2007 年 4 月 6 日 星期五 【陰】

不經不覺呢個長假期又放得七七八八喇，放埋今個星期日就要開始返工了，真係好唔捨得呢個長假期．．．其實自放假去台灣後，再返了兩天工，之後再放呢個復活節假，哈，真係成個人都係在假期既心情當中，而家叫我返工，真係十萬個唔多想囉．．．哈！但係，而家卻要好努力咁返工，而且我亦希望可以得到續約，可以繼續做住呢份工先，因為我而家要努力儲錢，要在零八年前完成我同佢既願望呀！要努力努力．．．

今日好開心，因為琴晚訓得唔錯，今朝都成十一點幾先至起身，哈，真係好．．．之後，A仔約左我出去同佢爸爸家姐姐夫飲茶，我地去左北角間城市花園酒店度飲．．．嘩，真係幾貴下，五個人最後要三百幾埋單囉，係A仔比錢架，我都為佢有點肉痛囉．．．

之後，我地行左一陣，上左去A仔個家姐屋企，我地係度玩Wii，十分之好玩，簡直係好似做左場運動咁呀，因為我地又玩bowling，tennis，boxing，桌球，golf．．．好累呢！而且又係咁笑，真係好攪野呀！所以最後玩到人都累晒．．．之後，我地出左去銅鑼灣，本來打算去板前度食，點知行完個街返去都仲有成二百幾個位要等，所以最後都係放棄左，我地去左一間叫御前既地方食，都係食壽司果類野，不過都幾好食，加上仲係有人請啦，係A仔個家姐請既，真係多謝晒喇，哈！不過我地可能貪吃左少少，因為之前個個都話肚餓，所以一坐低就係咁叫野食，最後差點食唔晒，好在大家都好努力咁食晒D野去，不過個個都飽到捧住個肚走囉，哈！真係好飽呢！不過頭先返到屋企，見到媽媽買左我至愛吃既"積及"朱古力 ，HEHE，我又忍唔到口食左一條呢．．．比A仔知道又會話我胃食的了．．．

A仔佢今日病了，是傷風呢，真係可憐，希望佢快點好番就好了，唔洗佢咁辛苦．．．因為我知道病病是十分之辛苦的一件事呢．．．！A仔，祝你早日康復！記住食藥呀，OK？

>>April 7, 2007 at 3:54:09 PM GMT+8

2007 年 4 月 5 日 星期四 【陰】

今日都冇咩特別，可能大家去完個CAMP都好累了，所以都訓到好晏先起身．．．之後又係佢整早餐我吃，哈．．．好似我好懶咁囉，O．．．

之後，陪左佢，唔係，我都有幫手架，幫左佢手執下屋，之後又係佢煮野比我食喇，哈！太甜蜜同太嘆既兩日生活了．．．跟住睇下電視玩下電腦咁，跟住走左出去元朗行左一陣街，行行下都行到七點幾喇，我就番屋企食飯啦，一路睇住電視到而家了．．．哈！

剛才收到A仔的兩張E CARD．．．好開心呢！雖然係一D好攪笑既野，不過好FUNNY好開心呀！因為當中惑覺得到佢既創意同用心囉，哈！所謂為博紅顏一笑丫嘛．．．

好，我地答應左大家，由而家開始大家一齊努力儲錢喇．．．加油努力呀！希望大家可以為目標而行啦．．．08年呀！！！

>>April 6, 2007 at 4:41:17 PM GMT+8

2007 年 4 月 4 日 星期三 【陰】

哈，終於帶完A仔個CAMP，都幾好呀，D小朋友都幾攪笑好玩丫．．．呢兩日都好好，尤其係琴晚等D人訓晒之後，我同A仔就自己兩個出左去行左一陣，承機拍下拖，仲傾左好多野添．．．我好開心大家好似有點共同既目標開始出現左，我真係好希望我同佢可以一齊走向我地人生另一個階段呀！如果真係落實我地既目標既話，我真係希望大家會努力為目標而前進呀！我地一齊努力好嘛？

今日個CAMP未完我就走人先喇，因為我要去拜山囉．．．嘩，真係煙到死呀，好辛苦，成個人好似煙燻咸魚咁囉，好臭好辛苦呀！跟住同屋企人去飲茶，妹妹請架，跟住行左一陣就返屋企，一返到去我都頂唔順即刻去沖涼喇，太臭了，真係好辛苦！之後，我就出門口去同A仔會合，哈！繼續過我地既二人世界．．．

今日太好了，又可以食到愛心晚餐喇，雖然只係即食麵，但係都甜都暈左喇，HEHE~ 聽日都冇咩計畫做咩好．．．本來想睇電影既，不過佢好似唔多想咁．．．算啦，聽日訓醒先算．．．

>>April 6, 2007 at 4:33:45 PM GMT+8

2007 年 4 月 2 日 星期一 【溫暖】

嘩嘩~ 今日天氣十分之差，無啦啦落大雨，好在有帶遮．．．

今日好holiday mood囉，成日都好唔想做野，加上今日落左中心坐，所以更加心散．．．不過好在朝早果時都好忙於中心運作上既事情，我都話晒有follow up架，哈！

放工之後都趕住返屋企，跟住同左妹妹一齊落街食飯，因為媽媽呢兩日去左澳門呢，所以要食自己喇．．．食完飯之後返屋企都好累了，仲有聽日要幫A仔手帶camp呢，所以．．．要早訓喇．．．

>>April 6, 2007 at 4:24:53 PM GMT+8

2007 年 4 月 1 日 星期日 【雨】

WOW．．．終於要返工了，真係有點兒唔習慣呢，差點今朝唔識按個PASSWORD開門．．．傻左呀！之後返到去有好多野要跟番，咁就攪左一個上午喇．．．下午去左食M記，嘩，我足足等左二十分鐘先至買到野，我從來未試過等咁耐架，最後我要用十五分鐘時間去食晒D野去囉，食到我傻，兩點鐘又要帶TOUR，今日帶左班曳仔，好煩，不過都幾好玩既，係我地D社工先至攪得佢地掂架Ｏ者，D老師都係唔多掂囉．．．

之後完左個TOUR，就留番係OFFICE度做野，好快就到六點放工．．．好在今日返十點咋，如果唔係就辛苦死我，琴晚睇完詹端文都成十二點幾先返到屋企，所以十分眼訓呀！

放工好趕快咁返屋企，因為約左A仔去市中心食野同去佢度．．．天氣開始越來越凍了，大家記住著多件衫呀！

>>April 2, 2007 at 2:10:06 PM GMT+8

2007 年 3 月 31 日 星期六 【晴】

嘩~ 今朝早仍然係早起架，因為要返教會丫嘛！完左崇拜之後，我同媽媽、妹妹去左壽司亭食野．．．當然係我比錢啦，唉！不過都唔係好貴，之但係除左d壽司之外，其他野都係好難食囉！尤其係d定食，實在係太差喇．．．

之後，我地行左一陣就同媽媽分道揚鑣喇．．．因為今晩我同妹妹去睇詹端文既「萬世歌王」．．．的確係期待以久既節目呀，因為其實早在上年十二月已經買左飛架喇，等足四個月喇！

今晩場「萬世歌王」簡直係勁正啦！有攪GET好笑既，有令我憤怒既，亦有令我好有感受既場面．．．

攪GET好笑既包括：好多不文既說話同動作；即場揾觀眾黎玩啦；而令我憤怒既係，中間有一PART講到而家D人興將D聖詩改頭換面成K歌，咁好明顯都有講「明日恩典」呢首歌，但係當中佢講到：「任何神都係偶像，只係各宗教有唔同既神」，我聽到之後都幾嬲下囉，不過好快就下左啖氣；至於令我好有感受既係，佢中間突然出現一個全紅色既場景，播住哥哥張國榮既「我」，初時我只係被歌既歌詞所感動，因為歌詞內常會問「我是什麼？」，真的令我去想想我究竟係什麼，我係呢個世界裡真係好渺小．．．但係，我突然想起，今日係四月一日，係愚人節之餘，亦係張國榮既死忌；播完歌之後，詹端文都有帶領觀眾為哥哥而鼓掌，場面真係十分之感動！仲有，當中亦有提到我地好多時都會為左得到一D可能根本唔值既野，而放棄左一D好寶貴既野，最後亦只有後悔一生．．．亦提到好多人都唔清楚自我，詹端文提到，如果要在娛樂圈立足，便要「BE YOURSELF」，唔係做番自己，而係做人地！講到藝人冇晒自己既苦處！哈，仲有千人大合唱一首Thousand mountains I go alone (千山我獨行)，鄭少秋果首呢，不過我地係唱英文版囉，哈！超好笑．．．

一句講晒，由頭笑到落尾，毫無冷場．．．真係好欣賞詹端文囉，唱又幾得，跳都幾得，做戲就簡直係一流啦．．．佢可以一個分別做三個角色，做作扮聲毫無問題；有扮十兄弟既三哥同大帥啦；cookies啦；射”loan”機(鄭中基)啦；郭富明（郭富城）啦．．．好正！尤其係扮女人．．．哈！仲有佢可以即席問一個觀眾拎份報紙，照住報紙既內容就唱歌，勁呀！完全係考功夫！

本來想買件thousand mountains I go alone既t-shirt比A仔，不過妹妹話佢都冇睇過，唔夠過癮，唔知個來龍去脈唔好笑，所以都係冇買到．．．不過今次真係超值，由七點八開場到十一點先完，中間只係十五分鐘Break，都睇足三粒鐘，所以真係超正．．．

今日聽完哥哥果首「我」之後，好想揾番個mp3，因為個歌詞真係好有意思呀！真係整日都好有感受呀！不過返到屋企都十二點幾喇，好在聽日返十點，可以訓晏少少啦，唉！

>>April 2, 2007 at 1:58:45 PM GMT+8

2007 年 3 月 30 日 星期五 【晴】

今日訓到好晏先至起身啦，不過晏極都係十點半已經醒左，因為A仔十點半就CALL左我起身喇，嗚！

之後，我好努力咁執番D行李，因為仲有好多野未執好呀．．．之後，約左個好姊妹出街，由於我太累了，所以出到去同佢食左個LUNCH，行左一陣之後都冇咩力同心機行喇，好快就走左人．．．五點零鐘返到屋企再訓過，七點幾先至再起身，同左屋企人出去食晚飯．．．

因為太累了，聽日又要早起身返教會呀，所以．．．訓喇．．．

>>April 2, 2007 at 2:01:21 PM GMT+8

2007 年 3 月 29 日 星期四 【陰】

嘩，終於走人喇，而家已經返到香港了．．．

要離開一刻真係好唔捨得啦，因為呢幾日真係好開心好充實好好玩啦．．．不過個人就十分之疲累了，哈！個黑眼圈大過601同602啦，哈！我地今日主要都係番西門行動啦，因為方便我地走人嘛．．．不過我知道我今日曳曳，要令A仔佢又嬲又擔心我，因為我中途唔聽話，自己走開左睇野，攪到不知時間，又令佢擔心我，又搵唔到我．．．我知錯喇，以後唔敢喇，A仔，你原諒我啦！但係佢無鬧到我呀，我反而仲唔開心，仲內疚呢！唉！

到左夠鐘搭機場巴士既時間，我地等左好耐先至有車，上左車又見塞塞地，真係心急死人．．．終於到左喇，四點零度，以為仲有時間可以去食番個HAMBURGER KING啦，點知．．．我地傻傻地咁好早入左閘喇，所以冇去到囉，傻豬左！所以入左去又冇野好行，好早就係候機室度等喇，又冇野好做，唯有係度映下D無聊相囉，哈！跟住架機又DELAY左呢，所以呆左好耐．．．不過最後都九點前度出到香港機場喇，都唔錯！嘩，D行李重到爆呀，好在有媽媽同妹妹幫手咋，如果唔係都唔知點好喇，拎到我聽朝都未返到屋企呀，哈！

而家十分之累啦，見到D野仲未執真係好煩，因為都唔知從何入手呢！A仔仲慘，聽日仲要去行山考山藝呀，真係怕佢辛苦啦，因為呢幾日我都要佢拎好多野啦，辛苦佢了．．．乖乖，我錫番呀！唔理喇，聽日先至執喇，聽日我又下午約左個好姊妹行街食野，哈！真係好豐富既時間呀！好開心．．．

>>March 31, 2007 at 4:15:08 AM GMT+8

2007 年 3 月 28 日 星期三 【陰】

YEAH~ 今日天氣繼續唔錯，不但有少少太陽，又冇落過雨，真係十分之好．．．

我地今日都成九點先起身，食完早餐，玩左一陣MSN，CHK過EMAIL先再出發．．．我地今日去左行街，先去左台北車站，再行多次光南先，跟住再行去左中山至雙連之間既地下書局街，嘩，又真係幾多書局，不過．．．我同A仔都唔係十分之喜歡睇書既人，其實，唔係唔愛睇書，只係果刻唔多想O者，所以好快行完，興趣都不太大啦，跟住走人喇．．．係中山同雙連之間既地面位置都行左一陣，都可以買到野喎，哈！女人丫嘛，什麼都可以睇一餐買一餐的，hehe~

走左之後我地去左光華再掃貨，因為A仔有幾本書都仲想買架，所以再去果頭啦，不過只係用左三十分鐘左右既時間行咋，好快手攪掂喇．．．之後我地去左天母區行街，今次叻叻，係我地自己搵車搭去可牌捷運站之後再行過去的，我地仲行左好多地方，比我地搵到一間賣外國貨既超市，係果度入左好多貨．．．唉，不過只係先兩日，我地既錢已經洗得七七八八喇，我地都好慘，本來真係諗住跟住呢兩日都要”扎砲”架喇，因為真係冇咩錢，琴晚都冇點食餐好啦，哈！今日好在要洗既錢都可以用VISA卡，好在O者，如果唔係就死喇！跟住我地去左"義美"(有食過蜂蜜蛋糕既朋友應該知呢個牌子的)，我地去左佢間專門店買野啦，真係平香港好多囉，所以我都買左兩盒啦．．．

之後黃昏前時間，我地去左淡水，簡直係要唱番句：”夕陽無限好，wow．．．”真係好靚囉，我地好浪漫咁睇住個太陽落山呀！真係好難得，因為呢幾日都係陰天，難得係可以見到一陣太陽架．．．所以我同佢都好珍惜呢一段既時間啦．．．係淡水都係離不開行街shopping同食野，我地食左一枝好長既雪榚，又好味又得意，食都食得開心d啦．．．

到左夜晚，我地再戰西門啦，不過，都買唔到野喎，只係食左餐好既，就係去左食日本野，咖哩哦，味道麻麻啦，不過叫做食番餐好D架啦，坐得舒舒服服．．．跟住大家都好累了，所以都係固酒店好好休息吧！

>>March 31, 2007 at 4:06:52 AM GMT+8

2007 年 3 月 27 日 星期二 【陰】

嘩哈哈．．．今日係妹妹生日，先同佢講聲生日快樂！

今日係旅程既第二日喇，琴日可能太累了，又早起又周車勞動，所以好早就訓喇，十二點左右啦，A仔就十點左右已經訓左，佢唔頭痛呀，所以夜晚我一條友係度睇電視囉，而且生保床唔係好訓到呀！

今日真係天公造美，完全冇點落過雨，只係陰陰地天，有時仲見到下陽光添，都幾熱下咁．．．我地見咁好，所以去左烏來．．．嘩，好靚呀，咁大個女未見過咁長咁高既瀑布呢，真係好開心，我地又搭纜車，台車，上山睇瀑布，行左上好高既山，好開心，D景好靚呀！仲食左好多地道既食物，好開心．．．雖然今餐幾貴，而且車費都好貴下，不過我覺得值既．．．

之後我地再去多次光華，因為琴日閂左門嘛，所以A仔一定要再去多次．．．咁我當然陪佢啦．．．係光華又掃左一大輪後，當然又有收穫啦，我地夜晚就去左士林行街街，嘩，我地SHOP左好多野呢，今日真係拎到A仔傻左呀，辛苦佢了．．．成日買左野都要佢幫手拎拎，HEHE~ 本來想繼續行落去，但係其實大家都已經好累了，所以十點幾都走人喇．．．好在都有食我至愛既酥炸雞排O者．．．

>>March 30, 2007 at 2:08:32 AM GMT+8