2007 年 4 月 25 日 星期三 【晴】

哈，今朝十點幾已經起左身，之後同左A仔食早餐，跟住就陪左佢返工．．．A仔笑笑口話：而家先至係你放假既開始！．．．點解咁講，因為佢話琴日既假期好似冇放過咁，成日都訓覺同嘆，所以佢叫我好好享受埋今日下半日既假期，而佢就繼續努力工作．．．A仔，你努力工作啦,我會乖乖的．．．

下午返到屋企，諗住媽媽好快會落街食野，點知都係成三點幾先落樓．．．不過好好笑，今日媽媽朋友個孫女瑤瑤又有出黎喇，我今日餵左佢食好多野，佢個樣越來越似男仔喇，真係．．．-_-"，不過佢好好笑，成個POPYE咁呀，哈．．．攪鬼！

之後，我就出左旺角，因為今日約左妹妹出去睇戲．．．話說之前我地買野送左兩張”明明”既戲飛，所以今日佢一上畫我地就打算去睇．．．其實我一向對呢套戲都冇點抱咩期望會好睇，因為始終我對港產片既質數．．．唉！點知，中晒啦，睇完之後完全係想界凳囉．．．真係有好多地方睇到好”蚊憎”，完全唔明佢既意思之外，佢用既手法真係好唔O岩用係電影度囉．．．講真，如果呢套係一個廣告或者MV，我會覺效果好好，之但係．．．真係好唔MATCH，好差既感覺，有好多場面都睇到我同妹妹O晒咀囉．．．我真係為比錢入場睇既人不值呀，大拿拿六十蚊睇套咁既垃圾片．．．我就話唔洗錢O者，不過都浪費左我兩粒鐘既時間，但當中已經有成二十分鐘係睇廣告囉，唉．．．最好笑既係，佢既THEME完全係抄NANA架，而入邊周迅一個角色又係叫NANA，哈，我聽左之後真係笑左出黎，超差囉．．．我睇左頭半個鐘已經有少少想走既感覺，不過妹妹話既然入左黎就睇埋佢．．．但係最後妹妹都話後悔，總知走去隔離院睇”十分愛”好過．．．雖則我都唔會認為呢套”十分愛”會好睇，不過我杷信一定好過呢套死人”明明”．．．真係勸各位有意思睇”明明”既人不如留番果六十蚊暖下肚好過喇．．．

睇完之後同左妹妹周圍行，其實睇戲之前我一個人都係四圍行架喇，因為我一早出到去拎飛先，等妹妹放工嘛．．．我地之前去左EURO GO GO食，嘩，好在唔係叫左好多野，不過，有樣野好好笑．．．佢有杯飲品叫”凍蜜桃茶”，咁我買果時問個姐姐佢有冇熱既，佢話冇，咁我話：”走冰可以嘛？”咁個姐姐就不斷係度話：”下，走冰會唔凍架喎，會好似水咁架喇，唔似蜜桃茶．．．”咁我問佢：”咁你D蜜桃茶唔係用冰整架，所以冇左D冰會唔似”咁姐姐又係度話：”唔係呢，冇左冰會唔凍！”咁我就好嬲咁話：”我就係唔想凍先至走冰，咁究竟可唔可以走呀？”咁姐姐好無奈話可以．．．佢都傻架，走冰點解可以咁多道理呢？走咪走囉，你理得我丫，我就係唔想凍，佢又冇熱既咪走冰囉，係咪？唉．．．香港人！

最後，我同妹妹都攪到成十點半先至走人，因為臨走前拎埋部新相機去貼個保護貼．．．哈，妹妹第一次咁醒目，幫自己同我帶齊晒所有保護貼，單據．．．真係要比個叻佢，因為佢從來都唔會咁醒架．．．哈！返到屋企，見到雪櫃有我其中至愛既一種生果．．．榴槤！我又愛不惜手咁食左三粒呀！好肥肥呀！不過．．．真係好好味，好滿足咁走去訓了．．．

>>April 27, 2007 at 2:10:59 PM GMT+8

2007 年 4 月 24 日 星期二 【乍寒還暖】

今日都幾hea下呀．．．本來九點幾就醒左，不過之後又訓番，一訓就訓到十二點幾喇，哈．．．

之後同A仔係度食野睇電視，跟住大家都覺得好累，所以就落左去會所度坐按摩椅．．．嘩，正正呀，好正呀！雖然，始終按摩椅冇真人按摩咁正，不過都好過冇啦，係咪？都算係一丁點的安慰吧．．．因為我既頸膊成日都好似相左鐵板咁，又痛又累又梗，真係好辛苦．．．即使成日點做運動希望去整番鬆個膊頭同頸，但係都係唔得，始終都係好痛好梗．．．呢個舊患早係兩年前已經開始架喇，我次次去親DUP骨都總係比D技師話我條腰同條頸歪左，唉！

下午時同A仔傾開08年計畫既開支．．．唉，超頭痛呀，簡直係滿天數字飛，好驚呀！如果因為冇錢而做唔到我地既計劃，我會好失望同傷心架．．．唉．．．．

之後，A仔佢眼訓得滯訓左，我就一個人呆豬豬咁對住部電腦喇．．．到左六點幾七點，A仔就同我一齊宗飯仔，我地煮左個燭光晚餐吃，哈！懶係浪漫咁．．．不過，又真係好Sweet喎．．．跟住，橫掂我聽日都放假，所以又留係度陪多A仔一晚啦．．．我地今晚好攪笑，我地係度又打機又玩埋D低能遊戲，好好笑．．．最抵死既係我地玩電腦既拆炸彈鬥高分，哈，好好笑．．．YEAH~ 我一分鐘攪掂，哈！咁就點幾鐘喇．．．

>>April 27, 2007 at 1:52:22 PM GMT+8

2007 年 4 月 23 日 星期一 【溫暖】

wow...今日既天氣十分之恐怖，我簡直係睇住佢變化，由十點左右個天開始黑，黑到好似六七點咁，之後就開始有行雷，仲好似打風咁落雨，好恐怖，再由黃色暴雨變成紅色．．．真係好可怕呀！本來仲等我諗住如果黑雨就好喇，可以放工，點知十二點幾就去番黃雨，真係失望．．．

不過，講起恐怖既野，我琴日遇到d仲恐怖既野．．．我琴日返工果時，大家都知早上果段時間落好大雨黎，我去到公司樓下既電梯，突然見到地上有好多好似枯左既花同樹葉，初時都唔為意架，不過，想想下．．．好似附近冇樹架喎，點知會咁多樹葉架，唔通大風到吹晒過黎？但係又真係冇理由，於是睇真d，原來係．．．一隻隻飛蟻既屍體！嘩，好核突又恐怖呀，隻隻飛蟻既翼都有成寸咁長，又啡又大塊，望落去真係好似枯左既樹葉咁．．．而家諗起都毛管幢呀．．．果度我估冇一百都幾十隻呀，好核突．．．令我諗番起有次A仔果時仲住係中大宿舍時，又係類近而家呢d既天氣，我地係厠所又係見到成百隻飛蟻圍住晒d燈既情境．．．諗起都驚呀！唉，唔講喇，好恐怖．．．

今日好忙呀，成日都做野，又開會又做文件又帶tour，今朝帶左幾個深圳公安廳既guest，初時我幾擔心要我講普通話呀，真係死得人架，點知好在佢地都聽得明廣東話，只要講得慢少少就ok，哈，我就梗係講廣東話啦．．．咁就過左關喇！

放工之後搭車，今日冇琴日咁暈喇，不過個頭好痛囉，唔知點解喇，只知道個人累到飛起啦．．．好累！好在，明天放假，可以訓多點了，yeah~ 返到屋企食完飯睇左陣電視就出門口了，因為要到A仔中心接佢放工，因為佢把遮借左比人呀，我要去接佢呢！之後一齊份元朗．．．好野，明天大家都放假，可以好好一齊享受下喇，YEAH~

>>April 24, 2007 at 3:15:38 PM GMT+8

2007 年 4 月 22 日 星期日 【颱風】

嘩~ 今朝早七點半左右時，完全係睇住個天好似塌左落黎咁，”棚”一聲就係咁落雨喇，幾恐怖呀！係都要係正人地出門口前落咁大雨架．．．不過好在我七點十一時出門口時已經收左少少雨啦，如果唔係都好慘呀！

今日大塞車喇，最後又係九點五先至返到去，真係討厭．．．返到去就忙到飛起喇，真係係咁做野，就連原本我要十二點落去中心頂counter既事我都忘記左，到左成十二點九我先至醒起我唔記得左要落去，之後就係咁趕落去喇，d野都做到半之半呀，真係衰呀！跟住成點三先至可以食到飯，又係趕到我死，衝左出去買野食，返得中心已經係一點半有多喇，我兩點仲要帶tour添，真係趕到我丫，唉．．．

好快手咁攪完個tour，仲同路德會三個同事分享左好多，傾左陣計，真係好，同自己友傾計真係開心好多，大家既經驗同想法都好一致．．．之後又係繼續攪好多野，仲要上番去30/F office去攪少少admin上既野，仲要同我好唔鍾意果個admin小姐去傾野，唉，好討厭．．．跟住又返番去中心做野．．．好累呀，簡直係十萬個累呢．．．

放工之後上車，嘩，好辛苦呀，又暈又想作嘔，真係捱左成粒幾鐘先至返到屋企，真係差d嘔得出呀，但係都唔知點解會咁架，都已經唔係今日既事，我呢排都總係咁，成日放工搭親車都係又暈又想嘔架，唉！好可憐！跟住返到屋企就訓左一陣先至食飯．．．嘩，計計下已經好似有成五日冇食過屋企飯了，哈，所以今日特別覺得好味，仲食左好多添，弊弊啦，肥肥呀，哈．．．不過，之後個人都醒神左少少喎，哈！唔喇，今日都係早點訓喇．．．

>>April 23, 2007 at 1:46:04 PM GMT+8

2007 年 4 月 21 日 星期六 【陰】

今日返工眼訓到爆，真係十萬個唔想起身呀．．．個頭痛到傻左！不過好開心今朝七點十一度，收到A仔打黎既電話，果刻好開心呀，聽到佢把聲好似好精神咁，不過我相信佢琴晚既考試真係唔易過，佢地捱左足足十二個鐘完成成個旅程呀，通宵完成晒，好厲害呀！不過都好既，快手攪掂唔好煩啦．．．

返到中心都好似唔多想做野咁，好可憐！捱得好辛苦到下午，要帶一班來自澳門既青年人，其實每每帶一d外來人士時都好開心，因為佢地通常都好熱情架，今次呢班人都同樣係，最後大家又映晒相，攬頭攬頸咁，好攪笑！早上十一點幾時再收到A仔既來電，佢果刻已經返到屋企喇，仲打算訓覺啦，因為都知佢成晚冇訓過好可憐架喇，真係心痛死我！今晚本來打算去佢度既，因為想佢一打開眼就可以見到我，點知佢六點時打比我話元朗好大雨，又打晒雷咁，佢怕我危險，所以叫我唔好去喇．．．唉，真係衰，要起碼星期三等大家放假先至可以見到喇，好可憐．．．

放工返到屋企，原來屋企人約好左附近既鄰居一齊玩，佢地初時只係唱K，後來又話一齊開大食會，叫埋PIZZA返黎食，所以叫左我地過左隔離玩埋一份．．．雖然佢地D大人唱埋晒D舊歌，不過咪當係social下啦．．．後來，好在其中一個朋友帶埋佢個孫b黎，咁我就可以有野玩喇，真係好好笑，bb真係特別好玩．．．不過玩就ok喇，叫我湊就唔好玩我喇，哈！食飽野之後我都返屋企先啦，有佢地繼續玩，因為聽日都要返工啦，都係早點休息下好過了．．．

>>April 22, 2007 at 2:42:26 PM GMT+8

2007 年 4 月 20 日 星期五 【晴】

嘩~ 今日好happy呀，因為好難得可以一家人出去玩，去左郊遊啦．．．

我地參加左某某區議員攪既一日遊活動，首先我地八點半去到指定地點集合，點知最後都成八點十一先至上到車，上到車之後個導遊姐姐就係咁講野，講好多我都知道同認識既事物．．．真係好悶囉．．．我同妹妹爹地一齊坐，媽媽就同佢d朋比為奸坐啦，我同妹妹諗住對耳塞住個earphone聽住mp3一定冇死，可以訓番覺好架啦，點知導遊姐姐個咪真係大聲到丫．．．所以都堅持住唔訓．．．我地第一站係東涌，因為我地要轉大嶼山既巴士去大澳，所以順便落車可以伸展下之外，最重要就係去”放低幾錢野”先啦，我地去左東薈城底層個toilet，點知裝修喎，攪到我地上多兩層先至攪到，真係煩．．．之後齊人就開車，開車之後玩抽獎，估唔到我地一家四口，都可以抽到三份禮物，哈．．．d禮物都幾見洗架，有兩枝牙膏同一枝手掌size既Dove沐浴露啦，真係唔錯架．．．

一路上行，車所經過既地方對我黎講都係十分之熟悉既地方，因為成日都搭車入大嶼山架啦．．．但係對於妹妹黎講就好似每樣野都係新奇刺激架喇，因為佢比較少去郊遊同出去玩，所以佢好開心呀，知道沙灘又叫，見到牛牛又叫，見到狗狗又叫．．．哈，真係好好笑！我同妹妹爹地沿路都有講有笑，又係度映相，好好笑同好好玩呀！終於搭左一粒鐘車，就到左大澳喇．．．我地冇跟導遊行呀，自己四圍去行，因為都確實唔係第一次黎喇，所以十分之熟悉啦．．．我地行完海味街之後就自己行左去睇棚屋．．．嘩，我同妹妹爹地都好鍾意睇呢d野架，所以我地三個都十分雀躍，不過媽媽就．．．好似難為左佢囉，悶左少少之餘，仲要佢行黎行去，晒住晒添，哈．．．我地三個就蹦蹦跳咁四圍貢，哈．．．復來比我地發現左一個叫少林寺文化館，點知行到好入都好似搵唔到，所以最後放棄了．．．我地出番去去左行新整既長堤，嘩，有紅樹林睇，不過．．．真係好大風，吹到好似傻婆！

之後再上車，我地去左昂坪既寶蓮寺，我地去左睇舍利子．．．我記得上一次我睇果時，一來因為我唔夠高，二來真係唔知咩原因，我完全係什麼都看不見架．．．但係今次我有點進步，我只係見到黑色一粒野，唔知係咩．．．妹妹都同我見到同一樣既野囉，不過爹地話佢見到既係一粒黑色但係旁邊有閃光既野；而媽媽話見到一粒黃色既野；而媽媽既朋友話佢見到米白色訪邊有閃光既．．．聽人講，見到不同顏色即係代表你同佛既緣份．．．哈，好明顯既係，我同佛真係冇緣又冇份喇！之後我地去左食齋，嘩，確實幾好味喎，不過都可能係因為齋本身冇味，所以先至落多少少味料同油去煮，先至特別好味啦．．．之後，有個uncle帶左我地去一個叫"心經簡林"既地方，我都係黎左咁多次第一次去咋．．．我地行左大約二十五分鐘既山路之後終於到左．．．一見除左見到鳳凰山既牌坊外，就見到好多好高好大既木柱，真係十分之宏偉！原來每條木柱上面都刻左”般若波羅心經”，真係好厲害呀！雖然我對每句經既意思都唔知道，不過只係果一刻有一種好似去左去古代咁，d武林高手對招時既情境咁，仲要有d霧飄飄下，d高手往往會企晒係d柱上邊打，好勁呀，哈！

跟住，終於到左今日既重頭，我地行左去昂坪360既車站搭纜車呀！好在，今日都唔洗點排好耐隊，聽導遊講平時要等成一粒鐘，點知我都地都等左半粒鐘多少少，所以都幾ok丫．．．一上到車，只係有好high好興奮既感覺，因為真係好正呀，一路行又有風吹入黎喎，真係好好feel呀，d景又靚到爆呀，我地映左好多相，又拍左video添，哈，好開心．．．雖然今日天氣麻麻，好多霧呀，所以上到大佛時見到個佛好似係度騰雲駕霧咁，真係好似走左去仙境咁，好正既感覺．．．不過搭纜車時都ok喎，又唔係好大風，起碼冇停過車呀，哈，如果要我比分，我會比八十分架！

搭完車之後，我同妹妹離左隊呀，我地去左東涌度行街，因為我地發現左原來東薈城果頭有好多名牌既outle架，所以梗係要去行啦．．．我地係度真係買左好多野，嘩，呢度確實係一個洗錢地架，因為實在太正喇，無論係衣服，飾物，眼鏡，鞋，行山用品，護膚品．．．都會有outet架！所以我地都行到唔捨得走．．．之後我地搭番車番屯門，再係市中心行左一陣就走左去食飯喇，嘩，好飽呀，妹妹因為生痱茲，所以冇咩胃口，所以我食左好多呀，食到傻左，個肚脤卜卜呢，o．．．而爹地媽媽就同朋友去左三聖食海鮮，佢地就有口福囉，食好野，好似話食左成二百幾三百蚊位啦，真係幾貴，不過食好野就係咁架啦．．．

聽日返工了，好在返十點，都好在可以八點先至起身．．．今日好累呀，雙腳好似開始發軟了，好似有點痛呢，好可憐．．．

>>April 22, 2007 at 2:33:52 PM GMT+8

2007 年 4 月 19 日 星期四 【晴】

今日討厭呀，一朝早返工已經遲左出門口，點知仲要玩塞車，一上屯門公路就黎料喇，真係玩死人囉．．．最後要九點五先返到去公司．．．激死！

今朝早都係做好多ADMIN既野啦，之後就落左去中心，因為唔夠人手，加上要睇下裝修既情況點，要跟進丫嘛，因為老細今日放假呀，要我去睇架喇．．．而家間OFFICE度係好臭油味，好難頂呀！我都唔願係OFFICE度做野，寧願上去圖書館做好過．．．雖然要睇埋圖書館，不過都好過咁辛苦丫．．．

又係如是者過左個上午，下午就要帶隊，都幾好，唔係太麻煩．．．咁又過左兩個鐘．．．最後果兩粒鐘都係輕輕鬆鬆咁做埋D野去咁過．．．

放工後約左妹妹，因為妹妹要去市中心睇相機．．．其實我都想買部新呀，因為舊果部成日FOCUS唔到囉．．．見到妹妹買新松自己都想買呀！不過．．．最終都係冇買到，反而．．．買左條裙啦．．．寧願靚靚先啦，哈！

明天A仔要去考山藝喇，知道佢有個同伴非常麻煩，令佢地成班人就晒佢一個人．．．唉，有時都總係一個TEAM內會有D麻煩友架喇，希望唔會影響佢地全部人既表現啦．．．A仔，加油呀！支持你．．．祝你旅途順利！記住小心為上呀！我會乖乖等你回來！祝你考試成功！

聽日會同媽媽爸爸去郊遊，哈！其實係參加左什麼區議員舉辦既活動，會去昂坪搭纜車．．．不過聽日天氣好似唔多好咁，真係有少少擔心會掃興呀！

>>April 20, 2007 at 4:39:24 PM GMT+8

2007 年 4 月 18 日 星期三 【晴】

yeah~ 今日好開心，因為一朝早可以同A仔一齊搭車返工，真係自從我進軍左港島區返工以來既第一次呀！今朝都好累，本來大家都想係車度訓下，點知司機叔叔同樣地開到個收音機十分之大聲，所以最後我地選擇唔訓，我訓左係佢膊頭度傾計．．．時間真係過得好快呀，真係好唔捨得呀，但係都總係要分開吧！

返到公司，十分之準時呀，好少何準時的，因為成日都塞車吧！今日同樣十分之忙碌呀，又是做很多的PAPERWORK了，好痛苦吧！但係亦因為中心人手不足，我同樣要分身咁兩地走，十分麻煩！但是每每一落到中心做野，我總係集中唔到，因為實在太多AD HOC既麻煩野會出現，討厭！咁就過左一日喇．．．

放工之後，約左個好姊妹，本來打算行下中環區間H&M，但係都好似唔多掌握到間野係邊，所以最後都係決定去葵芳．．．到左之後因為大家都好肚餓，所以去左食車仔麵．．．好味呀！不過自己貪心落多左少少咖哩汁，攪到食到個咀紅晒，辣到傻左．．．之後我地去左行街，我買左兩條褲，難得O岩我著既兩褲呀，實在太好了，莫非我真係要轉行著橡筋褲頭既？O．．．

返到屋企都已經係十點半，O拿O拿聲十一點半都訓覺了，因為好眼訓吧！早抖各位．．．

>>April 20, 2007 at 4:31:30 PM GMT+8

2007 年 4 月 17 日 星期二 【晴】

今日放假，真係好．．．所以即使今日A仔已經一早起身返工，屋企冇晒人，我都仍然繼續訓，哈，訓到十點半先至起身．．．

之後十一點幾就起行返自己屋企喇，返到屋企十二點半左右，媽媽就話好肚餓，所以叫左我陪佢落樓食野，一點半去到大快活，嘩，當時真係有D唔想食，一來係唔係好食得落，二來心諗：又係大快活呀？已經成日返工都會食佢，真係睇見都想嘔．．．”不過算啦，既然黎左啦，都要食架，所以都食左個燒味撈麵，真係超飽啦．．．之後陪左媽媽買左少少野之後就返左屋企．．．本來今日打算係屋企好好咁做我要做既野，聽日可以一早交比老細，點知媽媽就係咁霸住部電腦用，因為．．．佢話要睇住個市喎．．．唉，攪到我四點後先至可以用！仲要四點果陣媽媽叫左我落去，又食，今次食KFC．．．嘩，真係好飽喇，如果唔係因為可以有BB玩，我都唔會落樓呀！因為係屋企悶左成兩粒鐘真係好悶，我都係係度聽下音樂睇下CONCERT DVD咋．．．

返到屋企即刻o拿o拿聲做野啦，因為真係好怕做唔晒呀！因為今晚約左A仔，佢話聽日可以陪我一齊返工，一齊出去香港果邊，所以就約埋一齊係佢度出發啦．．．真係好，可以同佢一齊返工，都好似咁耐以來既第一次咋，我地可以聽日一齊搭村巴出去啦，YEAH~

死啦，而家好似好肚痛咁，唔知係咪今日食得太多野呢？食完個KFC之後七點幾又食飯黎，去到A仔度九點幾時又食左兩塊麵包，嘩，而家好飽好飽．．．開始有點肚痛添呀！真係痛痛哦．．．今晚要早點訓了，因為聽日又要繼續戰鬥呀！要到星期六先再放假了．．．努力，捱多兩天就放假啦．．．！加油！

>>April 18, 2007 at 2:03:51 PM GMT+8

2007 年 4 月 16 日 星期一 【溫暖】

wow．．．天文台話今日會狂風大雷雨，嘩，真係準到暈，夜晚八點幾就開始落好大雨喇，係真係好大果隻，好似倒水咁囉．．．好恐怖！望住出邊就好似打八號風球咁，好可怕．．．

今日好忙，一朝早收番琴日比老細既文件，跟住就著手開始去改番佢要我改既野，同老細傾左一陣之後，我就係咁做喇，做到食lunch先至完全停左手．．．

到左下午，因為要帶tour，所以好早就落左去中心，帶完個tour之後，就留左係中心喇，因為聽日開始一連幾個星期三中心都會裝修，所以我都要將我桌上既物品PACK好，之後我都一路看COUNTER一路做野，咁就一個下午喇，好痛苦既過程囉．．．

放工之後就好快手就去左搭巴士，入元朗搵A仔喇．．．直到而家．．．嘩，出邊好似剛剛收左雨咁，希望聽日唔好咁大雨啦．．．好在聽日放假，可以訓晏D．．．

>>April 17, 2007 at 12:44:24 PM GMT+8