2007 年 11 月 25 日 星期日 【陰】

wow．．．天氣真係漸漸凍起黎喇．．．今朝起身時都未係咁涼架，但係太陽一落左山，風就開始來了，開始感到有一點既寒意了．．．但係想一想，其實早前在北京時的天氣比而家還要凍得多，自己都可以習慣得到．．．但係因為返左香港後，天氣都十分暖，所以而家突然一凍起來反而唔多習慣囉，哈！

今朝起身時十分唔舒服呢，其實琴日已經係開始十分唔舒服了，已經食左藥先至訓覺．．．點知今朝起身時十分唔妥，其實琴晚都起過幾次身架喇，今朝七點幾時仲咳醒左添，本來諗住打個電話比A仔架，因為佢都一早要出去西貢帶行山，但係最後都冇打比佢呀！！後來真係好頂唔順了，好似七孔閉塞咁，有鼻水流不得，有痰咳不得，連耳仔都塞埋，仲有耳鳴添．．．人地七孔流血而我就閉塞，呵！成個頭部既area都好塞咁，好辛苦呀！最後決定去睇醫生．．．

醫生話我流感呀，好在未有喘得太勁，不過條氣真係唔多順了．．．醫生建議我過兩日要再去覆診，不過我一慣常例都一定唔會去．．．哈，我係一個好唔聽話既patient黎架．．．醫生建議我都係打枝流感針好d．．．係啦，等病好左再去打針啦！食完藥好眼訓，本來媽媽叫我陪佢出去荃灣行既，不過後來都係敵不過睡魔，繼續訓．．．

訓到半路，A仔係山上打電話比我，我估佢可能終於收到我send比佢既sms卦（佢係山上有可能收唔到電話架)！佢知道我病左都好擔心，都建議我星期三唔好去幫佢手添．．．真係唔好意思了，又幫唔到佢手了！再繼續訓，半路又再收到A仔電話，知道佢已經下了山仲上左車準備出番彩虹！本來，佢想叫我陪佢出去旺角行既，不過知我病都係要我係屋企好好休息．．．再訓左一陣又收到電話，果時開始有點激氣，仲要係一個3字頭既電話，初時有點爭扎唔想聽，因為怕係宣傳，後來都聽左，因為怕係有人叫我見工嘛！

聽左之後，原來係工聯會打黎，佢話會聘請我．．．唔知呀，果一刻冇咩特別興奮！一方面我都覺得自己係IN得幾好既，而即使人地唔請我既，我都冇所謂，因為係人地既選擇嘛！而家人地請我，我都相信係神既安排黎既，所以我都好安然接受．．．之後，就將呢個好消息向人宣佈了，先係打比A仔，之後媽咪，再係MSN同爹地，妹妹，仲有個好姊妹！剛好又有個好姊妹打比我，我又順手講埋佢知了，呵！！佢地都好戥我開心．．．我都好多謝佢地！我答應佢地會比心機去做架喇．．．

而家約左星期三下午上去簽約，其實我頭先都想問下人地會offer什麼，不過我一問佢又話簽約時會詳細講．．原來我睇睇個鐘，五點半了，阻住人地放工呢，哈！所以算啦，星期三再問啦，如果到時唔o岩既，唔簽都得架啦，哈！一日未簽，佢都冇野好講架啦．．．不過，聽A仔講，呢度既福利都唔錯，什麼醫療，牙醫一定有津貼，仲有好奇離既有什麼娛樂費津貼，即係睇concert話劇有津貼，仲有結婚會有十日婚假．．．但係，聽講大假真係好少囉，呢方面有點唔開心．．．因為以前點都起碼有十二日，少左真係唔開心呀！唔可以成日計劃去旅行了．．．我會失去至愛既活動呀！！唉，不過而家既然搵到份工，都係要接受，唔通再係咁唔"dair"唔吊咩！都係時候要好好穩定架喇，大個女架喇，要乖乖地坐定定架喇，係咪？

而家突然間話黎緊星期六(1/12)返工，真係好突然呀，冇咩心理準備呀！因為始終放左成三個月假了，呵！好怕唔習慣！不過好在第一日返工是星期六，可以返半日，放一點，之後星期日再放番日假．．．不過真係有點驚驚地呀！好怕唔慣呀！哈．．．

今日開始真係要好好收拾心情了，唔可以再掛住玩喇．．．星期三去簽約時，真係要諗清楚有什麼要問同知呀，因為呢d都係自己有既權益嘛！仲有，而家要做既係，要快d好番呀，唔好未夠返一個月又請假呀！一定要養好身體先得！

>>November 26, 2007 at 12:54:30 PM GMT+8

2007 年 11 月 24 日 星期六 【微雨】

琴晚好夜訓，今朝訓到十二點幾先起身呀！琴晚原來我係開始作病就真．．．今朝八點幾醒左一醒，因為個喉嚨劇痛，又不斷咳．．．好辛苦呀！超多痰痰呢．．．好可憐！後來訓來訓去訓到十二點起身，同A仔講好唔舒服．．．原來佢都有點病病地．．．想番起，大家都確實係佢一個朋友傳染比我地的，真係衰呀！佢一個人病，就傳染晒比兩個人，真係唔抵呀！唔得，要屈佢請食飯補數．．．

好經辛苦起左身，之後A仔即刻沖左d京都念慈奄我飲，好sweet呢！飲完確實好左少少咁．．．而A仔都成日流鼻水，外冷內熱咁．．．好可憐呢！A仔今晚仲要返夜，聽日仲要帶行山活動．．．真係辛苦了！希望佢快D食左藥快D好番啦，如果唔係辛苦死佢了．．．好擔心佢呢！所以決定星期三同四協助佢帶CAMP啦，怕佢辛苦呀！多個人幫手係好點既．．．加上佢冇女同事幫佢手，我當然成為佢最佳既選擇了！呵！

之後同佢食左少少野，四點就同佢一齊出門口，我順手送佢返埋工我就返屯門了．．．返到屋企，我都即時食左一個蛋糕仔，之後都啪番D藥先，因為都好辛苦下．．．有佢眼訓啦，橫掂係屋企都冇乜關係了．．．

今日個人好累，可能病卦！加上呢幾日都好累，成日走來走去，十分頻泊！跟住，聽晚約左個好姊妹食晚飯，有好多野想同佢講呀！！好期待呢！

媽媽琴日同今日都去左旅行，真係開心呀！！我同A仔都plan緊下年去四川雪山既時間呀，因為要夾番個山藝朋友帶我地去呀！！好期待呢！不過而家要做既係，一定要好好keep好自己身體，到時一定要最佳狀態咁去，因為我地去果時都仲要映埋結婚相的，所以一定要身體健健康康，同埋靚靚咁去呀！！加油！

PS，呢兩日好多朋友同我地講會出年結婚．．．一下子好多朋友出年結，嘩，要飲好多餐呢．．．而家數下，三月一個，六月一個，九月一個，十二月一個，跟住到自己十二月結．．．嘩，傻左！唔知仲會唔會再有朋友結婚呢？．．．

>>November 25, 2007 at 10:30:50 AM GMT+8

2007 年 11 月 23 日 星期五 【晴】

YEAH~ 在此再次祝A仔生日快樂！大個仔喇，要生生性性喇，乖乖地啦，知嘛！呵！

今日因為琴日好累呀，四圍走，所以訓到好晏先起身．．．起身後，本來A仔有個朋友話左會上黎幫我地手整埋今晚天使社群AGM既野，點知最後都放左飛機，真係氣死人呀！！所以最後得番我地兩個人去prepare晒所有野，最死既係，我地兩個人包晒二十幾份禮物囉．．．死左！之後，我地仲要落街去拎蛋糕同買埋其他野，真係好累好辛苦呀！！不過．．．其實我地呢一年都冇點做過天使社群既工作架喇，都唔多時間可以投身太多落去，所以都係時候好好補償番架喇，哈．．．

攪點晒d野，我地就預早番少少時間落去場地set定場．．．攪到頭暈眼花呢，太多野要做了．．．走來走去，一頭煙咁呀！！好在，都好順利．．．d人係7點零鐘就到達左，而d食物就準時7點3到左，都咪話，都好大盤呢．．．整個活動中，基本上都係我同A仔擔大旗，做司儀帶活動咁．．．雖然係好累好忙，連野都冇乜點食，不過都係我地以熟能長既工作．．．冇所謂啦，最緊要大家開心嘛！大家確實玩得好開心，遊戲好玩，節目豐富，抽獎又刺激．．．開心死囉．．．

之後，完左個AGM，都係十點鐘，我地仲加多三個A仔既同事朋友上左去A仔屋企再繼續玩．．．我地玩到癲左，初時就玩佢地山景中心版既康樂棋，玩到人都什麼情緒都黎晒，因為玩黎玩去都去唔到終於，十分激氣！最後我包尾．．．之後，我地玩非洲話事啤．．．超癲！佢地諗埋晒d極度變態同低能既懲罰方法．．．什麼四級動作，咀咀，什麼汽水溝啤酒溝水飲，什麼走落樓同看更傾計，走出騎樓指住下面既人大叫：你條仆街咪走，什麼親吻屎桶，錫某人個膊頭．．．好變態哦．．．好在，我都係比人罰過兩次，都唔係太變態既野o者，呵！．．．玩到一點幾，開始玩其他野了，因為大家都再抵受唔住這些變態遊戲了！我地玩了山景中心版既大富翁．．．最後玩到好夜好夜．．．

而家把聲已經沙沙地，個喉嚨有點痛痛，而且開始咳起來了．．．都唔知係玩得勁得滯，定係病左了．．．

>>November 25, 2007 at 10:14:00 AM GMT+8

2007 年 11 月 22 日 星期四 【晴】

今朝訓到十一點先起身，因為琴晚好夜訓，睇埋妙手仁心先至訓．．．雖然果刻好累，但係轉來轉去都訓唔著覺，我估都起碼兩點幾先合得上眼．．．

之後，我就上網睇下明報有冇好工，最後都只係寫左一封信咁大把！！．．．唉，好似之前send晒出去既信都冇一封有回音咁，就連工聯會果度都相信係會泡湯的了．．．唉，有點冇心機吧！唔開心呢．．．比左咁多時間同精神落去完成兩次既面試加筆試，點知最後都冇好回報，真係有點兒灰囉．．．都唔知講咩好了！

跟住一點前就出左門口向A仔屋企出發．．．因為今日約左佢去買聽日天使社群周年大會既物資．．．去到元朗，就同左佢一個朋友飲茶，因為A仔琴晚幫佢個朋友手整段片黎，整到今朝七點呢，十分可憐！所以都唔太夠訓呀佢．．．慘慘！飲完茶送埋個朋友走之後，我地就開始今日既長征了．．．

我地先去左屈銀紙買野，之後再去左萬寧，再去左惠康百佳華潤堂，SASA卓悅天使，日本城，零食物語優之良品，JUSCO十蚊店，一D雜貨店．．．好多好多地方！行到腳都軟埋，好累．．．加上，我今日著左對新既高跟鞋．．．．死左！而家對腳起晒枕，好痛囉！不過，買晒野之後返左屋企，數晒d野有冇遺時，最後都係決定再落多次街買齊晒所有野．．．不過，都係食左個少少既dinner先再落去．．．

之後，仲有大把野食．．．就係要佈置聖誕裝飾了．．．用了差不多兩小時去做，雖然好累，不過好靚．．．好浪漫呀！仲有要準備定明天有朋友來過夜既東西呢．．．好多野做呀！不過．．．好開心！

＊＊＊而家到左24/11零晨12點了，要在此向A仔說一句．．．

　　　　生日快樂！
　　　　　身體健康！
　　　　　　心想事成！
　　　　　　　精乖靈利！
　　　　　　　　樣樣都好！
　　　　　　　　　錫我多D！（呵，好似唔關事架喎．．．）
　　　　　　　　　　　　　　　　　　　　　　　　　　　＊＊＊
　　　　　　　　　　　　　　　　　　　　　　　　　　　　　

>>November 23, 2007 at 4:54:42 PM GMT+8

2007 年 11 月 21 日 星期三 【晴】

今朝送左A仔返工之後就一個人回家了．．．回到家，媽媽表示話要帶點東西出去比姨媽，所以我就咁跟左佢出街．．．點知後來媽媽又話先要去市中心一轉做少少野，於是又跟埋佢去市中心先．．．去到，原來佢約左一大班朋友，之後無啦啦又去左食壽司，仲有個auntie請客添．．．食完之後就同左媽媽出去佐敦搵姨媽了．．．

出到去都已經係五點幾，同姨媽行左一陣街，行行下就行到去尖沙咀了．．．後來，妹妹仲出埋黎一齊添！我地去左city super個food court度食dinner，我食左個好好味既手打烏冬，係咖哩湯底的．．．而妹妹食左個章魚丸餐，d章魚丸好好味呀！食完之後就搭村巴回家了．．．咁就過左一日！

頭先同妹妹又睇開幾本日本既時裝郵購書．．．嘩，好靚囉d野．．．妹妹決定又出擊了，會再去訂野．．．羨慕死！實在有好多野都好想擁有呢，呵！

>>November 23, 2007 at 4:36:53 PM GMT+8

2007 年 11 月 20 日 星期二 【晴】

今朝一早起身了，因為妹妹早前在日本訂回來的東西今朝十點至十一點內會送到家中，於是我要一早起定身，費時人地送野黎果陣成個剛訓醒既樣出黎，嚇鬼死人．．．

終於，份包裹係十點半送到黎，嘩，好大盒呀，唔係妹妹訂得多野，而且佢個箱有三份一係果間公司送既雜誌同宣傳單張．．．其實都幾正呀，因為佢本本雜誌係出邊買都要成港幣三十蚊一本架，佢都送左成五本比我地，又可以慳番．．．而且，仲送埋coupon比我地下次訂野時有discount，真係唔錯！！

我都急不及待打開我訂左既野睇．．．好靚呀！好彩揀中我至愛既紫色比我咋！其實佢係冇得揀顏色架，只係佢果個session時就會係某一種顏色，所以你只係訂左個款而冇揀埋個顏色架！見到太靚了，所以決定今日就著左件新衫．．．

之後，我就整裝待發了，因為今日下午要去A仔中心度講藥物教育TALK．．．我約左佢早少少食個lunch先再講．．．我地後來去左飲茶茶，得我地兩個人，不過都好ENJOY既．．．好抵食呀，兩個人食左唔洗五十蚊，GOOD~ 之後我地就返去準備了．．．心情都有點緊張架，不過一開左波就十分之smooth，而且d細路好聽話，上堂都好留心，仲好有反應添．．．個氣氛十分之好呀！連A仔都讚我講得好好，分分鐘佢同佢D同事都冇我咁既知識同水準呀！！其實．．．真係有點過掌了！

完左之後，等左A仔一陣，我地就好快手返元朗了．．．因為今日有人黎佢度整寬頻．．．飢餓了差不多三個多星期既佢，真係可憐！沒有網上既日子終於可以完結了，哈！不過，果個哥哥仔好慘，整左好耐，由九點整到十一點幾先至整好．．．問題不在於佢，係在於TECHNICAL既問題．．．所以真係幾慘下．．．不過最後A仔都十分開心，因為終於可以上網了，簡直係要慶祝添啦．．．呵！

>>November 22, 2007 at 6:10:46 AM GMT+8

2007 年 11 月 19 日 星期一 【晴】

琴晚無啦啦挑起條根走去執衫，因為天氣凍左喇，都係時候要轉下季了．．．執了好長時間呀，執到傻左．．．因為先排去北京時拎過d冬天衫出黎，之後返到香港又熱番，所以d衫都係求其放番入櫃無理過，哈．．．而家只淨d鞋未轉季o者，諗住聽日繼續執埋佢．．．

今日約左個好姊妹食lunch，我地去左食euro go go，食到好飽飽呀，已經不能夠再吃下去了，呵！我地傾到不知時日過，姊妹仲差點忘記要返工吧，哈．．．之後，我一條友行了一會市中心，見好多靚boot，不過好貴．．．琴日去見工後行旺角都見到好多靚boot，不過真係唔捨得買，對對都千千聲既，唉．．．之後好快返左屋企．．．見眼訓就訓左陣．．．醒左之後再整理多一次聽日幫A仔講talk既資料．．．開始有點擔心聽日既表現呢，哈！怕會吃螺絲吧！而且好像有點資料唔係好記得呢，呵！

聽日會約A仔去飲茶茶，之後再去佢中心度講talk，再等埋佢放工一齊返元朗．．．聽日要同佢一齊計劃下天使社群星期六既AGM流程同遊戲部分了．．．

>>November 20, 2007 at 2:12:44 PM GMT+8

2007 年 11 月 18 日 星期日 【微冷】

今日既天氣好明顯轉冷左呀．．．今朝七點幾就比波波貓嘈醒左，因為佢又係慣例地一朝早跳上我張床度訓，尤其而家天氣凍左，佢更加會搵個暖既地方訓啦．．．有我做佢個人肉暖爐，佢真係醒呀！之後好經辛苦再訓番，十點幾再起番身，跟住媽媽話去飲茶，於是拿拿聲就著好晒衫，執好晒要帶既野，順便諗住飲完茶就走見工．．．

一點多就走人了，之後成個車程都幾順利呀，兩點九已經去到要去既目的地．．．上到去時，原來佢仲有人見緊，我估都係2nd in架喇．．．等左一陣，就有上次見我果個admin女人，仲有一個唔知什麼部門既主管，係一個年紀幾大既男人，有點笑面虎的樣子．．．過程中，又係不斷hor我一d對於工聯會同外間政治上的不同見解問題，真係好q煩，問到我都有點”忟”，後來我都寸左一句：”如果同事真係唔同意工會既原則既話，我會問自己一句”點解我仲會申請工聯會既工囉”．．．”之後，果個人先至冇再追問落去．．．真係煩死！答到我都唔想再糾纏落去！

之後，佢都問到我有關人工既問題．．．我都堅持住我比佢既expected salary．．．後來，佢好似好無奈咁，咁佢就好快手咁問我仲有冇問題，好似想打完場咁．．．咁我就即刻問佢對於我堅持人工方面係咪有困難？佢就又解釋一大餐．．．我就懶係打完場咁，話都希望佢地唔好介意我問咁尷尬既問題！佢都懶係好客氣咁話大家應該坦白的．．．呵！咁就見完喇．．．

講真，得唔得我都唔特別要求，不過當然佢比唔到我心目中既價我，我係唔會做架囉．．．而且，我都將一切交予神架喇，如果神係覺得呢份工係合適我既，我一定履行神既旨意去做呢份工的．．．所以，而家都冇點話什麼擔心或者緊張．．．隨心吧！

好開心，聽日約左個好姊妹食lunch．．．個傻婆約黎約去咁終於約實左．．．哈！希望聽日有個愉快的午餐！

>>November 19, 2007 at 2:40:42 PM GMT+8

2007 年 11 月 17 日 星期六 【陰】

嘩，今日既天氣明顯係凍左，因為冇太陽呀，而且知道下星期開始會凍番．．．真係唔開心呀！我最怕凍架喇．．．今朝十一點九起左身了，其實都好累同眼訓呀，琴晚睇得太多DVD了，而且又行了大半日街呢，都係累架！之後A仔煮左早餐過我吃，吃完之後我地又一次過睇左兩套DVD．．．傻左．．．就黎睇到眼盲，哈！一次過睇埋”玉蒲團第二同第三集”．．．又係快SHORT CUT咁睇，唔洗三粒鐘竹睇晒．．．

之後，又見肚餓，又叮左野食．．．嘩，肥死，食咁多野．．．之後好眼訓，就訓左粒幾鐘．．．訓醒真係好好多呀！太眼訓了．．．之後，A仔就送左我落去搭車，我就一個人返家了．．．返去途中經開投票既地方，順手去埋投票！今次兩個候選人其實都唔太想選佢地，不過只係有一個特別唔想選既就更加推使我去選另外一個，哈．．．是否有點求其？不過都係個人喜好咁O者．．．

明天要去工聯會2nd interview．．．都唔知要再prepare什麼了，好似冇咩可以準備咁．．．我諗今次隨心吧！不過講真，我又唔係真係好十分想做呢份工，始終都好似有點唔知點咁，因為呢度佢好似想人洗腦咁，要成個人都要忠於佢地個會咁．．．個心始終有點不安．．．不過如A仔所講，只要清楚自己既理念就OK架喇，如果覺得有什麼東西係接受不到時，就唔好強出頭去做啦，隨心吧！．．．好一句”隨心”！

而家什麼都唔諗喇，聽日好好見完先算吧．．．要努力呀！！

>>November 18, 2007 at 2:15:05 PM GMT+8

2007 年 11 月 16 日 星期五 【晴】

今朝十點幾已經醒左，之後一直都唔敢打電話比A仔，因為知佢琴晚一定打機打到好夜，所以唔想嘈醒佢呀！不過佢又話約我今日出街街，所以一直在家等待佢電話．．．眼見媽媽同妹妹都相繼出街街，自己一個人在家等，都幾可憐下架．．．不過都係願意等待的！到了一點，佢終於打比我了．．．原來佢琴晚四點幾先訓，但係十二點時已經比佢媽媽嘈醒左再訓唔番，真係可憐！我地都商討左好耐究竟我地今日如何善用這個假期好．．．

最後，我地決定左上深圳行下街．．．我就好快手兩點出門口，去左元朗度等，諗住搭六蚊小巴上皇崗．．．辛苦了A仔，佢兩點半已經去到小巴站排隊，最後我地三點先上到車，即係佢足足等左半粒鐘．．．而我就兩點九先到．．．不過，我都有買野比佢食架！去到之後我地就即刻買左張深圳地鐵既八達通，因為真係橫掂都多上黎，而且成日下下搭車都要留定晒D散紙，成日都要儲定D COINS買飛好煩，乾脆買張八達通方便好多．．．而且發現用八達通係會平少少架，所以．．．都唔錯！

上到去東門，都已經係四點了．．．我地先去左KFC度醫肚，食左一個套餐同埋加多一個新出既三文魚塊．．．WELL，麻麻地啦，係細粒左少少咁．．．十蚊都叫OK啦！之後我地就四圍行街，去左好多地方行，我就買左兩本書．．．之後我地去左東門天虹商場個超市行，覺得果度D野好少，好唔齊，都冇我地想要既野買．．．所以最後決定去購物公園果邊既吉之島行．．．

我地後來去左吉之島既FOOD COURT度食，食左一餐平宜既韓國餐．．．不過都OK好食丫．．．但係叫得多左野，好飽呀！食到捧住個肚仔呢，呵！之後，我地去左超市度行，買左好多好多野．．．呢度先至有我地想買既野呀，所以買得特別多．．．其實都覺呢度幾好行，又唔太多人，又GRAND些，又多野買到，所以都認為沒有什麼必要都少去東門了．．．

最後我地十點先係吉之島走人．．．照樣搭地鐵去番皇崗過關．．．返到去元朗十一點幾啦，都幾快，因為我地冇排隊等小巴了，太多人喇，我地搭左巴士走，貴四蚊，但係快好多啦．．．返到元朗，我地無啦啦好有興致睇DVD，我地先睇左一套叫”伊波拉病毒”，黃秋生主演，係一狩三級片，有色情有暴力咁，而且好多場面都好恐怖，係黃秋生發狂殺人時特別恐怖．．．睇到我呆晒，真係好突兀．．．完場後耳油未盡，再睇多一套，係”玉蒲團第一集”，我未睇過第一集，第三集就睇過．．．我地快SHORT咁睇，一粒鐘就KO，睇完已經係兩點幾了，十分眼訓．．．

>>November 18, 2007 at 2:05:39 PM GMT+8