2008 年 3 月 16 日 星期日 【晴】

今朝有十個唔願起身呀！一朝九點返到中心，留左一陣，九點九就出門口了，同左個CASE去勞資審裁處落案．．．攪完之後都十二點半了，之後就同左個CASE去公司註冊處攪手續，咁就半DAY了．．．之後因為下午補假，於是走人！搭番車去左旺角，之後一個人行左一陣街街，買左兩對高跟鞋，因為屋企果D已經好舊了，而且爛晒！加上下個月去映婚紗相，我都要買番對高少少爭的著住去映，否則個人好矮，哈哈！

返到屋企，媽媽好好，煮左野我食，食完之後我就係咁訓了，一醒已經係七點半．．．都算幾好訓咁啦，好過冇！之後食飯，食完飯就揹晒A仔借比我既去CAMP用品過去佢中心，因為佢中心要做盤點呀，真係好累，對腳痛到丫．．．死左，好似機械人咁行，對大比好痛好硬，小腿反而因為琴晚訓前查左按摩膏，大比一冇查就係咁，頂！好痛痛．．．好經辛苦去到A仔中心，坐左半粒鐘，之後就同佢D同事一齊走，仲去左新墟果頭食宵夜！其實我已經好耐冇做過食宵夜呢個動作，EVEN係屋企我都極少食完飯再食野了，除非係生果啦！琴晚磅左一磅，發現輕番三磅，真係太好了．．．希望可以KEEP住，尤其唔想再見到個肥肚腩！但係，知道一定要做運動囉！之但係近日四支死左咁，點做？哈，都係藉口．．．要努力！

返到元朗A仔度，已經係十二點了，沖得涼黎訓得都已經成點鐘了，唉！好在今日下午訓過下！A仔買左兩個新枕頭返來，今晚要試訓了，唔知是否OK呢？

>>March 18, 2008 at 1:47:11 AM GMT+8

2008 年 3 月 15 日 星期六 【晴】

wow．．．今日終於去完個死人camp回來了，真係想死，好累好累．．．有十個累囉！仲要返到屋企極之黑仔！先係放低個背囊時唔小心比個袋一野撞左落隻腳度，果刻隻腳即時瘀左囉，頂！之後，打電話比A仔，點知夾唔住，成訢手提飛左落地，電話，電話蓋同舊電分為三體．．．頂！好肉痛！好在未壞到，如果壞左就真係死得人！跟住好啦，諗住整番部電話就轉身，點知一野撞左落門框，隻手呀！頂！好嬲好嬲．．．好啦，入左房諗住拎衫去沖涼，點知一開個櫃，頂！個櫃平時又唔知咁順，一開成個櫃撞左落去我腳眼度囉．．．XYZ&#%^QW(!

好黑好黑，真係應該唔會再有喇卦？一次過四單喎？！頂！好在，跟住都冇咩，不過真係累到要死囉．．．今次去訓練真係完全係比人玩既感覺，好差好差．．．而且，我見自己既情況，我好擔心下次去南蛇尖時能否支持得住呀！好驚好驚．．．真係唔知點好，有點想放飛機，哈！

>>March 18, 2008 at 1:37:16 AM GMT+8

2008 年 3 月 14 日 星期五 【晴】

太好了．．．在中午時，同A仔見了一面，大家終於冰釋前嫌了！而家大家COMPRISE左好多野，希望都為將來而好的．．．大家都要努力呀！而家個人開心左好多，因為難得大家都可以坦坦白白咁去解決問題！我地都相信，今次既經驗係神所要考驗我地，希望我地可以學懂如何好好咁相處．．．真係好感恩！

>>March 16, 2008 at 2:09:59 PM GMT+8

2008 年 3 月 14 日 星期五 【晴】

一整夜不能睡的晚上，直到太陽升起至現在，差不多十二個小時的時間．．．整夜都在哭，哭了不止十幾遍，想了又想了十多遍，祈禱又再是祈禱．．．心中仍然是有無盡的爭扎，失望，不快，傷心，懷疑．．．

暫別？對於這個字一點都不陌生吧！這次的暫別會是長或短的暫別？我不知道．．．在這差不多十年的時間裡，暫別已經發生了很多很多次，而每次我只知道它是很痛，很傷，很令人無奈的！究竟，在我人生之中，仍有多少次的暫別會再出現？我仍要承受多少次的痛，傷及無奈？而暫別的過程，我唯一的選擇就是．．．等待！對於等待，有很多人有不同的想法，有人會覺得等待是被動的做法，有些認為是價值且應該的做法，問題在於．．．你的目的是什麼？我唔知道今次我又要等待多久，又要再承受幾長時間的痛，傷及無奈！我亦都好擔心，我往後既日子仍要面對多少次既等待？我在問自己．．．annie，你是否已經不能再接受嘛？這些一次又一次的等待又是真的價值嘛？而且又能否達到真正的目的嘛？有好的結果嘛？那些不被尊重被當眾侮辱的又再可以承受多少次？．．．無可否認，每次我都均會無條件到付出去等待，因為我只知道．．．我愛這一個人，無論如何，我都選擇”等待”！等待佢回心轉意，等待佢改變，等待可以同佢永遠在一起的一天！．．．或許這就是人所說”愛情就是不理智的，如理智的就不是愛情”！

係早前，我曾經認為我已經找到了我一生中的最愛，因為，我慢慢的看著他有改變，看著他有所領悟，看著他真的為了我改變了很多，看著他真的一心一意去愛我．甚至看著他開始步入信靠主的道路．．．但是，昨天，以前的他又再次出現在我眼前．．．無可否認，這才是真正的他！一句的"out"令我心灰意冷，令我失望過後只有失望．．．這句的"out"是否意味著我就是要out呢？我存有懷疑同矛盾！亦都唔敢去面對．．．我真係好驚，日後唔通再一句"out"我就要即時執包袱返娘家？

呢一次神對我既考驗真係大，亦讓我知道原來一個人如果意志不堅既時候，真係好容易受魔鬼既引誘，將醜惡的一面表露出來！包括我自己在內．．．天父神呀，係呢一刻我並唔係想放棄去接受神既考驗，而係，我真係唔知道我仲有冇信心同堅持去接受考驗．．．我此刻並未想放棄的，只係．．．我覺得真係好可怕，我唔知道自己是否有能力過到關？亦唔知道其實神係當中做咁多野係想我領悟什麼？我真係好迷妄，我好想將一切都交托到神既手上，希望神你可以給予我啟示，讓我知道我應該如何是好？．．．我當然相信神在當中一定會帶領住我，走佢所喜悅以及已安排好的道路！

>>March 15, 2008 at 2:57:03 AM GMT+8

2008 年 3 月 13 日 星期四 【陰】

總括而言，今日既心情真係大起大落，點解？由琴晚同A仔發生口角後，今朝早一直都好擔心同唔多開心，後來，知道A仔都好番了點，自己心情亦好了一點．．．到了放工見到A仔，再一齊去婚紗展，過程中曾經有少少爭執，不過經過大家用心同努力後，終於為婚事處理了一些事宜，包括買了餅卡同訂了婚紗相拍攝．．．大家當刻心情都很好，因為認為終於可以處理了部份東西！本來大家正好好心情打算去銅鑼灣食美味既晚餐時，過程中大家又發生了爭執．．．唉！令大家心情都唔好，A仔更大發雷霆起來．．．

我當刻真係好無所適從，亦曾經問過自己．．．我而家做緊什麼？我又為緊什麼？點解要承受這些侮辱及唔開心？．．．但係後來再想了一想，再祈禱後，我感到近日發生的事是神所對我地的考驗．．．神希望在我地真正決定一起前好好考驗我們，要讓我們知道兩個人真正在一起時是怎樣的一件事，更希望要我地學習當日後大家發生爭執時應如何處理．．．初時，我都有點爭扎，因為我唔清楚神這些考驗是希望要我認清對方的問題，而要我敬而遠之，甚至是好好考慮清楚這個人是否可以付託終生？但我又細想，其實神這些考驗或許是要我學懂如何面對日後的爭執，以及讓大家知道對方就是一個怎樣的人，就是要我地作出一定的心理準備，因為事實就是．．．要改變對方，一來不是必定做到的事；二來，亦需要相當的時間才可讓一個改變．．．我曾有點懷疑，神不是仍有在A仔當中繼續下工夫，幫助他日漸改變的嘛？是關早前我確實感受到A仔是有不少的改變，當然是好方面的改變！但現在為什麼他又好像走回以前一樣的呢？

雖然我呢刻有好多懷疑，對自己，對對方，甚至對神．．．但係，我知道我唔可以作出任何懷疑，因為呢刻我只知道，我需要的是有信心地堅持地向神表示：我願意接受神的考驗！我相信，只要我地有信心同堅持，神必定會讓我地順利過關的，而且亦必定在當中協助我地渡過難關，解決問題！當然，現刻最重要的是．．．對方是否願意與我一起並肩作戰，接受神的考驗？

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

有一首歌很想在此分享．．．一首很舊的歌．．．

今日
歌手：陳奕迅


今日事情如不順　今日問題如不盡
像處圈中圈　了斷也了不斷
若今日你倦了　頹然哭　容許我送贈暖
准我漫漫長路末端　亦如初戀

當日熱情燃不盡　今日熱情仍不盡
就算怎都好　你願我更加願
共跨盡冷及暖　甜和酸　才可以算是共存
能共患難　才是認真的有緣

抬頭吧　相信愛　你便能飛
敢交出　你會創出傳奇
變幻人生是避無可避
卻沒人可驅使愛別離
（這份情愛卻永不會死）

抬頭吧黑暗過　會是晨曦
懷著樂觀　總有轉機
今天珍惜今天　逢凝望我心所愛的你
我已彷彿會飛　（能敖翔天和地）
（我已彷彿會飛　你眼睛牽我飛）

今日像明日一樣　今日任何日一樣
就算怎辛酸　愛護你　我甘願
沒揀擇冷或暖　甜和酸　晴天雨季　缺或圓
全部受落　才是活得真正全

>>March 14, 2008 at 3:33:23 PM GMT+8

2008 年 3 月 12 日 星期三 【晴】

今日好忙好忙．．．一朝早出左去長沙灣勞工處，因為要同兩隻case去開調解會議，之後開完個會，我就要即刻走過去隔離既小額薪酬索償仲裁處度幫另一隻case去落案．．．攪掂晒已經係十一點半有多了，好辛苦呢，一連走兩個地方！跟住搭車返土記．．．返到去都已經十二點三了，hea了一會就食lunch，去左買左幾件壽司食，都係二十二蚊，都ok抵食丫！

食完飯就出左去坐counter，本來今日兩點半要上堂上orientation的，不過因為好多電話同walk-in，最後我成三點四先上到去．．．上左一陣已經眼訓到爆，係咁釣魚．．．去到三點十一我又走了，因為要去開會，同班紅隧工友開員工大會呀．．．好趕好趕．．．開完個會攪好晒所有野都已經六點了．．．帶住好累既身體走人．．．上到59x，一心諗住訓番個靚覺，點知隔離坐左個死男人，一路車程都係度訓，成個人都成日訓晒落我度，我已經整左佢幾次，但係都係咁，我差點要起身走人．．．好討厭！最後當然成程都冇訓到，頂！好累好累．．．

幸好回到家有餐美味既飯食，真係好感謝媽媽，世上真係只有媽媽好，一啖美味既湯水，已經令我什麼疲勞都消取了．．．好幸福的感覺．．．

不過，剛才，同A仔為左明天婚紗展既事而嘈交黎，唉．．．我唔係想堅持什麼意見，只係我自己心急，唔想D野一拖再拖，到最後什麼都做唔到．．．反之，我知道A仔係想樣樣野都做到最好，所以一點都唔想馬虎了事．．．我明白的，係我自己心急過頭，我唔係要爭去決定什麼，只係得一個協調同平衡罷了．．．希望A仔明白！我知，我而家再講什麼，佢都唔會再相信我了，因為我實在一而再再而三的令佢失望！唯一的是，我要做好自已，不時提醒自己唔可以太意氣用事，要按步就班而行．．．我知錯了．．．

天父神呀，我唔知道自己咁心急既行為真係錯定對，因為，我心中只係希望可以早日處理好事件，唔想大家再拖落去．．．但係，我知道自己同時亦都未理解對方既感受同埋想法，令對方覺得我一意孤行咁．．．好矛盾呀！我唔係唔同意對方既意見同想法，只不過我真係唔想錯失左一點好處或者機會（我指在展覽中）．．．我只係想大家協調好想法後，到時唔會係個展覽度嘈交，爭論．．．或許，我真係想得太多了．．．天父神呀，希望你可以將我既訊息帶給A仔，讓佢重新相信我，相信我真係會往後不再意氣用事，會按步就班！亦希望天父神給予我力量，好好維持我這一個目標，不時在旁給予我啟示，提醒我要履行承諾！．．．

>>March 13, 2008 at 3:31:24 PM GMT+8

2008 年 3 月 11 日 星期二 【晴】

今日係病後第一天返工，真係有點吃力感，因為返工是需要成日說話的，就好似今朝早咁，所有同事出晒去做野，得番我一個係中心，所以我就要負起聽電話既工作．．．真係講到聲都沙晒，好可憐！到左下午，我都唔敢再講電話了，因為我帶住口罩，聲音自然唔夠大，所以講電話時就要更大聲去講，真係氣都咳埋呀！下午於是叫同事聽了，我做其他admin工作好過吧！

今日A仔佢去左睇醫生，我聽到佢把聲時真係好心痛好肉痛．．．因為佢係病到聲都出唔到，係聲嘶力竭咁，好心痛呀．．．放工果陣，佢話佢出黎旺角要買點東西，所以約左我係旺角見．．．當然，我相信佢真係想把握同我見面既時間！我出到旺角，急不及待要見佢了，因為真係好掛心佢呀，唔知佢點樣．．．見到佢，憔悴的樣子，我好是心痛呢．．．我地兩個都病左，都唔知點好！幸好醫生冇話佢係流感，我都叫做安心一點！而佢隻腳既問題，都係暫時沒有什麼問題．．．都安心了再多點！不過，過程中同佢傾計，佢都係用口型或者手勢去答我，真係好攪笑，不過，我都唔想佢再講咁多野住，好好養番把靚聲先得丫嘛！同佢食DINNER都係去食粥，對大家都好點嘛，大家都病病，都係食呢D架喇．．．我今朝都係食麥皮吧，呵！當減肥肥囉．．．

唔，希望A仔快點好番啦．．．本來我都想今晚過去元朗度陪佢既，照顧下佢．．．不過，我怕我地D細菌交叉感染，而且我星期六要入CAMP了，唔可以病落去架喇，更加要快點好番才有體力去考試！所以．．．好矛盾，又好心痛佢呀！唉．．．希望佢明白啦！天父神呀，願你可以賜予A仔力量，可以早日康復，亦都希望天父神可以繼續眷顧保守A仔佢，讓佢可以快點好番！

>>March 12, 2008 at 2:35:35 PM GMT+8

2008 年 3 月 10 日 星期一 【晴】

今朝先身都係覺感冒未好，好鬼死辛苦呀，又頭痛又鼻塞，真係想死，完全起唔到身，周身骨痛咁．．．於是決定再拎多日病假，要好好休息！

十一點幾去左睇多次醫生，醫生都比左連續兩日既病假我，佢都話好在我唔係流感，只係普通感冒，如果唔係就手尾長了．．．我都覺好好彩！之後，由於姨媽同姨丈聽日就離開香港返美國了，於是今日媽媽約了姨媽二舅母二舅舅飲茶，我都去埋一份，因為太唔捨得姨媽了，佢太錫我地了．．．臨走，我都比左個big hug佢，佢都話好唔捨得我．．．唔緊要啦，我地好快又會見面架喇，出年時間再見啦．．．姨媽姨丈，你地要好好保重呀！

之後，就返左屯門，食左藥，個人好累，於是乎就係咁訓．．．訓到五點九度，A仔打比我！本來我約左佢今晚接佢放工的，不過都係太累了，而且佢都未好番，佢都打算再睇醫生呀，所以．．．大家都係各自各休息好吧！本來約明天去銅鑼灣食飯既，不過而家要取消了，兩個都病左，食咩都冇味啦．．．唔，有點兒失望呢！不過，最緊要我地快點好番，之後再去食過，哼！

>>March 12, 2008 at 3:14:06 AM GMT+8

2008 年 3 月 9 日 星期日 【晴】

今日好慘，打敗仗．．．病倒了．．．．好慘慘．．．近日身邊好多人病病，媽媽啦，A仔啦，兩位同事啦，妹妹啦．．．真係好多人病，大家都要小心身體了．．．就連我都病埋，真係唔知講乜好了．．．幸好醫生話我好彩唔係流感，因為我冇發燒．．．真係幾驚呀，所以先至即刻去睇醫生咋！今早起身已經係超級頭痛，痛到有點想爆的．．．昨晚訓覺時已經係咁鼻塞了，真係好慘．．．希望各位都能夠早日康復啦．．．

今日真係好累好累．．．睇完醫生生，同左媽媽去買送，之後就返屋企了．．．同左個好姊妹傾左好耐電話，因為有說不盡的話題去傾啦，好期待下星期同佢既約會．．．聽日要繼續返工，好在未有特別野要做．．．希望可以好好休息，快點好番啦．．．

>>March 10, 2008 at 2:17:47 PM GMT+8

2008 年 3 月 8 日 星期六 【微雨】

嘩~ 今日訓到成兩點先至起身，真係前所未有．．．是關我其實十點幾起過身了，之後諗住訓多陣，點知一訓已係兩點．．．媽媽一直唔敢叫醒我，同埋佢都病左好累，所以有我訓．．．醒左之後，爹地本來叫我地落街食野，但係後來見媽媽病得太勁，所以爹地佢就落街買粥返來比我地食．．．

食完後同妹妹係度睇電視，睇左陣就出刷門口了，因約了A仔接佢放工．．．一齊入元朗！

入左元朗後，因為A仔佢都病左，所以好快手食完野沖埋涼佢都訓了．．．近日真係多人病病，我自己都有點點感冒呀！希望大家小心身體啦，病了的就早日康復啦．．．

>>March 9, 2008 at 12:42:13 PM GMT+8