2006 年 12 月 15 日 星期五 【颳風】

wow....今日開始凍左好多喇，不過天氣明顯比先幾日好左好多啦，個人既心情都會好好多．．．今日放假，但係一朝早就起左身喇，因為要去銀行處理d我平日一直都冇時間去做既事，而家攪掂左喇，真係好呀！所以一朝早就同左媽媽落街食個早餐先，之後再去左銀行．．．

到左下午，本來我同媽媽打算約埋妹妹一齊去市中心行下既，因為我都有野要買呀，但係後來妹妹佢約左人，所以得番我同媽媽行．．．我又買左野喇，不過今次係買左件好實際既野，就係一件羽絨褸．．．天氣凍丫嘛，識我既人都知我係個好怕凍既人，加上舊果件真係好殘喇，比我果時坐單車尾時整污糟晒，所以都係時候買番件啦．．．不過件野好抵買，比原價平左成千蚊，所以都好開心呀！跟住仲買左件冷衫同一d禮物，因為跟住有兩單活動都要同人交換禮物．．．

今晚同屋企食飯果陣諗起我地一家不如自己玩交換禮物，哈，真係第一次玩呢d野，因為以往我地都係自動自覺送禮物比其他幾位屋企人既，但係今次一反傳統，玩抽籤，抽中乜水就送禮物比果個人．．．哈，好好玩呀，我地話左christmas果日就要送比對方，yeah~ 唔知邊個抽中左我呢？因為我地係唔比人知我地係會送比邊個架，好玩好玩．．．唔，時間不多喇，我都要諗諗我要買d乜野比我要送禮物果個人先．．．唔知我又會收到咩野禮物呢，緊張緊張．．．hehe~

>>December 17, 2006 at 4:08:15 AM GMT+8

2006 年 12 月 14 日 星期四 【雨】

今日返工都係如是者咁平凡，所以都冇咩特別可言．．．放工之後約左好姊妹alice去旺角，點知佢有野做遲左出到黎，我等左佢成粒幾鐘．．．不過算啦，雖然一條友行街真係幾悶，不過佢都唔想既，工作要緊丫嘛！

我地兩個為左慳錢，所以都係去左食魚蛋粉算喇，平d丫嘛．．．不過實質都唔平得去邊，我碗紫菜四寶都要成廿四蚊呢，哈！我今日都冇買野呀，反而買左件衫仔比波波，因為過兩日天氣凍呀，得果12度，迫都要迫到佢著件衫呀（因為佢好衰架，成日唔肯著衫．．．唉！）件衫好靚架，粉紅色，親番佢白色毛毛丫嘛！

明天放假，但係好像有好多野要做咁，因為平日實在有太多野冇時間去做喇，所以聽日都係要一早起身去處理好多野．．．真係諗起都頭痛喇．．．呢兩日個死人鬧鐘又成日唔響，今日已經係啦，唉！好在我而家習慣左早起，差唔多時間都會醒咋，如果唔係真係大鑊．．．所以成日個人好大壓力之餘又好累囉，唉．．．唔得，今晚要早d訓先得．．．好啦，訓喇各位．．．早抖！

>>December 17, 2006 at 3:58:06 AM GMT+8

2006 年 12 月 13 日 星期三 【微冷】

近日既天氣越來越開始凍，認識我既人都知道我一向都唔多鍾意冬天的，因為我份人一向都好怕凍，一凍既時候總係成個人都冇黎精神同活力咁，成個人都”硬棒棒”咁，朝頭早又唔願起身呢，一個字啦，懶呀！

不過，今個冬天令我有很大既感受．．．認識我既人都知道我成日都係手冰腳凍既人，即使沖完個熱辣辣既涼出黎，我都總係全身凍冰冰咁，成個冰人咁！但係，係過往既七年多裡，我總有一個人係我身邊，無論我手有幾咁凍，身體又幾咁冷，佢都會用佢溫暖既手拖住我，給予我溫暖．．．佢又會不時攬住我，尤其係訓覺既時候，佢總係會攬住我訓，好讓我感到佢身上既溫暖．．．但係．．．而家想起得番自己一個人時，心中有無限既孤寂同冰冷感，好痛苦的感覺．．．

而家，失去了這種很實在既溫暖感覺，我很想找尋番一種唔實在的溫暖感．．．我相信，這個亦是神所想或者所喜悅我要追求的東西吧．．．從家人，朋友，以及神的身上找回被愛，找回那種失去了的溫暖．．．當然，我仍然很盼望那種很實在的溫暖感覺！一隻大大，溫柔，以及溫暖的手．．．我仍然十分希望再次感受得到．．．

>>December 14, 2006 at 12:02:47 PM GMT+8

2006 年 12 月 12 日 星期二 【雷雨】

嘩~ 今日同左個朋友出去，我地去左好多地方，又去尖沙咀又去左深水土步，主要都係陪個朋友去買野．．．其實都幾開心既，見到人地買到心頭好，或者係好想買既野既時候，我自己都會為對方而開心既！雖然今日去左咁多地方，但係因為我買左張西鐵既”全日通”，所以真係十分之抵玩，去度度都係二十蚊咋，哈！

今日去左馬莎，買左d薑餅，諗住請同事食．．．因為聖誕節係要食薑餅架，哈！我都送左份小小既聖誕禮物比今日見既朋友，希望佢鍾意份禮物仔啦，我真係覺得隻狗仔好可愛好得意架！哈！但係我下星期約左班舊同事食飯，我地會交換禮物呀，但係我仲未買呢，哈，因為好麻煩，份禮物既價錢有規則架，要個尾數係九毫字，所以都有點難度呀！

聽日又要返工了，希望快點又放假就好了．．．今日同朋友談起，今日花了錢買東西，所以我們就要努力工作去賺錢．．．但係，其實我們努力工作又如何？最後都只係賺來賺去都係咁多錢，係唔會因我們努力而賺多左的．．．哈，真係有點兒灰了起來呢！或許．．．我們應該是．．．找尋其他方法幫自己賺些外來的錢，例如．．．哈，買六合彩，去投資買股票外幣？．．．有時候，真的很灰心，腳踏實地去做人，尤其做社工這一行，何時才有出頭天呢？

>>December 13, 2006 at 11:34:37 AM GMT+8

2006 年 12 月 11 日 星期一 【晴】

wow...今日好可憐，因為我先幾日唔小心食蘋果果陣咬親自己條利，之後就損左喇．．．今日痛到發癲呀，又要帶tour係咁講野，超辛苦囉．．．睇睇個schedule，死啦，之後仲有好多tour要帶呀，我就死喇，我好驚我過兩日會痛到痴晒利根呀，到時點算呢？好痛好痛．．．嗚！都係自己衰，近排食多左熱氣野，加上連續兩個星期日都打邊邊喎，唔死至其喇．．．唉！

聽日係放假天，約左個朋友仔出街陪佢買野．．．都好期待，因為同佢都已經半個多月冇見喇，知佢近排成日病，唔知佢好番未呢？希望佢好番晒啦，我就慘喇，條利都唔知幾時好添呀！下星期二仲約左班舊同事去打邊邊添呀，唔得呀，要快快好番呀！睇黎聽日都要去飲番杯涼茶先至得喇．．．唉！

今日下午中心發生好多麻煩事，不過都已經比我處理好，真係考起我既危機處理呀！好在以前做開外展，呢d咁既突發野應該難唔到我既，所以．．．有時候我都未後悔過自己做左三年幾既外展工作架，因為當中真係令自己都有所成長，都學習到好多野架！

>>December 12, 2006 at 11:56:49 AM GMT+8

2006 年 12 月 10 日 星期日 【晴】

嘩~ 我今日又差點唔知醒喇，因為個鬧鐘成日都壞壞地架，一時叫一時唔識叫咁，真係令我好大壓力．．．好在琴晚半夜三點三時，波波貓佢叫醒過我開門比佢出我房門，之後我就醒訓左，到左今朝好在識得起身咋．．．其實真係超級之眼訓！今朝返工搭車時訓覺訓到真係唔想落車呀，因為真係太好訓喇，每朝都係咁，訓到半知半就要落車，真係好死呀！碘先放工搭車返黎時都係好眼訓，係咁訓，訓到醒果時已經仲有一個站就要落車，哈！差d唔誻得落車呀！

近排個人真係成日都好累咁，幾時先有假放呀？唔係一日半日果隻喎，我想放長假呀！快d啦，快d到31號，我就可以連續放假放到4/1喇，有五日呀，好想快d到！仲有，快d到31號就可以去玩喇，去電車遊呀！yeah~ 威威同開心．．．仲有，1月頭同芬芬玉玉去dup骨骨，yeah~ 要舒服舒服呀！

天氣開始凍喇，各位好朋友，要好好保重身體呀！要著多件衫喇．．．

>>December 11, 2006 at 12:43:48 PM GMT+8

2006 年 12 月 9 日 星期六 【晴】

今日返教會真激氣．．．唉，今朝早等妹妹出門口都等到我傻，最後．．．梗係又遲到啦，之後返到去都已經係十一點八喇，加上妹妹又唔舒服，所以最後我地都係冇上到禮堂參加崇拜！

之後，我同媽咪妹妹三個去左食野，我地行到去灣仔果邊先至食野，跟住我地搭”叮叮”去左中環，行左陣ifc，跟住就搭船去左尖咀．．．嘩，中環而家個新碼頭行死人呀，完全係港外線碼頭，即係去長洲南丫島果邊既碼頭，我地由ifc果邊行過去真係行到腳軟，而家遠左咁多真係麻煩左．．．不過算啦，都未試過係新碼頭搭，咪當試下囉．．．去到尖咀，約左姨媽行街，姨媽佢好好，本來佢打算送份禮物比妹妹當係恭喜佢洗禮既，點知姨媽佢怕我怪佢偏心，所以又送埋份禮物比我．．．其實我都話左唔洗架喇，因為正所謂無功不受祿嘛．．．但係後來都係避免唔到啦．．．但係，真係好開心喎，因為姨媽送左條agnes'b既冷頸巾比我，而呢條頸巾正正就係我之前睇中左打算遲d買架，所以十分之happy．．．無啦啦有禮物收既感覺真係幾好．．．唔得，姨媽咁錫我，我遲d都要送番份禮物比佢．．．其實，我份人都好鍾意送禮物比人，因為當見到人收禮物時既開心樣我都會開心埋一份架，我係好享受呢一種見到人地開心既感覺．．．哈，所以識著我都唔錯架，可以無啦啦收到禮物！

返到屋企，今晚又係打邊邊呀！今次實肥死囉，哈！上星期又係打邊邊，今日又係喎，哈，好肥好肥．．．唔得，得閒又要做運動先得喇．．．加油！頭先又係度好努力咁執衫，因為又凍左喇，所以執定d外套出黎啦，隨時都可以拎到黎著丫嘛，之後又掉左好多野喇，哈！識我既人都知我係一個鞋痴，我最高峰期時係有成五十幾對鞋．．．但係係我努力之下，我終於將鞋既數目降到得番三十二對．．．好叻呀！少左好多呀！哈！要努力keep住唔可以再多番呀！

>>December 10, 2006 at 3:03:56 PM GMT+8

2006 年 12 月 8 日 星期五 【晴】

今日商台黎左我地中心做節目．．．真係麻煩，淨係entertain佢地一個半個鐘既節目，就已經晒左我地一整日既人力物力喇，真係浪費到極．．．我最後仲要攪到成三點鐘先至可以食飯，不過好在我都預左有呢一著架喇，所以今朝早特登早d返去買份大大既麥記早餐食，飽飽先至返工．．．哈！

聽日是放假天，本來真係好想好好咁留係屋企訓餐飽，休息餐飽，因為近日好似特別累咁．．．雖然，我實質唔係咁多野做，又唔係真係忙到死咁，不過唔知點解身心都好似好疲累咁．．．或許．．．我近日想得太多野了，令到自己好疲累卦！我就係咁架喇，一有時間我就好鍾意思前想後架喇，諗黎諗去咁，有時都可以冇結果架，或者會諗埋晒d唔等洗野，或者天馬行空既事．．．令到自己更加煩惱添．．．哈！

但係，今晚同屋企人食飯時大家都話要出去返教會，所以．．．都係”的”起心肝返教會啦，唔可以咁懶架喇，就黎比神鬧得架喇，哈！或者，出去走走，個人會輕鬆多點，唔會再想太多野卦．．．但係，正如我琴晚所言，有些東西我總是要解決的，我不能夠再拖下去了，免得令自己更加煩惱吧！唉，好矛盾呢！！

>>December 9, 2006 at 3:08:29 PM GMT+8

2006 年 12 月 7 日 星期四 【晴】

今日都同琴日一樣，都係平凡既一日，樣樣事都尚算是順利吧，所以很感謝神給予我這樣平安的一天．．．

今日放工果時突然想起了一些東西．．．其實有時候搭車無無聊聊都會想到很多東西出來的．．．

其實，在過往既七八年裡，愛情，或者應該係我最愛既人，係我心目中都係佔在我最高的位置．．．所以，當這個最高位置的東西已經失去了的時間，我曾經處於極度collapse既日子中，日子真的十分之難過！在這一刻，我完全感受到自己完全失去了方向，失去了生命，失去了人生目標，失去了自己．．．到左而家，呢個首位東西事賓上完全地失去了，我想，我是時候找回自己了，重新要排列過我心中的東西．．．但是，我想了很久都是想不到而家自己的需要是什麼？究竟．．．我想要什麼？我應該將什麼放在最高的位置呢？當然，我仍然很希望可以找到一個真愛我的人，可以找到一段真愛．．．但是，我現在並不擁有，唯一的是將我手中所擁有的去排列吧！

我想，我真的要再花時間去想清楚這個問題，讓我可以找回自己，找回生命，找回人生的目標．．．無可否認，我已經迷失了差不多三個月了，迷失過後總有一天是需要蘇醒過來的了．．．神呀！希望你可以幫助我找回自己，找回適合我的方向及人生目標吧！

>>December 8, 2006 at 1:51:11 PM GMT+8

2006 年 12 月 6 日 星期三 【晴】

今日都算是平凡的一天．．．都是同樣地返工，帶隊，食飯，等放工．．．哈！只是本來今早要帶隊的，但同事突然話唔洗我帶喎，幫左我帶埋．．．之後下午就繼續帶隊，又係如是者咁樣．．．唉！開始感到沉悶了．．．所以我話今日係平凡既一日．．．

突然間想起了以前曾經有個人同我講過既一句說話．．．（唔知果個人仲記唔記得佢同我講過呢？）

佢話，”如果懂得欣賞同享受平凡，每一日都可以係情人節！”

唉，講咩丫，而家連情人都冇，平凡既日子都變得更加平凡了．．．情人節一點都不會快樂吧！我都想欣賞享受平凡，但係．．．有時候太過平凡既生活卻會令人變得枯燥！其實，只要身邊有一個自己好愛既人，即使係大家日日都係坐係屋企度，我都覺得已經好滿足了，這外表看來平凡的生活我卻覺得一點都不平凡了．．．因為，至少我可以與自己深愛的人在一起！

>>December 7, 2006 at 12:04:23 PM GMT+8