2008 年 1 月 28 日 星期一 【乍雨乍晴】

嘩~ 今日超超超凍呀．．．今朝早起身換晒衫，都打算出門口返工的了，不過突然個頭好痛，覺得好暈，不斷係度流鼻水，心知，我已經中了招！最後，都係太頭痛了，完全不能起身，於是都係打左電話返去請左病假！真係好辛苦呢．．．即刻換番衫上左床訓．．．但係個頭超痛超重，自知已經超級重感冒了．．．唉！

訓到十一點起左身，之後同左阿媽落街食飯，係太興食左大半碟瑞士汁牛柳濕河，雖然好好味，之但係果度個空氣好似好唔夠氧氣咁，好辛苦，個人仲更加暈同頭痛．．．好經辛苦食完之後就去左睇醫生．．．醫生話我感冒，而氣管果度暫時冇咩事，真係thanks god！之後，行經藥房，見到一d暖貼，即時買左一包，希望可以星期六去camp時用．．．不過相信，近呢幾日己經可以用了，因為聽日市區都係十一度，即係屯門應該係八度左右，而星期四更加得十度（市區），真係想像唔到屯門是否又得七度或六度既情景．．．

A仔佢六點打比我黎，當時我訓緊覺，佢話我知佢返左工中途都係唔舒服，好似發番燒，而且仲不斷流鼻血．．．唉，我好擔心佢呀！見佢咁我好心痛佢．．．有種想喊既感覺！因為自己又病左，又唔可以係佢身邊照顧佢，而且知道佢唔似我咁，可以有媽咪睇住照顧住，有人噓寒問暖，有人煮飯我食，又有o岩我飲既湯飲．．．果一刻個心好痛好痛．．．覺得自己好冇用，點解呢個時候病，如果唔係就可以照顧佢了．．．真係好唔開心，突然流了眼淚出黎，好心痛既感覺．．．我都知道A仔同我一樣好心痛我，未來幾日天氣會更凍，佢見我都仲要返工同返學，星期六都仲要入camp，佢都話好心痛我．．．唉！

頭先睇新聞，見到大陸既一班民工既苦況．．．個心都好唔安樂，覺得佢地好可憐！有點感同身受既感覺．．．可能自己都病緊卦！真係覺得中國人好自私，一有事時就只會以自己利益行先．．．真係好一句：”各家自掃門前雪”，真係冇講錯的！以前的詩人已經看通看透這個世界了，知道中國人絕對係一d自私自利既人．．．唉！自己身為中國人真係覺好可恥！唔幫不特止，仲要雪上加霜！頂！希望班民工可以早日回鄉同家人團聚啦．．．

我希望為佢地代禱：

天父神呀，而家眼見大陸大風雪既情況，真係令人心傷同心痛，因為眼見d民工，佢地每一年都係等呢一日先可以返屋企同家人團聚，偏偏而家就遇上咁差既天氣，令佢地既願望做成障礙！而且，佢地係外邊係好辛苦咁工作，每一分每一毫佢地都係依靠勞力而得番黎架，而佢地亦都係將一年好辛苦儲好既錢帶返屋企去讓家人有更好既生活！所以，我希望神真係可以眷顧佢地，看守佢地，可以讓大陸既天氣可以好轉，令班民工可以早日平安回家，阿們！

>>January 29, 2008 at 2:23:58 PM GMT+8

2008 年 1 月 27 日 星期日 【乍雨乍晴】

今日仍然十分寒冷，朝早屯門係得九度咋，好凍呢．．．超唔願起身，而且有點feel到想作感冒咁了，周身骨痛咁．．．唉！曾經有想過拎SL，不過最後都係決定起身返工！

今早都係十分無聊咁渡過，電話同樣唔多，而且心情都一般，因為十分擔心A仔既情況，又唔敢打比佢，怕嘈醒佢．．．不過最後我都係食完飯之後打左比佢，知道佢仲未退燒，果刻十分之擔心，真係有想即時走去睇佢既衝動！是關佢今次103度燒，對於一個大人黎講係十分之辛苦架，我好明白當中既感受，因為我都試過發到咁高燒．．．個人係好散好WING架．．．唉！

今晚係約左好姊妹出來交收一點東西，同埋食飯行下街，本來都有點衝動想放飛機，放工去同A仔睇醫生．．．後來我放工時再打比A仔，佢話已經退左燒了．．．心想，真係好了，終於退左燒，而且聽佢把聲好似精神好了一點點．．．因為之前聽到佢把聲又冇氣又冇力咁，真係好心痛呢！所以最後，都係繼續敵好姊妹的約，出左去葵芳！

我地去左食飯，傾左好多野，仲有一齊行街買下野，我都買了一件衫，平野黎，可以新年或者而家著都可以，呵！好姊妹好有心，佢好有誠意同熱心協助我準備婚禮．．．好多謝佢呀！佢真係一個好有心機既人，真係好開心識到佢，佢比左好多意見同協助我架，真係要錫到佢暈．．．

而家知道A仔退左燒，我都可以話安樂一點．．．不過，而家好似到自己有少少作病咁．．．千祈唔可以病呀，因為有好多野要做，今個星期六仲要去CAMP做TRAINING，一定唔可以病架！但係得知今個星期六會落大雨，仲要係好凍．．．SHIT！真係好煩呢．．．希望個天氣好點啦．．．好怕又凍又落雨的天氣，令人心情好差呢．．．

>>January 28, 2008 at 3:44:33 PM GMT+8

2008 年 1 月 26 日 星期六 【乍雨乍晴】

今日發生左超級多野呀．．．首先係，今朝一早要起身，七點九就要出門口了，但係天氣極之凍，真係好辛苦．．．要周車勞頓，搭左兩程車加一程船先至到．．．真係想死！不過，都十分準時咁到達左目的地，我都覺自己好叻呀，好成功同順暢咁做到，哈！

嘩，今日已經係超級凍架啦，仲要係山上邊，d風真係凍到丫，好似鑽入個身度咁，好慘！仲有，因為要攀石問題，唔可以著得太多衫，又要除咁少少．．．咁樣就出事了．．．唔係即時凍親，而係練習時唔小心趺左落水度，成個背脊同pat pat濕晒．．．shit！好在，條褲係快乾褲，而且件外套係cortex，唔怕濕．．．不過始終條褲要乾都要時間，呢段時間真係好難過，因為個pat好凍之餘，仲要成日比d教練寸同笑，頂！其實已經十分激氣的了，對住呢班咁既所謂教練．．．真係想打人！又寸又成日玩人，我地比佢地整蠱到都不知幾死開心！真係完全唔會理人地安全同生死，d同學仔有危險佢係唔會理架囉，只係會係度笑人地出事．．．邊有咁既人架？！．．．不過，好在都唔難攀，我其實某程度覺都OK易喎．．．好似比起北潭石易攀！因為佢比較多石級，易點攀！所以過程都好順利，咁易就拎到張CERT.喇，GOOD~

攪掂晒後，個人好累，一上車就係咁訓了，好辛苦！天氣又凍，我真係怕會冷親呀！返屋企途中，A仔話我知佢病左，相信係果日去大陸時冷親了．．．死啦，我都好擔心自己都係咁，呢幾日好凍，又係大陸喎，今日又係山上面凍左一日，真係要病好易囉．．．好啦，終於返到屋企，諗住可以安安樂樂食飯，今日打邊爐，而且阿哥入左黎食飯，仲帶埋剛做完手術既芝麻狗狗來，當然十分開心啦．．．但係．．．中間又發生了事！爹地佢將我部電話係一個好高既櫃度整跌左落地．．．SHIT！我部電話呀！！！冇喇．．．．就咁．．．我要買電話了！雖然部電話跟左我三年，不過，我好喜歡佢，因為好好用．．．頂，其實我應該多謝佢還是打佢一身呢？係，我係好想換電話，只不過．．．而家真係十分極度非常極之窮困！錢如果去，都唔想再提了，只知道而家唔可以再洗任何錢，亦唔會再有多餘錢比我去洗！所以．．．天呀！可以點呀？我而家部電話好似handicap咁，可以點捱？而家完全叉唔到電囉，想點？完全係個叉電位接觸不良之餘，連個叉電既火牛都死埋．．．shit & 頂！．．．

唉！今日我係咪好黑仔呀？A仔同我講，佢頭先返到屋企探熱發高燒．．．而家又鬼死咁擔心佢，而自己又咁多煩野．．．我真係想死！叫我要好點脾氣？絕對做唔到囉．．．今日心情一直都唔好，而家直澄係超差．．．XYZ$^#!!$O(%#$*^@#^!()．．．．

>>January 27, 2008 at 3:27:32 PM GMT+8

2008 年 1 月 25 日 星期五 【乍雨乍晴】

琴晚十一點度入到去瑪雅城了．．．入到去又玩桌球，又玩飛行棋，真攪笑．．．到左一點幾就上房dup骨了，因為唔想太夜．．．嘩，今次間房都好似我上次果間，應該係完全係果間，真係有緣．．．不過，間房既冷氣唔知點解好凍，完全係好似雪房咁．．．想轉房又話冇，真係衰！冇計，都要頂住．．．我個技師好似唔係好掂囉，完全係差！有同我去開dup骨既人都知我對於個質數好著緊架，我隨時都會因唔滿意而要換技師．．．不過，今次因為我太累了，所以最後都冇放左佢一馬．．．佢好彩喇！好經辛苦，中間訓下醒下咁，又凍又訓得唔舒服！中間起過身同醒過幾次了．．．

最後八點全部人起晒身，我就自己搭的士去貝岭居賓館，佢地有佢地去玩去飲早茶．．．我都想同佢地去玩架，可惜！我都好安全咁到達會場！好多同事以為我失左蹤，係咁問我去左邊，做乜唔跟車上．．．同事對於我琴晚已經上左黎十分驚訝呢，呵！

今日既內容十分悶，不斷聽D大粒講野，聽住D人係度擦機構鞋．．．SHIT！好討厭．．．仲有，D死人老屎忽對於新政策同計劃既不滿，真係令我好唔順超．．．不過算吧！或許我應該要理解佢地吧！

六點九走人了，好快手就一個人過左關，八點唔夠已經返到屯門了，真快！而A仔都同我差唔多時間返到元朗啦．．．佢買左好多DVD，錫晒佢記得我叫佢買既野．．．我知佢係錫我既．．．聽日要去考攀岩了，真係有點擔心．．．一來唔知聽日點去個考試地點，二來真係擔心因落雨而影響考試成績．．．唉！或許A仔講得對，我要好好考驗一下自己了，要對自己有信心，同埋要清楚自己既定位是什麼．．．我知道了！多謝你的提點！明白的．．．我聽日會努力，要好好咁依賴自己了，唔可以再依賴別人了！

>>January 26, 2008 at 3:48:13 PM GMT+8

2008 年 1 月 24 日 星期四 【乍雨乍晴】

今日天氣極之凍，真係太恐怖了，得十一度左右．．．屯門應該係九度囉，傻架！今朝極唔願起身，所以懶左床五分鐘，呵！返到去中心，完全唔想do咁，完全係56k modem狀態．．．另一位同事都同我一樣，加上今朝電話好少，真係悶死人．．．於是得閒都同同事吹下水，傾下電話咁渡日．．．lunch同樣叫canteen野，不過今次叫番去office食，真係暖好多喎，呵！吃完個人充滿了力量，仲暖左好多．．．本來，想好似個同事咁訓番個小睡，不過我最後都係出左去行，一來要唱定d人仔今晚同聽日用，二來唔想訓，怕會肥死．．．

嘩，d人仔好死貴，100:92．．．shit！終於捱到放工了，今晚會上去大陸DUP骨．．．於是放工即刻去左搭mtr出九龍塘轉火車．．．去到九龍塘站收到A仔電話話有個朋友放左飛機．．．真衰！攪左一大餐，最後都決定繼續去，好在另外兩個朋友冇甩低咋！我地join埋後就出發了．．．

我地先去左行東門，大家都買到自己喜愛既野．．．yeah~ 本來仲有個朋友話黎架，點知最後又話唔黎，真衰！跟住唯有我地自己去瑪雅城了．．．

明天我地會各自各了，因為我要去開會，佢地有人要先走，亦有朋友會再上黎join呀A仔再去玩．．．真係好攪笑．．．

>>January 26, 2008 at 3:50:11 PM GMT+8

2008 年 1 月 23 日 星期三 【乍雨乍晴】

嘩，而家係超凍囉．．．今朝起身時都仲有十四度架，所以出門口都唔係著左好多衫，點知去到三點，睇下天文台，發瑤已經卦起左寒冷天氣警告．．．真係可怕呢！突然得番十二度，屯門仲只有十度．．．嘩嘩嘩．．．好凍，真係好突然！

今日返到觀塘，入到一間日日都會去既面包店．．．心想，真係唔知食什麼好？因為開始十分討厭或者厭倦吃包了，但係唔食包又可以吃什麼？當然，最重要既係要平！因為近日十分窮困！已經陷入經濟困難，亮起了紅燈了．．．SHIT！都唔知點死，好怕真係儲唔到錢年尾結婚！如果儲唔到既點算？D股票而家又做晒大閘蟹，唉．．．六月去四川心知一定要洗好多錢，但係．．．唉！唔想令大家掃興吧！所以同自己講，點都要死掂D錢出黎．．．但係，我又可以點死出黎？真係好煩，是關．．．一言難盡！今日先至處理左一D銀行事宜，而家心煩到要死，真係好擔心，有十萬個擔心．．．唉！真係唔知點死好？眼見自己戶口既錢不斷直線下降時，好驚！唉．．．

計一計，仲有一個星期先至出糧，其實真係好死！而且，下個月開始又要扣MPF了，咁又少了好幾百蚊，SHIT！突然間好恨錢呀．．．

放工去左IKEA，因為要去買個櫃！其實之前睇左一個既，不過之後再去度番清楚個SIZE，同埋再諗清楚，都係覺得．．．雖然果個櫃好平，只係二百幾蚊，不過，始終覺得個SIZE太細了，放左係個空間度，好似晒左其他冇用到既空間咁，而且佢既質地有點兒”雞”，舍　櫃上面都唔方可以放到D重少少既野，所以先至覺好浪費空間！如果佢質地硬實點既，上面放什麼，再放多點都得丫嘛．．．於是乎，都係買左另一個更大SIZE，更好質地既櫃．．．係，個價錢真係貴好多好多，最後要七百蚊落樓，不過．．．我覺係值架喎！起碼襟用點，用番幾年D錢都係番度啦．．．個內籠又大點，又可以放多點野，上面又可以再放，幾好丫．．．不過，都係我一廂情願咁諗！但係，我最後都落實買左！A仔今次比我話事呀！其實，去到果陣真係諗左好耐，左度加度咁．．．真係好怕買錯比A仔話！所以我係IKEA足足流連左成粒鐘先至下決定！希望A仔佢都同意我既想法，都喜歡個櫃啦．．．

>>January 24, 2008 at 2:23:20 PM GMT+8

2008 年 1 月 22 日 星期二 【陰】

今日既天氣唔多好，成日都係陰陰天咁，真係令人心情唔好．．．剛好親友探望自己，所以十分差心情．．．！

今日都遲左出門口呀，不過都冇遲到，搭車要企住咁出去，真係想死．．．好在最後都有三個字坐下訓下咁．．．好可憐！返到去觀塘，突然好想食一d熱既早餐，於是乎想起左一樣野，就係．．．馬拉榚！回想起以前在救世軍做時，佢樓下有間聖安娜，裡面有新鮮熱辣既點心買的，而我最喜愛既係馬拉榚，因為實在太美味了！剛好，公司留下有間酒樓，其實朝朝經過都有點心動想食點心，只不過怕好貴，而且又怕吃唔晒好浪費．．．不過最後都決定走埋去睇睇！見到只有千層馬拉榚，心想：咁早食咁甜既野好似唔多好咁，於是都係叫左一籠叉燒包，有三個，共八蚊．．．都幾ok喎，好好味，熱辣辣的．．．good~ 令我今日既早上增添溫暖！當時同事見我買左點心食，佢同時比我毒害，都走左去買，哈！肥死了．．．

今日lunch同左個同事去左一間叫"上海坊"度食野，叫左一個排骨粗炒，小籠包，同埋葱油餅！其實話平唔平啦，都食左四十幾蚊！不過味道好ok．．．到左五點，今日竟然冇包點吃，因為今日原來係尾牙，師傅佢收了爐呀，所以冇好野食了．．．都好，可以唔洗咁肥，抖番一日先，呵！再咁食死得人架喇！

放工，本來今日係公司既權委會去食團年飯，去尖咀ceo唱k，不過．．．實在唔多想去呢，一來好累，二來都唔多舒服．．．於是，都係選擇左約A仔！今日佢都約左個朋友出黎食飯，我地去左食韓國燒烤！想起，我都有好兩三年冇食過了，好像有點老土吧！哈！不過我都覺麻麻地咁，一來唔平，二來我覺得同我以前細個食果陣已經好唔同了，冇左應有既風味，已經好港式了．．．想起以前細個爹地媽咪帶我地去食果D，真係好韓式既餐廳，而且佢張張台都有個好長既抽油燼機，由個燼面直上天花的．．．咁樣D油煙可以完完全全走晒！不過今日食完就成身油煙味了．．．加上食物都係港式化了，一定會型合香港人口味的，什麼魚生壽司都會有囉，真係好笑！

食完野，我地去左行街，因為A仔想睇下D背囊．．．其實都想佢搵到個o岩既，咁我可以唔洗諗情人節加拍拖九周年份禮物嘛，呵！同朋友分左手後，我同A仔繼續行街街，去左好多地方行．．．想想下，又計計下，六月果陣去四川雪山可能要好多錢錢呢，因為要有好多裝備！不過，而家最需要擔心的，當然係我之後考山藝既事情啦．．．黎緊星期日要考攀岩了，有點驚！而家連點去個地點都有點擔心，因為聽聞要在落車點後再行三十分鐘先至到達．．．我怕會迷路呀．．．

>>January 24, 2008 at 2:09:22 PM GMT+8

2008 年 1 月 21 日 星期一 【陰】

近排d天氣真係反常，初頭又話會暖，點知都係涼涼地咁，真係衰．．．聽聞好多人估計新年都會凍．．．回想起上年新年，真係唔太凍，我都係著d薄衫裙加件皮褸咁．．．都係全黑色出現．．．今年都應該係咁樣出現架喇，哈！實比d老人家鬧死了．．．

今日返工時間都好多電話，同另一個同事兩個一齊睇場．．．今次係我地首度合作，不過過程都好愉快！同呢個同事講左好多野，主要都係圍繞講其中一個同事既事情．．．哈，即係講是非啦．．．不過，真係好開心既過程．．．之後下午去左食沙爹王again，都係照舊白咖哩豬扒飯啦，再加多個上湯菠菜！good~ 好豐富！

下午五點，再次有野食，今日係食面包，係一個我會比一百分既面包；佢有鮮奶包既面，即係十分脆口的，有朱古力既吉士同朱古力醬做心，再加點芝麻係面．．．正！真係極好味道！而家想起都好想再食．．．無奈師傅話今日呢個包既卡路里係勁過琴日個tiramisu囉．．．shit！等我仲係咁食添，以為面包係冇蛋糕咁勁．．．哼！肥死喇今次．．．師傅已經成日叫我而家好磅定自己有幾重，到時可以有個對比喎！頂！已經知肥左啦，而家根本都唔想再上磅喇．．．我堅決一定唔可以超過一百呢個關口架．．．要keep住！

放工後好快手走人返屋企了，因為要執點東西就過去A仔度了，因為今日送個書架黎呀，要先睹為快去睇嘛！不過，今日超肚痛，唉，男人唔會明既女人生理情況．．．每會都總係要探我一次既．．．好煩惱！而家暫時A仔度已經執好左佢d野上左架，只欠我果d．．．不過最煩既係，本來星期四可以送埋床黎，但係屋企冇人可以收到貨，而家又要改期了，煩死．．．都唔知會唔會過埋年先送，如果係就麻煩死了．．．好討厭！希望佢早日送到，我地可以快點執好野去啦．．．因為而家其實好多野叫做執住放住先架喇，遲d攪好晒後都係要一次大執架！．．．真係煩死了！好怕好怕．．．

>>January 23, 2008 at 7:50:58 AM GMT+8

2008 年 1 月 20 日 星期日 【晴】

今日好晏先起身，good~ 之後同左A仔食早餐後出門口陪佢返工．．．去到市中心我地就各散東西，因為我今日約左妹妹去剪頭髮．．．初時，我真係諗住剪架咋，點知最後都覺我D頭髮成日都好唔聽話，飛起晒，於是乎都係電左去算，方便打理．．．有些人可能會覺電髮係難打理，但係我反而覺都幾OK的．．．

攪左好耐呀，我最後六點半走人，妹妹同佢個朋友都未攪好．．．我走左之後，一個人行市中心，去左一間賣衫既賣左兩條裙，用黎過新年！之後，去左ORBIS，初時諗住只係買洗面既野，點知．．．最後買左好多野，OUT BUDGET呢．．．不過，希望今次買左番黎既野真係可以幫到我改善我既皮膚情況啦．．．因為近日真係差左好多，背脊同心口生晒粒粒，面都係，狂生粒粒呀！唉．．．我相信係成身都係毒，因為都排唔出．．．仲有，塊面好衰，又多雀斑同印，毛孔又現．．．唉．．．要努力比心機攪好佢．．．仲有，係時候再次積極做番FACIAL了，呵！

返到屋企，食左少少野，跟住就同左爹地將屋企部死左既電腦拎去比A仔整．．．真係衰，其實部電腦死左幾日了，真係討厭！好在而家屋企有部手提電腦係度先方便少少咋！如果唔係冇左電腦真係死人．．．拎到去A仔度，佢好好，即時幫我整好多野，真係辛苦晒佢了．．．佢明天仲要一早六點幾起身，之但係整到一點先攪好．．．真係要錫番晒佢呢．．．

>>January 21, 2008 at 4:02:15 PM GMT+8

2008 年 1 月 18 日 星期五 【乍雨乍晴】

今日終於冇之前咁凍了，真係好．．．心情都好了很多呢．．．

今日都係一個人係觀塘做野，電話不算多，到左十二點半就走人返土記，因為今日下午要開交流會，所以早少少返去同同事一齊叫外賣返去食．．．返到去時間剛剛好，一點到達，仲有野食添，good~ 十分豐富．．．吃了很多很多．．．

近日個肚都仍然好痛，都唔係太順暢咁，唉．．．好辛苦呢！

下午開交流會，一個字，悶！真係好悶，好眼訓．．．好經辛苦捱到四點半完場，太好了，即刻走人，出左去causeway bay搵A仔同佢家姐姐夫．．．之後去左一間叫LES ARTIST CAFE度食，係第一次去，都唔錯．．．食左個cake set，個朱古力chesse cake好正，有十粒星呀！！之後，大家傾計傾左好多野，仲計劃遲點大家一齊去旅行玩．．．十分期待呢！

跟住同左A仔返元朗．．．其實本來好地地的，後來大家又為左一些事而爭扎．．．真係好唔開心，次次都係咁．．．不過，最後大家都叫做settle左，之但係，最失望既係，本來今晚係可以二人世界，仲諗住煮愛心牛扒比佢食，點知攪成咁，大家都冇咩心情吃了．．．好可惜！

>>January 21, 2008 at 3:55:42 PM GMT+8