2007 年 11 月 5 日 星期一 【晴】

嘩嘩~ 今日既空氣質數十分之差，令到我成日都好似覺得唔係咁舒服咁，成日都鼻塞塞，喉涸涸，頭重重咁，都唔知想點．．．好討厭！總之係唔多舒服咁．．．攪到我都赴唔到好姊妹既約！真係唔好意思．．．再約啦！

今日成日都留左係屋企冇出過街，就連本來打算今晚接A仔放工既都冇去到．．．但係冇去係有原因的，因為A仔今朝早打比我話我知佢成晚都訓得唔好！佢因為工作關係，令佢成晚都訓得唔好，成晚都發夢，個腦轉黎轉去都係公司既工作．．．真係好慘！最後六點幾就醒左都再訓唔番了．．．

而我聽到當然十分之心痛啦．．．唉！不過，唔知點解啦，我就好少會發生咁既情況．．．或者我都幾公私分明，我好少將公司既野都帶番屋企既，除非有必要之外啦，否則我都盡量希望工作時工作，私人時間時可以做到工作以外既野．．．當然啦，好多時都好矛盾既，唔到你話帶唔帶公司既野返屋企做同思考！加上，A仔係一個熱愛工作既人，當佢一工作時就可以什麼私人事都不理，真係講笑咁講可以話係”六親不認”架！當然．．．咁樣既態度有好有唔好啦．．．有時我真係有事搵佢時，都可能比佢拒諸門外架！不過．．．我都喜歡男仔係比較有工事業心同拼博既心既．．．哈哈！

希望A仔既工作可以順利處理好啦，咁佢就可以有覺好訓了．．．咁我又可以安心一點啦，唔洗咁心痛佢成日都訓得唔好了．．．所以，都係唔去佢度了，等佢好好的一個人訓個好覺，一個人訓張雙人床可以訓得舒服點既，呵！祝佢今晚可以訓個好覺啦！

近排我成日都周身骨痛咁，都唔知係咩原因．．．成日D肌肉好痛呀，個膊頭同條勁更加BI LI BAR LAR咁，好似唔係自己咁！所以，如果可以有機會上下大陸DUP下骨都唔錯．．．不過，好難同A仔夾時間去啦，唉！真係好累好累呢．．．其實都係舊患黎架喇！唉，都困擾左我好幾年了．．．辛苦辛苦．．．

>>November 6, 2007 at 1:52:20 PM GMT+8

2007 年 11 月 4 日 星期日 【晴】

哈，今日訓到成十二點幾先起身呀！因為琴晚夜訓呀，呵！

起身後，A仔就整野過我食，哈，好味，係炸醬麵，仲有”谷古”飲，好味呀！！YEAH~ 食完之後hea左一陣，就出左去屯門市中心行街．．．因為A仔今日只係返夜一節咋，所以好多時間一齊呀！！我地去左行街，之後又去左PAPAGALLO度買雪榚食，呵！今日用左恆生既CASH DOLLAR買左2杯雪榚．．．都咪話，好大杯的，有兩個球架！計計下好似比起琴日果個雙球雪榚CONE抵食呀，因為今日果個一杯只係$8CASH DOLLAR．．．算吧！兩者都十分好食，而且今日食果個只有朱古力，雲呢拿，同士多啤梨揀．．．當然我就揀左至愛既朱古力食啦，仲係要意大利朱古力添，十分香濃呢．．．正！吃完都十分飽了．．．後來我一個人回屋企了．．．

今晚媽媽煮了很多送呀，十分好味！食到好飽．．．尤其係那些在盞記買的加拿大臘腸．．．好好味，又唔肥呢，正呀！而家十分飽．．．好在呢兩日食既雪榚都係LOW FAT架O者，如果唔係肥死了．．．

>>November 5, 2007 at 1:36:09 PM GMT+8

2007 年 11 月 3 日 星期六 【晴】

今朝早雖然喊左一場，不過．．．我覺係值得的，因為至少可以得個明白，同埋真係分享左好多好多．．．雙方既坦白係十分重要的！多謝你的坦白對待，才讓我可以有更多的反思同反醒．．．

今朝反思完就去左A仔度，佢好好，去左西鐵站度接我，之後一齊返左屋企，食左少少野後，我地就出左街行．．．去左好多地方，行到腳仔都軟埋．．．

今日好開心，A仔請左我食多野．．．尤其係最開心係去左PAPAGALLO度買左個雙球雪榚CONE食，有石板街加芝麻紅豆雪榚，正呀！食完好飽呀！本來，我地打算去”仙踪林”度飲野既，明明記得朗豪坊有一間仙跡岩，再有間仙踪林架，點知唔見左間仙踪林喎，氣死人呀！最後冇得去飲啦，激氣．．．之後，我地去左廟街，我地係果度買左好多DVD呀，果度好多平野，仲有好舊既DVD都有，唔錯！行完都已經十點幾了，所以決定打道回府，一起回了元朗．．．返到去見肚餓仔，A仔就整野食，哈．．．今日完全係比人”包”起咁，什麼都不用做，袋又不用拎，食野又有人請，又有人陪行街，哈．．．真開心呀！

>>November 5, 2007 at 1:29:38 PM GMT+8

2007 年 11 月 2 日 星期五 【晴】

今日發生左件唔開心既事！係咩事？已經唔想再多提了．．．只係希望當事人可以原諒我，因為我真係冇心要令你傷心同氣憤架．．．

原諒我吧！！

>>November 5, 2007 at 1:18:38 PM GMT+8

2007 年 11 月 1 日 星期四 【陰】

今日A仔佢終於要出CAMP了，佢今早打左電話比我報平安．．．真係好安心同開心呀！越來越掛住佢呢，hehe~

今日日頭都係留左係屋企冇出過街呀，係後來五點先至出門口，因為今晚約左好姊妹去葵芳食飯呀！我仲帶埋份北京手信出去添．．．我地join左後係葵芳行街，買左少少野，都係平野．．．我仲去左拎左琴日買既裙，真係開心喇．．．之後，我地join埋好姊妹既男友食飯，去左一間茶餐廳度食．．．味道都幾好！食完之後，我就上左姊妹既屋企，探下佢個囡囡．．．哈，其實係隻狗仔，一隻迷你貴婦狗狗．．．

哈，好好玩，mocha見到我就開心到爆，係咁跳同跑，傻左咁．．．或者因為我身上有伎貓味卦，令佢以為有”朋友仔”係度啦．．．哈！後來，玩到十點半就走人了．．．好累好累呀！本來打算今晚去A仔度既，不過佢又頭痛又累，都係明天去探佢啦．．．希望佢今晚可以早點休息啦．．．乖乖．．．

>>November 5, 2007 at 1:08:24 PM GMT+8

2007 年 10 月 31 日 星期三 【暴雨】

今日A仔仍然在camp中呀，而家天氣又凍又落雨（今晚市區最低得17度咋），真係令人擔心佢地既情況．．．希望天父神保守看顧佢地，讓佢地可以順利平安進行活動．．．

今朝媽媽奘左姨媽出去旺角行街，我地十二點半就去到聯合廣場，點知d舖頭都冇咩邊間有開，於是乎我地去左行花園街，姨媽買左d野，有幾件出口衫，咕臣套，bb衫(因為姨媽個契女，即係我個契表姐，阿jean生左個仔，個b而家2星期大)．．．都係平野黎！花園街真係d野特別抵買！後來，我地行左去椰林閣食tea，食到好飽呀！三個人叫左兩碟炒飯同一個魚柳沙律，差點吃唔晒呢．．．

食飽飽，我地再去朗豪坊，去左k2行．．．因為媽媽星期六要去飲，想買d靚衫．．．大家都血拼了很長時間，又揀又試咁．．．好攪笑！我買條裙就得display，要我聽日去葵芳拎；姨媽買左一件衫同一條褲（本來件衫媽媽都想要的，不過只有一件新貨，所以比左姨媽）；而媽媽．．．本來揀左好幾件衫，但係都因為冇新同破爛左而冇買到，即係冇收穫！媽媽十分不憤呀，呵！後來，決定行番去聯合廣場再血拼過．．．

去左聯合，果然不出所料，大家都血拼左好多野，嘩！相信大家夾埋三個人可以一日內消費左成千幾蚊！勁！後來，妹妹打來又話想出來join我地，於是我地就去左花墟，媽媽話要買花，一路等妹妹一路行街．．．最後媽媽又買左兩盤花，係大果隻呀！仲要買左花生．．．天呀！拎到我丫！跟住join左妹妹去新世紀food court食野．．．

我地食越棧凍檬，正！好飽呀！不過都唔知點解今晚都唔係好餓，可能lunch果餐飽得滯卦！食完之後大家係度傾計，傾左好多野．．．妹妹今日佢好煩惱．．．佢決定今日同某人講清楚一件事．．．不過，妹妹十分軟弱，唔知點去解決事情！唉！希望神給予妹妹信心同智慧去解決事情啦！之後，妹妹想我陪佢行陣街，於是媽媽就獨自回家，我陪妹妹再血拼過．．．妹妹終於買左harry porter本書，好在咁夜田園都未閂門咋！仲陪左妹妹買左好多野．．．而我，最後竟然係i.t買左對ankle boot．．．哈！其實想買好耐，終於睇o岩左款．．一直都睇唔o岩，好唔開心架！而家終於買到了，yeah~

回家時十點半，但係見女人街個站超長龍，都唔知咩事！所以走左上去新世紀總站搭車，同樣係超超多人，好恐怖！後來回到家都十二點幾了．．．原來聽媽媽話佢回程時八點八，但係塞車塞到佢十點半才回到家．．．原來如此．．．

>>November 2, 2007 at 5:27:27 AM GMT+8

2007 年 10 月 30 日 星期二 【暴雨】

唔~ 琴晚因為自己做錯左一件事，令到A仔佢嬲嬲我呀！都係自己衰，對唔住呀！．．．我知道你好好人已經原諒左我喇，我唯有罰自己”渣”耳仔，要記住做錯咩野，以後唔可以再犯．．．！

今日送完A仔去西鐵搭車後就一個人回家了．．．其實係好唔捨得A仔，因為一來知道自己激嬲左佢，二來係佢要入三日camp呀，又三日不能聯絡了，好可憐呢．．．回到屯門，剛好媽媽在街市買野，於是我就趕過去陪佢同幫佢手拎野．．．之後，媽媽講左件激氣事比我知．．．其實件事唔多唔少都同我有點關係既．．．好唔開心呀，點解好似咁多野都係因自己而起架，好討厭自己點解咁大意呀！！真係好事多磨呀！！後來返到屋企，都係好hea咁同左波波玩左一陣，到左三點半就落左街食野，食完野就一個人去左海趣坊行左一陣，去左萬寧買左d零食．．．而家唯有吃零食去支撐自己了，因為真係好多野要煩惱．．．

已經兩個月了，失業了兩個月！唉．．．總係毫無音訊．．．是什麼問題？真係好頭痛！表面好像唔擔心，但實質又點會唔擔心呢．．．？我都好想穩穩定定了，始終跳來跳去都唔係一個好既結果！我更加既係，將要建立一個自己既家喇，更加唔可以再係咁落去啦．．．唉！神何時才有一個合適既安排比我呢？

>>October 31, 2007 at 3:20:12 PM GMT+8

2007 年 10 月 29 日 星期一 【陰】

今日天氣唔多好咁，成日都陰陰地天，黃昏時仲落起時黎，真係討厭．．．今朝起身時都周身唔妥咁，係咁流鼻水同咳，我都心知不妙了．．．唉，好可憐呢！昨晚已經吃了藥，但係都一直吊住咁，都未真正好過．．．唉！訓下又醒下之間，拖到十一點半先至起身！起身時媽媽已經不在家了，唯有一個人煮了一杯即沖南瓜湯，以及叮了四條腸腸食．．．都ok飽既．．．後來一點幾媽媽回來了，佢買了點包，我兩點幾時吃了一個．．．

到左三點幾媽媽去了做gym了，我才一個人找了包餅吃．．．後來，A仔打來，佢知道我冇吃藥，嬲到不得了，我後來乖乖地都吃了餅再吃藥（其實很怕吃了藥後個人呆呆的，好辛苦架！又眼訓，但係真係唔多想訓呢，訓得多個人好辛苦呢．．．）吃了藥媽媽就回來了，買了點麵同餅回來比我！吃了一點後就坐在家看電視！看到九點半就出門口了，因為今晚約了A仔去佢家，A仔佢聽日一連三日會去了camp，所以真係要同佢好好聚聚吧！雖然病了，但都係要去一趟的．．．

今日胃口都不太好，好像吃左好多野，但係其實都係吃得不多．．．心情又是麻麻地咁，都唔知做乜！今日都冇點講過野咁．．．唉！個頭又係好痛了．．．討厭！

>>October 30, 2007 at 2:55:44 PM GMT+8

2007 年 10 月 28 日 星期日 【晴】

今朝起身到我係咁流鼻水了．．．o．．．相信到我病倒了．．．好可憐！

成晚都唔係咁訓得好呀！起左幾次身．．．唉！到左今朝十點半終於忍唔住起左身，不過就好累，好辛苦，係咁流鼻水了．．．嗚！最後都係吃左藥．．．食完十分之眼訓呀！後來訓下醒下之制，媽媽叫左我落街飲茶．．．見又屋企冇野食就跟左佢去飲茶啦．．．又係一大班師奶咁．．．好悶！飲完同左媽媽去買送，我覺得自己好快就會融入左係師奶既生活當中架喇，好似成日都離唔開佢地呢班人咁，天呀！！！

返到屋企見好累就眼左一陣，起身時已經係四點九．．．訓到蒙蒙龍龍咁比媽媽叫醒左落街食野！去左大排檔吃野，我食左碗仔翅同炸兩，好飽！返到屋企就係度hea，到左食飯時候都食唔落野，好死飽！只係飲湯同食送，仲有食左個雪梨！後來，見間房好亂，就的起心肝執房．．．不過而家執到半之半咁．．．唉，妹妹又唔理喎（其實大部分既垃圾都係由佢堆積而來架．．．討厭！）眼見波波貓咁優閒，以前都好羨慕佢，不過而家都唔羨慕了，因為真覺好悶！

唔知點解近日成日都好掛住A仔．．．唔知係咪因為先排去北京時連續九日都同佢一齊，形影不離咁．．．而家成日都見唔到佢就好掛住佢好唔捨得佢咁．．．真係肉麻死！

>>October 29, 2007 at 1:59:00 PM GMT+8

2007 年 10 月 27 日 星期六 【晴】

今朝訓到十一點先起，因為琴晚夜丫嘛．．．同A仔在家吃完早餐後就陪左佢返屯門返工．．．好唔捨得咁送左佢返到中心門口就要分別了．．．一個人回了家！原來今日媽媽病了，所以全家都留在家中，沒有返教會！媽媽佢重感冒，真令人擔心！而家情況仍然唔太好，睇黎聽朝我要帶佢去睇睇醫生了！！

下午回到家，在家hea住睇電視，睇左韓戲”緣份的天梯”．．．都幾得意既一套戲．．．之前未睇過，都覺幾好睇．．．睇完後就同左妹妹出去屯門市中心，一來想陪下妹妹，同佢行下街散下心，二來想找機會同佢傾下心事，希望佢可以輕鬆一點，唔好太大壓力，改善下佢既情緒．．．因為先排聽到佢話醫生話佢有焦慮症，真係令人擔心呀！

我地先去左euro go go食左個tea，嘩，食左好heavy既野．．．我地食左一件濃朱古力軟蛋糕，一個蜜糖雞翼，我又飲左一杯凍忌廉朱古力添呢，天呀，肥肥呀！食完唔敢上磅！之後，同妹妹行左好多地方，買左d野呀．．．其實好耐冇咁去shop過了，哈！係見陪妹妹先至咁放肆！唉．．．

七點就回家，爹地今天煮了西餐，好多好味野，有羊仔扒，有薯餅，螺絲粉，雞翼同生菜．．．嘩，太好味所以食左好多．．．死了死了．．．冇眼睇！越來越肥肥．．．體重直線上升呢！！！！

>>October 28, 2007 at 2:53:37 PM GMT+8