2006 年 12 月 25 日 星期一 【晴】

今天返工呀！可憐．．．今朝唔知醒呀，成七點半先識得醒，哈，所以最後遲左到，成九點四先返到去．．．好在今日冇tour o者，哈！

今日成個都係56k modem既運作，十分之慢．．．呀，唔係，有朋友講過佢今日係1440 kb先o岩，係超慢．．．因為佢琴晚成晚係度整電腦，佢好慘，個hard disk死左，唉！好在而家整番，不過佢今日又要返工，同我一樣，好可憐．．．

成日好似係度等食飯，等放工咁囉，完全明明係有野要做都唔想做，係咁恰眼訓呢．．．唉！放工果時搭車，係咁訓，訓到不知時日呢．．．

近排個胃成日痛，可能真係妹仔肚啦，近排我由二十二號開始，真係冇食過屋企媽媽飯喇，每餐都係出街食，仲係要餐餐都十分豐富；好似22號既suzuki同金鳳牛扒；23號既目黑壽司同麻布茶房；24號既異國風情既意粉同夜晚christmas party好好味既野食，好似壽司，蛋糕，雞翼，腸仔．．．；仲有25號既清亭越南餐同埋聖誕聚餐皇廷．．．嘩，呢個聖誕真係食左超多野呀！o．．．肥肥啦，點算？係咁食係咁食．．．所以近排成日無啦啦胃痛啦．．．到左今日，lunch食mc當當，夜晚食爹地牌牛扒，又是十分之豐富，o．．．唔得喇，要keep fit喇，唔可以肥過92 lb架！

>>December 26, 2006 at 1:03:06 PM GMT+8

2006 年 12 月 24 日 星期日 【晴】

YEAH~ MERRY CHRISTMAS !!!

今日同樣係好忙好忙呀！琴晚好夜返到屋企，之後今朝早又是好早要起身了，因為今日要返教會崇拜，加上妹妹今日行堅信禮，所以要早少少返到去啦．．．嘩，真係好眼訓嗯，搭車出去時係咁訓呀，超辛苦呢！崇拜過程十分感動，其中牧師講道講起一個故事，我都好想同大家分享下．．．

從前有一個猶太教既猶長，佢係一個好虔誠既教徒；以往猶太教的教徒佢地逢係安息日，佢地都會好乖，真係完全唔會佒野，靜靜地休養生息，履行佢地既安息日；但係一日既安息日，呢個猶長突然之間好想好想去打golf，但係外於果日係安息日，所以猶長佢十分之爭扎．．．後來，猶長佢決定靜雞雞去打golf；由於果日大家都乖去守安息日，所以根本冇人知道同見到佢去打golf！猶長佢祈禱同神講：”神呀，請寬恕我啦，我只係打十一個洞架咋，我打完就會返屋企架喇！”跟住，猶長開始打golf，好奇怪，猶長今日既狀態十分之好，全部波都可以一q入洞，簡直技術好比世界級運動員．．．中途，天上既天使同到咁既情況，佢就向神報告左呢件事，當時，神話：我有分數架喇，我自然會懲罰佢．．．完成左十一個減之後，猶長覺得自己今日咁難得有咁好既成績，所以佢決定再打多十一個洞，佢再次祈禱向神講佢打完會返屋企！天使見到咁既情況，佢十分之憤怒，所以再同神報告左件事，更問神為什麼唔去懲罰佢？神笑了一笑，之後同天使講：”我已經懲罰緊佢啦？”天使唔明白，所以問神當中既意思．．．神話：”你睇下佢，玩得幾開心，打得幾咁好？但係．．．佢唔可以同人分享佢既快樂！”天使佢終於明白了．．．

聽完呢個故事，我覺得好同意．．．人既一生，如果身邊不能夠與人分享，無論是喜是悲都好，真係好痛苦既一件事．．．正如神正正在懲罰那位猶長一樣，佢果刻好開心，但係，因為佢在安息日打golf，佢不能夠與其他人分享佢既喜悅．．．牧師很希望我地日後不時可以關心多些身邊既人，讓他們感受到愛，尤其係神既大愛；與身邊人分享多些，因為，人及生活如果沒有了分享，是一件十分痛苦的事，亦是毫無意義的了！．．．願大家共勉之．．．

完了崇拜，我地四圍去行街，之後夜晚去了灣仔間皇廷食我地既聖誕聚餐．．．同樣地，我每年都係冇咩抽獎運，都係空手而回．．．哈！算啦，大家開心是最緊要的吧！今天已經是由二十二號開始最早一天回家既一晚，可以十點半就走人喇，真係好．．．不過想到聽日又要返工既時候．．．唉，好可憐呢！！

>>December 26, 2006 at 12:51:09 PM GMT+8

2006 年 12 月 23 日 星期六 【晴】

嘩，首先同大家講句：聖誕快樂！新年蒙福！

今日成日都係街度，真係好累！一朝早起身返工，真係十萬個不願意起身呀！因為琴晚成點幾先至訓覺．．．返到去公司都係係度等放工咁滯，哈，因為今日放兩點，哈！之後放工就走左去causeway bay搵爸媽食lunch喇．．．再之後我地四圍行街，因為五點先至要返到教會再練詩，練左大約一粒鐘，食埋d西點飲品之後，我地就浩浩蕩蕩咁出發．．．我地先去左東華東院度報佳音，唱左八首歌，之後再行番出去聖保祿醫院度歌，今次每首歌唱double，不過好開心，因為有好多反應，有d小朋友係病房度打開窗簾同我地say hi，係咁揮手，真係好開心！之後，我地行左去維園門外唱，當時都好多人聽呀，咁o岩撞到另一班人又係報佳音，大家好似不打不相識咁，一齊唱埋一份，仲係咁say hi啦！跟住，我地再去左百德新街果邊唱，呢一度係最多反應既一個地方，尤其係好多家庭，小朋友見到我地好開心，不斷映相，仲走埋黎同我地一齊唱添！不過最好笑就係我地見到有兩個和尚，佢地走埋黎同我地映相喎，真係好好秧，正式係宗教隔膜大解放呀！

跟住，大家都好累了，所以上左去嫣虹auntie屋企玩party喇，有好多野食，仲有扮野化妝大賽，每一個人都別具心思咁去打扮，我當然都唔會執輸玩埋一份啦，哈！最後，我媽媽佢憑扮大com姐一角得左第二名，哈~ 真係諗番起佢果粒墨．．．真係驚今晚發惡夢呀！

之後，再去左瑪麗度鼓埋佳音就完囉，真係超累呀！死左咁．．．聽日又一早了，因為妹妹佢洗禮，要一早返去準備，咁我當然陪佢啦．．．真係開心，聽日終於見到妹妹洗禮喇，真係好安慰，哈！希望佢日後可以依靠神多d，親近神多d啦！

>>December 26, 2006 at 12:33:50 PM GMT+8

2006 年 12 月 22 日 星期五 【晴】

嘩~ 今日都係同琴日一樣，成日都係不斷係度食野．．．今日下午果陣時同媽媽去左市中心間目黑度食壽司，唔知點解突如其來好好胃口呀，我食左成八件呢，真係都幾多下架！之後，我六點再出左去旺角meet妹妹，我地係朗豪坊行左一陣，之後就同左佢個朋友一齊去左"笑笑"度食野．．．同樣地係十分之豐富既一餐呀，好好味，不過可能我近呢兩日真係實在食得太豐富了，所以食到中途開始胃痛喇．．．唉，真係多吃之過啦，所以好慘，痛左成日，到左今晚仍然都係十分之痛．．．頭先食左胃藥架喇，但係都好似冇咩效咁呀！死啦，諗諗下呢幾日都應該會係咁既狀況，因為大部份既時間都係出街食．．．死啦，咁我個胃一定死得喇，天呀！

今晚好累呀，行到好夜先至返屋企，因為媽媽爸爸都各有節目；爸爸去左參加公司既聖誕晚宴，媽媽去左聽徐小鳳既concert，所以先得番我同妹妹兩個咋嘛，我地仲唔行到夠先至返屋企咩．．．所以一行就行到十一點幾先至走人．．．好累呀！因為琴晚已經係好夜先至返到，我都成十二點幾先至訓，雖然今日十一點先至起身，但係可能平日訓得冇咁多，所以個人好似特別更加累咁，所以今日成日個頭都好似痛痛wing wing地咁呀，可憐！

明天又是返工，不過可以放兩點，開心！之後就返教會練詩，跟住去鼓佳音，再跟住去嫣虹auntie屋企開party，玩化妝天才表演，哈！好玩好玩．．．

>>December 24, 2006 at 4:56:49 PM GMT+8

2006 年 12 月 21 日 星期四 【晴】

今日可以用一個字去形容，就係．．．”食！”點解？今日lunch時本來係我地自己department ND攪christmas party既，不過因為當中發生左一d事件，所以最終我同IC都係冇去到．．．係咩事？算啦，我覺得不值一提，因為只會係激氣！所以後來LUNCH果時我同IC自己出左去食飯，我地去左PACIFIC PLACE間SUZUKI度食．．．嘩，真係超貴，我一向都知呢間野貴架喇，所以一直都未試過份去食，點知一入去一睇MENU，嘩，一個最平既SET LUNCH都要$108．．．傻架，我咁大個女都好少咁樣豪食法，一個LUNCH成百蚊？不過．．．今餐IC佢好好，佢講明話請我，話當係我地自己慶祝聖誕同做冬，不過就唔可以比D下屬知道啦，如果唔係嬲死佢，淨係請我食咁偏心．．．跟住下午既時間都好易過，同IC同事一邊係中心攪呢攪路，一邊傾計等放工，哈！

放工之後，我約左朋友A仔．．．我陪佢去左好多地方，因為佢有好多野要去買，咁我幫下眼咁啦！我地去左金鳳度食牛扒，真係好正，一直以黎D水準都未變過，雖然係等得耐少少，但係等既時間我地去左隔離間機舖打機玩PHOTO HUNT，其實，我地都好耐冇試過入機舖玩喇，所以．．．我覺得好開心呀！終於入得座喇，我地梗係叫左最好味既牛柳啦，好好味，超滿足！簡直興奮到．．．嘩！（有一個動作只有我地兩個卮先識！哈！）跟住我地好奢侈，係太子果頭打的去朗豪坊，我地就係一間專買毛公仔既舖頭度買左六百幾蚊野，因為A仔要買禮物送比兩個朋友，一個係結婚，一個生日！我就梗係幫手揀啦，我至愛揀野架喇！哈！所以走果時兩袋大既一袋細，真係好似人地係蛇口返黎咁．．．哈！

後來，我地落左去M記度食雪榚，A仔佢個傻仔話而家鍾意左食果隻朱古力脆皮雪榚，所以見佢咁好請我食牛扒同打的，我梗係要請番佢食雪榚啦，係咪？坐左一陣傾下計咁，真係幾開心架！諗番起．．．之前同佢拍拖都好似好耐冇試過咁節目豐富喇，我地最後行埋去花園街一頭，上埋新世紀，我走果時已經幾十一點十五分喇．．．令我想番起我地初初拍拖果陣，每次出街都係好把握時間，一朝早就出去，玩到夜夜先至走，好珍惜每一分每一秘既寶貴時間．．．

今日對我黎講真係好滿足好開心既一日．．．雖然．怛憐閎聖誕沒有了他在我身邊，但係．．．而家咁樣我已經十分之滿足了．．．我真係好感恩，可以同佢渡過一個很愉快既冬至！預早慶祝聖誕節！佢仲送左隻高飛既玻璃杯比我，上邊仲刻左佢個名係度．．．我想，以後每當我見到呢個杯，不但會想起今日，亦會更加想起他，是一生都不會忘記他．．．

>>December 23, 2006 at 4:05:04 AM GMT+8

2006 年 12 月 20 日 星期三 【微冷】

琴晚我又係訓得唔好，因為我臨訓之前祈禱，我又再次一路祈禱一路喊．．．我喊左足足一個鐘頭，一路同神交談，一邊在告訴神自己心中既想法同痛苦感覺，很是難受．．．到了今朝，雙眼自然是腫腫紅紅的了．．．

唉，正所謂：每逢佳節倍思親．．．真係好o岩！臨近節日聖誕，我心裡邊總係想起很多過往呢七八年黎既回憶，同埋一個人．．．而呢d回憶當中，有甜既有痛既；甜就甜在它們真係一d好美好，好令人開心既回憶；痛就痛在往往呢d美好既回憶到左而家呢一刻已經唔再可以延續下去，令人感到痛苦！．．．真係好矛盾吧！

約兩個月前，大家剛分開，我初時真係感到十分痛苦！我覺得自己好像一隻被主人飼養多年而被拋棄既小貓咁，一路以來我既生活都有著主人的陪伴，照顧，愛錫．．．但係，到左一日，主人竟然說不再愛我了，他不再需要我了，他認為我滿足不到他了，他想找其他東西去代替我了，我在他心目中已經不再重要了，他不能夠再忍受我為他帶來的所謂麻煩及問題了．．．很是痛苦的感覺！而到了而家，雖然這種感覺已經漸漸開始消失，我亦開始努力去為自己找回應有的位置，希望四處找尋更懂得去愛錫我，照顧我，關心我的人；雖然而家我找回了家人和朋友，但係，我想要的就是這樣嗎？連我自己都不知道．．．

以前，曾經很多人說：你們很親，你們很夾，你們很恩愛，你們一定可以永結同心．．．但是，而家又是什麼的境地？為什麼人人說的東西都沒有實現的呢？究竟是什麼原因？當事人一直沒有回應，亦沒有給我任何答案，一直都是一個謎！

有時候，我真係覺得自己並非係大家想像之中那麼堅強，那麼瀟灑．．．

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

從小老師也加倍認真
來教導我步過紅綠燈
右與左必須清楚看真
那管一次做錯 也都可摧這生

何解我戀愛雙倍殘忍
從來是快樂過便不會僥倖
動作小 簡單偏偏最深
我怎可以做個最優秀路上行人

＊明明綠燈 轉眼變成紅燈
假使相當勇敢 怎可挽回自身
若要衝損傷怎可以不留痕
來又去 要找的際遇未接近＊

＃明明綠燈 轉眼變成紅燈
抬頭前望去 對面馬路如此吸引
逐秒等 心急總加倍的難行
難道我要必先壯烈地犧牲去換吻
(如夜了我衣衫太薄便歸家靠路燈)＃

誰想到走錯死裡逃生
才明白較沒有夢想更不幸
若誕生 不好好開過心
也不可以被愛 我不過是像泥塵

>>December 21, 2006 at 1:07:09 PM GMT+8

2006 年 12 月 19 日 星期二 【微冷】

今日係放假天．．．其實又是放假天，我已經一連放了三日假了．．．三天無啦啦的假期吧！真係有點兒古怪！不是預期的假期，總是感到很無聊的，因為在沒有計劃下，真係唔知道自己可以有咩好做呀！今日朝早一早起左身，（其實琴晚都唔係好早訓），跟左媽媽落街食早餐，之後同媽媽去買餸，好無聊咁就返左屋企．．．到左下午，本來打算同媽媽去行荃灣，點知後來又改變左方向，去左屯門市中心食野，我地去左溉流金歲月食下午茶，好味，我始終都係最鍾意食佢果個開揚乾蔥伴麵，正呀！仲食埋佢果個古醬叉燒包，都係好味，yeah~ 十分之飽，跟住去左行街，但係，，，唔知係咪近排行得多街，所以總係覺得好悶，好唔想行，好似冇咩野好睇咁．．．總之一個字，悶！

之後返左屋企，我都係冇野好做，去左去訓覺，一訓就訓到去食飯，唉！咁就虛渡左一日喇！但係放左三日假，真係要好好咁收拾心情返工了．．．黎曉寧，努力呀！

>>December 20, 2006 at 12:26:28 PM GMT+8

2006 年 12 月 18 日 星期一 【晴】

今日簡直係有寃冇路數呀！明明係返左工，就係因為一個好小既問題而攪呢攪路，一d麻煩既女人真係好乞人憎囉，偏偏鍾意係度整色整水咁，唉．．．問題係攪著我呢個職位又唔係好高，o岩o岩夾正係中間既人丫嘛，真係玩死呀！好討厭呢d女人呀！不過鬼咩，都仲要捱多三個月先至可以唔洗再見到佢呢d咁既人囉！唉，當係又放多日假囉，都係好事黎既，因為我琴晚又訓唔到覺喇，因為食左d藥所以訓唔到囉．．．

算啦，講番d開心野，今晚約左班mto舊同事食飯，嘩，真係好經辛苦先至叫做約齊人，真係辛苦菲比了，要她今次做發師號令了，哈！今晚食得很開心，大家都有講有笑，特別多謝wil哥，佢買左d好好味既聖誕蛋糕比大家食，哈，真係好味，不過就甜左少少，哈，怕肥肥啦！不過最緊要係開心丫嘛！yeah~ 可能好耐冇見過呢班朋友啦，我開始總係覺得有點生疏左咁．．．不過我知道佢地係好錫我架，我都會同樣好錫佢地架．．．我地一齊加油努力啦！我未來都會有一d既目標同計劃，我好希望可以成功達到同埋做到啦，我需要你地既支持同鼓勵．．．因為，我發覺得不能夠少左你地呢班好朋友．．．阿wil，我知道你係好關心我架，所以你每每都話係因為我今日先至出黎食飯．．．我真係好多謝你，我收到晒架喇．．．多謝你！

今日知道考試果位好朋友應該考得幾好，聽佢講本來三個鐘既考試時間，佢可以一個鐘已經完成得到，所以證明d題目係幾咁簡單易做啦，哈！我都話架啦，你實掂既，今次個牌你仲唔係”眾望所歸”？朋友，加油努力啦，永遠支持你的．．．

>>December 20, 2006 at 12:12:45 PM GMT+8

2006 年 12 月 17 日 星期日 【乍雨乍晴】

今天天氣仍然十分凍，剛才收到一位好朋友的sms，真是感動．．．多謝你的sms，我會小心身體的！

今早仍然十分頭痛，仲不斷在咳，我很相信我的氣喘病又是時候發作了．．．每逢天氣一轉我總是這樣，尤其是天氣突凍既時候每每很容易病．．．醫生一向都建議我長期噴類固醇去控制個情況，只是連續爰用兩至三個月後，再睇番個進展情況去計劃下是否需要繼續爰用或者減少用量．．．我都考慮當中呀，因為爰用烡固醇始終對身體唔多好，一來好容易肥，二來好容易生暗瘡，我近排都生多左瘡呀，我相信都關事架喇，唉！所以都未知點好．．．

明天約左mto既舊同事食飯，佢地話會去映下聖誕靚相喎，咁聽日都要著靚d先得喇，哈！好開心，可以食番餐，玩番餐，同埋仲有可以交換禮物添，yeah~ 但係，好病唔病而家黎病，聽日都唔知食得d乜囉，好可憐！

明天有位好朋友將要面對考試呀！我在此祝佢考試成功！題題識做！yeah~

>>December 18, 2006 at 12:10:38 PM GMT+8

2006 年 12 月 16 日 星期六 【乍雨乍晴】

嘩~ 今朝得果13度咋，不過好在個太陽夠晒，所以都唔係十分之凍．．．

今朝起身時十分之唔舒服呀，一來爹地媽咪佢地兩個已經病左，我唔知係咪比佢地野左我喇，二來琴晚可能食得果餐太"豐富"了，有點食滯左，hehe~ 成晚個胃都唔多舒服，今朝起身時仲超頭痛，琴晚訓之前其實已經食左傷風藥，我半夜仲喘過氣黎，噴左幾次都好似唔係好得咁，我相信係因為我枝噴霧轉左牌子，所以好似唔係好work囉，攪到我成晚都訓得唔好呀，今早起身所以十分之頭痛，好似超病咁囉！好辛苦．．．後來因為今日中心唔夠人，加上有線又黎我地度拍野，所以我必須要返工呀，最後死死下咁返到去，一路搭車一路想嘔呀，超辛苦．．．anyway，都捱左一日喇，唉．．．而家好了點啦．．．只係咳咳啦同埋有點胃痛咁．．．仲有係好腳軟，因為今日返黎果時冇位坐，企足一粒鐘先至返到屋企．．．唉！

今日爸媽參加了教會既長洲遊，所以得番我同妹妹兩個去食飯，好飽呢，我地叫多左野呀，食唔晒，不過打包左番屋企益下爹地啦，佢可以”送”啤酒食嘛！今晚要早點訓，好好休息先至得．．．最多唔睇一公升眼淚啦．．．因為平安夜要報佳音，所以聖誕節前一定要好番呀！！

>>December 17, 2006 at 1:58:07 PM GMT+8