2007 年 1 月 21 日 星期日 【微冷】

今日返工時真係好眼訓呀，因為琴晚係度追電視，睇prison break．．．真係好緊湊既內容，而且當中都有d幾核突恐怖既場面．．．不過，我一向都唔多怕睇呢d野既，哈，反而屋企人一路睇一路係度叫囉，傻架，都唔知有咩驚！

今日好忙，朝早又係落左中心幫手睇檔，因為成日星期一都係唔夠人手用架，尤其呢十幾日有個同事放左大假就更加麻煩．．．希望佢快d返到黎，咁大家可以冇咁辛苦喇．．．

下午同樣帶tour，之後比IC叫左我入房，話就話同我傾野，其實係”照肺”囉．．．佢話我唔識得管d細喎，同埋話樓上d大粒成日好似對我冇信心咁，覺得我好似好唔成熟，好似會好多野都做得唔好咁．．．嘩，我心諗，我唔係冇野做架，不如佢地幫我帶tour丫，咁我咪可以好專心一致咁去做同諗d新既program出黎去增加人流囉．．．加上，佢地班大粒只係識得諗d好表面化既事，永遠唔會諗清楚實質係咪可以做得到，真係好麻煩囉．．．唉．．．好在，暫時我都感覺到IC都應該保我既，佢都好希望我點都可以捱到一年，而我都答應應該可以既，與佢並肩作戰！唉，跟住落黎有好多野要做野，我都希望可以成功，做得最好，唔可以比班死人大粒睇死．．．

跟住放工之後就急不及待咁入左元朗搵A仔喇，哈！我地睇左呢兩日佢夜晚錄既”如來神掌”呀，呢幾日亞視重播，比佢發現左，但係因為太夜做，所以唯有錄左佢放工返去睇．．．我放工到左元朗之後，佢就踩佢架私家車（BMX)黎接我，哈！跟住返到去快快趣食完野就開始睇電視喇．．．我地最後睇左成兩三個鐘呀，所以好累呢．．．明天又要返早了，要早點訓喇．．．

>>January 23, 2007 at 11:48:39 AM GMT+8

2007 年 1 月 20 日 星期六 【颳風】

今日成日都好努力咁去寫proposal，因為黎緊要開始動工喇，哈！今次要做鑊勁既，yeah~ 一定要有個好表現同效果呀，我要證明比人知我係有用處，有價值既，努力呀，黎曉寧．．．

下午又係要帶tour，今次帶d家庭，又有老人家又有家長又有好細個既小朋友，d小朋友真係好惡攪，超頑皮呀，攪呢攪路，超煩，又唔聽話，d家長又唔理d仔女喎，真係討厭．．．不過，我都有辦法攪得掂佢地既，只不過係太耐冇用過d招數喇，係初頭有d唔係好掂，不過後來都ok既．．．

今日放工果時同佢傾左個電話，之後大家澄清左好多野，我覺得好開心，亦都好appreciate大家可以咁坦誠咁去傾，我好希望大家可以keep住咁落去呀，可以讓大家既一段感情可以越來越好．．．我會加油的！我相信只要對自己，對佢，對神有信心，什麼事都可以解決得到，亦可以做得最好．．．加油！

今日成日都唔敢食藥呀，因為要好用神工作，所以怕眼訓，冇食到．．．哈，比醫生知道一定罵我．．．因為我係一個好唔聽話既病人黎架，hehe~不過今晚我會乖乖食番．．．而家等得好心急，一路睇住top model，一度係度等prison break做呀．．．快d夠鐘啦，好想睇呢！心急心急要睇呢．．．

>>January 21, 2007 at 12:52:05 PM GMT+8

2007 年 1 月 19 日 星期五 【微冷】

今日上下午都要帶tour，真係好累，加上食左藥，所以好累好眼訓啦．．．

雖然今日曾經發生兩次電話上既誤會同唔開心既事，但係我有信心去面對，亦會抱著開心輕鬆既態度去處理同面對，因為我相信大家會有成熟度去處理的，既然大家那一刻有這樣成熟的決定，那為什麼不可以更豁然開朗，更成熟咁去協調一個更好的方法嗎？而且，我相信大家都希望可以日後有一個更好更適合的相處方法，要不然就不需要有那個再走在一起的決定了，亦不會要讓自己繼續浪費時間同光陰吧，對嗎？

我係唔會氣憤或者氣餒的，因為．．．希望在明天丫嘛！只要有信心，什麼都可以解決得到，對嗎？因為我對佢，對自己，對件事都有信心嘛，所以．．．又有什麼好怕呢？只要大家好好傾談同協調，什麼都可以達致最好的結果啦！反而，我好想快d可以好好clarify清楚一點事啦，因為我唔想再成日為d小事或者根本未澄清清楚既事而令大家誤會同唔開心，更會容易影響到大家既感情添．．．所以，早早處理會是更好吧！我會等待他的回應的．．．

>>January 20, 2007 at 2:15:01 PM GMT+8

2007 年 1 月 18 日 星期四 【微冷】

added．．．

琴日電頭髮果時因為有時間，所以特登帶左本新買既書去睇．．．其中睇到有一個部分好有反醒，所以希望在‘此與大家分享一下．．．

筆者在書內提到，有好多人對於”快樂”往往覺得很遠，很高不可攀咁．．．但係其實要真正得到快樂並不困難，只要能夠構成快樂的五種因子便可以了．．．照HAPPY這個英文字看，若要抓住HAPPY，就不能只是一味地自怨自哀，反之是要．．．

1) 盼望 (HOPE)：
　在悲傷之餘，仍要給自己盼望，人可以”失望”，但不應”絕望”！如果老是告訴自己：”一切都完了！”而不往　正向的方面去思考，那麼很容易就會一輩子陷在絕望的死胡同裡．
2) 行動 (ACTION)：
　在悲苦的環境裡，更要加倍努力，才有可能突破，超越眼前的困境，空悲切好比一個人坐在搖椅上耗力動　個不停，但卻無法向前跨進一步．
3) 禱告 (PRAY)：
　在悲痛之中，千萬記得禱告，邀請上帝來跟您一起並肩作戰，讓自己如有”神”助，戰無不克．
4) 忍耐 (PATIENCE)：
　無論環境再不如意，一定要懂得忍一時之氣，不當的宣洩與遷怒不但於事無補，反而會把情況越弄越糟，　在困境之中，需要的是”韌性”而非”任性”！
5) 渴慕 (YEARN)：
　處在艱困中時，更要懂得渴慕神的話語，謹守全每日讀經靈修的好習慣，要知道，上帝常會奇妙地藉由聖　經中的話語來安慰人，為人開路．

其實，一味消極地怨天尤人，哀聲嘆氣並不能改變眼前的一切，反而會讓您越”唉”越悲哀，越怨心情越低潮，唯有在困境中積極地盼望，行動，禱告，忍耐，渴慕，才能夠走出憂境，擁抱HAPPY！

>>January 19, 2007 at 2:50:17 PM GMT+8

2007 年 1 月 18 日 星期四 【微冷】

今日好可憐，因為一早起身就發現自己去小便時出現問題，我懷疑自己係尿道炎，所以最後請左病假去睇醫生．．．醫生話我可能忍尿忍得太多，所以攪到細菌感染．．．真係好慘呀！唉！

跟住真係d衰野一不離二架，我下午諗偽帶我隻貓貓係我張床落地，點知就咁扭親條腰喇，唉，而家都係痛緊，好慘呀！我都好少咁樣扭親架，真係唔知點好．．．唉！

不過，好在下午既時候可以陪左A仔行街街，我地行左好多地方，睇左好多野，真係好開心，陪左佢買左好多好野食，哈．．．佢最鍾意食野架喇，真係傻豬．．．之後我就送左佢去返學，佢今日要上普通話班呀．．．我之後就返左屋企喇．．．可能食左藥太眼訓了，所以返到去就訓左一陣啦，訓醒之後好左少少啦．．．

聽日要返工了，仲要上下午都有TOUR要帶，真係死喇．．．仲要同IC傾我既PROPOSAL添呀，真係辛苦．．．唉！

>>January 19, 2007 at 2:19:26 PM GMT+8

2007 年 1 月 17 日 星期三 【乍寒還暖】

hehe~ 今日訓到好晏先起身，即使琴晚已經早左訓，今朝遲左起身，但係都仲係好累好眼訓．．．可能因為星期二晚冇乜點訓啦，同埋訓得又唔多好，所以訓番多都係補唔番，哈！

今朝起身之後陪左佢一齊搭車番屯門陪佢返工，去到佢中心附近之後我陪左佢食飯，行左陣街之後就送左佢返工．．．之後我就返左屋企喇，陪左媽媽出去美孚，又係同二舅舅二舅母佢地飲茶茶，唉！跟住我地返左屯門，我就去左電髮喇．．．YEAH~ 又電左個靚頭，個人都醒神d既，仲有，新既生活就要有新既形象去襯托啦！希望佢見到我既新髮型都讚好啦！

唔，聽日又要返工了，又要帶tour了，連續四日都有tour要帶，真係好死既生活呢！佢就好啦，可以放番三日假，真係令人羨慕喇．．．不過佢放假我又陪唔到佢了，真係失望呢！

>>January 18, 2007 at 1:28:16 PM GMT+8

2007 年 1 月 16 日 星期二 【雨】

哈，今次既dup骨團十分之難忘，我相信自己好難可以忘記2007年1月17日這一個日子的了，因為實在太令人感動了．．．因為有一件事終於有了一個結果，而我相信這一個決定唔係大家輕率，衝動，唔理智架，我相信佢係真心的，我相信神當中係有一定既安排．．．所以今次既旅程我十分之感恩，因為我對他對自己都很有信心，我的信心再次出現了，它回來了！我知道我將要好好把握同珍貴神所安排給我的機會．．．

今晚回香港後，由於實在太不捨得了，亦很想繼續珍惜及把握會個可以與他相聚的時間及機會，我願意繼續留在他身邊陪伴著他．．．真的很開心可以與他再聚．．．他每一句說話，每一個表情，每一個笑容，每一個動作．．．好像已經久違了，很久沒有很認真的看過．．．但在這一刻，我卻可以再似看得到了．．．心中真的很是高興，那種感覺是不能夠形容似的．．．我很希望他亦是一樣，感受得到我對他的真意！

是次既旅程，除左可以找回失去已久的人和感覺外，亦有很多物質上的收穫．．．我們買了很多東西啦，有吃的有看的．．．哈！真係一個很愉快既旅程，即使這兩天都係下著雨，都不會令我地既興趣去遊玩，哈！希望遲些仲有機會同佢出去玩玩啦．．．yeah~

>>January 18, 2007 at 1:23:30 PM GMT+8

2007 年 1 月 15 日 星期一 【微冷】

wow...今日亦都係超級累啦，因為成日都係office度寫proposal囉，就黎死喇．．．一日之內寫好兩份，我都覺自己幾勁．．．當然其中一份係draft啦，邊有真係咁勁丫．．．唉！因為之後將會有一連串既活動要攪喇，唔可以再乜都唔做了，係時候要出招！！！

希望份proposal掂啦，因為d野好急好趕架喇，我都有d汗顏，因為好快firm左個proposal之後有好多野要跟住黎料架喇，唉．．．由二月至三月尾都將會馬不停蹄咁有野要做，差唔多個個星期六日都要返工咁滯，好可憐哦！今日好攪笑，有個朋友既同事打比我，想約book tour，佢個同事仔好好笑，好似樣樣都唔知咁．．．我初時都有d想玩下佢，不過算啦，見人地係細路女，所以冇啦．．．之後個女仔無啦啦打去我手提，我極奇怪．．．我問佢點解有我手提，之後佢好驚話：唔係我打架，係ｘｘ（我朋友個名）打比你架咋！哈，超好笑！

好開心，今晚會出發北上了，可以好好享受這一天多的時間，好好的去relax下了．．．希望dup完返黎可以個人輕鬆晒啦，因為個膊頭同頸真係超級梗晒，好緊呀．．．真係好痛下．．．快d快d去dup骨骨啦！yeah~

好啦，聽晚返來再同大家報導啦，see u．．．

>>January 16, 2007 at 12:50:36 PM GMT+8

2007 年 1 月 14 日 星期日 【微冷】

今日超累呀，因為一朝早已經落左中心，因為中心唔夠人手呀，我要落去幫手看counter啦；二來，下午有連續兩場tour呀，簡直係死左咁．．．係咁企住講野，真係好累啦，唉！

今朝同IC開會，真係慘，怇要我聽日要交個proposal比佢呀，天呀，得一日時間咋，傻咩．．．好在聽日冇tour要帶，如果唔係死左囉！唯有聽日日都要留係office度做野啦，唉！辛苦．．．

今日收到個好消息．．．就係．．．我期待以久既dup骨團終於可以成團喇，真係好呀，我等左好耐，真係超級有需要去dup骨呀，成個人好似散晒咁呀，周身骨痛．．．可能先排病黎，之後就成日訓得唔好喇，一訓得唔好就好容易周身骨痛喇，唉．．．而家終於可以去relax喇，yeah!! 聽晚出發，明晚回來，真係實在太好既安排．．．之後星期三同四又放假，哈，可以抖抖．．．開心！不過之後星期五番黎又開始要博殺喇！

>>January 15, 2007 at 11:50:33 AM GMT+8

2007 年 1 月 13 日 星期六 【微冷】

今日返工好悶下，因為今日冇tour要帶，所以成日都坐左係office度，更加唔想做野，哈．．．所以成日都好"hair"下咁過！

今朝好辛苦，簡直好似死左咁，因為琴晚唔係好訓得到，成晚好似冇訓過一樣呀，所以今朝超級唔想起身，係十萬個唔想起身返工呀．．．我賴左成十五分鐘床先肯起身，波波貓一早聽到我鬧鐘叫，就同個鬧鐘一齊叫喇，佢就慘喇，企係我門口等足我十五分鐘先出黎比野佢食，哈！

返到金鐘，去左買早餐．．．今日買左份好健康既早餐，係紫米腸粉同黑豆漿一枝．．．哈，都幾好味丫，今次係第一次食呢個早餐，其實係因為天氣凍，唔想食飽，凍冰冰咁，想食熱野，所以就買左佢．．．其實星期六日返早（九點）都好差，因為要幫助開館，好辛苦架，尤其係開d死人電腦，要跪晒地，pa晒地咁開架，真係開完後都一身汗．．．我第一次開果時起番身真係有d"mou低起身見頭暈"架 ．．．哈！到左下午，媽媽同妹妹過左黎金鐘搵我食飯，我地去左灣仔一間食上海野既地方食，都唔錯，有人請梗係好架，哈！之後妹妹請左一個好美味既DOUNUT我食，簡直係沉悶既生活中加添一點振奮呀，多謝你，妹妹！

終於捱到放工，唉，十分之眼訓呀，一上車又係訓，一醒已經係就到站果隻，幾狼狽呀！又係烏烏下咁行番屋企．．．好在返到屋企有餐好豐富既晚餐，有扇貝有蝦咁，好味，突然又振奮左．．．不過，而家又開始眼訓了．．．唉．．．今晚要早點訓，因為聽朝早要同IC開會傾新年PROG既野，下午仲要帶兩個TOUR添呀，你話點死呀！我都唔知果個同事佢點BOOK野架，有乜理由同一日比兩個團體黎，仲要D時間咁貼，根本我地既MANPOWER都唔夠，佢真係有問題架，做又唔洗佢做，痴線咩，做死人咩．．．唉！鬼咩，人地大牌，點夠人玩丫．．．

>>January 14, 2007 at 1:51:47 PM GMT+8