2007 年 5 月 5 日 星期六 【晴】

wow．．．今日係超級眼訓的，因為琴晚玩到四點先至訓覺呀，o．．．

今日簡直係超級唔願起身，我都衰架喇，訓到成九點先至比爹地叫醒我咋．．．跟住成日都好似遊魂野鬼既生活了．．．

返完教會，去左買左少少野，之後打算回家，因為A仔在家等緊我地回去一起飲茶呢！他就好啦，可以訓到十一點先起身，我就可憐了．．．但係好景不常，今日無啦啦銅鑼灣唔知攪什麼活動，好似係青少年慶十周年回歸咁，有巡遊呢，超級多人呀，又封晒路，我地好經辛苦先至可以搭到車走人，仲要塞車，所以攪到A仔係屋企等左我地好耐，餓到佢傻左．．．真係衰，攪到咁樣．．．不過真係冇人想咁架，真係激氣呀！

之後最終去到飲茶，點知已經成四點咁滯，唯有O拿O拿聲叫野食啦，點知A仔佢又突然唔舒服，攪到我好擔心佢呀，唉！真係唔知係咩原因唔舒服喇．．．後來，我地飲完茶之後我同A仔就快趣返屋企，抖左一陣我再陪左佢返佢屋企，因為都好擔心佢呀．．．我地搭的士返去啦，無計！返到去我同佢都好累了，所以都訓覺，一訓訓到九點半了，訓到人都傻埋．．．

起身之後好在A仔媽媽整左D米粉過我地食，食完之後又唔係好眼訓喎，所以而家又係度上網睇野同玩玩啦．．．哈．．．而家點幾了，其實都應該訓了，因為都開始有點兒眼訓吧！

唔，我估到聽日一定又唔多想起身，同埋會係好累囉．．．唉．．．可憐！不過好開心，我地打算今個星期五去WILD CAMP，不過唔知去唔去得成喎．．．仲有，星期三原來A仔都放假，真係開心，我地又可以見面了．．．YEAH~

>>May 7, 2007 at 4:31:24 AM GMT+8

2007 年 5 月 4 日 星期五 【晴】

今日返工，返到去金鐘就去左買左個好豐富既麥記早餐，yeah，係我至愛既熱香餅呀．．．確實係令人開心，不過真係好肥下喎．．．不過食完之後個人十分之滿足喇．．．成朝都係好呆滯咁，不過我都有做野架，而且都有打過唔少電話同外間聯絡添．．．不過個人真係冇咩心機做野咁，有太多野去跟同做喇，做到都已經冇咩心機喇．．．

幾經辛苦到左兩點食飯，其實朝早份早餐都幾飽下，所以都其實可以唔洗點食．．．之不過話晒都要捱到五點先至放工，所以都走左去食個大快活下午茶啦，頂住個肚先．．．

放左工之後就好開心喇，因為約左A仔係市中心等，一心諗住去A LOOK睇下眼鏡，點知都睇唔O岩既，激死呀！跟住行多一陣就返左去屯門碼頭，同左屋企人去酒樓食飯．．．食食下都成九點幾十點喇，真係豐富下架！返到屋企HEA左一陣之後都已經成十二點幾，我同A仔就傻左，決定要玩一次大富翁．．．哈，咁就已經玩到三點幾喇，但係又好似唔係好累咁，可能已經玩到有點金睛火眼喇，哈．．．今次又係我大獲全勝啦，YEAH~ 勁呀！

O．．．明天我仲要返教會呢，一定眼訓死我了．．．

>>May 6, 2007 at 2:33:01 PM GMT+8

2007 年 5 月 3 日 星期四 【乍寒還暖】

唉，今日既心情仍然係唔多好呀，成日都好唔開心咁．．．真係好難頂呀！

朝早返去做左一d野咁就十一點半喇，之後再落左去中心同d下屬交帶叫佢地幫手做d野，之但係班死野就好似當我死咁，之前，真係差唔多一個月前我交低叫佢地做既野，到而家為止都可以一d都冇做過囉，你話我係咪要死比佢地睇丫？有時真係好心淡，上司就不斷壓迫我，又話我果樣呢樣，又醒到死往往叫我叫d下屬做野，咁自然佢地就當我係衰人．．．而d下屬又唔理我，唔肯做野，呀．．．你叫我可以點呢？好辛苦囉．．．完全冇人理過我既感受，我覺好心淡呀！

不過，好在放工果陣有一個驚喜．．．就係A仔佢神秘地過左黎接我放工呀，真係好開心同安慰呀！係我最唔開心同失落既時間，就係有佢係我身邊陪住我支持我，我覺得自己好幸福呀！多謝你呀A仔．．．錫晒你！你既出現確實令我感到好幸福呢．．．我都明知A仔佢好累了，但係佢都堅持陪我行街，食野，講笑．．．真係好多謝佢呀！好感動呢．．．雖然我並冇同佢講到我什麼唔開心，什麼令我心情不佳，但係我知道佢都好明白我，佢都冇問過我半句．．．真係好感謝佢！

返到屋企，同一個好姊妹傾MSN，知道佢好唔開心．．．我都好擔心佢呀，我真係好怕佢比人呃．．．唉．．．愛情真係可以令一個人麻木，我都曾經試過係咁傻．．．所以，我真係好希望神可以幫助我呢個好姊妹，可以鼓起勇氣面對問題同逆境，亦都希望神可以協助佢處理佢既問題．．．

明晚好開心，A仔會黎我屋企食飯，哈，之後佢會留係度過夜，等到星期日會再同我屋企人飲茶．．．好SWEET既家庭日呀！好期待呢．．．

>>May 4, 2007 at 3:54:47 PM GMT+8

2007 年 5 月 2 日 星期三 【晴】

唔知A仔食左我整比佢既野食未呢？唔知味道如何呢？唔，希望佢鍾意食啦．．．

今日好累呀，其實琴晚太眼訓了，所以同A仔一早十一點零就上左床訓覺了，一訓就是今早七點半了．．．好不願才起到身．．．之後落左下面等村既，點知村巴發生事故，攪到我遲左搭車，不過好在最後都冇遲到．．．返到公司，攪左一輪野，唉．．．唔知點解，近日越來越發覺自己個心好散，成日都好唔想做野．．．EVEN連我上司都話我近日好似做野慢左好多，好多野都好似跟唔足咁．．．

死啦，點解會咁架？係我近日成日病，成日太累，所以心不在焉？定係我個人既性格變左，變得樣樣野都唔上心，冇晒以前果一道火？或者係我真係懶左，D懶根走晒出黎，唔可以連根拔起晒去？定係．．．根本我對呢份工完全提唔起勁去做？諗番起，我即使之前份工我都好有心去做，即使係每一個細節，我都好上心去做，仲做得好快手添．．．但係而家真係成隻豬油咁呀！完全冇左個心同果道火．．．唉！

其實，真係越來越覺得係呢度做係好冇意思，好冇心機呀！唉！總知人和事都係好唔鍾意，令我都好un合皮(unhappy)．．．唉！但係有時係度諗，都咁大個人啦，唔通連呢d咁既"小事"都唔可以接受？都唔可以好好咁安份做一份工？但係，有時有d野我自己都唔識得去解釋或者去解決．．．唔通又推得一乾二淨咁交比神？什麼一句：”神自有安排”？我知神自有安排，但係又是否將所有野都要推得一乾二淨比神去為我解決呢？我自己係咪都應該有d責任去處理同找出問題既原因呢？之但係我自己真係好頭痛好心煩，因為，我只係知道４嗡刻我對呢一度既人和事都好唔喜歡，而且係呢度工作我得唔到自己想要既尊嚴，地位，人格，信任，專業，興趣．．．真係一句，”十分之無癮囉”！有時候都幾心淡．．．當初黎呢度做，明知自己並不會合適在一間政府部門度做，都堅持做呢份工，原因好簡單，就係我要離開當時我不喜歡或者我認為條件不夠好既一份工．．．到左而家，我好切實知道自己真係好唔適合同政府打工，尤其係接受唔到佢地既人同做事方式．．．加上，呢度既發展同進升係等如零，唔好話丫，連人工都冇得加，人地聽落都好笑，唔係嘛，政府工都冇人工加？

講真，你話我係咪仲有一道火想好好發展，好好發揮自己？其實，我又唔係講到什麼要好有衝勁咁，只不過我唔甘心咁樣就一世o者．．．我最唔鍾意一個人冇晒上進心，冇晒積極既心．．．所以，我見到而家既自己．．．確實係有點討厭呀！唉．．．．我真係好想積極番，但係，好似無論點都係提唔起勁咁，真係好心煩呀！！神呀，求你可以幫助我，讓我可以好好找到自己想要既東西，想達到既期望，讓我重新積極起來．．．阿們！

>>May 3, 2007 at 2:27:32 PM GMT+8

2007 年 5 月 1 日 星期二 【晴】

今日係假期，終於可以訓多少少喇，今朝成十點半先至起身，起身之後好乖咁做運動，因為要努力keep fit呢，哈！確實肥左好多，唉！

跟住十二點幾就出左門口，因為今日約左個好姊妹食lunch呀，真係好，可以一路食野一路分享左好多好多，真係好感謝神給予左我地一個咁好既時光，可以分享左好多大家既心事同感受．．．跟住，我一條友係市中心行左一陣街，咁又比我買左兩件衫喇，哈．．．一出糧就大出血了！行到三點幾就返屋企，返到屋企媽媽又叫左我陪佢落街，我地去左麥記食tea，食完之後同左媽媽去買送．．．我今日決定整餐好既比A仔食，所以好努力咁諗整咩比佢食好，最後決定左喇，哈！

返到屋企好努力咁整野比A仔食，比佢聽日帶飯丫嘛，哈！之後，我食完飯九點幾，我就拎埋D野過去佢中心度接佢放工喇．．．我因為太累太唔舒服了，所以一路等佢放工一路好辛苦咁等．．．不過唔緊要啦，最緊要係可以親手將好好味既野食比到佢手上．．．佢放工之後，我同左佢一齊返左元朗．．．

唔，聽日又是返工天了，今日成日都好肚痛呀，希望聽日唔好再痛啦．．．

>>May 3, 2007 at 1:48:31 PM GMT+8

2007 年 4 月 30 日 星期一 【晴】

今日係勞動節，我確實係要勞動架，唔似各位朋友可以放放假，抖抖下咁．．．真係可憐，個病都未好得晒就要返工了，唉．．．今朝起身超眼訓囉，真係好累，簡直唔想起身呀！之後一上車就訓到落車．．．哈，今日竟然八點十就返到中心，所以我一條友開門整定晒d設施囉，都ok啦，可以郁下，個人唔洗太眼訓．．．

整晒d野就成九點半喇，呢一刻先至食早餐，食完早餐就食藥喇．．．唉，超眼訓呀，完全今日冇心機做野，成日恰眼訓囉．．．到左兩點，終於食飯喇，我去左大快活，睇黎睇去都唔知食咩好，想食既野又冇喎，所以走左去大家樂，點知又係睇極都唔知食乜好，最後又走番去大快活．．．好無聊呀！買完野返左去中心食，食到三點三，再等到三點十再食藥．．．嘩，可能隔左太耐先食藥，所以攪到胃痛，唉，講起而家都仲痛緊添呀．．．

好在聽日放假，可以抖抖喇．．．聽日約左個好姊妹食lunch，真係開心，可以去食越南野喇，yeah~ 食我至愛既撈檬，hehe~ 仲可以比埋d手信佢啦，唔洗放係我度咁耐都比唔到佢呀！哈！期待聽日見到個好姊妹，可以同佢暢談一番啦．．．

>>May 1, 2007 at 12:57:55 PM GMT+8

2007 年 4 月 29 日 星期日 【陰】

今日慘慘，因為病了，所以沒有返工．．．

今朝起身其實咳既問題不是十分嚴重，反而係突然發現右邊面好似腫左少少呁，而口裡邊D牙肉就腫左晒，好痛！我好驚係”生炸腮”呀，不過媽媽話一生人只會生一次，我細個果陣好似生過，所以媽媽唔係喎．．．不過，我今日最後都係請左假去左睇醫生．．．醫生話我右邊淋巴腺有少少發炎，所以腫左，仲有喉嚨超過發炎，咳都幾勁，所以醫生一次過比左三日藥我，仲要我食抗生素添，唉．．．好可憐！

今日雖然病左好可憐，不過好在有A仔佢關心我錫我．．．佢今日下午拎左假，陪左我成個下午．．．其實都冇話邊個陪邊個既，最緊要係開心丫嘛！HEHE~ 總知我知道佢係愛我關心我就開心架喇．．．有病都病得開心，哈！頭先係屋企果陣，同A仔傾開好多野，唔，真係好希望零八年十二月二十七日快D來臨呀！不過，我知道將有好多野要準備同煩惱，尤其係錢呀！唉唉．．．要努力儲錢先得喇，最多．．．買少D野啦，哈！

>>April 30, 2007 at 2:04:03 PM GMT+8

2007 年 4 月 28 日 星期六 【陰】

今日係放假天，琴晚去完A仔屋企之後，今日就跟左佢返屯門，因為佢要返工，我就返屋企啦．．．返到屋企，屋企人話去飲茶茶，咁就梗係去啦，難得一家人去飲茶茶嘛！飲完之後，同妹妹係海趣坊行左一陣，妹妹買左D野，之後我地再去蝴蝶村JOIN番爹地媽咪去買野．．．買完就返左屋企．．．

返到屋企之後，因為今日咳得好勁，所以媽媽買左枝咳藥水過我食，食完之後超眼訓呀，所以我走左去訓左一陣，訓醒之後就食飯喇，食飯果陣D藥力都未散，所以成個人好似呆呆滯滯咁，好辛苦！最後，捱到去十點幾就想訓了．．．好累呢！就黎咳死喇．．．

>>April 30, 2007 at 1:48:39 PM GMT+8

2007 年 4 月 27 日 星期五 【陰】

今日因為唔洗帶tour，所以成日都可以好安份去做我既文件工作．．．但由於我office部電腦死左，所以我不得不要出去counter或者圖書館度工作，反而更好既係，唔洗令我會一個人係office度hea．．．哈！

今日返十點，所以可以去麥記買左個包食．．．-_-"本來係打算食個熱香餅早餐架，不過．．．近日咳得好勁，所以唔敢食咁甜既野，所以最後放棄左．．．好可憐哦！食完早餐就開始出左counter度做野喇．．．不經不覺就做兩點，到左我食飯既時間．．．我今日去左一間食魚旦麵既野，我之前都未去過架，係我琴日行左去灣仔行行下比我發現左佢．．．其實呢間野都唔係十分平，一碗普通既魚旦麵都要成廿蚊，一杯豆槳都六蚊，所以琴日都食左廿幾蚊．．．但係碗麵唔係呁大碗架咋，我個食量就剛剛好囉！食完之後我去左行街，入左zara，衫就真係冇咩特別，但係睇中左對涼鞋，三百幾．．．唔，下個月先諗下買唔買佢啦．．．

再過多三粒鐘，咁就放工喇．．．放工之後本來打算去舊同事屋企玩既，點知今日A仔CALL我話原來今日係佢媽咪生日，所以我地今晚同佢慶祝．．．我放工後直接入左元朗喇，A仔佢就一早準備好晒d野，今晚A仔佢親自下廚煮牛扒比佢媽媽食，唔．．．第一次黎講都算唔錯啦，係靭左dd咁多啦，其實都真係唔錯架．．．食完之後我同A仔係度睇番d舊vcd，我地係度睇周星馳既九品芝麻官，哈，超好笑，雖然舊，但最緊要受嘛，哈！跟住我地十點零鐘食蛋糕，好味，不過好肥，食左好多．．．而且，一定會咳死我喇，太甜太凍了．．．所以，係咁咳咳呀．．．天呀！

最後，A仔話唔夠喉，要再睇埋周星馳既鹿鼎記，咁就睇到點幾鐘喇．．．嗚，眼訓呢！

>>April 29, 2007 at 5:27:51 AM GMT+8

2007 年 4 月 26 日 星期四 【晴】

今日一朝早起身，又是返工天．．．放了兩日假真係好唔捨得放假既感覺呀！

返到去又係多到想死既ADMIN工作．．．往往每次放完假返去都總係咁既情境，真係令人十分討厭．．．之後十二點幾落左中心，個人就開始HEA喇，同左個同事傾計，傾左好多野，包括工作同感情生活．．．雖然呢個同事年紀比我細好幾年（佢比我妹妹還要少一年），而且佢亦係我既下屬身份，但係往往同佢傾計好有親切感，佢好願意聽人講野，亦會懂得分析同了解．．．所以佢係唯一我係公司可以傾訴既對象．．．講真，以前會係我上司，不過而家已經再唔會係囉．．．

之後下午好努力咁繼續做我要做既工作，好慘，我OFFICE部電腦死左，我冇電腦用，所以唯有去左圖書館用電腦做野．．．不過我往往喜歡圖書館這個地方，一來寧靜，二來佢靜得黎又可以知道出邊既事，唔會好似OFFICE咁收埋一邊出邊發生什麼都唔知道．．．四點三開始等另一個TOUR，點知佢地遲到，最後成五點一先至到．．．哈，都好，可以好快手帶完收工．．．

返到屋企，今晚又有我好愛吃既上海年榚．．．媽媽真好，成日整好野過我地食．．．媽媽，我愛你！聽日返十點，可以訓晏D．．．突然間想起．．．麥記既早餐，真係好想食．．．想食．．．熱香餅呀！不過．．．好肥．．．但係．．．決定明天買來吃．．．YEAH~ 因為．．．要對自己好一點吧！連自己都不愛自己，別人又怎會愛你呢？

>>April 27, 2007 at 2:20:31 PM GMT+8