2008 年 4 月 6 日 星期日 【晴】

今日係放假後返工第一天，真係好死眼訓囉．．．唉！今日係中心都冇咩特別野做，都係時不時同同事係度吹下水，講下是非咁．．．我都覺自己有點兒衰衰咁．．．見有時間，所以都上網搵下一d到會服務既資料．．．睇黎睇去，又計黎計去，暫時都會考慮搵明愛餐廳做到會．．．因為都相信佢地會有一定既水準，包括服務同食物水準啦．．．而且，佢話如果係宗教團體訂可以有discount，咁到時死人都話係聖光堂book啦，可以有得平點嘛．．．加上，佢唔止得食物，連fruit punch都有呀，而且價錢十分合理．．．所以都如無意外會搵佢做！

放工後，一條友去左旺角，之後行左一陣，join左A仔，我地去左和民度．．．失禮講句，是次係我同佢兩個第一次去和民食．．．當然，我同其他人都去過不少次，只係未同佢去過，哈，真係唔知點解？我地食完飯後，就上左紫藤，因為今日幫個朋友手做課程既嘉賓SPEAKER，當然，唔係什麼好專業既講座，只係一些既經驗分享罷了．．．完左個課程，我同A仔就各自各回家了，回到家真係好累呢．．．

明天大表哥同表嫂會在黃大仙請食飯，當係佢地之前係美國結婚後在香港補擺酒咁．．．其實都唔可以話什麼擺酒，只係一班親人一齊食餐飯咁．．．睇真點，今個星期真係好忙，差唔多晚晚都唔返屋企食，都係街食．．．O．．．HOW COME?

>>April 9, 2008 at 11:30:55 AM GMT+8

2008 年 4 月 5 日 星期六 【晴】

今朝好早起身，但係琴晚好夜訓，成兩點呀！因為我地琴晚係度睇古靈精探，當然就係用非法的方法去睇到十六至十八集啦，呵！因為實在太緊張了，劇情一浪接一浪的，令人唔敢唔睇埋下集落去，呵！

今日好早出到銅鑼灣，十點三呀，所以我地決定食埋個早餐先至去教會！今日牧師講道既題目係”主是羊的門”．．．當中我真係十分深刻，尤其我想到昨晚發生的事時．．．我再次好有體會．．．真係感謝神！當中我相信神係有加點工夫，希望給予我同A仔有點的回饋！當然，我唔知A仔有沒有回饋或者同我有同一既感覺，我知道神在當中係好希望我地可以和睦相處，當遇到困難時可以嘗試將事情交託予神，透過耶穌基督協助我地渡過薹關，因為耶穌基督就是我地羊羊仔的門了．．．我當中感受到神其實係喜悅我地一起的，亦喜悅我地結婚一事，但係，有時候討論總不免有爭執．．．我地係要學懂如何交託，如何平靜地找出解決問題的方法．．．而且要對神有信心，因為神一定係會行使佢既權力，去幫助我地的．．．

完左教會，我同A仔都自己去行街，我今日又破了戒，食左個好炸既朱扒包，仲有食左好大塊既朱古力曲奇．．．頂！都唔知點解戒口真係一件咁難既事．．．好討厭！同A仔行左好多地方，先行利園個SU-MARK，跟住再行去灣仔碼頭，搭船船去尖沙咀，再行去油麻地，再行去旺角．．．好累好累．．．當中A仔曾經睇中一件東西，本來諗住送比佢的，由係銅鑼灣已經見到，不過‘當時冇打算買，後來去到油麻地同旺角既分店又冇喎，好失望呀！不過，算啦，我下次見到再買比佢．．．

返到屋企同屋企人食飯，傾開訂酒席既問題．．．大家都議論紛紛，真係有點煩惱！後來，我去左元朗A仔度，點知佢又訓了覺．．．好像有點唔知去做什麼的感覺．．．算吧！

放了三天假期，真係開心，不過明天又要返工了，真係有點唔捨得個假期呢．．．

>>April 6, 2008 at 3:20:52 PM GMT+8

2008 年 4 月 4 日 星期五 【晴】

今朝係個朋友度起身都已經係十一點了，琴晚成兩點先訓，好累呢．．．今朝仲要早起，同個朋友一齊落去樓下睇中醫覆診．．．今日發生左一段小插曲，十分好笑．．．只有我，A仔，仲有阿車三個先知的事．．．哈！而家諗番起都好好笑．．．倒轉頭如果我係阿車，我都唔知點同屋企人解釋了，呵！

之後睇完醫生，我地各有各走人了，我就返左屋企，之後同左媽媽去市中心食元氣．．．我覺而家元氣又質數差了，而且真係唔係幾抵食囉．．．我都唔會點再去食了．．．跟住，我去左元朗搵A仔，我地係屋企JOIN左後，再出左去教育路果邊去睇下租衫既地方．．．呢度都睇唔出都有十間八間架，我地都睇左六間左右．．．都暫時心目中有左預定想搵邊間架喇．．．最重要除左價錢外，我地相信果D衫同埋個服務態度都好重耍，因為果間野比我地好好既感覺囉！

但係係屋企，我地之後為左結婚既事發生左一點爭執．．．其實過程中真係好痛心，而且我都係好十五十六，好混亂既感覺．．．其實雖然有刻好唔明白A仔為何要發這樣大的脾氣，亦都唔明白點解佢要做一點咁意氣用事的行動．．．不過，我最後決定唔再懷疑同深究，我主動向A仔提出一起祈禱．．．我希望祈求神可以比點啟示我們如何是好，亦希望神可以比我們信心，忍耐，理智，冷靜既心去處理事件，找出解決問題的方法．．．最後，雖然事件好像暫時了結左，但係，我心中仍有一點不安的感覺．．．唉！我願意將一切都交託到神既手中，希望神真係可以幫助我地啦．．．

>>April 6, 2008 at 3:05:07 PM GMT+8

2008 年 4 月 3 日 星期四 【晴】

wow．．．今日係清明節，所以就要去拜山了．．．今朝終於可以晏點起身了，之後就同屋企人出左去荃灣join二舅舅表哥佢地去拜山．．．嘩，今日真係好多人，真係超煙囉，真係人都癲，好辛苦呀，都不過吸入左幾多濃煙．．．就死！拜完之後我地去左飲茶，今次好特別，係我，表哥同埋妹妹三個夾份請飲茶，都可算係第一次破天方合作吧，哈！之後，表哥同妹妹去左葵芳行街，我就同左其他大人返左美孚，是關我要做我第一次的行動．．．就係．．．脫墨！呢件確實係我咁大個女既第一次囉，好擔心．．．

整果陣，都咪話唔痛呀，我好在都仲忍得住，冇喊出黎，哈！共脫左五粒囉，好慘．．．當然，我好希望快d可以靚女番啦，因為而家d傷口未埋口的，好快結焦，而家個樣好衰囉，哈！不過，其實都幾平，佢計我共四粒既價錢，而家一粒都係七十蚊，都幾平架喇．．．

之後夜晚係表哥度食飯，二舅母既廚藝真係．．．哈，好似從來冇進步過．．．不過，我從來都冇對佢有什麼期望的了，哈！食完就走人回家！

返到屯門o拿o拿聲沖涼執野，因為今晚要去個朋友屋企玩玩呀！成班人好開心的．．．哈，唔知今晚有咩玩呢？

>>April 6, 2008 at 2:54:35 PM GMT+8

2008 年 4 月 2 日 星期三 【陰】

唔，呢幾日既天氣又落雨又凍，真係心情都唔多好架．．．今朝特意係大快活買左個好豐富既早餐，因為知道我十二點至三點既時間要去荃灣做街站，都有排有飯食，於是食定野先啦．．．

十一點半出門口，最後由本來得我同另一位同事出去，到最後有多兩位去，真係好好多，起碼多點人幫手，同埋好玩一點，又有伴嘛，呵！出到去，我地都好落力sell架，而且都好好生意，都唔少客仔，係頭半個鐘，已經有幾個客問我地野了，而且好多人拎左我地出果本勞工法例小冊子添，真係好．．．完左後，大約兩點，我地成班人去左食野，食泰國野．．．我見有好多咖哩食物，好想食，但係我都唔可以食，最後都只係叫左個咸魚雞粒炒飯．．．好可憐！

食完就返中心啦，係車度我訓左覺，返到去落車，都不知幾想繼續訓呀．．．好慘！之後捱住眼訓到夠鐘放工．．．放工後直接返去屯門市中心，因為今晚約左個好姊妹食飯，真係好開心，因為好耐冇見佢了．．．而且大家傾左好多，分享左好多，亦都當中有感動既時候，真係好感恩，我覺得有呢一個咁好既姊妹，我真係好感恩．．．因為我知佢好關心我，好愛我，亦都好願意無條件咁幫助我．．．多謝你呀，涼芬芬．．．

直到回家途中，同另一位好姊妹傾電話，呢位好姊妹都係好關心我，好愛我的．．．都好感動呀！佢為左我既婚事，都好關注，而且都好願意幫助我好多野，係主動果隻架！哈！我好開心同感動呀．．．錫晒佢呀！！頭先個好姊妹又offer左d正野比我，而家結婚果度又可以慳番少少錢了，而且又多左個concept去整送比客人既小禮物，真係好開心呀！！多謝佢！

>>April 3, 2008 at 4:56:48 PM GMT+8

2008 年 4 月 1 日 星期二 【陰】

哈~ 今日繼續返工，都有點悶悶地，因為真係聽下電話，做下月度既統計咁，咁就一日了．．．放左工，約左妹妹去做facial．．．出到去旺角，都係得我一個人，於是行一陣先，而且又未夠鐘．．．之後去左麥記買左兩個包一陣同妹妹食．．．join左妹妹後一齊上左去美容院．．．已經有差不多半年冇黎到了，而家臨到要映相先至黎，都覺好衰下．．．希望要抓緊時間攪好塊面去呀．．．今次做左好多野，因為一定要靚．．．決定跟住係映相前都要每星期黎一次做了，因為要perfect呀！

做完facial，同妹妹去左朗豪坊orbis買野，妹妹一次過買左好多護膚品，當然，我之前都已經買左好多，因為要好好補救了．．．之後我地行上新世紀搭車，點知一上車就見到爹地，於是一齊返屋企了．．．係車大家都傾左好多野，好開心呀！好似好耐冇同爹地咁傾計了，好溫暖呢！

>>April 3, 2008 at 4:41:50 PM GMT+8

2008 年 3 月 31 日 星期一 【陰】

今日係愚人節，但係我冇去愚人呀，亦都冇比人愚．．．

本來今日諗住約妹妹同表哥食飯的，不過表哥唔得閒，或者再約過啦．．．好耐冇同佢食飯了，好掛住佢呢．．．

今日一早就出去了，因為要去上庭，不過好在係長沙灣度上，可以晏點起身同出門口．．．但係今日大塞車，我遲了到，好在個client等埋我o者．．．完左個庭，激到我死，個案主真係．．．煩到爆！我之前同佢講過既，提過佢既，通通冇做到！佢都激到個官死死下，真係火都黎埋．．．我完之後都捉住左佢話左好耐．．．好勞氣！

之後一個人係西九龍食飯，食完之後回中心．．．返到去，有同事因為升職所以請食下午茶．．．四點幾時出左去買，買左好多好味既壽司返來．．．我破了戒，食左刺身同壽司！比醫師知道鬧死！

放工去左行左一陣，買左一盒面膜，跟住都冇咩特別．．．之後回家！今日好累呀！返到屋企又食左好多野，因為媽咪既送太好味了．．．

>>April 3, 2008 at 7:20:00 AM GMT+8

2008 年 3 月 30 日 星期日 【乍寒還暖】

今日落雨，連心情都唔多好咁，好唔開心！已經要戒口，眼見好多美味既野都唔可以食，真係好可憐！今朝早返到中心，無啦啦老細就要我食完個早餐就要過去觀塘做野，真係好呢hea．．．去到觀塘既勞工處，好混亂，d工友好混亂，完全好似唔知自己做乜咁，真係好難攪．．．不過最終都可以十二點走到人，返番去土記！

食完個無送飯後，其實係我自己放得少送同飯，唔想自己食多野．．．之後就係中心做野，都唔多想做野，因為好悶，冇咩特別野好做．．．好經辛苦終於捱完個下午，放工了．．．搭車去到旺角，心血來潮去行左旺中一陣，買左一條平裙．．．之後就回家了．．．

食完個飯，又係要飲苦藥既時候，真係好可憐！真係要買番d山楂餅食先得呀！

今日同個朋友交流左一點結婚既資料，而家都打算係元朗度租衫，因為比較平，而且租還衫都方便，哈！不過，始終都係要搵日去睇一睇先至得．．．另外，當日拍攝果度我都正考慮當中，都仲搵緊資料，因為我都再仔細想清楚！始終有平有貴，真係睇下自己想要什麼既服務了．．．所以要考慮清楚！近日係公司，一有時間都會搵多點資料．．．其實呢份工都唔錯，又唔會話忙到連一點私人時間同空間都冇，又可以得閒上網睇下自己野咁．．．當然，唔可以比老細知啦，呵！所以暫時都冇打算要轉工住，我都幾喜歡而家份工作架！

不過，今日決定左一件事，但係，又唔敢同A仔講，因為怕佢會怪我做事半途而廢，太輕率，太冇自信．．．而且，我都唔知點同佢講好，因為當中有好多背後原因同因素．．．所以而家好煩惱呀！

>>March 31, 2008 at 1:48:19 PM GMT+8

2008 年 3 月 29 日 星期六 【晴】

嘩，今日好早起身呀，因為要一早返教會，有點事工要去做呀！好可憐！琴晚已經十二點幾先訓，而且一個禮拜都已經係朝朝七點起，所以真係好差的感覺．．．不過，今早都八點起了身吧！返到教會很是疲累的感覺，不過都堅持到底！

完左崇拜，同左爹地媽咪去食野，去左食易牙妙手．．．爹地媽咪好好，為左我戒口一事都十分關注，都就得我好勁，好多野都特登唔去食唔去叫，哈！因為怕會引誘到我嘛！食完野，我地就搭車去薄扶林，因為今日計劃去基督教墳場度拜太公太婆，太姑婆，同埋表伯公表伯婆．．．一d我真係就黎唔清楚什麼輩份的人，哈！相信他朝真係可能會忘記吧！

拜完山，搭番車去上環果頭，同左爹地媽咪行永安，真係一個好耐冇行過既地方，不過都係果度買左野，哈，都係食物啦．．．媽媽買左兩樽好貴既蜜糖比我，希望我食左之後個氣管可以好點，健康可以好一點．．．媽媽對我真係好，因為果樽野真係好貴，成三百蚊一樽．．．不過下星期一號開始就會再加價到四百蚊一樽囉．．．好q貴！真係食錢架！

跟住就同爹地媽咪返屋企，返到去個累，訓左一陣，醒時八點再食飯．．．好飽！不過，唔敢食太多，因為要戒口．．我好相信，我好快可以減到肥，哈，因為好多野都唔再食得嘛！真係希望可以雙管齊下啦，yeah~

>>March 30, 2008 at 3:06:56 PM GMT+8

2008 年 3 月 28 日 星期五 【陰】

今日係公司都幾辛苦，因為朝早冇咩好做，放工後就同同事食飯，食完就開會，開到四點三，真係辛苦死，好累好累．．．完左個會我就去左佐敦，因為諗住去睇中醫．．．早前一個朋友介紹我去睇，話個中醫醫皮膚幾好，因為我近日心口同背脊好多粒粒，所以好想係結婚前可以攪掂晒去．．．

妹妹好好，佢都今日開ot呀，佢放工後都走左黎陪我去睇．．．睇完之後，哈，大件事了，醫師話我肺虛，個腎，脾臟，仲有消化都差，而我d粒粒就係因為我個肺弱同埋食得太多氣喘食崏類固醇所致．．．醫師話，佢好有信心，可以用一年時間幫我既氣喘斷尾，而粒粒問題會因為個肺問題改善左而自然好．．．今次佢一次過開左七服藥比我，承惠二百七十蚊．．．講真，咁樣散計其實都算係平，不過，長遠去計計，嘩，一年要成一萬四千蚊囉，天呀！真係好q貴．．．而且心想，都唔知係咪真係work，又唔知個醫師信唔信得過．．．於是而家決定，都試番三個月先，睇下情況有冇好轉，有既就繼續睇落去．．．始終我都好想個氣喘問題可以真係攪掂去．．．

不過，今次睇一睇中醫，除左好貴之外，都唔少犧牲！就係我要戒口了．．．好多野基本都唔食得，例如辛辣，海產，生寒，奶類，刺激，零食，對皮膚有影響既食物．．．唉！真係心想，人生已冇晒樂趣了．．．其實，我都好愛吃食物，尤其係甜野．．．醫師話，所有呢d要我戒口既野，都係希望對我氣喘病有幫助，如果我聽話既話，佢相信一年內一定可以同我斷尾．．．唉！不過，好可憐呢！雖然，我都係打算keep fit架喇，不過都未至於諗過要戒口戒到咁既地步．．．好慘慘呀！！唔得，一定要堅持的！

而家每日都要沖一杯藥粉飲，我份人最怕飲苦茶的，而家真係一個大既突破！唉．．．好可憐的感覺．．．不過，一定要堅持到底，因為如果係得既話，我都想可以做到．．．

>>March 30, 2008 at 2:59:19 PM GMT+8