2007 年 10 月 26 日 星期五 【晴】

琴晚最後我都唔係好訓得著，我估都要成三點幾先至訓到囉，唉，一直都訓下醒下咁，A仔都唔知我起過身仲開過電腦添，正一大懶豬．．．不過，佢近排都病左呀，所以我都唔敢嘈醒佢啦，都想佢休息多一點嘛，係咪？

今朝最後都訓到十一點幾起身了，因為A仔好早就醒左，冇理由要佢睇住我訓架！雖然之後佢都一個人出左去銀行做d野，得番我一個係房度訓．．．哈！之後，A仔既家姐話入黎元朗搵我地，所以我地等埋佢一齊去左元朗廣場新開果間”潮樓”度飲下午茶．．．d點心幾ok呀，價錢都唔貴，而且全日免收茶錢加一服務費，抵呀！下次都要帶屋企人去試下先．．．

飲完茶，我同A仔A仔家姐去左租單車踩，後來踩左入南生圍．．．嘩，d風景正到丫．．．加上近黃昏時候，睇住個太陽落山．．．嘩，靚到暈低呀！當然最正既係．．．同自己最愛既人一齊去見證日落啦，呵！坐住A仔單南尾攬住佢睇日落喎，開心到爆啦，呵！！

踩完單車後，我地本來只係去一去百佳諗住買野飲，點知買下睇下就買左成籮野出黎喇，真係傻左！之後見又累又餓落，索性食埋飯先啦．．．我地去左一間有日式有西式既餐廳度食，其實呢間野我之前好幾年前同一個好姊妹係呢度食過架，d食物質數唔錯架，價錢都ok架．．．我地食左好多野，又有鐵板扒，又有北海道帶子闊條麵，又有葡式海鮮飯，又有煎鵝肝，炸生蠔，焗青口薯皮．．．好多野食呀！好飽好好味．．．正！今次又唔知會肥幾多了，哈！

吃完之後，我同左A仔返屋企，我地返到去突然心血來潮，一口氣睇番好多集既”楚漢驕雄”．．．最後，睇到兩點幾．．．但係，我地仲有十幾集要追呢．．．O．．．真係越睇越要追落去架，雖然係一套舊既劇集，不過都好值得重溫既．．．

>>October 28, 2007 at 2:44:20 PM GMT+8

2007 年 10 月 25 日 星期四 【晴】

今朝起身，見妹妹情況仍然不樂觀，於是我都鼓勵佢今日唔好返工了，要在家好好的休息．．．後來，我帶了佢去睇醫生，醫生竟然話佢唔係腸胃病，反而係因為妹妹近日情緒問題，而影響到佢有焦慮症．．．而剛好妹妹這兩天是每月一次的月事，醫生話妹妹患既係”月經前焦慮恐懼症後群”．．．真係好驚訝，因為從來都冇聽過．．．不過醫生話問題不大的，只要妹妹情緒可以改善，壓力可以減輕，而且睡眠情況得到改善時，病情就可以好轉．．．

其實因為妹妹近日經常忙於做project，而且近日亦被感情事所困擾，所以都明白為什麼佢情緒心情唔好既．．．唉！作為家姐既都好擔心妹妹既情況，因為佢已經唔係一次半次失眠咁簡單，而係佢係經常地發生失眠問題．．．真係要多點同佢傾談先至得！媽媽都好對住妹妹個病都唔知好笑定好嬲，因為初時都覺醫生話妹妹係呢個病都有點半信半疑，不過後來卻開始擔心了．．．唉！希望妹妹早日康復！

後來，我就一個人去了市中心剪頭髮．．．太好了，終於可以輕鬆一點，之前的頭髮太長了，而且髮質又差了好多，所以是次除左剪個新髮型外，仲焗左個油，希望頭髮可以好轉番點．．．剪完靚髮就回家了，hea一會就出了causeway bay，約左A仔同佢家姐媽媽食飯，我地去食上海野，good~

而家陪左A仔返到元朗，但係而家已經係27號零晨2點了，我唔知係咪頭先飲得太多茶訓唔到覺，又加上M第二日，雖然好累，但係都係心煩氣燥咁，唔係好訓得著．．．剛才打過電話回家，知妹妹好了點（只係冇再嘔同肚瀉了）都安心一點，不過見到A仔呢隻豬既感冒仍未好番都仍然要我照顧，真係頭痛死．．．唉！希望佢快點好番啦．．．我都個肚同條腰痛到要死了，但係仍然訓唔到覺．．．天呀！

今日剪頭髮時，發現了自己多了幾條白髮．．．O, HOW COME?．．．係自己近日真係老左丫？定係諗得太多野呢？定係太多煩惱事去想呢？．．．唔知呀，好似好多野要擔心同煩惱咁．．．好心煩呀！越諗越”蚊”憎！

>>October 26, 2007 at 6:00:03 PM GMT+8

2007 年 10 月 24 日 星期三 【晴】

今日朝早十點已經起身了，之後媽媽話姨媽已經從美國回來了，所以叫了我地出去飲茶！當然，每年姨媽回港都是十分開心的，因為姨媽是一個很慈祥的人，我也十分喜歡同佢溝通交流的．．．佢亦特別愛我地呢班”小朋友”，所以佢都十分受我地愛戴架．．．

琴日A仔開始病左，又是感冒了．．．唉！本來我今日打算拎D醫生開既藥過去佢中心比佢食，點知我飲茶前拎到去佢中心，A仔話佢病得好嚴重，可能有機會唔返工，於是我就回了家．．．後來，A仔又話因為工作關係佢都係要返工，所以攪到最後都冇比藥佢食，唉！之後我先至再出去美孚同姨媽飲茶！飲完茶十分無聊，跟住佢地班”大人”都唔知做乜咁，成日都係飲茶傾計．．．唉，天呀！悶死．．．

返到屋企hea左一陣，媽媽又叫左一班朋友上黎屋企唱k，好在有個bb係度比我同佢玩，如果唔係悶死我喇．．．之後七點我都準備出門口了，因為今天約了兩個朋友出去荃灣dinner．．．我地去左食pizza hut，不過係用一個好平既價錢去食，正~ 之後，我地仲去左杏花樓度食糖水，不過荃灣間杏花樓下星期一就會結業喇，因為租約問題．．．又少一間杏花樓了．．．

食完野十一點幾，獨自一個回家，回家後，妹妹佢病左，佢係咁嘔，唔知佢咩事，又肚瀉添．．．可能腸胃炎了．．．又有人病了，唉！希望各位病者可以早日康復啦，因為作為你地身邊的我都好擔心你地呢．．．

>>October 26, 2007 at 5:47:09 PM GMT+8

2007 年 10 月 23 日 星期二 【晴】

今朝本來打算陪A仔早起身既，不過因為太眼訓了，最後都係繼續訓，得佢一個早出門口．．．我都訓到十點幾先至起身，之後十一點幾就自己返屯門了．．．

返到屯門都冇咩好做，上網又搵唔到咩好工，所以到左下午就陪左媽媽去食野，食完野又係一條友返左屋企，好悶好悶咁過我今日既一天．．．

聽日約左兩個朋友仔，所以好有心機執好晒D手信，諗住聽日拎比佢地．．．好期待大家既見面呀！

其實發覺，近排身邊有好多朋友都病左，真係有點心痛．．．例如其中一個舊同事，其實佢一向由小至大心臟都有毛病的，而近日醫生表示佢既情況惡化，需要進行一個大手術．．．幸好，個手術十分之成功，佢而家在休養當中！希望佢早日康復；另外，一個老死加舊同事，佢隻腳既舊患又來了，但係今次醫生話佢一係會細菌感染，一係就痛風症．．．真係好令人擔心，而家都未知情況如何．．．同樣，希望佢早日康復！仲有，近日教會有個弟兄，其實佢一向都係有毛病，佢身體既肌肉因病而開始萎縮，但近日醫生表示佢盤骨開始有枯萎既現象，即係所謂講既骨枯．．．所以佢開始行動越來越有問題．．．真係令人擔心佢既情況．．．希望神可以繼續保守看顧佢，祝佢早日情況轉好！

有時真係會覺得自己好幸運，即使係有病痛，都唔會係身體上一D重要器官或者四肢有毛病，所以我覺得自己好幸福，比起身邊好多人自己有時都唔懂去愛惜自己既身體，真係覺得好無奈！從今天起，我要同自己講，珍惜眼前的，同埋要知道，自己原來係好幸福的．．．

>>October 26, 2007 at 5:38:43 PM GMT+8

2007 年 10 月 22 日 星期一 【晴】

今日因為A仔佢返2點，所以可以同佢都好晏先起身，呵！好似好耐冇訓咁多了，係北京日日都差唔多七點幾起身，平均每日都係訓七個鐘左右架咋．．．返左黎香港就要補番數啦，呵！好似好懶惰咁．．．

今日送左A仔返工後我就返左屯門，返到屋企好肚餓，食左少少野，之後覺好累，又見有時間，所以就訓左一陣，起身果陣四點幾了．．．之後好趕住時間咁去準備出門口去旺角，因為今日要去見工．．．最後都早左少少出到去，後來去左旺中度行．．．其實見到D秋裝都冇咩興趣想買，只係買左兩件線既背心，幾十蚊一件！攪掂晒D野後，join左A仔係朗豪坊食吉野家！因為我地有coupon．．．食完之後我地去左行街，我去左MUJI行，因為見之前唔見晒D筆同埋今個月尾要用埋恆生卡既cash dollar去，所以就買左d筆同一件t-shirt，最後只係要補番$120既cash，抵！

跟住都行左好多地方，行完之後就同左A仔返元朗了．．．今晚因為妹妹要趕工做功課，佢而家讀緊個course，聽日last一堂了要交final project，所以唔阻住佢了，今晚個廳同房比晒佢用啦．．．無謂大家阻住大家啦嘛，呵！

>>October 23, 2007 at 3:06:01 PM GMT+8

2007 年 10 月 21 日 星期日 【晴】

今朝九點幾十點就起身喇，因為琴晚都早訓，唔知點解好鬼死眼訓，所以十點半連交響樂情人大結局都冇睇就訓左了．．．

今朝起身後就同左媽媽去食早餐．．．嘩，好似好耐冇試過吃一個咁豐富既早餐！係北京都係多數兩個人食幾蚊既早餐，但係今日食左個成廿蚊既，真係感竹覺好唔同！食完早餐同左媽媽去買野，之後就返左屋企．．．返到屋企見眼訓就訓左一陣，訓醒就已經係三點半了，媽媽再叫左我落街吃野，食左個好好味既墨西哥辣豆焗薯皮，正！跟住，媽媽去做gym，我就一條友返屋企．．．

返到屋企都係悶悶地上下網，同朋友傾下msn咁，同埋同個好姊妹傾下電話咁，咁就過左一日喇．．．

而家越來越覺得生活苦悶，日日都好百無了賴咁，唉．．．呢d日子何時了結呢？．．．

今晚去左接A仔放工，已經好耐冇做過了，順便整左D飯比佢食！但係想唔起佢聽日只係返一節，O．．．唯有佢星期三吃啦．．．

>>October 22, 2007 at 3:41:58 PM GMT+8

2007 年 10 月 20 日 星期六 【晴】

呵~ 今日訓到成十一點幾先至起身，醒都係因為有電話先至識得醒．．．不過事實上都唔係訓得太好，因為琴晚唔知點解成晚係度發夢，夢中見到自己仍然係北京既旅程當中，我同A仔玩到好開心，完全係唔捨得走咁．．．哈！簡直係樂而忘返呀！！之後，唔知係因為香港既空氣差定係咩原因了，成晚都氣喘了好幾次，真係好辛苦．．．就連妹妹都知道我因氣喘了起身好幾次身呀！！噴了幾次氣，都仍然未見好轉！

到左今朝起身，氣管都仍不太順暢，不過都冇特別去理會佢了．．．亦因成晚訓得唔多好，所以個人成日都好似呆呆的！不過幸好，有妹妹在家陪住我，我地後來一齊去左KFC度食lunch．．．回想起果時係北京，唔知點解KFC既數量好似比麥記既多，而我地每次經過KFC時，都總係會入一入去．．．入去當然唔係食野，而係．．．借個廁所一用．．．哈！其實，每次當我入親去KFC時，真係十萬個好想食架，因為．．．實在太香了！眼見住人地大啖大啖咁食d咁美味既雞時，真係口水都流埋．．．但係，我地同自己講，今次係一個刻苦既訓練，唔可以因為一時既貪吃而放棄左個目標既，所以堅持唔食，唯有望梅止渴！其實都幾可憐下架！不過講真，係果度食一餐KFC雖然比起香港價錢黎講係平，但係，對於當地低收入既人黎講就真係好貴了，二十蚊一個餐喎，都不知可以食幾餐既錢了！

所以話，今次既旅程中，我都體會到真係要珍惜！在香港時成日都大魚大肉，而且有時仲會浪費左食物添！成日以為食果一百幾十蚊一餐好小兒科，又話要什麼享受，連食野環境都要學人地講什麼”要有FEEL"．．．但係呢D錢真係夠北京既平民食好多餐喇．．．所以真係要珍惜，珍惜自己而家現有的，因為好多人真係想有的都冇機會有！

到左下午同妹妹行左一陣街就返左屋企，又睇左一本日本既時裝郵購書．．．真係好靚，不過．．．諗諗先啦，剛去完北京，雖然花費左既錢不算十分多，全部加埋晒九日都洗左三千多蚊，其實真係不算好多，不過，都係要慳慳地了！

琴日同妹妹傾左好多野，唉，知道妹妹近日為左D野好煩惱！希望佢快D諗清楚自己想點啦，做家姐既都擔心佢架嘛！不過，同妹妹一齊玩有時都開心既，因為真係成日可以講同玩D好低能既野，真係笑都笑鬼死．．．我琴日都唔知已經因為笑而死左幾多細胞喇，呵！

今日都有send左信出去，希望早日有回音啦．．．之前見果d都好似完全一d消息都冇，真係．．．心到up埋 ！自問真係唔係見得差，唉，都唔知點解？或許神覺得我應該仲有其他更有發揮的工作卦！一定要相信神，佢一定會有安排比我既．．．而家唯有做好自己本份，同埋耐心地等待神既安排啦．．．

>>October 22, 2007 at 9:53:52 AM GMT+8

2007 年 10 月 19 日 星期五 【晴】

hehe~ 終於返來了．．．從北京既旅程回歸了香港．．．其實，真係有點唔習慣！

這前後加埋九天既行程，話長唔長，話短又唔短．．．真係好開心既旅程呀！！首先係搭火車，比我想像中既仲要舒適，d床又乾淨同闊落，而且又幾軟熟，廿四小時係火車裡既日子並唔難過，一時玩下啤牌，一時又食下野，一時又走來走去，一時又睇下風景，一時又訓下覺咁，都幾free下架，good~ 講到風景，不能不提我地車程中會經過黃河同長江的，真係好正，十分宏偉呢！尤其係橫跨長江果條世界上最長（長達七公里）既河上鐵路．．．真係好好feel，在長江上走過果幾分鐘真係正到暈低．．．其實如是者，好快咁就過左一日一夜了．．．

在住方面我都覺幾好架，旅舍佢環境都唔錯，我地住一間六人房其中一張錄架床，一人一個細櫃黎擺野，又有床頭燈用，地方又夠大同乾淨企理，唔錯．．．而toilet就特別少少，因為佢係個mau廁同個沖涼既係同一個room，即係你沖涼果陣有機會會唔小心差錯腳落屎坑．．．不過so far都未試過，哈！而旅舍內既職員都好友善，而且都好好傾，佢地都好helpful添．．．仲有唔提唔得既一隻小貓，佢係一隻自來貓，白底黑斑，唔係旅舍養架，隻貓佢好"痴"人架，佢會自動行去你身邊，之後跳上你大比係你大比度訓覺，好攪笑架！其實住左六日，都係得第一晚同埋第五晚有人同房訓，第一晚係一個中國男人，大肚腩的，佢果日成零晨點幾鐘先返到房的，所以冇同佢有咩交流；而第五晚既係一個少女，一個個樣好tom boy既女仔，大約十多歲度啦，佢係同屋企人一齊黎呢度住既，不過唔知點解得佢一個住六人房，佢家人就住四人房囉，好可憐！不過同樣都冇同佢有咩交流，怕嚇親妹妹嘛！反而最後一日我地走果朝，有一對來自澳洲既情侶入住我地間房，佢地係杭州讀書架，係放假特別黎北京玩幾日．．．

而食方面，其中真係好正，正唔係正在食左什麼珍修百味，而係可以食到一d好地道既食品！佢基本上既什麼餅什麼餅我地都會去試，真係好正，有咸有甜的，有有餡的（肉餡或者素的）；而且又食左好多特別野，什麼乜卷物卷啦，蜂蜜餅啦（個質感好似啄啄糖咁），傳統既炸醬麵，爆肚（涼羊肚），宮保雞丁，雲吞，餃子．．．數之不盡．．．而我咁大個女，都未試過可以兩個人食一個只係$2.5既早餐．．．呢度既平民好喜歡食一d小米粥，豆腐花（辣的），豆醬，夾餅，蒸包子（有肉有素的）．．．做早餐，而d早餐係每樣野都係一個幾毫咁，所以好抵食！好多平民見到我地呢類”遊客”都去食時都覺幾驚訝的，不過我地為既係要融入佢地既生活嘛！所以我地都唔介意去香港人所講既”地mau"度食野．．．其實又唔係講到咁唔乾淨既，如果係既我肚瀉左好耐囉．．．而最正既係．．．相信去過北京既人都認識”全聚德”．．．佢最出名既係烤鴨，即係香港既燒鴨或者片皮鴨．．．佢有出一d真空包裝既鴨架，我地有一晚買左半隻返旅舍，之後同微波爐丁黎食．．．嘩，真係正到爆，好好味囉，於是我地決定一人買多幾隻返屋企做手信．．．呵！除左之外，我地都買左佢地道既食品，茯苓餅．．．其實都唔知係咩黎，只係見佢好多地方都有得買咋！希望好食啦．．．

人方面．．．其實北京既本地人真係幾nice，有好多時問路佢都肯答，而且態度都幾好！而且有d人都會主動幫助我地添，真係唔錯．．．反而一d由外省去旅遊既人就．．．又粗鄙又冇禮貌！冇計架，我地為左融入都係要學埋佢地一份冇咩禮貌同manner咁架，唔排隊啦，行路要打橫行啦，要識得同人去迫啦，仲有要識得過馬路，同埋要識得推開人（因為d人好鍾意無啦啦推開你，真係要隨時扎好馬架！）而我都曾經接觸過唔同既人，係第一程火車中，就同左隔離房既鬼仔傾左幾句計；而係參觀圓明園時，我都曾經同幾位本地既中年女人傾過計，佢地初時以為我係本地人添（乜我似咩？咁即係證明我融入左佢地啦，呵！）；仲有有次食早餐時同左一個女人傾過幾句咁啦．．．

而搭車方面，其實都唔係太難搵車搭，我地多數都係搭地鐵同公車，公車都唔係咁唔好搭或者香港人講到什麼好危險好混亂．．．反而我覺得佢d地鐵仲衰囉，因為北京既地鐵好舊（除左新開果條5號線)，仲有佢d司機係冇制服著架，而且大部分都係似十幾二十歲既後生仔去架駛．．．見佢地架車時十分求其，而且好唔專業個行為．．．都咪話唔驚架！而去石花洞同八達嶺架公車都唔難搵，都好順利去到．．．

而玩方面．．．我地都去左好多香港人好熟悉既地方，什麼故宮，長城，天壇，天安門，圓明園，頤和園，睇升旗同降旗．．．我地都有去參觀，不過都係冇花太長既時間去睇，唯一係長城用左成日時間係度，因為我地都行到最盡頭先再返轉頭，真係行到傻左．．．而故宮都行左成四粒鐘，都咪話唔死．．．另外，我地都去左其他地方，例如琉璃廠街，大柵欄，南鑼鼓巷，西單，香山公園，石花洞，什剎海一帶．．．呢d地方旅行團就未必會去了！所以真係好開心可以參觀咁多不同既地方；雖然我十多年前去過北京，不過是次真係好唔同，除左係同A仔去之外，加上去既地方都唔同左，亦都嘗試感受當地人既生活，所以係好正！

今次既行程，當然最深感受既係．．．我知道我找到了！找到了一個好愛我既人．．．過程中佢既照顧，鼓勵，愛護，關懷備至，親力親為．．．多謝你！尤其最為感動既係．．．在長城我行到要死既一刻，你竟然跪下來叫我坐下，之後把我其中一隻腳台在你的膊頭上，而你用雙手按摩我另一隻腳既肌肉，令我感覺舒緩一點．．．行經既人都好好奇為什麼這個男人要幫一個女人咁樣做，正所謂男兒膝下有黃金丫嘛．．．不過，你卻冇理會其他人既眼光，每行一條長路，都照樣幫我按摩一次．．．多謝！我真係好感動！仲有，你又常常幫我揹著重東西，又陪我行東行西．．．而且，尤其係回程時在火車上發生既不愉快事（雖然大家講過為了讓旅程感到完美一點，會不再提起此事，不過我不可不提的是．．．）多謝你地提醒了我，最重要的是用心去感受及回味！．．．你這句說話讓我更加感受到自己終於找到了想要的人，一個好愛自己的人．．．是的，每事每物都總係一齊去面對一齊去感受一齊去親歷．．．真係一個好溫暖好親密好感動好甜蜜的感覺．．．．所以是次既旅程是十分之愉快的！

即使是次買了什麼手信，看到什麼特別的風景，吃了什麼好吃的東西，感受到什麼特別的風土人情．．．我覺得都係表面的過眼雲煙．．．因為最重要的是，我知道自己是找對了，並作了一個正確的決定，就是．．．與你永遠在一起！這就是我是次旅程中最大的收穫了．．．你呢？

>>October 22, 2007 at 9:46:10 AM GMT+8

2007 年 10 月 10 日 星期三 【綿綿細雨】

今朝去左red cross度見工．．．車程都不算遠，都ok咁，只係等車等得太久咁．．．因為果架死人59A可以直接去到大窩口，如果唔係我都唔搭佢，下下都要人起碼等番十分鐘以上先有車架，好麻煩．．．

今次早左成十五分鐘到，所以可以早點攪掂．．．又係先比份wirtten test我做，半粒鐘做兩題，一題中一題英．．．英果題係寫一封信，中果題係要寫一份proposal，都唔知好陪時間做．．．我最後一分鐘都仲寫緊野，不過都時間剛剛好攪掂！做完之後就係”單打獨鬥”既時候，佢有兩條友見我，都問左好多問題．．．最後，佢地都提到關於人工上既事．．．我估計，如果佢地對我一點興趣都冇既話就唔會提呢d野，因為提黎都冇咩作用！唉，希望人地真係可以比個機會我啦．．．

見完工就返左屯門，媽媽就買左個麥記我食，實在太肚餓了，朝早九點幾已經食左早餐，，到左兩點先至有野食，好可憐！之後感到有點唔妥，所以食左d藥，兩點幾就訓了覺．．．到左四點半就醒左了，之後就去左屯門市中心，因為要去買電話卡既增值卡．．．攪左好耐，點知其中一張原來過左期，攪到最後要買過張新既先得！不過而家都算攪掂左！

之後返番屋企．．．今日得我同媽媽食飯，不過媽媽煮左好多野過我食．．．好似好耐冇食過媽媽飯了，真係特別覺得好味！不過之後有成個星期多食唔到媽媽煮既飯了，真係有點無奈呢．．．

聽日就出發了，心情都冇乜特別，又冇話特別的興奮或者點，都幾期待咁啦．．．希望會係一個開心愉快既旅程啦．．．

>>October 11, 2007 at 2:02:20 PM GMT+8

2007 年 10 月 9 日 星期二 【綿綿細雨】

今日妹妹佢病左，所以請左病假，留在係屋企陪我，呵！

到左下午，媽媽話出去美孚同二舅舅佢地飲茶，所以我地一行三人就出左美孚．．．後來，因為妹妹要在美孚睇醫生，而剛好佢間公司而家參加左什麼醫療計劃，所以在某某醫務所睇醫生就可以有半價．．．後來幾經辛苦係美孚搵左好耐都搵唔到合適既醫務所呀，真係想死．．．好啦，搵左半粒鐘後終於搵到果間死人野，點知．．．shit，星期三係close架！除左粗口外都唔知講咩好，因為已經搵到好累，加上今日二舅母比左成大袋衫我地，d衫係表哥係公司GAP度拎既貨版．．．好重囉！最後唔理喇，求其搵間醫務所睇就算喇，咁就已經四點八喇，真係想死！

後來，因為妹妹今晚佢要返學上八點半，但係佢又唔想返番屯門，所以要求我陪佢出去旺角行街．．．好啦，咁就陪左佢喇，行左一陣已經想死，因為袋野真係好死重呀，就算你輪住拎都想死！連睇野都冇晒心機呀！之後好好笑，A仔打比我，原來佢都係旺角呀，所以我地就join左，去左朗豪坊一齊行左一陣．．．後來因為妹妹一齊上堂既朋友仲未到，而A仔又約左朋友，所以各散東西了．．．我一條友拎住三大袋野返屋企，又累又肚餓，好可憐！妹妹就去返學．．．

返到屋企，媽媽今日冇煮飯，只係買左好多”現成”野返黎食．．．好似一D炒粉，一個手卷，一隻雞比，仲有一個糯米慈．．．呢個就係我今日既晚餐．．．好古怪咁，不過都OK既．．．吃完之後再嘗試執下去北京個袋，但係執黎執去都好似好重咁，都唔知點行呀！唉．．．

聽日會去見工，但係心情唔多好，唔知點解．．．又唔係太有holiday mood得滯而影響冇心情見工喎．．．或者係因為近日空氣唔好，所以有少少鼻敏感同氣喘，攪到成日訓得唔多好．．．夜晚成日醒左就係度喘，好辛苦．．．尤其朝早既時候最辛苦．．．唉．．．我唔想咁樣去北京囉，媽媽有叫我睇醫生，不過．．．我又唔想成日睇醫生，想自己靠自己好番，但係．．．唔知幾時囉！因為就算睇，醫生都係叫我噴藥架o者，咁又有咩分別？！

今晚頭先冇啦啦落雨黎，之前A仔打比我時都話旺角出邊落好大雨呀！我都初時唔信，唔夠一陣屯門就落左雨了，真係令人擔心．．．突然又醒起唔記得帶遮去北京添，所以叫左A仔帶 ，但係佢又叫我聽日先提佢拎．．．我都怕唔記得呢！不過最怕係我地出門口時都已經要帶遮了，又重多一樣野．．．或者可以帶把可以用完唔要既遮就好點啦．．．希望北京既天氣好點啦，近日睇中國條象局都係話多雲，而且氣溫介乎12-18度左右，呢個只係我地出發果日既天氣，而其他日子係唔知架，所以我都帶定D厚衫去呀！

>>October 11, 2007 at 1:23:41 AM GMT+8