2007 年 12 月 16 日 星期日 【陰】

今日第一次返觀塘中心呀！今朝本來打算早點起身返一返去土瓜灣拎少少野過番觀塘用既，不過後來都係起唔到身，太累了．．．所以最後都係決定直接返觀塘算．．．一落車，shit，落雨喎，討厭！我仲差點兒趺到，真衰！返到去觀塘中心，同事帶左我行左一個圈．．．真係好細，係土瓜灣既八份一囉．．．簡單黎講係呢度只有一個counter咁大！唉．．．

之後九點八，我就跟左個同事出去勞資審裁處．．．又係呢度了，呢個星期都不知去左幾多次！不過今次可以嘗試了解到勞資雙方透過勞工處調查主任去和解既過程！都學到好多野．．．完左之後十二點半，同左個同事係旺角食埋飯先返觀塘．．．

明顯地，觀塘真係busy過土瓜灣好多，無論係電話或者walk in．．．不過，我今日都冇咩機會落手落腳去做，因為我覺得始終同事未有信心比我去試住．．．所以今日成個下午都好hea好悶咁過！冇野好做，唯有同同事吹水講笑吧！不過呢度既氣氛真係比土瓜灣既好同free囉！

放工後就約左A仔出左深水步買少少野，之後就一齊返左我屋企食飯．．．食完飯，我就好快手拎左細舅舅送比我份禮物，手提電腦，出黎睇．．．都唔錯呀！真係好開心！又hea左一陣，就同左A仔去山景放低少少野，之後再返元朗．．．

而家好眼訓好累，因為已經連續好幾日唔夠訓了．．．我就死喇．．．聽日相信都會係好悶咁渡過了！

>>December 17, 2007 at 3:14:54 PM GMT+8

2007 年 12 月 15 日 星期六 【晴】

哈！終於係深圳回來了．．．琴日一朝早上到深圳，好在約左個新同事同我一齊上去，如果唔係好傻仔咁一個人了．．．d同事都遲到既，我同新同事八點三已經到左，點知d人一個都冇出現．．．後來，原來傻仔左，我地企錯集地方．．．好在後來比我發現左！之後同左同事一齊食早餐，都ok好食啦．．．想起好似仲未比番d錢個同事添，呵！

食完之後人齊晒，我地就打的去開會地點，貝嶺居酒店！呢間野係近住二奶村，黃貝嶺果頭．．．不過間野係黃貝路架，我地搭的士時個司機初時以為我地想去二奶村，哈，我地再三clarify唔係囉！因為我地既配搭太似係，兩男兩女，就好似兩個女去火車站接兩個男返二奶村咁，呵！

呢間酒店附近都幾荒野下，不過．．．well，都ok咁啦！係果度d toliet唔係咁得囉！間會議室都唔太大．．．係d凳幾舒服咁啦！附近既風景都ok咁啦！

琴日開會簡直係車輪轉咁，好辛苦呀！超眼訓同悶．．．唉！不過，都係捱過左喇，哈！我連晚飯都冇跟同事去，就同左另外唔去既同事打的走．．．本來，我同阿魚hannah三個打的，我地同司機講先去東門再去羅湖，點知個死人司機係都話去唔到，唔肯開車．．．攪到我地好激氣．．．後來好經辛苦先開車，真麻煩！終於我八點前去到東門，可以join到A仔同guyver, joanne了．．．

我地去左鼎泰豐吃飯，好味！食完之後去左附近行街，我就買左少少野啦！joanne就有大收獲喇，哈！之後，我地就去左dup骨．．．去左瑪雅城．．．我整左個中式，正！個膊頭好似好左少少，不過仍然係痛同超梗！好慘！我估可能要去中醫度睇睇先得．．．做下什麼推拿卦！嘩！我地dup足三粒鐘，真係好長時間，不過我覺幾ok，因為都好enjoy呀！

今朝起身時已經係十點了，A仔就一早醒左訓唔番，我就陪住佢啦，一於做跟得夫人！之後，我地去番火車站果邊飲茶！都係食到好飽！食完繼續行街，再去番東門行，行完去左萬象城，又係入左好多食品！YEAH~

六點就返到元朗了，我就回家！回到家，屋企人原來去晒睇戲，真開心！仲係屋企比我發現左，細秀秀送上既手提電腦禮物．．．WOW，不過未有時間打開黎睇，好似係華碩出品！聽妹妹講已經入晒D野．．．

呀，講起禮物，星期五晚收到今年聖誕第一份禮物，就係爹地送比我架！係一條AGNES B既電話繩．．．十分開心呀！好鍾意呀！媽咪妹妹都有，人人不同款．．．三條中，我最鍾意自己果條，我覺得爹地好識得揀比我呀，呵！好多謝佢．．．錫錫爹地．．．

>>December 16, 2007 at 2:27:05 PM GMT+8

2007 年 12 月 13 日 星期四 【晴】

嘩~ 今日係超超超．．．累呀！因為今日上午同左同事去左將軍澳果邊攪勞法講座，之後完左果時都十二點了，順便係將軍澳食埋飯先走．．．食完後，因為今日我有少少唔舒服，所以索性係果頭睇埋醫生先至返中心．．．返到去都已經兩點了，哈！過左一陣，因為今晚會有大單野要攪，所以都要同同事一齊準備下同做下breifing．．．開下會傾下野，就咁就到左五點半．．．權益委員會既主任葉生本來話呢個時間落黎中心同我地再詳細傾，所以我都早少少出去買定d燒賣糯米卷食，驚一陣餓食！後來，葉生係六點先到，大家就開始開會了，一傾傾到七點，大家就準備就緒．．．

d工友陸續黎到，大家就開始今日既會．．．一傾就九點半了，好可憐呀！成十點先至食飯．．．最後我返到屋企係十二點囉．．．

聽日仲要六點幾起身，一早八點三約左同事係深圳度等一齊食早餐呀！！聽日一定眼訓死了．．．一來眼訓，二來真係悶死．．．

不過，聽日約左同A仔，JOANNE佢地係深圳JOIN埋，一齊去玩玩．．．好野，可以RELAX下喇！

>>December 16, 2007 at 2:09:33 PM GMT+8

2007 年 12 月 12 日 星期三 【晴】

嘩~ 今日超忙呢．．．返到中心做左陣野後就出發去勞資審裁處了，因為今日再跟一個同事上庭．．．攪掂晒之後返到去土瓜灣就已經十二點幾了，剛好係食lunch時間！今日我都冇咩胃口食野，唔知點解個人好累好眼訓，所以冇咩胃口．．．最後只係食左一個包同一個滋味杯．．．份量雖少，但已覺好飽了！之後下午繼續hea左一陣，有個同事話帶我地出去沙田勞工處，又係一個學野既好機會了．．．完晒之後就六點了！又開多半粒鐘OT！

今日走來走去，都幾累下，有點周車勞頓既感覺．．．頭都暈埋呀！不過，總好過留係中心咁悶丫，又可以學下野咁．．．本來下午果彈我冇份架，係我自己爭取先至有既．．．有得出去梗係想出啦，哈！

放工係沙田走，本來好想去一趟IKEA食個肉丸，不過．．．冇A仔係身邊，都已經冇咩興趣去試了．．．因為早前曾經同佢一齊話過，下次試果陣要一齊去試架！要守諾言呢，哈！

A仔今日又出發去CAMP了，真係辛苦，琴晚從CAMP回來後又再去另一個．．．唉！近日我都開始有”忙”既感覺．．．雖然始終唔係真係好忙，不過有機會出出入入咁，都覺得有點價值了．．．

明天再有機會出外工作，一朝早入將軍澳做野，之後下午先返中心做野．．．夜晚又要同一大班工友傾野，又要開OT了．．．唉！慘在聽晚一定好夜先返到屋企，冇十一二點都返唔到屋企，而星期六仲要一朝早上深圳開會．．．天呀！近日已經唔夠訓了，個黑眼圈大到丫，絕對可以同熊貓相比呢．．．皮膚亦差了很多很多．．．下個月睇黎要開始做番多點FACIAL了！

>>December 13, 2007 at 2:37:15 PM GMT+8

2007 年 12 月 11 日 星期二 【晴】

真係好，今日一早就出去勞資審裁處，唔洗返土瓜灣，咁就可以遲點起身同遲點出門口．．．真係好好多呢！所以今朝可以同妹妹一齊出門口搭59x，佢有佢去荔枝角，我有我係太子落．．．上到去始創20/F剛剛好9:15，準時到達！今日聽既case其實都冇咩特別，只係睇公司有咩要覆核．．．不過最後公司都比個官插到一文不值，好抵死！個官都幾寸幾有性格架！之後，去左隔離庭等埋個同事，順便跟佢學野，學下點樣跟case同睇下個程序點．．．之後十一點幾就走人回中心了！

lunch去左一間cafe度食，都唔錯，d西餐幾好味，不過係個size細左d咁！下午好忙，因為有個大case出現，我地總動員都要準備隨時要做大單野．．．而家星期五仲要約二十個工友傾野．．．之後去到五點，接左個case，個case好煩好複雜，所以傾左好耐，攪到六點半先走得人．．．咁快就要開OT了！

雖然今日好忙，但係都不忙幫A仔手做野，因為佢琴晚打比我話佢對千幾蚊既NORTH FACE鞋行行下爛左，只係第二次著就咁，個quality好似好差囉．．．今日佢一去完camp就拎左對鞋去整了，而家要等兩個月，真係長時間了．．．

今日都有好消息，就係黎緊星期六日本來要上深圳開會既，不過而家只係星期六攪，八點就會完，可以星期日有番個假期．．．真係好！如果唔係就好似踏蟒兩個星期冇得抖咁架喇，好可憐o者．．．

聽日繼續要上庭，不過就先返中心先．．．真衰，如果直接去咪可以又遲點出門口囉．．．哈！不過算啦，今晚放工就即刻入左元朗找A仔了，因為十分掛念佢．．．係元朗出去都快既．．．

>>December 12, 2007 at 1:34:47 PM GMT+8

2007 年 12 月 10 日 星期一 【晴】

今朝繼續十分眼訓，是關琴晚同A仔傾左好耐電話，所以十分之夜訓了．．．今朝差點唔願起身呢！本來曾經好爭扎，好唔好遲點起身就搭巴士出去，放棄西鐵．．．但係最後都係起左身，趕黎趕去為左搭西鐵，因為可以有得坐．．．搭巴士係分分鐘冇位坐的！

今朝係公司終於有點所為了，上司比左D野我做，就係幫同事入每日既case stat喇．．．真係好，終於有野做了，仲要係好麻煩既野．．．咁樣可以花多點時間丫嘛！我上司都講，本來想唔安排我地十二月上班，因為佢地十二月太忙了，根本冇咩時間去教我地做野同安排我地工作．．．唉，唔緊要啦，我咪當仲係過緊honeymoon囉！不過，而家學既野都七七八八架喇，係差一點好technical既野未學習o者．．．其實，相信只要比自己試多d真係去聽下電話咁，咁樣可能學得快手d．．．而家見到d同事跟既case咁複雜，真係有點擔心呀！

聽日朝早終於可以跟同事出去學上庭，睇下個程序如何，仲有個環境係點．．．有點緊張同興奮呢！加上，聽日終於可以遲點圯身，遲點出門口了．．．真係好！所以今日真係要好好安排早點訓．．．

頭先放工，突然好想去旺角行一轉．．．於是一放工就走左去旺中同新之城行．．．都有收獲呀！買左恤衫同冷外套．．．而家d天氣都睇黎唔會太凍，所以呢d打扮都仲可以著呢！返到屋企八點，剛好吃飯，真係好！今朝我個胃都仲有點痛，相信真係琴日食滯了．．．唉！

A仔佢今日會去camp，唔知佢點呢？希望佢會小心點隻腳腳啦．．．希望佢順順利利啦！掛住佢呢！

>>December 11, 2007 at 2:00:28 PM GMT+8

2007 年 12 月 9 日 星期日 【晴】

今朝七點個鐘響時，真係成個人嚇醒左呀！因為琴晚太夜訓了，真係十萬個唔願起身．．．但係最後都係七點一起左身．．．好快手就出到門口了．．．上到西鐵又冇得坐，好辛苦．．．一上12A就狂訓了，因為太累太累．．．

今朝繼續上堂學野，d野好似越來越深了，好怕到時唔識得用番出黎囉，相信真係要好好實習一下了！到左下午，同左同事去左食台灣野，食左肉燥飯．．．食完後，我帶住同事既”人頭”去業餘進修中心度報一二級山藝加一級攀岩證書．．．點解我要帶同事個”人頭”去？事原係我食lunch前打去問有冇位，之後問佢我係新黎同事，但係未有staff card，會唔會仲有優惠（因為staff會有半價)．．．但係對方答我因為冇證明，所以比唔到我．．．後來同事聽到之後就叫我帶埋佢上去證明了．．．就咁就可以慳番五百蚊了，真係好呀！

下午時間繼續上堂，十分眼訓，飯氣攻心呀！而且d野好難，一叫計數就即時死左．．．好經辛苦捱到完堂！但係，惡夢卻繼續來臨！因為今晚要去聽talk，係一個完全同我地工作冇咩關係既talk，只係因為上邊既人攪反應差，於是叫左我地下面既人去”登”場了．．．於是我地五點半放工後就出左去買個外賣返去吃，點知，吃完後我個胃就開始痛起來，唔知係d野有事，定係咩原因了．．．想了一想，可能係lunch碗飯太肥卦，所以個胃頂唔順啦！

終於捱到七點半我地就過去工俱果邊聽talk了．．．好難捱呢，又悶又唔想聽，個speaker講野又誇張，都唔明點解d人都笑得落，講既野擺明係爛gag黎架啦．．．我個同事佢直澄擺明訓，仲後來鼻塞都出埋添，我地幾驚比人知呀，即刻叫醒左佢！後來，去到九點八都未講完，我果刻又胃痛到爆，所以同同事講早走先．．．之後就返屋企了！去左搭61x，都幾快下，返到去屋企十點九度啦！

返到屋企同A仔傾左好耐電話．．．大家都傾得好開心呢．．．尤其講到我報果個course既內容．．．因為A仔佢之前上過呢個course，所以佢好清楚當中內容同情況！佢分享左好多比我知．．．仲話我知會送一個背囊比我添！多謝佢呀！

>>December 11, 2007 at 1:43:26 PM GMT+8

2007 年 12 月 8 日 星期六 【晴】

琴晚十一點幾就訓了，於是今早十點就醒左．．．起身後就一路睇多啦A夢，一路食早餐，哈！之後，A仔打比我叫我去山景join佢出街，於是我就急急腳換衫了，真係十萬個趕呀，因為佢又話好快就走人，真係激氣，趕死．．．

join佢佢之後，我地就搭巴士出去深水步，點知上到巴士，坐後面有兩條o靚妹由頭到尾大大聲聲咁講野，仲要滿而粗口，十分討厭．．．最後，都係無奈地忍受住．．．相信車內每一個乘客都好想打呢兩條女！！落車後，先去左炳記牛牛食馳名的焗飯，我第一次去食，都唔錯，係等得耐左少少咁．．．食完就去左行街．．．行下行下就行到去旺角了．．．同左A仔四圍睇有冇一D可以保健軟骨既產品，希望佢食左可以等D軟骨生番，可以好番D．．．最後，係屈銀紙度買左D葡萄糖胺．．．希望真係WORK啦．．．我自己就買左樽蜜糖，其實呢隻野一向有食開既，只係近排食晒左好耐冇去買番咁．．．好攪笑，今日A仔係太子果陣曾經打過一個電話比個朋友，之後，大家竟然係旺角相遇，真係有緣了．．．世界就係這樣奇妙！

之後我地竟然行到去尖東站先至搭車返元朗．．．今日真係行左好多路呢，唔坐都唔覺架，一上車就覺對腳開始累了．．．返到元朗，同A仔又發生了一段小插曲．．．唉，大家又嘈了一大場．．．真係好心煩！又喊起來了．．．好討厭！初時真係難受到極點的，因為感覺很差．．．本應想走的，後來大家傾傾下又平伏了心情．．．算吧，都很夜了，返到屋企又係好夜先訓到，算吧！相信今晚都係展轉難眠的了，唉．．．

>>December 9, 2007 at 4:20:48 PM GMT+8

2007 年 12 月 7 日 星期五 【晴】

今日繼續返工，但係琴日因為已經一次過教晒d野，所以今朝同事唔洗再教我地野了．．．不過，今朝就跟左同事開始學點樣跟case．．．好似好複雜咁，真係要好好學習了．．．

之後好快就一點放工了，我就即刻入元朗，因為今日要同A仔去睇醫生呀！今日只係同佢去敷藥，希望敷左會好D啦佢．．．之後，同左佢同超市買野，但係因為今晚要返屋企食飯，所以好早就走左囉．．．

返到屋企，姨媽同二舅舅二舅母已經到左，佢地話要開台打麻雀，咁就叫我同佢地一齊打．．．其實我都今日精神狀態唔係好好架喇，所以最後都係輸左七蚊，呵！

過左陣，表哥，爹地，姨丈都到左，好快就開餐了，食左我係北京買既烤鴨．．．媽媽冇煮埋D荷葉餅，所以冇得包黎食，好似麻麻地咁．．．不過其他野食好好呢．．．所以大家都食得好飽呀！仲有龍眼同番石榴食添，YEAH~~

今日好眼，所以決定十一點幾要訓了．．．

>>December 9, 2007 at 3:43:49 PM GMT+8

2007 年 12 月 6 日 星期四 【晴】

wow．．．今朝失左手，因為遲左到呀，遲左十分鐘先返到去．．．基於今朝係搭西鐵返工，但係預既時間又預得錯誤左，所以造成呢一次既失手，真係激氣．．．聽日睇黎要再早點出門口了．．．好可憐！要早點起身了．．．如果以以前既搭車方式返工，可以七點七八先出門口都仲有十分鐘早；但係而家反而要早多十分鐘出門口先至時間剛剛好．．．唉，真係好難取捨呀！前者可以遲起身，不過車費貴一點；一個要早起，不過就平一點．．．點好呢？

今朝成朝都好悶渡過，因為冇堂上．．．原本今朝係跟一個同事出去上庭既，不過後來cancel左喇，所以就呆坐在office．．．好在，後來突然身痕，走左上facebook，見到A仔送左個big kiss比我後，就突然好有心情去虐下點樣玩facebook喇．．．雖然到而家都唔係好知佢既function，不過都試左玩其他從來未郁過既野，呵！

到左下午食lunch食左媽媽愛心飯盒，食完仲好似唔多夠飽咁．．．死啦，大食左！不過，我死忍口冇再食野，直至放工返到屋企七點幾先至食野咋．．．所以返屋企既車程中餓到個人要死呀！下午後來四點先至再上堂，因為個同事唔得閒有野要做．．．最後上堂上到五點九，遲左三個字放工．．．算啦，今日我都遲左十分鐘先返到去，都應該遲走的．．．今日放工照樣搭西鐵返屋企，雖然遲左走，不過都剛好搭得番琴日果班車，所以可以準時返到屋企．．．

今晚得我同媽媽兩個食飯咋，不過媽媽買左d好好味既現成野返黎食．．．仲有糯米慈食添，好味！今晚A仔去左覆診，醫師幫佢再做多次唔知什麼震波．．．今次A仔話比起上次多左地方痛，不過唔知係心理作用定係什麼，好像冇上次咁痛了．．．聽日佢會再去敷藥，我都會放工後入元朗同佢去敷．．．真係好擔心佢，唔見下佢既情況我都唔多安心呀！唉．．．好在佢今個月既所有外出活動，好似行山CAMP咁，都可以取消或者改到期．．．冇計啦，都要咁安排架喇，如果有同事代替到佢去既就安排啦．．．好在而家十二月佢唔洗點多勞動咋，如果唔係手尾長就麻煩了．．．希望佢多點休息，快點好番啦．．．根擔心之外，亦都好心痛肉痛呀！！唉．．．

>>December 7, 2007 at 1:33:47 PM GMT+8