2007 年 7 月 30 日 星期一 【晴】

~沒有A仔在身邊的第三天 ~

今日返工基本上都係十分之hea的，不過．．．今日我都唔知點解，真係超黑仔．．．真係掂乜死乜！首先係朝早，我做做下野，用用下電腦，突然間已經死左一次機，我再reboot之後再繼續用左一陣，突然間真係死左，係咁自動reboot，入安全模式都攪唔掂，但係最快聽日先可以有人黎整，真係老土．．．好啦，到左下午，諗住食個靚飯啦，點知丁飯丁到半途兩部微波爐都死埋，唉．．．天呀！為什麼今日如此黑仔呢？最後，連飯都冇得食，要落去買包食．．．唉．．．

終於捱到四點，我上司叫左我去開會，原來佢想同我做埋個apprasial．．．如我所料，寫得我好差．．．算啦，我都預左．．．只不過係既然都走囉，費事同佢嘈，大家當客客氣氣咁咪算囉．．．傾完都五點幾了，梗係走人去執定野等放工啦．．．

放工約左妹妹去做facial，個死野又遲到，真係好討厭！我每次約佢都總係咁，一世人都唔改下架，唉！好啦，好快手咁食左個車仔麵就走去做facial喇，我今次做多左野，我都覺係好左少少，尤其係塊面係firm番，對眼冇咁累了，個樣精神了，真係好事！最衰，如果A仔見到佢一定讚好架，哼！不過，有樣好安慰的事，就係A仔琴晚打左個電話比我呀，聽到果時好開心呀！雖然佢只係係咁易報下平安，什麼花言巧語都沒有，不過，都已經好開心了，起碼佢都唔係樂極忘形，仲記得我，哈！不過，唔開心既係，佢話琴晚SEND左個EMAIL比我架，但係．．．我真係收唔到喎？！真係激死呀！點解架，唔制呀！收唔到好唔開心呀！CHECK左好多次都冇既，連"垃圾箱"睇埋都冇，嗚，唔開心呀！唉．．．

做完facial之後同妹妹行左一陣朗豪坊，不過好多野都收左囉，只係行左一陣咁大把！跟住都返屋企．．．返到去，媽媽話上海個二叔同二妹黎左香港了．．．o，真係好突然！突然在．．．無啦啦要做大家姐，好老呀！哈．．．因為佢地一向都係上海，完全係極少機會見面同聯絡，而家要見面，真係有點不知所措了．．．

>>August 1, 2007 at 8:57:34 AM GMT+8

2007 年 7 月 29 日 星期日 【晴】

~沒有A仔在身邊的第二天 ~

今日好可憐，因為琴晚成晚係咁氣喘，完全冇停過之外，仲要好黑仔咁，平日用開既噴霧原來已經用晒，真係黑仔到爆，我就唯有係咁忍受氣喘既辛苦．．．所以我成晚都訓唔到覺呀，好慘呢！今朝早一路係咁喘呀，最後都因為喘得太勁所以冇返到工．．．

之後好辛苦咁忍住，媽媽不斷係度安慰我，希望從而令我個人冇咁辛苦，可以輕鬆一點，條氣都可以鬆番少少．．．跟住好經辛苦走番上床訓左陣，十點半再起番身，之後媽媽就帶左我落去睇醫生．．．醫生話我今次嚴重左，所以今次都要開一d類固醇比我食，同埋要我兩日後返去覆診，睇下個情況如何．．．唉！其實，我都唔多想今日請假架，因為一來朝早有tour要帶，我唔想又麻煩同事；二來我今日係應承左會reply番personnel既同事我是否續約既．．．最後，我都係send左個email比我老細，透過佢話番比果個同事聽．．．總好過我咁唔比面，直接同果個人講丫，係咪？我都算係咁架喇．．．

聽日我會再返工，不過．．．心情已經十分之唔同了，因為我已經講明會離職了，所以，要做的我先會做，不用做的我係唔會咁好人去做囉．．．所以，之後既沉悶日子會好難過了，哈．．．因為真係唔係好多tour要帶囉，所以好多時間都好冇野做，就算要handover既野都唔多，講真，一至兩日都可以攪掂，走之前幾日做都ok啦，最多咪同老細傾下點樣handover同點樣可以減到最低既麻煩啦．．．因為，我聽其中一位同事講，如果佢聽日一收到消息後，佢都可能會係八月一日遞信辭職．．．哈，突然間有點心涼，如果果個同事真係八月一日辭職既話，即係一連有兩個同事係八月尾走人，佢都應該會好難攪了．．．等佢咁寸丫o拿？！

下午果陣，媽媽話約左二舅母飲茶，所以叫埋我出去．．．嘩，因為食左藥呀，所以一路飲一路恰眼訓．．．後來，同媽媽各走各路，我盲返屋企，媽媽就去左市中心做gym．．．我返到屋企就係咁訓了，一訓就訓到七點有多了．．．不過仲係好累好眼訓呀！

聽晚我同妹妹會去做facial，而家要積極加緊去做多少少facial了，因為近日真係好殘，同埋晒得多有好多斑斑呀，真係要好好護理了．．．

雖然今個星期沒有A仔陪伴在旁，不過反而我可以運用時間去做多少少自己既事，例如聽晚去做facial，星期三放假就要去拎眼鏡，配con，覆診．．．星期四晚我約了妹妹去行街街咁．．．哈，好多節目！星期六晚就應該會同係上海回來的二叔及堂妹去食飯，爹地就當日負責帶佢地四圍去玩咁啦，因為我要返工，只可以參加飯局了．．．之後就梗係去A仔度陪佢啦，因為大家星期日都放假呀！YEAH~ 希望快d到星期五晚啦，因為A仔當晚先返黎．．．其實琴晚都唔係咁訓得著，一來因為喘氣，二來可能有點掛住他吧，所以個心總係忐忑不安咁，又好擔心佢，因為佢係一個好careless既人黎架，唉！不過，要對佢有信心，同埋有好多野都係唔可以控制到的．．．唯有可以的是．．．為他同埋一班團友祈禱，希望神帶給他們平安快樂！

>>July 30, 2007 at 12:04:40 PM GMT+8

2007 年 7 月 28 日 星期六 【晴】

~沒有A仔在身邊的第一日~

嘩~ 今日訓到真係黃朝百晏囉，因為我訓到成十二點半先至起身呀，哈．．．好耐冇試過訓到咁晏架喇，嘩嘩！

之後同左屋企人落街飲茶．．．飲茶果時好好笑，大家傾左好多話題，又攪左好多爛gag，例如．．．突然妹妹講起自己近來好少運動，想做多少少運動健康d，而我就想自己個對麒麟臂可以firm少少，咁媽媽就突然show左佢隻老鼠仔出來，大家笑左好耐，因為．．．我同妹妹不若異同咁想起了．．．通渠王！除此之外，媽媽今日簡直係爛gag王，佢又講起下星期會有”廿二世紀殺人王”睇，其實．．．大家都應該知道係”廿二世紀殺人網絡”啦，哈！

飲完茶後，我同妹妹去左市中心行，我地去左i.t睇野，哈，我又買左對鞋喇，哈！中途我地撞到個好朋友，潦芬芬．．．佢睇黎好似晒黑左好多喎，而且都肥左少少．．．不過，我覺得咁樣伸健康左丫，我都幾鍾意佢而家咁既形象呀，哈！跟住，我地去左吉吉島超市買野，入左好多貨，因為下星期媽媽會去旅行，成個星期冇飯開呀，所以要入定貨，仲係要方便快捷既東西啦，哈！不過都係要煮既野黎既．．．

返到屋企食完飯，媽媽因為飲醉左酒，洗洗下碗突然打爛晒d野，嚇親我地呀！真係好驚，好在冇受傷．．．之後，我地一齊睇”忽然七鴨”，都幾好睇，又好笑又有意思．．．

今日成日電話都冇響過，成日都好想A仔會打比我．．．當然，佢唔會打比我架喇，因為長途好貴架！唔知佢而家點呢？好掛住佢呢．．．希望佢平安啦．．．

>>July 30, 2007 at 12:04:51 PM GMT+8

2007 年 7 月 27 日 星期五 【晴】

哈~ 今日笑死人喇，因為今朝有一團係來自北京理工大學既學生參觀，咁因為好叻普通話位同事放左假，所以我都要頂硬上啦，不過．．．真係發覺我d其實係"煲冬瓜"唔係普通話，哈！真係唔係好掂，不過都尚可同班學生溝通得到，因為佢地始終係大學生，可以用少少英文都ok，不過都好愉快咁過左一個早上，佢地仲同我合照添，真係開心！

之後成個下午都係度hea，因為一來唔想做野，二來係冇野好做．．．哈．．．而家都既然有左決定唔再續約，真係除左帶tour之外都應該冇咩好做架喇．．．所以都唔知跟住既日子點捱了，呵！

今日成日個肚都唔多舒服，都痛痛地咁，朝早果陣已經食左一粒止痛藥架喇，不過效眸好快冇左啦．．．但係又唔敢食咁多呢！捱到放工，好快就走左返屋企，因為想快d同屋企人食完飯之後去A仔度丫嘛，點知最後．．．都係冇去到．．．唉．．．不過都好既，佢最重要既係要休息呀，養好精神明天出發同連續幾日既行程！希望佢可以順順利利完成啦．．．我在此祝福佢地平安順利．．．唉，六日沒有A仔既日子可以怎過呢？好痛苦哦．．．而家時間睇住係咁過，就越來越唔捨得佢喇．．．去完今次之後八月尾仲有一次，唉．．．掛死人咩！又唔可以打電話比佢，而佢又唔方便打比我喎，好痛苦呢．．．嗚！

頭先同A仔一路傾住電話，越聽到佢把聲就越唔捨得佢呀！嗚．．．不過都好既，如果今晚見埋面聽朝可能仲唔捨得呀！希望佢都玩得開心D啦，不過真係萬事都要小心呀．．．因為廣西而家既氣溫都好熱呀，好似成37/38度，都熱死了．．．但係溫差都好勁，差成十度左右，所以我都好擔心A仔呀！始終唔係自己身邊，即使佢係一個大人，我都會好擔心同掛住佢．．．

今日我既心情比起琴日其實係好了點，不過又因為快要同A仔分開而開始差了．．． >_<”　頭先睇過d工黎，都冇咩o岩，都係send左兩份咋，唉．．．又開始擔心了．．．點解人生總係充滿煩惱架呢？

最後，再次祝福A仔同佢一班參加者平安順利開心愉快地渡過6日既旅程．．．尤其係A仔，記住萬事小心呀，唔好要我掛心你呀！OK？乖乖地啦．．．我都會乖乖地架喇．．．

>>July 28, 2007 at 2:23:06 PM GMT+8

2007 年 7 月 26 日 星期四 【晴】

唔~ 今日終於有左個定奪喇，其實都係好事，起碼唔洗成日拖泥帶水咁丫．．．今日personnel既負責同事同埋我個上司一齊見我，去傾關於我來年是否續約既事．．．其實過程中，我真係十分之不滿架，因為由頭到尾對方都係因為人手不足，以及唔想再請個新人番來再train呢兩個原因而希望我留低，而唔係因為佢地係欣賞我，而且覺得我為公司帶來貢獻．．．所以個心都有點不安同不滿．．．加上，佢地兩個真一係pk王，我估都估唔到佢地可以係度”匈”我，點”匈”？．．．

首先，佢地話我個performance達唔到佢既心目中既標準喎，之但係由頭到尾都冇講清楚什麼標準！跟住，又係度叫我諗清楚，如果我打算續約既話就要做足佢地既要求．．．心想，咁係咩要求呢？完全get唔0到個意思喎？仲有，佢地又話什麼如果唔續就會個reference letter會寫得衰，而家續就即係比自己一個番身既機會咁喎．．．我心想，你癲架！我唔洗你寫什麼，只係要你比一封證明我係度做過既信件就得！最後，我最唔順氣既係，佢地竟然話我個performace唔好，佢地可以唔比個約滿酬金我．．．我心再想，我幾時做過一d對公司不利，或者係什麼彌天大錯呢？真係冇喎，咁你有咩權力話唔比我呀？而且，係唔比呀佢寫report都寫到手軟啦，佢有冇咁傻仔呀？又冇做左咩錯誤野，佢吹水都吹唔到啦．．．如果佢真係唔比而且係冇一個合理既理由既話，我一定去勞工署告到佢甩褲．．．

完左個interview真係好慶，真係好唔gir囉，無啦啦比人寸，仲要係無理果隻，加上係比人”匈”住咁要我留係度做．．．哈，我都係第一次咋！真係十分奇怪囉．．．不過，好在我都唔弱架，一入到去見到勢色不對，我都即刻成個 tone都係寸寸地咁，仲係要好唔在乎份工咁，我都講埋自己都打算唔做既決定．．．初時，我個上司都面色黑左一黑，因為佢冇諗過我有咁既想法，之後，佢見到我係度寸公司既問題同埋個personnel負責人時，佢都忍唔住掩住半邊咀笑啦，正一cheap精！梗係，有人幫佢出手寸丫嘛，幫佢出左氣丫嘛，佢仲唔笑咩．．．

講真，而家咁既情況，如果我再係度做，咪即係我買佢怕？我有冇咁傻呀？而家人地叫我下星期一reply佢我續唔續約．．．我諗，呢度又冇人工加，而且發展又冇乜，又會比人”嚇親我”既，我真係覺得冇乜意思再落去囉．．．其實，剛好同同事而家叫做關係好少少，初時都有諗過係走既都等搵到份工先啦，而家？唔啦，仲咁傻仔留係度比人寸咩？擺明會比人踩死一世，人地而家擺明係有你冇你都得丫嘛，只係突然冇左你佢會麻煩d，要請人又要再train過人咁解咋嘛！講真，我覺得你都對人地冇乜價值可言，仲留係度做乜？走好過啦．．．

話雖如此，其實都有點爭扎，因為而家都仲未搵到工，而且我而家唔可以輕易冇工做，因為我要好努力儲錢錢呀！加上，我有時都係度諗，究竟係咩問題呢？好似成日都覺自己遇到d唔係咁好既上司．．．定係．．．其實我都知呢個世上”天下烏鴉一樣黑”的道理．．．但係，真係係我黑仔丫，定係咩原因成日每次離職我都好似要好唔開心咁走人呢？諗真少少，真係除左MTO之外，我真係冇邊份工係唔會含屈而走架．．．唉！或許．．．我個人都有問題卦！！每件事都總有兩面既，我明白！

而家最終都有左決定，雖然有點覺唔gir，但係都算啦，一向都打算呢度又工作沉悶，又學唔到野，一早都想走架啦，所以都唔再諗果d什麼唔gir既事囉，因為呢d野係唔會影響到我既，係咪？而家反而係要努力搵工呀！不過．．．好似近來冇咩好工咁，講真，又唔想太濫咁去搵，所以每次睇親都有一封起兩封止咁寄出去．．．真係開始有點灰了．．．距離離開仲有唔夠一個月既時間，我可以在九月頭就找到份好工呢？我要努力呀！！為我祈禱丫．．．

唉，A仔佢今個星期日就要出發同同事帶交流團了，心中有點又唔捨得又有點唔習慣呢．．．整整六日呀，好可憐！而且，近日自己發生了真係好多事，心情都不是太好吧！所以，即使今日同A仔去了漫畫展，去了行灣仔，之後再一起搭船船浪漫浪漫，一起食包包同餅餅，再去了尖沙咀行街街．．．其實心情都是麻麻．．．加上肚仔痛呀．．．唉，或者，我仍對於那些唔gir既事介懷卦．．．不過，我相信只要對自己有信心，什麼都可以解決！要比心機呀！

不過．．．都要多謝A仔，佢都好支持同鼓勵我架，而且都好明白我添．．．唯一只有家人往往都比好多說話我聽，真係好難受．．．A仔，好感謝你呀！我知你永遠都會在我身邊的．．．有了你支持，我會更努力完成餘下既一個月時間，同埋會努力搵份好工，努力儲錢！

>>July 28, 2007 at 9:37:42 AM GMT+8

2007 年 7 月 25 日 星期三 【晴】

今朝早真係十萬個唔願意起身呀！因為呢排都習慣左遲起呢，哈．．．．突然要我七點起身真係好唔習慣．．．最後．．．都係七點二起身啦，因為再唔起就遲到架喇！

朝早返工果時，經過上星期四發生事故的地點．．．我唔係有心行過去架，而且真係咁O岩經過附近既位置！我心想，日光日白朝早咁多人行過，佢唔通都咁夠膽犯事嘛？所以，我都行左呢條路，因為另一條路實在又遠又晒了！走過呢條路，心中有點忐忑不安，怪怪的，又想起了當日既情境了．．．O．．．好想嘔呢！很嘔心既一件事！唔．．．頭先係公司同一個朋友係MSN度傾開呢件事，XENXEN,好多謝你既關心，我真係好開心你知道左件事之後會主動了解同關心我安慰我，多謝你！其實，我都成日盡量希望忘記，不過，好像很難吧！A仔都成日叫我唔好再諗，但係唔知點解，往往生活上的一點細節東西，都總係會令我想起當日發生的事．．．唉，很可怕！不過，我知道有A仔係我身邊，我一定很快忘記的，係咪？

今日放假後返工，都總係離不開麻煩的事啦．．．首先係：因為我上星期五請了假，事因是上星期四發生的事而請事假，所以當我交假紙時，我上司要求我將有關報案既編號比埋佢．．．其實我心想，這是我的私隱，如果佢想知更詳細既口供內容，我想，佢可以問我，佢無權去取任何有關資料！不過，後來佢話因為要我證明我果日膚假真係因為呢件事，所以．．．我都無奈地要向警署取回有闦編號比佢．．．真係麻煩！

第二件事就係：關於我續約既事．．．上司話原來唔係佢同我講是否續約，是另有其他更高層既人通知我，但係今日都未有消息！都唔知佢地想點？玩野丫，定係忙丫？想點呀！係續就續，唔續咪算囉，好煩！上司話佢地”應該”最遲明天會通知，因為我27/8到合約期喎．．．其實，唔係應該係今日嗎？一個月通知期丫嘛，唔係應該是今日嘛？痴線！不過算啦，我都唔想再拖了，好討厭，有咩快講啦．．．橫掂我都唔打算續，佢係咩結果我都唔理了．．．如果話續既，我一定寸我做得唔開心，係我唔適合呢度同呢一份工囉；如果話唔續既，我咪”哦”一聲咪算囉，大家開始可以冇說話再傾啦，係咪？只需要有野就做，要我做OVER我合約期既野我一定SAY NO！所以快手講咪好囉，大家好話為丫嘛！

哈，唔好諗喇，諗下聽日約A仔去漫畫節既事仲開心啦．．．不過都擔心會多人呀！但係同A仔又再就唔到時間去喇，因為佢今個星期日就要去交流團了，一去就六天．．．真係唔捨得他呢！

>>July 26, 2007 at 12:11:35 PM GMT+8

2007 年 7 月 24 日 星期二 【晴】

唔~ 今日同A仔訓到成十一點先至起身呀！真係舒服．．．因為係屋企真係好難可以訓我咁多架，媽媽佢一朝早九點幾就會嘈醒我既，所以都係去A仔度訓好D．．．哈！

起身之後我陪左佢去西鐵站返工，之後因為佢要出旺角，所大家各行各路，我有我返屯門，佢有佢出去做野．．．佢今日威威呀！因為佢有個展翅既個案拎左”展翅之星”既名譽，所以今日佢會出去同勞工署署長張耀忠握手隻，呵．．．真係威死喇．．．

我返去屯門途中，媽媽打比我叫我一齊去LUNCH，所以就去左喇．．．之後見左個好耐冇見既朋友，不過呢個朋友大家都已經識左成二十幾年架喇，不過從來大家都唔會主動來往．．．哈，奇怪嘛？我身邊都唔少呢類既朋友架．．．跟住，陪左媽媽去買野，咁就返左屋企喇．．．返左去同媽媽傾左好多野呀，因為都想媽媽對於我地既婚禮比少少意見．．．唉，越傾越煩惱呀，好似好多問題要考慮同計劃咁，真係頭痛了．．．後來，媽媽出左去做GYM得我一個，我就好乖咁寫信睇下有冇好工啦，但係．．．都冇點寫到信，所以最後累了就在媽媽的床訓著左，直至媽媽回來．．．

今晚得我同媽媽吃飯咋，妹妹出了街．．．媽媽話：”唉，琴日就得你個妹陪我食飯，今日呢就得你陪我．．．都唔倨第二日你結埋婚，妹妹拍埋拖時我點好了，可能得番我一條友食飯．．．真係可憐！”我聽到之後都好唔安樂呀，因為我可以想像到個情況．．．媽媽，你放心啦，一得閒我一定會返來陪你吃飯的，PROMISE！

唉，聽日係放假後同發生事後第一日係屋企出發返工既日子．．．心情？有點怪，而且．．．都有點擔心再走上發生事故既路時有咩感覺同心情如何？雖然，我決定都盡量不會再走這條路，不過，有部分的路都總是會有機會經過的，除非我一生都不再踏足此地架O者．．．唔，都有點不知所措！而且．．．明天已經是26號了，上司仍未與我做APPRASIAL，而且佢型應要話我知是否續約的，因為佢必須於一個月通知期做這一個行動！或許．．．佢會聽日無啦啦講都唔定架，哈！不過．．．都沒所謂了，反正我都有了決定！而家只係想快D搵到份工，真係擔心有機會會完合約前都未搵到工呀！唉．．．要努力了！

>>July 26, 2007 at 11:58:13 AM GMT+8

2007 年 7 月 23 日 星期一 【晴】

嘩~ 呢個死人網死左幾日，今日終於可以寫番日記喇．．．呢幾日冇日記寫，個人真係好唔習慣呀！因為真係習慣左日日都會係呢度分享自己既經歷同想法．．．所以呢幾日都好空虛下！加上，近呢幾日真係發生左好多好多事，而且仲要係好唔愉快既經歷，所以真係好灰呀！！

發生左咩事？唉．．．上星期四，即係剛好呢個網死之前一日．．．我夜晚照常返屋企，之後行既途中發生左一件事！係一個好唔好既經歷．．．不過大家放心，我唔係比人打劫或者強暴，不過．．．都差唔多架喇，唉！其實係咁，我落車之後，就行左一條平日都好靜既捷徑返屋企，咁因為當時我見到有一個女仔都同我一齊行呢條路，所以我都跟埋一齊行啦，懶得就懶．．．咁就出事啦．．．我地行到中途，大家都各自分路走，得番我一個人之後，行到中途，突然有一個人從後伸隻手過來，係我面手持一個紙杯，之後將杯內既野潑向我塊面．．．當時，我真係好驚，成個人呆左，唔識得反應，後來呆左幾秒，個人醒左一醒後，又見d野好似唔係好"乸"面既，於是我就用手去抹對眼，我就轉頭一望，只係見到一個冇著上衣只著波褲同拖鞋既中年男人既背脊，當時，佢已經走左有好幾米了，所以我都追不到佢．．．其實當時我有大叫的，而且我見到有一個路人甲經過，可謂，果個路人甲完全冇打算幫我既意思，照樣走左去．．．我當時好不知所措，所以只有用手不斷在抹，不斷走回自己大廈既管理處．．．當時，管理員見到我好似發生左事，於是我講左佢知，佢叫我報警，但係我打比媽咪，媽咪叫我先回家清理好先再報．．．後來，我都報了警，攪了一大輪．．．唉．．．好煩！

講真，而家警方話因為資料不足，而且都曾經加左人手去查，又捉唔到人，所以只有備案，以及會加派人手去巡邏．．．唉．．．真係一個我認為我一生之中，到而家為止，最倒楣既一次了！好可憐呢！！而家諗番起，真係好想嘔．．．其實當日我不斷沖涼，沖完又沖，成日覺得仲係好污糟，仲好似有味咁．．．之後又食唔落飯喎，好怕d細菌會走左入身體．．．因為，我真係唔知佢潑向我既是什麼．．．我只肯定是尿液等東西，但係當中有否”加料”，真係唔知了．．．所以真係好核突，想起都想嘔．．．先兩日同A仔行超市，見到d香腸物體，我都即時好想嘔了．．．．真係好辛苦！

而家過左幾天了，亦都多謝A仔近日經過陪伴左右，亦不時安慰我，令我都感到安慰．．．而且，自己而家都打醒十二分精神了，真係很大壓力吧！每行一步都是步步為營的．．．夜番又會要屋企人接我！

算吧，這些唔開心的事唔提了，講些開心事吧．．．

最後，上星期五我都沒有返工，因為一來真係前一晚成晚都訓不到，常常發惡夢，而且真係好怕了．．．心情都仍然很差．．．所以星期五A仔放工殷約了我，決定要陪我好好放鬆心情，協助我忘記不愉快的經歷．．．而星期六再繼續返工，都好多謝同事的關心．．．星期六放工後又約了A仔同一名朋友，大家都傾了很多東西，亦都多謝朋友的關心．．．今日我同A仔都放假，所以琴晚大家約了一起見面先．．．我們在元朗行了很多地方，亦買了很多東西，哈，購物真係一件令人情緒轉好的行動呀！琴晚，我地都不斷找尋好多有關結婚場地既資料，後來打算今日去一去傳說中既”伊甸園”度睇睇．．．我地去左紅磡都會廣場度睇．．．其實，真係好靚，D裝飾真係好正，不過．．．好似個場地真係細左少少．．．雖然，個價錢真係幾合理架，而且真係好靚，不過．．．仲有好多外在既因素問題．．．所以，都係考慮下先．．．再計劃下吧！

之後我地去左好多地方，又去左尖沙咀同廟街．．．買左好多野，好開心呀！

一句講晒，多謝A仔陪了我幾天．．．真係要錫晒佢！！過埋騉日，一連四日既假期又要過去了，工作又要再次出現，真係好煩．．．放完假總是會有好多麻煩野出現的．．．算吧！都習慣了！只有好好渡過埋明天的假期便好了．．．努力呀！

>>July 24, 2007 at 4:06:06 PM GMT+8

2007 年 7 月 17 日 星期二 【乍寒還暖】

哈，今日都幾開心呀！今日係完全用放假既心情去面對今天既假期，所以十分之五．．．我同A仔一齊十一點先至起身，之後就一齊出左去灣仔．．．點知，預著係上環就開始塞車喇，所以最後都係中環落車再搭地鐵，後來先知道原來今日係CAUSEWAY BAY果邊發生左事，所以先至塞車！

其實我地今日去灣仔係想搵我地既FINANCIAL PLANNER，想問佢一點意見關於安排我地既資金．．．最後真係好多謝佢既意見，我地都好同意呀，而且都決定會實行喇．．．真係好緊張，好似好突如其來就有新既計劃喇，真係要好好咁去安排同多D留意下個市場狀況先．．．哈！

跟住，我就同A仔去左灣仔一間好舊既酒樓飲茶，就係龍門大酒樓．．．嘩，好平囉，我地兩個人食都係五十二元落樓，真係抵，而且D野都OK好食既，格局都係我預其之內，幾有特色丫．．．哈，其實有機會都想去下例如陸羽呢類既酒樓試下架．．．不過今次係我第一次黎，都幾OK啦．．．

食飽飽，我地就起行去青衣，因為今日A仔要去整牙呀，我就梗係做跟得夫人啦，陪佢去整．．．整完之後，A仔既家姐約左我地同埋佢媽媽一齊出左旺角食飯，我地去左一間叫”潮樓”度食，係食潮州菜既．．．都幾OK架，個格局都好靘，D野都好好食，而且都唔貴，四條友都係三百七十蚊，都OK啦．．．我地都叫左好多野食架，仲要一人一中雞燉翅，不過都係十八蚊一中O者，哈．．．好好味，好足料架！總知好味又好飽啦．．．真係多謝晒JOANNE喇，哈！

跟住，我同A仔就去左行街街，我地行左好多地方，又旺角又佐敦，真係行到有點累呢，不過好開心呀！仲可以買到野添，HEHE~ 不過當然，最重要係因為同A仔一齊先至係最開心啦．．．

呀，而家終於有左決定知道我地跟住既計劃而行，真係有點開心同興奮．．．我地都決定下星期二會BOOK定結婚地點添，我真係好開心呀！其實，如果可以搬近D我娘家既我真係仲開心呀，因為始終做女都係鍾意近住娘家既，哈．．．而且．．．仲可以成日”黐餐”添，哈！有時去旅行呀，行開行埋，媽媽又可以幫手執下屋下睇下屋咁．．．當然啦，我唔係洗媽媽架，而係媽媽話明佢好樂意咁做架，仲話可以成日煲湯過我地飲添．．．越諗真係越想係咁，哈！不過，當然呢個唔係我一個人既決定同意願咁簡單啦，仲要好好咁商量同討論架嘛．．．唔，不過，我覺得都係一個唔錯既建議黎架，哈！

>>July 18, 2007 at 3:54:52 PM GMT+8

2007 年 7 月 16 日 星期一 【綿綿細雨】

嘩，我都唔知係我近排黑仔丫，定係真係咩原因喇，成日都總係覺得心情唔多好，仲成日頭頭碰著黑咁囉，唉．．．好似今朝咁丫，我個鬧鐘明明七點唔夠響左，但係我就貪訓，諗住訓多五分鐘先起身啦，點知咁就衰左，最後成搭四過d先至識醒，嘩，趕到我丫．．好啦，終於好似平日咁搭九過d出到門口啦，點知今日又預著大塞車喎，最後成九點八先返到去．．．唉，仲約左同事九點半開會，遲左到添！開會又多麻煩野跟同傾，d死人同事成日都好似當你死咁，真係．．．死左！

好啦，開完會喇就返番上去office做野啦，又係多野做到嘔，每一刻都係被老細既魔掌控制住，佢無時無刻，無聲無色既出現，往往都會令人嚇一跳．．．係即使係冇做錯野或者做衰野，都可以比佢嚇死架．．．唉．．．佢行路係冇聲之餘，仲好鍾意偷望同事，之後就捉住你痛腳．．．好恐怖嘛？每日都對住呢個女王的教室既女王，真係心血同細胞都死左唔少囉．．．日日都係驚惶之下渡過囉．．．唉！

之後，今日下午帶畤，又帶左班超曳既學生，完全係生番囉，唉，真係氣都咳埋．．．好在d老師同導師都有幫手o者，如果唔係死左．．．之後，我就決心打電話去上星期叫我見工間野度問津，睇下佢會否安排到面試比我．．．點知．．．唉，食左閉門羹啦，人地話如果下一輪有面試時先考慮．．．咁即係冇行啦．．．好失望．．．

近日成日都唔開心，好似好多黑仔野出現，而且越來越唔想對住個老細，好唔想同佢合作工作．．．好頭痛．．．而且又近來冇咩好工搵，又冇面試見工機會．．．真係好灰．．．心情好差呀！！

>>July 17, 2007 at 3:15:06 PM GMT+8