2007 年 3 月 16 日 星期五 【陰】

WOW，今日超級眼訓啦，我估琴晚都係訓左五粒鐘左右度咋，都唔知有冇添．．．好眼訓．．．

今朝個人好似呆呆地咁，仲話要帶TOUR添，真係半死呀！今日帶既TOUR又係我預科時間中學，我講左比MISS聽我係舊生，佢不知幾開心，即使佢唔識我，因為佢冇教過我，亦都唔認得我，不過好似大家既感覺十分之親近咁，好親切．．．好似突然想起好多回憶．．．雖然預科只係得果一年半度既時間，不過都好令人忘懷既．．．

帶完隊之後就一直HEA到6點收工，返到屋企超累啦，好容易咁訓左落妹妹張床就咁訓著左，不知不覺訓左半個鐘有多就比爹地既電話叫醒左，叫我地出街食飯．．．背著疲累既精神去左食飯，無啦啦唔知係訓覺時冷親定係鼻敏感喇，係咁流鼻水打噴嚏，唉，好辛苦呢！返到屋企即刻食藥啦，而家都係時候要訓喇，聽日仲要返九點，放工後約左A仔呀，因為大家都好耐冇見了．．．佢呢兩日去左考山藝呀，唔知佢凍唔凍呢，辛唔辛苦呢？掛住佢呢！期待明天來臨．．．

>>March 18, 2007 at 2:38:47 PM GMT+8

2007 年 3 月 15 日 星期四 【陰】

今日都冇咩心機做野，因為冇tour要帶，加上IC佢今日開始連放3日假，所以更加冇心機做野，見有野做既就做下，冇既就做下其他野咁，仲走左去睇一d關於台北基隆同野柳既網頁添，希望了解多少少資料先至去玩丫嘛．．．

今晚準時六點收工，因為今晚約左表哥表姐佢地去唱k，不過，因為約左佢地八點半，所以唯有我約左妹妹去旺角行下街先啦．．．唉，又失手喇，買左好多野，我竟然買左條levi's呀，我係見佢月下貨平先至買咋，佢原價六百幾架，而家加上冇size，得番26寸，我又o岩喎，又平到三百幾蚊，所以失手買左．．．其實，我都冇牛仔褲既，係都係一d好cheap既褲黎（作死，係度安慰自己，呃自己！）之後，細表哥好好，一早book定左房，但係佢地個個都遲到，所以最後得我一條友去拎左房先，仲一條友唱住先咁，真係怪．．．本身諗住個buffet應該唔會太差啦，所以一直都餓住個肚唔敢食野，點知．．．係超少野食同超難食囉，唉！食左少少都唔想食喇．．．

我地今晚玩得好開心好癲，玩埋d低能遊戲，都唔知點解妹妹次次都輸架，真係冇用！不過諗番起真係幾好存笑，妹妹好似由細至大同我地玩親都總會輸架喎，真係攪笑．．．我地映左好多好多相相呀，張張都係d低能相，仲有係玩輸左被人罰時映既相，有d仲係幾變態下添架，哈！不過，真係好唔捨得表哥表姐佢地呀，越玩得開心就越唔捨得．．．唉．．．但係最終大家都係要講分手喇，嗚！唔知幾時先可以再見到佢地呢？十月會係大表哥同佢未來老婆結婚既日子，我在此預祝佢地百年好合，永結同心啦．．．

今晚不出我所料，真係玩到好夜，我返到黎都已經係一點幾喇．．．唉，聽日仲要返工添架，一早仲要帶tour呀，好痛苦呢！

>>March 18, 2007 at 2:38:55 PM GMT+8

2007 年 3 月 14 日 星期三 【晴】

今日繼續努力返工，今日好忙，都好似唔知自己忙d乜野，只係知道總係走來走去咁，冇停過咁囉，好累呀！

返到屋企，真係累到飛起，加上知道聽日約左表哥表姐去唱k，一定會玩到好夜，所以．．．唔講野喇，而家走去訓喇，see you all~

>>March 18, 2007 at 2:16:39 PM GMT+8

2007 年 3 月 13 日 星期二 【晴】

今日放假，但係十點幾就比A仔既電話叫左我起身喇，佢約我出街街啦，因為難得今日大家都放假，所以一定要出來見面啦，我好掛住佢呢，因為好耐冇見喇，哈！

所以今日出黎好開心，可以見到佢之外，又可以同佢去買野，買左佢一直想買既野，哈．．．最緊要就係買到心頭好丫嘛，係咪？

跟住我地就返左屋企，自己煮飯仔食啦，好SWEET咁過左一日喇．．．

明天又要返工了，難得放左既四日假就咁過左喇，之後就要返六日工先至可以再放假了，真係可憐！

>>March 14, 2007 at 2:01:46 PM GMT+8

2007 年 3 月 12 日 星期一 【晴】

嘩哈哈~ 終於去完廣州返來了．．．呢個兩日一夜既旅程可以話係食到傻左！因為兩日都係食盡好野，我地食左無米粥，其實呢種粥真係用米黎煮，不過佢點解叫無米粥係因為佢將d粥煮到好綿，連米都可以融入埋落d粥水度，真係好正．．．好好味架．．．佢既食法係好似打邊爐咁，用d粥去當湯底，再將d雞呀，蜆呀，菜呀，魚呀咁落落去煮熟佢，之後d粥就可以食埋佢．．．最後d粥就會好鮮好甜，因為佢有晒所有材料既精華係度．．．

除左之外，我都食左好多廣州既出名甜品，例如雙皮奶，馬蹄露咁，真係好正呀！一句講晒，今次食左好多好好味既野啦，而家．．．肥肥喇，哈！本來仲打算減肥左先去台北，咁樣到時去台北可以盡情咁食丫嘛，點知而家失左手喇．．．不過，今次都幾好，因為完全係零消費，我除左自己買野比過錢之外，所以搭車食飯dup骨打bolling咁都唔洗我錢，全部由姨丈屯晒，哈．．．所以今次都開心既，雖然去行街都冇咩買得到，而且都係主要陪表哥同未來表嫂去買佢地結婚既野，都有點悶既，不過都ok啦，一班人有講有笑有玩咁，都幾開心架．．．

而家返到屋企喇，真係好累，頭先搭車返香港時又唔眼訓，所以成程車都係望住出邊，反而去到上水上小巴時就開始眼訓喇，所以返到屋企就好累喇．．．好在聽日放假呢！

>>March 14, 2007 at 1:57:29 PM GMT+8

2007 年 3 月 10 日 星期六 【陰】

今日終於可以訓番多d喇，可以成十一點半先至起身，真係咩都訓番陪本喇，真係開心．．．

今日訓醒之後就睇番之前一d錄左而未睇既電視節目，例如星期二晚既prison break啦，星期五晚大結局既十兄弟啦，睇晒呢兩套戲後，我同媽媽妹妹就去左市中心，我地做左好多正經事呀，好似陪妹妹去左整個PPS啦，去ONE2FREE度轉名啦，同媽媽去左中原買左部抽濕機啦咁．．．當然，我好開心既係，我終於可以買到一條好合我身既褲呀，我自從之前瘦左之後，一直都買唔到一條合身既褲著呀，成日都要著裙返工出街，而家終於搵到條喇，真係好．．．不過真係唔平呀，諗諗下都有點肉痛，不過冇計，都係要買架喇，唉！

聽日同後日會同姨丈姨媽表姐表姐夫同我媽媽一齊上廣州，因為大表哥要去提親呀，我個未來表嫂原本係廣州人，所以今次佢承邀我地一齊上去，順便去玩埋一份啦．．．不過．．．就少左兩日可以陪A仔喇，真係好掛住佢呀．．．今日收到佢電話，知道佢呢兩日去考山藝好辛苦，好累呀．．．真係好心痛好肉痛呀！希望佢可以好好休息下啦，我會買d好野食番黎比佢食架．．．聽朝要一早起身，因為九點車呀，所以．．．訓喇，返黎再同大家傾啦．．．

>>March 11, 2007 at 3:51:38 PM GMT+8

2007 年 3 月 9 日 星期五 【微雨】

今日返十點，但係都十分之眼訓，今朝七點幾時爹地走左入我房，佢以為我唔知醒呀，點知後來先知我今日返十點，攪到我無啦啦七點幾就醒左，好可憐．．．好經辛苦八點起左身，好快手就攪掂晒所有野，包括沖涼洗頭同熨衫，因為今晚要去飲表姐果餐呀，佢今晚補擺酒呢，所以要去黃大仙度飲．．．

今日成日基本止返工都係HEA既，朝早係咁易帶完中大班學生之後，成日都係HEA咁，真係冇正正經經咁做過野，一路等放工咁，哈！好經辛苦終於放工喇，之後就直接去左黃大仙．．．

去度之後同樣係好悶，因為六點半已經到左，等下一個又等下一個，終於齊人，可以一齊去酒樓．．．去到之後都係例牌映相啦，我同表哥妹妹好悶，唯有周圍去映相，映埋d好奇呢既相，好低能的呢，哈！不過都幾好笑．．．之後，久未露面，同傳說中既大表姐出現左．．．

其實，大家真係一直都冇聯絡過同溝通過，所以大家如同陌生人一樣，冇乜兩句．．．不過，加上佢圩上一代既恩怨問題，攪到二舅母同大表姐兩個今晚做左最佳女主角，做左場大戲出黎．．．真係好矛盾同無奈囉．．．唉．．．有時我地做細既，都係睇大既頭架啦，大既唔做d乜，我地都唔敢做任何野既，所以成日都好似好怪咁囉．．．但係有d野又好似好唔應該同好過份咁，我唔係話我地班細，係某d大人既態度同行為．．．真係唔明白囉．．．不過算啦，我地都應該唔會有咩機會同大表姐再有咩溝通同聯絡架啦，因為真係好唔熟囉，由細至大都冇聯絡過既，佢又係加拿大，只不過近呢幾年先返左黎香港咋嘛．．．而我既立場就係，人點對我，我就點對人既．．．我見大表姐初頭對我地都好似態度好差，後來就好左少少咁囉，不過我覺得佢份人都好假，不過好聽d可以話係世界女囉，好識得social．．．不過一句講晒，都係印象麻麻地．．．

頭先去飲之前去左starbucks飲左杯mocha，所以而家個人好似好精神咁．．．但係其實係好累喇．．．都係訓喇．．．

>>March 10, 2007 at 5:05:49 PM GMT+8

2007 年 3 月 8 日 星期四 【晴】

今日都幾忙碌，因為琴日請左假，所以今日就多野做，尤其係好多paperwork既野要跟番，好死呀！而且今日又走左個鬼佬黎，係我地圖書館度發爛渣，好麻煩，好在我地centre IC攪掂左佢o者，如果唔係都唔知點攪好．．．好快就放工，本來A仔想等我放工後陪佢去深水步行街街買野，可惜我一早就約左表姐表哥佢地行街，我都好衰仔架喇，本來飛左表姐佢地飛機，約左A仔，但後來表姐話叫埋A仔出黎，但係因為A仔佢聽日要去CAMP呀，去考山藝，我都怕佢辛苦，所以後來只係佢黎左我中心度接我放工，送左我去旺角，之後我同番表姐佢地一齊，而佢就返屋企喇．．．點知佢係旺角度等左好耐都上唔到車，攪到中途我地又係地鐵站再見多一次面．．．總知就係好曲折啦，唉．．．都係我衰啦，無啦啦要佢黎接我放工，又要佢去旺角，攪到佢咁"呢HAIR"添．．．不過，因為大家跟住都好忙碌呀，完全係冇時間見面，所以今日可以小聚片刻，確實係十分之開心呀！所以．．．我好多謝A仔呀，我知佢係錫我架，好好咁特登走黎我中心度接我放工，仲陪我去左旺角，真係短短半小時既時間，真係已經令我好滿足喇．．．但係，要等到下星期三先可以再見到佢囉，唉！

之後JOIN左表姐佢地，我地買圍行街買野，後來去左笑笑度食野，食完之後就JOIN左EDMOND表哥去一間CAFE度飲野，我地仲係度玩大富翁添，超好笑同好玩呀．．．玩玩下不知時日過，都已經十二點喇，所以走人啦，我返到屋企都已經係點幾鐘喇．．．好在聽日返十點，都可以有好幾個鐘訓．．．不過而家係超級眼訓囉，今日都已經唔敢食藥喇．．．

>>March 10, 2007 at 4:54:09 PM GMT+8

2007 年 3 月 7 日 星期三 【晴】

嗚~ 今日病左，所以冇返到工呀．．．好可憐，又病左，唉！

所以朝早睇完醫生之後喂左媽媽出去美孚飲茶，今次係表哥表姐返黎香港之後第一次同佢地見面．．．雖然先幾日大家都有傾電話聯絡下約下出街咁，但係都係今日先至正式見面，所以感覺都唔錯．．．飲完茶之後同左佢地去旺角行下街買下野咁，之後，食完個下午茶後因為我病既關係，個人又累又眼訓（因為食左藥呀！），所以我都走人囉．．．返到屋企就訓左一陣，食完飯同藥之後而家好想就係大覺索了，因為聽日要返工呢．．．

>>March 10, 2007 at 4:45:36 PM GMT+8

2007 年 3 月 6 日 星期二 【乍雨乍晴】

嘩嘩，今日好凍呀，好似話得果十二度左右．．．不過好在今日我地起身果陣都已經係十二點，所以都唔係十分之凍．．．不過．．．唉，今朝原本我地好地地架，仲好開心，成日係度玩，後來仲去左同A仔既媽咪大姨去飲茶添，仲好開心咁．．．

之後就發生事喇，我地輕輕嘈左場交，唉．．．不過，我地可以好好咁表達左自己心中既想法同感受，尤其係我，我講左好多我過往都收埋係心裡面既想法同感受比佢知，我當時都喊左出黎呀，唉．．．真係衰，係正西鐵站喊，真係醜死人．．．唔，真係希望大家可以冰釋前嫌啦，我都好強調，我已經唔再係以前既黎曉寧喇，所以真係希望我地可以好努力咁繼續KEEP住一個好既關係，可以開心快樂咁去過我地既將來．．．

當然，我真係好希望我地會有將來，但係．．．我知道佢唔會覺得而家係一個適合既時候，因為佢始終認為我地之間係仲有問題需要去解決．．．但係，我就覺得問題係要解決的，但係我相信問題到左一個點既時候，自然會有解決既方法，只要我地堅持要一齊同對自己同對方有信心既原則，什麼事都可以有能力解決到架，而且，我認為每一樣既東西神當中已有佢既安排係度，無論我地想點樣去改變或者扭轉，始終都會由神去安排左，所以，我好相信神一定唔會點條黑路我地行架，我知道神所給予既會係最好最適合我地架．．．既然係咁，何必咁執著，一定要去解決什麼什麼呢？好多野其實可以順其自然的，只要隨著自己既心同感受去做，自然可以得到一個完滿既結果，或者可以話有一個解決架喇．．．所以，我好希望我地可以一齊努力隨著我地所喜愛既，心中所想要既去做得最好，而我亦唔會再輕易放棄同唔會再讓自己失去．．．！

今日終於BOOK左去台北既PACKAGE喇，真係開心，十分之期待呢一個旅程．．．要等多二十日呀，真係頸都長埋呀．．．我好希望呢個會係一個好開心好愉快既一個旅程．．．我地一齊加油好嘛，A仔？記住呀，我已經唔再係以前既ANNIE喇，我大個女架喇，EQ都會好高，我答應過自己唔會再因為一D少事或者某些人去影響自己或者係我地之間既感情，請記住同相信呀．．．

>>March 7, 2007 at 3:09:59 PM GMT+8