2008 年 2 月 8 日 星期五 【乍雨乍晴】

今日叫左輕輕暖左少少咁，不過都係好凍．．．我今朝訓到十一點幾先至起身，GOOD~ 之後係屋企hea左陣，妹妹話請屋企人去飲茶，因為佢出左雙糧同加左人工．．．哈，真係冇幾何妹妹咁闊綽請食野架，所以一定去啦．．．我地去左海趣坊一間酒樓飲，透過爹地既交際能力，我地好快可以有位坐了．．．我地叫左好多野食，食到好飽好飽．．．

係飲茶中途，A仔打比我話佢係屋企樓下見到一隻貓bb，相信只有二至三個月大，見佢好瘦又冇野食，係度不斷叫，不斷震咁，好可憐！仲發現佢有一隻腳係跛左的．．．好慘呀！後來，A仔同佢媽咪拎左少少面包同水比貓貓食，不過貓貓好似唔多鍾意食咁，情況令人擔心．．．而且仲發現佢左眼係有點事，不斷流眼水，好怕佢真係生存唔到呢！初時，A仔曾經想過帶佢去睇醫生，可惜今日D醫生未開門呀，都好心UP呢！十分無奈呀！我相信只有養緊小動物既人先至可以了解得到呢一刻我既心情．．．雖然，我冇親眼目到個情況，不過聽到果刻都已經十分之心酸了．．．

之後，我約左A仔同另一個朋友去一個朋友屋企拜年，個朋友住係我屋企附近既地方，所以我飲完茶就可以好快去到了．．．我地去到打麻雀，A仔做了個好男人，佢做了住家男的角色，一邊煮年榚比我地食，一邊又洗野執野，仲整埋一D晚餐比我地食．．．哈，好SWEET！令身邊既女士朋友都好羨慕．．．錫死佢．．．到左夜晚，因為玩得太夜了，決定係朋友家過夜．．．

>>February 10, 2008 at 10:33:10 AM GMT+8

2008 年 2 月 8 日 星期五 【乍雨乍晴】

今日係A仔度十點半已起身了，因為要一早出去二舅母屋企食開年飯！今次係A仔第一次加入，真係好開心呀！佢同我一齊出去，相信二舅母對佢既印象都好好呢！希望可以KEEP住啦，因為我都係一個好重家庭生活既人，我都好錫我身邊每個家人架！見到佢地開心和諧我都好開心的！哈！

食完飯，我同A仔就去左旺角行，點知去到信和什麼都冇開，失望！去了朗豪坊個超市，都好多野睇，不過冇買野喎！跟住就搭巴士入左A仔家姐屋企了．．．去到睇了一套FILM，集結號，真係HIGHLY RECOMMEND呀！好好好睇，而且十分之感人，真係一套非常好的電影呀．．．！之後就食飯，今晚又係吃盤菜，O．．．不過，我認為比琴晚的好味一點，因為當中有好多貴價野，好似海參，鮑魚，元貝等．．．GOOD~ 食完仲有A仔姐夫親手整既紅豆沙糖水加芝麻湯圓吃，聽說佢由下午開始做了，真有心機呢．．．而且十分好味！真係要問佢有什麼心得可以整得咁好味，要偷下師先得，篡日整比A仔食．．．

十點零走人了，要回家！回家路上訓著了，醒既時候已經係要落車前既一個站，好在咋，如果唔係搭過龍就好笑了．．．呵！

>>February 8, 2008 at 4:47:57 PM GMT+8

2008 年 2 月 6 日 星期三 【乍雨乍晴】

今日大年初一，係度祝各位新年快樂！身體健康！心想事成！笑口常開！

今朝好早係A仔家姐屋企走人了，我琴晚，唔係應該係今朝四點先至訓，睇埋周星馳兩套FILM，哈！好累呀！九點半就起身了，十點鐘走人囉，返到屋企十一點半度．．．食埋個羅白O同爹地媽咪拜年後就o拿o拿聲沖涼換衫，準備出發去姨媽屋企拜年！

如皇年一樣，都係約左二舅母表哥係麥記集合，食埋野先至上去．．．上到去今年好唔同，唔洗又係睇賀歲波，哈！今年可以睇有線娛樂台，good~ 唔洗咁悶嘛！坐左一粒鐘度都走人了，因為今晚細叔細嬸細佬妹一家同A仔都黎食飯．．．媽咪訂左盤菜吃，今次係今年第一個盤菜，往年會食好多次的，哈！食飯過程都冇咩特別，都係傾下計咁，之後，我就報左我個書櫃既書，要A仔幫我一次過揹晒返佢屋企度．．．可憐呀！揹到佢傻左喇．．．辛苦佢了！錫晒啦．．．頭先睇左套好悶既FILM，姊魅情深，一套十分不好睇既FILM！情節又慢，內容又唔好！浪費了時間．．．

>>February 8, 2008 at 4:40:59 PM GMT+8

2008 年 2 月 5 日 星期二 【乍雨乍晴】

今日係年三十晚，可以放假，真係好了．．．訓醒都已經好晏，跟住爹地媽咪買左野返黎比我食，我就係屋企執下野咁，之後就跟左爹地媽咪出左市中心買年貨．．．我自己就買左一條裙，可以新年時著啦．．．返到屋企都已經係七點幾了，吃埋個團年飯我就出門口，因為今晚約左A仔同朋友去行年宵，出去維園行．．．

嘩！超多人囉，我地十一點三度開始行，迫左兩個鐘，都行唔到一條ROLL，唉．．．實在太迫了，好辛苦呢，好在有A仔係我後面攬住我行，下下都護住我，如果唔係我會比人迫死了，可能仲壓死埋添．．．因為前面既人又唔行，後面既人又鼓譟迫住黎行，我地係中間既真係死得架！之後，我地決定去A仔家姐屋企過夜，因為近丫嘛，呵！

>>February 8, 2008 at 4:33:54 PM GMT+8

2008 年 2 月 4 日 星期一 【乍雨乍晴】

今日心情十分矛盾無奈！早前的一份懷疑感又再出現了．．．我唔知應該如何說好，總知是十分之煩惱！我未有決定，因為實在是十分難去取捨的決定！應如何抉擇好呢？可以這樣決絕同忍心嘛？我做到嘛？好無奈呀！！

我同自己講過，唔要再令自己無故流淚，唔想再令自己失去任何自己曾經唔小心失去既東西，而且要學懂好好珍惜一切，尤其係曾經失去過既東西！但係，我而家開始個心好動搖，因為我唔知道自己是否可以真係做得到，我開始感覺到有點東西好像又開始要離我而去咁，呢種感覺令我好可怕，好驚嚇，不能夠形容．．．只知道有些東西好像越來越淡而無味，越來越沒有了感覺，有如行屍走肉咁．．．曾經想把握一些好機會去做一點東西挽救，但係發現沒有人支援，亦沒有人感受到有問題，更加的是沒有人回應及反應！心感到極痛！好痛苦．．．

而家完全唔知自己係好嬲？好激氣？或者是好傷心．．．好似冇左感覺同反應咁！只感到一遍空白的！係，淚是不斷流下來，但都唔知是因為什麼？真的不可以挽救嘛？我曾多次努力過，但係總是沒有回報或好效果出現．．．是我做得不夠好？或者是有人不配合？定係有人從中作梗？是人已經討厭？沉悶？受屈？，或是真的感情已經淡無再淡？沒有了感覺？我好擔心！

今日原本應該係開開心心去準備放假的心情都失去了，明明可以放早，跟住去食公司團年飯，仲抽中百佳100蚊劵應該好開心至係，但係而家做唔到．．．係我自己搵野黎擔心同激氣，定係我真係想得太多？唔知呀．．．．好煩呀！！！

>>February 5, 2008 at 5:45:52 PM GMT+8

2008 年 2 月 3 日 星期日 【乍雨乍晴】

唉~ 今朝起身時突然間感到有點發冷既感覺，而且個頭好痛好重，仲不斷流鼻水添．．．我又再感冒了．．．shit！

好可憐囉，可能今次去camp又凍到了，頂！真係想死．．．最後決定都係請病假！因為就黎新年了，都係一定要先醫生個病先！去睇醫生，醫生都問我做乜咁快又凍到，我唯有話佢知我去左camp啦，佢好突然呀，而且仲叫我呢排唔好再去了．．．醫生要我好好保暖自己，唔好再比自己凍到，仲要我帶埋口罩出街，唔係怕傳染人，而係唔想我容易吸入d府空氣入氣管！唉，真係唔開心呀！無啦啦又病左，好辛苦，個人成日都好累，個樣殘到丫，頂！好似十年冇返過咁既樣！真係訓番幾多都補唔番呀！！下午食左藥，本來想訓下，點知媽媽叫我陪佢去市中心買年貨，好啦，想起我都要買定d禮物去人地度拜年用，因為要去A仔屋企同佢家姐屋企拜年，所以都要買野喇．．．

返到屋企好累，坐係度都訓著左咁，而且周身骨痛，好慘！聽日要返工了，明日可以放早，不過夜晚要食公司既團年飯，唔去唔得．．．因為唔去要比錢囉！而且呢D咁既埸合都要去既，唔可以唔去！個人成日都好凍，仲成日震晒咁．．．好慘呀．．．

>>February 4, 2008 at 2:02:09 PM GMT+8

2008 年 2 月 2 日 星期六 【乍雨乍晴】

wow．．．終於去完個camp回來了！一句講晒，凍！哈！星期六成一點先至起身，跟住同A仔食完早餐後係屋企hea左一陣，之後就同左佢一齊出門口．．．我地去左九龍灣，因為諗住去ikea買野．．．我地去左食個好豐富既tea先，因為要就我，食定d飯同熱野可以星期六晚唔洗咁餓！跟住就去左行ikea．．．本來A仔今晚係約左佢姐姐食飯的，不過後來因為佢媽媽突然唔舒服，所以唯有行完ikea後佢要折返回家．．．

我就一個人入去西貢join同學仔入去．．．入到去不斷上堂，之後半夜一點幾出左去夜行！今次好好彩，因為我地去赤徑YHA，本來係wild camp的，不過個舍監話天氣太差了，又凍又落雨，如果發生事故就麻煩，於是要求我地都係入營舍住．．．於是我地星期六晚可以好好咁係室內住了．．．真係好感謝神！我地出發夜行，係郊外足足凍左兩粒鐘，係呆等果隻，因為呢個都係一個訓練過程．．．三點半再走人，返到營舍都已經三點九有多了，我估訓得果陣都已經起碼四點．．．之但係我成晚都訓唔到，因為實在太凍了．．．我相信果刻只得四五度左右．．．我即使訓住一個羽絨睡袋，再有一張被，再加一件羽絨外套，都仲係好凍，有點起雞皮既感覺，就咁就過左成晚，冇錯，係冇訓過既．．．shit！

今朝八點就吹雞要起身了，一早做所謂既早操，其實都係比教練玩囉，頂！做埋晒我覺得唔認為係早操既早操．．．之後煮早餐食，食完再做左五個考驗．．．雖然過程都幾累，亦都有點悶．．．只係我個人覺得啦，因為果d咁既遊戲，我同d細路都玩得多，而且佢地所謂講既de-breifing我以前都係咁同d細路講，所以．．．有點覺得：報應呀！以前玩人，而家比人玩！

好經辛苦完左個訓練，跟住再揹住個超重既袋行出黃石，足足行左九個字，想死，又熱又重．．．唉！好辛苦．．．出到去見到架96R走左，唉．．．又等！一上車就訓，訓到醒果陣已經係彩虹了！即刻去轉車，再上車再訓．．．返到去屋企，十分累的感覺，之但係仲要出去食團年飯！我沖好涼又要出門口了．．．

今次A仔都有出席，十分好．．．我都知道悶親佢了，一來要佢一早去到我屋企等我返去，二來因為我遲左所以又遲左食飯，攪到佢好夜先返到屋企．．．真係唔好意思了！希望佢原諒及明白！明天要返工，但係而家已經感覺周身骨痛的感覺，而且，好眼訓，因為成晚冇訓囉．．．唉！好怕明天冇信念起身呀！！

>>February 3, 2008 at 3:51:32 PM GMT+8

2008 年 1 月 31 日 星期四 【乍雨乍晴】

今日終於出糧了，不過同樣地好快冇晒d錢，一順眼架咋，唉．．．朝早又係得我一個人，好可憐！！不過電話都唔係好密，於是乎都係上下網咁．．．到左下午，又係一個人出去食飯，去左一間野食河粉．．．其實而家唔敢食咁多野，即使咁凍，都知道食飯會係好點，不過都係食粉好了，呵，唔想太肥！食完飯出去銀行，攪左好耐，超多人排隊，可能一號卦．．．攪左好耐，返到去都遲左五分鐘．．．

下午電話好多好密，聽到有點應接不下，因為得我一個人咋！聽到我丫！好快就到放工了，今日冇蛋糕食，呵，都好，可以減下肥．．．放工好快返屋企了，之後即刻報野，因為要入元朗join呀A仔．．．．入到元朗去左百佳買野，買左好多．．．返到屋企食野，食完野就開始執野了．．．發覺好多問題！A仔罵我好多野．．．嗚．．．不過算吧！佢都係將正確占的話我知！

今日A仔買左張king size既羽絨被回來，有90%的，好開心，可以暖暖了．．．希望好用啦，將買埋d被袋床舖咁，真係好．．．一入到房，見到成間房唔同晒，初時有點唔習慣！好像有點似森林．．不過，相信再執下應該會好點的．．．

>>February 2, 2008 at 6:15:53 AM GMT+8

2008 年 1 月 30 日 星期三 【乍雨乍晴】

今朝本來要跟個同事出去上庭，不過同事又係錫住我，知我病左，又見天氣咁凍，所以叫我唔好出去了．．．太多同事錫住我了，呵！所以一早返左覲塘！今日都冇咩電話同查詢，都幾好，可以比我休息一下．．．但係下午得我一個人係中心，因為另一個同事過左土記幫手，果度唔夠人手．．．於是我一個人去吃飯了！出去左”新之食”度食手攪面．．．嘩，貴左好多，果時十五蚊，而家要十八蚊，飲野仲要加多四蚊！不過，都平過我平日同同事食啦．．．

食完之後一個人去左行惠康，因為要買定星期六既食物．．．買左好多零食，因為怕星期六晚會肚餓！跟住又係一個人返中心，另一個同事又返左中心了，不過佢四點又走人，因為要返土記做野，於是乎又得我一個人係觀塘了．．．有好有唔好吧，有時都幾悶的，不過，我都會有時同對面同事打下交道傾下計講下笑咁．．．咁就過左一日！

放工好快返左屋企，因為好累！返到去食完飯就開始執下d行裝．．．好多野要執，而且越報越忟，因為好多野唔見左咁，好辛苦先搵得番！而家叫做報好大半了，聽日放工返黎仲要繼續呢．．．好驚，睇天氣報告話星期六得番十度．．．好想死，相信星期六晚應該得四五度左右．．．唉！點算呢．．．

>>February 2, 2008 at 6:08:49 AM GMT+8

2008 年 1 月 29 日 星期二 【乍雨乍晴】

今日終於返番工了，可是辛苦的一天，因為要一朝早起身，仲要返土瓜灣，奔波勞碌咁，唉！其實個病都未完全好番，帶住病返工真係十分辛苦！返到公司，吃了早餐再吃藥，個人仲更加眼訓，真係越坐越訓得著．．．同事又錫住我，唔洗我出counter聽電話．．．．我心想，你越唔比野我做，我越想訓．．．

後來，好經辛苦過左個早上，係公司食埋帶左既飯盒，開始做一d手作仔既工作，做下一d剪紙，係for我地counter工作需要的．．．之後整好，同左個同事上去一樓幫手整聽日”成報”去抗議既banner同舉牌，好快手就整好了．．．之後返到中心，有個工友來左求助，上司叫我同佢一齊入去聽，咁就spend左我一個hour了，真係好事，唔洗我咁眼訓嘛！

終於放工時間，我坐到五點九出左去買野返黎食，買左粥同腸粉，good~ 好平，只係下午茶十三蚊既價錢！本來打算訓陣先再去工俱上堂，不過d同事一直都未走，為聽日既工作而討論同煩惱！唉，唯有陪埋佢地一齊傾啦，咁就攪攪下我六點九走人，過工俱上堂了．．．．

今日個堂我覺好悶，因為講裝備，我有好多都知同識，而且好眼訓，但係已經冇食藥了，都係咁．．．我本來唔想返，不過因為要同同學傾星期六既野，非返學不可吧！好在最後十點三都攪掂晒，可以走人，返到屋企十一點半有多了，好可憐！

>>February 2, 2008 at 6:09:10 AM GMT+8