2007 年 7 月 15 日 星期日 【微雨】

唉，今日返到公司真係好多野跟呀，只係要服侍好個老細都已經煩到要死喇．．．而且今日仲要發生左件麻煩事．．．不過我都唔會太在乎或者在意了，因為我覺得只要做好自己本份都已經好足夠了，對嘛？

今朝係咁電話來電話往，而且係咁對住部電腦係咁打野，又要對住部計數機係咁計．．．真係人都癲呀！好辛苦呢！唉，仲要整單麻煩野出黎，無啦啦又話要開會傾．．．其實，都唔知係咪我老細作大件事既，我同同事都好懷疑事件既真實性．．．不過算啦，人地係上司，點都可以架啦．．．係咪？唉，而家真係越來越冇心機工作，尤其今日等左一日果間上星期通知我見工間機構都冇REPLY我會否再安排面試．．．唉，真係個心都”囉囉攣”呀！好想真係試下，睇下有冇機會，但係好心急，又唔想比人知．．．我都唔知點好呀．．．或者，聽日試下打電話去問下啦，係就係唐突左少少．．．不過，我相信加點誠意實有機會的．．．我真係好想試一試呢．．．

天父神呀，希望你給予呢個機會我啦，可以試下見呢份工，甚至有機會試下呢份工，因為我真係好想轉換下而家咁沉悶既環境，咁冇發展既環境．．．因為真係好辛苦了．．．我知道神你只有安排．．．我唯有的是等待神你既安排．．．但係．．．真係希望神你可以眷顧我，讓我可以得到神你安排最好的東西．．．阿們！

放工果陣搭車，唔知點解都唔多眼訓，反而一直同個好姊妹係度傾電話．．．講左好多好頭痛或者唔開心既事，佢都係講左好多煩野比我知．．．其實有呢個好姊妹真係好開心，因為佢成日都同我分擔喜與悲的，真係好感謝神呀！返到屋企，就好積極打信．．．不過，近日好似冇咩工O岩咁呀！我都開始有點擔心．．．講真，話唔擔心就假既，因為而家仲講緊要SAVE $結婚呢，一定不容有失架．．．希望呢個半月可以快D搵到份好工，咁我就唔洗煩啦．．．

>>July 16, 2007 at 2:04:31 PM GMT+8

2007 年 7 月 14 日 星期六 【晴】

嘩~ 今朝十分之眼訓呀，因為琴晚同A仔一次過睇番晒4集既學警，終於睇埋個大結局喇，不過就十分之眼訓囉，後來都成點幾兩點先至訓呀，唉．．．

今朝雖然返十點，不過因為冇村巴搭，所以都要早點出門口．．．點知，唉，我幾錯左小村巴時開車時間，攪到我D時間亂晒龍．．．不過都好彩既，起碼我去左總站搭車，會有位坐．．．如果我去左我預期去既車站，一定冇位坐囉，因為都原來幾多賓賓坐呢班車出去港島區架．．．

返到去，嘩，早左成半粒鐘呀，於是改左今日既更表由返十至六，變成返九半至五半，早返半粒鐘走人都好丫，起碼返屋企抖下都好呀！今日好忙，因為朝早同下午都有團，而家越來越唔喜歡帶團，因為有時都覺好悶，而且都幾辛苦，係咁講野冇停過呀！唉．．．好厭倦而家既生活．．．即使上司幾多既壓迫同不滿，我都而家好少理．．．因為真係再頂唔順呢個”女王的教室”既女王上司喇．．．佢都SHORT架，成日都冇理取鬧，又做埋D鬼祟野，成日都唔聲唔聲咁，但係其實個心都不知成日密謀計算緊人，而且仲成日A膊，係野都卸晒比我，又成日大人，但係自己又冇權冇勢．．．唉，好討厭！如果佢係一個好既上司，我點仆心仆命幫佢又點話丫，之但係．．．佢絕對唔係之餘我亦認為佢唔識得做上司囉．．．唉！好討厭，好唔喜歡同佢合作！有時真係好憎囉．．．

不過算啦，即使係唔做呀都仲要捱多個半月啦，點都要完成埋佢，仲要係我同人講我唔續，而唔係人地唔要我囉．．．我都係人O者，我都係為自己既感受同出路而FIGHT架咋，無它既，又冇發展機會，又冇人工加，真係預左人走．．．出邊要搵份高少少人工既我相信都唔難，而且出邊個市都幾好丫，我唔信自己有手有腳搵唔到份好工．．．雖然係要時間，不過我會好好把握而家餘下既個半月架．．．

本來星期五果日有份工叫我聽日星期一去見工，但係要返工呀，而家都唔知佢會否再幫我約見，唉．．．真係幾想試下呢份工架，因為佢好多既條件都比而家份好．．．希望神真係會眷顧我，比呢個機會我去試一試啦．．．

今日A仔本來係唔洗返工架，之但係佢聽日又要帶班麻煩人去行山，佢都好擔心呀！其實我都好擔心呀！唉．．．真係好煩囉．．．講真，如果而家叫番我做番外展或者做番社工，倒轉頭走．．．我真係唔肯囉，真係發覺自己越來越冇以前果一個心同果度火架喇．．．而家反而會覺得：唔好攪我囉！好似好衰嘛？不過．．．我估每個人去到唔同既階段都有唔同既選擇同安排既．．．

琴晚同A仔傾過關於結婚同佢媽媽既事．．．其實，我覺得做野有時唔可以太執著或者太多顧慮，因為有時咁樣可能令事情會更糟．．．嘗試括出去，用平常心去面對，用輕鬆既態度同心情去處理，唔係會更好咩？有時我明白人與人之間唔可以存有太多既懷疑同猜忌，反之就係要透過溝通同了解先可以打破呢D懷疑同猜忌架嘛？你唔知對方點諗，就做什麼都不行，做什麼都不成了．．．對嘛？所以大家既然有緣成為一家人，何不可以開門見山沒有猜忌下去好好溝通呢？仲有，其實結婚是為了什麼？是要與自己最深愛既人一同走進另一個階段？定係純粹係一場SHOW呢？如果係前者，我相信無論用什麼方法去慶祝，每一個愛我地既人都會好衷心咁去祝福我地．．．所以，即使最後達唔到我地預期既形式結婚，我覺得已經不再重要了，最重要既係．．．呢個婚禮係永永遠遠都係屬於我地兩個人既婚禮．．．其他人？只係一個陪襯吧！因為真正既主角是我地呢．．．係咪？所以，預其POSTPONE咁令人失望，不如就睇”送”吃飯啦，好好善用同安排原有的資源便可以了．．．對嘛？最重要的是．．．我愛你，而且只要我知道你都同樣愛我的話，已經足夠了．．．

>>July 16, 2007 at 1:50:59 PM GMT+8

2007 年 7 月 13 日 星期五 【晴】

嘩~ 今日無啦啦肚痛同胃痛，都唔知發生咩事，好痛呀．．．已經由星期二開始冇得去bu bu啦，點算呢．．．好驚呀！仲痛痛添．．．後來頂唔順都係去左睇醫生．．．醫生話我一d事都冇，初頭都懷疑過我可能盲腸炎架，不過佢chk清楚黎又話唔係．．．佢話可能我近日工作壓力大，個人情緒緊張，所以令到我經過個胃痛，同埋自然消化唔好時，肚仔一定谷住晒d野，咪更加去唔到bu bu囉．．．唉．．．好可憐既我呀！醫生只係開左一d特效既胃藥同埋止肚痛既藥比我．．．唔，希望快d無事啦．．．或者可能我近排都太擔心A仔佢帶隊既情況，加上自己工作上又好似衝鋒陷陣咁卦，所以攪到咁既田地．．．唉！

今晚約左妹妹去睇”一期一會”．．．．簡直係期待以久既節目呀！因為之前曾經聽朋友講，個故事不但感人，而且內裡角色即場唱歌表現一流．．．所以對於呢個音樂劇都抱住一定既期望．．．最後，當然不負所望啦，一個字．．．正！故事雖然係我一早睇果時已經估中左個結局，但係真係幾感人下（不過又未至於喊左出黎）！而且當中角色既唱功真係正，尤其我非常欣賞林一峰，盧凱彤，同埋趙學而．．．真係好正呀！我以前一向都幾喜歡聽趙學而既歌，而且覺得佢都唱得幾好聽架．．．今次真係冇令我失望，佢既現場唱功而家越來越好呀！

不過有樣衰啦，就係遲左入場呀！本來我約左妹妹六點係CAUSEWAY BAY度等，佢不但遲到，而且仲又話行呢度行果度，陪佢去睇野，攪到遲左先至食飯．．．最後成七點十一先至去到．．．跟住見到好大班人都企左係入場口度，原來都唔少人遲到呀，哈．．．我地一班人企係門口度睇住大電視先，過左七分鐘左右，等佢轉場時就可以入去喇，好在都唔係MISS左好多，嘩，張飛好貴架，點可以咁晒架．．．

睇完之後都幾開心，雖然個故事內容係幾慘，不過最後一班人都可以積極面對．．．人生就係咁樣，當中總係有好多不如意同不能夠預料得到既事．．．當然，我地面對時會好辛苦，好困難，好唔知點好．．．不過我地身邊都總有一班朋友家人去支持我地．．．而且，只要我地勇敢，積極去面對，相信一定可以搵到解決問題既方法！

返到屋企都已經係十二點七喇，好眼訓好累呀！！明天約了朋友去大埔，探望一個朋友同她的BB，好開心呢！要早點訓吧．．．希望唔好再肚痛了！

>>July 14, 2007 at 2:47:18 AM GMT+8

2007 年 7 月 11 日 星期三 【晴】

今日都好眼訓呀，今朝完全唔想起身，因為琴晚真係訓得唔係咁好，尤其係波波貓琴晚無啦啦大叫左幾聲，我比佢嘈醒左，特登起身睇下佢咩事，點知佢又好似冇咩野咁，所以後來都冇理佢了．．．

今日老細冇返工，所以真係輕鬆好多，哈．．．一朝早返到30樓，做左一粒鐘野，就走左落中心繼續做野喇，因為真係唔想留係office度了，實在太靜太恐怖了，哈！係中心做陳就真係輕鬆得了，我今日最後都做左好多野．．．

到左3點，因為今日中心唔夠人，所以連我都要看埋counter，咁就三粒鐘了，十分難過既日子．．．雖然猜野係度做緊，不過都覺得好悶好難頂！都唔知平日坐counter既同事日子點過架．．．到左四點幾，食左一件由樓上老細請既蛋糕，真係好大份呀，食完之後好飽呀！不過．．．好好味喎！肥死了．．．

放工果陣好累，真係好眼訓，又係車度訓著了．．．一醒已經到了屯門喇．．．好唔願意咁起身呢！返到屋企hea左一陣就有飯吃了．．．好在今晚有我好愛吃的東西．．．媽媽，我愛你呀！辛苦你了．．．睇黎今晚都係早點訓吧！

唉，已經有兩天冇聽過A仔把聲，沒有A仔的消息了．．．真係好掛住佢呢．．．唔知佢而家點呢？做緊咩呢？工作順利嘛？D細路有冇曳呢？．．．真係好擔心好掛住佢呢．．．希望．．．佢聽日完左之後會打比我啦．．．

>>July 12, 2007 at 2:07:25 PM GMT+8

2007 年 7 月 10 日 星期二 【晴】

嘩~ 今日好早起身，因為要一早出去旺角做facial呀，哈．．．真係好早，早餐都食唔切就出左去，最後都係成十點九先至食埋早餐再上去美容院度．．．

唔，我諗我都係時候要積極少少做facial了，因為近排d皮膚實在差了好多，尤其係d雀斑同暗瘡印．．．唉！希望快d可以攪番好啦，如果唔係下年結婚就唔靚了．．．如果下次去果時都有人陪我就開心d啦，因為唔洗一條友咁悶丫嘛．．．或者叫妹妹陪我去都好喎，哈！

做完之後同媽媽行左一陣兆萬，之但係果度d舖頭成一點幾都未開門，攪到都冇咩野睇．．．後來我地去左椰林閣度食lunch，食完就返左屋企喇．．．返到去已經四點有多了．．．後來真係好眼訓呀，所以都訓著左，一訓醒已經係五點九了．．．哈！好辛苦咁起左身，”的”起心肝寫信．．．不過，只係寫左兩封咋，都冇乜o岩心水既工囉．．．唉．．．其實而家個心都冇咩點諗喇，如果人地唔續我既我都覺冇所謂，況且我都冇咩留戀架喇，所以．．．算啦，聽天尤命了！

之後去到六點九，我同妹妹先至突然想起想去市中心買少少野，所以索性約左媽媽係市中心等，因為媽媽早前已經去左市中心果度做GYM．．．我地去行左陣街，唉，又買左野喇，哈！跟住，我地去左EURO GO GO度食，好飽飽呀！

至於A仔，佢今日終於出左發去camp了，我都唔敢call佢呀，因為都怕阻住佢做野．．．其實都掛住佢架，始終又有少少擔心佢，又唔知佢攪成點呢？唉．．．希望佢順順利利，D細路乖乖地就好啦．．．

>>July 11, 2007 at 2:52:22 PM GMT+8

2007 年 7 月 9 日 星期一 【晴】

一朝早，老細就好似古古怪怪咁．．．無啦啦就叫晒人去中心話開會，原來大老細有d野要我地中心做，所以藉此公告呢件事出黎．．．o車，洗唔洗好似咁緊張咁丫，個樣好似死人咁！

同樣地，今日上午下午都有團要帶，所以我都索性落埋中心駐守！成日都好疲累，因為琴晚係A仔度好夜先至訓呀，所以好累呢！今朝搭車果時真係辛苦到死，好想繼續訓落去，哈！好辛苦到左放工既時候，我今日約左好姊妹愛麗斯呀，真係開心，我地都好耐冇見喇，本來約左上星期既，不過佢唔舒服，所以約左今日．．．

我地去左旺角行街，一見到之後我地先去食野，我地去左食魚蛋粉，都幾OK！後來我地去左行朗豪坊，因為發覺什麼旺角中心之類既地方實在唔係咁O岩我地行，果度都係賣好多妹妹仔野，哈，我地太老了．．．我地行到半路覺累就去左仙跡岩坐，飲杯野傾下計咁，哈，幾爽呀！飲完之後我地充晒電，就再繼續行，我地去左行兆萬．．．其實呢個地方都成日行架喇，之不過．．．哈，通常都係同A仔行，而且都係睇玩具多，反而少真係睇下衫囉．．．其實都發覺呢度幾多靚衫架，下次可以再黎睇下，因為都覺好利過旺中好好多多．．．跟住順手我地仲行埋家樂商墋場添．．．

哈，今日真係好多收穫，有買左衫，好味既野食（有預A仔份架，等佢去完CAMP返黎同埋D飛滋好番就有得食，OK？)，仲有袋同鞋．．．HEHE~ 又大出血了．．．不過．．．真係好開心呀！我同好姊妹仲約定下個月中再出黎，因為我地要一齊慶祝我地既生日！我地決定豪一次，去食TEA BUFFET！！YEAH~ 好期待呀！

唔，今日聽A仔講佢跟住幾日去CAMP既果班細路好曳呀，今日差D激死佢，攪到好麻煩．．．唉，跟住幾日佢去左CAMP我已經好掛住佢了，而家佢會好辛苦了．．．希望可以順利啦！在此，我為佢同佢今次活動祈禱，希望神可以協助A仔，給予佢能力，智慧，耐性，愛心，去讓佢可以順利舉辦活動，亦希望神可以讓參與活動既一班青年人知道，佢地其實是次能夠參與訓練係一個好珍貴既經驗同機會去學習，希望神真係讓他們感受到積極同認真參與既重要性，亦感受到團結一致既道理！最後，希望神可以保守佢地，眷顧佢地，讓佢地成個行程平安同順利完成！阿們！

唉，連續三日沒有A仔的日子．．．可以怎樣過呢？我又唔可以CALL佢，佢又因為太忙要看住D細路而不能夠打比我了．．．唔．．．總知在此祝福佢平安，順利吧！仲有努力加油呀！

>>July 11, 2007 at 10:05:47 AM GMT+8

2007 年 7 月 8 日 星期日 【晴】

今日返工好眼訓呀，因為琴晚都夜訓呢．．．今朝搭車一直係度訓，訓到落車．．．返到去都好忙，一朝早老細話要開會，都係為左一d好小既事，真係無奈呀！我戥果位同事唔抵囉，無啦啦比老細話，其實．．．都唔關佢事既，而且，佢都係一個實習學生o者，真係咁樣對佢好唔公平o者．．．唉！無計，鬼叫我地老細就係一個麻煩人丫．．．仲有，我相信唔會有一個老細會同自己既下屬講自己做野係好認真，所以連佢既上司都好信任佢．．．哈，我完全再次覺得佢根本唔識得做一個好上司囉．．．有乜理由咁同個下屬講架，就算佢係想個下屬知道做野認真先可以令上司信任自己，都唔洗係度台高自己話比下屬聽佢好認真，上司好信任佢囉！當然，事實上我好清楚知道，佢既上司係咪真係咁信任佢囉，哈！

今日好攪笑，成日都係為左一個實習學生既事而奔波，確實係好好笑，完全係高度介備咁．．．哈！希望件事快d處理好啦！因為實在太麻煩了，攪到老細成日都多多說話咁．．．

放工之後好快手就走左去搭車．．．真係好累又好肚餓，所以上車前買左個包上車食．．．食完之後就收到A仔既電話，佢約我今晚去元朗．．．所以返到屋企用最快既速度換衫再係西鐵JOIN佢．．．之後我地去左一間新開既日本料理度食．．．唔，D野好就好似麻麻地咁，不過一D都唔平囉．．．兩個人食左成百四蚊呀！O．．．頭先食飯時同A仔傾左好多野，知道A仔近日好多煩惱同解決唔到既問題．．．唉，我都好擔心呀！其實．．．真係唔知點解決好呀！我都覺好煩惱．．．頭痛了，點算好呢？

>>July 9, 2007 at 2:20:41 PM GMT+8

2007 年 7 月 7 日 星期六 【晴】

嘩嘩~ 今日好眼訓呀，好在返十點，而且唔洗出去港島區，反而係一朝早就出左去又一村開會．．．因為今日義工畤係果度開會，剛好有關於我既工作既野，所以我都要去埋一份傾．．．去到九龍塘搵左十幾分鐘先至去到果度既俱樂部．．．嘩，行到我丫，又晒又熱呀，真係人都癲呀．．．

去到坐底就叫早餐食，嘩，傻架，我都未試過食一個成三十蚊既早餐囉，真係滴晒汗呀！不過．．．人人都叫人人都食，我冇理由話唔食架，都叫左個早餐啦．．．不過．．．好在最後唔洗我比，由義工畤比，哈！我開會開到十一點度，見都開始傾唔係好關我事既野，所以都走人先喇，一來真係好悶，二來又想早少少走承機出去行陣街，三來中心今日又唔夠人，要早少少返去頂食飯嘛．．．之後我走番出去又一城行左一陣，嘩，都有收穫，係uniquolo買左好多野呀，真係好．．．d t-shirt好平呀，仲係要出名既designer設計架，都好正！行左一陣之後就走人喇，費事啦，始終唔係咁好既．．．十二點二都返到中心了．．．

到左兩點我食飯，唔知點解，明明十點幾食左早餐架，個肚都係度打鼓既，未夠兩點已經係度嘈喇，真係哀．．．所以食飯果陣走左去大快活食下午茶，仲要加大果隻，驚死唔夠飽咁．．．最後？咪就係飽到傻左囉！哈！．．．好經辛苦過左個下午，成日都做report，好死呀！冇計，老細吹交丫嘛，都係要做架．．．唉，仲有大把野要做．．．我而家越來越唔想做呢度，但係又未搵到份好工．．．今日都有抽左少少時間上過網睇下工黎既，不過就未有時間去寫信喇．．．maybe聽晚寫啦．．．

頭先食完飯，無啦啦同爹地為左d小事係度爭執．．．其實又唔係嘈交，只係係度討論．．．不過．．．真係好唔明白d男人點諗架，點解係都要咁死要面呢？又要補住自己既尊嚴，唔夠人地講或者人地講一句又叫人收聲shut-up．．．而且最叻係．．．踩低女人，台高男人．．．我最爭呢類男人架，自以為是，自大，狂妄．．．以為男人就好巴閉，大晒，好叻．．．！真係討厭呀！．．．不過算啦，始終都係老豆，唔通佢幾唔o岩都要同佢嘈咩，講左道理咪算囉，因為最後佢都係唔會聽架啦．．．唉！>_<"

聽朝又要一早起身了．．．唉，又要見到老細．．．而家每天都好唔想見到佢，好想逃避佢，好煩呀！一見到佢就成日都好似冇運行咁架喇．．．討厭呀！！！

>>July 8, 2007 at 3:19:30 PM GMT+8

2007 年 7 月 6 日 星期五 【晴】

嘩．．．今日訓到成十一點幾先起身．．．不過好累，因為兩個人迫埋訓係一張兩呎半既錄架床度訓．．．唉！加上間房既冷氣好凍，仲好似好多塵咁，可能好久沒有洗隔塵網卦．．．攪到A仔成日流鼻水呀，唔知佢係冷親定係鼻敏感了？我就冇事，只係覺得D空氣好差Ｏ者．．．

我地今日差唔多遊盡香港九龍新界呀！首先係佢家姐屋企港島區出發，再去左旺角陪A仔去拎D野，之後再係旺角返屯門，而佢就再去深水步，繼而返元朗．．．之後，大家再相約係彩虹度等，因為今晚我地同天使社群既朋友去釣墨魚丫嘛！我同A仔JOIN左之後再一齊搭小既去西貢，係途中撞丁三位朋友，所以一齊搭車．．．去到西貢．．．嘩，足足等左粒半鐘先至可以上得船！因為隻船出現左問題，初時大家都好擔心會否出唔成海，大家都有點失望的，後來都上到船．．．不過半路中途又話出了事．．．我都擔心返唔到岸呀，因為當時係海中心呢！我又唔識游水既．．．O．．．不過都冇事，大家好開心咁係船上食野同釣墨魚．．．

不過激死我，我又釣唔到喇，一隻都冇呀！而A仔就釣到一條，真係令人氣憤呢！我上次同朋友去釣都係釣唔到！不過今次叻D，因為上次我地一行十幾人都係得兩條，今次廿幾人有十幾條，都幾OK啦，哈！不過釣完都成十點半有多喇，後來成十一點半先至出番彩虹，幾可憐呀！返到屋企已經係十二點三了．．．

聽日要一朝早十點去到又一村開會呀！都未知點去．．．都係睇睇地圖先．．．

>>July 7, 2007 at 4:54:11 PM GMT+8

2007 年 7 月 5 日 星期四 【晴】

今日朝早本來要帶團，不過．．．唉，BOOK左間機構放左飛機呀，所以超麻煩囉．．．不過算啦，當我HEA左兩粒鐘去等囉，哈！

之後下午再有團帶，今日成日都好似冇點做過野咁，好似都係同同事係度講是非多，哈．．．都係講番我琴日同老細傾野既事．．．其實我有心咁同同事講既，哈，呢個係我既人事對策！因為要係D下屬面前站得穩，都總係要耍一點手段的．．．

下午五點，無啦啦又上番去３０樓開會，開到五點十走番去中心，跟住走人．．．因為今日趕住走要去見工嘛．．．A仔今日好好，佢陪左我去見工．．．好在有佢陪我咋，如果唔係悶死我！點解？我地六點半已經到左長沙灣，之後我地係美心坐左一陣，A仔再陪我去目的地．．．去到之後，對方竟然話因為佢地剛見緊人，而且因為地方淺窄冇地方可以收留我，所以要我遲多十分鐘先再去．．．當時係六點十，佢本來約左我七點既．．．果刻真係覺好怪！原來早到係錯架！哈．．．後來到左七點一我再入去見工喇．．．果度好細，得三張台同三個同事．．．我都有少少唔多想繼續見，不過算啦，都去左囉，而且琴晚又好辛苦咁大左份野，唔通唔去咩？見完之後，我同A仔就搭車過海，去左A仔家姐屋企！

嘩，A仔家姐佢姐夫剛去完北海道返來呀，真係羨慕死！佢地買左好多野食返來，我地都食左好多好好味既野．．．我都好想有機會去北海道玩．．．不過我知價錢一點都唔平呀！因為佢地今次係自由行，而且仲係自己租車架車，真係正！仲去左好多好特別既住既地方，食又食左好好味既野，所以相信唔會平囉．．．A仔曾經提過，如果2009年去當我地到時渡蜜月就好了．．．我都好想．．．不過真係要好努力儲錢錢了！

>>July 7, 2007 at 4:46:20 PM GMT+8