2007 年 11 月 15 日 星期四 【晴】

琴晚同左個好姊妹吃宵夜，食到十二點幾．．．係A仔未到之前，我地係咁傾計，傾左好多好多．．．姊妹好好，不斷聽我係度”伸”，講左好多唔開心同激氣既事．．．真係好多謝佢成日都咁願意聆聽我發勞騷！當然，A仔黎到之後既氣氛都好好，佢不斷比左好多面試TIPS比好姊妹，希望佢可以對今日既面試有多D把握．．．好姊妹終於今日完成左面試，下星期會知道結果．．．希望佢伯會成功啦，同A仔一齊合作做野都幾好玩下架，呵！

今日十點幾就起身，因為就係為左件好好笑既事，就係．．．要逅電視劇既大結局囉！哈！其實呢套劇我一向都冇追架，因為係ATV既劇，我好少睇既，只係A仔有追開，所以就陪左佢睇啦．．．睇完劇A仔煮左野過我食，之後．．．都有點嬲嬲地，佢叫左我幫佢手做左點家務後，佢竟然走左佢訓覺．．．激氣！冇理過我！哼！後來見嬲嬲地，本來想走人唔理佢有佢訓，點知佢後來知道衰左，就叫左我留多陣傾下計．．．

講左一點大家近日都好頭痛好唔愉快既事，不過亦都係大家需要正視既問題！係遲早都要解決既事．．．真係十個唔開心呀！希望可以早日處理到啦．．．

之後佢同左我去新元中度食野，我地去左RED FOREST度食下午茶，個咖哩海鮮炒飯真係唔錯，仲有果個吉列魚柳沙律都好好味呀！食完之後我地去左百佳度行，掃左好多貨呀！重重．．．之後我就一個人返屯門了，因為佢今日約左朋友去佢度打機，過埋夜．．．本來佢地話打埋聽日既，不過後來A仔又話推左個朋友聽日唔打喇喎，要陪我咁話．．．唉！我其實唔介意佢同朋友玩，反而我都享受同朋友一齊既時間架，唔係成日連體人咁架嘛．．．不過算啦，佢咁有誠意話陪我，我就梗係奉陪啦，呵！

>>November 16, 2007 at 1:37:52 PM GMT+8

2007 年 11 月 14 日 星期三 【晴】

今朝鼓起了勇氣，同A仔講左自己心中既想法同唔開心既地方．．．好似個心舒服左少少．．．暫時我都感到大家其實都係有心去想為件事做一點東西的．．．希望真係如我所想，大家可以一齊努力向前啦．．．

送左A仔返工後，一個人回家了．．．其實呢兩日好好笑的，因為A仔中心正想請社工，而我就唔打算申請了，因為費時造就問題要大家去面對吧！而剛A仔又問起我有什麼人可介紹比佢時，突然就想起左一個姊妹，佢近日正打算想轉換新環境工作．．．於是乎就打左比個姊妹．．．這兩天大家都衝衝忙忙的做了很多東西吧．．哈！終於姊妹會於明天面試了．．．希望佢會成功啦！加油努力呀！成功左要請食飯呢，呵！

A仔先兩日打比我，叫我下星期幫佢手講TALK．．．係關於DRUG ABUSE既野．．．其實絕對係冇問題啦，因為係老本行，呢一年都做唔少關於DRUGS既教育工作，講TALK完全係冇難度．．．不過初時就話要講長少少時間，有可能比得番個講社FEE我，點知後來又唔得，叫我做番義工．．．其實都冇所謂啦，橫掂而家都冇野做，承機又可以用D時間去PREPARE下，整下D教材囉．．．都咪話，好耐冇講過TALK了，雖然只係個半鐘既時間，但係都唔可以太樣衰架嘛，哈！要比心機做去佢喇，YEAH~

今晚好攪笑，約左個好姊妹同A仔一齊食宵夜，要去交流下心得丫嘛，呵！好開心呢．．．會去食B仔呀，我至愛既甜品店之一．．．

>>November 15, 2007 at 11:31:53 AM GMT+8

2007 年 11 月 13 日 星期二 【晴】

今日A仔佢只係返朝早一節，於是我一點鐘就走左佢中心度等佢放工．．．之後同左佢D同事一齊食LUNCH，食完之後同A仔出左街．．．我地今日去左好多地方！首先搭西鐵出左南昌再轉K16出尖沙咀，行左一陣之後再搭船出去去灣仔，係灣仔行左一陣後再JOIN左A仔一個朋友拎少少野，攪掂後我地再搭番船過大角咀果邊，因為要去一間攀山中心取之前上既一級運動攀登既證書．．．拎完證書之後就行過去南昌搭車！

係行返去既旅程中，我同A仔講開一D事，令到大家都唔係咁開心！唉．．．其實，有時做人都幾矛盾，總係會有D想逃避既野．．．是乎你係想用幾長既時間去逃避落去？定係你想如何去處理克服到佢喇．．．真係好唔開心，有十個唔開心．．．佢成日教我，做人唔可以畏首畏尾，唔好成日都諗左最壞一面先，要面對挑戰克服問題先得．．．咁點解，你又唔可以做到呢？你究竟怕什麼？．．．真係幾激氣，尤其係，當聽到一個唔太成熟既原因或者藉口時，更加會覺得．．．自己係咪真係太傻呢？我係咪高估左自己係佢心目中既位置呢？定係．．．我係咪想像得太完美呢？原來要走進人生另一個階段係咁多問題同咁高層次架，唔係一件簡單既事．．．

當然，我梗係希望佢可以放下心中對進入人生另一階段既爭扎，亦希望佢真係可以嘗試為住之間既一段感情而願意走進多一步．．．我是願意的，你呢？可否一起面對挑戰？一起走多一步？不要什麼都”怕”左先，好嘛？有時，未試過又點知呢？係咪？

>>November 15, 2007 at 7:09:36 AM GMT+8

2007 年 11 月 12 日 星期一 【晴】

今日訓到十點幾起身了，之後在家做運動，積極地玩”呼拉圈”，哈！因為經本人過往經驗所得，每日做10-15分鐘呼拉圈，維持大約一個月度，係有助纖腰同減肚腩的！因為．．．近來心廣體胖了，真係嚇驚呢，好可怕！正所謂”休養生息”．．．而家想唔肥都幾難！所以橫掂在家有時間，倒不如玩埋呼拉圈啦．．．因為只係跑步都發現唔係好收到身呢．．．

做完運動後就上網做下無聊野．．．到左兩點幾，媽媽叫我同佢落街食野，我地去左一間日本料理吃下午茶！我叫左一個壽司拼盤．．．都應該有七至八舊左右！係食晒囉！o．．．好肥呀！之後，媽媽去做gym，我一條友返屋企．．．返到去就親有時間上網搵下工啦．．．都有send左三封信既．．．希望早日有回音！

攪掂之後大約五點半我就出門口了，因為今日約左妹妹陪佢出去又一城．．．妹妹之前買左d野爛左，所以叫我陪佢出去換．．．算啦，橫掂冇野做，去啦．．．今日著左對新鞋仔，好刮腳呀，痛到傻左！即時去左萬寧買膠布貼貼呀！可憐！係又一城好多野睇呀！我地先去左page one睇書，之後去左行i.t，跟住再去左uniquolo同妹妹換野同睇野．．．之後太肚餓去左food court食吉吉家，好味！

食完飯見九點幾，即刻走左去H&M行．．．佢又一城果度有兩層，初時唔知去左上邊個層行．．．但係d野睇黎睇去都唔係好o岩心水咁．．．之後走左落去下一層果間行．．．．原來young line係下面果層架囉，唔怪得之前上層睇極都唔o岩feel啦，哈！睇到人地打烊我地就走人喇，係最後一班走既客人！

之後，我地搭火車去番旺角，諗住橫掂都係要去旺角轉車，不過上去新世紀走一轉啦．．．點知．．．去到黑晒囉，舖頭都閂晒喇，唯有出去搭車啦！點知上左架超舊既老爺車，行得極慢，好似螞行咁，好討厭！最後落車時，見住後一班車，係新車黎架，接住同我地一齊埋站落客囉，頂！仲見到爹爹地佢落車，於是乎一諂上番屋企．．．

今日好累呀！因為著左對新鞋仔，又刮腳又高跟．．．唉！其實都不是太高的，只係近日少著高跟鞋，唔多習慣咁．．．對腳傷痕累累了．．．嗚！貼滿膠布呢！

A仔之前打比我話佢聽日只係返朝早一節，下午可以陪我，十分之開心呢．．．終於可以同佢見面．．．兩日不見如隔三星期啦，哈．．．聽日我地約左先係屯門吃飯之後再出去行街．．．因為我地夜晚要去大角咀度拎CERT.，十分麻煩！不過算啦，當行街囉．．．

>>November 14, 2007 at 3:14:14 AM GMT+8

2007 年 11 月 11 日 星期日 【晴】

琴晚十點幾就訓著左了，就連A仔十點半去完街打比我時都已經訓到呼呼聲吧，呵！最後A仔本來話返到屋企打比我既，不過佢又怕會嘈醒我所以冇打到．．．其實自己果陣係一邊訓下一邊醒下，好想又接到A仔既電話架，就連部手機都放左係自己枕邊呢，呵！

真係好訓，今朝成十點幾先起身，真係足足訓左十二小時．．．嘩！醒左之後見屋企冇人，就上下網咁啦．．．本來係知道要開始做份筆試架喇，不過一直都唔太ready去做，因為一做就要一鼓作氣去架啦嘛，唔可以半途而廢．．．所以攪下野，十二點開始做，一路睇住十一點九開波做果套”老婆大人”．．．而家好好睇呀！雖然有一排miss左冇睇到，不過d情節都仲記得，所以都ok好睇呀！！

睇完之後十二點九，今次真正開波做筆試了．．．真係難攪呀，好麻煩！麻煩在．．．唔係佢既題目難做，而係．．．一條本來可以三言兩語講晒既題目，佢就要人用800字去答囉，傻架！而且有d題目係最好有stat.去back up會好d，所以．．．好麻煩呀！！

做到中途，媽媽又借左電腦用左一個鐘，後來三點幾，媽媽又話叫我同佢出去市中心，因為佢部電話有少少問題，而佢又唔知點同人講又唔識用，咁唯有要我出馬啦，同佢一齊去左市中心食野，之後再去左one 2free度整電話．．．走果陣真係比媽媽激死，唉．．．追錯車囉，佢一見車就追，其實果架車係返到屋企既，不過有其他車係可以用少一半呢架車既時間返到屋企架囉，咁又浪費左我多三個字既時間先返到屋企喇．．．

返到屋企即時又開工了．．．好經辛苦又做完了一條！後來，妹妹回來了，終於救星回來！因為最後一條是英文題，其實唔係難做，只不過佢要好多point去back up，仲有係好難吹到500字出來呀！好在有妹妹幫手比意見我點寫咋．．．因為我一向都只係善於寫議論文，要我在文章中加d什麼連接詞，形容詞咁．．．真係好難呀！好在妹妹幫手咋，終於做完歡樂今宵前攪掂左！yeah~

嘩~ 好耐冇試過咁做功課了．．．令我回想起以前讀city時要做paper，同埋考a-level時既情況．．．哈！真係辛苦！都好，人地叫我星期二前先交，而家星期一就交左喇，唔洗夜長夢多吧！可以專心做其他野了！

>>November 13, 2007 at 3:19:49 AM GMT+8

2007 年 11 月 10 日 星期六 【晴】

wow．．．今朝好早起身，八點就起身了，同A仔一樣都唔多願起身，因為好眼訓呢．．．不過都係要起！同A仔在家吃了早餐，是一個價值$9的一個包，在美心買的，什麼日本芝士軟心包？嘩，真係幾順下，不過都係最後試左！突然想起，琴日我地去左沙田既IKEA，佢果度既CAFE既野食真係太好食了．．．決定下次再去，要特別吃那個肉丸呢！好想好想吃．．．

吃完早餐我地就出發去朗屏果邊個單車店，因為今日要幫A仔手帶單車活動．．．我地成班人二十多個起動動的踩去天水圍，嘩，從來都冇試過咁多人一齊踩單車的，真係勁！後來，我地去左天耀，我地係果度既公園野餐（其實係買外賣係公園度食．．．）都別有一番風味架，幾好，風涼水冷！之後，我地一齊踩去洪水橋，決定去果度一間好好味既豆腐花店吃豆花！果然係正，又平又好味，$4一碗冰凍豆花！YEAH~ 之後我地再去番元朗．．．其中一班人說要走了，因為太累，其中有兩個男仔說耳油未盡，所以A仔說可以再帶他們去入錦田及南生圍走個圈，於是我亦跟住左去．．．嘩，真係好累呢，因為已經踩了一日了，都好幾個小時呢．．．最後真係想死咁！我一直堅持住，我同自己講：一定得既！我要堅持落去！仲不斷祈禱，希望神可以給予我力量同意志去完成個旅程！我即時感到渾身有力起來了，好神奇吧！呵！最後終於捱到去南生圍的橫水渡，好像兩星期才搭過吧，哈！之後再一直踩番去交單車了．．．

踩完真係好累，有十個累呢！我之後就同A仔係西鐵都分別了，因為佢要出去旺角約了朋友吃飯，而我就一個人回家吃飯了．．．帶住疲累的身體回家真係好可憐呢！回來後就即時打比A仔，因為掛住佢丫嘛！之後就頂唔順走去沖涼了，因為好臭好濕呀！

妹妹頭先好好，比我睇左佢琴日去DISNEY既"戰利品"．．．佢好好呀，買左個高飛既磁石公仔比我，真係有我心了，好多謝佢，成日都記住我！HEHE~ 都幾窩心架！

聽日要好好留在家做那份工聯會既筆試了．．．琴晚比左A仔睇，佢都有點嘩然．．．唉！睇黎都係要比心機坎做了，A仔一點意見都沒有比我呢，可憐呀！所以決定明天要成日留在家努力做份功課了．．．

>>November 11, 2007 at 12:22:22 PM GMT+8

2007 年 11 月 9 日 星期五 【晴】

嘩嘩，今朝真係死，我竟然見工遲到呀！我從來都冇試過架，真係幾激氣架！因為我去到旺角後要轉小巴，點知個死人司機要等多少少人先開車喎，D死人紅VAN就係咁架喇，討厭！最後等左成二十分鐘先至開車，SHXT！！

好啦，去到土瓜灣啦，點知我又記錯左地方，我以為係工聯會既總會，點知．．．我要去見果個部門已經搬左，去左過兩條街果度．．．好左，唔係要行好遠，都係五分鐘度．．．不過，當我一睇錶時，SHXT，已經係十點九了！我係見十點九的．．．我不斷跑跑跑．．．最後去到十點十個半字！頂！一上到去就不斷同人講SORRY，話自己係屯門黎唔係好識路，所以遲左！！唉．．．

嘩，今日見果陣真係．．．共見左一粒鐘，只係度傾，有三個人IN我囉．．．佢一個係工聯會秘書處既人，就不斷問我有關個人對工會，工聯會，政治．．．的意見！嘩，真係幾小心答架，因為答錯少少野都可以即時比人KO！好在我琴晚有溫書，知道工聯會既原則係什麼．．．咁就係咁吹水囉，仲有係咁講到自己政治中立，幾咁愛國．．．而家諗番起都覺好假！而另外兩個人就係勞工服務中心既人，就問番份工相關既野，同埋比D CASE我去考我，仲有考我英文．．．佢考我英文時．．．哈，我估唔到佢只係考我答一條題目咁多囉，真係令我懷疑佢地既英文能力．．．不過算吧！

本來諗住攪完啦，點知走前又話會SEND一個EMAIL比我，關於一份筆試．．．嘩，我心諗：洗唔洗呀？！咁麻煩既？．．．唉，頭先開左個EMAIL睇，頂．．．超長既筆試，要答超多題囉，傻架！雖然係星期二前交O者，但係都想死喇．．．傻架咩！真係需唔需要呀！一個咁既POST要咁大陣象嘛?唉．．．

之後見完工約左A仔出街，我地係旺角JOIN左．．．初時想去DELIFRANCE度食，因為A仔有COUPON，點知．．．真討厭，又係星期六日唔用得囉！頂！之後都要食架！食完就去左行街，我就買左對鞋，係皮鞋，又唔太高跟的，因為唔想太高！後來，陪左A仔去左沙田，係果度間NORTH FACE度，A仔買左對鞋，好貴，成$1150．．．不過佢好幸福，佢家姐送比佢的，因為佢今個月生日！．．．而我會送什麼比佢做生日禮物？我會送一個背囊比佢，遲D會同佢去揀！嘩，行到好累好累呢．．．

係沙田搭番263返屯門，真快，半粒鐘車程已到豐景園，之後再轉番小巴返碼頭，總車程都係九個字，超快！一陣會同屋企人出街食飯，之後會去A仔度，因為聽日要幫佢手做義工帶活動，所以今晚去定佢度要商討D野，仲有當然既係．．．我會帶埋份筆試過去問下A仔啦，希望佢比少少建議我點做！當然，我唔會要人”請昌”的，我係唔會咁做啦！

PS，妹妹今日好開心，可以去DISNEY玩．．．已經記唔起妹妹今次係第幾N次去了．．．真令人羨慕！我從來都冇去過香港果個，只係去過日本果個咋！希望有手信啦，呵！

>>November 10, 2007 at 11:48:48 AM GMT+8

2007 年 11 月 8 日 星期四 【晴】

今朝同左A仔吃完早餐後，同佢一齊去左搭西鐵，我冇送晒佢返工呀，我係天水圍站就落車了，因為約了媽媽，姨媽及二舅母去嬸嬸屋企．．．是次係我第一次去參觀嬸嬸屋企的，其實一直期待，因為一直好想去探探堂弟妹隻狗狗HONEY．．．呵！

果然HONEY是一隻十分可愛的米白色PUDDLE．．．真係好鬼得意！佢一見到我同媽媽就發晒癲咁，可能又係FEEL到我地身上既動物氣味卦，所以同我地玩時特別癲的，哈！真係好好笑，不斷同佢玩摸肚肚同咬咬手．．．當然，唔係真咬啦，係好輕力果隻．．．好得意呢．．．好好玩呀！波波貓就唔同了，一定唔會咁樣玩發！

玩完狗狗後，我地去左附近飲茶，飲完茶，我，媽媽，姨媽同二舅母就一齊去搭番西鐵出去．．．二舅母返美孚，姨媽返佐敦，而我同媽媽就出去尖咀行街．．．我地只係去左UNIQULO行咋，不過最後都只係媽媽買左件FLEEZE比我，什麼都買唔到呀！買完之後，本來A仔話約左佢家姐出街，點知又話佢家姐放仍飛機，咁就約我出去旺角啦，點知又再打比我話佢家姐又出得黎．．．唉，玩死！我仲要幫佢出去交番和記個死人MODEM呀！個死人和記好賤，前日先SEND信黎話我地CUT左個寬頻，要我地十四日內交番個MODEM，點知佢既出信日期係一號囉，即係要我地十五號前比番佢．．．但係收到信既時候已經係八號既夜晚．．．超賤，話如果在限定日期比唔番佢就要比五百蚊！有病架，明屈架喎．．．所以唔順氣，琴日幫A仔拎左出去先啦．．．又要伙去搵餐死呀！激氣．．．不過算啦，我又唔太介意A仔放我飛機既，因為我知佢同家姐有野要傾，所以都唔阻住佢地了，同媽媽行完街就返屯門！十分累呢！

明天要見工了，所以今日好努力去溫習，去搵資料！因為都唔想太樣衰．．．加上，A仔都比左少少TIPS我要準備D乜野好，所以都好比心機去準備呀！希望聽日成功啦．．．

>>November 10, 2007 at 11:52:57 AM GMT+8

2007 年 11 月 7 日 星期三 【陰】

今朝起身本來打算落街去跑步，點知見個天陰陰咁，又好似想落雨咁，所以最尾決定唔去，留係屋企自行做運動！近日發現自己肥左好多．．．正所謂”養精儲休”，成日係屋企，唔係坐就訓，唔係訓就食咁．．．唉！唔肥就其了！

今日下午同左媽媽去飲茶．．．真係老土，因為成三點幾先去，所以叫乜冇乜，真係掃興！最後是是但但咁叫左有既野食飽就算．．．不過都好在，可以食左我冬天至愛吃既．．．臘腸卷，yeah~ 正！十分好味道！之後就同左媽媽行左陣街，因為想睇下d高跟鞋呀！不過最後都唔係好睇得o岩．．．

近排，發現波波貓好奇怪！成日都無啦啦個人好驚咁．．．有時，媽媽開左個大門想出去走廊淋花，咁波波佢　feel到媽媽開左個門，就明明係我房係我張床訓緊，都失韉無神咁雞咁腳走左出廳，confirm左真係開左門後就走左去電視機櫃後面或者梳化後面呢埋！真係古怪！一係佢知道有人黎屋企時，而果個人佢係從來冇接觸過既，佢都係同一個情況！而最好笑既係，佢近日竟然好心野，有時媽媽又彼開左大門口去淋花時，佢竟然試過走左出門口睇住媽媽，而且一點都唔驚，仲試過出左門口去賞花添．．．佢既行為十分極端，好奇怪呢．．．唔知佢做乜！仲有，近日發現佢好驚跳上跳落．．．以前好輕易就可以由我書桌跳上我碌架床上格，然後又會係床度好輕易跳番落地．．．不過近日佢次次跳上跳落時都係叫一大餐，好似個樣好驚咁，但係又好想跳喎．．．而家我多數都係抱佢上落，一來希望安慰到佢唔洗驚，二來希望減低佢受傷既機會！始終佢而家年紀大左喇，可能係咁驚左跳上跳落啦．．．其實，波波年紀唔細喇，有時諗諗下都好驚，因為佢始終有日會離開人世．．．唉！不過而家都唔擔心得咁多，只希望比到幾多既愛佢就幾多啦．．．

今晚計劃接A仔放工，因為已經好幾日沒有見過佢了．．．有時候知佢為工作，為朋友，而沒有時間陪伴我．．．都有點唔開心架！不過，又想到其實每個人都應該有番自己私人空間同想做既事，所以，我都好明白的！

PS, 今日接到電話叫我星期六去見工．．．希望可以成功啦！

>>November 8, 2007 at 1:06:27 PM GMT+8

2007 年 11 月 6 日 星期二 【陰】

唉~ 今日既身體狀況都唔係太好，七點就醒左了，又係不斷咳同氣喘．．．後來噴左氣再訓，十點鐘再起身！起身後都留在家中，自己整左d早餐吃後，就上網搵下工．．．都唔知點解，身邊d朋友個個都話：”近排幾好景丫，要搵工唔難架！”．．．係，個市係幾好既，都幾多空缺！只不過．．．我唔係唔想試，只係．．．我都知自己過往太過jumpy了，我期望下一份工係我會好穩穩定定咁做落去，唔想又係做唔o岩又係要辭工走人．．．就係唔想再係咁浪費精神時間，我都唔想話太揀擇架，但係．．．真係唔想亂搵工做囉！唉．．．

到左下午，同左媽媽落街食野．．．無無聊聊咁，食左個lunch之後就一條友返屋企，因為媽媽去做gym！返到屋企同朋友仔傾msn，傾左好多野．．．聽見佢而家好幸福！希望佢身邊愛既人會越來越愛佢啦，錫到佢暈．．．哈！

至於A仔，今日佢放早的，不過因為約左朋友夜晚食飯，所以陪不到我了．．．不過見佢近日都唔係好陪訓，都唔敢叫佢陪我了，不如讓佢好好休息吧！聽日佢仲要返三節呢，一朝上法庭（工作關係）．．．好可憐！佢真係要好好把握時間休息了．．．真係心痛死我呢．．．

>>November 7, 2007 at 12:17:52 PM GMT+8