2007 年 3 月 6 日 星期二 【暴雨】

今日繼續返工，但係總係覺得日子十分之難過．．．後來，我一向唔多喜歡果個同事佢無啦啦同我講話佢接左一個english speaking既tour比我，又玩晒野咁話：你之前都應該睇過我點帶架啦，而家要到你帶喇，我星期四你帶果時我會落黎睇你帶成點．．．嘩，我聽到幾嬲呀，佢傻架，之前又話呢d既vip又話唔洗我帶，而家又話要我帶之外仲話扮晒勁要去評估我帶得好唔好？佢傻架咩！．．．不過算，我唔同佢計，佢三月尾都走人啦，當送比佢囉．．．

放工之後返左屋企，好快就等到十點鐘，跟住就出街去會合A仔，因為我地聽日大家都放假（其實係A仔佢知道自己之後冇咩日子可以陪我，所以明知我每逢星期三都放假，所以佢都拎星期三放假陪我囉），我地聽日會去銀行中心度睇下去台北既package，希望睇得o岩可以book埋啦．．．

今晚好凍呀，希望今晚訓果陣唔好太凍啦，因為佢屋企係特別凍d架．．．

>>March 7, 2007 at 2:56:33 PM GMT+8

2007 年 3 月 3 日 星期六 【晴】

哈，今日終於可以放假喇，所以返左教會，今朝一早八點就起身了，哈，起碼比起平日遲左一個鐘起身，真係可，起碼可以訓多一個鐘頭丫．．．

今日教會突然召開左一個教友大會，因為要商討有關我地教會個外殼失修既問題．．．其實作為呢個家既一份子，真係好需要參與其中架，所以我地一家人都有參加呢個大會，最後，足足開左庐粒幾鐘，坐到我又累又肚餓呢，哈！之後，我地去左一間食日本咖哩既餐廳食，好味，好飽飽．．．跟住A仔打電話比我，因為佢琴晚上左鳳凰山呀，其實我今朝都好想打比佢架喇，因為琴晚落雨呀，我都好擔心佢既情況，不過後來都係等佢打黎，最後，佢約左我今晚去佢度，同埋食飯，所以，我同屋企人行左陣街，買左少少野之後就趕返去喇．．．

之後，我同A仔同佢屋企人去左一間食印尼野既餐廳食野，d野都ok既，都唔太貴，不過就真係貪心左少少，叫多左少少野．．．之後因為都食得太飽喇，所以我同A仔後來兩個順便去拍下拖行下街街，因為今日係元宵節嘛，亦都係中國情人節，點都要拍下拖先得架嘛，哈！好sweet．．．其實可以同佢一齊，去邊度，做乜野都好，都可以係好開心架．．．

>>March 5, 2007 at 1:36:43 PM GMT+8

2007 年 3 月 2 日 星期五 【晴】

今日成日都冇tour要帶，所以就好用功咁去做好多paper work同admin既工作，嘩，做到傻左，真係好死，一要我去諗好多好多文字上既野時，成個頭好似想爆咁呀，真係好辛苦．．．不過，我已經盡左力架喇，冇計，d野最後都係做唔晒．．．之後，因為媽媽正好係旺角，我放工又放五點喎，所以就去左旺角join媽媽．．．我地係旺角行左旺角中心，我都買左兩件衫，諗住可以遲d熱番時著．．．但係好似下星期又有幾日凍番，尤其都唔知表姐擺酒果日凍定熱，都唔知好唔好買衫，又唔知著咩衫好，又唔知好唔好買新衫，唉，煩！

之後我地媽媽返屋企，同左爹地妹妹出去食飯，食完飯之後都累到死死下，不過突然間有心情執下野，所以執左個衣櫃既一格咁大把．．．之後就去左訓喇，因為聽日早呢，要返教會嘛．．．想起真係有點兒慚愧，因為都有一段時間冇返教會了．．．

>>March 5, 2007 at 1:30:57 PM GMT+8

2007 年 3 月 1 日 星期四 【晴】

今日十分辛苦，因為朝早一場，下午又一場，真係帶tour都猜到傻左，氣都咳埋呀！可能近排少左帶tour，所以好容易冇乜氣．．．不過，好在今日帶果兩隊雖然係一d完全唔同既target group，但係真係好開心，呢兩班青年人都好好，其實真係唔知點解，我發覺自己真係好適合做青少年既工作，成日都覺得同d青年人好好傾，好融洽，好容易溝通得到．．．其實，做教育既工作，唔係一定要擺晒個款出黎話比人知你係什麼expert，而係你要先同呢班人融洽得到，從而令佢接受得到你，而唔係擺晒大粒野咁，利用威勢去迫人信服你囉．．．

放工之後，陪左妹妹去左市中心，因為佢之前訂左件衫，今日先去拎，佢要我陪我去喎，咁咪去囉，點知比佢引誘我買左件外套，哈．．．一出糧就會手多多架喇．．．我琴日同個同事傾開計，佢話好想快d儲到錢，因為佢急住想有錢去做一d野，佢講到由而家開始要忍手唔可以再買衫喇，哈，但係我真係做唔到囉，我都相信我倨同事都好難捱得住，哈！始終女人點忍到手唔買野架，係咪？

今日IC比左好多野我去做，而且個deadline都好急，要我下星期交好多野呀，今次點死？好在聽日唔洗帶tour，可以有一日時間去做，唉，真係慘喇．．．點死，有好多野要跟呀，真係有少少擔心．．．不過，我決定而家要努力加油，積極做好每一樣野，要令每個人都另眼相看，唔可以輸架．．．

>>March 2, 2007 at 2:08:20 PM GMT+8

2007 年 2 月 28 日 星期三 【晴】

今日係公司發生左一件應該我係好唔開心既事，之但係我卻沒有特別既唔開心，而且，仲好似有點奇怪地覺得是理所當然，亦認為是神當中有所旨意同安排，所以．．．我唔知點解今次好安然咁接受左呢個既結果．．．唔，我同自己講，我一定要加倍努力去工作，唔可以再比d死人老忽忽或者同事睇死或者睇少，我要積極備戰，唔可以再係懶散了．．．

放工後落車返去到屯門既巴士站，A仔係度等我，哈，果刻真係好開心興奮，因為真係好掛住佢，見到佢果時大家好似d戲咁，好想衝過去之後攬埋一團咁，哈！好攪笑．．．之後佢黎左我度幫我整電腦，佢整左好耐好多野，真係辛苦佢了．．．

聽日好死，朝早下午都有tour，死得人喇．．．我近排好易講講下野就聲都沙埋，真係慘，今日帶果時都係咁架喇，真係好驚遲早會失聲呀！

>>March 1, 2007 at 3:57:09 PM GMT+8

2007 年 2 月 27 日 星期二 【晴】

嘩，今日放假，所以朝早就跟左媽媽落街食早餐，之後就陪左佢去買野，仲特別為波波買左好多零食，當然，係用佢既利是錢買啦，哈！到左下午，我同媽媽去左飲茶，跟住我又陪佢買野了．．．

之後，我就出左街街，因為約左妹妹去尖咀行，我地行左好多地方，妹妹仲請我食飯添，係好好味既北海道拉麵，好正！我地買左好多新衫，係今季既新裝，我要轉style呀，轉新形象呀，要靚靚啦．．．

女人十分奇怪，真係超愛購物shooping，無論係開心又好，唔開心又好，都可以買一餐，為既就係tum自己開心．．．

>>March 1, 2007 at 4:01:35 PM GMT+8

2007 年 2 月 26 日 星期一 【晴】

今日條腰都仲有少少痛，返工果時都行動十分之慢，好似烏龜咁，因為怕又整傷自己呀！今朝早收到A仔既來電，真係十分之開心呀，佢打黎係關心我，安慰我，其實．．．真係有點兒掛住佢呢！好似好耐冇見過佢咁，但係其實星期日先至見到兩個鐘黎之嘛，哈．．．不過，做緊野點同去玩去拍拖先得架，所以好唔同既．．．

今日主要都係圖書館執野，但係都係慢動作啦，執下要抖下咁，條腰真係梗晒咁，好酸痛囉，好似比人打左十幾下咁，好慘．．．放工果陣時個頭又痛到爆咁，真係痛到死左，好辛苦呀！好在聽日放假，可以抖番下．．．不過頭先已經約左妹妹明晚出街街，我地打算去行街，因為妹妹佢生日買野有discount，所以梗係唔好晒啦．．．

妹妹真係正，到今日為止都仲有利是收，真係羨慕死人呀，佢已經有二千蚊利是喇，多我好幾百蚊啦，因為佢公司既同事好闊綽，妹妹係公司都收左好幾百蚊利是喇，恨死我喇．．．不過，見到妹妹係公司都幾好，同同事關係又唔錯，其實都好安慰既．．．只希望佢可以努力向上，好好把握機會發展啦！

今日lunch果時上網睇左d關於台北野柳同基隆既網頁，希望可以get多d資料呀．．．我一向都係一d鍾意well prepared既人，最好安排好晒d野我先安心，去旅行都係一樣，當然，我都係一d喜歡ad hoc架，隨心隨意去加減我都好ok既．．．不過始終睇定d野我會開心d，完全係未出發先興奮囉，哈！快d到三月尾就好喇，可以同A仔去台北旅行玩玩．．．真係好期待．．．我同自己講，我今次要有一個開心愉快浪漫溫馨sweet sweet既旅程！YES！要加油呀，黎曉寧．．．

哈，今日攪笑，爹地間學校突然間電力出現問題，所以可以好早就close左間學校返黎屋企食飯．．．又真係好耐冇試過無啦啦平日佢咁早返黎屋企食飯喇，當然除左放假之外啦．．．頭先食飯果時真係以為今日係星期六日添呀，哈，因為平日真係完全冇可以一齊食飯囉．．．感覺都唔錯架．．．

唔，聽朝可以晏d起身喇，真係好呀，可以抖抖．．．但係聽日要去銀行入錢錢呀，將d利是錢入銀行啦，哈．．．鬼咩，全部都係細紙，又唔係完部一百，所以入唔到食錢怪呀，唉，聽日要去排隊入錢囉，真係好耐冇做過呢樣野喇．．．諗番起之前，好似兩個月前度，有次要我簽番本紅簿仔既名我都唔記得點簽喇，哈！不過好在佢都比我過關，仲比我睇番個名點簽添，真係樣衰．．．聽日好在係入錢唔洗簽架o者，哈！

今日菲比打比我話可能約下星期四或五出黎食飯，哈，好期待呢．．．如果係八號都幾好丫，因為婦女節，女人大晒，yeah~ 其實．．．點都好，只係好想約朋友出黎見下面聚下舊傾下計咁啦．．．快d要confirm個日子呀！

>>February 27, 2007 at 2:25:26 PM GMT+8

2007 年 2 月 25 日 星期日 【陰】

唉，今日真係黑仔都爆．．．今朝早起身去沖涼啦，沖完之後出黎，點知唔小心扭一扭到隻腳，唔知係訓唔醒丫，定係因為果d一個月一次果d野令我果刻個人腳軟軟喇，總知之後成個人坐左落地，隻手撞到個櫃之外，個pat仲好大力咁坐左落地，痛到我飛起．．．而家講起條腰近pat位都有d痛痛地，而隻腳而家就好番好多，隻手只係紅左腫左少少咁．．．唉．．．超慘啦，之後行都唔係好行得到，所以都係請左假冇返到工，因為本來今日我要執圖書館架，而家咁都唔知點執啦，同我執骨就差唔多喇，係咪？

今朝成朝都留左係屋企休養，訓左好耐，成十二點先至再起身，之後就成日坐係度唔郁，哈！我真係好似好耐冇試過咁樣，諗起真係好慘．．．到左三點，媽媽問我落唔落樓食野，其實我都想去食野既，始終係屋企又真係幾悶下，所以用左好慢既動作去出去，行到慢吞吞咁，哈，真係衰，要人等我，妹妹又話我行得慢，唔肯等人喎，好衰．．．之後好經辛苦返到屋企，又係訓覺，訓到食飯為止．．．

而家反而條腰仲痛痛地，隻腳好左好多，反而係個肚超痛，唉，好討厭囉，每個月總係有一次係咁．．．而家係都要攬實個暖水袋架喇，唔放．．．

聽日要返工了，早點訓喇，因為要早同埋又要執圖書館，所以好好咁休息下先得喇．．．

>>February 26, 2007 at 3:09:07 PM GMT+8

2007 年 2 月 24 日 星期六 【晴】

哈~ 今日終於輕輕有d陽光見下，令個人既心情都好d既，真係好．．．

今日上午基本上都幾hea下，睇下同諗下proposal咁，好快就到左十二點就出去食飯喇，因為今日下午要帶tour，所以咁早就去食飯，之後十二點九就食完幫手早左開工，去左library度執野，又係執果d死人書，真係近排執到我想死想殺人，見到書都驚左．．．到左兩點，A仔班cleint到左，我就開始左今日既tour喇．．．哈，個感覺都幾ok既，真係不時都會偷望下A仔咁，哈，唔知佢知唔知呢？佢就係咁拎住部電話係咁映相，唔知係幫我映定係幫佢既人映喇，哈！總知今日好順利咁帶完個tour啦，而且係好開心咁完成左，yeah~　我都好努力同用心去講解架，真係講到喉都沙埋架，A仔都知道呀，所以頭先佢都打電話關心下我，佢都知道我今次好用心講架，哈！真係要食番多幾粒喉糖先至得喇．．．或者．．．如果有人”呵”下我我會快d冇事既，哈！

返到入黎屯門，因為今日同親友食飯，所以返到黎hea左一陣就落樓食飯喇，整個過程十分好，特別係又可以同表哥傾下計，尤其講到有邊到好野食就特別開心，哈！人都總係為食飯而生活，所謂”搵啖飯食o者"，人人做野都係希望有飽飯食，係一件好平常既事黎．．．

唉，好想放假呀，之前新年放左五日，而家要捱到下星期三先再有假放，好痛苦呀！連續返五日工先有假放，唉．．．有時候休息都係為左要走更長既路o者，所以休息係十分之重要架，如果唔係邊有power去做野丫，係咪？跟住個三月A仔都會十分之忙碌，無論係佢工作上同進修方面都十分忙，所以我知道佢會冇咩時間可以陪到我架喇，唉．．．不過唔緊要啦，最重要係要珍惜今次見到同一齊既時間同機會，因為佢成日都話：”如果懂得欣賞每日既平凡，其實每一日都可以係情人節！”．．．我真係好認同呢句話架，所以我會加油努力咁去珍惜每個同佢一齊既時間同機會，即使只係一個電話都會好開心好珍惜架．．．

>>February 25, 2007 at 2:29:38 PM GMT+8

2007 年 2 月 23 日 星期五 【暴雨】

哼，今日一直都係好努力咁係圖書館內執野，因為centre IC希望可以2月尾之前執好晒個圖書館去，而且因為佢跟住落黎有兩三個月都好忙碌去做其他大單野，所以佢都同時比左好多admin既工作我去跟．．．其實都有點擔心，唔係擔心做唔黎，只係擔心d同事是否服由我去接手做呢d工作o者．．．唉．．．

今日一心諗住快d做完d野放工，之後可以約A仔同一個朋友食飯，點知臨時比A仔放左飛機，真係衰．．．琴晚又話今朝整早餐過我食，點知佢又係起唔到身，唉．．．不過算啦，大家都係一樣好夜先訓，好似成兩點先訓呀，所以今朝我都超眼訓，加上，唉，真係衰，比我講中左，今朝d村巴真係仲未有番，要到下星期一先至有呀，所以今日返工果時都十分之狼狽呀，好在臨時比我係銀包度搵到張去元朗廣場既車飛，如果唔係都唔知點攪，冇就真係要由佢屋企行出去囉．．．不過好在今日都冇遲到，準時返到去中心！

放工果陣時搭車真係好眼訓，一上車就訓，醒果陣已經係我平日落車個車站，當然我果刻係完全冇可能落得到車，加上又有點落雨，所以過多兩個站先至落車啦，其實係行少左路既，只不過有時唔鍾意坐得耐，所以早d落車啦．．．返到屋企又眼訓又肚餓，媽媽今日煮左七寶粥，媽媽話因為今日係年初七，人日，所以要食呢d粥慶祝生日喎，哈！仲食埋之前留下來既榚．．．可能隔左幾日冇食過，加上又肚餓，所以好似特別好味咁呀，哈！

因為今日超級累了，所以頭先o拿o拿聲去沖涼，而家都打算訓囉，因為聽日仲要返工．．．不過聽日好特別，因為要帶一個tour，而呢個tour係A仔中心既client黎既，所以聽日都會見到A仔．．．當然，角色十分之不同啦，唔可以做到咁熟咁啦，所以都擔心一路帶tour時見到佢會忍唔住會笑呀，哈！希望聽日個tour順順利利啦．．．

>>February 24, 2007 at 1:44:24 PM GMT+8