2007 年 2 月 1 日 星期四 【晴】

今日返工比較輕鬆，朝早繼續做番好份proposal，跟住無啦啦十一點幾有個同事請食蛋糕，因為慶祝佢六十大壽．．．食完之後好飽呀，連lunch box既飯都食唔晒呢！之後下午又係帶tour，好快攪掂之後，hea多大個半個鐘就放工了．．．好似從來未試過平日放五點呢，其實都感覺唔錯既，哈！

放工返到屯門就去左買左d野，順便睇下有冇野可以買黎送比佢．．．唉，點知睇稷睇去都冇野o岩買，點好呢，真係頭痛呀！！

明天係我地既八周年紀念．．．其實減去中間大家分開了半年都唔算係，哈！不過．．．算啦，計埋在內啦！聽日只係可以同佢食一個lunch咁多咋，真係唔開心呀，因為佢要無啦啦帶camp呀，冇計啦，工作要緊既，我作為女朋友既梗係要支持佢工作為重啦，係咪？好頭痛，聽日可以送咩比佢呢，要努力諗下喇，今晚要諗到呀！加油！不過好在聽日約左個好姊妹飲下午茶，傾下計行下街，又可以好好咁充實我既假期，都算有點兒安慰啦！

>>February 2, 2007 at 11:42:49 AM GMT+8

2007 年 1 月 31 日 星期三 【晴】

今日終於到左1號喇，哈，又係出糧既大日子，真係好喇，糧尾緊拙既日子終於可以過渡得到了，太好喇！不過今個月又係洗錢月喇，因為又要去澳門，又要過新年，哈，承機去買新衫過年啦，yeah~

今日都冇咩特別，d時間都好快過左，上午同IC傾野，比佢話我話到一”動”都冇呀，因為佢之前叫我一日之內寫比佢既PROPOSAL當中有好多野唔係寫得咁詳細同細微，所以比佢話到傻左．．．唉，好慘！我都明白，佢都比上頭壓緊落黎，我又夾係中間，自然成為佢出氣既工具．．．我唔會怪佢既．．．另外，之前同我一直有過折既同事佢全日又對住我黑面，完全連講野都唔會講一聲，一眼都冇望過我一眼．．．我心諗，真係又小氣又低能，D咩人黎架，只係我透過一個同事將一D而家工作上既問題傳達比佢知O者，希望可以大家合作同協調得好D，點知佢就玩小氣，一D都唔大體架，點做人架，仲要成日懶係威咁同人講自己有幾叻．．．做野好有鬼用咩，人際關係同個人態度一D都唔好呢！算啦，都係要捱多一個月多D對住佢O者，好快過，之後可以好D既我相信．．．

回家後十分之累，好快咁食完飯之後就睇完電視走左訓覺，因為真係好累呢！明天返多一日工又可以放番兩日假喇，真係好．．．只不過．．．唉，叫人拎左假（星期六日）又陪唔到我，真係有點唔開心呢！冇計啦，佢又要無啦啦帶CAMP，做野要緊既．．．唉，雖然係周年紀念既都要讓步．．．

>>February 2, 2007 at 11:36:07 AM GMT+8

2007 年 1 月 30 日 星期二 【晴】

哈~ 返來了返來了．．．今晚終於玩完從大陸返來了！今次我地買左好多野．．．其實今次上去主要係牛奶．．．哈，各位可能好好笑，傻架咩？其實上次我地去大陸時，發現蒙牛新出左一隻deluxe版既牛奶，一大盒裡邊有十二盒，要成五十蚊，我地最終都買左．．．不過真係好好味好好飲．．．後來，我地先排係香港既吉吉島發現有得買，要成九十蚊呀，所以．．．我地決定上多次去入貨喇．．．今次我地共買左四大盒啦，哈，拎到傻架呢！除左之外，我地都買左好多其他野呢，真係開心．．．

不過最衰，無啦啦一個月一次果d野出現，唉，攪到我呢兩日都鬼咁辛苦，又痛又累呀！不過好在佢好體諒同體貼，成日怕我唔舒服，拖到我實一實．．．hehe~ 真係好溫暖好sweet呀！

今個星期六，即係三吮，原本係我地拍拖八周年（如果計左我地中間分開左半年就已經唔係八年了，哈！），不過我地都照樣慶祝．．．但係最衰啦，佢要帶camp呀，所以當日只能夠食餐lunch慶祝．．．我都未諗送d咩比佢做禮物，唉，好頭痛呀!！

>>January 31, 2007 at 12:36:26 PM GMT+8

2007 年 1 月 28 日 星期日 【乍雨乍晴】

嘩，今日超凍呢！今日都係唔願起身呀，一來太眼訓喇，二來真係好凍好累呀！一到冬天就好容易個人累到死死下．．．

今朝早發生左一件事，唉，都唔知係好嬲定好笑呀．．．總知一句，辦公室政治呢d野真係好難攪，今日？咪當係做場戲囉，當係一個笑話囉，影響唔到我既．．．我相信自己只要努力，一定什麼都可以解決得到，人地既野人地既事啦．．．好在既係IC都十分支持同撐我．．．唉！諗起都係十分之矛盾同無奈！

又是好累咁返屋企，返屋企之前仲要幫媽媽去左買野，真係拖住咁返屋企呀！

聽晚我又會上大陸，今次去係有目的架，哈！聽日再話比大家聽啦！！

>>January 29, 2007 at 12:17:13 PM GMT+8

2007 年 1 月 27 日 星期六 【乍雨乍晴】

今日仍然係十分之凍既，真係凍到個人都唔願郁．．．今日好經辛苦才捱到放工，哈！放工後去了市中心行街，因為想買褲呀，我之前掉左好多裙同褲，有好多褲都唔o岩著呀！大家唔好誤會，唔係我肥左，而係我瘦左，條條褲都鬼死鬆，真係激死我！我琴日行黎行去都買唔到褲，長得滯既都可以話改丫，但係問題係條腰太闊呢，最細個碼都著唔到呀，真係好可憐！我唔係晒架，真係好難買褲．．．最後，都係買左兩條裙，都係裙比較o岩我著d，因為我又矮呢，褲下下都要改好麻煩既．．．

行完街之街之後趕番屋企，之後再去元朗搵A仔，我真係好感動，本來我地一早約左一齊食飯既，但係因為一D原因佢要出去攪D野，所以後來打算取消個約會架喇，而我又睇野睇到遲晒，但係佢都肯等我，餓住個肚都話肯等埋我一齊食飯，最後，我地成九點三先至食飯，我地去左食至愛既壽司啦，YEAH~ 開心．．．

聽日又要一早起身返工了．．．今晚真係十分之凍，好在可以開住暖爐訓o者，如果唔係都唔知點算！

>>January 29, 2007 at 12:07:31 PM GMT+8

2007 年 1 月 26 日 星期五 【颳風】

今日好凍呀，我琴晚都訓得唔多好呀，因為好凍呀，自己又懶起身開著部暖爐喎，哈，就咁捱左一晚．．．真係懶到出晒汁呀！哈！今朝真係好唔想起身，因為好眼訓呢！

由於琴日同一個同事發生左d事，不過琴日冇講到，因為係一件又唔開心又麻煩既事，所以唔想提喇，總知係十分之討厭啦，都唔知點解呢個世上有d咁既人架，真係乞人憎！算啦，唔想提呀！好憎呀！今日大家係度鬥黑面咁，佢仲想點我做野去”羅”威，佢都傻架，我真係唔會比佢點到呀，佢仲要衰到係我d下屬面前想點呀，佢真係當我傻仔玩囉，我就梗係即刻叫番我d下屬去做啦，當時佢即時個面仲黑過我呀，哈，果時我真係從心想笑出黎囉！不過算啦，捱多個多月都唔洗再見到呢個人喇，咪當送個優惠比佢囉，唔同佢反面！

放工之後返屋企，好開心，又係野邊邊呀，yeah~ 真係鍾意打邊邊，不過好肥．．．hehe~ 近日唔知係咪個人開心左，所以．．．肥左少少呢！唔得，要減減呀！！聽日又要返工了，唉，好凍呢．．．真係好辛苦呢！今晚要訓番個好既先得喇．．．

>>January 27, 2007 at 1:43:32 PM GMT+8

2007 年 1 月 25 日 星期四 【微冷】

今日放假，朝早好乖留左係屋企執下野咁，之後下午去左元朗搵A仔，陪佢同佢爹地出食野行街睇野咁，過程都唔錯丫．．．後來，我地諗住今晚係屋企煮野食，所以去左買野，我地諗黎諗去，即使百佳好近，我地都唔敢去呀，都唔知又會唔會買到D假野架，哈！

跟住，因為A仔今日要返普通話，所以我就留係屋企等佢番黎啦，等左返黎先至食飯．．．

今晚好凍呀，真係好凍．．．都唔知跟住幾日點過呀！怕怕凍．．．聽朝又要一早起身返工了，好可憐！

今日收到個好姊妹既電話，知道佢今日去面試，係2ND IN，仲預計成功機會好大．．．真係為佢高興喇，希望佢成功啦！佢今日仲會見工架，希望佢都可以加油同成功啦！

突然間好想約D朋友仔出黎食飯見面呀，好掛住D朋友呢！唔知幾時可以約到佢地呀！大家都咁忙，真係好難夾啦！是但啦，約到邊個既，有幾多出幾多個黎囉，哈！我係重質不重量的．．．

>>January 27, 2007 at 1:15:24 PM GMT+8

2007 年 1 月 24 日 星期三 【晴】

嘩~ 今日既天氣開始凍喇，大家真係要好好保重，著多件衫啦，過多幾日會得番十零度架咋．．．凍凍．．．

今日十分之累呀，因為朝早同下午都要帶tour，帶完晒之後就要開會，不過我地好快就開完個會喇，仲後來一齊high tea，因為有同事買左個蛋糕同d飲品番黎，大家就可以嘆下喇，好味道！之後，我地仲決定左2月13日去食團年飯添，IC話佢靖我地去neway CEO度唱K，yeah~ 真係好開心呢！

返到屋企個人好似散左咁呀，所以．．．．睇完電視就要早點訓覺了，要好好休息吧！

明天放假，哈，又可以見到A仔了，真係開心！期待明天呢！

>>January 27, 2007 at 1:04:37 PM GMT+8

2007 年 1 月 23 日 星期二 【微冷】

今日既假期確實可以用一個字去形容，就係"hea" ，哈．．．因為今朝十點零鐘起左身，之後十一點零同左A仔傾左陣電話，跟住就落左街搵媽媽一齊去食早餐．．．食完早餐之後就陪左媽媽去買野，真係成個師奶既生活咁，哈！返到屋企又繼續hea，玩下電腦睇下電視，食下零食咁．．．之後媽媽話落街食lunch，我地去左食日本野，我食左個我既至愛，牛肉鍋烏冬，yeah~ 今餐係我請媽媽食，因為好似好耐冇請媽媽食飯喇，所以有機會就做下孝順女啦！之後我地又去左超市買野入貨，嘩，媽媽真係識得利用”有我存在”既日子，又買米又買”送”又買好多乾糧．．．嘩，真係拎住好多野走呀！不過，我覺得應該架，因為就係親我係度先至叫媽媽買咁多野丫嘛，有多個人拎唔洗佢平日咁辛苦．．．

返到屋企之後又繼續係度hea，係度睇電視．．．哈，又唔係十年冇睇喎，都唔知點解真係無聊到咁呀！後來見媽媽收左衫番黎，橫掂都係喇，所以我又順手係度執衫啦，又執左好多衫唔要喇，後來拎左落去回收箱，希望比到d有需要既人用啦！

聽日要返工了，朝早要entertain一班VIP呀，真係麻煩喇，下午又要帶TOUR，之後又要開會．．．所以好忙呀！好在星期五可以放假，又可以輕鬆下喇！

>>January 24, 2007 at 12:22:47 PM GMT+8

2007 年 1 月 22 日 星期一 【微冷】

今日真係激死我呀．．．好氣憤！今朝早如常搭A仔屋企樓下部村巴出去香港啦，咁諗住冇死啦，一定出得到去金鐘落車，計下分分鐘仲有多餘時間可以去買番個包做早餐添，點知就出事．．．我已經醒左喇，訓到中環已經醒左，之後睇實邊個站落車．．．好啦，當架車去到中銀果頭時，我都有點爭扎是否落車，因為由果度行番金鐘政府合署都有好一段路，所以我諗住應該下個站落車O岩啦，點知，架車就一直係咁去，仲過埋金鐘廊添，跟住我好擔心去問司機下個站係邊度停，點知佢答我係灣仔修頓囉！我當時"O"晒咀呀，最後唯有係修頓落車啦，我行到死死下先行到返去，勁慘呀！嗚！最後成九點兩個字先返到公司，唉！

其實今日真係冇乜野做，所以上午都有一個鐘時間走左落中心，同D同事了解下工作情況，亦都要做少少野啦．．．之後下午同左IC一齊出去食飯，我地去左仙跡岩食．．．嘩，超唔抵囉，食一個餐要成四十蚊，又唔好食喎．．．我地走果時經過間日本料理見到一個定食最平都有三十蚊個時，真係好唔開心呀，覺得超級唔抵呀！真係只此一次好喇，唔好再去仙跡岩食喇．．．

放工返屋企同樣係十分累，一路搭車一路訓．．．聽日放假，可以訓多D喇，哈！真係好呀！！

>>January 23, 2007 at 12:00:33 PM GMT+8