2007 年 5 月 25 日 星期五 【乍寒還暖】

雖然琴日好累，不過今朝都幾早起左身，九點半度已經起左身喇，後來仲同左媽媽出左去飲茶茶添．．．飲完茶之後，我就約左A仔，我先去左元朗會佢，係佢度HEA左一陣之後再一齊出去食野，我地去左食一餐好豐富既壽司，係我請既，價錢都不算太貴啦！之後，我地出左去旺角行街，我地去左D行山鋪睇野，點知最後係我買左好多野，哈．．．都係為左之後行山或者去戶外活動時方便而加添既用品，真係估唔到自己會花錢係呢D野度架！

後來，我地再搭巴士去左尖沙咀行街，行左好多地方，行行下都已經好夜喇，本來打算去食雪榚架，點知搵黎搵去都搵唔到，最後我地去左M記食，食左好多野，哈．．．食完都已經係十一點喇，所以今晚好夜先返到黎呀，十二點幾呢，而家好眼訓呀．．．好慘，聽日仲要返九點囉，點死？

>>May 27, 2007 at 3:06:33 PM GMT+8

2007 年 5 月 24 日 星期四 【晴】

今日下午終於去完個WLILD CAMP返來，真係好辛苦，又熱又焗又多蚊，我比蚊咬到成身都係蚊蚊呀，我估都有成幾十粒囉，好慘，仲晒到黑左添呀，嗚．．．都唔知白唔白得番喇，唉！

返到屋企已經係超累，好快手咁執晒D野出黎，跟住走去沖涼，沖完之後唔知係咪焗親呀，成個人好似好暈好想嘔咁，果刻好驚呀，不過坐左一陣，食左媽媽買回來既KFC葡達後好似好番少少，跟住就走左去訓喇，一訓訓到八點幾媽媽叫起身食飯為止．．．

琴晚，除左因為天氣又熱又悶外，其實都發生左好多事．．．1) 我琴晚同A仔傾左好多心事，當中有好多令大家唔開心既事，我都喊左好多次，流左好多眼淚．．．不過最後，我知道我其實係好幸福，因為，我身邊可以有個好愛自己，好關心自己，好顧及自己感受既男友，甚至係自己將來既老公．．．其實，我已經係好滿足架喇！所以，即使要我點樣我什麼都不怕，什麼都不會介意！只要係我可以有佢係身邊，不要讓我再失去最愛的滋味已經好足夠了．．．2) 我琴晚4點時見到D鬼怪野，而家諗起都有D驚呀，但係A仔佢又見唔到喎，我真係成個人都震晒呀，A仔都知道我好驚，所以佢成個過程都捉住我隻手，又陪我半夜三更出去噓噓，唉，而家都個心未好定咋，頭先同媽媽講起先至可以當下笑話聽咁．．．

唔，聽日同A仔都放假，亦都係我四日假既最後一日喇，所以我要好好珍惜呀！

>>May 25, 2007 at 1:57:25 PM GMT+8

2007 年 5 月 22 日 星期二 【晴】

wow．．．今日放假呀，所以今朝陪左A仔返到黎屯門之後，我就返左屋企，同埋媽媽一齊出去青衣，因為我今日約左去果凌洗牙，而媽媽又係去睇牙．．．

去到美景花園，我同媽媽食左少少野，就去左睇牙醫．．．醫生話我D牙幾好，又齊又冇蛀，洗完之後，醫生話我知唔知我加上顎生左隻智慧齒．．．哈，我真係唔知喎，因為從來都冇感覺！醫生話唔出奇架，因為可能唔痛就唔知架喇，而其他三度地方就好似未有出既跡象，又或者已經生左，不過只係係牙肉下面，所以我唔覺痛．．．其實都幾好彩，因為我識好多朋友生智慧齒時都好痛好慘架，而我都好似SO FAR都冇咩野咁，都好好彩啦．．．

睇完牙之後，我同媽媽去左葵芳，我地行左一陣街，不過都好似行來行去都好似冇咩特別咁，之但係我地都到野呀，我就買左一件背心外套，媽媽就買左三件衫．．．哈，我買左一枝洗面膏比A仔呀，因為想佢開始注重下個外表啦，要KEEP住靚仔先待架嘛，哈．．．而我就係買左盒平野EYE SHADOW啦，共有十八隻色，純粹貪玩咋，哈！

行到咁上下，就約左妹妹去"爹地蕃薯"(BISTRO DELIFRANCE)度食野，嘩，好味又好飽，不過，我都好忍口架，唔可以食咁多，都係比媽媽同妹妹食多少少啦，哈！食完之後，我地再行多左陣，不過都睇唔O岩野，所以好快就趕番屋企，睇”溏心”．．．

聽日要幫A仔帶CAMP呀，剛剛先執好野．．．死啦，都有少少擔心架，天文台話要有雨落，都唔知點好，好麻煩啦．．．不過，唔緊要，因為我知道有A仔係我身邊，我什麼都不需要怕，係咪？至少，已經有佢幫我持左好多野，我個袋都不知輕左幾多，哈．．．真係好開心有呢個男朋友，佢真係越來越錫我，我好滿足呀！

>>May 25, 2007 at 1:46:23 PM GMT+8

2007 年 5 月 21 日 星期一 【溫暖】

今日朝早遲到呀，因為天雨關係而塞車啦，真係麻煩呢．．．返到去就o拿o拿聲攪掂埋手上既urgent野，之後就走左落中心帶tour喇，因為今朝帶一班特殊學校既小朋友，其實，佢地都幾cute丫，都唔知點解我d同事咁怕佢地架，又話佢地係”李小龍”(因為佢地成日係度叫)，又話佢地傻傻地，又多手又鍾意攪呢攪路．．．咁無可否認，即使我今日已經三番四次咁同佢地講規則，要佢地唔可以用雙手四處去掂野攪野，但係最後都有個小朋友多手按左我地部lift既求救制，攪到成個中心響晒警號，真係幾狼狽下架．．．

之後帶完隊，無啦啦有個男人走左入黎話要搵黎小姐，我都覺好奇怪，原來佢係星期日會黎參觀既團體負責人，佢想了解多少少我地既內容．．．呢個男人原來係一個退休警長黎架，而家佢負責交通安全隊既工作．．．睇佢一面認真既模樣，真係好勁呀！佢真係好詳細佢問清楚所有野．．．原來佢想要佢交通安全隊既成員考章，所以佢先至咁緊張啦．．．佢令我感到佢一股對教育下一代既使命感，真係好羨慕佢仲有呢一股既心同火呀．．．我？好似已經冇左好耐喇，哈！

下午繼續做好多我唔想做既文件工作，真係好死，而家日日都係prepare下個月既活動，好辛苦呢！日日都頭痛到爆呀！可憐！放工之後，就即刻去左搭巴士入元朗，因為約左A仔嘛！上車之後同左個好姊妹傾電話，講左好多我同A仔出年既計劃同安排，佢好為我開心呢！真係好多謝佢呀！！

聽日開始連續放四日假，真係好喇，聽日就會去青衣洗牙仔，唔，希望唔好痛啦．．．之後A仔話會陪我去架，仲會之後請我食雪榚添，點知後來佢比老細改左佢返工，聽日放唔到假，而家變左媽媽陪我去喇，嗚．．．不過都好，可以承機同媽媽去行下街，行下青衣同葵芳都好架，係咪？

>>May 22, 2007 at 12:02:08 PM GMT+8

2007 年 5 月 20 日 星期日 【乍寒還暖】

琴晚好唔覺意唔夠十一點就訓左覺，攪到A仔佢唔敢嘈醒我，又怕攪到我訓得唔好，所以佢最後一個人走左廳度訓．．．哈，真係好過意唔去呢！！今朝我見到佢訓左係梳化度時，真係幾擔心呀，我知道佢唔開心，因為我琴晚冇陪到佢就好早訓著呀，真係激死我呢！！攪到A仔唔開心，我真係好過意唔去，今日成日我返工都心情唔好呀，直至佢下午五點幾時再CALL我，佢仲約我食飯之後，我個心先好過少少．．．　

放工果陣即刻做番少少野，希望可以TUM番A仔佢開心啦．．．跟住我地去左海麗邨果頭，約左個朋友仔一齊食日本野．．．唔，D野好似麻麻地好味O者，不過勝在唔貴囉！食完之後我地一齊搭西鐵返屋企，真係開心可以同佢一齊搭車．．．

今日返工成日都冇咩MOOD呀，一來可以擔心A仔佢唔開心啦，二來今日既工作真係好沉悶，文件又是文件，加上老細又再次比一D好唔合理既要求，我今次好叻，識得同佢SAY NO，A仔佢都讚我講得好，HEHE~ 不過，真係好辛苦囉，成日都要咁樣去相處，點解唔可以好好地架呢？真係唔明白呀！！

雖然之前A仔佢嬲左我，不過，佢同樣好錫我，頭先佢出街，都不忘買野比我食，係好多好好味既野食．．．唉，你話丫，點減到肥呢？哈．．．

>>May 21, 2007 at 2:39:27 PM GMT+8

2007 年 5 月 19 日 星期六 【颱風】

唉，琴晚都唔係訓得咁好，可以擔心今日既活動同天氣狀況卦．．．

wow．．．今日既天氣真係超級恐怖．．．朝早七點起身時，相信係今日全日最大雨既時間，佢大雨既情況就好似黑雨咁樣，係咁倒水落黎咁，好得人驚呀！但係，最驚都莫過於好驚真係黑雨呀，所以今朝早一起身時昂刻開電視睇下個天氣狀況，好在乜都冇o者，個心都定少少．．．到左出門口果陣，d雨好似細番dd咁多，都好過冇．．．

返到中去中心時真係一腳踢，超忙，因為今日要攪活動呀，我今日成日都企，真係差唔多企左八個鐘有多呀，好可憐呢！不過，好在今日天公都算係造美啦，起碼冇什麼紅雨黑雨，都好在唔洗取消個活動，如果唔係真煩死喇．．．今日既活動最終都有成六十幾人黎，比起之前預既五十人多左十幾個人，都係一件幾開心既事，而且d氣氛又真係唔錯，加上d義工又好幫得手，所以今日既活動十分之smooth，真係安樂晒，咁就攪掂左一彈野喇！

唉．．．之不過跟住落黎仲有大把野要做呢，而家只係一個開始黎架咋，唉．．．唯有為做而做啦，呢度就係咁架喇，想做自己想做既野？發夢啦．．．都係行屍走肉既形式最o岩呢度既情況架喇，老細話乜你都say yes，佢想點咪做囉，最緊要係聽話，唔好反佢就ok啦．．．不過認識我既人都知，我根本就唔係呢類既人，所以好辛苦囉．．．不過，我會努力的，捱埋餘下既三個多月啦．．．

放工之後，就走左去搭巴士入元朗，因為今日約左A仔．．．本來諗住：真係好，終於可以好好坐番下，休息下，食下D餅咁．．．點知．．．冇位坐企足全程呀！好慘囉．．．對腳好似唔係自己咁，完全係殘廢左咁．．．之後去到元朗JOIN左A仔，我地去左扒王之王食．．．嘩，我地食左一個16 OZ既美國肉眼扒，超正呀，不過好貴，要成二百六十六蚊一份！之但係，都覺得係物有所值，因為真係好好味，D肉好林好好味呀！真係開心！食完野之後都將今日既悶氣累氣都係咁易消除左．．．食完野飽飽地，我地就去左行街街，承機又可以輕鬆下啦．．．不過，當返到屋企果陣，我又開始有點懶起來喇，不覺意咁訓著左！好在A仔叫醒左我起身沖涼咋，哈！

明天又是返工天，又要開始做下個月的活動內容了，仲有七，八月TRAINING既工作，天呀！好多野做呀．．．我就死架喇，好痛苦呢！真係忙到飛起呀！！！有時候真係感到好疲累，問一問自己為乜？真係唔識得答囉．．．只可以話．．．我為左份糧而咁辛苦．．．好無奈嘛？

>>May 20, 2007 at 2:34:58 PM GMT+8

2007 年 5 月 18 日 星期五 【颱風】

wow．．．今日天氣十分之差，簡直係恐怖份呀．．．！五點幾果陣有一下好勁既雷呀，真係成個中心都好似地震咁，好恐怖呀，成間野震晒，我幾驚間中心會塌落黎呀！好在走果陣d雨細左少少．．．

個人今日都好疲累，朝早就帶左個tour，已經係累到死左咁，即使放完假都係好累，唔知點解．．．可以未病好啦，所以個人好住拖住黎走咁，唉！下午果時，聽日黎幫手攪活動既樂隊EMPTY黎左SET場，咁我都幫埋一份啦，順便都醒佢地一人一枝水啦，因為：”你要識做呢．．．”呢D野唔少得架啦，人地話晒都係義務幫你，雖然大家都係互利情況下合作，但係我都好識做既．．．

等佢地練歌時，我就去左做一件好無聊既事．．．其實早前曾經提過我地中心失竊，後來我地問到管理處睇番果排裝修時後門既錄影帶，因為我上司佢都一個人睇唔晒架，所以而家要我地咁多個同事輪流去睇，我今日就去左睇一個鐘，睇到人都呆埋，成粒鐘都係得兩個人影，仲係要同一個人，就係清潔阿嬸，真係O晒．．．我同事話，我算好，因為佢之前試過成粒鐘一個人影都冇囉，唉！真係可憐，咁既狀況唔知維持幾耐先睇得晒．．．聽講老細聽日都要繼續睇，而我聽日就要攪活動．．．

死啦，都驚驚地，一來聽日係我頭炮活動，二來聽日D天氣咁死，我真係好驚影響參加者人數呀，唉．．．希望天父神可以眷顧我啦，讓我今次既活動可以成功啦！A仔就好啦，聽日同後日都唔洗返工，真係羨慕呀！我都好累好想休息，不過聽日攪活動，我都總係好似個心成日好似有野未做咁，好頭痛呀！好驚有咩錯誤咁，好擔心呀！

可憐既波波，今日又要再出去受難喇，真係好慘！不過，我知佢已經盡左力好乖D架喇，因為佢初時都好乖比人去剪毛，不過後來係因為不耐煩同驚，所以又惡起上黎．．．真係可憐了！而家返到屋企，因為佢滴左D去蚤既藥，所以24小時都唔可以掂佢，我知道佢知架，佢都好想人摸下佢呵下佢架，但係我地又唔可以喎，佢好失落呀個樣，唉．．．真係好想攬住佢錫下佢，但係．．．都要待明天下午先可以囉，真係好可憐！

>>May 19, 2007 at 2:17:46 PM GMT+8

2007 年 5 月 17 日 星期四 【綿綿細雨】

wow...今朝早九點幾十點就比唔知樓上定樓下既裝修聲嘈醒左我，唉！其實我琴晚都訓得唔係咁好，成晚都係轉黎轉去咁，都冇乜邊幾個鐘係熟睡架，去到朝早五點鐘，又比波波貓一聲既尖叫聲嘈醒左，我好驚佢有事，所以都即刻走出去睇下佢，點知佢只係想食野咋，唉．．．之後我都成兩三個鐘都係好清醒，爹地妹妹起身既一舉一動我都好清楚知道．．．直到十點半都終於起身，又比媽媽既電話嶵聲嘈住，唉，好痛苦呢．．．所以起身之後就攸左一d好無聊既事，就係翻閱番d舊雜誌，睇下有咩有用既就剪出黎留低竹日後for reference．．．

跟住十一點幾跟左媽媽落街，順便帶埋波波貓落去剪毛．．．真係好可憐！總知一句講晒，今日為左波波真係好奔波囉，好累好疲於奔命！而且見到佢又好可憐咁，真係好慘．．．叫到傻晒咁呀，唉！今日都未整好架，聽日仲要去受苦呢，真係好慘！

攪掂左波波之後，我同媽媽返屋企都成四點幾先至有野落下肚，都係食公仔麵咋，唉．．．跟住，我就趕住出街喇，因為今晚約左妹妹出去尖沙咀，本來我真係好累好唔想出架，但係．．．實比妹妹罵死，所以都係出左去喇．．．今日天氣好差，我出門口時都冇落雨既，點知出到尖咀超大雨囉．．．好在妹妹有帶遮，如果唔係真係麻煩喇！我地都行左好多地方，而且都有d收穫．．．想知係咩？得閒睇下我個msn space就知！不過都要時間擺上去啦，哈！

好累了，明天要返九點呢，要訓了，各位早抖喇．．．

>>May 18, 2007 at 3:07:27 PM GMT+8

2007 年 5 月 16 日 星期三 【晴】

嘩~ 今日d天氣好"藝"住呀，成日想落雨但係又落唔出喎，好令人感到辛苦，又悶熱又焗速咁，唉．．．所以今日個人都好唔舒服，個碘又痛又暈，真係痛到爆呀．．．好辛苦！仲有，近排唔知咩事，下巴勁爆瘡，攪到我連妝都唔係好敢化啦．．．琴日有個好姊妹問我去唔去上化妝堂我都耍手擰頭呀．．．

琴晚同左個朋友傾msn，佢以前學過化妝，而且都有做開freelance，所以順便諗住問下佢幫人化妝要幾多錢，等我都可以有個預算．．．但係呢個朋友實在太好喇，佢話比discount不特止，仲話佢果份唔收我錢添．．．真係正一傻婆！其實又諗諗下真係慳好多，因為真係冇咩錢呀，真係樣樣要計得精明d．．．唉，真係煩惱！

本來今晚有打算去A仔度既，不過後來因為一D原因唔去啦，加上其實自己都唔係太舒服，所以算啦．．．聽日又放假了，所以約了妹妹放工後行下街．．．都好似好耐冇好好咁行下街買下野喇，哈．．．都好既，睇多D野等自己冇咁OUT，哈哈．．．

琴晚好乖咁終於填好份稅單，今日仲寄埋添．．．唉，唔知又要交幾多錢呢，真係無次都好頭痛既事．．．之前試好好有得回稅比我，又試過唔洗交，不過今次睇黎冇咁好彩喇，哈！不過呢個係公民責任黎既，係咪？今日仲寄左兩封信出去添．．．唔，聽日放假，又可以有時間睇睇有冇好工喇．．．希望早日可以搵到份好工，可以穩穩定定咁啦．．．我都知其實我都係時候要好好計劃下將來架喇．．．但係我好想讀書，好想從另一方面發展我既事業．．．真係好煩惱呀！！！

媽咪今日都有同我傾開呢D既話題，佢好想我繼續呢份工，可謂既係，我一來真係同呢份工既性質好唔夾，二來我同政府既工作模式都好唔夾，三來呢度真係冇咩發展空間，一世都只係係原地架咋，我唔想咁就一世，我都仲有少許憧憬既．．．唉．．．雖然話女人結左婚之後，有自己頭家就唔同左，但係，我都仲可以有自己既理想架嘛，係咪？而家仲唔做，唔通等到七老八十先去咩？真係好唔明媽咪點諗架．．．

媽咪話聽日打算同波波貓去剪毛，可憐了，波波今次有難了．．．祝福它吧！

>>May 17, 2007 at 3:20:22 PM GMT+8

2007 年 5 月 15 日 星期二 【綿綿細雨】

今日係放假天，本來諗住可以訓多一陣既，點知無啦啦唔夠十點唔知樓上定樓下係度裝修，又轉野又砰砰bom bom咁，嘈到我同A仔都頂唔順呀，最後都十點半起左身，真係討厭啦．．．

起身之後睇左陣電視食左少少野就出發陪佢返工，哈，去到山景仲去左大昌，見到有雪榚特價喎，加上我同佢果一刻都好想食，就咁就買左喇．．．今次死得啦，又話忍口，而且A仔又話會控制住我既，點知都係咁．．．真係大件事！我琴日其實都唔係食左好多野咋，早餐已經冇食，到左一點先食一個自製好細既飯盒，到左四點幾食左一包好細包既威化餅，返到屋企五點幾食左包蝦條同1/3既mousse蛋糕，夜晚果餐都係食左兩啖飯同少量送
o者，但係個肚腩就好似人地有左四個月咁喇，都唔知點解．．．好煩惱呀！成日想做運動減肥，一來冇時間，二來自己懶，唉．．．真係死得，點keep呀！

返到屋企之後，等媽媽睇完個股市，都成三點幾先至落樓去飲茶．．．今日我請媽媽飲茶，媽媽特別開心！去飲茶時，媽媽有個朋友又帶埋佢個孫女黎，咁我又承機玩bb啦，哈．．．bb已經成歲幾，已經識得行行地，所以我都拖住佢係咁行，又帶佢上落梯級，佢都幾叻叻架．．．不過同bb玩真係幾累下，而且都幾花心機．．．哈，我諗到喇，如果真係要減肥，我估揍bb一個星期啦，包會一定減到呀，哈！

跟住下午返到屋企，就開始積極上網搵下好工，因為確實係時候開始要搵下喇．．．講真，貴精不貴多既，最緊要係搵到d心水工啦．．．之後，收到一個好舊既朋友既email，係一件喜事啦．．．佢話我知佢上個月剛生左個女（其實我一直都知佢大左肚架，唔係唔知．．．）因為近日太忙同要坐月，所以先至冇通知我．．．佢send左佢個女既blog我睇，嘩，好得意呢，而家既bb真係同以前既好唔同，我地以前邊有咁精靈可愛架，個個都呆豬豬咁既．．．但係呢個bb好唔同，出世左十幾日咋嘛，已經多多表情，多多動作喇，好得意囉．．．眼仔大大，有少少似鬼妹仔咁，好cute呀．．．雖然今日同bb仔好有緣，不過完全冇勾起我令我想生番個玩喎，哈！

呀，唔知今日A仔食左我整比佢既愛心飯盒未呢？唔知好唔好味呢？唔，希望OK啦．．．本來今日打算整咖喱過佢食既，不過因為太累了，而且A仔唔想我太趕太忙，所以都叫我唔好整喇．．．真係SWEET，佢太體諒我了，O．．．

>>May 16, 2007 at 12:27:35 PM GMT+8