2007 年 6 月 13 日 星期三 【乍寒還暖】

今日都係忙，忙，忙．．．忙到放工前十分鐘都仲係度開緊會囉，唉．．．好多野做，好似做極都做唔晒咁，而d細既又幫唔到手喎，我老細又一味叫我搵佢地幫手做，之後我去跟番個進度．．．佢都傻架，咁同我自己做有咩分別呀？最後咪又係攪到一鑊粥咁，要我自己跟番．．．既然係咁既，不如自己做．．．

放工之後十分之趕呀，因為今晚要去土瓜灣上運動攀登，嘩，都幾悶下．．．其實係因為個阿sir既presentation好差囉，好似成日都係度講埋晒d廢話咁．．．不過，中間有度講繩結，我先至喚起下我d興趣繼續去聽．．．上完堂之後，個衰A仔玩我囉，明明陪我去搭車，之後我上左車後轉個頭唔見左佢，等我以為佢係咪見到有車，所以走我好快．．．後來我打比佢，佢好似知道晒我既一舉一動咁，仲叫左我上去上層．．．點知．．．原來佢跟左我上車呀，哈．．．個傻豬又玩我了．．．不過．．．我鍾意喎！哈！好開心呢．．．最後佢陪住我返入去屯門！

入左屯門市中心後，我地因有點肚餓，所以我地去左食宵夜，食完之後飽飽咁走．．．好開心今晚有A仔陪我呀！我地聽日又見面了，因為會夜晚一齊去上堂嘛，上完之後我地會一起同D朋友上大陸去DUP骨骨．．．星期六我放假，所以可以去玩玩喇．．．好耐冇DUP過骨了，真係好，可以輕鬆一下了，近日個人真係好累好累呀！！日日做到冇停手呀！天呀！！

星期日是父親節，但係都唔知點同爹地慶祝好，因為我果日都要返工呢．．．想買衫比佢，之但係佢之前又買左好多．．．唉，點好呢．．．要同妹妹商量一下先得喇．．．

>>June 14, 2007 at 3:40:12 PM GMT+8

2007 年 6 月 12 日 星期二 【溫暖】

唉，就咁就過左一日既假期了．．．講真，我係一個坐唔定既人黎架嘛，要我成日都留係屋企休息，其實休息真係一樣好好既野，或者難得可以留係屋企好好咁去執下野都係一件好事黎既，只不過，真係有點覺得悶囉，當你要執既野已經執好，要做既野都已經做好既時候，真係d日子好難過囉，唉．．．

基本上今日一整日都是陪媽媽既，陪媽媽留在屋企作戰股市，陪媽媽去飲茶茶，陪媽媽下午再作戰股市後，媽媽就出了去做瑜伽，我先至有時間一個人係屋企靜靜地上下網，順便搵下工咁，之不過近排都好似冇咩心水工咁，所以都冇寄過信呀！

到左夜晚，媽媽話因為做完運動太累了，所以不煮飯，我們，仲有妹妹三個，一齊去了山葵食日本野，都唔錯吧，好食而且不太貴，好飽添．．．食食下天氣突然轉變，十分恐怖，完全睇住佢由天陰至大風，再繼而有閃電出現，就下起大雨來了．．．好恐怖，又打雷又閃電吧！本來我今晚打算食完飯之後去接A仔放工的，順便同佢一起回元朗，但係媽媽話太危險了，不讓我去，所以最後都是回了家．．．

回家後，同妹妹傾計，講起原來大家早前上”一期一會”時都已經係好想睇架喇，只係大家都冇提到，所以既然而家知道”一期一會”七月會再上，所以即時就相約一齊去睇．．．點知，上網睇夾黎夾去，一係日子唔O岩，一係價錢太貴．．．不過，最後我地都買左飛喇，係13/7星期五晚去睇，嘩，好想快D到果日，因為今次有趙學而份做．．．其實我以前都曾經幾喜歡趙學而，我覺佢唱歌都唔錯丫，而且佢以前D歌都幾好聽下架，所以都好想睇”一期一會”架喇！今次終於可以了，雖然．．．價錢真係貴了點，本來想轉去睇GWEN SETFANI既CONCERT，之但係差不多價錢都唔係有咁好既位置去睇，仲係要好遠果隻，所以好似好無謂咁囉，睇CONCERT梗係要睇得好D架啦，如果唔係睇黎做乜？咁倒不如索性買最平既，當係去聽歌好過啦．．．所以，我同妹妹決定下個月先至再買GWEN SETFANI個CONCERT最平既飛，佢八月先至做，仲要得一日咋，不過因為應該香港冇咩人會睇SETFANI架喇，都唔係咁多人識佢，而且都唔係咁多人喜歡聽佢既歌，遲D先買應該冇問題既．．．

唔，有點掛住A仔呢，不過好在明晚我地會一同去上堂，明晚放工後會去土瓜灣工聯會度上運動攀登第一堂，都係理論堂黎，所以暫時可以唔洗咁煩，因為我分分鐘要帶定D衫去換呀，我返工咁斯文既衫點攀呢，哈！仲有，我都未買白飯魚鞋添，點攀呀！！好在下星期先實習O者，仲有時間．．．而星期五晚再要去上堂，上果個關於SEX既課程呀！今個星期真係好忙好忙呀！聽日返到公司同樣係好多野要做啦，一諗起真係頭都痛埋．．．今日下午同個好姊妹傾電話黎，大家都”申”左好多工作上既不如意事．．．唉，人生不如意事十常八九丫，只要自己做好本份，有時合理地賴皮都係正常既，哈．．．

”支持合理賴皮，抗拒無理老屈！”

>>June 13, 2007 at 3:10:13 PM GMT+8

2007 年 6 月 11 日 星期一 【暴雨】

今日返工十分之忙碌呀！真係超多野跟同做，因為月尾既活動都已經密鑼緊鼓咁殺緊埋身喇，之但係仲有好多野未做同未跟之餘，大家都知我既好老細幾好咁服侍架啦，哈！淨係服侍佢一條友都足以令我壓力大多千倍，瘦都瘦番幾磅呀，因為成日比佢追交野都追到瘦丫嘛．．．

好經辛苦終於放工，可以鬆一鬆口氣，因為明天放假，而且今晚約左班好姊妹食飯，有神神啦，菲比，sherry同xenxen，真係好開心，大家都講左好多趣事，尤其係．．．女人一走埋一齊，一定有說不盡既話題架嘛，係咪？所以大家說下東說下西咁，好快就坐左係pizza hut成兩個幾鐘喇，大家食都食到飽飽，傾又傾到飽飽啦．．．食完野之後，大家仲出去映左d相相．．．菲比記住send埋d相相比我地呀！要紀念嘛！跟住，本來大家都諗住各自走人，點知．．．哈，大家突然做左一件好八卦既事，係咩？唔講啦，比人笑死架，自己都不知笑左幾多次了！最終結果係點．．．就係冇結果喎，大家都唔知個結果係咩野，哈．．．菲比話我好似瘦左少少，當時我都叫佢唔好tum我開心啦，因為我好清楚知道自己先排真係肥左唔少，尤其係食左好多A仔買比我既零食之後，O...不過琴日返到屋企即刻磅一磅，哈，真係瘦左少少，可能先排病黎啦，所以而家得番91.4磅左右．．．真係瘦返2磅喎．．．原來病一病真係瘦唔少．．．琴日XEN XEN都病左呀，佢都同我一樣成日都病．．．哈，希望佢都可以keep番好個身體去啦，我都要呀！今日見到xen xen佢終於得到自己既幸福，真係好為佢高興啦．．．

本來今晚打算去A仔度架，因為佢話想我今晚過去陪佢，佢放早丫嘛！咁之但係我又約左朋友，仲要成果個幾星期前約，我又唔知佢今日放早，所以我都打算食完飯去佢度陪佢啦．．．點知完左之後我打比佢．．．佢竟然訓左覺豬．．．唉，果一刻有點氣憤，因為本來一心想即刻飛過去陪佢，差點打算去搭68M架喇，好在當時未上車o者，唉！果刻有點唔開心架．．．不過算啦，都知佢連續返左幾日早呀，都知佢係好累的了，知道佢訓了覺豬就唔去啦，唔想嘈醒佢嘛，係咪？

所以一條友搭車返屋企啦，其實今晚都好開心呀！除左同朋友有講有笑之外，都發現大家都係幸福女人呀，真係好為大家開心．．．大家都能夠找到自己所愛，同埋好愛自己既人．．．真係唔係話咩，一個女人既一生，當然有好多野都好重要啦，美麗，財富，健康，事業，家庭，愛情．．．不過，我相信一個女人最希望既，都係希望自己一生之中可以找到最愛既一個人，令自己可以幸福一生．．．所以，我在此都祝福我身邊既朋友，可以找到自己一生既幸福，做個幸福既女人呀！！

>>June 13, 2007 at 9:00:44 AM GMT+8

2007 年 6 月 10 日 星期日 【陰】

今朝早比起平日返工可以晏少少先至起身，真係好，話晒都訓多成四十五分鐘，都真係幾係野架．．．之後就好快手去準備今日要見工既文件同其他野，因為琴晚都幾夜先返到屋企，所以跟住都冇咩心機去攪喇，都係留番今朝先至做啦．．．

今日去左觀塘果頭見工，不過真係幾轉折下，去到觀塘仲要搭小巴上去，雖然搭小巴既時間只係五分鐘左右，不過始終都唔係咁方便！去到見工，先黎一個written test，唔，份test都唔係好難做既，一條英一條中咁啦，都係慣例，一個鐘做．．．做完之後，足足等左一粒鐘零十幾分鐘先至可以見，係以group interview既形式見．．．同我一齊見既人都幾”奇離”下架，一個係澳洲讀書番黎香港，做左一段時間澳洲領事館，之後走左去中大讀社工master，而家就出緊placement；一個就九一年已經畢業出黎做野，當中兜兜轉轉咁，最後而家先至走左去讀part time社工，仲有一年先至畢業；所以都總係怪怪咁既情況，哈！不過講真，呢份工都唔係咁好做，因為要做既野實在未必係我能力範圍內做到，始終我末做過關於abuse既case，好難去跟去做．．．雖然佢唔洗跟case，不過都要做呢方面既工作，而要真正做有關marketing或者社區教育方面既都唔係咁多，所以．．．麻麻地啦呢份工！不過都好既，當係見下啦，起碼我都會打算向教育主任方面既工成作嘗試啦，都係一個幾好既選擇黎既．．．

完左既時間都已經係一點幾，返到屋企都三點喇，唉，餓住個肚走人囉，好可憐！返到屋企食左少少野就覺好累好眼訓了，所以恰左一陣．．．點知咁就出事喇，因為今日約左A仔，我地今日約左個好耐冇見既朋友，點知就係因為我訓過龍，所以．．．遲左到！唉！真衰．．．

我地同左兩個朋友去維苑食飯，之後我地傾左好多工作上既趣味．．．後來，我地去左佢地既新居參觀．．．其實我覺得都係一個唔錯既地方，當然當中一定有好有唔好既啦．．．不過，人地兩口子住，間屋鍾意點裝修又得，鍾意點佈置又得，鍾意放乜野又得，都唔錯架．．．其實，自己由小至大都好羨慕人地可以擁有一間屬於自己既屋，咁自己就可以以自己既心水或者風格去裝飾佈置DESIGN，真係好開心架！

>>June 11, 2007 at 3:19:00 PM GMT+8

2007 年 6 月 9 日 星期六 【颱風】

今日返工基本上好似個機械人咁，不斷係度fax野出去，同埋入信寄d宣傳品出去．．．好悶既工作．．．咁就攸左一整日既時間，所以時間都真係過得好快下．．．

下午果陣去左食M記既雙層魚柳包，well~ 都好味既，不過唔係什麼特別囉．．．而且咁就廿五蚊又好似唔係好抵咁．．．所以食過一次就算喇，哈！

今日早左大半個鐘放工，因為要出去買定月尾活動既物資．．．我先去左旺角，之後再去深水步，跟住A仔就放工出左黎深水步JOIN我，我地一齊行街睇野，因為我地想買一D行山既衣服，不過最後都係睇唔O岩，所以我地搭車去左旺角，A仔帶左我去一個地方，果間野係賣好多外國入口既食物架，有好多好好味既野食呀．．．不過，我唔敢買，因為一來我咳未好，二來係要KEEP FIT呀，唔可以食太多零食架．．．反而A仔佢買左好多野，佢就唔怕食啦，最多食多D添，肥番少少就仲靚仔多D啦，哈．．．

之後，我地又去左美而廉度食扒餐喇，今次醒喇，唔咁貪心，只係叫左一個餐加多半打吉列帶子，咁就O岩O岩好夠，上次太貪心了，叫了兩個餐都食唔晒，好浪費吧！食完野之後我地去左行街，因為要陪A仔去買野，點知比我地係買野果度撞番一個好耐冇見既朋友，而且大家都仲失去左聯絡架喇，點知咁都見得番．．．不過大家見度都係閒話幾句咁，無咩特別感覺咁囉，都唔知點解？！好似連我地走果陣都冇同佢講聲就走左添，哈．．．好似有點衰嘛？！

不過有樣野好好笑，真係唔知點解，有時見番D好耐冇見過既朋友或者親戚，都總會問一個問題，就係：”幾時結婚呀？”哈，真係好奇怪，點解往往都係會問同一個問題架呢？唔通去到呢個年齡就真係一定要結婚？定係見我地行左咁耐都覺得係時候要結婚？如果有D人唔鍾意結婚既係打算同居既，咪會令人地好失望？哈．．．

行完之後我地都各自返屋企了，因為A仔聽日要返早，而我聽日雖然放假，但係我又會去見工了，聽日要出去觀塘，仲要上去樂華村，好遠呢．．．要預番多少少時間搭車先得喇．．．唉，聽日見工要佒WRITTEN TEST呀，好耐冇做過D咁既野喇，有少少驚驚地添．．．而且以前曾經見過呢間機構其他POST，都知佢地請人都幾高要求架，所以都有少少驚架．．．不過，唯有盡力而為啦．．．加油呀！！

有樣攪鬼野唔記得講，我妹妹話我琴晚好攪笑咁同佢一齊係半夜做埋同一樣野．．．當然，梗係唔係訓覺喇，唔係咁傻仔，而係琴晚半夜咪有一下好勁既雷既，妹妹話佢比個雷嘈醒左，同時間佢同我異口同聲講左一句：”痴線！”．．．不過我真係冇咩記憶了，我真係有講過嘛？唔知喇．．．不過妹妹佢頭先講番比我聽時都笑到收唔到聲，我估都應該係真架喇．．．妹妹講到好好笑，大家真係同一時間一齊講架喎，哈，如果真係既都幾攪笑下喎．．．

>>June 10, 2007 at 3:21:53 PM GMT+8

2007 年 6 月 8 日 星期五 【雨】

真係好，今朝可以同A仔一齊訓到成十一點幾先至起身，好似好耐冇試過訓得咁暢快喇，哈！訓醒之後我地食左少少早餐，今朝A仔爸爸黎左探佢同佢隻狗狗，一點幾之後我地一齊出左去，我地用左半個鐘唔夠既時間，就食左八碟壽司，哈，超快呀！其實唔係因為我地肚餓，又唔係因為D野十分之好食．．．其實，我地都唔知點解呀！哈．．．

食完野之後我地周圍行街，行黎行去，見到天色越來越差呀，非常之恐怖，個天超黑呀，WOW．．．之後，因為A仔佢今日要返中大，佢唔係去探人，亦唔係特登重回舊地去回憶舊日學校生活，而係佢約左一班中大既學生，呢班學生係將會參加A仔暑假攪既交流團．．．係呀，A仔佢黎緊既暑假會連續帶兩個交流團呀，唉，我就冇機會再參加了，因為個FUNDING講明上年參加過既人係唔可以再去囉，都唔知係咩道理，哼！所以，我會有成兩個幾三個星期會見唔到佢喇，我估我地到一定會好掛住佢O者，唉．．．好可憐！雖然仲未到，但係個心已經”籮籮LUEN"喇，嗚．．．

不過好在，我發覺琴日同A仔一齊上完一堂課後，我同A仔既關係真係好似好左少少咁，我越來越感到佢係好錫我架，真係好開心！好希望真係可以繼續維持落去．．．我要做一個幸福既女人呀！！！哈．．．唔知佢會否做到最好，去令我成為最幸福既女人呢？？HEHE~ 今日A仔送左樣野比我，雖然樣野唔係什麼好名貴既野，之但係呢樣野係佢自己親手整架，雖然手工並不是十分精美，之但係我反而咁先鍾意，因為我知道佢係有用心去學整架，仲係要佢一手一腳整出黎架喎，收到果陣時簡直係甜到入晒心啦，呵！佢話果個公仔佢代表佢，因為個公仔又係手長腳長架，哈，睇落又真係好似喎！好，等我掛住佢係身邊先，就好似日日”掛”住佢咁啦，見公仔有如見佢啦．．．YEAH~

後來我返左屋企，我就上網睇下有冇好工啦，點知最後都只係寫左一封信．．．其實都已經差不多個幾兩個星期冇睇過個市架喇，都估唔到冇咩心水工添．．．不過唔打緊啦，呢D野唔急得既，最緊要係搵O岩工嘛！跟住HEA左個下午兩粒幾鐘仲同左屋企人出去食飯，食左餐好好味既飯．．．唔知點解特別覺得今餐好好味既，哈．．．返到屋企仲要食埋雪榚添．．．呀，肥肥呀！點好呢．．．要努力KEEP喇，先排就話病左唔可以減，而家好番左多多喇，希望可以努力KEEP番啦，仲要努力做運動添呀！實在太懶惰了．．．

>>June 9, 2007 at 3:33:41 PM GMT+8

2007 年 6 月 7 日 星期四 【雨】

真係死，今日超級忙碌呀，由朝早到下午都係未停過既一日呀，每一刻都係受制於老闆既魔掌之中，成日被佢迫我做野，又吹三吹四咁，之但係d野根本唔係真係咁趕，而且仲有大把更趕既野要做先至死呀！佢都有問題架．．．

本來今日打算放工早少少走，之後順手出去旺角果頭為六月尾既活動買定d物資，點知臨到四點先至黎話要開會，開完都成四點八，跟住又要趕住做埋d手尾比老闆，趕到我死呀！有病架．．．之後放工前十分鐘又要走落去中心同同事交低d工作，走到我傻左呀！唉．．．跟住六點一先至走人，又趕‘下場喇．．．因為今日要去上堂呀，之前報左一個course，係紫藤果度攪既，係講有關sex既course黎既，我同A仔一齊報左去讀．．．所以好趕咁又走左去太子，野又未食，又累又趕，真係人都癲！！好在A仔佢好好，一早預左我一定趕唔切食野，所以買定個包包比我食，真係開心呀！

之後去左上堂，今日係第一堂，都幾特別丫，尤其係有部分既參加者，雖然有部分都係社工，之但係始終覺得佢地好似好dominate左個氣氛咁，成日好似係度晒野咁，又話乜又話物咁，都某程度上覺得幾討厭下．．．仲有一個上左年紀．．．我估佢都有五十幾六十歲既叔叔，佢成日都會講一d令全部人呆左同O晒咀既說話架，哈．．．不過都可以為大家帶來一刻既寧靜同抖一抖氣既，哈！

今堂請左一個浸大教授宗教及文化既講師來，其實真係幾充實既一堂，個講師好SPECIAL，佢一黎到就話希望大家都可以好放咁去討論同講自己既事或問題，而佢都一黎到就解開TIE同恤衫領，過程中佢說話都幾粗魯下，不過大家都好接受呀，反而咁先至可以令大家更投入更放去討論．．．

其中既內容都有提到宗教 VS. 性 既話題．．．原來呢個講師佢自己都係讀神學出身架，佢而且都係一個基督徒添，但係佢都分享左好多佢細個果陣既事，好似佢好細個都有睇咸書，之但係個口就成日話自己係有幾咁虔誠．．．其實當中都有令自己有幾多反思架，尤其真係講到宗教 VS. 性 既時候．．．講師提到睇番聖經裡面，都確實係一本有提及性既書，而且亦有提到耶穌基督都曾經愛上兩名女子，但因為佢有任務在身而沒有再同佢地發展．．．哈，所以而家出面話要立聖經為禁書都唔係話唔係架！講師認為，只係基督教進入左中國人既地方之後，再加上左一點儒家既思想落去，攪到而家咁不倫不類，例如話唔可以離婚，如果唔係就有罪；又話女仔一定要同基督徒男仔先可以結婚；又話好多好多不合理既事．．．所以今堂都令我自有好多在信仰上的反思．．．當然，我都相信，上完今次呢個course之後，最重要既係我同A仔既關係必定可以更好的！

>>June 9, 2007 at 9:19:06 AM GMT+8

2007 年 6 月 6 日 星期三 【雨】

今日係放左兩日假後返工既日子，哈，真係好唔願起身呢．．．今日既天氣真係變幻無常，一時冇雨一時落大雨，真係好差！好在我都避竹過幾場雨O者．．．

做左一個早上，因為食左藥，十分眼訓呀！加上，唔知點解今日係咁咳，個喉嚨好痕呀，都唔知咩事，係咁咳．．．唔通就係因為琴日飲左杯凍野，仲有係食左D熱氣野？哈，琴晚食左我最愛既雞軟骨呀！唉，就攪成咁喇，可憐！咁就捱左一朝喇．．．食完倨飯之後訓左二十分鐘左右，之後就走左落去中心喇，因為有野要交低比同事去做，仲有有野要係下面做嘛．．．到左四點半，我就出左去旺角，因為要幫中心買物禎呀，月尾有大型活動要攪嘛．．．點知激死，出到去一間鋪頭度想買D特別野，其實係一早係網上面搵到呢間野既資料先黎，點知佢竟然話冇晒貨．．．激死我！好在，復來我去左行中南書局都買到咋，如果唔係今日出去咩都買唔到返去，真係會比人誤會我承機出左去行街喇．．．好在都買左少少野返去可以交到差．．．今日買完野之後都成五點十喇，所以都索性唔返中心喇，直接係旺角返屋企．．．真係好，可以早成粒鐘返到屋企，真係開心！

返到屋企因為咳得太勁，所以食左少少野飲左咳藥水就走左去訓，一訓就訓到八點半食飯．．．而家又頭暈又咳，好辛苦呀！我最怕就係咳咳架喇，真係好辛苦架．．．嗚！

>>June 7, 2007 at 2:31:36 PM GMT+8

2007 年 6 月 5 日 星期二 【晴】

今日都係幾充實既一日．．．一朝早起身就同媽媽出左去旺角，哈，我地今日去做facial呀！唔，今次係我第一次幫親呢間美容中心．．．都唔錯丫，個美容師都幾好手勢，而且佢好就好在一定唔會sale你野，仲會將最適合你既野幫你去做，有晒程序去話比你聽點樣去幫你做好塊面去．．．美容師主要話我有粒粒，同面孔較粗，而且仲有好多雀斑同粒粒印．．．不過今次因為我第一次係佢度做，所以佢都係主要幫我做清潔既工作，睇下我是否適應或者適合佢果度既野先，之後如果ok既話就可以跟我地之前plan既程序去做架喇，其實，都係時候要好好保養下皮膚喇．．．唔，要靚靚呀！

攪完之後都成四點喇，成四點先食晏，真係餓到傻左呀！哈．．．之後食完野就係咁易行左一陣，咁就返左屋企．．．由於妹妹今日唔返黎食飯，所以得我同媽媽兩個，就出左街食，我地去左食日本野．．．唔，d野麻麻地好食，而且都唔平囉．．．不過媽媽話冇幾何喎，哈，咁我就一於有大食大啦，yeah~

食完飯返屋企hea左一陣，就準備出去接A仔放工．．．唔知點解，出去接佢放工時既心情有少少唔知點咁，一來可能一來大家都成一個星期冇見喇，好掛住佢啦；二來．．．因為之前我地嘈交黎，我都唔知佢仲有冇嬲我，所以真係有少少忐忑不安呀！不過好在見到佢之後都好似冇咩咁，我都冇咁驚！>_<" 真係好希望同佢既關係可以越來越好，我會記得佢講過既野，我應承佢唔可以再比佢明月照溝渠架喇．．．

>>June 7, 2007 at 2:06:05 PM GMT+8

2007 年 6 月 4 日 星期一 【微雨】

今日好可憐，起身果陣好唔舒服，所以最後頂唔順冇返到工．．．

之後八點都起身係度做野，快快手就send左d野比老細，跟住先至再訓覺訓到十二點先起身．．．

起身之後就落左去睇醫生，都係感冒同唔陪訓問題影響我啦，唉．．．再食埋個lunch同陪媽咪去買野，之後就返左屋企，又係訓．．．咁就成日都係度訓覺．．．

唔知係訓我太多定點，而家個人好累好頭痛．．．伸周身骨痛添呀，好慘！

聽日我會同媽咪出去做facial，其實今次唔係我第一次做facial架喇，只不過出去旺角呢間就真係第一次喇．．．！希望做得好既話就可以以後keep住做啦！

>>June 5, 2007 at 12:48:55 PM GMT+8