2007 年 10 月 8 日 星期一 【晴】

今朝好早就起身了，好似係七點幾．．．同A仔一樣十分之眼訓．．．好經辛苦八點二出左門口，同A仔趕到死死下呀，因為佢就遲到！最後陪佢返到去山景就走人．．．返到屯門屋企好眼訓呀，又走番上床訓，一醒就已經係十一點三．．．同時間媽媽打比我叫我落去飲茶，所以好快手十一點半就出門口了！

飲完茶之後同左媽媽去買送，買完又返左屋企．．．之後好努力咁將已經執好左兩日既北京行裝再重新執過，因為琴日睇過中國氣象局既資料，佢話北京係12號會最高得21度，最低得8度，所以．．．又要好好咁安排過d衫喇 ．．．琴晚A仔佢借左件CORTEX褸比我著，希望呢幾日o岩用啦．．．

執完野都已經係三點幾了，之後跟左媽媽落街食野，食完後媽媽就去左做gym，咁我就一個人走左去惠康買下野，因為發覺成個屋企都好似冇野食咁，好唔開心，一定要買番少少自己喜歡食既野tum下自己至得．．．所以，呢個時間係最易肥架喇，唉．．．

唉，之前見既工到而家都仲未有消息，真係令人擔心！唔通我真係要再繼續糧地落去？真係唔想！神呀，我真係好希望可以早日搵到份工，可以安安份份，穩穩定定咁呀！

>>October 9, 2007 at 2:04:12 PM GMT+8

2007 年 10 月 7 日 星期日 【晴】

嘩~ 今朝起身時仲係周身骨痛咁呢．．．琴晚半夜三點幾我都痛醒左，之後就去左用d按摩膏按摩下d肌肉，希望可以快點冇咁痛．．．其實今朝已經好好多，不過都仲有少少痛咁啦．．．忍得住既．．．琴晚好早訓呀，十點幾就訓了，今朝直至十點先至起身，真係訓足十二個鐘呀，呵！

起身之後同左媽媽落街去大快活食早餐，食完之後都係同媽媽去左買野．．．不過因為今晚媽媽會出去大會堂度聽歌，所以今晚冇飯吃呀！本來，A仔佢今日會同班展翅仔去BBQ既，初時都打算叫埋我去架，點知後來又話唔太方便我去，所以我最後都冇著落．．．所以成個下午都唔知做乜好，最後走左去訓覺．．．本來都想上網搵下工既，但係又擔心人地會係我去左北京既時間搵我見工，所以都係冇打信！訓醒果陣妹妹打黎，我地後來約左七點一齊落街食麥記！其實都好耐冇試過係自己屋企留下間麥記食晚餐了．．．真係好耐好耐冇試過了，感覺好古怪咁！定係其實我一向都好少係麥記食晚餐呢？哈！

食完麥記後我同妹妹就返左屋企．．．因為妹妹打算係日本郵購一d新一季既衫，所以我都幫下手睇下啦，哈，最後我都失左手，決定都買兩件衫，呵！妹妹聽日會拎去fax左份form去，希望早日可以有feedback，快點有新衫著就好了！

到左十點，A仔去BBQ完了，佢直接上了我屋企，因為佢係我屋企留下既蝴蝶溝燒咋嘛，呵！之後接埋我一齊我地就去元朗．．．因為新聞話北京開始有一條新既地鐵線行車，而且開始所有車票都劃一收費為兩蚊，真係正．．．所１我地今晚要再好好plan下我地既行程，睇下新開既車線可否方便到我地或者影響到我地．．．

但係，唔開心地，臨返到元朗時我同A仔因一d誤會攪到大家嘈左一陣．．．唉，真係唔開心呀！我都知自己係衰多口架喇，正一多口怪！講錯野攪到A仔嬲我，又激氣添！對唔住呀A仔！！不過，最後我地都可以如常傾北京既行程，因為A仔佢大方囉，哈！原諒左我呢個多口豬．．．

>>October 9, 2007 at 9:19:29 AM GMT+8

2007 年 10 月 6 日 星期六 【晴】

wow．．．十萬個累呀！剛剛從wild camp回來！琴朝十一點鐘便在家出發了，約了A仔在上水集合！我地先在椰林閣吃一個超級豐富既午餐，好讓我地可以夠氣夠力上路．．．之後兩點左右，我地個山藝教練朋友就架車過黎在彩園村接左我地去黃石碼頭！

去到黃石，哈，我地一行四人就坐”大飛”快艇直接去到大浪東灣．．．船程雖然不太長，不過真係好刺激，因為是日既浪十分之大，真係有好幾次都幾驚險下，個浪拋起我成個人呀！大家都知我有幾咁重架啦，真係超驚會跌落海呀！好經辛苦終於到左東灣，由於隻船埋唔到個岸，我地要係附近既石灘度”搶灘”，十足十好似打仗咁．．．同樣十分驚險，因為我地個山藝教練朋友先行上岸，佢一個不留神就跌在石上，因為d石太濕滑了，加上佢個背袋足足有80 lt咁重呀，真係驚人，所以唔”百佳”就其了．．．終於平安上到石灘，我地好經辛苦咁爬石埋番上海灘，我同A仔都過程中整到損手爛腳了！哈，今次有戰績比人睇了！

行到去營地，我地好快就開始set營了，我都有點兒中暑，因為天氣太悶熱了，又爬石來，"mau低起身"後個人就暈左一暈，好驚！當時即刻飲水補充一下啦．．．好快就set好晒d野，我地就落番個海灘度游水．．．嘩，d浪十分之大，尤其對於我呢d唔識得游水既人黎講就更加恐怖了！不過．．．在A仔既陪同下，我可以克服得到大浪，而且．．．有佢抱抱同攬攬就什麼都不怕了！多謝你，A仔！錫晒你！游完水我地就去左附近既一條溪水沖身，不過．．．都唔太可以徹底地沖洗乾淨呀，只係暫時性！不過都總好過"UP"住兩日丫．．．到左夜晚，我地就一齊打邊爐，十分之豐富．．．有澳洲肥牛，新鮮海蝦，鱔，芥菜，皮蛋下火．．．正！仲有方便飯同鳳爪排骨飯．．．哈，其實我同A仔如果自己去camp既話都好似唔會咁豐富，只係因為同山藝教練一齊就咁有口福了．．．真係好！

其實是次除左我地四個外，其實係一個訓練，所以當中仲有其他既學員參與，而我地都只係路人甲乙咁架咋！但係佢地班人就好夜先至入到黎，我地等佢地都等到呆左．．．最終佢地成十一點幾先至到，我都等到眼訓．．．後來同佢地班人食左陣野傾左陣計，我地都一點訓覺了．．．

到左今日，八點半度就起身，天氣仍然十分熱，琴晚都ok啦，都唔算係太熱既，因為都對住個海，都有少少海風咁．．．不過到左朝早比個太陽晒住就好係野喇．．．我地起身就執拾好行裝，收好d營同埋煮早餐吃！同樣係好豐富既早餐，一個超大既出前一丁杯麵，少少點心同埋美綠朱古力．．．之後，我地就去左附近既一個山上既石牆去攀岩．．．超熱同超晒，個太陽晒落黎d肉係覺得刺痛架．．．講起刺痛，諗起琴日係溪邊沖涼時，我咁大個女都係第一次比烏蠅咬，嘩，超痛，果下簡直係好似比枝針吉左一下咁，好刺痛架！都唔知點解蚊就真係冇乜，反而烏蠅就好多，仲會咬人添，好可怕．．．！

攀完岩就梗係超超熱同累啦，所以我地決定早點下山既石牆，之後再去海灘玩水．．．今日既浪比起琴日既細左好多了，好明顯係風平浪靜左好多好多．．．而我都係A仔既鼓勵下再次落水玩！雖然琴日同今日都飲左好多咸水落肚，不過．．．都好好玩既，而且真係涼快好多呢！玩完水我地就起行行山了．．．由於太多人，同埋有部份人執野比較慢，所以我地共分左三批人行，而我同A仔就係其中一組．．．不過．．．中途發生了事故，就係我地誤會左佢地打算行去鹹田灣個海風士多，點知唔係，電話又收唔到喎，真係十分麻煩同頭痛．．．我地就係果度足足白等了佢地成粒鐘呀．．．好可憐！最後，我地係不知所措情況下決定行上大浪坳，試下電話是否收到．．．終於上到去收到了，真係好．．．佢地已經當時到晒大浪灣了．．．我地就用最快速度落到去．．．我行到對腳好似已經唔再屬於自己咁了．．．好經辛苦二十分鐘終於到左，但呢二十分鐘並不易過！而之前所行的白行路就更慘痛！好在，最後我地都係搭番船返黃石碼頭．．．終於可以坐下，不過只係五分鐘既船程已經到左．．．之後再坐番山藝教練部私家車返上水，我地就各散東西了．．．

是次既旅程當中有辛苦有愉快的．．．都係一個好既”鍛鍊”．．．不過．．．換來的係超累，超痛的四肢，同超黑既皮膚．．．

>>October 9, 2007 at 9:21:55 AM GMT+8

2007 年 10 月 4 日 星期四 【晴】

wow．．．今日訓到成十一點半先起身呀，因為琴晚夜訓囉．．．真係訓到夠了，真好．．．

起身後我煮了個早餐過A仔吃，吃完之後我地就出街，我地做左好多野．．．先去銀行入票，之後去左”唱”人仔for去北京時用，再之後去左超市，買定聽日同後日去camp既食糧．．．攪掂晒d野後，我地就返左屋企，好努力咁執去camp既東西，因為都好多野架．．．今次又是辛苦了A仔，又係大部分既野都係由佢去拎，哈！執到夜晚，我地就睇住VCD一路食飯，食左一個唔多好味既HOT DOG！係自己整的．．．佢唔好味在D腸度，太辣了，完全冇左腸既原有味道！下次都係唔好買辣味．．．睇果套VCD雖然係舊片，好似叫”學校風雲”，不過都幾好睇，有袁潔瑩，劉松仁，李麗蕊等做，都幾OK，講八十年化未時既學校同黑社會情況．．．幾刺激！

之後又繼續努力執野．．．到左八點半就一直睇電視．．．睇到舞動全城大結局大半時，大約九點四啦，我就走人了．．．好好笑，A仔本來打算只係送我落去搭村巴，後來變左話踩單車送我去西鐵站，最後就決定送我去屯門市中心吃宵夜，但係去到屯門時又決定了送我返屋企．．．最後我地，唔係，應該係A仔踩左一個鐘零十分鐘單車，車左我返屋企．．．辛苦死佢了．．．明天仲要行山呢，真擔怇冇力行呢！希望佢好好休息了．．．我都要努力執野，因為有好多野未執呀！好怕帶少左野呢．．．而家都應該叫做執好，不過好似都幾重呀！希望冇帶少野啦．．．

>>October 5, 2007 at 4:34:20 PM GMT+8

2007 年 10 月 3 日 星期三 【晴】

呵~ 今日都真係有點無無聊聊咁，朝早起身本來打算去跑步，點知起身時周身骨痛的，都唔知係咩原因，只係覺得好累，好累，十分累．．．跟住十一點就起身了，媽媽就叫左我落街吃早餐，最後我地同左另外兩個朋友去左飲茶．．．飲完都已經係一點幾了，後來陪了媽媽回家，做了一點家務後，媽媽話想去葵芳行下，於是我地兩個就去左葵芳行街．．．唔，d衫都唔係好吸引，我最後都係買左兩件for去北京時著既衫，一件長袖t-shirt，一件線衫．．．希望到時o岩著啦，因為我一直都好怕d天氣好唔穩定，時凍時熱咁都唔知著咩好．．．

行完返到屋企，我又繼續執下去北京既野，因為琴晚都實在執得太亂了，加上d衫諗黎諗去都唔知點好，不過好在最後都比我執掂左．．．返到屋企都冇咩胃口吃野喇，可能四點幾時係葵芳食左個幾heavy既tea啦！所以最後我都係食左幾片麵包同飲左兩碗媽媽靚湯就算．．．都咪話，都幾飽架！跟住，九點半就出了門口，因為去接A仔放工！

先前接到個電話，其實係A仔既同事打比我．．．佢想搵我幫手佢做功輔班既導師．．．其實，我都知道佢係好等人手用，不過．．．我都唔想攪到人地唔上唔落咁，因為我下星期會有工見，而且有可能有一份會有消息；加上我之後又會去左北京成十日．．．人地叫我下星期開始幫佢手，我都唔係咁好意思成日都要請假啦！所以．．．我都好坦白咁同佢講爻我既困難．．．最後唯有同對方講我下星期去北京前一定會再回覆佢如何既．．．講真，如果我仲未搵到工既，我都願意幫手架，幫補下生計都好架，而且都不是十分難攪卦？！其實．．．我覺得自己咁既回應同安排係對大家都比較好架喇，我都唔想到時應承左人又話唔做咪仲麻煩？起碼我講左我既難處比對方知，大家都協調到既先至有意思架嘛！

接左A仔後返左元朗，我地好努力又再次plan我地既北京行程，因為將會有少少既改變．．．真係好期待呢幾日既來臨呀！數下數下，仲有一個星期度就出發了，好緊張呢．．．聽日A仔放假，我地會去”唱”定d錢錢先啦，因為星期六日我地都要去wild camp呀，所以都未必會得閒攪！

頭先接到神神既來電，佢話想去台灣玩．．．好丫，真係highly recommend啦．．．

>>October 5, 2007 at 4:25:04 PM GMT+8

2007 年 10 月 2 日 星期二 【颱風】

今日好早起身，一朝早七點未夠就起左身喇，真係十分之眼訓呀！！之後七點半就出了門口．．．初時見到屋企樓下個巴士站咁少人排隊，以為時間仲早，所以冇少人o者，點知車一黎．．．嘩，架車爆晒，我上到去都係企左係門口附近位置，好可憐！搭到半路竟然黎塞車，真係衰，已經企到鄆軟，而且又超眼訓，而家仲要玩塞車，真係討厭！好在，好快唔洗一陣就通番車，初時見到佢郁都唔郁咁真係幾擔心會遲到呀！

嘩，去到旺角一落車就開始大雨起黎，八點幾果陣係最大雨既時候，我一路又要搵個小巴站，一路好”呢hea"呀！後來見等極都冇小巴，再睇下錶已經係八點九了，十分趕呀，所以一見到有架的士埋路邊，有個人落車，我就即刻走左上車喇，唔理待得咁多喇．．．後來落車好在冇跳錶，八點十一去到，好彩！

去到見工都係先填form之後就用一個鐘做一份written test．．．份test我覺佢有少少裝人陷阱的，考下做果個人識唔識得揀題目．．．（因為佢共有兩邊，一中一英，每條再分三細條，可以選其中一條作答）佢其中有兩條問既野係差唔多的，只不過係一條中一條英，雖然我對條題目好有把握，但係冇理由令自己不能好好發揮架，所以最後選了有把握的為英文，中文答其他次等有把握的．．．都叫做答得ok啦！答完之後就見左個高層，果個小姐問左我好多野，好似查家底咁，我咁大個女真係第一次要我一次過寫晒五年來既諮詢人資料．．．講真，有d舊既公司就已經搬左 ,我都唔知道或者根本唔記得晒d電話，再者，有supervisor都已經離左職，點都唔會搵到佢問野架啦，但係個小姐好奇怪點都要我寫比佢，仲話有咩佢可以問HR去了解．．．我心諗佢都傻架，問得HR既都咪就係只答到佢我係呢凌做過，我都比晒工作證明佢睇啦，仲問咩呀？．．．不過算啦，佢鍾意點就點，問左咩人地答咩我都控制唔到．．．唯有交托比神去安排了！

見完已經係十一點三，真係長既時間．．．之後諗住搭小巴去番旺角，但係就發生左一件好激氣既事．．．我上小巴時，問左司機一聲：”請問架車係咪去旺角架？”（因為當時我見到佢個牌係去土瓜灣）跟住個司機就用一個好差既語氣同態度回答：”行呢邊既就梗係去旺角啦，唔係去邊呀！我冇轉到個牌o者，唔係咁都要問呀嘛？”．．．當時我好嬲，即刻拎紙筆出黎抄低晒架車既資料同個司機個名，諗住投訴佢．．．寫果時後個個女仔仲睇住我寫添．．．未寫完果陣，有個女人再問司機旺角火車站可以係邊度落，個司機又係好差咁答個女人，仲好大聲咁話人唔知就上車前好問！．．．實在太令人憤怒了！話未說完，睇住我寫字個女仔再問個司機一聲：”係先達會唔會有得落？”，個司機又好寸咁答個女仔：唔過先達果邊我點去總站果頭呀！”，之後個女仔好憤怒，仲學我即刻抄低司機同車既資料，我相信佢都同我有同一個想法，就係去complaint佢！香港多多幾個呢類人，一定唔會再有人去消費！

到左旺角，去左旺中行，點知九成舖都冇開，行左唔夠五分鐘走了，去了搭巴士．．．一上車就訓著了，因為太眼訓！一醒已經是屯門．．．回到家中，突然心血來潮好想執衣櫃，所以就係咁執．．．後來三點幾媽媽才我和落街吃左KFC，好味，不過好似唔夠飽，但係又唔敢食太多喎，好慘！好肥肥呀！吃完就同媽媽各散東西，佢去做yoga，我返屋企繼續執野．．．執執下索性睇下有咩衫可以帶去北京，執下執下十分頭痛，因為都唔知d天氣會點，又怕太少衫會凍，但帶得太多又怕重，好煩！後來好經辛苦係食完晚飯之後執好d衫了！而家個袋爆晒50L了，點好？！仲有好多野未放入去！．．．我已經帶少左好多野架喇，唉！煩惱呢！聽日要再好好PACK過了．．．

>>October 3, 2007 at 3:41:19 PM GMT+8

2007 年 10 月 1 日 星期一 【乍寒還暖】

今朝本來打算陪A仔返屯門架，點知．．．太眼訓了，所以我就繼續訓，得番A仔一個自己返工．．．後來我訓到十點半都起身了．．．十二點三就返到屯門！返到屯門就同左媽媽出街食lunch，去左食台灣喇！好飽呀！跟住就去左超市買野．．．

返到屋企我就溫習聽日見工既野，不過．．．好似都唔係好具體睇過d咩咁，加上冇咩心機溫呀，最後好米快就睇完關於展翅青見既野就算．．．跟住我就好努力咁整好北京旅遊書既bookmark，方便我地之後係北京時用！到左五點媽媽又叫左我陪佢落街，我地又去左食tea，我食左個西多，好heavy呀！我近排已經又肥左幾磅了，成個人都似d肉鬆鬆地咁，好醜怪呀！唔可以再食了．．．之後食完再去左超市．．．從超市回家途中，我同媽媽見到有兩隻貓貓，剛好我地買左一包貓餅比波波，所以媽媽開左包餅請左兩隻貓貓食．．．點知，當我伸手過去比其中一隻貓食時，佢竟然．．．嗚，好大力咁用手打左我一下．．．不過，佢冇出到爪架，算佢啦！我估佢都係果一刻好驚，唔知我為乜伸隻手過佢度o者．．．所以我冇怪佢，只係罵佢做乜打我，話我下次唔請佢食野囉，哈！

返到屋企幫媽媽整左部手提好耐，幫佢set好d歌同將d人分組set唔同歌曲咁，好無聊咁．．．食飯之後，我剛好打算上網申請藍十字保險時（for我地今次去既北京之旅 )，A仔就打黎了．．．我好快就攪掂好晒，仲幫A仔買埋添．．．yeah!

聽日一朝就要起身了，因為約左九點見工呀！我真傻左，我初時攪錯左聽日以為去又一村果邊見工，後來chk番先知原來攪錯左，應該去何文田先o岩呀，攪到我之前打電話問個好姊妹時唔知自己問錯架野，哈！不過而家都大概知黠去架喇，最多到時叫司機叫我落車啦．．．

>>October 2, 2007 at 4:14:28 PM GMT+8

2007 年 9 月 30 日 星期日 【陰】

今日係十．一國慶．．．不過．．．哈，唔係好關我事喎！

琴晚攪部電腦黎呀，因為之前比個朋友連累，攪到個msn中左毒．．．一直都冇時間整之餘都唔識得整，所以唯有琴晚試下去yahoo知識度問下人點攪啦！咁都有人教點攪，但係好複雜囉，我攪左好耐呀，最後我都唔知道究竟我有冇整番好？！哈．．．最後我成兩點先有得訓，都唔知而家部電腦點，話就話scan唔到有virus．．．唉，煩呀！

今朝八點九就起身了，因為約左A仔去中旅社果度買京九火車飛．．．十點九就去到了！嘩，好彩今日買咋，再遲d都買唔到！原本我地諗住買硬臥架，因為平d，但係只係得去果程先至有，回香港果程就冇了，只有軟臥．．．後來計來計去，都唔差在比多兩百幾蚊，決定了來回兩程都係軟臥，而家共要比千五蚊，好肉痛呀！真係未出發先黎割我一刀了．．．

跟住我地去左同auntie飲茶，飲完茶之後我地就四圍行，最後比我買左條熱褲．．．哈！想買好耐，不過一直睇唔o岩，終於買到了！之後返左A仔屋企，我地一齊PLAN北京個行程呀 ！就咁就PLAN左好幾舍 鐘了，死左咁．．．辛苦了A仔了，又睇到眼花，又計到頭都大埋．．．不過，而家終於攪掂左喇，真係好呀！錫死A仔呀！

星期三就要去見工了，所以明天要在家好好溫習同準備了．．．

>>October 1, 2007 at 1:46:38 PM GMT+8

2007 年 9 月 29 日 星期六 【晴】

哈~ 今朝本來打算九點起身，之後九點半出門口架，點知．．．最後因為太眼訓了，琴晚成兩點半先至訓呀，因為我地好努力咁去嘗試計劃我地北京既初步行程，所以．．．好累好累！最後成十點半先至出到門口呀！哈！

出門口後我地去左元朗大橋果邊既小巴站，諗住搭果架直接去到新既落馬洲管制站，點知個站既人真係多到嚇死人，我地係又熱又晒既情況下等車，足足等左差唔多二十至三十分鐘，死左．．．好在等車之外，A仔好醒咁即刻去左買野比我食，我地一路等住車排住隊一邊食住我地既早餐．．．食完就o岩o岩好可以上車了．．．架車都ok快既，唔洗三十分鐘到左喇！去到都人生路不熟呀，因為第一次去果邊過關，唯有跟住d人行啦．．．果度都好靚好大，而且都唔係太多人呀，所以好快就過左關，之後就上左地鐵喇，十分方便呀！而且架小巴好平，都係六蚊咋，所以下次再可以係咁既方法去．．．

我地第一站就係去少年宮站，去左深圳書城．．．我地係度主要都係睇下有冇o岩既北京旅遊書．．．睇左大約一粒鐘度啦，都搵左兩本o岩洗既，正呀！好在搵到o岩架咋，如果唔係就要買香港我地之前見到果本超貴既書喇，成百幾蚊呢．．．而家只係五十幾蚊就買左兩本o岩架喇，GOOD~

之後，我地再搭車去左購物中心站落車，去吉之島行．．．我地主要係呢度買我地搭二十四小時京九鐵時既食糧．．．其實火車上都會有野食買既，不過我地怕d野又貴又唔好食，所以．．．都係寧願買杯麵食好過，因為果度會有熱水供應的！仲有買左少少方便飯同其他乾糧，for我地火車時同埋係旅舍時食既．．．仲有買左d大包既紙巾，因為可以方便一點，唔洗成日一細包咁，又要搵黎搵去，係旅舍又可以方便一點．．．

嘩，咁就係吉吉島流連左成粒鐘了，跟住仲要將四大袋野pack晒入A仔個60 Lit既背囊度，咁就用左十五分鐘了．．．不過可以放晒入去喎，勁．．．揹到A仔死死下．．．

之後我地就打算回程了，果時都已經差唔多五點．．．就係呢個時候就發生左事．．．A仔有個同事打黎問佢點解仲未返到中心，仲話佢係今日既DO添呀！！A仔果刻呆左，諗黎諗去都唔知係自己記錯今日放假定係自己係記事簿度寫錯左．．．點都好啦，總知最後都係要趕番去中心．．．我地係咁跑係咁趕呀！最後去番新落馬州果邊過關，搭番架B1巴士返元朗先，再轉的士返山景啦．．無計，都要咁先至可以六點一返到去．．．A仔唯有同同事講佢今日有事所以要遲返，同埋櫃住我先咁啦．．．哈！冇所謂啦．．．我就送左A仔佢返到中心先，再同佢分裝，唔洗佢拎咁多野返屋企，同埋唔洗佢到時拎咁多嘛．．．

我六點半就係中心走人回家了．．．回到家十分累．．．但係因為今日晒左好長時間，所以點都要做一做個mask好好保養一下，哈！聽日都係假期，所以A仔都放假啦，我地打算去中旅社買火車飛呀！我地計劃十二號出發二十一號返到香港．．．共去九天呀！攪掂晒d野後，唔知A仔會帶我去邊呢？希望唔好去d咁harsh既地方啦，因為一來都怕佢辛苦，星期二佢好似要返三節；二來我都近日太累了，加上星期三要見工，都唔想太累，只係想可以好好享受明天既時間．．．其實．．．去濕滯公園都唔錯丫！不過．．．唔知聽日會唔會好多人呢？

>>September 30, 2007 at 2:44:15 PM GMT+8

2007 年 9 月 28 日 星期五 【晴】

嘩~ 今日既時間好充實．．．一朝早十點起左身，之後就沖涼洗頭，攪掂晒之後就乖乖地溫習，溫下今日要見工既資料，同埋睇清楚地圖點樣去法，因為怕會到時”呢hea"就煩喇．．．十一點幾果時整左個公仔麵食，由於屋企個煮食爐壞左，所以要用微波爐丁，真係．．．好難食呀！但係最尾都食左去，因為怕會餓死．．．

跟住一點正就出左門口喇，唔洗兩點就已經係黃大仙落左車．．．我早左一個站落車，行到我死，跟住仲要去搵個死人小巴站，搵到我丫．．．又熱喎，攪到身水身汗．．．好在最尾都搵到，果時已經係兩點三！點知，唔洗五分鐘就落得車，真係xyz@$%^@)....！去到只係兩點四個字．．．係中心門口流連左一陣，兩點五就決定入去！佢係約我兩點九的，我早左咁多去到佢地好似覺得我好任咁，後來都係比我兩點五個半字開始做個written test，唔洗半粒鐘就做好了．．．唔係話求其做架，只不過真係唔係太難做！哈，有溫書架嘛！

之後再等左好幾個字，果個見我個人先至係出邊做完野返黎，佢見我果陣已經係三點九個半字．．．都係問埋一般既問題，唔難答既．．．佢睇黎對我都幾有興趣咁，不過．．．我就對呢份工麻麻地有興趣，問題在於佢要返shift，夜更夜晚放十一點，嘩，即係返到屋企要十二點半了．．．地點又偏遠呢！所以．．．都需要考慮考慮．．．加上，工作性質係主要跟hotline，我又唔係咁喜歡咁dull既工作．．．算吧，人地叫我2nd in先算啦！

見完工之後約左A仔出深水步一齊食tea，本來我地想去KFC度食架，點知．．．總知發生左事啦，我地決定杯葛佢，一於走人去麥記食，哈！食完野我地就各自返家，我回家執野準備明早上大陸，A仔就去剪髮！最後我地再相約七點幾再在元朗集合．．．我地行左三聯書店，再睇好多有關北京既書．．．發現左一本好正架，不過要成百二蚊．．．好似貴左少少咁，不過內容真係好正，完全合我地心意架！唔．．．都係聽日上去大陸睇睇先，如果睇唔o岩既先再買呢本啦！

頭先我地終於初步定好我地既北京行程．．．而家決定會去九日，因為發覺八日真係唔夠玩呀，因頭尾兩日都搭左車了．．．一程火車都去了足足二十四小時零二十分鐘．．．都好既，去多一天可以去多一點地方，唔洗走馬看花咁嘛！咁先至係旅行！

明早又一早上大陸了，所以．．．要訓了！！

>>September 29, 2007 at 5:47:49 PM GMT+8