2007 年 4 月 15 日 星期日 【晴】

~ ADDED

頭先同左個好耐冇見同傾計既義工朋友傾電話．．．我地講開一d工作上既話題，佢大大話話都已經糧左地成八個月喇，所以先至咁耐冇見過佢出來參加活動同聚會啦．．．

其實，我都好明白佢既心態既，所謂高不成低不就嘛，有時都總會覺得自己有既係工作經驗同學歷，點解要屈就自己做一d自己認為好唔合乎情理既工作．．．我同佢講，其實真係最重要係”放下”．．．我之前都曾經糧地過一段長既日子，而當中亦曾經有好多既感受同反醒．．．有好多朋友都會認為我當時既決定係十分衝動，而且係好大既唔值，但係，到左呢一刻我可以講我係從來都冇後悔過當時既決定．．．因為如果唔係因為我離開，我係唔會知道原來個世界係咁大，自己係原來咁渺小，自己原來視野係咁窄．．．我認識左呢個世界同自己多左好多．．．

近日，我係工作上發生好多衝擊，人事上，工作模式上，甚至係我既專業上不受人認同等．．．我都好麻煩咁為自己既前景打算緊．．．一d人亦曾經同我講過，尤其我屋企，佢地好擔心我會係因為人事上既問題而又衝動地離職．．．其實，我唔會囉，因為我好早前已經明白到，天下烏鴉一樣黑既道理，衰人壞人多的是，佢地係無處不在架，無論你係邊度做野，都總會有呢類人存在，所以少不免在工作世界中你總會學識如何同呢類人相處同工作．．．其實，我所關汪既反而係我既前途問題．．．係呢度做野，自由度極低，最鍾意玩假民主，話就話放手比你自己去做，有創意就得，點知都係一句，”要依本子辦事”．．．政府既人和事就係咁，最好就不變，唔好要佢去變，亦不願去改變，永遠係咁都甘願，因為”一向都係咁架啦，無問題呀！”．．．哈，當一個一向會為弱勢人找尋權益既社工來講，呢d簡直係廢話之外，亦都認為係一d極度不負責任既說話．．．

係禁毒處呢度，除左冇自由度之外，無論人工同晉升機會都唔會有改變，即係，如果你甘願一生係呢度過日子既，你可以好平步青雲咁渡過你下半生，但係，就真係一世都係呢個位呢份人工囉．．．而且，表面係非公務員職位，人地會以為好正，話晒係政府工，但係其實呢d所謂非公務員職位，分分鐘有既benifit仲衰過出邊既business firm．．．所以，你話留係呢度真係冇咩意思可言．．．呢度又冇得發揮發展，而且又學唔到野，成日都係帶tour．．．有咩學到呢？

頭先同朋友傾開計，都認為進修係十分之重要，所以我都唔例外．．．好想進修，而且係一d完全同社工無關既工作添．．． 而且我好想將自己將來學到既野去發展自己既新事業．．．雖然，仲有好多細節上既野我未好清楚諗好，而且都需要好多人力物力等，但係我好有決心同信心我會做得好．．．希望我真係可以好好咁找到自己真正既工作道路啦．．．

>>April 16, 2007 at 2:48:24 PM GMT+8

2007 年 4 月 15 日 星期日 【晴】

wow．．．今日好辛苦，超級感冒發作．．．自從上次比A仔野到之後，就已經成日都作感冒咁架喇，今日終於頂唔偵了，終於發左出黎了．．．好辛苦呢！

今日十分難頂，個人已經累到要死，但係就有十萬九千樣野要跟要做，仲要衝埋D文件野比老細呀，簡直係死左，一個朝早就係咁整野，真係頭痛到爆呀！不過好經辛苦LUNCH之前終於完成左喇，都叫左輕輕鬆左一口氣咁啦，唉．．．

而家個頭痛到爆炸咁呀，又重又痛，好似仲有少少發燒咁．．．唉，之後好忙呀，除左要跟之後幾個月既一連串活動之外，仲要帶TOUR，聽日又要帶了，真係好難頂呢．．．死啦，好似越來越多野要做咁呀，好驚會攪唔切，攪唔掂呀！我唔想成日比人嘈我，因為呢凌既人真係十萬個麻煩呀！好討厭！

今晚好努力咁轉左個鞋櫃既季，將D BOOT都收埋晒，拎番晒D涼鞋出黎啦．．．我發覺自己原來都唔少涼鞋架，唔理喇，之後返工都著涼鞋了．．．我今次又數左一次，原來我而家共有三十三對鞋，係冬天加夏天共有三十三對．．．哈，比我之前既五十對紀錄少左好多喇，YEAH~ 叻叻，要努力KEEP住唔好再多落去喇，如果唔係第日都唔知點算囉，冇咁多位比我放架喇．．．哈！

除左鞋櫃，我又順便執埋好多衣櫃，又掉左一些衫，一些已經好舊同唔O岩著既衫．．．仲有掉左好多鞋呢！但係個櫃都唔知點解好似冇點空過咁既？哈！好似都仲係要塌落黎咁，唉．．．但係，女人就係喜歡買衫啦，有靚既野就梗係會買．．．不過而家要收下手喇，要睇清楚先至好買，一來要慳錢啦，二來唔可以比自己再積太多唔O岩自己既衫係度喇，因為真係好浪費囉．．．

A仔今日入左CAMP，希望佢順利啦，仲有希望聽日既天氣唔好太差，影響佢地既流程啦．．．因為天文台話聽日會有狂風暴雨呀！真係令人擔心．．．我明天約左A仔見面，順便我約左個好姊妹聽日在元朗見面，一來好耐冇見過，二來我要比我台灣既手信比佢呢，哈．．．希望佢鍾意D手信啦．．．

>>April 16, 2007 at 12:34:56 PM GMT+8

2007 年 4 月 14 日 星期六 【陰】

嘩~ 因為琴晚出街食飯，所以冇睇到亂世佳人大結局，不過好在有錄左，所以返到屋企就睇喇．．．嘩，睇到成十二點幾先至睇完囉，幾眼訓呀！但係，琴晚又唔係太訓得著，所以今日超眼訓啦．．．

今日好鬼死忙呀，一朝早返到去十點三，哈，我遲左到，本來應該返十點的．．．之後好快咁食左個火腿扒芝士漢堡，十點半就要招呼一班女拔萃小學既學生同家長，幫佢地做訪問．．．咁就攪到十二點喇，真係想死．．．之後坐左一陣counter，十二點九又開始同班義工開會，今日大家傾左好多野，發覺呢班義工好唔同，唔同在．．．佢地好多野say，會比好多意見．．．其實，有好有唔好啦．．．！之後就傾到兩點喇．．．兩點三先至可以出到去買個飯團仔食，一路做就一路食，有好多文件既野要做，聽日要交比老細喇，但係而家都好似仲未做晒囉，唉．．．咁就到左四點半，我就要準備帶tour了．．．今日帶既tour都幾特別，特別在參觀既人係我教會既兄弟姊妹．．．就係因為大家熟，先至覺得好奇怪．．．亦都因為今日唔夠人手，所以我都唔可以帶到d乜，只可以比佢地自由參觀啦，唯有係睇電影時講多d野，倏多d discussion補救番啦．．．完左之後閂埋館，爹地就等埋我放工，之後一齊搭叮叮去灣仔皇廷度食飯，因為教會今日既活動多左兩個位，所以佢地叫埋我去食飯，唔好晒咁話，所以我都去埋一份喇．．．

不過，果d野食簡直係．．．我都識煮囉，即係家常便飯啦．．．好似平日屋企媽媽整果d咁，哈．．．所以，最後都唔係食左好多，上左車之後都開始有點肚餓了．．．上到車十分之眼訓，但係架死人962永遠真係搭到人死死下，好辛苦囉，我日日如是咁搭，真係就黎死．．．返到屋企都忍唔住口食左好多野，不過．．．係零食．．．今次死啦，點keep fit呀，o．．．唉，d文件都仲未做好晒，真係唔多想做喇，好累呢而家．．．定係聽日返到公司先做呢？但係，我要lunch前就要交喇，都唔知做唔做得切．．．唉．．．好煩呀！好忙忙忙．．．好累．．．

>>April 15, 2007 at 2:00:53 PM GMT+8

2007 年 4 月 13 日 星期五 【綿綿細雨】

今日訓到成十點半先至起身，真係開心，而且琴晚都訓得唔錯，所以今日都幾精神呀！起身之後我就係屋企做運動，因為想keep fit嘛，由而家開始keep差唔多架喇，就算唔減肥都要keep住唔好肥落去喇，如果唔係下年先開始就好難攪架喇，一定唔可以比自己肥呀！

下午就同媽媽去左葵芳，我地去果時經過見到間鴻福堂，即刻買左一枝銀菊露，我同媽媽一人飲左半枝，嘩，正呀．．．因為近排都幾熱氣下，飲番枝涼茶好d囉，一枝又多得滯喎，同媽媽一人一半就o岩o岩好喇．．．去到葵芳之後我地就開始行街街喇，開頭行都幾ok既，又唔係太好多人，而且見到d衫都幾ok，所以都好有心機行架，不過之後越行越多人，完全係要迫入間鋪到囉，而且越睇越覺d野好似好cheap咁，好唔想睇喇，之後就走左去維園度食下午茶．．．嘩，好飽，我地都成四點先至食野呀，個餐都好heavy下架，食到我都傻呀！之後我地再返番去荃灣，去左荃豐度行多一陣，之後就返屋企．．．

返到屋企，我好努力咁執我呢季同夏季既衫，嘩，都執左好多野掉左呀，因為實在太多唔要既野喇，又比左好多衫媽媽呢，哈！不過個櫃都仲係好爆咁，都唔知點攪．．．睇黎真係可以唔洗點再買衫喇，係買都係下身既衫，裙或者褲，因為真係缺乏．．．鞋都應該唔洗架喇，哈．．．真係好！不過，有時真係忍唔到手去買野，見到d野又平又靚點會唔動心呢！

之後我同屋企人出左去食飯，嘩，d野實在係太好味了，即使係得我同爹地媽媽三個食，都可以食左四樣野，好飽呀，仲要食埋碗糖水添．．．食啦，今餐又是十分heavy，都好難keep囉，唉！今朝做運動所消耗既卡路里又返番黎喇，大師兄又返來了，o．．．

聽日返工呀，好在返十點，可以訓晏少少啦．．．聽日好忙呀，成日都有野要跟，所以都好擔心我會冇時間做我既文件，因為星期一我要交到野比我IC喇，好煩囉，而家好多野要密鑼緊鼓咁去架喇，唔可以停呀，好痛苦呢．．．不過，我都希望做番場好野出黎既，因為唔想比人睇死囉，我要比我D死人同事知道我唔係冇價值架！仲有，即使而家我係打算此地不宜久留，最終都係走，但係我都想我走得係轟轟烈烈咁走，係要佢地知道冇左我係一個損失囉．．．所以，我決心要努力做好每一樣野去．．．

”神呀，我真係曾經軟弱過，但係我而家已經再次積極起來．．．我好希望神你可以協助我振作起來，亦希望神你給予我智慧，創意，精神同耐力，去做好每一份工作．．．亦希望神你帶領我找尋合適既工作道路，協助我找到真正合適自己既東西，我願意將一切都交到神既手中，好讓神你為我安排．．．阿們！”

>>April 14, 2007 at 2:18:40 PM GMT+8

2007 年 4 月 12 日 星期四 【晴】

今日係mon表姐生日，在此先恭祝佢生日快樂．．．．哈，第一次過佢做洪太既生日，唔知佢習慣嘛？唔知佢感覺如何呢？相信佢必定會幸福快樂架！

今日返到去公司，一返到去都係積極咁攪埋琴晚未整好既手尾，仲有打埋琴日未打好既電話，好用心好快手咁整埋份proposal囉，唉．．．到左十點，IC主動問我攪掂D野未，可以開始開會傾未．．．唉．．．最後我地開會開足三粒幾四個鐘呀，足足開到十二點五十分．．．好痛苦．．．過程當中，可能好多人都會問我，琴日發生左D咁既事，你地之間咪好似好多介蒂咁，又會否開會時大家都面阻阻咁呢？哈，我都唔會咁唔識做人既，琴日既野係心中囉，總知我而家清清楚楚知道我IC究竟係一個咩人就得啦，我今日同佢開會都係對事唔對人既，都係想做好份工去，所以我都同佢過程中都好似冇咩咁，大家好似有講有笑咁囉，我相信呢種都係神想我做既態度同反應，無理由要做一D令自己心情同情緒唔好既行為o者，係咪？咁樣做自己都開心少少既．．．唉．．．

好經辛苦去到一點，都未傾好要傾既野，最後我落左去中心，因為人手不足我又去左睇counter，一點至兩點呢段時間，我都有半個鐘又係同IC傾住電話去傾野囉，好想死呀，傾野傾到頭都爆埋，超痛囉．．．最後終於兩點鐘後可以返上OFFICE去食飯，但係邊食咪又係邊做野，真係想死呀．．．咁就係咁做PROPOSAL做到放工喇．．．

好在放工前收到A仔既電話，大家約左放工後出去行下，唉，好在我可以承機放鬆下咋，可以發洩下，如果唔係我好驚我會死呀．．．放工後都o拿o拿聲走人喇，完全留多一陣既心都冇呀，十分想即刻走人囉．．．好快就出左去油麻地join A仔喇，YEAH! 見到佢就什麼煩惱都冇晒喇．．．我地行左好多地方，仲去左廟街食煲仔飯添，好味．．．不過肥死喇，又話減肥喎，哈．．．成日話食左先算，死得．．．

今日我同A仔都一齊大出血呀．．．我就買左D護膚品，佢就買左對TEVA既涼鞋，哈．．．大家當平手喇，唔好話大家都大洗了．．．真係諷刺，大家成日都話對方大洗，又成日提住要儲錢，點知大家都係管唔到大家，哈．．．　

>>April 14, 2007 at 4:15:53 AM GMT+8

2007 年 4 月 11 日 星期三 【晴】

唉~~~~ 而軟簡直係十萬個唔開心呀，再加上十萬個angry呀．．．天呀！！好忟呀！想殺人呀！！！

頭先三點幾果陣，無啦啦比人叫左入房話開會，咁咪開囉，之後就發生連串”比人擺上台”，”比人切生豬肉”，同”比人老屈，所有屎比人推晒去我身上，要我揹晒上身”既事件．．．真係十分之無奈囉！好嬲添呀！好唔開心呀！頂．．．

我一向以為我個IC係一個好講道理既人，點知．．．原來當佢面對對自己不利既情況時，都只係會將所有責任同御有問題推晒去人地身上，仲係要一乾二淨果隻囉．．．仲有，我相信當面比人話你係”喱仔”，無資格帶TALK，話你唔夠什麼大律師，什麼警司，什麼名人出名，有名氣，夠PROFESSIONAL時，都真係十分之唔好受既一件事囉．．．

加上，明明所有野你之前同個IC傾好晒，大家都同意晒既野，仲準備要出街既時候，竟然有人同我講：
”ANNIE，你仲乜做咁多野，好似就黎出得街喇喎，但係點解我一D都唔知既呢？”而呢個人，係從來都所有野唔關佢事既人，而無啦啦關佢事就係因為我地個阿姐請左個好長既病假，足足一個月，而家要呢個麻煩人頂住個位，所以先至無啦啦佢所有野都唔知，就係咁係度BAN人既野．．．當初，係我IC同我講所有關於PROGRAMME既野可以由我負責晒，只要我每個月將所有過程向佢報告一次就OK喇，點知而家有話我：”點解你所有野都好似自把自為咁既？你好似冇同你呢兩個上司報告過喎？乜你唔知道你係要咁做架咩？好在而家D野仲未出街O者，如果唔係點算呀？”嘩，我個IC可以推得一乾二淨咁話：”係囉，ANNIE你唔知架咩？你仲乜唔同呀XX報告呀？”．．．頂．．．>_<" 　XYX．．．．．

哼，我果刻真係黑晒面囉，而且仲好想打我個IC囉，我唔可以相信佢點解可以為左自保而將所有野都推得一乾二淨囉，擺明擺晒我上台，仲要我食死貓，切埋生豬肉囉．．．當然，認識我既人都知我絕對唔會妥協架，而且仲要點都要爭議番，但係．．．最後開完會之後，不但冇被人一句安慰，反而仲要比人寸：
”ANNIE，你千祈唔好有HARD FEELING呀，我地都係對事唔係對人架咋，希望你明白．．．你今晚點都同我死掂份PROPOSAL去呀，你知啦，你唔好累到我都要比人噴到一面屁呀！”．．．嘩，我心中除左一個粗口字（門＋小）想到出黎之外，我真係無野想回應呢個人囉．．．

我真係越來越唔鍾意同政府既人合作，真係好麻煩，又諸多LIMIT，可以差到連BOOK架車比表演者又唔得，比個飯盒義工食又唔得，樣樣活動都話要攪大佢，但係從來冇諗過中心人力物力上是否OK，又唔會諗下其他外在因素，例如地理環境等．．．成日只係想搵人著數，成日話同NGO合作，叫人來攪攤位，但係又冇錢比人喎，你當人傻仔咩，我都做過NGO架，你冇錢已經死啦，仲要個活動又唔係人地NGO攪，連數都冇得計啦，真係諗得開胃囉．．．所以呢，我都係覺得自己唔太適合係政府部門做野，實在欠缺好多自由度，而且有好多野都好麻煩，又話什麼要夠派頭，但係最好唔洗洗一分一毫，又話要係野都要請嘉賓，即使極細小既TALK都要請什麼什麼醫生律師做嘉賓．．．痴線架！有冇腦架，人鬼理你咩，好得閒呀．．．你估人地冇咩做架咩，人地NGO自己大把野做啦，洗去幫你做埋呢D冇利益既野？有病架．．．而家人地又話嫌前線社工都唔夠專業丫嘛，咁可以點呀？我都係專業社工黎架，有註冊架，你同我講專業？你呢D只係識做ADMIN既人又係什麼專業呀？即使我唔係樣樣叻樣樣精，之但係我唔會好似呢D人咁，係又噴唔係又噴囉，嫌自己D屁多得滯嘛？

唉，越來越嬲呀，好煩呀！我而家越來越想為自己既工作前景去計畫同打算，因為我知道呢度一來不是久留之地，二來我知道自己根本唔適合呢度既工作生活．．．但係．．．唉，而家又要想到儲錢既問題．．．好煩呀！！神呀，可否比D啟示我，帶領我如何走我工作既道路呀！好煩惱呀！我應該如何是好？繼續？我又頂唔順呢度既人和工作模式；唔繼續？我又可能要面對一個失業既境地，而且我仲話要儲錢，點儲呀？唉．．．10萬個煩呀！！

>>April 12, 2007 at 12:04:44 PM GMT+8

2007 年 4 月 10 日 星期二 【晴】

今日終於可以訓多d喇，今朝成十一點先至起身，起身之後就好神心咁做左一陣運動，因為近日覺得成日都好似周身骨痛咁，成個膊頭同條頸好似相左塊鋼板咁，好辛苦，加上．．．hehe，近日真係好開胃，食多左好多野呀，我而家都唔敢上磅呢！尤其係個肚腩仔，真係見到都眼怨呢．．．唉！真係要積極咁減減喇，如果唔係點迎接黎緊既夏天呢？

跟住今日都好努力咁執下間房，因為都自從放假後都冇點執過房喇，越來越亂呀，尤其有妹妹係度，間房就更加亂，更加多垃圾呀，天呀！執死我喇．．．衫又多，”林嬸”野又多喎，唉．．．到左下午兩點幾，先至同媽媽去飲茶茶，都等左好耐先至有位呀，因為下午茶抵d架嘛．．．之後見到d叉燒咁靚，所以都買左廿蚊，諗住今晚拎d比A仔聽日帶飯食．．．

今日同一個好姊妹傾開MSN，佢建議我可以煮多D飯比A仔食，一來可以比A仔佢帶多D飯，可以慳多D錢，二來我又可以TRAIN下自己既廚藝．．．我都幾同意佢既建議架，所以我決定下星期開始，逢星期三都會煮野比A仔食，可以比佢帶飯返工．．．點解只係星期三？因為我逢星期三都放假架嘛，咁可以有充足既時間準備同整囉，哈！當然，如果我平日其他日子有時間既話，我都會整比佢食架．．．哈！我要努力呀！不過．．．就辛苦左A仔要食我D野喇，哈！希望唔會難食啦．．．唔，要對自己有信心先得！

之後，我就去左接A仔放工，因為佢今日放五點，咁我去左佢中心附近JOIN佢之後，一齊慢慢行左去屯門西鐵站，承機可以拍下拖啦，哈！入左元朗之後，我地都去左行一陣，順便同A仔去睇下D涼鞋，因為佢想買對靚少少既涼鞋去行山呀，之但係D靚野又真係好貴下，起碼都要成六百蚊對，真係好”那利”囉．．．但係其他平D既又質素唔好，未必可以行到山喎，真係頭痛喇．．．本來我都諗住算啦，最多我自己慳D洗，買對佢睇中左果對貴野比佢，但係A仔又唔想我晒錢喎．．．唔，唯有遲D同佢四圍再去睇多幾次，睇下有冇D平D又o岩佢心水架啦．．．其實，我自己慳d洗唔緊要呀，最重要既係佢開心丫嘛！

聽日又要返工了，唉，相信自己已經患左”放假後群症”，一提起要返工都總係提唔起勁咁，唉．．．放完假之後都仲係有一段時間再去適應番返工既生活，而家就係過渡中既適應期啦．．．都唔知幾時先可以適應番，之但係，我又好想可以快d又放假喎．．．哈！不過，聽日好似冇咩特別野要做呀，所以都唔知d日子點過好囉，好痛苦呀！

>>April 11, 2007 at 12:25:29 PM GMT+8

2007 年 4 月 9 日 星期一 【乍寒還暖】

wow．．．今日又是返工天，今朝起身時A仔同我講佢琴晚訓得好好，真係好喇，不過就．．．成晚比我捲走晒D被囉，哈！都唔係第一次架喇，我地兩個成日都係度爭被架啦，算啦．．．

我今朝同樣係A仔樓下搭村巴返工，一上車就訓喇，不過次次個司機都開到個收音機鬼死咁大聲，好似有心令到人訓唔到覺咁囉，好討厭．．．不過我照樣大覺索．．．好經辛苦先識得起身落車呀，去左買左個包包食，哈，我發覺我好似次次都係買果個包食架喎，可能好味同夠飽卦．．．

返到OFFICE，嘩，足足一個星期冇返過OFFICE喇，只係開始有點兒陌生，連同事都好似係咁，唔知點解．．．不過算啦，一向D同事都好似當我透明架啦，有野又唔會搵我或者問我既，而明明我係知道既野佢地都特登唔問我，即使我上司放左假都係一樣．．．所以，人地點對我我咪點對人囉，同樣當佢地透明．．．我唔會主動同佢地有任何交涉架，當然必要時先啦，冇必要我係唔會囉．．．好經辛苦做左好多ADMIN既工作，到左食飯時間，今日同樣唔知食乜好，所以都係走左去M記買野返中心食．．．返到中心好冇心情做野，所以成日都係度上網搵資料，搵一D我會08年有用既野，哈．．．計劃左好多野呀，發現．．．成個腦都係數字，好多數目呀，好慘囉，飛黎飛去都好似解決唔到咁呀，唉！不過．．．我會努力的．．．努力儲錢呀！

放工喇，返到屋企成個人都好似死左咁，好累．．．搭車果時收到個舊同事兼好姊妹既電話，佢講到工作上既不如意同某個同事既態度問題．．．唉，我都好擔心果位有工作態度問題既同事呀，如果佢仲係咁落去，真係永遠都唔可以離開呢一度，因為根本出邊既社會同商業世界完全不能夠接受得到佢囉．．．唉，點解佢已經係度做左一年喇，都可以咁無成長同改變架呢？真係令人擔心佢．．．冇既，我以往做個案既經驗都話我知，我地係呢一刻，再晒幾多口水都係冇用架喇，唯一係要等到佢衰左，真係出左事既時候，我地先至再介入做野．．．唯一既係等．．．係喎，頭先提到做左一年．．．不經不覺同MTO既同事朋友識左一年喇，我知道佢地琴日已經慶祝左喇，雖然冇我份，但係我同樣可以感受得到架．．．我都在此祝我地相識一周年而乾杯，YEAH~

食完飯之後，同樣係度睇電視，近排追緊亂世佳人，實在太好睇了，所以叫A仔幫我D/L左首主題曲比我，咁我可以做電話鈴聲了，哈！雖然我已經知道個結果大概點，但係都忍耐不住要每天都去睇電視呀，哈！好努力咁追．．．反而果套溏心風暴我就興趣不大了，又可以慳番時間喇，哈！

睇完電視後都十分之眼訓了．．．好在明天放假，可以訓多點，而且聽日可以留係屋企執下野喇，自從放假開始我間房就好似狗竇咁喇，尤其一日有妹妹係度，間房永遠都係比佢攪到亂晒架，唉！又係要我去執野．．．不過算啦，我反正都係要執下野架喇，太亂令個人既心情都唔多好既．．．真好，聽日終於可以去拎對CON喇，可以試下用DAILY既CON，希望好用啦．．．不過開始就要帶多點眼鏡了，因為唔可以太浪費嘛，盡量可以減少用既就減啦，帶多點眼鏡就冇咁靚靚喇，哈！所以又有點心郁想去配眼鏡呢．．．不過．．．睇下點先啦，又話要儲錢呢．．．唉！其實有好多野好需要買架，有護膚品啦，屋企果D就用晒喇，就連洗面果D都冇架喇，跟住我下個月又要去洗牙啦，三來我之前睇中左個agnes b既銀包，不過好貴，加上好似已經比人買晒，因為佢係每間分店得一個架咋，想要新既都冇呢，唉．．．睇黎第三樣野可以忘記同放棄架喇．．．唯有最急切既就係要買護膚品啦，搵日要去睇下先得呀！而眼鏡．．．哈，都真係有點心郁架，因為之前同A仔既家姐睇眼鏡時，我自己就睇中左一副，都唔太貴，一副都係要四百幾蚊，都ACCEPTABLE啦，所以．．．真係有點心動呢．．．但係．．．都係睇下點先啦．．．

>>April 11, 2007 at 3:58:15 AM GMT+8

2007 年 4 月 8 日 星期日 【晴】

今日好可憐呀，要返工呢．．．朝早七點就起身喇，好眼訓，應該係眼訓到爆呀．．．．一上左車就係咁訓，丁訓到落車，一直係咁訓．．．好唔捨得架車呢．．．

返到去中心，真係好眼訓，拿拿聲開左個中心之後就返OFFICE度呆坐，真係好累，所以基本上今日成日都冇點做過野．．．好在，食飯之前收到A仔既電話，為我振奮了一會，哈！每當收到佢既電話都係十分之開心，可以為我悶悶既心情帶來一點振奮的，YEAH~

之後食完飯，好經辛苦過左最後既四個小時．．．簡直係三年零八個月咁呀！放左工，即刻走左去搭車，一上車就打比A仔喇，但係佢訓左覺，嘈醒左佢呀，真係好唔好意思呢．．．返到屋企，屋企人開始開飯喇，加上十分之肚餓，所以自己又食埋一份，哈！明明應承左A仔一齊食野，點知因我貪吃．．．HEHE~ 我知A仔唔會嬲我既，因為我真係肚餓丫嘛，佢唔會餓親我架嘛，係咪？哈！

跟住食完野我就拿拿聲去A仔度喇，因為約左去佢度嘛．．．明天又要早起了，但係會同A仔一齊起身，因為佢都要早起嘛！

>>April 9, 2007 at 2:25:50 PM GMT+8

2007 年 4 月 7 日 星期六 【陰】

嘩~ 今日好早起身呀．．．因為今日返教會．．．真是想說一句：哈利路亞！今日係耶穌基督死後復活既大日子，而耶穌基督既再生，亦表示左我地世人蒙福，可以繼續接受到神同基督既愛同救恩．．．其實自知並唔係一個虔誠既基督徒，但往往係一d特別紀念神既日子，每每都會成日一種動力，推動我返教會參與崇拜及活動！今日都不例外，今日教會亦都攪左個全人生日會，因為耶穌基督既再生，亦代表著我地眾人再生，所以我地亦舉辦左一個全人生日會．．．

完左個崇拜之後，我地就舉行左全人生日會，有好多野食呀，我都琴晚已經食到滯左架喇，但係眼見咁多美食，真係忍唔住口食左好多，最後亦都係捧住個肚走囉，哈！食完之後，我同媽媽去左行街，順便幫妹妹拎部ipod去整，而爸爸就留係教會度開會．．．我同媽媽都冇咩點買到特別既野，只係見到好夕靚衫，但外於張八折卡係妹妹度，所以都係冇買到野．．．

返到屯門，我就陪左媽媽買今晚既晚餐，仲去左配con，我配左daily既con，因為會乾淨d嘛．．．今日得番A仔一個食飯咋，真係可憐！如果佢有我陪會開心D呢！可惜我唔係佢身邊陪到佢．．．唉！

食完個晚飯後都好累了，但明天卻要返工呢，好可憐！唔，希望聽日知醒啦．．．

>>April 9, 2007 at 2:18:59 PM GMT+8