2007 年 12 月 5 日 星期三 【陰】

hehe~ 琴晚係A仔度過左晚好開心既一晚，因為好耐冇見了，感到好溫馨的感覺．．．好掛住豬豬呀！！琴晚都算訓得幾好，話晒都係一覺訓到天光．．．今朝七點就起身了，真係十萬個唔願起，因為好眼訓呢！之後，見七點四都已經攪掂晒喇，於是就出門口了，因為今日計劃搭西鐵返工，要嘗試一下count個時間，所以都係預早少少出門好d．．．

最後個timing都ok喎，我都係八點五十五分返到公司，準時呀！係朝早由屋企行去元朗西鐵用多左少少時間咁，要二十分鐘先行到去呀！都咪話，都累架！而且人又多，都唔易行既路．．．返到公司，先至食我既早餐，係我係南昌西鐵站時買既，我上巴士時眼訓冇食到，都係訓左．．．半個鐘就到了．．．原來都係比平時行多五分鐘度，都ok丫．．．

今朝繼續上training，不過今日可能搭車都冇點訓過，自然個人醒d，所以今朝training時都冇恰眼訓，呵！好快完左個堂，就同左同事去一間新開壽司店食飯，我食左個定食，仲有discount添，同事有vip嘛．．．同d同事暫時都ok傾到計既，自己dept既同事普遍年紀差唔多，都比較好傾點，而且有d仲係NGO度做過，大家話題都有點可以夾得來啦．．．希望日後可以同D同事夾得來啦．．．

到左下午，都係冇堂上，無聊咁渡過．．．後來，出左去counter，諗住搵同事吹下水，順便可以跟同事學下野丫嘛．．．好快咁就過左一個下午了．．．一放工，我就走左去搭番今朝搭既車，嘗試一下放工搭西鐵既時間如何．．．最終，發覺同我平日搭既方法時間差不多，只不過係要搭三程車，比較有點轉到頭暈咁o者．．．但係又計過，如果下個月買西鐵月票搭西鐵，個車費會比而家搭巴士轉小巴既平好多喎．．．而且，加上我第日入住元朗後，搭西鐵都會係一個比較方便同抵既方法搭返工．．．所以，而家都係嘗試下再計算一下先．．．或者，都想聽日試下搭西鐵返工，係屯門出發．．．

>>December 6, 2007 at 2:06:46 PM GMT+8

2007 年 12 月 4 日 星期二 【陰】

呀~ 有樣野唔記得左！其實琴日係爹地媽咪既結婚周年紀念呀！在此，祝佢地周年快樂！恩恩愛愛！甜甜蜜蜜！．．．恭喜恭喜．．．

琴晚都用左好長既時間先至可以入睡，不過，都總好過冇，因為終於係可以訓得著覺喇，訓到今朝七點鬧鐘響我先起身．．．不過真係十萬個唔願起，因為難得係一晚可以訓番好少少，真係唔捨得離開張床呀！！今日返工都係同樣帶住眼訓既眼上車，一上車就係咁訓．．．本來遲左少少出門口，點知都趕到呢幾日搭果班巴士，好彩！不過，最後去到土瓜灣返到公司時，時間就剛剛好，八點五十五分．．．比平日遲左五分鐘．．．ok啦！今朝同樣係上training，好悶，又眼訓．．．好經辛苦捱過左！十二點半食lunch．．．雖然琴晚嘔過黎，不過都食晒成盒媽媽既愛心飯盒．．．今日個胃冇琴晚咁痛了，真係好彩呀！

下午成日都係一個人坐係office對住部電腦，好悶！好難先過左四粒鐘既時間．．．放工果陣，好快就走人喇，因為今晚要入元朗！心知要用好長既時間車程先可以入到去，所以都好趕急呀！點知去到旺角，眼白白睇住架68x走左．．．個心即時灰左！唉．．．等左好幾分鐘先至有車，點知架死人車又慢又多人上落，攪到個心好急，又唔係好訓到，條腰好赤，唔知做乜．．．一落車就係咁快步行．．．攪到A仔等左好耐，最後都係叫佢叫定外賣先，等我黎到可以快D有野食，唔洗餓親我既愛愛A仔嘛！

A仔今日下午去左睇跌打，醫生話佢膝頭高有塊骨裂左．．．真係令人擔心呀！醫生話都有一段時間去治療了，而且每次既診金十分貴，唉．．．又心痛又肉痛呢．．．不過錢真係事少，只係希望佢快D好番啦！星期六仲要繼續去覆診呀！希望祝佢早日康復啦．．．願主保守看顧佢．．．

>>December 5, 2007 at 1:21:50 PM GMT+8

2007 年 12 月 3 日 星期一 【晴】

唉~ 已經係第三晚失眠了．．．想點呀！好辛苦呀！成晚都係轉黎轉去，完全都冇一刻係個人有熟睡既感覺．．．所以今朝起身時完全唔想起囉，好累好辛苦呀！對眼好似開唔到咁．．．上到車諗住訓下啦，點知都係訓唔到，唉．．．返到公司，成個人都好似呆呆滯咁，好累．．．但係仲要上堂囉，唉．．．

好辛苦捱到下午食lunch，叮左個飯食．．．但係，都好似冇咩胃口咁，完全唔想食，食完又好想嘔喎，極辛苦呀！又好經辛苦上堂，捱到放工．．．放工搭車去到旺角時，本來打算買個包食，因為果刻個胃好痛，我又唔知自己係肚餓定什麼事．．．不過最後都冇買到，係車訓覺，但係又係訓唔到，個胃就越來越痛．．．好辛苦捱到返屋企，覺得超累，係車訓醒果刻就好似對眼再冇能力開番咁喇，所以決定返到屋企要訓一訓．．．

之後，忍住個胃痛咁訓．．．訓到八點媽媽叫左我起身食飯，食完個飯個胃都係一直係度痛！直到九點幾，已經頂唔順了，走左去廁所嘔左出黎，嘔左好多野，頭先食既野都嘔晒出黎．．．真係好驚，完全唔知咩事．．．不過媽媽話我應該係食滯左，因為近日我睇醫生後，食左藥，就唔係好去到廁所了．．．於是乎，下面唔去，上面繼續入時，唔滯都唔得啦！好辛苦，而家個胃仲係超痛，個肚好痛．．．

本來想早點訓，但係個胃仲痛緊，但係又好累，明知要訓下，完全係要有一個perfect sleep．．．但係，我可否擁有呢？

明天決定放工入元朗找A仔，因為佢聽日會下午放假之後，去睇跌打．．．我都擔心佢既情況．．希望冇事啦！

>>December 4, 2007 at 3:03:42 PM GMT+8

2007 年 12 月 2 日 星期日 【微雨】

今日七點就起身喇，不過成晚都訓得唔係咁好，展轉反則咁，好辛苦先至捱到七點起身．．．唉！都唔知點解？係因為我琴晚飲左茶丫，定係因為我對於工作有擔心呢？真係唔知．．．希望今晚可以訓番好點．．．

今日八點九就已經到左土瓜灣，後來見到中心仲未有人返，所以走左去對面間大快活度去個洗手間先再返去對面．．．哈！一返到去，原來新同事都同我一樣咁早，係佢開門架，哈！返到去都係八點十咋，d同事都未返到，最怏一個都九點，仲買埋早餐咁返來．．．都唔知講什麼好了！

今朝十點鐘就開始training，嘩，好多野要記！不過今朝所學既野都唔係太難既，因為有d野以前都識，只係而家要深入少少去認識同理解！到左下午，同事話一齊去飲茶，咁見有機會同d同事聯絡下，都即時話跟住去．．．點知最後成十幾人一圍台飲茶，大家都好親密地坐，哈！又認識多左幾位同事喇．．．不過，都係唔會記得d名！

到左下午返工，因為冇training，所以十分悶地渡過．．．好在妹妹有上msn，同佢傾左陣都好點．．．後來發生左一段好笑野．．．話說我地去洗手間係要上一樓先有，咁我上左一樓去洗手間啦，而洗手間旁就有個茶水間既．．．當我去洗手間時，見到茶水間門外有個男仔，我望左佢一眼，我覺得佢好熟口面．．．同樣地，個男仔又係望左我一眼，都好似感到我好熟口面咁．．．後來，我去完洗手間出來，個男仔仍然係度，佢跟住就出聲話：”係咪city同學仔？”我答係．．．之後大家就相認左了．．．我想起佢係同我同班的．．．不過大家從來冇溝通過，因為大家都唔同組，只係認得對方！後來大家都交換了電話．．．估唔到係新公司會遇到舊同學！

之後，係office好辛苦先渡過完好悶既時間．．．只係度睇document同溫習一下今朝講既條例！仲得閒度抄notes，哈！放工後，約左妹妹去尖咀，陪佢去拎相機，因為早前佢部機壞左！陪妹妹行左一陣，去左marks & spencer同city super，買左個袋比將要從美國回來既表妹，因為佢生日喇．．．希望佢鍾意啦！而自己最後買左本o岩用少少既schdule．．．

聽日成日都係要training呢，好擔心又係好眼訓好悶．．．要早點休息了！

>>December 3, 2007 at 3:45:03 PM GMT+8

2007 年 12 月 1 日 星期六 【晴】

今日好晏先起身，因為琴晚睇”第19層地獄"睇到兩點幾先訓．．．A仔佢睇到半路已經訓著左喇，而我就繼續堅持睇埋落去．．．雖然呢套戲比我想像中冇咁恐怖，不過都係一套幾玄疑既戲黎，可以一路睇一路估下邊個先係主謀．．．

起身之後，同A仔係屋企食左個英式早餐，包括伯爵茶，三文魚芝士加水餅．．．好味！不過d芝士好似三文魚味又唔太夠，芝士味又唔夠香．．．都係食一次好喇！之後，我地係屋企上網，上左you tube，睇左好多攪笑片，笑到停唔到．．．後來，我地五點幾出左門口，因為A仔要返覲塘拎d野，順便約左佢老豆同家姐姐夫係APM食飯．．．我地去左一間叫”家傳滬曉”既地方食，都係食D北方野為主．．．OK啦！今餐係A仔請，因為佢加左人工，但係當然係唔多啦．．．琴晚又係佢請，今晚又係．．．真係為佢肉痛！好啦，下個月等我出左糧就要請番佢食大餐先．．．

食完飯，我地係APM行街，好耐冇黎過呢度．．．我地行左幾個地方！最後，去左吉之島超市行．．．行左好耐，最後都只係買左一盒新鮮藍莓．．．而家人人都興食藍莓，我媽媽先排都買左一盒藍莓乾過我地吃，味道都唔錯！既然係食左健康既，食多都冇壞既．．．

搭車回家時，好好笑，A仔架車本來係早過我開架，點知後來比我架車追上左，之後佢架車就一直都跟住我架車尾了．．．直至去到汀九，大家就各自分開了，佢有佢上大欖，我有我繼續行屯門公路．．．回到黎都係十點零鐘，都OK啦！

聽日要返工了，一朝早就要開始training了．．．好擔心d野好難好多，會跟唔上呀！！唉．．．要好點訓了，養足精神呀！！

PS，琴日A仔買左樣野比我，好好笑架．．．事原係，我去到元朗之後，佢話擔心我會肚餓，於是叫我係佢個櫃度拎個蛋達食．．．我一見到，個包裝十分精美的，係一個蛋達，有一個金色盒包住，仲有絲帶包住添．．．咁我見到咁靚，就好急不及待就打開左喇．．．點知．．．原來係假野黎架！！一見到就覺好膠喇，不過．．．都幾神似的，如果唔打開個盒，只係望一望都幾似架，所以我先至比佢呃到．．．激氣！不過．．．其實又好心甜，因為．．．佢都係為左博我一笑O者，HEHE~．．．多謝你呀，A仔！

>>December 2, 2007 at 3:39:31 PM GMT+8

2007 年 11 月 30 日 星期五 【晴】

今日第一日返工，七點就準時起左身．．．其實琴晚都係訓下醒下咁，唔係訓得咁好．．．個人成日都好怕會唔知醒咁，好辛苦呀！跟住係屋企食左塊餅再食藥，上左59x後就一直訓，訓到旺角先醒！後來去左搭小巴去土瓜灣，時間十分早，九點三已經到左土瓜灣了，於是慢慢咁行去公司，都係九點四已經到了．．．上到去，另一個新同事都未到，等埋佢之後，就由HR既同事帶我地去我地既DEPT．．．

今朝都係主要由我地阿頭講中心既運作同基本admin野，我地將會接受一連一個月既training，會有好多野要學同記了．．．回想起果時係mto做果陣時，大家都係一齊上training，要記好多好多野．．．哈！到左十一點零，阿頭帶左我地上去1/F同3/F認識d同事．．．嘩，好多人呀，成幾十人，真係而家完全一個都唔記得了．．．呀，唔係，有一個舊朋友原來都係同我同一個building做野，不過佢今日冇返工，我只係透過同事知道佢係呢度做．．．我make sure係佢啦，呵！不過相信大家都冇咩合作架喇．．．

呢個十二月都好pack既training，其中包括有兩日要上大陸，參加一個交流營．．．好攪笑，返唔夠一個月就要出trip了，好特別！今日見識過同事既工作，相信都會係幾忙，因為成日見同事都要出去工作，今日好少同事係中心呀！

星期一正式要上training了，一定要養足精神，因為好多野要準備學了．．．加油呀！

放左工，就好急不及待入元朗了．．．因為約左A仔！去到元朗後，陪左佢係屋企．．．後來睇左套vcd，睇完好眼訓，就訓到八點幾先醒．．．醒左後，去左一間新開叫”滿淮庭”度食，係食上海野，都幾ok，價錢好抵！今晚會睇一套新戲，第19層地獄．．．期待恐怖，哈！因為鬼片唔恐怖唔好睇既．．．yeah~

>>December 1, 2007 at 3:51:36 PM GMT+8

2007 年 11 月 29 日 星期四 【晴】

今日天氣冇之前咁凍了，真係好，仲感覺中午時有點熱的感覺．．．今日最後都係去左睇醫生，醫生話我今次d菌好勁，所以食左兩日藥都唔係好得，於是醫生今次都開埋抗生素比我吃．．．希望快點好番啦，因為真係幾辛苦下．．．成日係度咳，d痰又咳唔出，d鼻水又伸唔出呢，唉！

睇完醫生返左屋企，食左藥之後好眼訓，一訓就已經係四點幾了．．．之後就出了發，因為今晚約左兩個好友出外吃飯．．．其中個好友佢去完台北返來，又有手信收了，多謝晒！雖然大家相聚既時間唔長，不過，大家都好開心呀，傾左好多野，講左好多大家既近況．．．大家仲想相約下次一齊去行山添，真係開心！

之後九點都走人了，因為聽日要第一日返工，一定要養足精神的．．．回到家唔夠十點，真係好，可以準備一下明天既野．．．而家有點緊張，唔知聽日情況會如何？又唔知另外一位同我一齊入職既同事係咩人？又唔知d同事會係咩人？．．．好多問號出現．．．希望一切都順利啦，要開工大吉呀！！

>>December 1, 2007 at 3:35:23 PM GMT+8

2007 年 11 月 28 日 星期三 【颳風】

琴晚冇之前咳得咁勁了，夜晚都訓得好左．．．只不過仍然係有好多鼻水困住係個鼻度，伸勁都伸唔出囉，同埋超多痰痰，咳唔出呀！！本來想睇醫生，但係又諗，都好左好多啦，仲去睇咪益左個醫生？睇下聽日點先算啦．．．

今朝十一點起身，不過周身都好累，可能感冒卦，所以膊頭同條頸好痛．．．起身之後，同左媽媽落街食野，食完野去左中銀攪戶口．．．我發覺中銀既服務真係極差，真係差到爆，d人既工作態度同語氣係絕對不能夠接受囉．．．我隔離個婆婆只係同個職員話，佢之前打個電話黎問過一d野，咁果個職員問佢知唔知係邊個，個婆婆話唔知，咁果個職員問佢知唔知係男定女，個婆婆都唔知．．．個職員就好差態度話：”你有乜理由連男定女都唔知架，你點聽野架，你聽覺有問題架？”．．．嘩，如果我係果個婆婆，我一定complain佢到死．．．所以，如果唔係而家迫住要用中銀戶口出糧，我從來都唔會踏入中銀一步．．．真係好討厭！我從來都係比較喜歡恆生既服務，真係唔錯，所以一直都係恆生既粉絲．．．

攪左好耐終於攪好個戶口後，同左媽媽去買送，買完之後，媽媽班朋友又話出去市中心，於是見有時間就陪左佢地出去．．．出到去，佢地一班阿太就去左吉吉島shiseido個counter度睇野，因為佢地想買防曬．．．嘩，佢地d阿太買野真係唔洗睇錢，係咁易又一樣，係咁易又一件咁．．．咁就幾百蚊落樓了．．．真係羨慕死人！我都想買佢maquillage既粉底，因為d粉底就用晒，但係就要忍住手先，想等出左第一份糧先去買！之後，我地就四圍行，後來，大家就各自分手，我就同媽媽再繼續行．．．我係izzue度買左條褲，因為琴日係衣櫃發現自己冇咩冬天褲著返工，所以都係買左一條！之後，同媽媽開始見餓，去左椰林閤食tea，好味好飽！食完再繼續行，但係睇d平野硬係睇唔上眼，d野完全係買唔落手咁．．．算！去美心拎完餅之後就走人回家了．．．

A仔終於去完camp了，真係好，佢話隻腳比起先兩日冇咁痛了，應該係d鎮痛貼有效吧！希望佢快d好番晒啦，因為擔心心呀！仲有．．．計計下，原來都好幾天冇見佢了，好掛住佢呢．．．本來今日打算等佢出camp後一齊出去既，不過A仔佢又累，腳仔又有d痛，而且個袋又重重，所以都係唔好了，叫佢早早回家好過啦．．．而家唯有約定佢星期六我放工後見面了！好期待到星期六，一來因為要返新工了，唔知會怎樣呢？二來終於可以見到A仔喇，好開心呢！

>>November 29, 2007 at 10:55:47 AM GMT+8

2007 年 11 月 27 日 星期二 【颳風】

琴晚終於可以訓番好少少，不過六點半果陣都比波波嘈醒左，請左佢食野之後我都訓番．．．琴晚冇之前咳得咁勁了，不過d鼻水就永遠都流唔出黎，咳又咳唔出，極辛苦囉．．唉！

後來，跟左媽媽出去飲茶，又係飲茶，琴日先好似飲完黎，不過今日同唔同既人飲．．．飲完一點半，我就出門口了，因為今日要出去工聯會簽合約．．．出到去剛剛好三點，冇早冇遲！傾完簽完之後三點九了！出左去旺角，去左家樂商場同兆萬行左一陣，仲去埋izzue同b+ab睇褲，因為發覺冬天冇褲著．．．

今日A仔出發去CAMP了，真係好擔心佢隻腳既情況呀！唉．．．希望唔好痛痛啦，如果唔係我心好痛架！希望佢今次順利平安啦！

行完街返屋企，執左D冬天鞋出黎，嘩，好累！之後，媽媽話同我地落街食日本野，順利為我慶祝搵到份工！真係多謝晒！食到好飽呀！！好味．．．不過，頭先食埋最後一次藥了，都好似仲未好番呀！都唔知點好了！睇黎要再睇多次醫生先得！而家好眼訓呢．．．D藥真係勁．．．

>>November 29, 2007 at 10:55:58 AM GMT+8

2007 年 11 月 26 日 星期一 【颳風】

嗚~ 琴晚成晚機乎冇訓到呀，因為成晚都係度咳，而且又成日都發夢呀，發黎發去都係同一個夢．．．夢見自己對新工作handle唔黎呀！好可怕呢．．．琴晚三點幾時，d風好大呀，我都比d風嘈到訓唔著，所以起左身．．．當時好凍呀！我出到廳見到波波好可憐，凍到縮埋一舊咁，於是我同佢講：波波，如果覺得凍凍既，一陣就入媽媽房度訓啦，知嘛！．．．點知，波波真係咁聽話，走入媽媽房度訓喎，呵！咁佢就會暖d喇，真係好！

今朝我最後都係十一點起身，但係個人就好似從未訓過咁，好辛苦，成個人呆呆滯滯咁．．．點知，我一想出聲時，個人好似啞左咁，完全出唔到聲，如果夾硬出聲時，係走晒音果隻．．．我今日爪左聲呀！成把聲沙晒呢，好慘．．．後來，自己嘗試講多點野，飲多少少水先至可以出番少少把聲．．．初時勁驚呀，媽媽話我因為琴日可能講得太多電話，所以傷左聲帶．．．我估都係喇．．．

之後，媽媽話約左個朋友飲茶，叫埋我去，咁本來我都打算要去中銀開番個a/c，因為新公司要用中銀過人工比我，所以十分麻煩，要開多個a/c．．．於是都落左去．．．點知，飲茶中途A仔打比我，話佢對腳既舊患又出現了，好痛好辛苦，行路仲拐拐下咁．．．真係心痛死我．．．剛好，媽媽個朋友之前剛整傷過手腳，於是我即時向呢個auntie請教佢係邊度睇醫生既資料，希望對A仔有用啦．．．而auntie仲好好，介紹左隻鎮痛貼比我，於是我都買左張諗住比A仔試用，希望佢快點好番．．．

我都知道佢好痛，所以即使佢發脾氣對我，我都冇怪佢，因為我知道痛既時候人總係會情緒唔好的，我明白！只係當時有點氣憤我問佢一句佢寸番我十句咁！後來，A仔話有d野想我幫佢手買，於是我就病病下咁走左去佢中心搵佢睇下點幫佢．．．後來，我比左d鎮痛貼佢叫佢貼下睇下會否好d，點知佢又死人話冇時間去貼，激死．．．而我就去市中心幫佢四圍去搵下有冇護膝買，比佢穩固住隻腳．．．我四圍搵，好彩最後係新都商場一間好細既運動店買到．．．真係初時心急死我，走來走去，氣都喘埋．．．仲有點暈暈地添．．．之後，仲要幫佢去銀行入票，再到我自己去中銀攪野．．．點知，係中銀排左三個幾字隊，原來開a/c係要帶住址證明的．．．shit！所以，好可憐咁就走左．．．之後因為見早，知道A仔當時仲教緊班，,所以行左一陣，但係個人好似遊魂咁，都冇點睇野．．．只係知道唔敢早去到，博三點幾去到時可能佢放緊break．．．點知，三點半去到佢仲上緊堂，於是我唯有放低包野係佢台度，跟住就走喇．．．

返到屋企四點，食左少少包，呢個先係我既午餐．．．之後再食左藥．．．本來想訓覺架，但係又怕A仔中途五點幾落堂後會打黎，所以死忍唔訓住，其實係極眼訓的．．．點知，去到六點幾都冇收到佢電話．．．之後，我唯有打比佢啦，睇下佢睇唔睇到份野係佢台度．．．原來佢好忙，於是我都唔敢阻住佢做野了．．．去到七點，我才好辛苦咁走左上床訓左一粒鐘．．．好辛苦，個人wing wing地，連飯都冇咩胃口食．．．

跟住，十點幾，A仔終於放工，我都一直在等佢電話，想知道佢情況如何，因為真係有點擔心．．．即使佢成日話唔係完全行唔到，但係行果時有點忍忍痛咁．．．我都已經係極度痛心了．．．可能佢會覺得我太麻煩，或者小見多怪，小事化大．．．不過，我都係緊張同關心佢咋，如果唔係我大可以什麼都唔幫佢做，我做乜要今日頻頻泊汨咁呢？都係為左佢o者．．．我都希望佢知道我係著緊佢o者！希望盡量減輕佢既負擔同壓力，希望佢快點好番．．．希望佢明白啦，唔好介意我又長氣又煩啦．．．講真，我自己都病緊，其實都好辛苦架，走來走去，真係個人暈陀陀的．．．我一緊張，衝來衝去時，就最容易氣喘．．．所以中途我幫佢去市中心買野時，都係咁喘住，去到佢中心時，個人真係想暈低架，不過忍到返屋企．．．不過，我唔係要人可憐，只係我都想話我都係緊張佢．．．

聽日同後日A仔都要去camp，本來我都要幫手的，但因為我病了，A仔叫我唔好去，而且我聽日都要去簽約了．．．心情都有點緊張．．．要諗諗要有什麼一定要知道先，費是到時烏烏龍龍咩都唔知．．．而家食左藥好累了．．．但係每當要訓時，我都好怕．．．因為，成日都鼻塞，從來冇順暢過的，好討厭！唉．．．好怕今晚又係白白渡過，又訓唔到覺呢．．．而家都成日咳到死死下，諗住如果聽朝都情況不佳時，都係要去再見醫生一次架喇．．．要早日好番，精精神神咁返新工呀！！

>>November 27, 2007 at 3:07:38 PM GMT+8