2008 年 2 月 26 日 星期二 【陰】

嘩，今日好早起身呀，七點就要起身了，因為要返土記．．．返到土記先知道我上司係咁打比我，叫我原來唔好返土記．．．SHIT！算啦，我係咪都要返架啦，因為又要同同事交接跟住落黎幾個月既工作，同埋今夜又要返山藝．．．

今個朝早都忙，因為都好多電話同有人WALK-IN．．．下午都係食左個燒味飯，係中心睇電視睇財政報告．．．個報告暫時都未好實質惠及於我，哈．．．不過惠及到A仔都係好事！下午食完個飯都訓左十五分鐘，真係好好多．．．跟住又繼續工作，好多電話同WALK-IN，我自己又ENTERTAIN左一個客，佢十分長氣．．．好在後來都終於可以解脫得到，但係都已經比佢攪左我成四十五分鐘．．．SHIT！跟住同左同事交接工作，因為我返番去土記後要FOLLOW UP之後既會員同統計資料．．．都有點擔心，因為好怕對於同數字STAT.有關的東西．．．

終於捱到五點半，好眼訓呀，同同事吹左一陣水後，五點九開始係度訓覺，好辛苦，訓到六點半度就起身了．．．事實係訓左陣係好左一點既！不過都係好累好眼訓．．．曾經有衝動想今晚唔返學，不過最後都係去左．．．六點九就係中心走人，行經M記先至買野去食．．．

今日課堂我覺都悶，因為係講一D山中意外．．．其實有基本COMMON SENSE既野，同埋讀FIRST AIDS時都知道既野，所以興趣不大．．．加上講者唔係太吸引我去聽呢，所以成日都係恰眼訓．．．不過我都有聽書架！下星期三要考筆試了，都有點擔心，因為始終自己對於山藝既知識有限呀，又唔知會考D咩野喎，真係唔知點好．．．而且又忙，要我去做下功課都可能冇時間．．．不過好在問過A仔黎，佢都安慰左我，同埋都大概講左個情況我知，咁暫時都安心左少少咁啦．．．

好眼訓囉，一上車就係咁訓了，訓到落車．．．返到屋企媽媽整左野我食，好好味，不過唔敢吃得多，怕肥肥．．．而家要好好控制食量了，唔可以再唔節制架喇．．．唔可以胃食呀，哈！不過，三月開始離開觀塘，相信會好一點的，因為唔會再定時有下午茶吃，哈！而家係觀塘，日日差唔多五點度都會有面包西餅呢D咁既野食，唔肥就奇啦．．．不過又好難既，係難忍口之餘其實去到呢個時段都通常好肚餓的，所以一定會食囉，哈！可能返到土記唔係食呢D做TEA，係食其他野既都死，唉！琴日咪同個朋友食飯既，佢都話我好似肥左，係事實丫，起碼肥左六至八磅囉．．．而家我都唔敢再上磅架喇，因為冇眼睇！

>>February 28, 2008 at 3:56:22 AM GMT+8

2008 年 2 月 25 日 星期一 【微冷】

今日好累呀，今日返工都冇咩精神，不過同樣係好忙．．．亦因為有個同事病左，所以我同另一個同事就更加忙於處理工務了，少左病者幫手嘛．．．不過都冇計較既，因為我都好清楚知道病係好辛苦架．．．我自己都其實近日精神好差，成日都唔夠訓之外，其實睡眠既質數都係唔好多，有時都訓唔著覺既，好慘囉．．．唉．．．

今晚放工後就直接出左去太子果邊，行左陣街，之後就join左A仔，因為佢今日帶班細路去參觀紫藤．．．於是我都跟埋去一份啦，一來都好耐冇上過去了，二來內容好吸引，因為佢會請一個姐姐仔現身說法，三來亦都想順便探探係呢度做社工既朋友．．．果然，個內容都好豐富，個姐姐仔都分享左好多野比我地知．．．而且D細路都好多野問，其中有一對孖仔特別聰明成熟，但係佢地只係讀緊中二，真係正．．．

完左之後，同埋朋友，A仔食飯，傾左好多心事．．．過程都有喜有悲，好感動既過程．．．之後，就同左A仔返元朗了，好眼訓呀，因為琴晚又訓得唔好，今晚仲要夜訓，返到去都十一二點了，SHIT．．．

>>February 28, 2008 at 3:56:10 AM GMT+8

2008 年 2 月 24 日 星期日 【乍雨乍晴】

今日簡直係十個唔願起身囉，好辛苦，好累，好眼訓呀．．．．

起身時又係周身骨痛咁，真係可能要去學人做推拿先得喇．．．好想去dup骨呢！返到中心都係冇咩特別咁渡過左一個早上．．．下午又係大魚大肉咁同同事食飯．．．不過我已經十分控制，近日真係食少左野喇，因為想減肥，唔敢食得太多．．．

今日妹妹佢病左，真係可憐！但佢本來今日打算去買禮物比一個朋友做生日禮物，咁因為佢病左冇返工，所以我放工時代佢去左MUJI度買禮物，我自己又順手行下咁，最後買左D小食啦．．．不過近日行街都冇咩特別野想買，可能因為天氣都係凍啦，但係見到出了春裝都冇動力去買囉，因為都有排冇得著．．．而見到D季尾貨又冇想買既衝動喎，可能見都唔會著得耐，又要等下年先有機會著．．．都好既，順手當慳番D錢嘛，哈！

今日係公司都曾經計過結婚既錢黎，真係唔少囉，真係頭都痛埋呀！唉．．．真係好擔心唔夠錢呢．．．而且，原來諗諗下有好多錢係我之前未計算到架，真係想死．．．好多UNKNOWN係度呢．．．

今日有樣開心野，就係A仔好主動同我講想EASTER跟我返教會．．．不過可惜丫，撞正佢要返工呀．．．唉！算啦，我相信天父神知道你係有心就得架喇，最重要係不時記住要祈禱！我近日都祈多了禱，為了很多事而祈禱！其實，近日個心都平靜了很多，很時安慰．．只盼自己精神可以好一點吧，因為真係近日太唔夠訓了，個人好辛苦呢，個頭常常痛，又暈暈地咁，精神不在狀態，好痛苦的事呢．．．於是今晚決定早一點訓了．．．

>>February 25, 2008 at 1:14:23 PM GMT+8

2008 年 2 月 23 日 星期六 【颳風】

琴晚同A仔傾計傾到兩點幾，發覺大家自從小ME既事後，對於宗教既想法有著好大的改變同推動．．．我完全認為小ME既出現係一個好奇妙既神蹟，因為當中實在有太多好奇妙的東西出現了．．．尤其係A仔既態度同想法既改變．．．無可否認，我好感激小ME的，因為係佢令大家有所領悟同改變．．．佢真係好偉大，所以佢今次係光榮離開的．．．好感激小ME！

今早同A仔一早起身，我返屯門佢去返工．．．我跟住就JOIN左屋企人出去返教會．．．因為教會要裝修，於是乎今日崇拜既地點唔同左．．．雖然係範圍細左，不過大家又可以CLOSE一點吧，氣氛都唔錯丫．．．我都不時有為小ME同A仔一家人祈禱，尤其係為A仔而祈禱，希望神可以繼續帶領A仔真正的信靠依靠神．．．其實，我真係好開心聽到A仔同我講佢希望可是信主！因為由一個從來自說自己是”無神主義者”，到現在表示因為在經歷當中親歷一些情況而有所領悟．．．我真係好感激神，我相信亦認為神在當中係落左唔少既工夫係度．．．於是，我真係好希望終有一天，自己可以係自己既教會度行婚禮．．．唔知，我既願望可否成真？

返完教會同左妹妹去行街，因為妹妹要去買野，順便希望可以輕鬆下心情，睇下野咁．．．之後返屋企食飯，食完飯之後就落左去蝴蝶灣，因為A仔今晚係果度攪活動．．．我JOIN左佢地一陣，不過都冇咩特別，悶悶地咁，仲要冇人陪我返屋企，激氣．．．不過算啦，知佢要做野，都係做野要緊既．．．

>>February 24, 2008 at 4:11:44 PM GMT+8

2008 年 2 月 22 日 星期五 【微冷】

今日早了半小時走，因為今日要為小me進行告別會．．．我地在屯門西鐵集合，都有幾個義工朋友來了，佢地真係好有心．．．之後，其他就係我地既親友．．．一共十個人，真係好開心大家既來臨！

成個告別會主要以基督教形式進行，我地先由該公司負責人協助了解整個過程，之後再到一個會談室，與小me見面及與親友傾談．．．在會談室中，A仔先行致辭，之後由我帶領祈禱！其實，我琴晚成晚都唔係好訓得著，因為我就係諗下點樣可以讓個氣氛可以冇咁悲，於是我都打算以基督教形式進行．．．點知，唔知係咪同A仔心靈相通 ，佢都係咁諗．．．但係最後，個過程都好似好悲咁，因為當中都有唔少人有喊！喊得最勁既係A仔既一家．．．我反而比我心中想的來得冷靜理智．．．或許因為宗教既關係，我認為小ME一來係唔想見到我地傷心，二來係我知道佢將會到達天國，一個好快樂既地方，果度會有天父睇住佢，佢可以無憂無慮自由自在的生活．．．是一個較積極既想法．．．

完左個過程後，我覺得自己最心痛一刻係看住佢入左個火爐，之後由A仔按制火化．．．那一刻我都確實再忍不到眼淚．．．但係我同妹妹都仍堅持一同為小ME而祈禱．．．跟住，大家都各有各走了，我同媽咪妹妹去了滿記，因為想吃點甜的去緩和下心情，之後就回家了．．．同爹地媽咪妹妹出左去食飯，食完飯就去左A仔度，因為想今晚陪住小ME．．．實際我地已將小ME的骨灰帶左返A仔屋企度，將佢放左係一個玻璃櫃入面，旁邊放左好多玩具公仔同佢飧相，陪伴住小ME．．．因為，我地認為小ME係我地既家人，佢一定要返屋企的．．．

而家心情都好了一點，因為始終認為我地要對小ME有信心，因為我地認為小ME既來臨係一個任務，就係要讓我地有所領悟同得著．．．小ME，你做到了，你好叻叻呀．．．你記住去到天國要乖呀，聽天父既話，唔好曳曳呀！知嘛．．．得閒就看守我地啦，我地永遠記住你架！

>>February 24, 2008 at 4:01:49 PM GMT+8

2008 年 2 月 21 日 星期四 【微冷】

今日發生了一件我相信我將永不磨滅的事．．．小me已經離開了人世！

下午返工中途突然收到消息，得知小me情況不妙，於是乎即時向主管表示要早走，跟住由觀塘搭的士過海去天后．．．去到醫院，知道小me喘氣喘得不得了，需要以氧氣罩協助呼吸！那一刻個心真係痛到不得了．．．但見到小me仍是努力地動，很想很想走出來要我地抱抱摸摸咁．．．突然間醫生一看，發現小me情況急轉直下，即時作出急救．．．最後，小me於晚上七時左右正或離開了人世！那刻個人好像傻了的，不知如何是好，只懂得喊．．．喊完又是再喊！對著小me的身軀，個心只懂痛．．．不過，我都不斷叫自己要冷靜面對．．．最後，亦都為小me安排好了明天進行火化，正式告別小me．．．

走既時候，我個頭真係痛到好像要爆一樣，仲有些暈暈地，可能因為喊得太勁了．．．最終一個人回家，因為男友同其家人同樣傷心，佢都需要處理家人情緒以及再進一步的跟進．．．我是明白的，我不會怪佢冇照顧我，因為佢都同樣傷心，同樣有好多人和事需要處理．．．

返到屯門，因為太辛苦了，打左個電話落黎接我返屋企．．．返到黎都係冇咩胃口食野，食了兩啖面就冇食了．．．又喊了一大餐．．．唉！但喊完後又想清楚，其實小me只係早了一步到了天堂o者，我地好快會在天國再次相遇的．．．

小me，在此願你可以主懷安息！

>>February 24, 2008 at 3:52:19 PM GMT+8

2008 年 2 月 20 日 星期三 【微冷】

其實我近排都好多感受，尤其係當我將小ME既事向其他朋友，同事等講時，希望佢地可以伸出援手幫助小ME時，果D人竟然係用一D冷言冷語對待外，亦會覺得我地呢D係一D好無聊，好傻既行為．．．當然，我聽到果時都唔多開心！我心想，你唔捐錢咪算囉，最多咪唔好出聲囉，但係反轉頭仲要去揶揄別人既行為．．．但係，我而家想得好清楚．．．1. 我終於清楚知道邊D係真正既朋友，邊個係真正既好人；2. 我終於明白什麼係"道不同不相為謀"既道理，人地只係同自己唔同想法同理念O者，加上有D人真係冇養小動物既經驗，可能唔明白什麼係愛心，唔明白小動物都係有佢地既生命同生存權利．．．所以，我係唔會怪一D無知既人！．．．或許，我咁樣想，我會覺得開心一點囉．．．

不過當然，在這段期間，我亦感受到原來這個香港，這個世界係仲有好多有心人的．．．眼見瀏覽小ME個BLOG既人越來越多，眼見越來越有心人樂意為小ME出一點綿力，提供協助及意見．．．我真係十分之感激之餘，都真係唔知點報答這班人既好意．．．我都只能夠不斷代表小ME去多謝咁多位哥哥姐姐既幫助！初時，真係十分無助的，即使而家都有一點”今日唔知聽日事”既感受，因為始終小ME既情況雖然為穩定，但係一日醫生未說”好轉”一字，我都係十五十六咁既感覺．．．當然，我知道我要堅持下去，唔可以放棄同鬆懈的！但係，過份的擔心及執著卻未必係一件好事．．．凡事向好的去想，這樣對自己對其他人和事都係好的．．．

一個人人可能以為小小的經歷，卻令自己有大大的改變同得著．．．這個相信亦都係我咁大個女第一次咁深刻的體驗！亦都令我感到”人間係有愛”的．．．因為我相信，神愛我們，我們才會懂得互相相愛，亦會將愛帶到身邊每一個生命當中．．．正如小ME一樣，佢好幸運，不單得到我地既愛，亦得到其他有心人既愛，佢咁幸福，佢一定好快好番架，而且，神一定會眷顧佢的，神一定會為小ME安排一個最合適的結果！我地要相信神，依靠神，對神有信心哦．．．

雖然，而家距離我地要有既款項仍有一段好大既距離，因為我地預計真正到小me好番晒出院時所要花既錢應該都要數萬元．．．但係而家只係籌到數千元．．．不過，我地會繼續努力，同埋係唔會放棄！即使係因為為左處理小me既情況，我真係放棄左好多，包括：睡眠時間，工作時間，金錢，甚至乎結婚既事務．．．不過，我一定會令自己所失去同埋放棄左既野唔會再繼續冇落去，我會無論點都會想盡辦法做到最好為止．．．希望各位好友可以繼續支持我，無論係精神上支持我，或者係真係可以出一點點力，幫助小me的經費．．．我都已經十分安慰的了．．

>>February 21, 2008 at 2:14:49 PM GMT+8

2008 年 2 月 19 日 星期二 【微冷】

今日基本上返工都係大部份時間做左小me既野，而少部分既時間係真正咁工作．．．我唔係偷懶，而係小me既工作實在太多了．．．其實我呢幾日都好累好唔舒服，因為仲係病緊，加上每月一次果d又來了，特別辛苦呢．．．個人又唔夠訓，精神又唔好，真係好想死．．．

今日一放工我就即刻走人了，因為約左A仔同朋友去探小ME．．．去到天后MTR門口等A仔時，遠遠見到A仔，好開心呀，因為好耐冇見過佢了，因為大家都係小ME的事而忙碌，而且又要返工，所以大家近日都少了見面，更少了交談．．．點知，A仔佢一見到我唔知點解就攬到我好實，我果刻好突然！不過，我當中感受到A仔係有點唔妥的，我相信佢呢排真係有好多感受，我知道佢係好辛苦的．．．我真係好擔心佢，因為見佢常常仇眉苦臉咁，我知佢好多心事．．．但係，佢就係一D唔喜歡將心裡面既心事講出黎既人，於是我更加擔心！唉．．．我都不時同佢傾計，希望可以令佢開懷一點！真的，我相信，我地而家要做的已經盡力去做，無論係做好小ME個BLOG讓更多人知道；處理善款；聯絡有心人；向醫生了解小ME情況；向各位資深養貓人了解貓貓情況．．．同時，醫生都同我地一椒已經盡力做到可以做的東西！而家唯一的看小ME自己的意志同抵抗力了．．．當然，作為小ME的媽咪，我一定無限量支持同鼓勵佢的，我會永遠愛佢，希望佢都會感受到！既然如此，我地能開懷一點的，這便是對小ME的最大鼓勵了！對自己，身邊人，小ME越大壓力，其實未必係一件好事吧！要堅持．．．明天會更好的！

探完小ME，醫生都係話佢情況穩定，但係肚瀉問題而有所改善了，這是十分欣慰的事！我地希望小ME既情況可以續步改善啦！小ME，你要加油呀！

現在，我想為小ME同A仔代禱：”親愛既天父神呀，希望你行使你既大能同大愛，繼續保守看顧小ME，給予佢信心同更強既意志去對抗病魔．．．同時，亦希望天父神保守A仔，給予A仔信心及健康既身體，去應付往後既難關同挑戰！另外，我亦好感謝神，一直以來都協助我地，讓咁多有心人幫助小ME，協助我地，讓我地過程得以順利及平安！在此，我希望天父神亦會仔博所有有心人，給予佢地平安同福氣，因為，我相信只有他們懂得愛，神更會更愛他們！以上既祈求係靠主耶穌基督既聖名而祈求，誠心所願！”

>>February 21, 2008 at 1:52:13 PM GMT+8

2008 年 2 月 18 日 星期一 【微雨】

今日天氣同樣好了好多，冇咁凍了．．．真係好！不過今朝十個唔願起身呀，好辛苦！可能d藥仲未散得晒，所以個人好累好累．．．返到中心一直都好眼訓，不過又有好多電話要聽，所以有時尸３到合埋隻眼咁聽同答，哈．．．

到左lunch同同事去左食雲吞面，我都食唔晒，可能病所以冇咩胃口．．．之後返到中心仲有半粒鐘，所以即時訓番個靚覺，good~ 醒番之後個人都仲係好累，因為食左藥關係．．．跟住不時都食晒，因為同事有好多野請我食．．．又食雞蛋仔又食金莎又食新鮮出爐既面包．．．好飽呀！好經辛苦捱到去五點半放工，真係超超超眼訓．．．

上到車，就係咁訓．．．不過車程中有好多電話，妹妹啦，好朋友啦，A仔啦．．．所以訓下醒下咁．．．A仔話我知小ME今日情況只能以穩定來說，不過醫生話佢琴晚特意番去睇小ME，佢都有企起身，仲叫醫生同佢玩．．．不過玩左好短時間佢就覺好累了，之後又係不斷訓，有時仲訓得好熟，點叫佢都唔醒，要拍佢先可以醒到．．．其實，之前聽A仔一個係愛護動物協會做既朋友講，一隻貓貓已經貓瘟左一星期多都未好番，其實都十分之危險的，佢都叫我地要做定心理準備！不過，我地係唔會放棄的，一定會盡力咁去做！

頭先返到屋企，見到波波貓佢好似有點病病地咁．．．我都好擔心會可我帶左D貓瘟返黎傳染左比佢．．．真係好擔心呀！希望唔會有事啦．．．

>>February 19, 2008 at 1:27:39 PM GMT+8

2008 年 2 月 17 日 星期日 【微冷】

終於天氣好了點，今日最高溫度有成十八度，都唔錯呀！不過，我卻病倒了．．．好慘！一早起身已經好唔妥，又流鼻水又咳又頭痛，仲超鼻塞添呀，好慘！後來都係請左病假．．．一直訓，訓到十二點幾就去睇醫生了．．．之後返到屋企，食左藥，又繼續訓，訓到四點九起身，因為約左妹妹今日一齊出去天后探小me，所以雖然好眼訓，但係都要撐起身．．．好辛苦！

出到去，同妹妹時間夾得剛剛好，之後再join埋A仔家姐一齊去．．．醫生話小ME今朝驗了血，報告亦都出了，暫時要CHK的東西都是正常，醫生叫我地暫時不用擔心小ME會因有絕症問題而影響她貓流感的問題！而小ME仍有肚瀉，醫生相信該問題會影響流感問題，故此都會著手處理！而貓貓今日好像眼仔睜得大過之前，眼仔精靈左，而鼻鼻都冇之前咁多鼻水，乾淨了很多．．．而叫聲都同昨天差不多，都有叫過下，不過一時大聲一時細聲咁．．．腳仔情況亦仍需待流感情況穩定後才處理．．．

真係有黠奔波勞碌的感覺．．．不過都可以捱得住既．．．探完小ME，因為妹妹話個胃唔舒服，於是都去食完野先返屋企．．．真係好累好累．．．今日探小ME時都拍左點VIDEO同相，想擺上網的，不過都要睇睇精神狀況才算吧！

>>February 18, 2008 at 1:57:16 PM GMT+8