2007 年 2 月 22 日 星期四 【晴】

今日係放左幾日假後第一日返工既日子，真係今朝十萬個唔願起身呀，超級眼訓呢．．．上到車同樣地訓到唔識得落車，醒果時已經係臨落車前一個站，好在識得醒咋，如果唔係訓過龍就攪笑喇．．．

今朝收到個email，又係關於公司果個好麻煩既女人，真係越來越憎佢．．．有時候，我覺得如果我能夠學懂去愛或者為我憎既人代禱，相信我會好過一點．．．但係真係一件好難做得到既事囉，我相信有好一段長既日子我都唔能夠做到，真係慚愧．．．算啦，只要在呢一刻懂得寬恕，我相信神已經十分之為我高興，我相信神一定會幫助我如何可以與這位同事可以相處得更加好，令呢位同事對我少一點埋怨同誤會．．．

下午果時約左個好姊妹食飯，嘩，四周圍都係人呀，想搵個地方食飯都鬼咁難，最後去左大快活度食，好彩有位咋，如果唔係都唔知點好囉．．．雖然大家長處既時間十分之短暫，但係大家都分享左好多好多野，尤其係我今朝既激氣事啦．．．哈！呢位好姊妹佢今日去左簽新公司既約，真係戥佢開心，可以搵到間好既機構工作．．．希望佢會好好把握同珍惜呢個機會，好好咁發展佢既新事業啦．．．而我？同樣希望可以為自己既目標而繼續努力啦．．．YEAH~

放工之後約左A仔，我地去左食飯，之後我去左佢屋企．．．佢答應我明早為我煮早餐呢，哈！真係好開心呀！

>>February 23, 2007 at 3:20:40 PM GMT+8

2007 年 2 月 21 日 星期三 【雨】

哈，今日同樣地冇咩特別咁，起身之後都係屋企整呢整路咁，跟住下午就同左爹地媽咪出去旺角花墟，媽媽話要買花喎，所以就陪佢地出去啦．．．我地去左一間叫做名鑽石餐廳食lunch，果間野類似以前既紅寶石餐廳咁既架局，而裡邊d人睇得出係一d上左年紀而且幾有錢同知名度既人士，因為我地隔離就坐左幾個以前上一輩既老明星係度，當然，我只係係咁易認得出個樣，佢地叫咩名我真係講唔出囉，因為真係唔係好認識佢地．．．呢度食野都唔係平架，一個set lunch都$58，不過都叫ok啦，d食物水準都幾好架，所以都唔怪得好多人都好似係老顧客咁，果度既waiter見到個個都同人講恭喜發財，d人又會比利是佢地既，所以我估佢地一定係長期光顧架啦．．．之後，行完成個花墟都只係買左兩枝火百合咁大把，哈！算啦，雖然真係見到好多花都好靚（其實係女人都鍾意花架啦，見到花都個人開心晒．．．）但係唔可以係野都買架嘛，所以都只係買到呢d．．．返到屋企繼續hea落去，一路食住瓜子一路上網玩game，哈，十分之hea，本來想執野既，不過真係提唔起精神，一諗起聽日要返工呢，就係咁”放蚊”了，真係慘．．．

頭先睇新聞講到而家香港既人口女多男少，而單身人士要搵到個伴侶係一件好難既事，尤其好多女仔對選擇男仔方面要求過高．．．其實而家既女仔都真係要求幾高，問下自己丫，都唔多唔少有要求既，話晒係一生一世既事，所以都希望可以選擇一個最o岩自己既一個人架啦，其實都係人知常情o者，不過，當然有d人既要求係過高啦，什麼要每月五，六萬收入，學歷要有博士，又要高大靚仔有型，有樓有車冇家庭負擔咁．．．嘩，如果真係全世界都有d咁正既男人就好囉，咁根本唔洗擔心有人嫁唔出啦，哈！而我就而家感覺自己十分之幸福快樂，因為我覺得自己已經找到了，我相信”那人”就是他．．．我很希望佢都會同我有同一個想法啦．．．

今日同個好姊妹傾開電話，講開大家都好想做生意，認為真係唔想再打死一世工，認為社工呢行真係冇得好做．．．確實我而家既理想真係希望可以創業，有自己既理想同事業！當然，我而家都有好多爭扎啦，一來係錢既問題，呢樣係十分之大既障礙啦，二來，創什麼類型既業呢？我真係有好多想法同計劃，不過單靠我一個人既力量真係好困難去做，三來，我是否全身投入去創業丫，定係保留住份長工，繼而再創業呢？我真係好多困惑同問題要去諗同計劃呀．．．但係，我真係好想達到自己既理想同目標囉，因為自己都唔細啦，係時候要搵到個人生目標去發展架啦．．．我現時呢一刻，就係要努力save $$，要讀書仲要儲本．．．要努力搵方法搵錢呀，靠份丁丁人工真係死得人啦，唉．．．頭痛頭痛！

>>February 22, 2007 at 11:35:15 AM GMT+8

2007 年 2 月 20 日 星期二 【陰】

今日已經係初四，但係仍然放假，真係開心呀！真係好驚到時真係要返工時好唔想返工呀，而家已經係極度之HEA架喇，仲係咁落去真係唔多得囉，哈！

今日都冇咩特別野做呀，朝早等A仔起身之後整左野比佢食，送佢返工，之後就跟左爹地媽咪出去同佢地D朋友飲茶團拜喎，算啦，都冇野好做咪跟住去啦，係咪？嘩，不過真係食左好多野呀，近排真係胃口十分之大呀，哈，係咁食真係唔得，而家肥左好多好多喇．．．真係驚人地唔要我呀，嫌我肥肥就死喇，哈！

跟住返到屋企就好努力咁繼續HEA落去，直到四點幾先至再落樓食下午茶，但係都完全食唔落喇，因為真係實在太太飽了，所以在MC記只飲左杯野食左杯塞米就算喇．．．之後陪左媽媽去買”送”，唉，感覺有D似先排仲未搵到工既日子咁，日日陪媽媽落街食早餐食LUNCH，之後陪埋佢去買”送”，唉，成個師奶咁，哈！不過呢D日子唔會再出現架喇，唔，無錯！

返到屋企之後好努力咁執屋，我又掉左超級多衫呀，真係掉左好多．．．因為，我決定轉STYLE，轉LOOK，哈！要掉好多野先可以完全有個新LOOK出現，如果唔係邊有位放新衫呢，HEHE~ 執到真係死左咁呀！我估掉出黎既衫真係可以壓死人呀！認識我耐既人都知我既衫係多到可以壓死人架‘喇，而且數目可以係以百計，YEAH~ 我都覺自己有D好似SHORT左咁，真係瘋狂左，哈！掉野都可以咁癲？

頭先執野果時發現左妹妹一條中學時期既校TIE，哈，之後拎左去同波波貓玩，佢都不知玩得幾開心呀，呢條TIE死都死得有價值呢，哈！真係有點兒變態咁．．．

唉，之前講起有點兒唔開心既事，琴晚終於冰釋前嫌了，琴晚訓之前我同A仔完全講晒喇，而家個心安心左，亦都舒服左，而且知道A仔佢冇誤會我，仲好明白我添！不過知道佢近日為左屋企人既事真係有點兒唔開心同氣憤，但係我作為女友既又唔知點可以幫到佢喎，唯有既係在佢身邊陪伴住佢，安慰下佢，又幫佢打開下心結，做佢一個永不會埋怨既聆聽窨啦．．．其實某程度上我真係好開心．．．因為我好相信我地既關係又可以好好咁邁進一大步了．．．我發覺而家同佢一齊越來越開心，感覺好像回到以前八年前拍拖咁，但係其實大家又係好熟悉大家既，哈！真係好SWEET既日子呀！唔，我真係好希望佢同佢屋企人，甚至係我同佢屋企人都可以好好咁相處啦！

>>February 21, 2007 at 12:41:45 PM GMT+8

2007 年 2 月 19 日 星期一 【陰】

可能呢幾日太累了，所以今日成十一點幾先至起身啦，一於訓番夠本．．．

之後，媽咪買左MC DONG DONG過我地食，食完之後我就出發去A仔屋企拜年．．．初時都仲有點擔心，因為真係唔係好敢去．．．好似好唔好意思咁呀！唉！好爭扎，諗緊好唔好講我心裡邊既想法比A仔知，但係又好擔心佢誤會我喎，唉．．．好煩呀！

但係去左佢度之後都感覺冇想像中咁差同尷尬既，所以．．．最後都係打算唔講住啦，或者遲D有機會先啦！之後，六點左右，A仔打算踩單車由元朗同我返屯門，佢真係個傻豬，我好擔心踩到佢傻左，而且佢聽日仲要返工，累死佢囉！不過後來兩個鐘都返到屯門，佢仲過黎食飯添．．．又幫我整左部電腦．．．今日真係辛苦左佢喇．．．所以．．．今日係十分之SWEET既．．．

嘩，真係好慘，近排食多左好多野，真係完全了解到什麼係肚滿腸肥既感覺，真係好差，成個肚都係脤脤咁，而且便便又不暢，真係好煩惱．．．完全知道係食得太多”垃雜野”啦，唉！所以今日都飲左杯去濕茶，希望好少少啦，唉！唔得喇，係時候要忍下口，減少食零食喇．．．不過．．．真係好難架喎，點好？真係好肥肥呀！尤其係個肚腩，見到真係好驚囉！唉！

>>February 20, 2007 at 2:46:40 PM GMT+8

2007 年 2 月 18 日 星期日 【陰】

今日年初二，一朝早九點起身就出左去表哥屋企，食左今年第一餐既盤菜，之後，我地三表兄妹入番屯門去睇戲，我地去睇”森林反恐隊”呀，又真係幾好笑幾攪鬼喎．．．新年睇下笑片真係人都開心D架！

之後返屋企，今晚好多人黎我度食飯，有我地一家四個加表哥同二舅母，仲有姨媽姨丈，加埋舅婆同表姨，仲有阿哥同未來阿嫂，當然仲有狗狗芝麻啦，足足有成十二個人呀！哈！跟住今晚就食左今年第二次既盤菜喇，哈！不過夜晚果個明顯係好味過朝早果個既，都好D．．．

今日係咁同芝麻玩，真係開心，佢真係好叻叻呀，又乖乖，真係太得人喜歡喇．．．

明天我會去A仔度拜年，不過．．．我有點擔心同尷尬，但係．．．我又唔敢同A仔講，唉！好煩惱呀！

>>February 20, 2007 at 2:39:05 PM GMT+8

2007 年 2 月 17 日 星期六 【晴】

哈~ 今日係大年初一，在此祝大家新年快樂！心想事成！身體健康！事事順利！

今日年初一如往時既年初一一樣，都係要去人地度拜年，不過，今年有少少唔同既係，今朝早有A仔佢陪我一齊食年榚，同埋同爹地媽咪拜年囉，哈！仲有，過程中大家都十分之開心愉快，尤其係．．．A仔將佢一D想法話左比爹地媽咪知，亦同時好似為我打左枝強心針咁，我好開心聽到佢講左果番說話，令爹地媽咪都同時對佢好有信心，知道佢係會對我好，亦會好錫我．．．我果刻真係好感動架，哈，因為真係十分令我感到佢真係好愛我同錫我．．．希望真係”心想事成”啦！

下午又係去左姨媽度拜年，之後完左我同左屋企人行去旺角行街，之後得番我同妹妹兩個行，之後就買左好多野喇，哈，真係開心．．．購物係女人天生既愛好，真係好難改，HEHE~

聽日又要一早去二舅母屋企開年喇，唉，又係一早起身，好可憐呢！不過我同表哥同妹妹打算聽日去睇戲，唔洗咁悶，都幾好呀，一個GOOD IDEA啦！YEAH~

>>February 20, 2007 at 2:34:40 PM GMT+8

2007 年 2 月 16 日 星期五 【陰】

嘩，今日係年三十呢，在此預祝大家新年快樂！

今日好開心，因為只係返左半日工，兩點鐘就收工喇，真係好．．．之後返左屋企同屋企人同D什麼AUNTIE飲茶，食到好飽，之後陪妹妹去整新髮型．．．返到屋企，就開心好努力咁去執房了，一執就發現間房真係好亂，越執個人越情緒差，好嬲好煩呀！仲係咁發脾氣，不過，好經辛苦終於執好晒，超累呢！

到左八點幾，A仔黎左我屋企度食團年飯，真係開心，有好多野食呀，我地都食得好飽好飽．．．不過，中途比A仔嚇死我，佢飲左D酒之後因為不勝酒力，去左我房度訓左一陣，之後叫左佢起身出黎食湯圓，點知佢成個人扒左落地，佢話見暈呀！真係當時嚇死我，真係好驚，我個人都即時呆左，好在有屋企人係度幫手扶佢，如果唔係我一個人點夠力呀！好在，而家佢冇咩事喇，不過佢今日咁既情況，都係叫佢唔好走啦，因為都擔心佢一個人返屋企啦，所以佢會係我屋企度過埋年，同我一齊渡過狗年踏入豬年．．．

話咁快而家已經進入左豬年喇，唔知大家今年豬年有咩新年願望呢？我就希望大家心想事成，身體健康！男既諸事順境，女既豬光寶氣啦！恭喜恭喜．．．總知唔好豬事八卦就得喇，哈！

>>February 17, 2007 at 4:51:46 PM GMT+8

2007 年 2 月 15 日 星期四 【陰】

haha~ 今日返工都主要係執圖書館既書，嘩，好累呢，成日係求狂執，真係腰都直埋呀，執完之後好似成個人散左咁，好辛苦先捱左一日．．．放左工之後約左A仔，我地去左旺角，佢好好，陪我行街買野，後來，我地去左黃大仙，因為我地有個朋友BID左果度既年宵,所以我地特登去扟捧場啦，仲幫佢買左D野添，都算係朋友喇卦．．．花市果度好多人呀，A仔佢全程都係攬住我，怕我比人撞到，佢真係好細心呢！我地最後成十一點幾先至走人，所以我返到屋企都差不多十二點幾喇，仲後來見到隔世追兇大結局，又忍唔住去睇．．．因為實在太正了！

今日其實是很開心的，因為A仔很好陪我又去買衫又睇野，其實一個大男人陪個女朋友去睇衫真係幾悶同尷尬既事，不過我知道佢對我好好，仲幫我拎左好多野添，又好關心我，食飯都著重營養，哈！夜晚食飯飲奶奶都係第一次咋，不過．．．好SWEET，HEHE~ 又成程幫我拎住咁袋咁滯，哈，而家越來越感受到佢係好努力咁希望做好男朋友既角色同本份，我真係越來越開心，仲越來越感覺到佢好錫我．．．我好想多謝佢呀！

>>February 17, 2007 at 4:44:18 PM GMT+8

2007 年 2 月 14 日 星期三 【陰】

hehe~ 今朝好sweet，可以坐A仔架車，哈！一齊去西鐵站，又一齊食早餐，仲要係佢親自下廚呢，好甜既一份早餐！

今日約左個好姊妹去尖沙咀行街，嘩，買左好多野，有裙有衫有野食，仲有化妝品添，yeah~ 為左過新年要扮靚，真係咩都做得出架，因為女人就係咁．．．

今日好姊妹佢同我訴苦，我知道佢好煩惱同唔開心．．．因為佢記住一切都要交托比神啦，因為神只有安排架啦．．．仲有，我都祝福佢啦，希望神可以保守佢！因為我知道佢都好大壓力架，唉！唔好擔心咁多啦，唯有將一切交托啦！

返左屋企之後同屋企人落左街食晚飯．．．我好似已經好幾日冇食媽媽飯了，哈！晚晚都出左街呢！聽日終於要返工了，要比心機呀！唔可以心散呢！仲要返多兩日先放新年假，今個新年要開心愉快咁過呀！

>>February 15, 2007 at 3:43:33 PM GMT+8

2007 年 2 月 13 日 星期二 【陰】

hehe~ 今日係一日好sweet既一日．．．首先祝大家情人節快樂！

今日我同A仔都放假，所以大家一朝早起左身之後就約一齊出去玩玩．．．本來我地都冇咩建議去邊好，但係大家突然間好似好心有靈犀咁，一齊想起去淺水灣同赤柱，哈！真係好夾呢！所以，最後我地決定左去呢兩個地方．．．因為淺水灣係我地第一個情人節去過既地方，所以都想懷緬一下；而赤浬就係之前一直想去，但係成日都好多障礙去唔到；所以，今次要一次過去晒兩個地方！好開心呀！．．．

去到淺水灣，我地去番八年前第一個情人節去過既地方，同做埋同一樣野．．．就係．．．第一次情人節時A仔就係同一個地方同位置送左一份禮物比我，係一份手飾；而今次，佢同樣地係同一個地方送左一份禮物比我，係一條有我英文名字頭既頸錬．．．哈，我好鍾意呀，佢話佢之前訂番來既，係琴日先拎番黎．．．其實聽到果時個心好甜架，因為知道佢都仍然好在乎我．．．

跟住，我地去左赤柱，我地仲係果度既石灘坐，一邊睇海浪一邊食野，十分之浪漫呢，哈！真係好sweet，我地仲映左幾張相相添！最後，我地諗住搭車走，點知誤上賊車，坐左一架坐成粒鐘既車先出到尖沙咀，坐到呆左，哈！跟住返到A仔屋企，A仔親自下廚整野我食，真係好味又sweet！hehe~ 總知，今日過左個好浪漫好開心好sweet既情人節啦！感覺係好似回到八年前咁既感覺，好特別呀！

>>February 15, 2007 at 3:44:16 PM GMT+8