

>>May 30, 2007 at 12:55:36 PM GMT+8

2007 年 5 月 28 日 星期一 【晴】

今日十分可憐，因為今朝早起身時，發現自己一個月一次果d又到左喇，唔單止肚痛，而且仲暈暈地，後來我暈左兩次，一次我暈低左，好在妹妹經過見到之後拍左我幾下叫醒左我；一次係我行行下成個人””中左落個櫃度，撞到一野之後好痛醒左，唉．．．好慘．．．所以今日都冇返到工呀，太辛苦太痛了．．．

後來起身之後一直都冇再訓過，中途都做左好多野呀！後來十二點幾先至去左睇醫生，醫生話我血壓極低，上壓都不足一百，佢話呢d情況係好常見係一d又瘦又後生既女仔身上，即係講緊我呀！醫生叫我食多點咸既東西，可以幫助我血壓高番少少，唔好成日都咁低，仲叫我做多點運動，同時叫我輕鬆d，因為壓力都可以影響月經時既痛情況架．．．乖乖地食左藥之後又好似好左好多，順便訓左一陣覺啦．．．

訓醒之後就好努力做功課．．．做咩功課？哈，因為今日有間機構打比我叫我聽日去interview呀，佢比左份paper我做，要我聽日交喎．．．嘩，份野好煩好多野要做架，最後做到我成夜晚九點．．．當然，中間有一兩個鐘係食左飯同睇緊電視既．．．

唔，聽日要去見工了，好似好耐冇做過呢d事喇．．．雖然我又好似唔多鍾意呢份工，不過，當係一個開始都係好事黎既，而且人地咁有誠意幫我轉日子，轉到聽日我放假先見，所以都唔可以得失人既．．．我今日都好乖又寄左五封信喇，希望早日有回音啦．．．

本來今晚係約左A仔架，不過因為我唔舒服，加上聽朝要去見工，所以A仔要我係屋企好好休息．．．YES SIR！不過，真係好掛住佢呢．．．聽晚先見到佢真係可憐喇．．．一個人病果陣時最掛住既就係自己最愛既人喇．．．雖然，琴晚大家曾經為左D小事而發生左口角，不過，咁樣少少既問題係唔會影響我地架，係咪？哈，我地要努力呀！一定可以將問題找出解決方法架．．．相信我啦．．．相信明天就是機會！

>>May 29, 2007 at 3:13:12 PM GMT+8

2007 年 5 月 27 日 星期日 【乍寒還暖】

今朝係A仔屋企留下等村巴時，比我見番一個小學同學，我見佢都已經好似一個師奶咁既樣架喇，拖住果個男人應該係老公啦，一齊搭車去返工．．．我估佢都應該認唔到我喇，不過我一見到佢就認得出，佢同以前個樣分別不大，都係白白地，斯斯文文咁啦．．．不過我冇同佢相認為，無謂啦．．．

今日有少少塞車，比起平日搭村巴既時間遲左少少，不過都冇遲到．．．返到去公司，因為都足足好幾日冇返到去喇，所以超多野要做啦，尤其係D死人ADMIN野啦！做左一個早上，食完個LUNCH之後，同樣地落左中心，因為下午有TOUR要帶，帶完之後就留左係中心．．．今日下午都冇‘咩心情做野，所以上左網睇下D工啦，因為都好耐冇試過個MARKET喇．．．都睇O岩左幾份工，所以好快手咁順便打埋，利用埋公司既資源PRINT埋野，哈！

放工之後約左妹妹行街，因為媽媽今冕話唔煮飯，因為佢呢兩日因為健康問題唔食得野，所以就連我地一家都陪埋佢一份，順便唔洗佢咁粗勞去整野比我地食啦．．．同妹妹行街每每都總會有收獲，因為大家既TASTE差不多，喜歡既類型亦差不多，所以我地成日都買埋D好似樣或者係完全一樣既野返去，或者有時只係同款不同色咁，攪到成日比媽媽話我地浪費．．．其實又幾浪費呢？兩個人著架嘛，唔通買一件兩份咩？大家都唔同SIZE啦，哈！

返到屋企都十點幾喇，好快手就走左上床訓，因為好累了，先幾日都唔係好夠訓啦．．．聽日要同D同事去唱K，因為大老細話要同我地聯誼下咁話喎，哈，聽晚有幾好既野玩同食都係背脊骨落啦．．．不過算啦，嗓當自己去玩囉．．．

>>May 29, 2007 at 6:55:37 AM GMT+8

2007 年 5 月 26 日 星期六 【乍寒還暖】

WOW．．．今日天氣十分差，時好時落雨咁，真係好討厭，D飛蟻胎圍飛，好恐怖！

返到工十分眼訓，因為琴晚訓得六個鐘唔夠，返到去仲要帶TOUR，不過好快攪掂左喇，真係好．．之後就可以好好咁做我要做既文件工作，唉，又係果D野，放左四日假，轉來既就係好多既工作．．．好可憐哦．．．

到左下午，我出去灣仔果邊食飯，食到半路黎落雨，我就好快手食完之後走左去太古廣場避雨．．．真係好彩走得快，我入左去一陣之後就好肉落狗屎咁喇，哈．．．之後行左一陣就夠鐘返中心喇，返到去又係繼續我既工作，好快咁就到左五點放工喇，點知突然想起今日係六．四遊行，所以放工果時十分塞車呀，最後我都係去搭地鐵好過．．．去到荃灣順便又行左十五分鐘，咁又買左兩件平野，哈．．．

返到屋企可以食好好味既意粉餐，YEAH~ 食完之後好快咁走左出去JOIN A仔，因為今晚約左佢入元朗呀！返到黎，陪佢一齊睇電視，不過，真係有點眼訓呢．．．

>>May 27, 2007 at 3:12:19 PM GMT+8